الفصل 11
*روايات وقصص يمنيه 📚🖋️*
*روايه [مـابيــن الحـب والـحــرب عـقـلــي جُــن بــک ]*
*بارت رقم [ 11 ]*
*اعمل توجيه للروايه لحفظها وتفاعل بايموجي لطيف لنستمر [ 📖🖊️]*
عهود تنهدت: كيف رايش كيف اسوي امي اكيد بترفض.
خلود شافت لها بجديه:اسمعي لي وافهمي صح طاعه الأم مهمه بس مش في اشياء خاصه بحياتنا وقلبنا هذا حب مشو لعب تلعب فينا هي وعقليتها.
عهود:وكيف يعني ما اقدر اتحدا امي.
خلود:انتي أخبر انا متضااايقه لاني تصايحت مع رشا..
عهود بنص عين :كان ماله داعي تردي وتتفلسفي.
خلود:صح احبها اقرب واحده لقلبي رشا بس مش معناها اسمح لها تغلط على اخي كان المفروض تحترم وجودنا.
عهود:قلبها واجعها على اختها.
خلود بعصبيه:وأخي مش واجعنا قلبنا عليه والا كيف هو يحبها ويتعذب مثلها ويمكن أكثر.
عهود تضايقت:خلاص خلاص اسكتي وفكيني من الكلام الزايد.
بيت ابو إيلاف.
جالسه تفكر بكلام مصطفى وزعلانه من رده لها(تلفونها بيرن قطع تفكيرها).
ايلاف:هلا
سوسن:هلا وغلا وسله حلا اشتي اقلش تطمني لقيت الصوره عندي خرجت من الملزمه قبل اجي للجامعه مرجومه قاع الغرفه لقيتها.
ايلاف بعصبيه:صدق الله يقلعش ليش تحطيني بمواقف زباله اول قلتي اكيد معه والان تقولي معش.
سوسن استغربت من ردة فعلها:فكرت بتفرحي انها عندي مش معه.
ايلاف:بعد ايش بعد خلصت اتفلسف عليه اففف باي( وسكرت)
سوسن:بس اا الو مالها هذه بتجنن صرفو.
نرجع لبيت ابو مراد
مصطفى بيفكر بكلام إيلاف وضابح منها عساس انا ابن سوق عشان تجي تقلي معي ورقه ومدري ايش طز فيها وبكلامها رجم الملزمه حقه.
مراد التفت له:مالك تراجم.
مصطفى بضبح:تصبح على خير( تدفا ورقد).
مراد رجع رأسه للخلف مبتسم يتذكر عهود وفارح.
همسه::: كلا على أفكاره وكلا على همومه ذاك الي يبتسم ويضحك ذا مر طيف من يحبه وذاك الي دموعه تنزل وقت يذكر حبيبه:::بقلمي_n_O
يوم جديد في صنعاء الحبيبه.
كلهم داخلين الجامعه شذا دائما تدخل الاوله عشان تحاول ماتشوف خالد.
رشا:يامصطفى تعال كذيه( تعني تعال لاهنا).
مصطفى بملل:ايش ياكذيه ايش تشتي.
رشا غمزت له:بس اشر لي منهي سعيده الحظ الي اخوي معجب بها.
مصطفى تذكر كلام إيلاف وتضايق:مش معجب بااحد خلي لي حالي.
رشا استغربت:والكلام الي قلت لي انك معجب.
مصطفى:كنت امزح معش بس.
رشا:لاتكذب عليا عيونك والفرحه الي كانت فيهن ماكانو حق مزحه.
مصطفى عصب:اففف محقق مالش دخل( ومشي للقاعه حقه ).
رشا:يو صرفو قلب ساع الخادم مدري ماله تشتي تمشي شافت راشد وتاففت خطي من جنبها وفعل نفسه ماشافها.
راشد:اعوذ بالله من الخبث والخبائث.
رشا سمعت وتبرقطت فعلت نفسها ماسمعت.. رشا:والله ماراحت له ذيه المتخلف
بعد ثلاث ساعات محاضرات خرجين من القاعه بس ماتحاكين مع بنات عمهن.
شذا ورشا جالسات وحدهن.
في مكان ثاني في الجامعه
عهود:هيا عندهن نجلس واعتذري منهن.
خلود:هي الي غلطت على اخي وعاد انا اعتذر تحلم.
عهود:بطلي العناد سهل احنا بنات عم مابش بيننا تكبر.
خلود:خلاص تمام تعالي.
عند إيلاف.
سوسن:بس زعل ليش مبرطمه.
إيلاف:من سبب حقش الغباء.
سوسن:وانا ايش عرفني أسألش بالله من تيه الخباله الصوره موجوده خلاص انسي.
ايلاف شافت مصطفى :لازم اعتذر له
( فلتتها ومشت)
سوسن:يامجنونه تعالي ايلاف تعالي.
وقفت ايلاف من خلف مصطفى وهي خااازيه
مصطفى مقفي ظهره لها ومش عارف انها خلفه.
إيلاف بعد تردد:انا اسفه.
