الفصل 39
*روايات وقصص يمنيه 📚🖋️*
*روايه [مـابيــن الحـب والـحــرب عـقـلــي جُــن بــک ]*
*بارت رقم [ 39 ]*
*اعمل توجيه للروايه لحفظها وتفاعل بايموجي لطيف لنستمر [ 📖🖊️]*
رشا:ياشذا راشد قال بيتصل شكله فيه شي حاسه فيه شي.
شذا:مش حالي صوت قدهو رسايل وبس.
رشا:بس شكله زعلان ومهموم بس بعرف ايش فيه.
شذا:تمام قد انتي أخبر بس ان شاء الله انهي اخر مره.
عهود:اسكتين ارقد ساع الناس.
رشا😒:ليش انتي خليتي للناس نوم كل ساع نوم.
رسلت لراشد اتصل.
راشد اتصل.
رشا ماتكلمت منتظره يتكلم هو.
راشد محتار ايش يقول وبيجدم اصبعه ومتضايق.
رشا:الو راشد.
راشد تنهد:عيون راشد وقلب راشد.
رشا ارتبكت:ااءا كيف حالك وليش تتنهد مالك.
راشد:اااخ يارشا مدري أحزن على وطني والا على نفسي والا على من.
رشا دمعت:سلامتك من الحزن الله كريم بس ايش فيك.
راشد بينفخ بضيقه:ولا شي بس تعبان.
رشا افتجعت عليه اول مرة يتحاكى هكذا:سلامتك ايش فيك تعبان تحاكى اقلقتني.
راشد سكت
( اااخ يارشا ايش اقلك اهلي حالفين عليا ارجع عدن واتركك واترك كل شي هنا واروح واترك حبي واحلامي ومستقبلي ااااخ بس).
رشا قلقت أكثر ودمعت حست فيه شي:راشد تحاكى.
راشد:رشا والله العظيم احبك واقسم بالله احبك.
رشا نزلت دموعها:وانا احبك قلي ايش فيك.
شذا تاشر لها ايش فيه ورشا اشرت لها بمعنى لحظه.
راشد:فيني وجع شوفي كيف قد حال اليمن الجنوب تكره الشمال والشمال تكره الجنوب.
رشا بكت :من قالك الشمال تكره الجنوب الجنوب هم الي يكرهونا رضخوا للكذوبات وصدقو على الشمال ويفرحوا لوجعنا والله احنا مش كلنا نكره الجنوب ونبكي على عدن كما نبكي على صنعاء بس حسبي الله على من زرع الفتن بقلوب اهل اليمن.
راشد:لاتبكي يارشا دموعنا ماتفيد والجنوب مش كلهم يكرهوا الشمال بس بعض الناس الي ضميرهم مات هم اللي يفرحوا لوجع صنعاء والا مفيش مسلم يفرح لقتل اخوه المسلم صنعاء قلبي 'وعدن نبضي وانا في وسطهم هايم ومهموم.
رشا:خليها على ربنا والله يهدي الجميع ويظهر الحق ويبطل الباطل يارب.
راشد:يله غدوه اكلمش تعبان بأمان الله.
رشا:بأمان الله.
سكرت وهي مستغربه من كلامه اليوم.
شذا:مالكم ايش قال.
رشا حكت لها.
شذا:صعبه لأنه جنوبي وهو بالشمال واكيد أهله مابيخلوا له حاله.
رشا:اففف كيف متضايقه.
شذا:تحبيه يارشا.
رشا تنهدت:مش بس احبه قدهو إدمان وحب وكل شي يارب لاتحرمني منه.
شذا:لو قدر الله وافترقتوا بسبب الحرب ايش موقفش.
رشا دمعت:الله لايجيب الفراق مالش .
شذا تنهدت:الله لايطعمش الفراق لأنه صعب.
عهود قامت جلست:اديتين لي الحزن مالكن هكذا تفاءلين.
شذا:الله يسعدش ياعهود ربي وفقش بالحب بعد الزواج احلا شي.
عهود:الحمدلله ربي يحفظ لي مراد.
رشا تمددت.
.
رشا تمددت ونزلت دموعها بدا الخوف يدخل قلبها من شي يسمى الفراق
( الخوف من الفراق مع من تحب يحرمك لذة الحياة n_0💔).
بتفكر في راشد بكلامه بجنانه وبحركاته صوته شكله مشاكلهم اول ماالتقوا واول صدفه لهم بالجامعه ابتسمت ومسحت دموعها.
اليوم الثاني موعد فارس😍.
خلود:يمه انتي ماصدقتي عن فارس بس اليوم بثبت لش كلامي وانهو صدق صايع.
خديجه:حاضر وكيف يله انا اسمع.
خلود:اشتي تشوفي مش تسمعي اليوم بعد العصر بنخرج انا وانتي وتشوفي بعيونش وتتاكدي من أخلاق ابن اخوش.
خديجه:تمام بنشوف ياثقه مدري من بيضحك عليش.
خلود:تمام المهم قولي لابوي اليوم بعد العصر بنخرج للسوق وهناك بتعرفي وتشوفي.
خديجه:خلاص تمام.
بعد العصر.
خلود رسلت لعلي:الوووو... علي وينك مكن لي تلفونك.
علي:مع من امكنه اخرجي لباب بيتكم قبل امش وانا بمكنه مع اي جاهل.
خلود:تمام بس لو به رمز ابعده والا قولي ايش الرمز.
خلود:اسمش.
خلود:ماله اسمي.
علي:الرمز اسمش بالانجليزي😅.
خلود تصنمت شويه استغربت ليش اسمها قلبها بيدق:ليش اسمي.
علي:لانه يعجبني بس.
