اكتب ياصغيري - الفصل 42 - بقلم ضاقت انفاسي - مكتملة | روايتك

بارت ٤٢ ابو ليث نطق بصراخ بعد ما طق قلبه من وقاحة زوجها في: خلااااااااص ... اقترب وأبعد زينب عنه وهو يمسك بكتفها: قومي معي مالك جلسه هنا عند هالكلب!! قاطعه وهو يرفع يده بتهديد: احترم نفسك .. وإذا انا كلب فأنت وعيلتك كلها كلاب ... لأنه الكلاب ما تتزوج الا كلاب مثلها !! زينب وهي تمسح طرف شفتها من اثار الدم : أحياناً الذئاب تتزوج من الكلاب!! رجعت للخلف مباشره لما بغى يضربها زوجها ويكمل عليها ...وقف بوجهه ابو ليث بانفجار: خلاااااص ..انت ما تحشم احد ..الحين رح اشتكي عليك للشرطه ..تظن الدنيا سايبه تضرب البنت وأسكت لك ؟! قومي البسي وتعالي الحين رح اراويه كيف التعامل!! زينب برفض : بيتي وما اطلع منه ...وزوجي ما اتخلى عنه ...وما اسمح للعذال يأخذونه مني!! قاطعها ابو ليث بغضب: أخذك القرد إن شاء الله...صدق حريم تبغى تدبيغ واذا ما ضربتها ما تمشي!! اشر على زوجها بانفعال: بالله عليك كمل عليها ضرب يمكن تموت وارتاح من الغباء الي فيها !! وش عديمة الكرامه ذي !! تحرك للخارج وهو يسحب وهج معه ويردد: ناس متخلفه!! وهج تحس مصدومه للحين من الموقف ...فيها الضحكه بس كتمتها حتى ما يغسل شراعها ابوها ..وبنفس الوقت تحس بشعور مقرف لما تناظر أختها وهي متمسكه بزوجها ؟! ما تدري هي الكائن الفضائي وإلا اختها الي تتصرف بدون وعي ولا عقل !! كيف تشعر البنت لما يدبغها زوجها ضرب وترجع معه طبيعي ولا كأنه صار شيء!! ما عادت تعرف اذا هي المتخلفه عن جنس حواء وإلا اختها بالغت... اذا هي ما قدرت تتقبل ترجع لسراج بعد ما جرح شيء بداخلها بكلامه وبدون ما يمد يده عليها ...للحين تحس بالوجع على الايام الي عاشت فيها مخدوعه وعقلها رفض يرجع بعد ما حست بإهانة سراج لها ..أما الحين تحس فعلاً سراج جنة بالنسبة لهذا المتخلف ...ما تدري أختها ملتصقة فيه على إيش.. وكأنها لاصق فئران؟! زمت شفتها بسخريه ..تحس سراج فعلاً ملااااك... والرسالة الي ارسلها ولا شيء بالنسبه لزوج زينب ... الي فوق ضربه لها أهانها بالكلام ... حست قلبها طار على سراج ...وشعور الخساره يرفرف حولها ..ما تبغى تخسره للأبد .... بدأ عقلها يراجع حساباته .... حست بالنعمة الي كانت عايشه فيها مع سراج ... وبما إنه هو الي رجع لها ...ما رح تفقد الفرصه ذي المره ... ما تدري شيء بداخلها يحثها تستغل فرصه رجوعها لسراج ... بغت تقول لابوها عن قرارها برجوعها لسراج ..بس سكتت وهي تشوف ابو سراج واقف عند البوابه ومعه ابو سائد...استغربت تواجدهم هنا ... ابو سراج باستغراب نطق اول ما شافهم: عسى ما شر ..وش صوت قاطعه ابو زينب بقرف: كلاب قطعت بعضها ..ما عليك انت!! رفع حاجب بتساؤل: مربيين كلاب عندهم بالحوش ؟! ..عسى ما هاجموا احد اسمع صوتكم عالي !! ابو ليث يحاول يرد بهدوء عكس الغضب الي بداخله: بس شغل نباح ما يقدر على شيء!! ختم كلامه وناظر وهج الي ابتعدت عنهم واكتافها تهتز واضح انها تضحك..