الفصل 40
*روايات وقصص يمنيه 📚🖋️*
*روايه [مـابيــن الحـب والـحــرب عـقـلــي جُــن بــک ]*
*بارت رقم [ 40 ]*
*اعمل توجيه للروايه لحفظها وتفاعل بايموجي لطيف لنستمر [ 📖🖊️]*
.
خديجه سوت له نظره لما وقعت قلبه ومشت هي وخلود.
فارس خازي ومش مستوعب الاحراج شل الدبله من القاع وخرج من المول.
خلود:شفتي يمه اقلش صايع.
خديجه معصبببه:خلاص اسكتي وامشي سكته.
خلود سكتت وفارحه بنفسها تصيح من الفرحه.
علي قرب منهن عساس انهو بصدفه شافهن.
علي:عمتي هنا كيف حالش ياعمه.
خديجه:احمد الله واشكره وانت مداك هانا ايش معك.
علي افتجع تشك فيه:هاه جيت اشتري لاامي هديه عشان عيد الام.
خلود بهررت له وتحاول تسبر الموضوع :هاه ما شاء الله عاد عيد الام بعيد يعني مش بعيد زيادة بس قدك من كثر الاهتمام باامك تعجل بالهديه.
علي حس انه ودف:هاه ايوه ايوه عشان الحرب قلت اشتري من بعيد.
خديجه:هاه تمام.
علي:تعالوا اوصلكم بسيارتي.
خلود مبتسمه باقوا قوتها.
خديجه:مابش داعي بروح مشي.
خلود ساكته.
علي:ماشي والله ماتروحي مشي وانا موجود بعدين جيتي مشي قد انتي تاعبه.
خديجه:وايش عرفك ان احنا جينا مشي.
علي ارتبك:ههههه الله يحفظش هاه يعني كيف عرفت ايوة ايوة حقش البالطو كله غبار وعرفت.
خلود قرحت ضحك ماعاد قدرت تسمك نفسها.
علي انحرج وضحك على الخفيف.
خديجه بهررت لخلود:بطلي ضحوكه بالمول الناس سايره جايه وانت هيا نمشي.
علي فرح:يعني بتمشي معي ايش رايش اضيفش اليوم على حسابي.
خلود:منك صدق ايش من ضيافه هذا الوقت.
علي:باقي نص ساعه لاذان المغرب نجلس اشتري لكن عصير وسكريم وكيك روعه هانا.
خديجه ارتاحت له:خلاص تمام خلني ابرد كما احسن يخرج من اذاني نار.
علي ضحك:حاضر اجلسين بطاوله تيه لوما اطلب وارجع.
خلود عيونها بتراقبه طوال الوقت وعلي نفس الشي( حب جديد😍) بعد دقايق رجع علي وبيده السكريم والمباشر الكيك والعصير.
المباشر:اي خدمات ثانيه.
علي:تسلمممم.
علي:هيا عوافي على قلبش ياعمه.
خلود اول شي بدات تأكله السكريم لأنها تحبه قوي ولها فتره مااكلت.
خلود محرجه من وجود علي.
علي جالس ينكت لهن ويضحك مبسوط وخلود تشارك قليل وخديجه بتضحك مرت النص الساعه عليهم كأنها ثواني.
خلود:بسير اغسل يداتي.
علي: وانا والكل.
خديجه:هيا بسرعه انا بمسح بمنديل وخلاص.
خلود وعلي ماشيين.
خلود بصوت واطي:علييي انتبه تقول لايلاف شي بقتلك خليها لهن مفاجأه غدوه بقلهن.
علي:حاضر المهم تلفوني خليه فوق السيارة قبل ما تنزلي.
خلود بعناد:مااااشي هذا بااحلامك..
علي بهرر:منش صدق.
خلود:انت بتشوف ودخلت مكان النسوان تغسل.
علي ضحك:مجنونه قلك ماشي بتدي تلفوني سارق محترم.
