٤
رواية مبعثر فيك : الفصل الرابع : شردت مهره من نافذة السياره .. وكانت في المقعد الأمامي في سيارة سيف ..
بترجع معاه . لبيته ..
وسيف الصغير نايم ورى ..
من شوي .. بعد ماكلمها وقال بيمرها ..
كانت سندس وزينه جالسين ع الطاوله بره .. يشربون شاي العصريه ..
جات لهم بره وبربكه : سيف بيمرني ..اللحين .. وبروح ..
زينه بحنيه قامت لها وضمتها:
بعد قلبي .. ان شاء الله زواجة الدهر والعمر ..
سندس ضلت معطتها ظهرها وتشرب بالاستكانه بدون تلتفت ..
ابتسمت مهره بتأثر وبوست زينه :
بفقدك زينه .. عاد امانه .. لاتخلون الخميس تعالوا حفلتي ..
زينه وخلاص بتبكي ..راحت ضمتها من جديد .. :
اكيد يابعدهم .. واحنا نقدر نخليك .. الليوم بروح واطق لي هاك الفستان الزين .. فرحانه عشانك والله ..
بلعت مهره ريقها بغصه وتطالع ظهر سندس :
سندس ..بتجين صح ..؟!
مالتفتت عليها..
كررت برجا : سندس .. قولي لي انك بتجين .. ردي علي ..
زينه ببتسامه تدف مهره لداخل : بتجي .. غصب عنها .. روحي جهزي قبل يوصل سيف .. قلتي لجديده ..؟!
مهره باحباط وعينها على سندس :
قلت لها .. قاعده تطلع ذهبي عشان اخذه معي ..
زينه : تمام .. بدلي وحطي لك ميك اب خفيف .. يلا حبيبتي .
وهم في الصاله الداخليه .. مهره : تكفين زينه كلميها ..تسويها سندس وماتجي ..
زينه : يابنتي ماعليك منها .. يلا لاتتأخرين ع الرجال .. ويصير ممشاكم كله ليل ..
مهره : طيب زينه لبسي سيف .. في بدله كويتها له ع الكنب ..
زينه: ابشري ..من عيوني ..
مشت من عندهم .. وسندس .. تحاشت تكون موجوده لوداعها .. يالله وش قد زعلانه منها .. !!
اللتفت سيف عليها وهي شارده وحب يتحرش فيها ويطلعها من حزنها :
الوووو ..
اللتفتت وابتسمت بخفوت:
هلااا ..
سيف : وراه يابنت .. وش هالصمت .. قولي شي ..
هزت كتوفها وبحيرتها وضياعها : مادري والله وش اقول ..
اللتفت وعطاها نظره .. ومد يده لخدها.. قرصه :
قولي اي شي .. اسئلي .. صيري فضوليه .. شفتي بذا الطريق .. لو تامرين على خصوصياتي طرحتها لك بدون تحفظ ..
ضحكت :
مُصر ان ميته واعرف خصوصياتك ..
رفع حاجب :
والله يامهره .. اني اعرض عليك شي .. بتدورينه مع الأيام .. بس هي فرصه وبتقضي مع وصولنا ..
مهره : ياشيخ ..؟!
سيف وبثقه بنفسه : انتي الخسرانه والله . .
مهره بدلع عفوي :
باللهي لاتفكر اني كذا بتخرفن وبقولك تكفى .. الكلام هذا ..مثلا ً ممكن يغري نوف ..هيا .. بس انا لا ..
مد شفته ورفع حاجبه :
طيب وان قلت لك .. العرض ذا لم يسبقكِ عليه احد ..
مهره كذا تكت كوعها على التنده وتتكلم :
تبي تقنعني .. انك ماتجاوب على فضول زوجاتك .. من قبل ..
هز راسه نفي : لا .. !
مهره تبي توقعه: يعني لما تجي من نوف وتقوولك هيا .. وش عشتك نوف ..؟! .. ماتقول ..
سيف : ابد .. مالها دخل .. كل وحده لها حياتها الخاصه ..مالثانيه حق انها تعرف ..
مهره : طيب تمام .. خلينا من عشى نوف .. لما نوف تقولك .. وش لبست وانت رايح لهيا .. رسمي شماغ وكذا .. ولا كاجوال .. تجاوب ..
ضحك : يهمك تعرفين .. ؟!