خلود بدأت تشك انه يحبها:اها اوك يله بتجهز.
علي:اوك الله معش.
بعد دقايق
خلود:هيا يمه بطلع وانتي الحقي بعدي.
خلود باب الباب اول ماخرجت علي قبال وجهها ابتسمت.
علي مكن التلفون مع جاهل.
خلود شلته ودخلت للحوش حقهم شافت خلفيه الشاشه قلوب حمراء فتحته الشاشه الداخليه ورد احمر ومكتوب جنبهن احبك.
خلود قلبها يدق:ايش قصده يعني ايش افف كيف انا خبلا يمكن بس ذوق وعجبوه الصور.
خديجه خرجت :يله مشينا.
خلود دخلت التلفون بالشنطه ومشت مع امها طبعآ مشين مشي لانه مش بعيد المكان اقل من نص ساعه ومابش محرم عشان يطلعين تكس واقنعين خالد يخرجين مشي عشان مايشلهن بسيارته ويعرف عن فارس ويتضاربوا.
وصلين المول
( طبعا المول فيه مكان لشرب العصير والشاي والوجبات الخفيفه بس عادهن بعيد شويه من المكان هذا لأن المول كبير )
خلود خرجت التلفون فتحت الواتس بتدور اسمه حصلت اول اسم حلمي البريء شافت خلفيتها فيه دخلت وانهو رقمها😳.
( بتحاكي نفسها ليش مسميني كذا يعني ايش ياربي ليكون اللي في بالي صح وعلي يحبني ).
قاطعت تفكيرها خديجه:هيا مالش مطننه وينهو.
خلود:هاه ايوه لحظه لقيت اسم فارسه البقرة ضحكت كيف سما فارس.
خديجه:هذي البنت بتجنني ايش يكركرش هيا والله لااروح.
خلود:الآن الآن شوفي وقت ارسل له.
خلود رسلت:الووو... باي مكان انت
فارس على طول فتح لانه منتظر:بمكان..... بسرعه ياقلبي تعالي.
خلود رسلت:الووو... باي مكان انت
فارس على طول فتح لانه منتظر:بمكان..... بسرعه ياقلبي تعالي.
خلود:شفتي يمه بس لحظه تشوفيه قدامش.
رسلت له:ايش لابس عشان اعرفك على طول.
فارس:بنطلون اسود وقميص ابيض وجاكت اسود قبال ال.... بالضبط.
خلود فرحت:خلاص قربت دقايق واجيك.
خلود:هه شفتي الرسايل باقي تشوفيه.
خديجه بدات تصدق:بسرعه اشتي اتأكد.
(علي بيراقبهن من بعيد وخلود مش عارفه انه لحق بعدهن).
خلود مشت هي وخديجه قلبها يدق من الفرح.
بيتلفتين.
خلود شافته من بعيد شوي وفرحتتت:يمه شوووفيه وايش لابس هذا هو فارس .
خديجه حست انه خرج من اذانها دخان.
خلود:لحظه بزيد ارسل له كلمه واتاكدي.
خلود رسلت:فارس ممكن توقف لاني اشوفك من بعيد اشتي أقرب منك🙈عشان اتأكد.
فارس:من عيوني ياعيوني احبببك.
خلود تبرقطت:هيا شفتي ووقف كمان.
خديجه قد هي معصبه:ذلحين تأكدت والله ماتزوجتيه الكلب.
خلود قلبها طار من الفرحه:يووو انا فدالش يمه.
خديجه:بالاول حق من هو التلفون ذيه مشهو حقش( تقصد حق علي)
خلود:حق إيلاف هي الي اختبرته
( يووو وقت يعرفين البنات بالقصه وانا ماقلت لهن ).
خديجه الحقي بعدي انا فدالها إيلاف عرفتي فارس على حقيقته.
خلود قدهي تتحكول بعد خديجه.
وصلين لطاوله فارس.
خديجه وعيونها مبهرره عصبيه:فارس ايش بتفعل هانا.
فارس شافهن وقع قلبه:هاه ااءا منتظر صديقي.
خديجه فعلت له كف كل الموجودين التفتوا لهم.
فارس بهرر:ليش هكذا.
خلود بسخريه:انت ولا كلمه يانذل الحمدلله عرفتك قبل اودف فيك يا شطور جايي تقابل بنت هنا وتغازل ولا كانك ابن ناس يامحترم.
فارس ارتبك:ماهو هذا الكلام من قالكم كذب.
خلود خرجت التلفون وفتحت المحادثه:وهذي المحادثات لمن.
فارس انحرج من خديجه وخلود.
خديجه:والله ماتسوا جزمه بنتي افتكرتك رجال وسلمتك بنتي بس خلود مش من مستواك السافل.
خلود خرجت الدبله من يدها ورجمتها لوجهه:وهذي حقك الزفت روح بيعها واشتري رصيد وهدايا لبنات الشوارع الي مثلك.
فارس اكتبد وماتجرا ينطق بكلمه.
علي بيشوف لهن من بعيد وطاير فرح على نجاح خطته وتخلص خلود من فارس.
خديجه:حسافه ان انت ابن اخي حسافه على تعبه في تربيتك خزيت بنا الله يشلك انت وذا الكشه
( الكشه الشعر الي منفوش ومش مرتب )ساع حق الحيوانات وحسابك عند اخي يربيك من جديد .
خلود مسكت يد خديجه:خلاص يمه مايستاهل تفقدي اعصابش على شانه.
خديجه سوت له نظره لما وقعت قلبه ومشت هي وخلود.
فارس خازي ومش مستوعب الاحراج شل الدبله من القاع وخرج من المول.
.
يتبع ...
تفاعل لنستمر فتفاعلك يساعدنا بتكبير القناه 🎀