فوق السيارة كلهم ساكتين بس قلب خلود وعلي فيه ضجيح وفرحه.
وصلو باب البيت وهم بيقيموا الصلاه.
خديجه:اسلم الله يحفظك ياعلي.
علي مبتسم:ولو الله يحفظش.
خلود بيدها تلفونه كانها تضبحه.
علي:احم تلفون إيلاف ليش معش هاتي امكنها.
خلود بعناد:ماشي غدوه انا بسيره لها لاني محتاجته قوي.
علي:هاه سابر😡.
دخلين البيت.
خلود دخلت الغرفه بتتقفز من الفرح:يس يس هذا أجمل يوم بحياتي وتضحك حضنت الجوال حقه وقلبها يددددق وتضحك.
قامت توضت وصلت ورجعت للجوال فتحت استديو الصور وقلبها يدق تشتي تشوف صورة.
فتحت كل صورة ولقيت صور وهو بالجامعه وصور قديمه معه وهو بالثانويه رجعت تضحك رسلت كل صورة لجوالها بلوتوث تاملتهن كثير لوقت اذان العشاء طرحت التلفون يشحن وقامت تصلي.
خديجه في غرفتها بتفكر
( ذلحين كيف كنت بظلم بنتي فكرت انهو لمصلحتها كنت بدمرها ياربي لك الحمد اني عرفت قبل فوات الاوان). سارت لاعند خلود.
خلود مبسوطه:حيا بااحلا ام.
خديجه جلست قبالها:سامحيني يابنتي كنت بظلمش معه وانتي على طاعتي وافقتي.
خلود قربت منها حضنتها:انا فدالش لاتقولي اسامحش عارفه انهو مفكرة لمصلحتي.
خديجه ابتسمت:الله يرضى عليش.
خلود جلست قبالها ومسكت يداتها:تعرفي يمه كنتي بتغصبي عهود على ولد خالتي وزعلتي لانها تزوجت من مراد والان مراد مريحها وسعيده 'وباحسن حال.
خديجه زعلت:صدقتي الله يسامحني.
خلود دمعت:باقي شي يمه.
خديجه:ايش هو.
خلود:خالد وشذا يحبوا بعض يمه حرام تفرقيهم شوفي خالد مش راضي يتزوج ولا هي تقبل اللي يتقدموا حرام يضيع عمرهم كذيه.
خديجه بعناد:بس مشتيش بنت سميرة.
خلود:مافيها عمتي سميرة والله أنهي عسل وطيبه وكل شي فيها كم يمه تحكي عنش بالخير وتذكرش وقالت ان انتين تعرفين بعض من زمان.
خديجه:سميرة صدق قالت.
خلود:ايوة يمه خلاص انسي كل شي وانسي الحقد محدا عارف متى يومه ومتا يموت والدنيا حرب والموت مايرحم أحد الدنيا لله يمه وعمتي سميره والله طيبه قوي.
خديجه وقفت وساكته.
خلود:مالش يمه.
خديجه:ولا شي سكري الموضوع وخرجت من عند خلود.
خلود:الله يهدي قلبش يمه.
عند علي.
علي:ياايلاف ممكن تلفونش شويه اشتي اتصل منه.
ايلاف مسكت خصرها:احلمممم تخلص رصيدي بعدين ماترضا تعبي لي.
علي:غدوه بعبي لش بالف هاتي.
ايلاف:ماعه فيه أسرار مقدرش.
علي ضبح :ايش من اسرار ايش من خباله عساس بسير افحصه هو اتصال وارجعه.
ملاحظه لكل اخ وزوج( مش لازم اذا البنت حطت باسورد او ماجابت لك جوالها معناها معها شي المعنى معها صديقات مش ضروري انت تعرف سوالفهم او خصوصياتهم ارتقوا قليلا)
.
ايلاف:خلاص لا تضبح بس امانه لاتدخل الواتس والا استديو الصور.
