من 221 إلى 230
*روايات يمنيه عربيه مميزه 🇾🇪*
*بإدارة : شـٰٓمـُـس⁞♩⁽📚🖊️₎⇣℡*
*رقم الروايه 14*
*الفصل (من221وحتى230) ☆*
* جرح القريب غريب😔💔*
*تفاعلوالنستمر😍* *قراءة ممتعة 🥹💗⃟🎀*
خالد بكر الصباح لعدد من اقسام الشرطة وطلب منهم يدوروا على زينة، وبعدين راح لعند المقر حق الجرائد وطلب منهم عمل اعلان فقد، وحط رقمه هناك، وراح، بينما سارة كانت تكلم رغد:
_ تقولي فينه بنتي يا رغد؟
_ إن شاء الله بنلاقيه يا خالة، ربنا كريم وهي طفلة وما بيضيعه..
_ يا رب يا رغد يا رب، الله يرجعه لحضني، فقدت له كتير، خ.. خالك ما رقد هنا البارح فينه؟
_ أمس قد بات بالعزاء، وكلمني جدي أنه راح اقسام الشرطة يبلغ عن فقدان زينة، وبيحط اعلان عليه بالجرائد عشان لو حصلُنه يتصلوا لعندنا..
_ ااااه، إن شاء الله يا رب..
.
.
صفية تلبس المقرمة: مله اليوم يا هيفاء تأخرنا..
هيفاء جت تغلق الشنطة: خلاص يا اماه جاهزة، كنت اشوف كمال بالواتس متى آخر ظهور له، مش عارفة فينه مختفي يا اماه..
_ أكيد مشغول بعزاء اخو صاحبه، قدك تعرفيه كم يحب أصحابه ومتعلق فيبهم..
_ بس اني خطيبته يا اماه ولازم يلتفت لي، لو يعطيني ربع اهتمامه فيبهم كنا تزوجنا من سنين..
_ الآن خلينا من كمال دا ومشينا للعزاء هيا، قد برد الخمير بسببك..
هيفاء تنفخ وخرجين واياد كان مراعي لهن، وطلعين: مله ساعة يا اماه أيش تجهزوا عروسة؟
_ دي اختك اخرتنا، هيا امشي..
وهو لفت لهيفاء: وليش كدا مادة بوزه؟
هيفاء: كمال دا ما ادريش فينه لا يكلمني ولا يهدر معي كما الناس..
أياد: داك حانب العسكرة ومروجين المخدرات وزام وبالأخير ختمه موت صديق صاحبه، الله يعينه أكيد هالك وتاعب..
صفية: قد قلت له وهي تقول متغير عليا وما ادريش أيش..
هيفاء: ب.. بس يا اماه حتى لو مشغول، يعني لمن يقرأ رسايلي لازم يرد عليهم..
أياد: يمكن ما معوش رصيد وكدا، المهم خلينا من حنتك وخلونا نروح، أيش ما بتروحيش المعهد؟
هيفاء: لا ما ليش نفس، خلنا نروح نعزي..
أياد هز رأسه وشغل السيارة وطوالي لبيت عبد الفتاح.
في الِفلة حق منصور، كانت نجوى تلبس هي وكريمة، يا بنت تعالي معانا أيش بتخسري..
لمار: لا مش عايزة، بعدين الكل هناك بيعيط وأنا مش قادرة اتحمل الصراحة..
شيمَاء: بس انتي مش صغيرة عشان ما تقدريش تتحملي بكاء أحد، هيا تعالي معانا سكتة لازم توقفي مع خالتك واخوتك بدل جلستك هنا..
لمار وقفت وبغضب: وانتي خصك ايه بالموضوع دا، ماتدخليش يا شيمَاء عشان مزعلش منك..
كريمة: يا بنت اهدري كما الناس مش قادرة افهمك انتي والمصري دا، أيش تقول دي يا نجوى؟
نجوى تلف المقرمة حول رأسها: يا اماه ما عليك منه، هي بس العناد راكب رأسه ومصملة عليه..
لمار: لا انتوا كدا كلكو واقفين ضدي..
نجوى: لا ضدك ولا شي، بس الواضح أن الحق يزعلك..
_ أيه من حق، أنا مش عايزة اخوات ولا خالة عشان تجي تربيني بدل مامي، هو دا باطل بالنسبة ليكو يعني..
شيمَاء: باطل لو كانت الخالة طبعه مش مليح وتصايح وتضرب وتكره، بس الخالة سوسن زي العسل واطباعه حلوة زيه، ورزان وأسماء كمان، وقد شفتي دا بعيونك، وشفتي مُنى يلي عاده خلقن أمس كيف حبتهم، بس شكلك انتي العمياء ما شفتيش دا الشي..
لمار: لا أنا اطلع لي أحسن لي بدل الصراع يلي باين مش هيخلص..
وراحت وشيمَاء تأففت، تقولي يا اماه متى بتحب خالتي سوسن وبناته؟
_ والله يا بنتي متى ما ربك راد دا الشي، بس الواضح إن الموضوع مطول قليل (وشافت لأمها) هيا يا اماه قدك جاهزة؟
_ أيوة خلاص، هيا مشينا..
وخرجين ومنصور يتصل خارج، أيوة خلاص، جهز لنا خمسة تيوس وادبحهم، وسو غداء كتير، أيوة شف مطعم حلو كدا ومعروف، المهم لا تتأخروش، يلا..
وغلق وشاف خلفه وخرجت نجوى والبقية، قد جهزتين؟
نجوى: أيوة خلاص، بنرجع بالليل لهنا..
_ طيب تمام، أصلًا المعزيين بيجلسوا هنا كم يوم، المهم اوقفين مع سوسن، حرام المرة مسكينة، وأم صفوان كمان اوقفين معه..
كريمة: تمام يا ابني ولا يهمك..
نجوى: والعيال والصبوح كيف عليهم؟
منصور ويده بجيبه: قد وصيت على الصبوح من بدري يسووا بالمطعم كبدة وخبز، والغداء الآن طلبت من أصحاب المطعم يجهزوه له..
كريمة: الله يرزق يا ابني ويجعله بميزان حسناتك..
نجوى إبتسمت: يااا رب ويرزقك بدل الريال عشرة الف ويحفظك لي يا حبيبي..
شيمَاء راحت وحضنته: أنا بحبك اوي يا بابا..
منصور باس رأسها: وأنا أكتر يا روح ابوك، لمار فينه؟
نجوى: اااح منه، رفضن تجي معانا..
منصور: وكيف بتجلس هنا وحده والمعزيين بيجوا!..
كريمة: والله يا ابني رأسه يابس رفضن تسمع لنحنا، قالت بتجلس بغرفته طول اليوم..
منصور: هه، ليش على كيفه، بزونُّه معاكم سكتة تواسي خالته وخواته..
شيمَاء: رافضة يا اباه وما تقدر تقنعه..
منصور: إلا أقدر له، بس بخلي ابوه يتصرف معه،(وشاف للديوان وصيح) يا عبدالقادر، عبدالقادر..
.
البـارت 222 ◇
جُــرح القـريب غـريب 💔
👌🏻👇🏻 😍
عبد القادر خرج من الديوان: هاه ما لك تصيح صحيت العباد..
_ النسوان بيروحين العزاء وبنتك لمار رفضن تروح معاهم..
_ أيش، ودي من تحسب نفسه!
_ مش عارف، المهم تصرف معه أحسن ما أستلمه انا هي وعناده دا..
عبد القادر هز رأسه: خلاص خله عليا، وانتين راعين هنا يا اماه..
كريمة هزت رأسه ونجوى مسكت بيده: ب.. بس حبة حبة يا عبد القادر..
عبد القادر سحب يده وطلع، ودق الباب، ودخل وشافها فوق السرير جالسة، فنيلة رمادي وبنطلون ابيض، وشعرها الحريري على اكتافها يرتاح، ومسوية سماعات وتشوف للجوال، وهو صك اسنانه وراح وسحب السماعات وهي فزت:
_ ااااااه..
وبز التلفون وبغضب: الآن انتي أيش قصتك هاه..
_ ايه في ايه يا بابا بتزعق كدا ليه؟
_ ليش ما تشتي تروحي مع عمتك وجدتك عند خالتك وخواتك هاااه؟ (لمار قلبت عيونها) لا تقلبيش عيونك كدا وجاوبينا..
_ كدا يا بابا مش عايزة وبس..
