من 391 إلى 400
*روايات يمنيه عربيه مميزه 🇾🇪*
*بإدارة : شـٰٓمـُـس⁞♩⁽📚🖊️₎⇣℡*
*رقم الروايه 14*
*الفصل (من391وحتى400) ☆*
* جرح القريب غريب😔💔*
*تفاعلوالنستمر😍* *قراءة ممتعة 🥹💗⃟🎀*
مجد زعلان على شيماء: ي...يا عمة خليه تروح عادي أيش فيبه!
نجوى شافت له بغضب: أنته التاني اسكت ولا تتدخلش..
والصياح يطلع ونجوى تصيح وشيماء ترد عليها وهي تبكي وسامر وكريمة يحاولوا يتدخلوا، بس نجوى صوتها طاغي، منصور مع الصياح عروق غضب وكان يشتي يشرب قلص العصير لكن مع الغضب رماه وهو يصيح بكل قوة وهو يوقف:
_ بسسسس بس..
الكل لفت له بخوف وهو وقف: بس صرعتونا بس، خلاااااص خلاص، كم مرة تتصايحي انتي وبنتك صرعتونا قرحتوا راسي، (نجوى والكل تشوف له بخوف وهلع)، ما تملينش ما تشبعينش صياح أيش من بشر انتين!
نجوى: والله قل دا الكلام لبنتك، لو منعته وقلت له لا تروح، وتنسى يلي اسمه رغد تاك كانت سمعت كلامك، ولا عاد تدكره حتى، لكن منين يا حسرة، عادك مدلعه ومخليه تبات عنده والآن شوف النتيجة..
شيمَاء: بس اني اشتي اشوفه فين المشكلة يعني!
نجوى تشوف لمنصور: المشكلة يا حبيبتي بأبوه، صح يا منصور أو لا؟
منصور بأستغراب وهو مضيق لعيونه: أيش قصدك يا نجوى؟
كريمة مسكت ببلوزة نجوى تشدها بخوف: ن.. نجوى بس يا بنتي ب.. بس..
منصور: لا يا عمة خليه تقول يلي عنده..
الكل يشوف لها وهي سوت يد على الثاني: والله قدك عارف أيش يلي عندي يا منصور، أنته عارف البنت تاك ابوه من، أو تشتيني ادكرك وأقول اسمه عشان شعر راسك يرتكز كدا لفوق..
كريمة بلعت ريقها وسامر طبع جبينه براحة يده، منصور فزز ومجد وبشار وشيماء زي الطُرشان الزفة..
مجد: من ابو البنت دي؟ مش فاهم شي..
منصور حس قلبه يدق بقوة وبدأ الضيق والعرق يبانوا بوجهه، كريمة شدت بلوزة نجوى يلي شدتها بضيق ورجعت تشوف لمنصور، شيمَاء شافت لأمها:
_ أيش فيبه ابو رغد؟
بشار: هو ابوها مين؟
شيمَاء: ابوه اسمه محمد العدني..
منصور فزز عيونه وشاف لها ونجوى ابتسمت شوي لمن شافت صدمته، سامر همس بصوت صغير:
_ الله يقلعك بنت..
نجوى: يعني رغد تاك بنته لمحممممممد العدنييي يا منصور، بنته من ن...
منصور صاح بغضب: وعادك تبشرينا باسمه، عادك تبشريناااااا..
الكل فز وهو مسك الطاولة وقلبها وهو يصيح: اااااااااااااااااخ..
مجد وبشار وكريمة وقفوا بصدمة وبعدوا والطاولة وقعت والصحون والقلاصات تكسروا والأكل ارتمى ووقع بعضه فوقهم، ونجوى تراجعت للخلف وكانت بتوقع وشيماء تراجعت ويداتها على قلبها بخوف وهو شاف لنجوى وشعره الطويل على وجهه والعرق ينشح والعروق حق وجهه وعيونه نكعوا ومشى لعند نجوى يلي حست قلبها وقف وجسمها تسمر من الخوف وراح ومسك برقبتها وشيماء يداتها على فمها بخوف وكريمة جرت لعنده:
_ منصور..
منصور وهو يصك اسنانه ووجهه يرتعد: عادك تبشرينا بدا الشي، عادك تبشرينااااااا..
كريمة تمسكه: منصور يا ابني ما عليك منه دي غبية..
منصور شاف لها: ابعدي يا عمة ابعدددي، (وشاف لنجوى) أنا حدرتك مليون مرة من إنك تدكري اسمه يا نجوى، وانتي عادك تعاندينا..
سامر راح ومسك بيده: فلت لأمي يا اباه أيش تسوي..
وبعد يد منصور ونجوى تتنفس بصعوبة وبشار ومجد وشيماء يراقبوا بخوف ومش مصدقين ولا فاهمين يلي يحصل، نجوى تتحسس رقبتها ووجهها محمر:
_ ك...كنت ب..هااا بتقتلني يا منصور..
_ وبطلع بروحك كمان، (وهدد باصبعه بوعيد) وأنا قد حدرتك وقلت لك من قبل عقوبة دا الشي..
نجوى فززت وتحرك رأسها بالنفي: ل..لا يا منصور ل..لا..
منصور بغضب: نجوىىىىىىى..
نجوى بخوف مسكت ببدلته: لا يا منصور امانة عليك لا (الكل مستغرب وخايف)، لا يا منصور لا امانة عليك لا تطلقنيش لاااا..
الكل تصنم من الخوف ومنصور يشوف لها ولتوسلاتها وبكاءها وبغضب: انتي..
نجوى غطت اذونها: لااااااااا..
كريمة شهقت والكل مفزز عيونه: انتي طال..
شيمَاء مسكت بيده بخوف: لا يا اباه لا اهئ اهئ لا امانة عليك (منصور يرتعد ويده ترجف بغضب) لا امانة عليك لا تطلقش أمي اهئ اهئ (وشافت له) خ..خلاص اني ما عاد بدكر رغد و..والله، ل..لا تطلق أمي بسببي لا يا اباه لا امانة عليك لا تحرمنا من أمي لا اهئ اهئ..
نجوى تشوف لها وهي تبكي، ومنصور سحب يده وشاف لنجوى:
_ اتحمدي الله بنتك نقدتك، وإلا كنت طلقتك..
وبز جاكيته وخرج طوالي، نجوى ارتمت للأرض براحة وهي تبكي، وشيماء تبكي وطلعت لغرفتها، ومجد يشوف لها ومشى خطوتين بيلحقها بس وقف، وكريمة راحت وضمت نجوى يلي مش مصدقة إنها نجت باعجوبة، مجد منصدم:
_ الآن أيش في وليش عمي منصور كدا عصب؟
بشار: هو في أيه يا ماما حد يفهمني..
سامر: ولا شي، يلي حصل حصل، وبطلوا الفضول حقكم..
وطلع غرفته هو كمان، ومجد راح لعند جدته:
_ جده أيش في..
_ اصه أنته ولا اسمع نخس واحد، خلاص..
_ مله يا جدة فهمينا ليش عمي منصور عصب كدا وكان بيطلق عمتي...
.
البـارت 392 ◇
جُــرح القـريب غـريب 💔
👌🏻👇🏻 😍
_ مله يا جدة فهمينا ليش عمي منصور عصب كدا وكان بيطلق عمتي عشان د..داك محمد مدري أيش كان اسمه!
كريمة وقفت بغضب: حسك عينك تجيب كلمة وحدة عليه أو تدكره قدام منصور، والله بيقطع لك لسانك ويجدل به للكلاب سمعتني..
_ طيب لي..
_ اصه، قلت لك خلاص بسس، يا صوفي، صوفيي (صوفي جت) بزي الأكل ونظفي المكان هيا..
ومسكت بنجوى توقفها: تعالي يا اماه تعالي..
وراحين للديوان ونجوى تمشي روح بلا جسد، بشار مشى لعند مجد:
_ هو في أيه أنا مش فاهم حاجة..
_ على أساس فاهم عشان افهمك، قد شفت أمك كيف انهارن من ابوك لمن عصب، داك شكله أخس من عزام الاسد يلي مخوف نص الشعب، بس أيش القصة!
سامر نزل وهو يضبط نفسه وقد بدل، ومجد مسكه: أيش يحصل هنا يا سامر كلمنا أنته على الأقل..
سامر سحب يده: يا أخي خل لي حالي أنته كمان مش ناقصنا..
وخرج ومجد يصيح له: مله راعي يا سامر..