مهره : ايش اللي يهمني . انا اضربلك مثال ..تجاوب على نوف ولا ..
سيف بمكر :
ماجاوب على نوف.. بس لوتسئلين اللحين هالسؤال بجاوب ..بما اني معطيك الضوء الاخضر ..
مهره : طبعا ً ماراح يهمني .. اسئل .. هذي خصوصياتك اللي ماتعنيني ..
سيف : بس يمكن خصوصياتك تعنيني .. فلازم تجاوبين .. لو سئلتك ..
مهره :بالله .. اضف لشروط هالزواج ماحد له دخل بخصوصيات الثاني ..
سيف ببرود وابتسامه طالعها بجنب عينه :
طيب خلينا نجرب ..لابسه قميص او بادي .
مهره بنص عيون : ايش دراك يمكن فستان ..
سيف بمكر ..: شفتك لابسه بنطلون جنز . بين وانتي تركبين ..
مهره توسعت عيونها :
مااااشااء الله ..!!!!!!
سيف : واللحين جاوبيني .. بدي .. ولاقميص..
مهره ..:
وانا قلت مالك دخل في خصوصياتي .. لازم تلتزم بالشرط ..
سيف : بس انا ماوفقت عليه ..
مهره تتسند وتتكتف : اجل انتظر اللي بيجاوبك ..
سيف وبدون مقدمات .. سحب عباتها من فوق بخفها .وفتحها .. وقبل تستوعب .. سحب بلوزتها من فوق ..
والقى نظره :
قميص .. كنت متوقع ..
شهقت وهي تضرب يده وتضب عباتها : سييف ..!!!!
ابتسم وهو يرجع يركز في الطريق :
ماراح انتظرك تسمحين لي بخصوصياتك .. لابغيت اعرفها .. جاوبي ولا اعرف بطريقتي ..
تكتفت .. واسكتت ...
حس ان مزاجها تغيير .. وقفلت .. تنهد :
مهره .. ياخي ابي افهمك ... والله قصدي . احرك جوك .. واغير مودك .. وراه زعلتي ..
مهره بخفوت :
مازعلت .. بس فاجأتني ..
قالت كذا وهي تضب صدرها ..
سيف ربت على راسها :
دعابه يابنت .. لاتصيرين قفل ..
مهره :لاتنسى سيف اني كنت زوجة اخوك ..
سيف .. كذا تغيرت ملامحه وبعصبيه .. فاجئ مهره :
كنتي .. مهره كنتي .. فعل ماضي ..بس الواقع انك زوجتي اللحين انا .. انتي اللي انسي انك كنتي زوجة اخوي ..
توسعت عيونها :
بالله .. كيف انسى .. تراه اسباب زواجنا هالسبب ..
سيف وهو يسوق :
ممكن سببك انتي .. والعايله .. بس انا لا .. انا تزوجت عشانك .. ولا انا وش يعنيني اذا ربى سيف عند ابوي .. او عندك .. الولد له مني مايقصره شي .. من دريت انه ولد اخوي ..لمن آخر يوم بعمري ..بس في شي في نفسي مارضا انك تنظلمين .. حاجه بروحي مو راضيه انك تضلين مع جده اخذلتك .. ولا راضيه ان ابوي ياخذ ولدك ..
قبل هالعقد ممكن اي شي يصير .. وماكون راضي فيه .. بس مالي حق امنع .. اللحين لو ابي .. شلتك من البيت انتي ولدك .. وعشتي بعيد عن الجميع .. حتى لو ماكون معك .. بس ابن امه يمنعني ..
تأثرت وهي تهمس : ليه سيف .. ليه تسوي كل ذا عشاني ..
سيف :
شوفي انا دعمت عساف اول ماراح امريكا .. ابوي طرده .. لان عساف كانت بوادره دمار .. حاولت معه .. وكان يوعدني بالتغير .. وسوا مشروع .. وكنت ادفه ماديا ً .. انقطع عن التواصل معي كثير .. وكان يتصل احيان اذا احتاج .. ماكنت ادري .. عن حياته وش يسوي بالضبط .. ولا حتى وين ساكن .. ومن معه .. ابوي عنده بيت بامريكا ..كنا نروحه احيان .. نجلس فيه خلال شغل .. شي .. رحت كذا مره .. واكون متوقع انه فيه .. بس مع الأسف .. ماكان يجي فيه ..وذا دليل ان عساف فلت مره وحده .. ادري انه مدمن كحول .. وان راعي خرابيط .. وادري انه دفش .. وباختصار عساف سيء في التعامل .. مع اني الوحيد اللي كان يحشمني .. بس مو معناه انا بأيده .. او بكون في صفه .. فابناء على طريقة زواجك التقليديه .. منه ..اقدر اخمن انك انصدمتي فيه .. فايليت تنسين الايام الصعبه معه .. وانا الله يقدرني واسعدك ..
