الفصل 14
*روايات وقصص يمنيه 📚🖋️*
*روايه [مـابيــن الحـب والـحــرب عـقـلــي جُــن بــک ]*
*بارت رقم [ 14 ]*
*اعمل توجيه للروايه لحفظها وتفاعل بايموجي لطيف لنستمر [ 📖🖊️]*
رغد وهي تتشنهج:منير تصايحت انا وهوه وامي خلتني اعتذر هو بدا يطابز ذلحين اشتي تخليه يعتذر لي ساع مااعتذرت امي شريره خلاص.
منير:ما شاء الله والفلم الهندي
علي ضحك ويتحيلا لها:خلاص ولا تبكي وانت مادخلك من بنتي يله اعتذر لرغد.
منير عصب:من جدك تتحاكى يابه قد انا رجال بالثانويه وتشتي اعتذر لها شي معك خبر كما تدلعها زياده والله مااعتذر ولا ادعسها دعس .
علي:الله الله من متى طلع لك لسان.
منير:من حن زيدت لها الدلع احنا كلنا عيالك الصدق انا زعلت منك يابه.
سميره:اسمع وبطل الدلع لها هو رجال واكبر منها ومايصلح ترد عليه انا مشتيش البنت تتعود على المرادده لاخوتها شوف رشا وشذا وقدهن نسوان ولا عمرهن ردين على اخوتهن الا وهم يتمازحوا لكن وقت الجد ولا تسمع لهن نخس وانت تدلعها على بلانا الصدق ماعاد عجبني دلعك لها.
علي:شكلش بلعتي راديو من الصبح هيا ايش من دلع انا عارف منير مطابز.
سميره:وهي طويله لسان ولاتعودها ع المرادده بعدين تكبر وماعاد تحترم لا صغير ولا كبير ويقولوا لعن من ربتها.
علي حس ان كلام سميرة هو الصح.
علي:خلاص صار خير وانتي لا تكونيش تردي على اخوتش.
منير تهنجم وفارح.
رغد زادت بكت امي من صدق شررريره تعلمك عليا ودخلت الغرفه تبكي.
سميره هيا اسمع للدلع حقك قدي تقول لامها شريره.
علي بيضحك:سهل تكبر وتعقل.
دخل الغرفه ورغد تبكي وطارحه رأسها بين ارجلها.
علي:بنتي رغد الشاطره ماتبكي ابدا صح .
رغد تكابر:ماابكي بس نوم.
علي ضحك:اسمعي يابنتي مايصلح تردي على اخوش ابدا حتى لو هو غلط عليش قلي لي انا واكسر راسه بس انتي احترمي أكبر منش اشتي تقعي احسن واحده ويقولوا بنت علي رغد تحترم الناس وماترادد ابدا 'تكوني عاقله هو اخوش البنت عيب ترد على أكبر منها.
رغد:خلاص تمام اخر مره بخليك تفتخر فيني قبال كل الناس يقولو بنت علي احسن بنت.
علي حضنها ويتحيلا لها هيا بخرج اغير ونتغدا..
رغد حاضر خرجت معه.
علي:وين أصحاب الجامعه.
سميره:مدري قدهي واحده ونص وهم ولا رجعوا وتلفوناتهم مغلقه.
علي:غريبه مش عوايدهم يتاخروا اتصلي لمرة ناصر شوفي عيالها تروحو والالا.
سميره:حاضر على خباله فيني ولا اتصلت من اول.
اتصلت سميره.
سميره:السلام عليكم كيف انتي
خديجه ردت من غير نفس:من الله بخير.
سميره:تروحوا عيالش والا لا.
خديجه:لا ولا عيالي قد انا قلقه ليش تاخروا اليوم.
سميره:خلاص الله معش.
سميرة:حتى عيالها ماتروحوا تقول وين ساروا مش عوايدهم يتاخروا.
علي:ان شاء الله خير يمكن عليهم محاضرات والا شي هاتي الغدا جاوع.
في المستشفى.
مراد:خلاص تروحوا.
مراد:خلاص تروحوا وانا بجلس عندها اكيد امي قلقه.
شذا:اووه نسيت التلفون مغلق.
خلود:وانا والكل امي أكيد بتحرقنا وقت نروح.
مصطفى:يله مشينا العصر وانا هانا واتصل لو فيه اي شي.
شذا بتصل لااامي اول قبل نتحرك.
سميره شافت المتصل شذا 'وجاوبت بسرعه.
سميرة:وين انتو لاذالحين ليش تتاخروا وليش ماتتصلوا وليش.
قاطعتها شذا:ياصلاتي على النبي الان مروحين ونتفاهم معنا محاضرات خيرات.
سميره:تمام حسابكم معي
علي:هاه وينهم.
سميرة:قالت محاضرات.
علي:قد قلت لش بس ماتفهمي.
سميرة:عادني ما اقتنعت.
بيت راشد.
جالس يفكر ياربي ايش سويت الله اعلم ايش في البنت كيف اطمن عليها الان.
ريم( اخت راشد)ايش بك اليوم مش طبيعي تعال تغدا.
راشد:مشتيش غدا شابع.
بعد ما وصلوا سميرة معصبه:شرفتوا وين انتو لاذلحين ووين رشا.
مصطفى:لا تخافي بس تعبت وشليناها المستشفى واتاخرنا.
سميره افتجعت:ايش فيها بنتي لا تكذب انتو تاخرتوا والان وينها ووين مراد.
شذا:بالمستشفى بس معها مغذيه بعد العصر نسير نروحها ومراد جلس عندها.
علي:وليش ما اتصلتوا.