بشار تأفف: أيش حكاية الناس العيشة بالبيت دا ايه؟
مجد يمسح فمه ويتأفف وشاف للطابق العلوي وغرفتها هي بالتحديد، بعدين خرج من البيت ولحق سامر..
أيهم وحسام وصلوا للكلية ونزلوا وهم يمشوا مع بعض وحسام ماسك بخطام الشنطة حقه..
_ والله صدق، على قولتك الكلية بدون جراح زفت، حتى مليش نفس ادخله..
_ قد قلت اغيب لي اليوم جيز أمس ويلي قبله، بس أبي رفض وعصب عليا، وبيني وبينك قد البيت يضيق عليك أكتر، لكن هنا الضيق أخس، لأن انا أحس جراح موجود بكل مكان وكل ركن بالكلية..
_ الله يعينه، الآن مستقبله بيضيع وهو متخبي، الله يقوم الحج رضوان بالسلامة ويسامح جراح ونخلص من دا الهم..
_ إن شاء الله، عاد انا بجلس للظهر اتسمع للمحاضرات، اوووف والله مليش نفس لدا الشي..
_ قد كلنا، بس نحنا مضطرين، هيا حتى لو محاضرة وحدة تكفي..
_ على قولتك، قدنا ضابح لي من حالي، خلنا نحضر كم محاضرة ونروح لنا عند جراح، نشتري غداء من المطعم ونروح نهدر معه..
_ أحسن والله..
ومشوا للقاعة يحضروا المحاضرات..
.
.
رغد غلقت التلفون وضمته لصدرها: فدييييت صوتك يا روح روحي أنته، الله لا يحرمني منه يا هدوشة..
هدى: آمين يا قلبي انتي، على الأقل خلينا نشوف ابتسامتك دي..
_ فديته يا هدوشة، ما عاد بقي لي غيره بدي الدنيا بعد ما ماتن أمي وجدتي، وجدي عاد الله أعلم أيش بيحصل له (ونزلوا دموعها) و.. ولو حصل لجراح شي، ا.. اني وقته بموت يا هدى والله بموت..
_ بعيد الشر عنك يا رغد، إن شاء الله ما بيحصل له شي وبيقوم جدك بالخير والسلامة وبيسامح جراح وترجعي تشوفيه من جديد، وتكبري انتي وهو بين احضان جدكم وتعيشوا حياة سعيدة..
_ يا رب يا هدوشة يا رب، هيفاء ما جتش اليوم، تقولي عاد هي زعلانة على خالك لمن سابه؟
_ أكيد بتزعل، والله ما عاد دريت خالي بأيش يفكر لمن سابه، قده يحبه ومايت فايت عليه، بس مدريش أيش حصل له لمن طلع بباله يسيبه كدا بيوم العقد ولمن بتصير زوجته بعد ما حلم بدا اليوم سنين..
_ الله أعلم أيش قصته، مسكينة هيفاء، أكيد الموضوع صعب عليه..
_ مش بس خالي قهره وحده، هو قهرني وقهر أياد كمان، وبسببه ك.. كرهني..
رغد شافت لها بأستغراب: من قصدك؟
هدى خجلت إنها تتكلم مع ذلك قررت تخرج يلي بقلبها وترتاح: ب... بقولك شي يا رغد، ب.. بس توعديني إنه يكون سر بيني وبينك..
رغد حطت يدها فوق ركبة هدى عشان تطمنها إن سرها في بئر: وعد يا قلبي ما بقول لأحد..
_ ط.. طيب بقول لك، ا.. الصدق إن أ... أياد ك.. كان بيتقدم لي، هيفاء كلمتني إنه يشتيني..
رغد ابتسمت بفرح: ص.. صدق!!
_ أ.. ايوة، ب.. بس بعد يلي حصل بسبب خالي، ولأنه ساب أخته هيفاء، ق.. قال لي، (وبدأت تبكي) قال لي إنه ما عاد يشتيني اهئ اهئ..
رغد باستنكار: وانتي أيش دنبك عشان يسيبك!!، يلي سواه خالك ما لوش دخل فيبك..
هدى شافت لها وكل عيونها دموع من قهرها: ق.. قد قلت له كدا، ب.. بس هو يشتي يقهر خالي عليا، ب.. بس هو قبل دا الشي قهرني اني يا رغد قهرني اهئ اهئ..
رغد ضمتها: لا تبكيش يا قلبي لا تبكيش، لعله مكتوب خير لك، وانتي ما لك دخل بيلي استوى بين هيفاء وخالك، وأياد لازم يفهم دا الشي..
_ عادني بدأت اصدق إنه يحبني، طلع كداب وبسبب تافه سابني هئ هئ اهئ اهئ..
_ خلاص يا قلبي لا تزعليش نفسك على شانه، ربنا كريم وإن شاء الله يجبر بخاطرك، وداك أياد بيجي يوم ويعرف إنه خسرك وخسر شي كبير كمان..
_ اني زعلانة يا رغد زعلانة، ما قدرتش أقول لأحد بدا الشي، اني انحرق وانقهر من داخلي يا رغد اهئ اهئ..
_ خلاص يا قلبي هدي هدي لا تبكيش..
.
.
ريهام غلقت الباب حق بيتهم وتمشي وهي تتصل لهيفاء: هاه قلبي، الحمدلله كيف حالك انتي؟
هيفاء: الحمدلله بخير، قد رحتي للمعهد؟
_ عادني امشي، انتي بتجي؟
_ والله...
.
البـارت 393 ◇
جُــرح القـريب غـريب 💔
👌🏻👇🏻 😍
هيفاء: الحمدلله بخير، قد رحتي للمعهد؟
_ عادني امشي، انتي بتجي؟
_ والله مش عارفة، بعد يلي استوى معي مليش نفس اخرج من بيت..
_ يا هيفاء لا تهمليش دراستك عشان واحد ما يستاهلك، أهتمي بنفسك وأتبتي إنك بنت قوية لا..
يمكن أحد أو شي يكسره، بالله عليك جي للمعهد شوفيني فاقدة لك..
_ مدريش يا ريهام، والله أحس انني تاعبة وخجلانة أحد يشوفني..
_ يا بنتي خلك من الناس، انتي لا تهميش أحد الغلط جاء من كمال مش منك، فلا تخجليش يا قلبي وخلك قوية، واني بوقف معك، هيا تعالي أنا افدا لك قدني فاقدة لك كتييير..
هيفاء تفكر: طيب خلاص، بشوف، قد بكلمك لو بجي، مع السلامة يا قلبي..
وحطت الجوال جنبها، أمها دقت الباب ودخلت: هيفاء يا اماه، بتروحي المعهد اليوم!
_ مش عارفة يا اماه، حاسة انني تعبانة وبأن كل يلي بالمعهد بيضحكوا عليا لمن يشوفوني..
صفية مشت وجلست جنبها: يا بنتي لا تجلسيش تهمي كدا وتخافي من كلام الناس، يلي يتجرأ يتكلم عليك بقطع له لسانه، (وربتت على ظهرها بحنان) هيا قومي اني افدا لك قومي..
هيفاء ترددت شوي بعدين حسمت امرها: خلاص يا اماه، زي ما تشتي..
صفية باستها: فديتك مله، هيا قومي عشان اخلي اخوك أياد يوصلك..
_ طيب يا اماه..
وخرجت صفية: كدا تسوي فيبي يا كمال، كرهتني حتى بدراستي يلي ما أحب حاجة ساعه، الله يسامحك بس، الله يسامحك..
وراحت تبدل وتتجهز..
ولبست وجهزت، وخرجت وأياد مع خرجته من غرفته، وأول ما شافها ابتسم:
_ بتروحي المعهد؟
هيفاء هزت رأسها بفتور: أيوة، اشتي اغير لي جو قليل بدل الكظمة يلي أحسه..
أياد راح لعندها: فديتك مله، دامه كدا خلاص بوصلك على طريقي للمعهد..
هيفاء ابتسمت: تسلمي يا قلب أختك، هيا إدًا قدني تاااعب ومقدرش امشي..
_ طيب هيا مشينا..
ونزلوا وأياد يصيح: يا اماه أنا بخرج للشغل وبوصل هيفاء على طريقي للمعهد..
صفية راحت لعندهم: أيوة وصله، وانتي يا اماه لا تهتميش لأحد وطنشي كل يلي بيقولوه لك..
أياد عقد حواجبه: ليش أيش بيقولوا، والله يلي بيتكلم عليه أن انا برشه بالرصاص..