توها بتتكلم وتعترض.. قاطعها:
ماراح اخلف وعودي معك .. متقبل وجهة نظرك ومع انك حلوه يامهره .. الا اني انسان مسيطر على مشاعري .. ان ماجابني الحب لك .. ماراح يعميني جمالك .. ذا وعدي لك ..
مهره احمرت .. وقلبها يخفق .. رفع حاجب .. وطالعها بجنب عينه :
بس هاا .. الواقع انك زوجتي ..
مهره شهقت وبانفعال :
انت مثل اللي يوديك البحر .. ويرجعك عطشان ..
ضحك : ايه عشان ماتأمنين شري ..
توعى سيف وناداها .. ويقول انه جوعان ..
سيف : اووووه تصدقين نسيته ..
مهره خذت حليب من شنطتها .. وراحت لفت بجذعها لورى عشان تعطيه ..:
حبيبي انت ..اشرب فديتك ..
سيف وقربها .. بهالطريقه اربكه .. كانت ريحة العود بشيلتها .. وعطرها .. كفيل بلحظة سكينه حلت على روحه ..
سيف: وين اللوح ماما ..
مهره : بيت جدي سعود ..
شهق بسعاده ويقول : فالس .. (فارس)..
ابتسم سيف ..
ومهره قالت : ايه فارس هناك بعد ..
وارجعت جلست .. :
كيف مع فارس هوو ..
سيف : ممتاز .. يعني لو مستقبلا ً.. هاجرنا من بيتنا .. بتكون عندنا أسرة .. متحابه ..
مهره بنص عيون :
ومن قال بهاجر معك .. انا بقعد مثل السدره بيت عمي سعود ..
سيف : تمام .. عاد من قال اني اطمح اهاجر مع وحده مزاجيه .. متخبطه هي نفسها ماتعرف وش تبي ..
شهقت وسوت نفسها متأثره :
طعنتني بدون سكين .. ! .. تقصد اني .. ماعندي قرار .. واني مطفوقه .. قلها ع بلاطه ..يعني موافقتي على هالزواجه .. طفاقه ..
سيف بثقه:اتوقع انه القرار الصائب الوحيد .. اللي اتخذتيه في حياتك ..
فجعها : إيششششش ..؟!
..........
وصلوا وبعد استقبالهم ..
صعدوا عشان يبدلون وينزلون للعشاء..سيف راح غرفته وهي غرفة عساف ..
دخلت .. وكانت الخدامه ترتب في ملابسها بالدولاب اللفاضي ..
دارت بعيونها .. في المكان .. ارتاحت حيل .. لما شالوا كل شي يخص عساف منها حتى الصوره الكبيره تبعه ..
رتبوها بمفارش جديده حلووه .. بالوان دافيه وناعمه ..
تنهدت بارتياح .. الخطوه هذي .. اسعدتها .. ودعمتها نفسيا ً للحياه الجديده .. !
بدلت ولبست فستان ناعم .. وحزام جلد .. فكت شعرها .. وميك اب خفيف ..
طالعت نفسها .. وهي تتعطر ..
انتبهت لجيبها .. الواسع شوي ..وراحت ضبطته وهي تتخيل حركته بالسياره ..وردت خدودها..
وقفت بنص الغرفه .. محتاره ومستحيه .. تنزل كذا .. او تحط عليها شال ..
تنهدت وخذت جوالها .. وطلعت .. انصدمت لما لقت سيف واقف متسند على الجدار المقابل .. وعينه في الجوال .. والواضح ينتظرها ..
رفع عينه لها .. كيوت وناعمه.. ارتبكت :فكرتك نزلت ..
سيف :قلت يمكن تستحين .. تنزلين لحالك .. فقررت انتظرك ..
خذت الباب وسكرته ..