_ ليش الشغلة على كيفك يعني، هيا قومي والبسي عباية وغطي شعرك، عاد نجوى والبقية مراعيين لك تحت..
_ بس أنا مش عايزة اروح..
عبد القادر مسك يدها وهي خافت: لمار لا تخليناش اصيح فوقك، كلامي واضح ومفهوم، بتروحي يعني بتروحي، العزاء حق الرجال هنا، أيش معك انتي بينهم..
_ ب.. بس أنا مش عايزة اروح أنته مبتفهمش ليه..
_ أقول لك البسي هيا، السيارة مراعية لكم تحت، الآن بيجوا المعزيين، والبسي مقرمة زي ما قلت لك..
لمار سحبت يدها: وهلبس ليه إن شاء الله، أنا بمصر بطلع عادي وشعري مكشوف، وقفت على هنا..
_ هنا نحنا باليمن مش بمصر..
_ هو يعني هخلع الحجاب بمصر والبسه هنا، أيه التخلف ده..
عبد القادر مسك رأسه: يا رب صبرك وطولة البال،(وشاف لها ورفع اصبعه بوعيد) لمار، أنا بنزل، خمس دقايق ما تنزليش وانتي متجهزة والله العظيم إن انا بسحبك من شعرك لتحت تسمعينا..
ونزل وهي شدت قبضة يدها بغضب وصكت اسنانها: ايييييييي، أيه العيشة الزبالة دي يا ربي، قال البس حجاب، أنا مش عايزة اروح يا ربي بقا اوووووف، بس طيييب، أنا هوريكو هعمل ايه..
نزل عبد القادر بغضب، هاه يا اماه أيش قالن لك؟
_ بتجي يا اماه بتجي، اوووف كظمتنا من عناده..
منصور: أمه الله يرحمه كانت كدا عصبية أو طالعة لعمومته؟
نجوى: بس اني واخوتي مش عناديين يا منصور..
عبد القادر: يا أخي لا، أمه كانت باردة كتير، دي طالعة لأيهم اخوه، سبحان الله، فولة وانقسمت نصفين..
شيمَاء: يعني أيهم ابنك يا خال كدا يعصب وعنادي؟
_ يعني مش كتير، حتى لو عصب بيعصب على شي معقول، أما العناد دا يطلع عنده فل أحيانًا ولا يمكن يقتنع بشي ما يشتيه، وأحيانًا يقلب سبحان الله..
منصور: خلاص راعين له قليل وروحين للسيارة، ونحنا خلنا ندخل يا صهير..
عبد القادر: راعي بجيب الصبوح والحقك..
وراح منصور الديوان، وكان عبدالفتاح جالس وصقر راقد فوق المجلس ويده على عيونه وواحدة من رجوله عاطف لها، ودخل عبد القادر بالصبوح وحطه فوق الطاولة، هيا صبوح يا جماعة..
منصور راح لعند عبدالفتاح: هيا يا عبد الفتاح قم صبوح..
_ لا شكرًا والله مش لي نفس لشي..
عبدالقادر جلس جنبه: يا أخي عارف فيبك وحاسس والله، بس البكاء والزعل والكدر كدا ما بينفعش لأن الميت عمره ما بيرجعش..
منصور: أيوة، قل الحمد لله إن ربنا بزه وعاده جاهل لا سيئات ولا شي، إن شاء الله ربنا يجمعك فيبه بالجنة..
عبدالفتاح: إن شاء الله يا رب..
بشار أجا: بابا بابا، هو أكرم راح فين؟
عبدالقادر: بيروح مع اخوه أيهم يوصل أمك والبقية لبيت العزاء ويرجع..
بشار: مش على أساس سامر هو يلي هيوديهم..
منصور: سامر الله أعلم فينه، اتصل له من
أمس جواله مغلق، مش داري فين ضاع..
عبدالقادر: قده مع مجد وما بيحصل لوش شي، هيا يا عبدالفتاح تعال نتصبح لنا قبل ما يجوا المعزيين، وأنته يا صهير صح صقر..
منصور راح وهز كتف صقر: صقر يا صقر..
عبد الفتاح نزلت دمعة من عينه خلسةً، ويلي عليه، من أمس ما وقف بكاء، كان يشوف لصور صفوان ويجلس يبكي لمن تعب ورقد بعد الفجر..
_ كلنا على دا الطريق يا اخوي، وربنا ما بيختار إلا يلي مقدر له يموت..
منصور يهز صقر: يا صقر يا ابني قم قده صباح..
صقر فز وجلس بسرعة، بسم الله عليك لا تخفش، هيا قم وتعال تصبح معانا..
صقر فرك عيونه، يحس بإنقباض بقلبه، مش قادر يعرف ليش، فجأة داهمه واقعه المرير، وتذكر موت صفوان وفز لمن وقف:
_ ص...صفوان..
عبد الفتاح ضغط على عيونه ونزل رأسه: ص...صفوان م...مات..
منصور حط يده فوق كتفه: الله يرحمه يا صقر..
صقر بلع ريقه بس حسه انغص فيبه واختنق من كلمة الله يرحمه، كلمة ما قدر يبلعها عقله، هيا تعال كل لك لقمة..
_ ل..لا شكرًا ما اشتيش..
.
البـارت 223 ◇
جُــرح القـريب غـريب 💔
👌🏻👇🏻 😍
عبد الفتاح: يا ابني تعال قدك لا غداء ولا عشاء، هيا تعال..
صقر وقف: لا يا اباه شكرًا، كل أنته، أنا بروح الحمام..
منصور: يا صقر ما يستويش كدا، الصوم عن الأكل ما بيرجعش لك صفوان..
صقر نزلوا دموعه بحرقة، وطوالي خرج، وعبدالفتاح تنهد، كلنا انقهرنا بس هو قهره أكبر، رباه وكبره وعاش كل حياته معه، صعب يتقبل موته يا ناس والله صعب اهئ اهئ..
عبدالقادر: بيتعود يا عبدالفتاح بيتعود، خلاص كل لك الآن وهو بخلي أيهم والعيال يراضوه، هيا..
منصور جلس: هيا يا بشار تعال صبوح..
بشار: لا شكرًا مش عايز..
وصقر خرج من الباب الخلفي للديوان وبشار جلس يشوف بالجوال، أيهم كان داخل السيارة ساند ليده للزجاج ومغطي باصابعه على عيونه، وأكرم يبكي عنده:
_ الله يرحمك يا صفوان، ص.. صقر قطع قلبي البارح وهو يصيح ويبكي عليه..
أيهم بعد اصابعه: الله يرحمه أيش بنسوي، ربنا كتب له كدا، (وشاف للساعة) فين تأخروا؟، قد كان أبي يوصلهم أحسن، راضحيني هنا ساعة..
أكرم مسح دموعه بالمنديل: العزاء بيكون هنا صدق يا أيهم؟
_ أيوة، زوج عمتي رفض إلا يسويه هنا، والعزاء حق النسوان ببيت خالتي سامية..
_ والله زوج عمتي دا معه فلوس، اتكفل بالعزاء وتكاليفه كلهم..
_ اااح الله يجزيه الخير، أغنى رجل يمني كيف ما بيدفعش يعني..
_ والله حظنا مليح دامه أغنى رجل يمني ونحنا قرايبة يا أيهم..
_ الفلوس مش كل شي يا أكرم، أنته تعرفت على عمتي وبناته وخواتنا صح؟
_ أيوة تعرفت عليهم كلهم، طيبين كتييير، وبشار ابن عمتي نجوى حبنا كتير وكنا نلعب بغرفته..
_ طيب ولمار ومُنى خواتنا قابلتهم؟
_ أيوة، مُنى صغيرة وطيبة كتير، بس لمار يا ساتر على متكبرة وعنادية، وللأمانة خوفتنا..
أيهم عدل جلسته: ليش أيش سوت؟
_ كدا جت تمشي كما الزرافة شايفة نفسه، وصافحتنا باصابع يده، ورفضن أمي تحضنه، وجلست مادة بوزه ورافضة تكلم نحنا، وكل ما تشتي أمي أو البنات يكلمونّه تسكت وتقلب عيونه، وتهدر مصري
_ الييييه علينا، ناقصنا المصريات ولواكتهن والله، الله يعين بس..
_ تصدق يا أيهم، شفت طباعه زي طباعك، لمن تعصب وكدا تجلس بضيق وعاده تسوي زيك لمن تعصب وتلف يد فوق التاني..