مصطفى:ما شاء الله على تحقيق التلفونات كانت مغلقه من المحاضرات هيا ميت جوع اشتي غدا.
سميره تبكي:اشتي اسير الان عند بنتي.
علي:خلاص البسي نسير انا وانتي.
منير:وانا بجي معاكم.
علي:"تمام تحرك.
رغد:وانا وانا اشتي اسير عند رشا.
سميره الغداء حقكم في الفرم جهزي 'كلي انتي واخوش ومراد ورشا نشل لهم معانا من المطعم.
تحركوا للمستشفى.
خديجه:جالسين للان سمعت عيالك بدال مايروحوا جالسين معاهم ايش دخلكم تسيروا معاها اخوه.
عهود:انا تعبت للحكا ذيه داخله ارقد مصدعه. دخلت هي وخلود
خالد سكت ودخل الغرفه.
ناصر:مالش للجنان سهل بنت عمهم عمرش ماتتغيري رزع الباب وخرج.
في المستشفى.
مراد:قلت لكم مافيها شي.
علي:اختك تقول تعبت وانت تقول ثعبان هيا مالكم.
مراد:عشان ماتفتجعوا كذبوا عليكم ذلحين مافيها شي ادخلوا شوفوها.
دخلوا وهي نوم.
الدكتورة:مافيها شي بس مع المغذيه بعد العصر تقدرو تروحوها.
علي:الحمدلله.
بعد ما صحيت رشا روحوها البيت.
في الليل رشا تعبانه مسخنه وتفكر بنظرات راشد.
رشا:اكيد انهو هو بس ما اعتقدش لهذي الدرجه يسوي يحاول يقتلني اففف الله يقلعه.
شذا:ارقدي وارتاحي بدال التفكير.
رشا:تمام تصبحي على خير.
يوم جديد.
في الجامعه راشد عيونه لباب الجامعه شاف مصطفى والبقيه عدا رشا مش معاهم .
راشد:يعني مدري ايش في البنت ماجت اليوم.
محمد:ياجناه اقلقتني اكيد عادها تعبانه ولو فيها شي أكثر من تعب كان ماشفت اخوانها مداومين للجامعه.
راشد بهم:الله يستر بس.
عند البنات.
ايلاف:كيف رشا اليوم ان شاء الله احسن.
شذا:الحمدلله احسن بس ترتفع حرارتها كل ساع الادويه تنزلها وعلى الله.
إيلاف:وين بيتكم اشتي اجي ازورها وعتجي معي صديقتي سوسن.
شذا فرحت:صدق اهلا وسهلا بيتنا في شارع ال..... جنب....
عهود:وانا والكل بجي عند رشا.
خلود:احم احم لاتنسي مخطوبه والعقد بعد العيد مابش دخله بيتهم..
عهود خزيت التفت لشذا:اووه نسيت وانتو ليش تتقدموا من ذلحين كان لأبعد العيد مره واحده.
شذا ضحكت:الرجال مستعجل يشتي يركن وحيا بكن كلكن عدا عهود.
عهود:كلبه اصلا مشتيش اجي بيتكم
خلود بملل:الجامعه من غير رشا زفت.
إيلاف:ايوة صدق متعودين على جنانها وضحكتها.
عهود:الا ماقلتي لنا ياايلاف سوسن تيه ليش ماتعرفينا عليها.
ايلاف فرحت:انا قلت لها من قبل تجي معي تجلس معاكن قالت انو خزا بس الان اسير ادعيها.
بعد ما جت سوسن جلسين يتحاكين.
بنفس اليوم قبل العصر.
شذا تبخر البيت.
مصطفى: الله والشم ذيه يفتح النفس.
شذا:سير اشتري حلا الي معانا خلص واشتري جعاله ولفالف البنات بيجين يزورين رشا.
مصطفى :قولي لمنير انا مش فاضي.
شذا:عساس جالس تحرها منير خرج بسرعه انت سير عشان إيلاف وصاحبتها اول مره ببيتنا.
مصطفى فرح :الان اسير اشتري احلا جعاله لاحلا بنات.
شذا استغربت:ماله هذا قلب صرفو والجنان ذيه
بعد ما اشترا الحلا والجعاله رجع ومن بعيد شاف إيلاف وسوسن دخلين البيت.
بيدق الباب.
مصطفى:ياشذا ييي.
وهن يتسالمين شذا:المشولح جا دقايق وارجع لكن خذين راحتكن.
إيلاف ابتسمت:تسلمي.
شلت منه الجعاله ودخلت سلمين على رشا وجت خلود واستمتعين وبيعلقين على رشا لأنها تمشي بعكازه ورجلها وارمه.
بالليل بيت ابو إيلاف.
إيلاف تحكي لامها:ما شاء الله يمه بيتهم كبير اربعه دور وكبير والبنات ما شاء الله عليهن او مثل بيتنا ساع الدشم ثنتين غرف ومجلس وعاده إيجار اللهم لك الحمد يارب .
امها:الله يهنيهم يابنتي اهم شي مستورين وربش كريم مايخليش احد.
إيلاف:ونعم بالله بس يمه اربعه دور وجالسين بدور الاوسط ليش رفس النعمه البيت فاضي.
امها:يمكن معه عيال ويشتي لما يتزوجوا يكونوا عنده بنفس البيت وكل واحد له دور بعض الناس يفعلو هكذا.
إيلاف:ايوه يمكن معاهم ثلاثه عيال.
يتبع ...
تفاعل 👇👇
*العسل الي ماسك المبايل يجاوبنه😘👇*
* *متـــــزوج 👍*
*
* *خاطـــــب ❤️*
*
* *عــــــازب 😢*
*
* *طالــــب 😂*