وراحت جهته ..ومبينه مرتبكه .. وعينها في الأرض ..
سيف عينه على ملامحها .. ويوم وقفت قدامه .. قالت :
سيف زين شكلي كذا .. ولا احط شال على راسي ..
ابتسم .. ومارد ..
رفعت راسها وتلاقت عيونهم ..
همس : كنتي تلبسينه عشاني في البيت .. اللحين من تلبسينه عنه ..
بخفوت : مادري ..
سيف: من متى كنتي تدرين عن شي ..
توسعت عيونها : لاتسوي نفسك عرفتني من يومين..
رفع حاجب وبرود: تمام لاتعصبين ..يلا ينتظرونا ع العشا ..
مشت معه وهي تقول : الغرفه تجنن .. غيروا كل شي .. تصدق ..ماكنها غرفة عساف..
سيف بهدوء وهي تمشي جنبه نازلين :
غرفتك هذي .. ماعادت غرفة احد قبلك .. ولو في شي تبين تغيرينه عطيني خبر ..
ابتسمت وهي تقرب منه وذراعه يلامس ذراعها :
سيف .. شكراً..
بلهجته الحلوه : على ..؟!
كانوا وصلوا تحت ..سكتت ..
بهدوءه: قولي مادري ..
ابتسمت وناظرته: لااا .. أدري ..شكراً على كل شي..
ثواني مرت فيها نظره عميقه ..
قطعها سيف الصغير .. وهو يسحب فستانها :
ماما .. قتوه .. ماتت ..
نزلت عيونها له : هاااا .. شلون ماتت ..
سيف وهو يفهمها وبيبكي:
ابي قتوو . فالس .. قول لي .. ماتت ..
ضحك سيف وهو يشيله :
يكذب عليك ..
سيف بقهر : ابي قتوو..
راح سيف ناحية الجلسه .. ومعه مهره .. وقال : فااارس .. ؟!
فارس يلعب قيم بجواله : هااا ..
سيف : وين شيلي .. جبها لسيف يلعبها ..
فارس : شيلي شكلها حامل .. اجيبها للورع الدفش ذا بتسقط ..
بلقيس : يالكذاااب .. مين الحامل ..
فارس وعيونه بالجوال :والله مشغووول ..
جلس سيف .. :
قم جبها .. تجمل مع ولد عمك يلد ..
فارس :بغرفتي .. ناد سونا تجيبها ..
بلقيس : سونا مع امي في المطبخ ..
فارس: قومي انتي طيب ..
بلقيس : اللحين انا اللي اشتغل في هالبحث .. اقوم .. وانت يالفاضي .. ماتبي تقوم ..
سيف : فروس قم استح على وجهك .. سمي ابوك ياحيوان .. المفروض طلباته مجابه ..
سيف جالس في حضن عمه ويطالع فارس ..ويترقب انه يقوم ..
رفع فارس عيونه له .. وطفى جواله .. وظل يناظره .. بعدين قال :
بجيبها .. بس لو مشعتها مثل هاك الليوم بمشعك ..وانتف شعرك ..
مهره كانت واقفه : سمعت سيف ..ماتلعب بشعر القطوه .. هاك الليوم قامت تصيح ..
سيف : احبها قتووه .. ابيها ..
قام فارس : طيب قم نجيبها ..
نزل من حضن سيف وتمسك بفارس وصعد معه ..
وهو يهدد فيه .. وسيف يتمسكن .. وانه بيصير عاقل ..
مهره : انا بروح اساعد خالتي ..
مسك يدها وسحبها جنبه .. وجلسها :
خليك ..
بلقيس ابتسمت ..: هناك سونا وجودي .. مع امي .. تدلعي ياعروستنا .. وش يوديك المطبخ ..
مهره بتسائل : وينها جمان .. ؟!
بلقيس : جا شاهين خذها .. تعرفين بيان مدرسه .. مايمديها تظل اكثر ..
مهره : ايوووه .. الله يعينها ..
سيف رجع راسه على ورا واسنده ع الكنب .. وغمض عيونه ..
وظل ساكت وباين تعبان ..
بلقيس تطالعه بحنيه ..
مهره حست ان فيه شي ..اشرت لبلقيس .. بكلام صامت : وش فيه .. نايم ..؟!
هزت راسها نفي .. وهمست : تعبان .. لانوو ..
وكملت بس مافهمت عليها مهره ..