أيهم دفعه: يا أخي طر قال لك زيي، خلنا انزل اشوف فين تأخروا..
لمار نزلت لابسة عباية ابو ضغطات، وكانت مفتوحة كامل وبنطلونها الجينز وجرمها الأبيض واضحين، ومغطية شعرها من فوق ومن الخلف باين كامل وهو منسدل على ظهرها..
كريمة شافتها وشهقت ويدها على فمها: هيييي، أيش دا؟
لمار نزلت وبضيق ويد على الثاني: أنا جاهزة..
كريمة: أيش دا اللبس يا مجنونة!
نجوى: ليش كدا لابسة يا لمار؟
_ وفيها ايه يعني، بابا قال لي البس الحجاب، وأنا عمري ملبستهوش، كدا أحسن لي وليه..
شيمَاء: بس نحنا باليمن مش بمصر يا لمار، وعيب عند نحنا كدا تلبسي..
_ انتي حشرك ايه أصلًا، جايه تعلميني فرحانة أن رفقاتك دول علموك كم كلمة عدنية وبقيتي زيهو تلبسي وتتكلمي..
نجوى: لمار بس بلا مصايحة، لفي شعرك وزرزري العباية، عيب نحنا هنا بعدن والناس بيضحكوا عليك، بعدين ليش الشياكة دي رايحة عرس أو عزاء..
لمار تأففت: انتوا متخلفين كدا ليه، كله شوية روج خفيف وبودرة مش باينة أصلًا..
كريمة تضرب رأسها: واي واي يا ربي، البنت دي بتجيب لي الجلطة وبنوقع علكة بلسان الناس..
نجوى بتهديد: لمار زرزري العباية وغطي شعرك، يا أما بصيح لأبوك تسمعيني..
_ اووووف بقا، أنا لو كنت عارفة أن كدا بيحصل عمري مكنت جيت لهنا وكنت بقيت بمصر..
وزرزرت العباية ودخلت شعرها الأشقر داخله وشافت لنجوى، عجبك كدا يا عمتو؟
نجوى هزت رأسها بضيق: يعني مش كتير، بس أحسن من أول، هيا امشي هياا..
ومشت نجوى وكريمة بعدها، وشيمَاء شافت للمار، ايه انتي بتبصي ليا كدا ليه؟ عجبك شكلي الجديد صح؟
نجوى مشت وأكرم شاف لهن: خلاص جين يا أيهم..
أيهم رفع يداته: الحمدلله..
_ بس جت جدتي كريمة وعمتي نجوى..
_ خلنا انزل أسلم عليهن..
ونزل ونجوى جت، أيهم يا روح عمتك..
أيهم مبتسم وراح وهي ضمته: فديتك يا روح عمتك..
وباس راسها: كيفك يا عمة والحمدلله على السلامة مؤخرًا وسامحينا لأن ما جيت أسلم عليك..
_ لا عادي يا روح عمتك، ما شاء الله وكبرت وقدك شاب ساع ابوك، لو ما كنتش اعرفك من الصور ما كنتش تعرفت عليك وقلت دا غريب عند نحنا..
_ هههه الله يحفظك يا عمة..
وراح وسلم على كريمة، فديته مله، ناقصة العروسة بس..
نجوى: مله هو بس يأشر بيده وأني اجيبه له حتى لو هي بالصين..
أيهم: تسلمي تسلمي يا عمة الله يحفظك، فين البقية؟
كريمة: باقي لمار اختك وبنت عمتك شيمَاء، عادهم يتهادروا هناكه..
أيهم والكل لفت لهم...
.
البـارت 224 ◇
جُــرح القـريب غـريب 💔
👌🏻👇🏻 😍
📚 @rewayatyamania 🇾🇪
كريمة: باقي لمار اختك وبنت عمتك شيمَاء، عادهم يتهادروا هناكه..
أيهم والكل لفت لهم، وأيهم رن تلفونه..
_ انتي بتبصي عليا كدا ليه؟
شيمَاء: يمكن زي ما قلتي لي أنني تعلمت كم كلمة من صاحباتي العدنيات، وتعلمت البس زيهم، لكنني مسوية كدا لأنني مقتنعة وراضية، وأصلي بالأول والأخير يمنية عدنية حتى لو انولدت وكبرت بمصر (لمار تقلب عيونها بتجاهل) وأمي وأبي يمنيين، وانتي كمان ابوك يمني، ولازم تعرفي أن الدم عمره ما بيصير مي زي ما يقولوا، ومهما كنتي مصرية وطباعك مصرية، أكيد بيجي يوم بيطلع عندك العرق اليمني، ولو مش قادرة تطلعيه، على الأقل اتدكري المقولة يلي تقول " لو انته في ارضهم ارضهم "..
وقفت منها وراحت، ولمار تشططت من الغيظ وهي تشوف لشيمَاء يلي بتوصل لعند أمها، ونجوى صاحت من عند السيارة..
_ مله اليوم يا بنت تأخرنا..
لمار سحبت شعرها من الخلف بضيق وفكت العباية بعناد ومشت ناحيهم..
أيهم يتصل: هاه جراح، والله بالبيت حق عمتي، أيوة هنا بس عاده راقد..
جراح: أنا بوصل أمي والبقية لبيت العم عبدالفتاح وأجي لعندكم..
_ خلاص لمن توصل بنلتقي هناك، أنا بوصل عمتي والبقية لعندهم، خلاص تمام، ملتقيين..
شيمَاء وصلت ونجوى صايحتها: ساعة لكن تتهادرين، (ولفت لأيهم المقفي منها) المهم، دا ابن خالك الكبير، أيهم..
شيمَاء شافت له وهو لفت لها وكلهم فززوا، شيمَاء شافت لأمها:
_ د.. دا أيهم ابن خالي عبد القادر!
كريمة تبتسم وأكرم يشوف لهم من الطاقة حق السيارة: أيوة دا هو (ومسحت على يده) رجال ماشاء الله عليه..
أيهم عاده ما استوعب، وشيمَاء يدها على فمها،
أيهم نطق:
_ ا.. انتي!، إدا دي ب.. بنت عمتي، (ولفت لقدام عند لمار) م.. معناته ي.. يلي جايه هي....
نجوى بفرح: لمار اختك المصرية..
أيهم: ...
شيمَاء والكل يشوف للمار، أكرم يشوفها كيف تمشي وكيف لابسة وصفر وهو مضيق لعيونه ويرفع حاجبه اليسار يبتسم:
_ الله يستر بس..
أيهم عقد حواجبه وهو فاتح لفمه يشوفها تمشي والعباية ترفرف خلفها وبنطلون جينز، لين فوق مفصل القدم وبوط ابيض مرتفع، والمقرمة توقع لرقبتها، ويبان شعرها، ونجوى شافت لأمها بصدمة ويلي تطبع خدها، وشيمَاء طبعت جبينها، وكلهم شافوا لأيهم المصعوق من يلي يشوفه، لمار وصلت ووقفت قدامهم وسوت يد على الثاني:
_ انتوا واقفين هنا بتستنوا ايه؟
نجوى: يا بنت اني أيش قلت لك هاه..
_ لساتنا هنا مارحناش للعزاء، خليني كدا لغاية ما اوصل بعديها هعمل يلي انتي عيزاه..
شيمَاء أشرت لها بعيونها ناحي أيهم وهي لفتت له، وفتحت فمها لمن شافته وعرفت أنه يلي تصايحوا مع بعض عند الساحل حق البحر..
كريمة: دا اخوك أيهم يا لمار..
لمار شهقت وأشرت له باصبعها وهو أشر باصبعه لعندها وبنفس الوقت والصدمة:
_ دا اخويا!!!!!
_ دي اختي!!!!!
جراح وصل بيت عبد الفتاح، خلاص يا اماه برجع لك في الليل..
_ طيب يا قلب أمك، بس انتبه من الطريق..
_ طيب..
وهو مشى وجواله رن: حيا كمال..
_ حياك يا صاحبي، هاه قد رحت عند صقر؟
_ والله عاد انا وصلت أمي لبيت العم عبدالفتاح، وحاليًا مراعي لأيهم قال بيجي لهنا يودينا عنده، لأن راحوا بيت عمته البارح بيتهم مزحوم نسوان..
_ همممم، خلاص أنا بمر لحسام للمستشفى وأجي لعندكم، هو ما راح كمان الكلية اليوم صح؟
_ أيوة، والله ما لي نفس حتى اشرب ماء، قلبي مقهور على صقر..