_ لا رصاص ولا شي أنته التاني اسكت، قد على كم كف وزبطة لكمال ابوك حبسك عادك تسير تقتل، دا بيقتلك بعده، يا اماه يا هيوفتي، ما عليك من أي واحد يقول لك كلمة، اهتمي بدراستك وبس، طيب يا روحي..
_ ط.. طيب يا اماه..
أياد مشى: بخاطرك يا اماه..
_ الله معاكم، انتبهوا من الطريق وسوق دلا دلا لا تسرعش..
صقر يطرق الباب، شويات وأجت وفتحت له: صقر يا ابني حيا بك..
صقر سلم عليها: الله يحييك يا خالة سوسن، كيف حالك؟
_ الحمدلله والشكر يا ابني بخير، أنته كيفك؟
_ الحمدلله بخير، قلتي تشتينا أجي..
_ أيوة، سويت أكل لسارة والبقية وخالك عبدالقادر قد راح لشغله وأيهم راح للكلية، وما معي أحد غيرك يوديه لهناك..
_ من عيوني يا خالة، قلتي أيهم راح الكلية؟، أحسن له بدل الجلسة بالبيت..
_ والله أيهم متغير كتير بعد يلي حصل لصاحبه جراح، ما عاد يضحك ويمزح زي أول، حتى دراسته اهمله..
_ كلنا يا خالة، أنا كمان متضايق على جراح، خلاص جيبي لي يلي قلتي عشان اروح لي وعاده بدري، بس لمن بعطيه بالضبط؟
_ قد أسماء هناك، لمن توصل لهناك اتصل له وهي بتشله منك..
صقر حزه قلبه وشاف للأرض، ورجع شاف لها: ليش هي مكانه ببيت كمال؟
_ أيوة، روحت قبل يومين ورجعت عنده، وقد بتروح المعهد من هناك، خلاص راعي بجيبه لك..ودخلت وهو واقف وزفر الهواء بغصة: أسماء!!، من دي أسماء، أنا معرفشه، خلاص يا خالة، بنتك بالنسبة لي شخص كان موجود بحياتي ومات..
لمار خرجت لعند خالتها: هو من يلي بيدق ع الباب؟
سوسن وهي تغطي الأكل: دا صقر ابن اختي، اتصلت له عشان يودي بنت الصحن لسارة والبقية، شوفيني خليت لك منه دوقيه طعمه حالي كتير..
وراحت تودي الأكل لصقر، لمار حطت يد فوق الثاني وشافت للأكل: أيه دا؟
(وأخذت قطعة من بنت الصحن واكلته) اممممم، طعمها حلو اوي، ازاي بتتعمل دي؟
ومدته لصقر: دي بنت الصحن وتلاجة شاي حليب، بز لك منه لو تشتي..
_ لا يا خالة تسلمي، مليش نفس لشي، تأمرينا بشي تاني؟
_ سلامتك يا روح خالتك، ربي يحفظك إن شاء الله، لمن ترجع للبيت كلم أمك تروح معي لعند سارة نشوفهم، قد بخلي أيهم يبزنا بالسيارة..
_ على طول يا خالة، مع السلامة..
وراح، الله معك يا ابني (وغلقت ودخلت لعند لمار يلي تأكل وهي ابتسمت) شكله عجبك طعمه..
لمار فزت: ل..لا، طعمها مش حلو خالص..
_ عادي يا بنتي كلي كم ما تشتي قده مليان، وعندك شاي حليب اندكو اشربي لك..
_ لا أنا مبحبش الشاي بالحليب..
_ اسوي لك شاي احمر تشربيه؟
لمار راحت لعندها وسوت يد فوق الثاني: انتي...
البـارت 394 ◇
جُــرح القـريب غـريب 💔
👌🏻👇🏻 😍
_ اسوي لك شاي احمر تشربيه؟
لمار راحت لعندها وسوت يد فوق الثاني: انتي قصتك أيه، مفكراني رح أحبك لمن تعملي لي حركات اللطف والمحبة دي..
_ بس أني مش قصدي كدا، واللطافة والمحبة يلي تقولي عليه عمره ما كانتش حركات اني اسويه، دا طبعي من زمان يا لمار، بس لأنك جديدة هنا عادك ما تعرفيش طباعي..
لمار مدت بوزها: هممم، أكيد عندك طباع مش حلوة كمان، مش صح؟
_ محد كامل يا بنتي، ولكل واحد مننا طبع مليح وطبع زفت، والكمال لله، بس الواحد لازم يكون طيب قدر الأمكان عشان يقدر يحب وينحب، وما يكدبش عشان يأدي غيره (لمار عرفت أيش تقصد وأنها كذبت ذاك اليوم ومعطت شفايفها) شوفي يا بنتي، اني مش زعلانة منك لأنك كدبتي عليا وعلى عيالي داك اليوم، ربنا يسامحك، اشتيك تنسي كل شي وتحبي نحنا عشان تقدري تعيشي بيننا..
لمار شافت لها بدون ما تقول كلمة وسوسن مراعية لها تتكلم بس لمار أحجمت عن الرد..
_ خلينا من دا الكلام الآن، أيش رأيك نأكل سوا اني وانتي بما أنه ولا واحد عند نحنا؟
_ لا مش عايزة ااكل معاكِ..
وراحت طوالي وسوسن تنهدت: متى بتغير طبعه دي، الله يعين بس..
لمار دخلت الغرفة وجلست فوق السرير: أنا عارفة هي ناوية على ايه، مفكراني غبية هصدقها وإنها بتحبني والكلام المهبب دا، بس مش عليا يا سوسن هانم، مش عليا..
أسماء داخل الغرفة تراسل سامر: دا بيجي يوم ويجلطني، فين مختفي وعلى كل خمسين رسالة مني يرد بوحدة، ما له كدا قلب عليا فجأة، فينك يا سامر فينك؟
ورسلت له رسالة "يا سامر فينك ما ترد عليا؟، لو كدا طبعك من أوله شوفني مرضاش، طبعك تغير معي وذا الشي مش عاجبني"
سامر كان جالس بالبوفية مع مجد، وكان يراسل بالجوال، ووصلت رسالة أسماء وهو شافها وتضايق، مجد شاف له:
_ ما لك؟
_ يا أخي تاك البنت مش راضية تخلينا بحالي..
مجد ضحك: كدا الحب والا بلاش، اتحمد الله لاقيت لك حب نقي بالزمن يلي كله شوائب..
_ يا أخي مشتيش كدا حب فاقش لي راسي، كل ساعة ترسل لي رسالة أنا ضبحت منه..
_ خلاص كلمه إنك ما تشتيشه واتخارج لك..
_ قولتك، أحسن لي افرقه بريحة طيبة زي ما يقولوا..
أسماء تضايقت: اوووف، استلم رسالتي وما رد، طيييب يا سامر، كدا تتجاهلني، بس الحق مش عليك الحق عليا يلي صدقتك..
وغلقت بضيق وجوالها رن وهي فزت بفرح: سامر،(وشافت أنه صقر ولوت بوزها) دا أنته يا صقر، عادني فرحت قلت سامر، هاه صقر..
صقر بسرعة وبدون مقدمات: شوفينا خارج، أمك وصن معي أكل، اخرجي بزينُه..
_ طيب راعي قليل..
ووقفت وغطت شعرها وراحت للباب وفتحت، وشافته مقفي منها وبيده كيس كبير: حيا صقر..
صقر لفت لعندها بدون ما يشوف لها ومد لها الكيس، دا من أمك لسارة والبقية..
أسماء بزته وشافت له: وليش كدا تقوله وعيونك تطرق للأرض، وباين متضايق ولا سلام ولا كلام؟
صقر شاف لها: أيش من سلام، خلاص انتي صرتي غريبة بالنسبة لي يا أسماء..
أسماء فتحت عيونها بذهول من كلامه: غريبة يا صقر!!، كل دا لأنني مكنتش اشتي اظلمك واظلم نفسي معك؟
_ كل دا لأنك اعطيتينا أمل زائف يا أسماء، أنا مشتيش اضايق نفسي بالكلام على دا الشي، خلاص ادخلي لك أنا بروح لي..
ولف على أساس بيروح بس هي وقفته: صقر لحظة، ا.. اسمعني (صقر لفت لها) ا.. اني مليش دخل يا صقر، اني سويت يلي فيبه مصلحتي ومصلحتك، خلاص انساني يا صقر، ب.. بس لا تعاملنيش كانني غريبة، شوفني بنت خالتك بالنهاية..
