الفصل 50
*روايات وقصص يمنيه 📚🖋️*
*روايه [مـابيــن الحـب والـحــرب عـقـلــي جُــن بــک ]*
*بارت رقم [ 50 ]*
*اعمل توجيه للروايه لحفظها وتفاعل بايموجي لطيف لنستمر [ 📖🖊️]*
مراد:مالي نفس أخرج من بيتي بس عشان النسوان كم جهدهن يتحملين فجايع خصوصًا رغد قدهي سفجا بس كيف بنوقع كلنا ببيته معاهم بس خمس غرف وهو ومرته وعياله وبناته كيف بنوقع.
ناصر:والله مالي علم نسير بعدين نشوف حل ولو به هناك بيت إيجار نلقى بناجر وان شاء الله خير.
ابو مراد:يعني متى نسير.
ناصر:بعد يومين خلينا بهذي اليومين نرتب أمورنا.
ابو مراد:ان شاء الله خير بكلم عيالي والمره وانت كلهم زوجتك.
في الليل.
ابو مراد:ومافيها لو سرنا القريه عشان هناك اامن من هنا.
رشا دمعت:مانشتيش قوا يابه كيف نفلت بيتنا وكل شي.
شذا:ايوه وعاد نشتي ندرس التمريض قد لنا غايبات نص شهر من موت عمي.
مصطفى:خلاص معوضات مره ثانيه قدهو كلنا مابش جامعه ولا مهره ولا عمل.
مراد ضحك:بنسير القريه وندور لنا عمل في وادي وانتين عليكن نقل الماء والحطب اما ذلحين هناك شقى.
عهود افتجعت:يووو مانقدر نفعل هولا كلهن.
سميرة :انا خايفه على عيالي وبنسير القريه يعني نسير.
رشا:وعاد عندهم مابش كهرباء يووو كيف بنعيش.
رغد:ومدرستي كيف ومن ين اكون اتابع المسلسل الكرتوني حقي.
ابو مراد:الكهرباء انا قد فكرت اشل حقنا الطاقه الشمسية معانا والمدرسة نضيع سنه سهل المهم العافيه.
رشا ضبحت:ماعاد باقي الا نموت وبس اخرتها القريه.
عهود:والله مشتيش نسير بس الصدق هناك بعيد من القصف واشتي أولد بمكان بعيد من القصف والفجايع.
ابو مراد:خلاص اتفقنا جهزوا اغراضكم المهمه غدوه وبعد غدوه الصبح نتحرك القريه.
منير شهق:يووو يابه عاد النت به عندهم والا ماشي.
كلهم ضحكوا.
مصطفى:قلك مابش عندهم تغطيه سوا ولا هم يعرفوا النت ساعنا.
سميرة:احسن من هذا النت ذلحين نسينا عرس خالد وشذا ويحين يقع.
ابو مراد:اكيد في القريه.
شذا ورشا شهقين.
شذا:بالقريه مااااعه ولا صاله ولا شي والله ماسبرت.
مصطفى:خلاص خلوها براحتها بنتاخر بالقريه وترجع تقول زوجوني.
شذا:قلعك.
ابو مراد:ياسميره اطلعي قولي لاام علي وانا بحاكي علي وناصر قد بيتفق مع عياله وزوجته ونتحرك كلنا.
سميرة:تمام الان بطلع.
بعد ما اتفقوا كلهم اليوم الثاني بيجهزوا اغراضهم المهمه في الشناط كلهم.
رشا وشذا يبكين.
سميرة:بس بكاء قرحتين قلبي.
رشا:ظلم نخلي بيتنا ونروح القريه والله قهر.
شذا:نخلي البيت وذكرياتنا فيه وكل شي هكذا بكل بساطه.
سميرة:خيرة الله ولعله خير.
خرجين ذكرياتهن 'وذهبهن والملابس شلين اقل من النص لان معاهم كثير.
خديجه وخلود لفلفين حقهن وحق ناصر وخالد.
ايلاف ترتب بالشناط وتبكي على ابوها.
كلهم كملوا اليوم بالترتيب.
كملوا اليوم ترتيب وتجهيز الشناط.
وحزينين كلهم.
عهود خلصت ترتب بالشناط هي ومراد.
عهود طرحت راسها فوق رجل مراد:ع قهر نخرج من بيوتنا قد انا احب شقتنا كثير كيف بنعيش بالقريه وببيت واحد كلنا.
مراد بيمسح شعرها:مدري كيف بنوقع الله اعلم وخايف وقت تولدي والمستشفيات بعيده منهم.
عهود:ان شاء الله اولد في البيت وربي يسهل كل شي.
في شقة ابو إيلاف.
علي بيفكر:في القريه كلنا في بيت واحد ولا عاد خطبت خلود ولا شي والوضع مايسمح زواج ياليتني ماكلمتهم عن الخطبه لان بنوقع ببيت واحد واكون اوقع خازي كان لو مافتحنا موضوع الخطبه كان امكنهم ساع اختي اما ذلحين الانظار علينا والله انهي حنبه مدري كيف بنوقع ببيت واحد.
عند ايلاف تفكر:ببيت واحد كلنا مشكله وهناك تعب وقريه يارب نتخارج من هذي المشاكل والحرب.
عند شذا ورشا.
شذا:رشا تخيلي واحنا نسير الوادي ونفعل غداء لهم كلهم بنوقع كثير بالبيت بنضل في تعب.
رشا بتهم:يوو نسير الوادي ماشي بس يمكن يوقع حالي عساس واحنا برحله وان شاء الله الاجواء روعه في القريه ونكون نرقد بحين ونصحى بحين ومابش جامعه ولا شي بتتغير حياتنا تسعين بالميه.