_ يلا ربنا كريم، خلاص ملتقيين، الله معك..
وغلق وشاف لقدام، خلاص يا فندم أنا بروح لعند صقر اشوفه..
عزام: براحتك يا ابني، خلك معه وأوقف جنبه، بخلي واحد من العسكر يغطي مكانك هنا..
_ بس قد في نقص بعدد العسكر زي ما تعرف..
_ كلمت قائد اللواء الأول دعم واسناد يمدنا بعدد من العسكر وقال بيساعد نحنا، اغلبية العسكر حقنا مراقبين اوكار مروجين المخدرات..
_ متى نقدر نمسكهم يا فندم؟
_ قريب إن شاء الله، بس كنا نشتي نعرف هوية القائد حقهم والناس يلي تدعمه ، دا بيسهل عملنا كتير، لو عرفنا مصدر التمويل حقه بنقدر ننهيهم، لأن في واحد يدعمه لدلك مشروعه قوي ومش قادرين نوقفه، كلما نمسك مكان يصنعوا فيبه الحشيش نلاقي تلاتة غيره، ودا يدل إن في واحد يدعمه..
_ أكيد بيدعموه دامه يبيع لهم ويرجع الفلوس لهم أضعاف، بس تقول يا فندم يلي يسمونّه القائد موجود هنا في اليمن أو يتحكم فيبهم من الخارج؟
_ والله دا يلي مش قادرين نعرفه، لكن دامه يخلي رجاله ينتحلوا شخصيته، فأكيد أنه هنا..
_ وكيف عرفت يا فندم؟
_ لو هو مش هنا كان بيكشف هويته وما بيخافش لأنه بعيد وما في يد بتوصل له، لكن دامه متستر ومدني الستار على نفسه، فأكيد بيكون هنا في اليمن..
_ اااا فهمت الآن...
.
البـارت 225 ◇
جُــرح القـريب غـريب 💔
👌🏻👇🏻 😍
_ اااا فهمت الآن، الله يقدرنا ونمسكه (ووقف) خلاص أنا بمشي، تأمرنا بشي يا فندم؟
_ لا تسلم، أنا بخلص يلي بيدي وبلحقكم..
كمال هز رأه وضرب له التحية وراح، وعزام مسك رأسه ونفخ:
_ شكله مكانه زعلان، اااااه يا رب عليك بس..
حسام وصل للمستشفى، وراحوا الغرفة يلي فيبها رُبا، ودخلوا، السلام عليكم..
وداد وعارف: وعليكم السلام ورحمة الله..
حسام شاف لعارف يلي يشوف له ببرود قاتل، ورجع شاف لرُبا يلي هي بنفس الوضعية من أمس..
_ كيف صحته؟
وداد هزت رأسها بتعب: زي ما تشوف يا ابني، على دي الحال من أمس، والدكتور قال نراعيه لمن تصحى..
غزل: إن شاء الله بتصحى يا اماه ولا يهمك، قد كلنا بندعي له..
زيد: وأنا دعيت له كمان يا اباه..
عارف باسه بالخد: فديته يلي يحب اخته (وشاف لحسام) مش يكرهه زي بعض ناس..
وداد وغزل شافوا لحسام يلي فزز: أنته تدور مصايحة من الصبح؟
وداد: عارف حسام بس نحنا بمستشفى..
_ ما ادورش، بس يلي قلته هو الصدق، لتكون زعلت..
حسام يشتي يرد بس سكت: أنا عشان رُبا النايمة دي ما بردش عليك، (وشاف لأمه) اماه أنا بروح عند صقر اشوفه، إدا احتجتي شي أو حصل شي كلمينا..
عارف: ما فيش داعي نكلمك، الأحسن ما تجيش، ما اشتيش رُبا تصحى وتشوف وجه يلي حاول يقتله..
غزل طوالي وقفت ومسكت حسام: ح..حسام روح لك خ..خلاص قد اني بكلمك ما عليك..
حسام بس يشوف لعارف وعيونه بتفترسه وتنهش جسده، وخرج طوالي وهو مقرح، وداد تبكي:
_ ليش تصايحه قد قدامك يتطمن على اخته..
_ بس بسببه كانت بتموت يا وداد، بتموت وما كنا بنشوفه..
زيد: بس حسام قال أنه يحب رُبا، وكمان اليوم اعطاني جواله ألعب فيبه..
عارف فزز، ووداد فرحت وشافت لغزل: ص...صدق يلي قاله اخوك يا غزل؟
غزل هزت رأسها: ا..أيوة يا اماه، و..ووعدني أنه إدا صحت رُبا بيغير طباعه معه..
وداد فرحت ودمعت وشافت لعارف: س..سمعت يا عارف؟
عارف تجاهلها وشاف للجنب الثاني، وهي كانت سعيدة ومسكت يد رُبا:
_ ر..رُبا يا روح أمك قومي، شوفي حسام حالف يغير طباعه معك وبيحبك زي ما تحبيه أنتي، هيا يا روح أمك اصحي وفرحي قلوبنا..
بس رُبا لا شيء يوحي ببقاءها على قيد الحياة إلا ذاك النفس الذي يخرج من انفها..
دا اخويا!!!
_ دي أختي!!!
كريمة والكل استغرب، عدا شيمَاء يلي عرفت ليش كانوا الأخوة مصدومين من بعض ومن يلي سمعوه..
_ ل..لا يا عمة نجوى بلا جنان قال لك اختي..
لمار: ل.. لا يا عمتو ماتقوليش إن دا أخويا لا..
نجوى استغربت: م..ما لكم كدا، الا دا اخوك أيهم ودي اختك لمار ما لكم مصدومين كدا!
أيهم شاف للمار من فوق لتحت وهي شافت له ورجعت للخلف:
_ اييييه، دا اخويا، لا لا مش معقول..
أيهم فرك شعره، وشيمَاء يدها على فمها، وكريمة وأكرم ونجوى يشوفوا وهم منصدمين ومستغربين من ردة فعلهم..
نجوى: الآن ما لكم أيش في؟
لمار تأشر بيدها لعند أيهم من فوق لتحت: دا المتخلف يلي كان بيزعق علينا وبيهينا يطلع اخويا!
نجوى: أيش تقولي انتي؟
أيهم بغضب: دي كيف لابسة كدا فين مفكرة نفسه؟
لمار: هي أنته متزعقش عليا كدا فاكر نفسك مين..
كريمة تصنمت وأكرم فتح باب السيارة وخرج، انتي فين تحسبي نفسك عشان لابسة كدا عباية وفاتح له و..وشعرك باين كدا، وبعدين أيش المكياج دا يلي بوجهك رايحة زواج..
لمار: أنته يا هوو بقولك متزعقش كدا عليا بنت أمك يعني..
أيهم قدم ناحيها ونجوى غطت عليه: ا..أيهم بس اهدأ اهدأ..
_ كيف اهدأ وانتي تشوفي شكله يا عمه، الآن، الااان تروحي وتبدلي هيااا..
نجوى: ت..تمام بخليه تبدل تمام..
شيماء مصنمة مكانها
لمار: اييه، وأنته فاكر نفسك مين عشان اسمعك واروح اغير هدومي عشان ارضي حضرتك..
أيهم يدفع نجوى وهي تدفعه: تسمعيه أيش تقول يا عمة تسمعيه..
_ ما عليك منه اني بقنعة بطلوا صياح (ولفتت للمار) لمار بس اطلعي بدلي العباية وامسحي يلي بوجهك هيا..
لمار سوت يد فوق الثاني: لا مش هعمل كدا أبدًا..
كريمة شهقت: يا بنت عيب عليك تصايحي اخوك وتعلي صوتك عليه كدا، بعدين روحي بدلي اسمعي الكلام عيب تروحي العزاء كدا الناس بيضحكوا علينا..
شيمَاء مسكت بيد لمار: ل..لمار تعالي نبدل لك هيا..
لمار سحبت يدها وشافت لأيهم: مش هغير هدومي عشان المتخلف دا..
أيهم بدهشة: وعادك تقولي لي متخلف!
_ أيوة متخلف، المرة يلي فاتت رفضت تخليني اركب فوق الخيل، والمرة دي جاي تتحكم بلبسي، لا كدا أنا هضطر اطلع العرق المصري يا روح أمك..
أكرم تلجم مكانه، لا شكلك الفتين (تعودتي) على مصر يا بنت، والواضح عادك ما تعرفيش العرق العدني لمن يطلع، يلا روحي بدلي وغيري العباية، تشتي تسوي لنحنا سمعة بالحافة يعني..