سمع صوتها واستغرب ولفت رفع حاجب من غير اي رد.
ايلاف نزلت راسها:اعتذر عن كلامي بس كنت معصبه لانها صوره والغلط من صديقتي.
مصطفى.... ساكت.
ايلاف:قدر موقفي كنت خايفه لأنها صوره
( شافته ساكت وزعلت ومشت).
مصطفى:يي لحظه.
إيلاف وقفت وهي مقفيه ظهرها.
مصطفى:دامها صوره عذرش معش بس كان مش تتهجمي عليا بذاك الاسلوب بس يله حصل خير.
إيلاف تحاكي نفسها:مغرور مايسخاش يعتذر لأنه عصب فوقي( فلتته ومشت).
مصطفى حس براحه وابتسم.
عند البنات.
خلود:خلاص لا تزعلي انتي الي غلطتي وانا اعتذر يله تمام اسفه.
خلود:دام مش شايفه نفسش غلطانه لا تعتذري وانا الي بعتذر لاني تنرفزت.
عهود ابتسمت:قوا للشاطرات.
شذا ضحكت:هههه حسستيني انهن جاهلاًت بصف اول.
خلود قلبت عيونها :اخر مره اسمع شاطرات.
ورجعين يضحكين وكملين مجبر.
في الليل بيت ابو خالد جالسين كلهم بعد العشا ماعدا عهود .
ناصر :ياخلود وين عهود.
خلود:بغرفتها بتذاكر.
ناصر:سيري قلي لها تجي احاكيها.
خلود بفرحه:تمام من عيوني.
خديجه لخالد:ذلحين متى ناوي تفرحنا فيك الي بعمرك معاهم جهال.
خالد تضايق:غلقي الموضوع مش وقته.
خديجه:زكاك عقلك اجلس ساع ديك عتيق.
خالد:يمه انا فدالش غلقي الموضوع والا رحت لي غرفتي.
ناصر:خلاص خليه براحته.
في الغرفه قفزت خلود لا فوق السرير.
خلود:عهوووود ابي بيقلش تسيري يحاكيش.
عهود:يو مالش صرفو جننتي واذا يعني ايش فيها.
خلود:يعني بيفتح معش موضوع مراد.
عهود:يووو ياغارتاااه والخزا يله تعالي معي.
في الصاله جلست حبت راس ابوها.
ناصر بابتسامه:ما شاء الله بنتي قدهي حق زواجه .
عهود خزيت وسكتت.
خديجه :ماقصدك جاها خطيب صح وليش ماقلت لي عاد انا امها .
ناصر:والان ايش اسوي قد جيت اقلكم جمعه.
قاطعهم خالد:من غير هدار من الي تقدم.
خلود بتغامز لعهود وعهود تبهرر لها😹.
ناصر:مراد ولد عمك.
خديجه وقفت بعصبيه:مننن يحلم مابش لهم نصيب عندنا.
كلهم شافو ليها وعهود زعلت ودخلت الغرفه.
ناصر:وليش مابش نصيب بعدين انا ماجيت اخذ رايش جيت اخذ راي البنت.
خالد:يابه شوف راي عهود اول.
خديجه:رايها من رايي ومستحيل تتزوج ولد سميره.
خلود بعصبيه:وايش فيه ولد سميره بعدين من قالش راي عهود من رايش.
خديجه:لا تردي على امش ياقليله الحيا.
خالد بعصبيه:احنا عيالش خلينا مره واحده بحياتنا نسوي الذي نشتيه على الأقل اختيار الشخص الذي نشتيه والراي الأول والأخير لعهود
( دخل غرفته ورزع الباب بقوه)"
ناصر:خلاص ولا اسمع لش صوت انا بكلم البنيه واشوف.
دخل هو وخلود الغرفه عند عهود وخديجه تتبرقط في الصاله.
ناصر بحنيه جلس جنبها :يابنتي فكري الصدق مراد رجال ومايعيبه شي وانا عن نفسي موافق بغض النظر عن انه ولد اخوي وكلام امش ولا تفكري فيه هذه حياتش انتي .
عهود محرجه :خلاص شاافكر واقلك.
ناصر:براحتش الي تشتيه انا بعدش.
عهود:حبت يده الله يخليك لنا.
ناصر حبها في راسها:ويخلي بنتي العاقله
خلود:احم احم نحن هنا بس رمسسه فيه ناس تغار.
ناصر ضحك وحبها في راسها قدش حقنا الصغيرة المدلله ايش عاد تشتي.
خلود حبته وضحكت :انا فدالك يابه.
ناصر:الله يحفظكن تصبحين على خير ياروح ابوكن.
خلود:وانت بخير يا عيون بنتك.
عهود:احم وقلب بنتك انا.
كلهم ضحكوا.
خديجه شافته خرج من الغرفه ودخلت.
خديجه:اسمعي ياعهود الصدق انا مش موافقه بعدين هذا ولد سميره غثيث شوفي لمازن.
*يتببع ...*
*ارفعو التفاعل كلما شفت حماسكم كلما نزلت اكثر [❤️🩹]*