عقدت حواجبها ..واشرت (وش ..مافهمت؟! )
بلقيس اشرت بجوالها .. وافهمت مهره وافتحت الواتس ..
كتبت لها : (سيف يصدع حيل في الطرق الطويله بالسياره .. هو كذا من توفت نجود بالحادث في طريق الديره ..) ..
فتحت مهره عيونها متأثره .. وهي تطالع بلقيس .. بعدين اللتفتت عليه .. وهو على وضعه ..
وحاط ذراعه على عيونه ..
بلقيس شالت الاب واشياءها .. وهمست: بصعد الاغراض وانزل ..
ورقت ..
مهره ظلت تناظر سيف .. مايتحرك ..لدرجة فكرته غفى .. وضعه وهو مغمض ترك لها المجال .. للانغماس في ملامحه .. (وسامته شاهقه .. وانا معرضه للسقوط .. هل من حبل أمان يشدني.. !)..
همس بدون يفتح :
ترى اشوفك ..
ارتبكت وهي تناظر الجوال ..كانها تتصفح فيه .. وقالت : هااا .. كيف يعني ..
فتح عيونه .. وطالعها بنص عيون وطالع جوالها:
طيب اذا كنتي بتمسكين الجوال مقلوب .. ع الأقل حطي التدوير التلقائي ..
غمضت عيونها بقوووه .. من الفشله ..
ابتسم :
خلاص ماكني انتبهت ..
تنهدت واللتفتت عليه : وش فيك سيف .. باين تعبان ..
عيونه كانوا مرهقين .. وداكنين .. دعكهم باصابعه:
مافيني الاالعافيه ..
مهره : صدااع ..؟!
سيف تنهد : اشووي ..
: اجيب لك بنادول ..
: خذت فوق .. شوي ويخف ..
مهره قلقت عليه وانشغلت .. وهي تسترق النظر له كل شوي .. وهو يشتغل على جواله ..
رفع عينه لها وكانت تطالعه ..ابتسم :
والله يخف .. انا رفقه مع الصداع من سنين ..
مدت شفتها .. وبتردد :
طيب طفي الجوال .. لأن راح يزيد مع تدقيقك ..
هو : شغل مهم .. والله ..
: ماراح يطير ..
ضحك ومبين عليه التعب :لا يطير ..لازم اعطي مدير اعماالي .. بعض التفاصيل .. في شروه تهمني .. وهو اللي بيقوم فيها بغيابي..
مهره بسخريه : مدير اعمالك ..!! شوي شوي يابراد بيت ..
توسعت عيونه وضحك : كنه ماهو عاجبك ..
مهره : لاماهو عاجبني .. انت ايش شغلك بلندن عشان يكون عندك مدير اعمال .. تمثل ..؟!
سيف : ياشيخه ..!
مهره : ايه وضح لي ..!
سيف : مو بس الممثلين والفنانين اللي معهم مدرة اعمال .. ابوي مثلا ً مدير اعماله .. نواف اخوي .. وهادي..
مهره : بالله .. وليه ماصرت انت مدير اعماله .. مبسوط على خيبتك ..
سيف ضحك وبدهشه: وش دخلني بشغل ابوي .. هو له مجال وانا لي مجالي .. من زمان وانا مستقل بنفسي عن ابوي ..
مهره بنص عيون وسخريه : ياعصااامي ..!!!
سيف : عصامي وغصب على خشمك .. مو مثل اللي عندها شهادة احياء وتطارد تبي تشتغل في مختبر ..
شهقت .. كنها مطعونه وتمسك قلبها : جرحتني .. ياقااااسي .. ترى شهادتي قويه .. بس الحظ مقصر ..
سيف : بالله حد يدرس احياء .. وش كنتي تسوين .. تشرحين ضفادع .. وتحنطين صراصير .. ايش هالميول ..
مهره تدافع : والله التخصص حلوو وممتع .. انا احب الحيوانات .. والطبيعه .. انت وش عرفك عاد ..
سيف ومستمتع وهو يسولف معها كذا مباشر .. مو بجوال .. ولا متغشيه..
قال : تبين تقنعيني هذا الشي الوحيد اللي تحبيه .. ؟!
مهره : لحووول .. لاتكرهني بتخصصي .. شوف في اشياء احبها .. واحب ابحر فيها .. بس مافي لها تخصصات هنا .. فانا اكتفيت باني اتعلمها بنفسي واقرى عنها كثير ..