.
البـارت 226 ◇
جُــرح القـريب غـريب 💔
👌🏻👇🏻 😍
_ حافة ايه وجنان ايه، اسمع يا أيهم، أنا مش هغير اللبس دا، وأعلى ما بخيلك اركبو..
نجوى: يا بنت بس لا تدوريش المشاكل..
_ دا الواقف وراكي محتمي بيكي هو يلي يدور ع المشاكل..
أيهم صك اسنانه: كدا يعني، طيييب يا لمار (ودفع نجوى قليل) ابعدي انتي يا عمة..
أكرم فتح فمه، كريمة وشيمَاء يشوفوا له وهو قرب ناحي لمار يلي تهز نفسها ويد على الثاني والخوف ما عرف طريق لها، أيهم وقف قدامها:
_ لمار عاد انا عاقل للآن ومتحمل لك لأنه أول لقاء بيننا..
لمار ويد فوق الثاني: تاني لقاء..
أيهم مسح وجهه بعدم صبر: تاني تالت أو حتى عاشر لقاء، خليه لقاء حميمي بين أخ وأخته ما يعرفوش بعض من ١٨ سنة، اقلعي الشيطان واطلعي بدلي الشميز دا يلي مسميته عباية وغطي شعرك دا، هيا بسرعة..
لمار بعناد: لأه، ووريني بقا هتعمل ايه..
أيهم هز رأسه: دامه كدا طيب (وشاف يمين ويسار يدور على شي) طيب، أنا هوريك هعمل ايه..
ومسك بشعرها من الخلف هي صاحت: ااااااااه..
والكل فز بخوف، وشدها وهو يمشي بغضب ويسحبها بعده..
كريمة: و.. واي أيش يسوي دا الحقيه يا نجوى..
أكرم: شكل العرق العدني عنده قرح..
نجوى راحت تلحقهم وهو يمشي لمار معه وهي تتوجع وتطبع يده: فك لي بقا أنته بتعمل ايه، بقول لك فك لي اوعى ايدك دي قبل مكسرها لك..
أيهم: تعاندينا هاه، طيب يا بنت مصر..
ووصلها لعند نافورة ماء: الآن بوريك أيس بسوي..
ونزل رأسها ودخل يده بالماء ويطفش وجهها ويمسحه بغضب وهي تصيح:
_ لأه يا مجنون بتعمل ايه، ا..اب...ابعد كدا اوعى..
وايهم يمسح لها وجهها: تحسبي نفسك فين عشان تلبسي كدا..
_ ابعد عنييي..
نجوى جت وسحبتها: أيهم بس أيش تسوي..
لمار بغضب وشعرها منكوش ووجهها والعباية مبللين: ا..أنته عملت ايه، عملت اييييه، فاكر نفسك مين عشان تعمل بيا كدا!
_ الآن اطلعي وبدلي هيا..
_ مش هغير هدومي سامعنيي..
أيهم: لا كدا شكلك تشتينا اغطسك داخلة الماء..
ومشى ناحيها وهي خافت ونجوى غطت عليها: بس يا أيهم بسسس، بس وقف الجنان حقك..
_كلميه إدًا وفهميه على عاداتنا يا عمة، لأن شكل رأسه فاضي ما فيبوش عقل..
وراح للسيارة، ولمار قرحت: أنته يا متخلف، يلي شايف حالك، مفكر نفسك مين، مييين؟
أيهم وقف عند كريمة يلي تشوف له بخوف، وشيمَاء مقفية منه خافت، وكانت ترجف، وهو يمسح وجهه ويده على خصره، أكرم شاف له:
_ والله وسويت فلم هندي قوي يا أيهم..
_ اصه أنته مش ناقصنا تتفلسف عليا، بلا تربية بنت فين تحسب نفسه عايشة، قال لك اركب خيل واطلع بالعباية الخفاش دي، دي قده مصياعة..
نجوى تشدها: بس يا بنت انتي التانية بسس، كله منك، أني قلت لك وعادك داخل بدلي، لكنك عنادية وشوفي نتيجة عنادك، هيا طيري وبدلي والبسي كما الناس هياااا..
لمار: لا انتوا كدا عيلة بجد متخلفة، كلكو كدا على بعضيكو عبارة عن كومة تخلف..
عبدالقادر جاء جري: خير خير ليش كدا اصواتكم طالعة فضحتونا..
لمار شافت لبعيد وهي تلف شعرها، ووقف قدامها، ما لكم يا نجوى ليش الصياح؟
_ ه.. هاه، ل.. لا ولا شي ولا شي..
لمار راحت وضمت ابوها وهي تبكي: بابا بابا اهئ اهئ يا بابا..
عبد القادر خاف: م.. ما لك يا لمار ليش تبكي..
أيهم شاف لهم: الليييه علينا، وبدأنا هبال البنات..
نجوى: ل.. لا ولا فيبه شي..
_ كيف ولا فيبه شي وهي تبكي، أيش فيبك يا لمار هادرينا..
لمار أشرت لعند أيهم: ابنك المتخلف دا هئ هئ ش.. شدني من شعري وقعد يرشني بالمية، وجعني اوي يا بابا اهئ اهئ..
عبد القادر شاف لأيهم بغضب: أيشش!
شيمَاء فززت وكريمة تفرك يداتها: يا رب استر يا رب..
أكرم: شكله كبرت يا أيهم..
أيهم: خله إن شاء الله تسمن مش تكبر..
نجوى مسكت يده: لا م.. مش حاجة يا عبدالقادر ب.. بس..
لمار: وجعني اوي يا بابا، أنا مش بحبو، (ومسكت العباية) بص هدومي مبللة ازاي يا بابا..
عبد القادر راح لعند أيهم بغضب، ونجوى دفعتها بالكتف، أيش سويتي يا مجنونة (وشافت لعبدالقادر) عبد القادر راعي، عبد القادر..
لمار إبتسمت بخبث ونصر ولحقتها، شيمَاء خافت، وعبدالقادر وقف قدام أيهم يلي كان اقصر منه بكم بنانة
_ ليش سويت كدا باختك يا أيهم؟
كريمة: يا ابني اهدأ مش كدا أنته فاهم الموضوع غلط..
_ خليه يتكلم هو يا اماه، هيا هادرنا ما لك..
نجوى وصلت ومسكت بيده: عبدالقادر بس اسمعنا..
وهو سحب يده، ليش سويت كدا هادرنا..
أيهم شاف للمار يلي باين مقرحة، أنته كيف تسمح لبنتك تخرج كدا بالعباية يلي زي رداء باتمان هاه، راضيك تخرج كدا وشعره مكشوف قدام الناس..
عبدالقادر شاف للمار يلي لمت العباية: ا.. أنا كنت ماشية وهي انفتحت من نفسها، ودا فكر إن انا طالعة كدا..
شيمَاء والكل انصدم...
.
البـارت 227 ◇
جُــرح القـريب غـريب 💔
👌🏻👇🏻 😍
شيمَاء والكل انصدم من كذبها: دي تكدب
يا اباه، كانت تعاندنا وتقول إننا متخلف..
عبدالقادر: اسمعنا يا أيهم، أنا عاد انا عايش، وما بسمح لكش تمد يدك على وحدة من خواتك، زي ما تحب أسماء ورزان وتقدرهم، لازم تحب لمار ومُنى وتقدرهم، حسك عينك تبكيهم مرة تانية لأن انا بضطر اتصرف معك بأسلوب تاني..
لمار إبتسمت بنصر، أكرم: يا اباه أنته فهمت الموضوع غلط اسمع ا...
_ ولا بسمع كلمة، هيا روحوا الآن بيجوا المعزيين وانتوا صياح هنا..
أيهم بلع ريقه بغصة وشاف لأبوه يلي عيونه تنضح بالشرر: طيب، طيب شجعه على دي الأمور، العباية المفتوحة والشعر المفتوح، اسمعنا يا اباه، زي ما أنا مربي رزان وأسماء على الحياء والحشمة، لازم اربي لمار دي كيف تتحشم قدام الناس، راضيك أنه تطلع كدا وجسمه باين قدام الكل يرضيك!
عبد القادر شاف للمار: بس هي قالن أنه افتكن عليه..
لمار راحت جري ومسكت بيد ابوها وبصوت مليان براءة: أيوة يا بابا من غير قصد طبعًا بس أيهم دا هجم عليا متل الوحش، وما ادانيش فرصة عشان افهمو..