_ صح انتي بنت خالتي ودا الشي ما بنساه عمري، بس مدري، حسيت كدا أن القرابة دي انقطعت مدري كيف، بالعادة الجروح يلي تجي من الغريب يمكن توجع، بس جروح القريب موجعة أكتر يا أسماء (أسماء شافت للأرض بخجل) جرح القريب فعلًا شي غريب مش مألوف، تحسه كدا صعب إنك تتقبله، لأنك مش متعود يكون بدي القوة..
أسماء شافت له: ص.. صقر اني..
_ خلاص يا أسماء رجاءً، ادخلي قبل ما يشوفنا واحد ويفهم الموضوع غلط..
وراح له وهي غمضت عيونها بقهر وفتحتهم وهي تشوف له يروح: يمكن معك حق يا صقر، بس اني مش قصدي اجرحك والله، يمكن اني كمان انجرح، ومن غريب كمان، شكل سامر يكدب عليا زي ما قالت عبير، وويلي لو يطلع كلامه صح، وقته بكون خسرته و.. وخسرتك كمان يا صقر..
وشافت له وهو يختفي، ورجعت دخلت ورغد تمشط لزينة وهدى لمُنى، وررضية تصلي الضحى وسارة يدها على خدها، زينة شافت لها:
_ أيش معك دا يا أسماء؟
_ مدريش، دي كدتهم أمي مع شاي حليب (وشافت الكيس) دي بنت الصحن..
مُنى: ودي ايه؟
هدى: دي اكله حلوة كتير يا مُنى، أكيد بتعجبك..
سارة: الله يحفظه أمك يا أسماء، ما قصرتش مع نحنا أبدًا..
_ ولو يا سارة نحنا أهل وأحباب، بجيب قلاصات وصحن عشان نأكل..
زينة تصفق بيداتها: بنأكل بنت الصحن يااااي..
مُنى: حمستيني...
.
البـارت 395 ◇
جُــرح القـريب غـريب 💔
👌🏻👇🏻 😍
زينة تصفق بيداتها: بنأكل بنت الصحن يااااي..
مُنى: حمستيني عشان اذوقها..
رغد: بتعجبك كتير يا مُنى..
وجابت أسماء قلاصات وجلسوا يأكلوا مُنى ذاقتها: اممممم، دي طعمها حلو اوي، خالتو سوسن تعرف تعمل أكل حلو..
أسماء: أمي له نفس بالطبخ، ما شاء الله تعرف لحاجات كتيير..
رضية: الله يخلي لكم أمكم يا بنتي ويحفظه..
_ آمين يا خالة رضية تسلمي، هيا هيا كلوا، واني بسير المعهد قد تأخرت..
رغد: بس قد هي تسع..
_ عاد المحاضرة تبدأ تسع وقليل، بلحق قد بيتكم أقرب من بيتنا..
سارة: ومن بيروح معك؟
أسماء: م..مدريش، قد هو قريب بروح وحدي..
رضية: كنتي قلتي لصقر ابن خالتك دامه قد جاء لهنا..
أسماء انقهرت: ع..عادي يا خالة رضية بسير لوحدي، هيا بقوم البس..
ومشت للغرفة وغلقت: معاهم حق، ليش ما قلت لصقر يوديني، بس ما كانش بيوافق دامني غريبة بالنسبة له زي ما قال، ما توقعتش كدا شي يزعله لدي الدرجة، الله يعين بس، اروحي لي قبل ما اتأخر..
وتسارعت الساعات، وخرج حسام يمشي مع أيهم، اووووف يا أخي، محاضرتين فقشوا قلبي..
أيهم: والله صدق، عاد المصيبة جينا ومعانا كنترول..
حسام لفت له: وكيف حليته؟
_ هبشت لي هباش وجزعت الطريق، والله ضابح يا أخي بمووت..
_ جيزي يا صاحبي، امشي للكافيتيريا نشرب لنا شي قد نشف حلقي..
_ هيا..
وراحوا وطلبوا عصير وكيك، وجلسوا يأكلوا، جنبهم بقليل جلسوا ثلاثة عيال، وهم يشوفوا لحسام وأيهم، ويبتسموا بسخرية وخبث، وواحد منهم يكلم الثاني بس طلع صوته عن قصد..
_ أقول لكم يا عيال، ما سمعتوش بالتب حق الكلية أيش عمل؟
حسام وقف شرب وانصت يتسمع بس بدون ما يلفت لهم، وأيهم شاف له، والأثنين الثانيين ردوا بخبث:
_ لا ما سمعناش..
الليد كمل: هه، يقول لكم قتل خاله، والمسكين جالس هارب من حافة لاحافة ومن زغط لازغط..
وصاحوا ضحك وكل واحد يطبع يد الثاني، حسام صك اسنانه وحط العصير ووقف وأيهم جمع قبضة يده ووقف ومشوا لعند العيال ووقفوا قدامهم، وهم شافوا لهم وابتسموا لبعض..
أيهم: نحنا ما سمعناش بالقصة، ممكن تقصه لنا..
الليد الأول حط قلص الشاي ولفت له وبابتسامة ساخرة: هه، على أساس مش صاحبكم يعني عشان ما سمعتوش بالقصة..
حسام دفع القلص بيده للأرض والشاي تطعفر بالمكان والكل فز ويلي بالكافتيريا لفتوا له وهو جلس فوق الطاولة برجل وحده وشاف لليد:
_ مع الأسف لا، احكه لنا من لقفك بتطلع أحسن..
الليد باين غضب بعدين ابتسم: دامك مُصر، اسمع إذًا، يقول لك (وابتسم بسخرية وهو يشوف لأصحابه يلي ابتسموا كمان وهو لفت لحسام) إن واحد قتل أخته، (وغمز لحسام) عشان حصله مع واحد (أيهم تحرك شوية بذهول وصدمة وحسام ما أعطى أي ردة فعل) وبعدين ابن الوحدة دي، ما قدرش يتحمل قتل خاله لأمه، فراح وقتله، (وحط يد فوق الكرسي بسخرية) والمسكين جالس هربان، خايف من الشرطة ليمسكونّه..
واحد ثاني: مسكييين، المفروض يفتخر بخاله مش يسير يقتله..
الليد الثالث: لو أنا مكانه كنت بقتل أمي بيدي، هه، بالله ليش يقتل خاله وهو لاقى أمه مع واحد استغفر الله العظيم بس..
أيهم يرتعد من الغيظ وحسام يجمع قبضة يده يلي تهتز وعروقها نكعوا، الليد الأول شاف لحسام:
_ مسكين صاحبكم، جالس يهرب، ولو شفته بمسكه وأسلمه للشرطة بيدي، بس تعرفوا أيش بيحصل يا عيال؟
أصحابه بسخرية: أيييش؟
الليد ابتسم بإستفزاز: بيهرب كما الكلب يلي يلاحقونّه الجُهال..
وقرح ضحك وطبع يده بيد صاحبه وحسام مسك برأس الليد وخرعه للطاولة والليد صاح ووقف لمن ترنح ووقع للخلف وأصحابه وقفوا بخوف:
_ ما لك أيش سويت؟
حسام لفت لهم وقرح اصابعه: لا بس طريقة السرد ما عجبتناش، والواضح يشتي له تعديل..
أيهم لفت للأثنين: وانتوا كمان..
وهجم أيهم على واحد وحسام على الثاني والمضرابة والمرافسة والشاب الأول ماسك جبينه يتوجع والطلاب يصيحوا ويحاولوا يفرعوا بينهم وحسام وأيهم يدفعوهم ويضربوا بعضهم، ووقعوا الكراسي والطاولات، والكل يلكم ويرفس وينضرب، حسام قوي وعضلات، يدفعوهم ويضربوا بعضهم، ووقعوا الكراسي والطاولات، حسام رمى الليد فوق الطاولة لمن كسرها، (هي نوع خفيف عشان ما نبالغش لأن ما أحب دا الشي0) والطلاب يصيحوا..
_ صيح للأستاد..
_ صيح للعميد بيقتلوا بعض صيحووا..