تسائل باهتمام ..: مثل ايش ..؟!
مهره بلعانه: مالك دخل ..
سيف :هين يامهره .. ؟!
هي : طيب انت .. وش ميولك .. وش درست .. وش شغلك بالضبط ..
رد بنص عيون : مالك دخل ..
مهره كذا مو مهتمه .. وتاخذ مكسرات تقشمها :
ترى ماراح اترجاك ..
سيف: وحتى لو ترجيتي ماراح اقوول ..
مهره تكسر اللوز باسنانها: يااااخبر الليوم بفلوس .. بكره ببلاش..!!
.......
وليد يطالع التاج ع الطاوله .. ومعه اوراق وتعهدات ..
من بين اسنانه :
وهل انتي مجنونه .. لتفعلي ماطلبه منك .. كيف اخرجتيه واتيتي به ..
ماريا واقفه ومتكتفه :
لقد كان مُصر .. لو لم افعل ذلك .. لطلب من آرثر فعله .. انت تعرف سيف .. لن يتوقف على رأيي او رأيك ..
ضرب وليد الطاوله :ماريا لاتتصرفي وكأنك حديثه في هذا المجال .. اخراج مثل هذه القطعه من الدوله .. قد يؤدي لمسائله قانونيه ..
ماريا بانفعال:
القطعه لاميره المانيه بروسيه .. ليست من بريطانيا .. اعرف ما افعله .. ثم ان سيف اخيرا ً يتصرف بشكل دافئ .. وخاص .. لندعمه وليد .. لقد باتت العناكب في قلب هذا الفتى ..
وليد ضغط على جبينه .. وغمض بقووه :
كيف سترسليها بالشحن ..؟! ..
ماريا : لقد اخبرني سيف ما افعله .. سأرسلها بفاتوره .. معتمده من احد محال الالماس ..هي والثوب .. سأقوم بتأمين ايضا ً.. صدقني سيصل ..
وليد بانفعال: اللعنه على التأمين والتعويضات .. قيمة التاج ليست ماديه ماريا .. تاريخه فوق القرن ..
ماريا راحت جلست جنبه وضمت ذراعه :
وليد انت جدي اتجاه هذه الامور لعملك في ادارة المتحف .. لكن الواقع .. استخدامها بهذا الشكل.. هذا مايجعل لتاريخ تلك القطع امتداد .. فلنقل ان العائله الملكيه البست ابنتها سيسلي ..هذا التاج ..في حفل زفافها قبل قرن .. سيف يفعل ذلك الان .. وكأن التاريخ يعيد نفسه .. اختاره لمناسبه تُخلد .. فالندع الفتى يقوم بذلك .. ثم انها قطعه ليست ملك المتحف .. هي ممتلك خاص بسيف .. وهو حر بالتصرف بها ..
وليد بعصبيه : انتي متفائله جدا ً بالنسبه له ..
ماريا ابتسمت : وانت فعلا ً متفائل .. الم تدعم موضي في هذا القرار ..
وليد : ماريا .. سيف يقوم بهذا الوضع الخاص بدافع .. اسعاد الفتاة فقط .. لانيه له بالتقرب والحب ابدا ً..
داعبت خده باناملها :
ومع ذلك .. هو يقوم بتصرف غريب عليه ..
تنهد :
سأساعدك على ارسالها .. ليس لأجله .. بل من اجل تفاءلك ..
ضمته بسعاده : حبيبي ..
......
نجود: طيب انا ابي اروح ..احس حيل واحشتني الديره .. وعماتي ..
سيف : برد نجود والديره تلقينها ثلج.. فارس على طول بيمرض ..
نجود ومصره تروح : لاا اصلا ً فارس بخليه .. اتفقت مع امي موضي وبتخليه معها .. هي اوب رايحه ..
سيف بعصبيه : نجود من جدك .. كيف يطاوعك قلبك تخلينه .. متعلق فيك ..
نجود واصرارها الغريب : طيب شلون اقطع الوصل مع اهل ابوي .. دامك بتروح انت وشاهين بروح يعني بروح ..
سيف .. : وانا مابيك تروحين خلك مع فارس ..
هي بعناد : سيف ترى اول تروحون وتجون انت وشاهين بس ..اللحين فيه نجود .. وبروح ..