عبدالقادر شاف لأيهم المفزز من كذبها: يا اباه والله أنه تكدب عليك، هي رفضن تستر شعره وتبدل العباية دي..
عبد القادر شاف للمار: صدق يا لمار؟
_ لا والله دا بيكدب، وحتى بص (وقامت وسوت شعرها كعكعة وزرزرت العباية للأخير ولفت المقرمة عدد من المرات وسترت نفسها)، بص يا بابا، حلو مش كدا..
الكل كان متفاجئ ومنصدم، وهو شاف لأيهم: شفت حقيقة اختك يلي كنت بتظلمه يا أيهم..
لمار شافت لأيهم: ا..أنا مسمحاه يا بابا، هو اخويا بالنهاية..
أيهم تشطط وإبتسامتها تاك استفزته، خلاص سهل يا روح ابوك، هيا روحوا بسرعة، وصلهم يا أيهم، بعدين ارجع معي لك كلام..
وراح ولمار فارحة، أكرم شاف لها: ليش كدبتي على أبي كدا؟
_ أنا مكذبتش، دي هيا الحقيقة أو على الأقل (وشافت لأيهم) بابا لازم يشوفها كدا..
أيهم فاض الغضب منه وراح ووقف قدامها: اسمعينا يا لمار، لا تحسبيش لأن أبي ساكت لك إن انا بكون زيه كدا، لا يا روحي، دامك جيتي لهنا لعدن، فالقوانين نفسه بتنطبق عليك، افهمي دا وخليه (وشد اذنها لمن صاحت) حلق بأدنك..
وهي صكت اسنانها وهي تشوف له، ورجعت إبتسمت: لو قدرت حاول..
وطلعت السيارة وهو مسح وجهه، كريمة قربت منه: ما عليك منه يا روح جدتك، دي عاشن بمصر وتطبعن باطباعه..
أيهم: ودامه جت هنا لازم تتطبع باطباعنا يا جدة، فهمي ابنك دا الشي وفهميه لحفيدتك لأن انا شكلي بسوي مصيبة شوفينا..
وطلع وأكرم بعده، نجوى تأفف بضيق،: هيا اطلعي يا اماه اطلعي..
شيمَاء طلعت السيارة وشدت لمار: ليش سويتي كدا بأخوك يا جنية..
_ اخويا!، لسا مش معترفة بيه انو اخويا، مشفتيش عمل فيا ايه، فكراني حسيبوه يعمل كدا ويمشي
_ بس انتي كدا خربتي بين الأب وابنه وخليتيهم يتصايحوا، دا من غير الكلام يلي قال خالي بيقوله لأيهم..
_ مفيش مشكلة، خليهم يتخانقوا، حاكم حسيت إن غليلي اتشفى وقت بابا بهدلو..
_ يا بنت ا.....
بس قاطعها دخلول أيهم يلي مقرح فيوز، لمار قربت من شيمَاء:
_ بصي لو ازاي معصب، خليه يتحرق..
_ انتي أيش طينتك كه فهميني..
وطلع أكرم وكريمة ونجوى، وأيهم شاف للمار بالمرايا وهي تشوف له وتبتسم بنصر، وهو رفع المراية وهز رأسه وشغل السيارة وهو يشوف للخارج وبصوت صغير:
_ طيب يا لمار، طيييب، بنشوف نهايته كيف..
ووصلهم لباب بيت عبدالفتاح: خلاص وصلنا انزلوا..
والكل نزل، وهو شاف لأكرم: شف أمي أو خالتي إدا يحتاجوا شي والا شي كلمنا تمام..
_ تمام، فين بتروح أنته؟
_ برجع فِلة عمتي اشوف صقر يمكن قد صحى..
ونزلوا كلهم وبقيت لمار آخر وحدة، وأيهم صيح لها: لمار (لمار قلبت عيونها بدون ما تشوفه حتى)، خلك على حشمتك دي، أحسن بيقع لك خبر تاني، انتي معك أخ كبير الآن يخاف عليك، اسمعي الكلام أحسن لك..
لمار شافت له: ومتنساش كمان إن عندي بابا ولساتو عايش، يا... اخويا الكبير..
وخرجت وشافت له وغلقت الباب بقوة لمن رجع أيهم برأسه لليمين من قوة الصوت:
_ الله يقلع ابليسك بنت، أيش دا (وشاف لها وإبتسم) شريرة زي اخوه
جراح وقف قدامه: صباحك يا صاحبي..
_ صباح النور والسرور، هيا تطلع مشينا..
جراح يشوف للسيارة: اوهوو ونيسان كمان!، شكل الكل يعرف يسوق إلا أنا..
_ بعلمك لو تشتي..
جراح طبعه: هيا اسكت وخلنا نمشي، بعدين أعرف اسوق قد علمنا كمال، بس من فينه لك دي السيارة؟
_ دي حق أبي بزيته عليه عشان اوصل عمتي والبقية لهنا، عاد حصل معي شي، واهبوووي لو تعرفه بتنجلط..
_ خير أيش هو؟
_ هيا اطلع بقص لك ياته على طريقنا هيا..
جراح ركب ومشوا، ودخلت نجوى...
.
البـارت 228 ◇
جُــرح القـريب غـريب 💔
👌🏻👇🏻 😍
جراح ركب ومشوا، ودخلت نجوى والبقية وكان في صوت بكاء خفيف، وبيت عبدالفتاح غرفتين ومطبخ، ودخلين ولمار تشوف البيت (ايه البيت دا، مقبلش اعيش فيه ولو لسانية)، ودخلت مع البقية، وأسماء ظهرت ومعاها عصير: عمة نجوى جدة كريمة، حيا وسهلا..
وحطت العصير وسلمت عليهن وحضنت شيمَاء، كيف حالك يا أسماء؟
_ اااح، والله ما أقول إلا الحمدلله والشكر (وشافت للمار) كيف حالك يا لمار؟
لمار بس هزت رأسها، وجت مُنى وحضنتهم وحضنت لمار: وحشتيني اوي يا لمار..
_ لو وحشتك زي ما بتقولي كان لازم تفضلي جنبي ومتجيش هنا..
_ بس أنا كنت عايزة افضل مع اخواتي أسماء ورزان..
كريمة: وفين أمك وخالتك يا أسماء؟
_ داخل يا جدة عند المعزيات، حيا بكن ادخلين..
وراحين الغرفة وشافين سامية تبكي وسوسن عندها، وراحين وجلسين، والأنظار عليهن، رزان جت، وفرحت:
_ شيووووم..
وحضنتها: الحمدلله إنك جيتي، والله فقدت لك..
لمار: بس لسا البارح كنتي عندها، أي سر الأشتياق دا..
_ ولا شي، بس الناس يلي نحبهم نفقد لهم..
شيماء: واني فقدت لك كمان يا رزان، أمك وخالتك كيف هم؟
_ والله خالتي ولا سكتن من أمس بكاء، بس قد أمي بتهديه قليل..
أسماء: ادخلين داخل يا لمار، قليل نسوي عصير ونرجع لعندكن..
شيماء: بجي اساعدكن..
رزان: يا بنت كله عصير قال لك تساعدينا، بعدين انتي ضيفة ادخلي داخل..
_ أيش ضيفة شوفيني بزعل منك، انتن بنات خالي وأحبكن كتير، وكلنا أهل وحبايب وبجي اساعدكن..
أسماء: دامك مصرة تعالي نروح نكسر تلج ونسوي عصير وماء بارد نوزعه على الضيوف..
مُنى: وأنا وأنا عايزة اساعدكو..
أسماء باستها: فديت يلي تشتي تساعد خواته، هيا تعالي إذًا (وشافت للمار) تجي معانا أو تدخلي داخل يا لمار؟
لمار شافت يداتها: لا مبجيش معاكو، أنا لسا عاملة منكير ومش عايزة ظوافري يتكسروا، هروح عند عمتو..
وراحت ورزان تشوف لها: واااي على متكبرة وشايفة نفسه!
أسماء أشرت لها بعيونها لعند منى، شيمَاء إبتسمت: والله هي طيبة بس يشتي له وقت عشان تتعود..
رزان: بنشوف، هيا هيا دخلنا المطبخ..
ودخلين وكانت نوال تسوي شاي حليب، وتغسل الثلاجات، وهن دخلين..
أسماء: خالة نوال، دي شيماء بنت عمتي شوفيه..