علي:مثل اللي تشككيني انا واثق فيش مابش داعي ادخل ابعسس بخصوصياتش ومابدخل بنفسي هذي مش حركات رجال.
ايلاف ضحكت:انا فدا قلبك هيا الان اوعدني ترجع رصيدي الدنيا حرب وازمه.
علي:وعد بالف ريال.
مكنته التلفون ودخل غرفته اتصل لجواله.
خلود شافت الرقم:يووو ايلاف بتتصل لو ارد انا بتستغرب ذلحين لازم اجلطها.
خلود ردت وتغير صوتها :اهلا اهلا انا زوجه علي انتي مين مسجل ايلاف ممكن اعرف من كما اغار على زوجي.
علي تصنم وسكت عرف تشتي تمقلب ايلاف.
خلود ترقق صوتها:الووو لو سمحتي مين زوجي نايم.
علي قرح ضحك.
خلود سمعت صوته تغيرت ملامح وجهها😭.
علي وهو يضحك:هههههههه هيا زوجتي ليش خزيتي.
خلود اكتبدت من الخزا'هاه ماتوقعت انه انت باي باي.
علي:لحظه لحظه ذلحين ياام الصوت الرقيق متى ناويه ترجعي تلفوني.
خلود ضبحت:تتمسخر بس كنت ارققه عشان ماتعرف صوتي ايلاف.
علي ضحك:انا عارف ومااتمسخر والله انو عجبني.
خلود خزيت:طيب غدوه تلفونك بمكنه مع ايلاف.
علي:حاااضر بس ان شاء الله فال خير( يقصد لمن قالت زوجته).
خلود مافهمت:ايش اللي فال خير.
علي:ولااااشي يله مااطول عليش تصبحي على خير.
خلود ابتسمت:وانت من اهله.
عند خديجه بتفكر:ذلحين ضروري اخلص موضوع خلود وخالد قدهو اخبر.
خديجه:ياناصر اشتي اقلك شي.
ناصر:اسمعش تحاكي.
خديجه:خطبه خلود اشتي تنفسخ وبهذي اليومين كمان.
ناصر استغرب:ليش خير ان شاء الله.
خديجه ارتبكت:ماشي بس خلود احسها مش مرتاحه وانا الصدق ندمت وماعاد اشتي اناسب اخوتي او خواتي عشان لو شي مشاكل بين عيالنا ماياثر بيني انا وخوتي.
ناصر:اصلا انا مش مرتاح لهم بس قلتي موافقه والبنت قالت موافقه قلت بعدكن لكن أن شاء الله غدوه احاكي اخوش واشوف رده اخاف يزعلوا.
خديجه:اخي خليه عليا انا بتفاهم معه وبعدين انت زيد حاكيه.
ناصر:خلاص تمام ان شاء الله خير.
خلود فتحت الواتس:ياااابنااااااات غدوه بجي عندكن وبجيب معي كيكه وانتين جهزين العصير والجعاله وانا بجيب معي لفالف
( لفالف حلويات منوعه).
رشا:😳ليش مامعش بتعزمي نفسش.
كلهن رسلين ضحكات😂😂😂.
خلود:😂😂😂طرده محترمه بس برضو بجي وغصب عنش.
ايلاف:شكله موضوع معش ايش سر الاجتماع ذيه.
شذا:ايوه ايش معش.
خلود:خلينه سوووربراااايز( مفاجأه). ( عهود ماعاد تدخل النت كثير،). رشا:خلاص تمام قبل العصر وانتي هانا الوقت يمشي بسرعه نشتي نجلس سوا.
فجأه الكل سمع قارح.
كلهن نقزين ورجعين يكملين مجبر( ماعاد يفتجعين مثل اول تعودين على الفجايع). .
رشا رسلت:يوو
#يتبع...
*تفاعل لنستمر بتنزيل المزيد [🩵]*