أيهم راح ناحي الطالب الأول يلي يتوجع ويشوف له: قلت لك، القصة كانت حلوة، بس نسيت تختمه، وأنا بكمله لك (ولكمه بقوة لمن وقع وراح وجثا فوقه والليد ماسك على خده ويتوجع) تشتي تسمع التكملة؟ (وصمخه كف يمين بعدين بخده اليسار وشده من ياقة الشميز) تشتي تسمعه؟
واحد من الطلاب يشتي يتدخل وأيهم حط يده قدامه وهو شاف له:
_ تشتي نهب لك...
https://t.me/+Ecxq_OzMYh40M2E0
البـارت 396 ◇
جُــرح القـريب غـريب 💔
👌🏻👇🏻 😍
واحد من الطلاب يشتي يتدخل وأيهم حط يده قدامه وهو شاف له:
_ تشتي نهب لك درس أنته كمان؟
الليد تراجع للخلف بخوف، وحسام صمخه كف ثالث: ما قلت لي تشتي تسمعه؟
ورفعه لمن وقفه، والليد يترنح وبالزور قادر يوقف، والعيال والبنات يشوفوا لهم، حسام شاف لأيهم:
_ تشتي تختمه يا أيهم؟
أيهم قرح اصابعه: قدك تعرفنا أحب الختام..
حسام فلت لليد وأيهم ركله بقوة ببطنه لمن وقعه ووقع الكراسي والبنات صاحين والعيال يصايحوهم..
أيهم وحسام طنشوهم، وأيهم شاف له باستحقار: ختام القصة إن أصحاب الكلب داك أجوا، وعضوا الجهال يلي يلاحقونّه (وشاف لحسام) وتوتة..
حسام يكمل له: خلصنا الحتوتة، (وشاف لليد) حلو أو منتوتة يااا كلاب، اتفووو عليكم..
الاساتذة أجوا: أيش في أيش حصل؟
حسام وأيهم الواضح مش مهتمين، وراحوا الأساتذة يشوفوا الطلاب، وواحد منهم وقف:
_ من يلي سوا كدا؟
الطلاب التزموا الصمت، وهو شاف سكوتهم وقرح: أقول لكم مننن؟
بس هم سكتوا، حسام رفع يده: أنا..
الأستاذ بغضب: أنته يا حسام؟
أيهم رفع يده بعدم مبالاة: وأنا..
الأستاذ فتح فمه وهو يهز رأسه بعدم تصديق، وحسام حك يداته بجيب البنطلون وكأنه متفاخر بيلي سواه، وأيهم يشوف للأستاذ يلي مشى ناحيهم بغضب:
_ الحقونا لعند العميد..
وخرج طوالي وأيهم شاف لحسام يلي شاف للشباب المضروبين وبقية الطلاب يساندوهم عشان يوقفوا..
وقف بدهشة وبنفس الوقت خوف:
أيييش؟، ط.. طيب واتي و.. واتي الآن..
وغلق، منصور شاف له: ما لك أيش في؟
عبدالقادر يعض شفته السفلى: دا أيهم، يقولوا مسوي مشكلة بالكلية ويشتونا اروح..
_ أيش من مشكلة؟
_ مش عارف، بروح وأفهم أيش حصل، دا الليد ما يقدرش يعيش بدون ما يسوي مصيبة..
_ طيب أجي معك؟
_ ل..لا لا، بشوف الموضوع أول، ما يحتاج تجي..
_ خلاص اتصل لي لو تحتاج شي..
عبدالقادر هز رأسه وراح، ومنصور يلاعب القلم بيده، شلتك كلهم فاسدين ومشكلجية يا ابني، الله يستر لو صابوك بالعدوى حقهم وصرت زيهم، اااااخ يا روح ابوك متى التقي فيبك واشوفك، (وطلع جواله واتصل)، الو مدحت، كيف حالك يا صاحبي؟
_ الحمدلله والشكر بخير، أنته كيفك؟
_ والله يا صاحبي مش تمام، اتصلت اسألك على ابني لو في أخبار عليه؟
_ لا والله ما فيش، عاد الشرطة ما مسكونّه، وأنا مهتم بالموضوع فلا تهم شي..
_ تعتقد بنحصله وأقدر اشوفه يا مدحت؟
_ إن شاء الله يا صاحبي إن شاء الله، أنته بس خلك صبور ومتفائل..
_ اااه إن شاء الله، طيب متواصلين إدا في جديد..
_ على طووول يا صاحبي ابشر..
_ بشرك الله بوجه النبي، مع السلامة، الله معك..
.
.
في المعهد، هيفاء دموعها ينزلوا وهي تكلم ريهام: خ.. خلاص ا.. اني شلته من حياتي للأبد يا ريهام..
ريهام تمسح يد هيفاء: خلاص يا قلبي انسيه، يمكن دا مكتوب خير لك من رب العالمين وما يشتيش يضرك..
_ أني كنت واصل أقول إن كمال الحاجة الوحيدة الحلوة بحياتي، والمكتوب الأجمل يلي يمكن ينكتب لي، (وزمت شفايفها ودموعها نزلوا أكثر) طلع المكتوب الأسوا يا ريهام، الأسوأ اهئ اهئ..
_ خلاص يا قلبي لا تقهريش نفسك وتحرقيه على واحد ما يستاهلك، وزي ما قلت لك، لعله مكتوب خير لك، قولي اللهم لك الحمد والشكر وابدلني خيرًا منه..
هيفاء مسحت دموعها وانفها: اللهم له الحمد على كل حال، ااااح يا ريهام، ما عمري صدقت إن كمال يسيبني بيوم من الأيام، واني يلي راعيت له سبع سنين من عمري وجلست مخلصه له، لو وحدة غيري كانت سابته ومشيت وقد معه جُهال من غيره، ب.. بس اني ما سخيت فيبه، وهو عادي عنده سابني بيوم العقد حقي..
_ قلت لك ما عليك منه، هو الخسران صدقيني..
طالبتين جوا عندهم: السلام عليكم..
هيفاء دورت وجهها تمسح دموعها وريهام ردت السلام، وهن شافين لهيفاء يلي عيونها محمرين من الدموع:
_ هيفاء ليش الدبلة والمحبس حقك مش معك؟
هيفاء قلبها عصرها، ريهام شافت لهم: مش وقت السؤال دا دحين، بعدين مش مهم، روحين لكن من هنا..
البنت الثانية: بس نحنا سمعنا إن خطيبه سابه وراح، ليش سوي كدا يا هيفاء؟
هيفاء ارتسمت علامات البكاء بوجهها وبزت كتبها وراحت وهي تبكي، ريهام تصيح:
_ هيفاء، هيفااء، (ولفتت للبنات) أنتن أيش من بنات عشان تسألينه كدا سؤال وتقولين كدا كلام هاااه..
_ بس نحنا فيبنا فضول..
_ الله يهديكن بس..
وبزت كتبها ولحقت بهيفاء وشدتها بيدها: هيفاء لحظة..
هيفاء لفتت لها ببكاء: سمعتيهم أيش يقولين يا ريهام سمعتيهم..
_ م.. ما عليك منهم يا قلبي، د.. دوناك ما يستحوش على نفسهم..
هيفاء ببكاء: بس هم معاهم حق يقولوا كدا يا ريهام معاهم حق، كمال داك سابني بيوم عقدي..
البنات جذبهم بكاءها ولفتوا لها، ريهام شافت لهم: هيفاء بس البنات...
البـارت 397 ◇
جُــرح القـريب غـريب 💔
👌🏻👇🏻 😍
البنات جذبهم بكاءها ولفتوا لها، ريهام شافت لهم: هيفاء بس البنات يتسمعوا نحنا، (ومسكت بيدها) خلينا نروح بيبدأ الدرس هيا..
هيفاء هدأت قليل وراحين للقاعة وجلسين، والدكتور يمسح السبورة، وهيفاء متضايقة كثير، البنات خلفها يضحكين..
_ سمعتي، يقول لك خطيبه سابه يوم العقد حقه..
هيفاء رفعت رأسها وريهام شافت لهم، أيوة أيوة سمعت، مسكينةةة، تقولي ليش سابه بيوم العقد خصيصًا؟
_ والله مش عارفة، بس دامه سابه بيوم العقد، فأكيد الموضوع خطير..
ريهام فتحت فمها وهيفاء طوالي نزلوا دموعها، شكله كدا، الواضح سمع عليه حاجة مش حلوة..
_ الله يستر على نحنا من دي الظواهر..
ريهام: أيش تقولين عيب عليكن..
هيفاء وقفت بحنق وشافت لهن وهي تبكي: اني أشرف منك ومنه يا قليلات الأدب، فعلًا انكن بلا أدب وما تستحين
وطوالي خرجت وهي تبكي، البنات نزلين رأسهن بخجل وخوف والدكتور شاف والطلاب كامل:
_ ما لكن أيش في؟
ريهام وقفت وشافت لهن: بلا أدب صدق، يا عيباه عليكن بس..