نوال شافتها وابتسمت ومسحت يداتها بالجلبية حقها وراحت وصافحتها:
_ حيا بك بيننا وبين أهلك يا شيماء..
_ الله يحييك يا خالة تسلمي، ما شاء الله كل أهل عدن طيبين وحبابين كتير..
نوال: ما شاء الله تعرفي تتكلمي عدني زينا، قلت إنك بس تتكلمي مصري..
_ أيوة اتكلم مصري، بس صديقاتي العدنيات علمني اللهجة العدنية وكمان أمي وأبي علموني ياته..
نوال: اهااا، حيا بك بيننا للمرة التانية يا بنتي، أسماء قد كسرتي تلج؟
_ الآن يا خالة..
شيمَاء رفعت العباية: وأني أيش اسوي؟
نوال: مله يا بنتي عادك ضيفة ما يصلحش تشتغلي..
_ مله اني من أهل البيت يا خالة وشغلهم راحة بالنسبة لي..
رزان: ليتك عطيتي أختي لمار ولو شوية..
نوال: الله يحفظك يا بنتي، لسانك كما العسل، خلاص دامك مصرة اعصري عصير داخلة الترمس..
شيمَاء بإحراج: ا..أيش يعني ترمس يا خالة نوال؟
نوال ضحك: دي يلي هناك اسمه ترمس حق المي..
رزان مسكت بيدها: هيا تعالي انتي ومُنى نعصر عصير تعالين..
وراحين ونوال تشوف لهن وكم باينة شيمَاء مأدبة وطيبة..
داخل السيارة، جراح ضحك بصدمة، قل والله يا أيهم..
_ أكلمك الصدق يا صاحبي، والله طلعت لي شعر رأسي كدا للجو، كما المسامير خلته، قرحت فيبي، قال لك أيش، ايه التخلف دا..
_ والله الموضوع صادم وبقوة، ي...يعني داك الرجال يلي صايحنا طلع عمك زوج عمتك..
_ أيوة، لو تشوف على بيت معه وكم هو بزنسمان ما تصدقش، تعرف أصلًا هو طلع نفسه منص..
وجواله رن وهو سحبه: هاه اباه..
_ هاه أيهم، فينك أنته؟
_ وصلت عمتي والبقية لبيت خالتي سامية والآن راجع لعندكم..
_ طيب شفت صقر ابن خالتك؟
_ صقر!!، قده عندكم..
_ لا مهلوش، رفض يتصبح معانا وخرج ومعرفش فين، دورت عليه وما حصلتوش..
_ ط.. طيب بدوره أنا، وإدا رجع للشقة كلمنا، يلا (وشاف لجراح) ، يقول لك صقر مهلوش بالفلة، مدريش فين راح..
_ اممممم، راعي اتصل لحسام اشوف إدا عنده(واتصل لحسام) الو حسام، شفت صقر؟
_ لا والله عاد انا جاي لبيت العزاء، ليش مش موجود هناك؟
_ لا، اتصل ابو أيهم وكلمنا، تقول رجع بيته؟
_ ما أعتقدش لأن بيتهم كله نسوان فين يروح، أعتقد أنه راح للقبر حق صفوان..
_ ااااا أيوة معك حق، أنته فينك الآن؟
_ جاي مع كمال للفلة، خلاص دام صقر مهلوش هناك خلونا نلتقي عند قبر صفوان..
_ خلاص اوكِ، يلا ملتقيين، الله معك،
خلاص لعند القبر حق صفوان يا أيهم..
_ اببببشر يا قائدنا..
وراحوا لهناك وصقر...
.
البـارت 229 ◇
جُــرح القـريب غـريب 💔
👌🏻👇🏻 😍
وراحوا لهناك وصقر كان يبكي وهو حاضن لقبر صفوان، ل.. ليش سبتنا يا صفوان، معقولة ساخي فيبي تبكينا كدا عليك، ع.. هئ هئ على أساس بتشفى وتدرس و..وبتكون د.. دكتور عشان تعالج يلي زيك، اهئ اهئ، ليش يا صفوان ليش، اهئ اهئ، يا رب صبرني يا الله، والله مش قادر على فراقك يا صفوان مش قادر ااااااه يا رب..
وقف الطقم حق كمال ونزل مع حسام وراحوا لعند صقر وجلسوا جنبه، بس يا صقر حرام عليك تحرقه وعاده طفل حرام يا صاحبي..
_ ب..بس هو قهرنا عليه يا حسام قهرنا..
كمال: عارفين يا صقر، بس لمتى الحزن يا صاحبي، والله ما عمرنا بنستفيد من الحزن إلا الوجع أكتر..
صقر رفع عيونه للسماء: ياااا رب صبرنا يا الله،(وشاف للقبر) تصدقوا يا عيال ا..هئ هئ أنه كان يشتي يكبر ويكون طبيب عشان يعالج المرضى مثله، ل..هئ هئ ليته عاش، عشان يحقق حلمه و..اهئ اهئ ااااا..
حسام فرك ظهره وباس رأسه: خلاص يا صقر الله يرحمه يا صاحبي..
كمال مسح انفه ودمعه، وتنهد بقهر، وجت السيارة يلي فيها أيهم وجراح ونزلوا، وجلس أيهم طوالي حضن صقر:
_ صقر لا تقهر صفوان وتقهرنا معه، يا ابن خالتي، لا، يا صاحبي، لا تبكيش كدا وتحرقه، اتخيل إنك لمن تبكي كل دمعة من عينك هي جبل نار ينزل فوق صفوان وهو يصيح ويتوجع بس أنته ما تسمعوش..
صقر يمسح دموعه وجراح استلم الحديث، أيوة يا صقر اتخيل كم ينحرق بسببك وبسبب يلي يبكوا عليه، هو مات صح، بس دكراه للأبد بتبقى محاوطة لك ولنحنا كلنا..
صقر تنهد بغصة: يا ليت أقدر أوقف بكاء،
لكن مش بيدي يا عيال والله مش بيدي..
كمال: بتتقبل دا الشي مع الوقت، وربنا اكرم نحنا باللقاء بالآخرة مع من نحب، عشان نعيش حياة ابدية معاهم، سعادة وهناء لا مرض ولا تعب ولا هم ولا غم، دا نتيحة صبر المؤمن واحتسابه، وأنته اصبر واحتسب يا صقر عشان ربنا يجمعك بصفوان بحياة ابدية سعيدة..
صقر حس بالراحة من كلامهم وهز رأسه، حسام ضحك قليل: أعتقد بعد كلام الشيخ كمال ما لكش حجة تبكي يا صقر..
جراح: والله صدق، مله ابن ابو بكر الشيخ ما لك، طبيعي يحفظ كلام يريح النفس كدا منه..
@rewayatyamania المصدر الأول للروايات
كمال: الله يقلعكم عيال، قلبتونّه هبال وفلسفة، هيا بلا هدرة فاضي وخلونا نمشي الشمس قرحن رأسي..
أيهم: أنته واصل داخل الشمس وزام، ولمن تجي لعند نحنا وتحسه قليل تقول شمس وحما، على أساس الشمس يلي بالمعسكر اشعته باردة..
حسام والعيال ضحكوا عدا صقر يلي هزوه أيهم وحسام، هيا قم رحنا وبطل الزعل، شوف هاه (وقام يعدهم) واحد اتنين تلاتة اربعة، كلنا بننقهر ونزعل عليك زيما تقهر وتزعل على صفوان، شوفنا ما قدرناش نروح الكلية عشانك وعشان نوقف معك، مع إن انا والله معي كنترول اليوم..
صقر: سامحونا امانة عليكم، كنتوا تروحوا وما عليكم مني، وأنته يا كمال أكيد معك معسكر وزام وعطلتك..
جراح: يا أخي سهل كله يوم ونرجع ندرس، بعدين ما نقدرش نروح ونسيبك، تحسب قلبنا بيطاوعنا..
أيهم: يا أخي طز بالكنترول والسمنارات، وطز بالكلية بكله، الله يجعل له صاروخ يفجره..
حسام رفع يداته: ااااامين..
جراح: هه، ما لكم قلبتوا كدا، على أساس دراسة ونشتي جراحة وما ادريش أيش..
حسام: يا أخي سكه لك، والله لو اجلس اشرب شاي بالبقالة يوميًا أحسن لي من المحاضرات..
كمال: دا لو ندبحه بنلاقي بدل الدم بيطلع شاي..