شذا:غبني على حظي لوما عقدنا وتفجر المصنع ومات عمي وافتسخت خطبتش وبننقل القريه شوفي على حظ شكله مابش عرس نجلس هكذا معلقين.
رشا ضحكت:يمكن عرس القريه حلو نجرب بش ولو حالي عرس القريه نزوج الباقيين هناك.
شذا:تخيلي اعرس هناك واجلس فوق شنطه ساع نسوان زمان ومابش نقش سوا مابين أتخيل القريه شوعه قوي.
شذا:يااااااارب وهي خير لنا ونفرح كلنا هناك وننسى الهموم والأحزان.
رشا تنهدت:يارب وننسى قد نضحك والقلب موجوع.
كلهم كملوا ليلتهم بتفكير كيف بتكون حياتهم في القريه.
في الصبح الساعه 6:30.
كملوا اصطبحوا واتجهزين وخرجو الشناط ودعين بيتهم بدموع من يدري ايش ممكن يحصل بغيابهم.
نزلين السيارات.
سماح وايلاف مع علي بسيارته.
وسميره وشذا ورشا ورغد بسياره ابو مراد.
خديجه وخلود وعهود بسياره ناصر.
ومصطفى ومراد وخالد ومنير بسياره مراد.
خرجوا لطريقهم للقريه وزعلانين والبنات يبكين بس الشباب بالطريق بيضحكوا وينكتوا وناسيين الهم وتعب الطريق.
دخلوا القريه وكلهم عيونهم من طيق السيارات اول مرة يدخلوا قريه والبيوت مش كبيره واكثرها قديمه بس خضراء والوديان تفتح النفس.
الاطفال حق القريه عيونهم للسيارات ومستغربين من السيارات لانهم حلوات ومش متعودين.
سميرة:كم باقي ونوصل للبيت حقهم.
علي:باقي اقل من نص ساعه بيتهم بآخر القريه الان الساعه11 ونص هانت.
.
علي:باقي أقل من نص ساعه اخر مره زرت القريه كان قبل 11سنه.
شذا:يارب واحنا نرتاح فيها.
كلهم وصلوا باب البيت.
رشا شهقت:البيت قديم .
سميره:انزلي من السياره وانتي ساكته.
كلهم نزلوا.
ابو ايهم:اهلا وسهلا وارحبوا نورتوا القريه سلم عليهم.
ابو مراد:منوره باهلها.
"اعرفكم على هذي العائله.
وليد عمره56 معه ثلاث بنات وولد.
ايهم الكبير28 متزوج وعنده ولد عمره سنتين وزوجته منال .
سهام25 متزوجه من سنه طيبه وحبوبه ومرحه.
احلام19 تحب الوحدة ماتحب تنخلط مع الناس كثير وطيبه وضعيفه وكتومه ومعها هوايات كثيره واهمها القراءه والكتابه ملامحها بسيطه يعني حلوه وبشرتها بيضاء زيادة وخيالها واسع واحلامها كثيره وماعندها صديقات كلها كانت زماله في المدرسه بتتعرفوا عليها أكثر بأحداث الروايه.
الهام15 لقنه وطويلة لسان وكثيرة كلام وكسوله وتكره المدرسه عكس احلام.
الام عاتقه عمرها45 وطيبه."
نرجع لهم.
عاتقه:اهلا وسهلا وارحبوا كلكم.
منال:اففف منهم كثير عساس ناقصين.
احلام:منال اسكتي عيب لاحدا منهم يسمع اهلا وسهلا بهم.
الهام قلبت عيونها:جايين ببيت ابي مش ببيت ابيك انتي ولو ماعجبش تفضلي بيت ابوك.
منال ضبحت:قليله ادب وناقصه عقل.
الهام:يامنعاه سلفينا من عقلش ياقليله العقل ياعقربه.
احلام:الهام منال اسكتين الان بيدخلين الديوان عيب الصياح وعادهم وصلوا.
في الصاله.
سهام مبتسمه:نورتين كلكن.
خديجه:تسلمي ياقمر.
عاتقه:ادخلين الديوان عشان الرجال يدخلوا الصاله.
شذا ورشا وايلاف وخلود وعهود ورغد بس يتفرجين سكته وعيونهن لكل زوه بالبيت.
دخلين وتسالمين.
احلام سلمت وخرجت.
الهام:كل واحده تعرفني باسمها انا الهام اصغر واحدة.
سهام ضحكت:قولي اجنن واحدة خليهن يجلسين يفتهنين شويه.
الهام:خلاص بعد الغداء نتعرف.
منال تتبرقط وتاشر لالهام تخرج المطبخ.
الهام بضحكه:خذين راحتكن البيت بيتكن بسير المطبخ عشان زوجة اخي ماتقرح ساع البالون.
كلهن ضحكين ومنال ضحكت كذب وتتحلف فيها خرجين المطبخ كلهن.
خلود:شكلها جريئه.
خديجه:عادها صغيرة بتعقل.
شذا:بس باين طيبين.
في المطبخ.
منال:الله يلعنش ياالهامخ الجزمه شوفي ياعمه كيف تتحاكى عليا قدامهن.
الهام:ذلحين لاتتقارحي فوقي انتي كنتي تبهرري لي ساع الثور ماتقدري تسيري المطبخ الا بي عساس واحنا طباين.
عاتقه:الهااام الله يرضا عليكن مش وقتكن.
ايهم دخل:يله جهزين الغداء لوما نرجع من الصلاة قد بياذن واحنا بنجلس بالغرفه مش بالصاله ولو اسمع لكن صوت يامنال والهام بيوقع
.
يتبع ..
*لاتقصر بالتفاعل تقديراً للجهد المبذول [🔥]*