وخرجت كمان وهيفاء تبكي وتبكي بقهر وخرجت من البوابة وريهام تصيح لها: هيفاء راعي، هيفاااء..
هيفاء وقفت وشافت لها: سمعتي أيش يقولين عليا يا ريهام سمعتي اهئ اهئ..
_ ل.. لا تهتميش لكلامهن دوناك بلا أدب والله..
_ كيف ما أهتم فيبهن وهن يتكلمين عن شرفي يا ريهام اهئ اهئ، شفتي كمال وعمايله أيش سووا فيبي يا ريهام شفتي هئ هئ، الله لا سامحه، الله يقهره زي ما قهرني اهئ اهئ..
وراحت وريهام تصيح: يا هيفاء هيفااء..
بس هيفاء راحت وهي تأففت: اوووف يا ربي، الله يقلعكن بنات، بلا أدب صدق، الله يعينك ويصبرك يا هيفاء الله يعينك..
وكانت تمشي وهي تبكي وتمسح دموعها، اهئ اهئ، ليش كدا يا كمال ليش، هئ هئ، شوف كيف الناس تتكلم عليا بسببك، ليش يا كمال ليشش؟
وتعبت من المشي السريع والبكاء وجلست تبكي داخل زغط وهي تمسح دمعها لكنهم يستمروا بالأنهمار..
_ ليش كدا يحصل معي يا ربي ليش، و.. واني يلي كنت متوقعة أن كمال لي ومعي للأبد، ب.. بالنهاية يسوي فيبي كدا، ليش يا كمال لييش اهئ اهئ..
_ لأنه انسان ما يستحقك..
صدر صوت من على يمينها وهي شافت ناحيه بخوف واتسعت عيونها لمن شافته واقف قدامها بزيه العسكري..
هيفاء من صدمتها وقفت وشافت له..
رغد تكلم شيماء: سامحيني يا رغد امانة عليك، أمي رافضة تخليني أجي ازورك مدري ليش!
_ عادي يا قلبي والله، المهم انني اسمع صوتك واتطمن عليك وتهادريني وتوقفي معي..
_ دا أقل شي اقدر اسويه، الحمدلله إن هدى هبت لي رقم خالتك سارة عشان اقدر اتطمن عليك..
_ فديتك والله، أيوة فديته، قدك عارفة انني مش ساخية ابز جوال أمي، كنت بس اشتي أقول لك تسامحي أمي على يلي سوته داك اليوم..
_ مله عيب يا رغد أيش تقولي، يشهد الله انني مسامحه له ولا زعلت منه حاجة، الله، يرحمه ويغفر له..
_ تسلمي لي يا شيماء، نسيت أقول لك، جراح يتصل لي واااصل..
شيماء بفرح: صدق؟
_ أيوة والله صدق، فديت قلبه صوته رجع لقلبي الحياة يا شيماء، فارحة لمن اسمع صوته أحس انني كدا بطير من الفرحة وكل همومي تروح..
_ الله يحفظه ويخليه لكم يا قلبي، عاد قال لك فين هارب؟
_ قال عند واحد من أصحابه بس مدري فين، يا ليت جدي يصحى ويسامحه، داك أمجد بلغ عليه والشرطة قالبه الدنيا تدوره..
_ الله يوقف معه ويعينه، يمكن معه سبب على شان قتل خالك، المهم انتي لا تزعليش يا قلبي وخلك صبورة وارجعي للمدرسة لا تهمليش دراستك..
_ أيوة قال لي جراح نفس الشي، وإن شاء الله بكرة اروح للمدرسة..
_ أيوة كدا اشتيك، ربنا يوفقك ويسهل لك يا قلبي..
_ اللهم آمين يا رب، وفديتك يا شيومة، اهتمي بنفسك..
_ وانتي كمان والله، خلاص بغلق الآن، اخاف أمي تجي وتسمعني وتصايح..
_ خلاص تمام، بس كوني كلميني تمام..
_ عيوني ولا يهمك، مع السلامة..
.
.
في الكلية، حسام وأيهم واقفين وعبدالقادر وعارف جالسين يكلموا العميد يلي شابك اصابعه..
عارف حط يده على صدره: امسحه دي المرة بوجهي يا حضرة العميد، وأنا اعتدر منك بدل ابني دا..
حسام: أنا مش ابنك ما لك..
عارف تضايق: قصدي بدل ابن أخي الطائش دا..
عبدالقادر عمل نفس الشي: وأنا كمان اقبل اعتداري حضرة العميد، أكيد هم ما قصدوش يلي سووه..
أيهم همس لحسام: هه، يقول لك ما قصدناش..
حسام: مساكين، مش عارفين إننا نضرب من صماصيم قلوبنا..
_ اسكت لا يسمعونا ههه..
العميد: اااااه، أنا مقدر لأعتداركم، بس يلي سووه عيالكم مش قليل، راحوا ضاربين العيال ومبهدلينهم، وواحد منهم طلع من فمه دم وراحت عليه سنه، ودا الشي حصل قدام الطلاب كامل وكلهم شهدوا يلي حصل..
خالد: ما عليك يا حضرة العميد، سامحهم دي المرة و...
.
البـارت 398 ◇
جُــرح القـريب غـريب 💔
👌🏻👇🏻 😍
خالد: ما عليك يا حضرة العميد، سامحهم دي المرة وبس، وأنا اوعدك أننا بنأخد منهم عهد ما عاد يكرروش دا الشي نهائيًا..
عبدالقادر: أيوة، ولو الموضوع يشتي له فلوس بندفع..
_ الموضوع ما يحتاج فلوس، بس لو الليد اشتكى للشرطة فأنتوا بتتحملوا المسؤولية..
عارف: تمام ولا يهمك، المهم يكملوا دراسة يا حضرة العميد..
العميد: خلاص سهل، الموضوع كله عند العيال يلي انضربوا..
حسام: وليش نتعاقب نحنا بس، قد حتى هم ضربوا نحنا قدام الكل..
العميد: أنته ولا فيبك غير لكمة خفيفة مش باينين اترها كتير، الليد مخلفع وجهه وطلعتوا له دم..
أيهم: يستاهل، داك بلا أدب وكان لازم يتأدب..
عبدالقادر بغضب: مش أنته يلي تأدبه يا أيهم، في عميد هنا يعاقبه، لو غلط عليكم كنتوا كلمتوا العميد..
حسام: وليش نكلمه، مع نحنا يدات تتكلم بالنيابة عن نحنا..
عارف فزز: حساااام، خلك محترم وتكلم بأدب أحسن لك..
عبدالقادر: متفاخرين ما شاء الله بيلي سويتوه..
أيهم: يا اباه هم غلطوا على نحنا بالكلام وهبينا لهم درس سهل..
العميد: أيش من سهل وقد كسرتوا أم الكافيتيريا فوق رؤوسهم..
حسام: يتحمدوا الله ما قلبناش الكلية بكله فوقهم..
عبدالقادر عصب: لا كدا انتوا بلاطجة عيني عينك..
العميد: خلاص أنا احترامًا لكم ولجيئتكم لهنا، ما بعاقبهم بشي، وزي ما قلت للعيال حق الأشتكاي فيبهم للشرطة..
حسام همس لأيهم: يعني لو اشتكى علينا داك الليد بننسجن؟
_ يا أخي لا قال لك ننسجن، بس بنروح رحلة خفيفة ونرجع..
_ أيوة، الله يخلي حامي عدن بيسلي نحنا في السجن..(قصده كمال)
أيهم ضحك: قولتك..
عارف شاف لهم: ما لكم بأيش تتهامسوا؟
أيهم بعد من حسام: لا ولا شي..
العميد: خلاص تقدروا تروحوا، ويا ويلكم تعيدوا دا الشي مرة تانية، وقته شوفونا بطردكم من الكلية تحديركم معاكم..
عبدالقادر وقف: إن شاء الله ما بيتكررش مرة تانية (وصافح العميد) شكرًا لك حضرة العميد..
عارف صافحه: شكرًا لك ما قصرت..
ومشوا لعند أيهم وحسام ورمقوهم بنظرات تنضح بالغضب وراحوا، شكلهم زعلوا يا حسام..
_ سهلة، امشي خل نحنا نروح..
وخرجوا وعبدالقادر وعارف كل واحد يعتصر من عنده ومراعي متى يخرجوا عشان يصايحوهم، وهم وقفوا قدامهم، ولفتوا لعندهم..