صقر إبتسم وفلتت ضحكة خفيفة منه، وأيهم صاح وهو يحضنه:
_ افديه أنا يلي ضحك..
وهم فرحوا لمن شافوا صقر يبتسم، كمال وقف: هيا اليوم نروح بالطقم..
أيهم أشر بيده: يا أخي روح روح لك، مجلس طقمك المخلفع جنب سيارتي آخر موديل تشوهه
ولفتوا للسيارة، حسام صاح: اوهووووو أيش دي السيارة من فين لك يا ربحة..
_ من الموز يلي ابيعه، مش قلت ربحة..
حسام عصر له رأسه: هيا قم قبل ما اقلبك موزة من صدق..
_ دي حق أبي بزيته، هيا اركبوا فيبه هيا..
كمال: والطقم حقي؟
حسام: دا ما يستاهلش اجلب فيبه غنم..
صقر يضحك بهدوء، هاااه الآن غنم وأنا جالس الف فيبك حوافي عدن..
حسام يمشي مع صقر وأيهم: خله هنا يحرس المقابر أحسن..
أيهم: أو يمكن الجن يعجبهم يتعلموا السواقة ويعملوا رون فيبه ويتبضعوا..
جراح ضحك وراح لعنده: ما عليك منهم أنا بركب معك هيا..
_ فديتك مله، وطز فيبكم يا حسام تسمعنا أنته وأيهم..
حسام يحك اذنه بتطنيش، عفوًا ما اسمعكش، في كلب جالس ينبح..
كمال: والله ما الكلب إلا أنته، وكلب جربان كمان..
وضحك هو وجراح وراحوا لمطعم يتصبحوا، مع أن صقر رفض لكن اقنعوه بالزور، وحسام حالف لو ما يأكل أنه بيأكله غصب، وعاد تعرفوا حسام ظالم بيعصر له لقفه ويكسره، وصقر وافق واكلوا..
وبدؤوا المعزيين يتجمعوا ببيت منصور ودقت الساعة ١١...
.
البـارت 230 ◇
جُــرح القـريب غـريب 💔
وبدؤوا المعزيين يتجمعوا ببيت منصور ودقت الساعة ١١، وكان رضوان وابو بكر من ضمن المعزيين، حتى عارف أجا ومنصور كان عند الباب الخلفي يستقبل مدحت:
_ حيا بك يا مدحت نورت..
_ بنورك يا منصور، يعني هنا قررت تسوي العزاء؟
_ أيوة، وما شاء الله اشوف الفِلة مليانة..
_ أيوة، معاريف عبدالفتاح وجيرانه، كمان عبدالقادر ومعاريف أسرته كلهم هنا، الديوان الأول مليان، تعال نروح الديوان التاني، هيا دخلنا تعال..
والديوان مليانته ناس معزيين رغم كبره، وكان رضوان وابو بكر وعبدالباسط وعارف والكل موجود هناك، وجابوا الغداء والكل تغدى، وصقر كان رافض يرجع الفِلة ويشوف المعزيين، وجلسوا العيال معه يحاولوا يخففوا حزنه وزعله، وقسموا الغداء ببيت عبد الفتاح عند النسوان، والكل مشغول بالتوزيع، والبنات جلسين يأكلين بالمطبخ عند نوال، ولمار جت:
_ ايه دا، انتوا بتأكلوا بالأرض ليه؟
نوال: نحنا كدا متعودين يا بنتي، هيا تعالي..
_ أنا عيزاني ااكل بالأرض!!، لا أنا افضل بلا اكل اكرم لي..
أسماء: مله جي جيزك جيزنا وجيز شيمَاء ومُنى..
لمار شافت مُنى تأكل عندهم وبيدها وشهقت وراحت لعندها: مُنى بتعملي ايه، انتي ازاي بتأكلي بأيدك وبالأرض كمان..
مُنى: الأكل حلو، وبعدين أنا اعرف ااكل بأيدي..
لمار: لا متاكليش زيهو تعالي معايا..
وكانت تشتي تبزها بس مُنى تصيح وأسماء مسكتها، بس يا لمار أيش تسوي خليه براحته تأكل..
_ انتوا متخلفين وعايزين اختي تطلع متخلفة زيكو..
رزان: يا بنت أيش من تخلف، قد الرسول عليه الصلاة والسلام كان يأكل بيده وبالأرض..
لمار: دا لأن وقتها مكنش في تطور، دلوقتي الناس طلعت الفضاء، تعالي يا مُنى..
عبير: ما عليك منه يا لمار خليه براحته..
نوال: يا بنتي يا لمار خليك منه، خلاص بقوم اسوي لك اكل داخل صحن وحدك تتغدي..
_ ل..لا لا مش عايزة، أنا هروح البيت واكل هناك، عيزيني اكل من العزاء لا مش عايزة..
وخرجت وشيمَاء تنهدت: سامحوُنه يا بنات، دي عاده أول مرة تقابل ناس مش مصريين وتشوف عاداتهم..
عبير: بس انتي ما شاء الله قدك زينا وما فيش فرق، ودي بنت خالك مُنى كمان زينا..
أسماء: عادي يا بنات مصيرة بتتعود على نحنا، هيا كملوا اكل..
نوال وقفت: اني الحمدلله شبعت، بروح اسوي شاي حليب للمعزيين..
أسماء: شكرًا لك يا خالة نوال والله بدونك ما عرفناش أيش بنسوي..
_ مله يا بنتي عيب، نحنا أهل وجيران..
رزان: ليش ما جتش رغد معك يا خالة؟
شيمَاء: رغد!..
عبير: أيوة، رغد صديقتك..
شيمَاء انصدمت وشافت لنوال يلي تشوف لها: واه انتي شيمَاء يلي رغد صرعتني عليه؟
شيمَاء بفرح: أيوة أيوة ياخالة، واااي..
نوال ضحكت وراحت لعندها، تعالي احضنك يا قلبي تعالي (شيمَاء وقفت وضمتها) ما شاء الله رغد واصل تكلمني عليك..
مُنى: الخالة نوال طيبة اوي..
نوال: وانتي عسل يا مُنى..
شيمَاء: طيب ليش رغد ما جتش معك كنت اشتيه تجي ونلتقي..
_ قلت له تجلس عند خالته، والبيت وحده خليته هناك، لكن ولا يهمك، إدا رجعت بالليل بخليه تجي..
شيمَاء بفرح: واه فديت قلبك يا خالة نوال..
أسماء: هيا جي كملي غداء بعدين كملوا هدار، قد مُنى شكله بتخلص الغداء..
الكل ضحك ومُنى تهز رأسها: الأكل دا حلو اوي..
عبير: دا رز زربيان، معروف بعدن كله..
مُنى: أيوة حلو، عايزة أكمل أكل قبل ما يخلص..
وضحكوا البنات عليها ولمار تتسمع خلف الباب وباينة منقهرة، ايه دا، دا عزاء أو حفل عمالين يضحكوا، لسا كانوا عياط وصياح ودلوقتي يضحكوا! ناس مريضة بجد..
وراحت، نجوى جت للمطبخ، وشافت البنات يتغدين، أسماء فين الحمام؟
أسماء: اندكو هناك قدامك..
نجوى هزت رأسها وراحت، ونوال شافت للباب بس كان القفا حقها، ورجعت تغسل الصحون والشاي على النار..
.
.
العيال جالسين بالمقهاية يشربوا شاي، والله الشاي بعد الغداء ولا في منه يا عيال..
أيهم: يا أخي أنته تشرب قبل الأكل ومعه وبعده، وتجي تقول الشاي ولا منه، صرعتنا يا أخي..
حسام: ما لك دخل أنته، أحبه أيش عليك منه..
كمال: خلاص بس فضحتونا، فين بنروح الآن؟
جراح شاف لصقر: فين ما يشتي صقر..
صقر باين تعبان وذبلان مررة ومرهق وروحه أشد ارهاقًا، عادي أي مكان، بس إلا العزاء، ما ليش نفس اشوف الناس واتسمع الهدار حقهم وعظم الله اجرك وكدا..
أيهم: خلاص زي ما تشتي..
جوال حسام رن وهو رد: هاه اماه..
غزل تبكي: ح...حسام الحقنا يا حسام..
حسام وقف بخوف لمن شافوا له كلهم: أيش في ما لك تبكي؟
العيال وقفوا بخوف، ر...رُبا يا حسام الحقه اهئ اهئ الحقه..
حسام حس قلبه ذاب: ا..أيش فيبه رُبا؟