كان مايبيها تروح ..!!
كان بيكنسل الروحه بسبب شعوره والضيق اللي جاه من اصرارها ..
بس توسلته وترجته .. انها مشتاقه لجدها وجدتها .. وراحوا ..
وسبحان الله .. لاشافت الجد ولا الجده ..
كان غفى. .وغرق بهلوسة الماضي ...فتح عيونه .. وتنهد بثقل في قلبه ..وراسه مو راضي يفك الصداع منه .. جلس ونزل رجوله في الأرض .. وضغط على راسه بقووه . .خذ بنادول.. وشال بكت الدخان وجواله .. وطلع من الغرفه وجناحه كله ..
جلس في الصاله الفوقيه ..
ولع له زقاره .. ونفخ الدخان وهو يرخي راسه لورى ..
هدووء وظلام الا من بعض اللمبات البسيطه ..
توه بينفض الرماد في الطفايه .. الاشاف ايباد سيف المكسوره شاشته ..
ظل يحدق فيه .. بعدين فتح جواله واتصل .. ردت بخفوت : هلا ..
سيف : نايمه ..؟!
مهره : لا والله جالسه اقرا ..
سيف: طيب تمام .. اطلعي يمي انا بالصاله اللي فوق ..
ماعطاها فرصه ترد او تعترض .. قفل الاتصال ..
ظل شوي الا انفتح باب غرفتها .. ومارفع راسه .. سمع خطواتها .. وهي تجي ناحيته ..
وقفت على بعد مترين منه وكان شارد بنقطه وهميه .. بقلق: ماخف الصداع ..؟!
حرك عينه .. وطاحت على اقدامها الحافيه .. رفع نظراته لنص سيقانها اللي باين من البجامه الحلوه اللي لابستها .. واستغرب من الكنزه المفتوحه اللي عليها ..
قال: ترى صيف ..؟!
مهره جلست على الكنب المنفرد : انا اسئلك عن صداعك وانت تتريق على كنزتي ..
ابتسم :ماتريق والله .. بس ايش جوك ..
مهره : الغرفه بارده .. مره ..
بدهشه : من جدك من ذاك الليوم مافيه ريموت ..
مهره : قبل امشي كان فيه .. يوم جيت مادري وين حطوه العاملات بعد مارتبوها .. ماكتشفت ان الغرفه بارده حيل الا والكل نام .. عادي ترى البطانيه ثقيله .. بس انا ابالغ وابرد ..
سيف سكت شوي وبتسائل: وش اللي ماخلاك تنامين الى الان .. ؟!
مهره تنهدت :ارق .. افكر بكل شي .. ابي استوعب .. احس حياتي قاعد يصير فيها اشياء غريبه وسريعه ..يعني شفت لما عجوز تكون مرت بكل التجارب في سنينها.. انا احس خلاص كل شي حصل .. لو اموت .. اكون كفيت ووفيت..
سيف : بسم الله عليك .. جعل عمرك طويل ..
ابتسمت ومدت شفتها :
عساه اذا بيطول براحة البال .. ولا قبورنا اولى فينا ..
سيف نفخ الدخان : يائسه ..غلط ..
مهره : تبي تقنعني انك متفائل..
سيف بعمق وعينه على وجهها الجميل اللي يخلو من اي ذرة مكياج :
يقول افلاطون (الحياه أمل .. فمن فقد الأمل .. فقد الحياه )
مهره بلامبالاه :
يتفلسف ..
ضحك : اذا ماتفلسف افلاطون .. من يتفلسف .. انتي ..؟!
مهره : والله احيان الواحد .. يفقد الأمل .. عتامه ياسيف .. ونعيش .. مو عشان فيه امل .. عشان بس خايفين من عذاب الله لانتحرنا ...
عقد حواجبه: ايش اللحظات .. اللي بقى عندك بس الخوف من الله ..
مهره بشرود : سيف شفت لحظات اللي تحس تبي تموت ..هذا اللي بقى عندي شعور الخوف من الله ..
بس في لحظات اسوء ..مرحلة بعد موت عساف .. انا كفرت استغفر الله .. صار عندي قنوط .. سيف مرت فترة قمت ماصلي من الجزع .. الفترة ذي .. كان تمسكي بالحياه .. مو الخوف من الاخره .. كنت افكر بسيف الصغير .. لو انتحرت بيموت من الجوع والبكي .. ومامعنا احد ..هناك ..