عبدالقادر بغضب: قد حدرتك من قبل يا أيهم وقلت لك تبعد عن داك الليد يلي اسمه جراح بس أنته عاندتنا..
_ بس أنا ما عاندتكش يا اباه وقد انا بعيد منه..
_ وعادك تتجرأ تكدب عليا!
_ بس دا الصدق يا اباه..
عارف: وأنته يا عنترة، متى بتبطل العنتريات حقك دي، مش كافي المشاكل يلي تسببه بالبيت عادك تجي تسويه هنا في الكلية!
_ بس أنا ما سويت المشكلة، داك الليد وأصحابه هم يلي بدؤوا..
_ حسام شوفنا أعرفك، لا تكدبش عليا..
_ خلاص إدًا دامك تعرفنا مش داعي اكدب عليك، هم تكلموا على جراح وأمه وما قدرناش نسكت لهم..
عبدالقادر: يعني كلامي صح يا أيهم..
أيهم أخذ نفس: أيوة يا اباه، الصدق أنا مرضاش أحد يتكلم على أصحابي وأجلس اتسمع له وهو يهينهم ويتمسخر عليهم..
عبدالقادر عصب وبصوت صغير: الآن مش وقت الصياح يا أيهم، نحنا بكلية وقدام الكل، لمن تروح بصفي حسابي معك وبوريك شغلك..
وخرج، عارف كمان شاف لحسام: زي ما قال عبدالقادر، البيت يجمع نحنا يا حسام..
وراح وحسام أشر بيده بمعنى روح لك، أيهم شاف له: يعني ليش يقرحوا فوق نحنا كدا؟
_ يا أخي فاضيين يدوروا مناقرة، خلك منهم، والله داك الليد لو يرجع يقول حرف واحد وقدامي الآن، إن انا برجع أضربه وأمسح به بلاط الكلية كله..
_ وخل لي شوية منه لا تنساش..
حسام ضحك: بز لك أصحابه أنته..
_ اتفقنا إدًا، ههه، فين بنروح؟
_ عن نفسي جابوا لي الضيق وما ليش نفس محاضرات بروح لي..
_ بزنا معك..
_ هيا امش..
وخرجوا لهم من الكلية، وحسام رن جواله وشاف أنه رغم غريب، راعي أرد على الاتصال يا أيهم:
_ الووو..
هديل بتوتر: ا.. الو..
حسام عرف صوتها طوالي وشاف الرقم وتأكد: أيوة حيا..
_ ا.. ااا ا.. اني صديقة غزل..
_ هاه، ا.. أيوة هي اتصلت لك بعدين لاقتك مغلقة وأنا رحت الكلية، اتصلي لجوال أمي لو معك رقمه..
_ قد اتصلت مغلقة، خلاص سهل، لمن تروح البيت كلمه وقدني بتصل له..
_ خلاص تمام..
وغلق وابتسم: وعاده تهدر عدني..
أيهم شاف له: من دي؟
_ دي صديقة غزل، يلي من ردفان أخت ماهر..
_ وأيش تشتي؟
_ هي صديقة غزل، وبعدين بينهم صُحبة عميقة، وغزل اتصلت له من جوالي وكان مغلق وهي رجعت تتصل..
أيهم هز رأسه: هاااه، (وشاف لحسام يلي يبتسم) أيوة، وأيش قد معانا؟
حسام لفت له: أيش معانا؟
أيهم غمز له: والله أنا يلي اسأل..
_ معانا خبز وطماط تشتي؟
_ لا حياك، شابع..
حسام طبعه: أحسن، هيا هيا خلنا نمشي لعند جراح والبقية..
_ بس لو شافنا جراح...
البـارت 399 ◇
جُــرح القـريب غـريب 💔
👌🏻👇🏻 😍
حسام طبعه: أحسن، هيا هيا خلنا نمشي لعند جراح والبقية..
_ بس لو شافنا جراح مبهدلين كدا بيحقق مع نحنا، خلنا نأجله لمن عشاء عشان الآتار تروح قليل..
_ هيا تمام، خلاص بعدك عشاء عشاء، امشي نروح لنا المطعم نأكل شي قد حرمونا الأكل دوناك الملاعين..
_ قد تغدينا فيبهم عادك ما شبعتش..
حسام ضحك: لا والله، كان نفسي آكل العظم كمان..
أيهم شغل الموتور: يا أخي أنته روح..
وحسام ضحك وركبوا بالموتور وراحوا لهم..
.
.
هيفاء من صدمتها وقفت وهي تشوف له: أنته!!
كمال تقدم ناحيها ورأسه يشوف للأرض، بعدين رفع لمن وقف قدامها وشاف لها وكيف منصدمة من وجوده..
_ هيفاء أنا...
هيفاء صكت اسنانها وبغضب وبكاء: أيش معك هنا يا كمال، رووووح..
_ هيفاء اسمعينا..
هيفاء دفعته وجزعت من جنبه وهو مسك بيدها: هيفاء لحظة..
هيفاء سحبت يدها بغضب: لا تمسكش يدي مرة تانية أحسن ما أكسره لك..
_ هيفاء اسمعينا، أعطينا فرصة اكلمك كلمتين بس..
_ أيش باقي بيننا من كلام، خلاص أنته نهيت كل شي بيننا يا كمال، انساني زي ما اني نسيتك، خلاص روح بحال سبيلك وخل لي حالي، (ومشت)
_ بس أنا مش قادر يا هيفاء (هيفاء وقفت ودموعها تنزل بحرقة) صدقينا أنا مش قادر أنساك أبدًا، ح.. حتى إن انا جيت لهنا خصوصي عشان أكلمك، خلينا أفهمك واسمعينا للمرة الأخير يا هيفاء..
هيفاء لفتت له وهو أنقهر من كمية الحزن والدموع يلي على وجهها: لا يا كمال، ما بسمعكش، أنته صوتك بس كان يرد لي الروح، بس الآن صوتك هو يلي يسلخ روحي سلخ لمن اسمعه، بسببك الآن الكل يشوف لي بنظرة سيئة، ح.. حتى أنهم وصلوا لدرجة يتكلموا فيبها عن شرفي وكله بسببك اهئ اهئ..
كمال فزز: ومن دا يلي يتجرأ يتكلم عليك، من هو وأنا بروح اقتله ابن الكلب..
هيفاء ابتسمت بسخرية: تقتله!!، تشتي تسوي عنتريات كدابة يا كمال، بسببك يتكلم عليا وأنته تشتي تقتله!، لو في واحد يستحق إنك تقتله فهو أنته نفسك يا كمال، انتههه..
كمال بلع ريقه وهي راحت وهو يلحقها: هيفاء لحظة، هيفاء راعي اكلمك..
_ روح لك يا كمال..
وخرجوا من الزغط كان في طلاب يمشوا وشافوا لهم، هيفاء وقفت بخجل تشوف لهم بعدين راحت بسرعة، كمال يلحقها:
_ هيفاء اسمعينا..
وهي وقفت وشافت له ببكاء: والله، والله يا كمال لو ما تروح من هنا وتبطل تزعجني وتلحقني انني بصيح وبجمع عليك الناس وأقول لهم إنك تتحرش فيبي..
_ أنا تقولي عليا كدا يا هيفاء!
_ أيوة، لأنك تستاهل، واحد ما عندكش احساس ولا مشاعر، ما تستاهلش حتى انني أوقف اكلمك بالشارع هنا، روح انقع من حياتي يا كمال، انقلع منه زي ما أني قلعتك من حياتي..
ومشت بس هو مسك بشنطتها وهي قلبت عيونها: اسمعينا للمرة الأخيرة يا هيفاء، وبعده قرري لو تشتينا انقلع من حياتك والا لا، وأنا أوعدك انه أيش ما كان قرارك إن انا بتقبله..
هيفاء لفت له وهو ابتسم: لا يا كمال، (كمال انسلخت الابتسامة من وجهه) كل شي انتهى، روح شوف لك وحدة غيري تعلقه فيبك وتخليه عمياء بحبك، وعلقه سبع سنين عيشه بالوهم والأحلام وبعدين لمن تجي تعقد به، خل عندك قليل احساس وكلمه إنك بتسيبه أحسن ما تكون علكة يمضغه الناس..
وراحت وكمال يشوف لها، بعدين مسح وجهه بضيق ولف للخلف والطلاب يشوفوا له، وهو عصب..
_ ما لكم تشوفنا كدا!، روحوا قبل ما اطلع القرحة حقي فوقكم، روحوا..
وهم راحوا ويتهامسوا، وفرك شعره بقوة وراح له هو كمان..
.
.
كان يصيح ضحك وهو يطبع فخذه، بينما الآخر غاضب من ضحكاته ويحاول يمسك أعصابه عشان ما يقرحش..
رعد بضحكات: ال... هههه الآن م.. ههههه، (ما كان يقدر يكمل من كثر ما يضحك)، ا.. أنته تشتي هههههههه..
أمجد بغضب ووعيد: أقسم بالله يا رعد لو ما تبطلش البلطجة والضحك حقك إن انا بجي واخليك تبكي..
رعد مسح دموعه: هههه، يا أخي الله يقلعك بس، الآن من جدك تحب، أنته، أنته واحد متلك يحب!!، لااااا دي قده من المعجزات..
_ وليش يا روح أمك، ليش أنا مش رجال ويحق لي أحب زي غيري، قد واحد متلك يحب كمان، ليش متفاجئ مني!
_ يا اخي أنا غير أيش زيك..
_ والله!!، وأيش يلي مخليك غير؟
_ يا اخي كل شي فيبي غير، خلك مني لا تمرعنا الآن وتصيبنا بعين، قلت لي، وما لاقيت تحب غير أخته للهارب داك..
أمجد وقف: أنته ما شفته يا رعد، تاك البنت جميلة كتير، رغم ملامح الحزن يلي كانت طاغية عليه، إلا أنه ما غطت على جماله داك، (رعد حط يده عند ذقنه يبتسم من كلامه ومستمتع وهو يشوفه كيف متفاعل)، رغم القرابة يلي بين نحنا وكم كانت تصايحنا لمن كنت أجي ابز زينة واصايح خالد على سارة، لكن ما ركزتش بتفاصيل وجهه ولا جذبتنا كدا زي ما شفته داك اليوم..
_ لا كدا شكل البنت سحرنك يا أمجد...
البـارت 400 ◇
جُــرح القـريب غـريب 💔
👌🏻👇🏻 😍
_ لا كدا شكل البنت سحرنك يا أمجد، بس مجنون أنته، على بالك تحبك وأنته خطفت بنت خاله ومرمطتَ بخاله أيام وووووو، أيش مجنون أنته!
_ ما عليك أنته يا ربحة، بخليه تحبنا وبتشوف..
_ هيا احلم احلم، قد الأحلام بلوشي..
رعد لفت له بغضب: الآن أنته أيش قصتك واتي عليا..
_ أنا أقول لك بالحقيقة عشان ما تنصدمش وتوقع فيبك الجلطة وتدخل بغيبوبة وبعده تموت لمن تقول لك بالواضح الصريح لااااااا..
أمجد راح لعند يطبعه ورعد يضحك وهو يغطي على نفسه: أنته يشتي لك قتل يا رعد، دا بدل ما تشجعنا جالس تكسعنا يا جني، الله يقلعك بس..
_ اااح يا أخي بس وجعتنا، (أمجد بعد منه) خلاص خلاص، بس فرضنا وافقن عليك، من بيعقد لكم قد اخوه بالسجن وجده يمكن يموت وما معوش أحد..
_ مش مهم بلاقي طريقة، أنته هامم لي من يعقد لي عليه، همنا أول كيف بتقدم له وكيف أقدر اشوفه واصل و..
_ وكيف تتقبل الصدمة لمن ترفضك..
أمجد يضربه ويشد شعره، ورعد يضحك ويتوجع: يا أخي بس خل لي الشعرتين يلي باقيين، عاد انا فارح بشعري بدأ يطلع وأنته جالس تشده، غيران منه صح، قلعوك مله..
_ وأنته معي إن شاء االله، بعدين فارح لي بالشعرتين يلي معك..
_ لا تتمسخرش عليا، لو تروح عند عزام والله بيخليك كما البيضة، وقته تعال عندي واتمسخر على شعري..
أمجد جلس فوق الكرسي: الآن عاد انا ما فهمت، ليش القائد رفض يخليك تبلغ الشرطة عن مكان جراح بالرغم أنه يعرفه؟
رعد يحك اذنه: يا أخي داك مدري بأيش يفكر، تحس عنده انفصام بالشخصية..
أمجد ضحك وهو يشوف للباب: اصه الله يقلعك بيسمعوك رجاله..
_ عادي قد بقول أنته يلي قلت كدا..
_ وليش تكدب يا كداب..
_ مكدبش دا الصدق، غير رأيه يومه وقال أجله، قال معه شي تاني برأسه، الله أعلم أيش هو، (بعدين وقف، وبز البندق) أنا بمشي الآن، كدبت على الاسد وقلت له بروح اصلي، مش عارف أن انا جيت اشوف الشيطان بكله..
_ فدوووبك عليا إن انا شيطان، والله ما الشيطان إلا أنته والقائد داك..
_ اااااااا شوفنا يعجبنا اوصل الحشوش لأصحابه، (ولبس البندق)، يعجبنا سبحان الله..
أمجد يهز رأسه: وأنا يعجبنا احط رصاصة بالراس يعجبنا سبحان الله..
_ امزح امزح معك يا أمجد ليش تصدق سريع أنته..
_ أيوة كدا، وأنته فين وصلت بموضوع بنته لعزام؟
رعد ابتسم وهو يرفع حواجبه وينزلهم بسرعة: قصدك هيوفه، فديته مله، عاد انا بحاول اسلك لنفسي طريق بعدين سهل، خله تنسى كمال داك أول، بعدين أجي له أنا..
_ شوف كمال لو عرف إنك تشتيه بيقلع لك عيونك، دا لو ما قرح لك رقبتك أول..
_ ما عليك منه داك، سابه ويشتيه تجلس معلقة جيزه، خلك مني شوفنا انسان معه تكتيكات مش زيك امشي على الهامش كدا..
_ والله على الهامش يلي تقول عليه، بكرة بتلاقينا قد خطبت وعقدت، وبتجاوزك واتزوج رغد قبلك..
_ والله نصيحة لا تتفاءلش كدا، أصلًا لو سبقتنا ما بتسبقنا إلا لمن يرفضوك ويصفقوا الباب بوجهك..
أمجد وقف بغضب: يا كلبببب..
رعد طوالي فحط جري وهو يضحك وأمجد لحقه للباب وشافه يروح: قدك بترجع يا رعد، أنا بوريك،(وغلق الباب) حرقنا الملعون داك..
ووصلت هيفاء للبيت تبكي بقهر، وفتحت لها أمها الباب يلي بيتكسر من كثر الطرق، واتية واتية مله راعي راعي..
وفتحت وشهقت لمن شافت هيفاء دخلت بسرعة كما البرق:
_ واي هيفاء، هيفاء يا اماه أيش فيي؟
هيفاء طلعت جري للفوق، وهي لحقتها، استر يا رب أيش حصل يا ربي واي..
ولحقتها وهيفاء ارتمت فوق السرير تبكي وتنشج، دخلت صفية بخوف وهلع:
_ هيفاء يا روح أمك أيش في؟، (وجلست جنبها وحطت يدها فوق كتفها) هيفاء دري عليا يا بنتي..
هيفاء ارتمت بحضن أمها وجلست تبكي بدون قول كلمة، بكاءها وشهقاتها كانت كافية بتلجيمها عن النطق، صفية تربت على رأسها وظهرها:
_ أيش في يا هيفاء أيش في يا روح أمك ما لك؟
_ ااااااااخ يا اماه اهئ اهئ..
_ سلامتك من الآخ يا اماه، كلميني أيش في أيش حصل ليش تبكي..
هيفاء بس جلست تبكي وتبكي..
.
.
نجوى متضايقة وزعلانة كثير، وجالسة متخددة وكريمة جنبها تشوف بالتلفزيون وتأكل لوز وعندها عصير..
_ اووه مله جعل لكم موت يا أصحاب المسلسل،(ولفتت لعند نجوى)، شفتي أيش سووا في البطل، قتلُونّه ضرب إلهي يجعل ليدينهم تتكسر..
_ يا اماه حرام عليك، جالسة هامة لي بطل المسلسل دا، هميني اني يلي جالسة انحرق وانقهر وانتي ولا هامك غير المسلسل..
_ هااو يا نجوى ليش تقولي كدا، بعدين انتي يلي جايبة دا الشي لنفسك بنفسك مش اني..
نجوى لفت لها: وليش اني يا اماه ليشش، ليش تحطي عليا اللوم وحدي ومنصور تخرجينُه بعيد..
_ انتي يلي جالسة تدكري...