انصدم .. :عطيني تفاصيل مهره .. ابي تفاصيل حياتك مع عساف .. كلها ..
مهره هزت راسها نفي وابتسمت بوجع :
خلي الجروح مقفله .. انتهت باللي فيها ..
سيف .. كان يدقق في ملامحها الموجوعه ..
وهي تدارك المها:
قلي كيف راسك اللحين ..؟!
سيف : ورب البيت الصداع لعب فيني .. غفيت شوي .. وكوابيس .. وهلوسه .. صحيت مو متحمل اظل بالغرفه ..
لاحظته مهره .. كيف مبين تعبان من عيونه:
طيب كان رحت الدكتور يمكن عندك الضغط مرتفع ..
سيف:لا .. احيان يمسك معي بس احسه طولها ..
وضغط بابهامه وسبابته فوق خشمه ..
مهره رحمته ..
قامت وخذت منديل فرته : خلينا نسوي اجتهادي .. ونشوف ..
وقفت قدامه .. ابتسم وهي تقول: ارفع راسك ..
: وش بتسوين ..
قربت المنديل من خشمه وبعد.. ضحك: خبله انتي ..
جلست جنبه وبترجي وهي تقرب يدها :
والله بينفع .. يلا سيف ..
هو يبعد يدها وماسك معصمها:
لااااا مهره .. وش دخل خشمي .. اعقلي .
مهره وتبي توصل لخشمه :
بنطلع الابخره من راسك ..
ضحك :تستهبلين ..
مهره: جرب .. ماراح تخسر،شي .. هي عطسه ..
خلاها بتردد وهو ماسك معصمها وهي تدقدق خشمه.. مهره بابتسامه وترقب ..
تغيرت ملامحه .. وهو يقول : بس خلاص خلاص. بس .. وصلت ..
وعطس عطسه كارثيه .. وتلتها ثانيه ..مهره تضحك :
طاح السقف علينا ..
سيف بيتكلم وعطس ثالثه ..
وهي تضحك..
وقفت عطساته .. ومسك جبينه .. جلست جنبه وبترقب : ها بشر .. تحس خف ..
رفع حاجب .. وطالعها بجنب عينه .. :
والله لو انه سحر كلها عطسه ..
مهره: والله تعطي مفعول .. اسئلني ..خلينا ننتظر شوي ونعيد ..
سيف : يعني انتي تبين تساعديني ..
هزت راسها ايجاب .ببراءه..
سيف : ابعدي شوي ..
بتقوم .. قال : خلك .. زيحي اشوي ..
سوت مثل ماطلب ..
فاجأها .. لما انبطح .. وحط راسه على فخذها ..ارتبكت وتلعثمت ..:سيف ..!
غمض عيونه في محاوله منه للاستكنان.. :
مهره .. مسجي راسي شوي .. تعبان والله ..
تأملت قربه .. وحرارة راسه على فخذها .. عينها على لمحاته .. وعينه اللي مقفله .. وقلبها يخفق بشكل غريب .. حتى انها حست بالنبضات اللي بوريد عنقها ..
رفعت يدينها لجبينه وبتردد حطت ابهاماتها في مقدمة راسه .. وهمست :
تمام .. بتخيلك جديده اجل ..
ابتسم ومازال مغمض .. وهي تمسج راسه وقال بخفوت :
وش معنى .. جديده ..؟!
مهره واصابعها في فروة راسه وتحركهم فيها :
انا امسجها كذا لو صدعت .. عاد جديده يوميا ً مصدعه .. ويبي لها مساج..
ابتسم وهو مغمض ومسترخي مع حركاتها :
اذا كذا بغير اسمي .. من سيف الى جديده ..
ابتسمت.. وهي ترجع تدلك جبينه وتمر على اعلى انفه .. :
عاد مو يوميا ً امسجها .. اغلب شي اعطسها وامشي ..
فتح عيونه .. وتلاقت بعيونها القريبه .. وهمس:
لا عاد انا ابي البند الثاني ..
مهره تحاول تتحاشى عيونه .. ومستمره .. بتدليكها المريح .. ومسكت شعرات راسه .. وتشدهم .. على فوق ..
ورجع غمض ..
*طوقتني انامل مهره