وبحده نطق: انت بالذات انكتمي ..لو رجعت للزفت كان حنا بغنى عن كل ذي المشاكل!! بس يكون بعلمك وربي الا ترجعين لسراج مو بطيب خاطر منك الا غصب عنك ورجلك فوق راسك تفهمين؟! ناظرته باستنكار لانقلابه عليها ...يعني كذا سهل عليها الموضوع ..ورجوعها قدامهم ما هو برضاها ...بس لحظه كيف رجلها فوق رأسها ؟؟؟؟؟؟ ابو سراج نطق بعبوس: إلا قول تحرم ترجع له علشان يعمل ذي الحركات عنتره ....لو يموت ما ارجعت وهج له ...علشان يحسب على تصرفاته مره ثانيه .. لأني افرطت بدلاله ..ولولا امه ما سعيت لخروجه خليه يتربى!! عبست وهج ملامحها من كلام عمها .. كيف ما ترجع لسراج ... كذا خربت الأمور وبدأت تخرج عن سيطرتها ؟! اضطرت تسكت وما تعلق على شيء ... ناظرت ابوها الي نطق بتساؤل: اشغلتنا الكلاب ونسيت أسألك عن تواجدك هنا!! وهج خلاص ما هي قادرة تكتم ضحكتها على كلام أبوها ...رح تموت إذا كتمت ضحكتها اكثر .. ابوها عليه تعبيرات عجيبه!! ابو سراج بعبوس: جينا لزوج ابنتك علشان يتنازل! قاطعه أبو ليث : الحين الوضع عندهم ما يسمح ...خلها في وقت ثاني !! تعال لبيتي وخلينا نتفاهم ونروح لأهله افضل من التفاهم مع هالكلب!! ابو سراج رفع حاجب: وانت وش فيك لسانك معلق على كلمه كلب!! ابو سائد ابتسم وهو يشوف وهج توجهت لسيارة ابوها وصوت ضحكاتها المكتومه توصل لهم!! ابو ليث وهو يتحرك خلف وهج: لأنهم كلاااااب!! ** ** ** من اول ما دخل السيارة نطق بانفعال وحده: ممكن اعرف وش هالضحك الي عليك.. ما اشوف شيء يضحك بالعكس موقف مخزي ...ما ادري وين كان عقلي لما زوجته لزينب ...انسان حقير ..والي قهرني هالكلبه ملتصقه فيه ..انا الي ابغى اعمل لها كرامة وإنه لها اهل وعزوه بس اذا ما اكلت طراق صبح ومساء رح جلدها يحكها ...بالحريقه تحرقهم كلهم!! حرك السيارة وهو يبربر من كثر القهر الي بداخله ... وهج مكتفيه بالاستماع ...وانفعال ابوها كل ما فيه يزيد ...رفعت حاجب والتفتت على ابوها لما تطرق لموضوع بالنسبة لها خط احمر : اسمعيني ترجعين لزوجك واخوك ترجعينه لأهله وانتهينا من كل المشاكل ووجع الرأس!! حست بشيء اطبق على صدرها من وين طلع لها ابوها بذي السالفه ... موضوع ورد قفلته من قبل وما تسمح لاحد يتدخل فيه ...وبنبره ظهر فيها الضيق والاختناق : ورد انتهينا من موضوعه ...ورد لو اروح لآخر الدنيا ما تركته ...لو اتخلى عن رويد ما رح اتخلى عن ورد ... متى تترك هالطفل بحاله ...ترى ما له ذنب بشيء ... ليه دوم مصر تأخذه بذنب غيره ...ترى هذا قاطعها بنرفزه : انكتمي...محامي دفاع له...ايوه انقهري كذا ..ما يقهرك الا سالفه اخوك !! زمت شفتها بتعجب ما تدري وش يستفيد لما يقهرها ...تنهدت براحه كلامه مجرد حتى يقهرها ....اهم شيء عندها ورد ما يشعر بالنقص أو يتشتت ..مستعده ما ترجع لسراج مقابل ورد يعيش مبسوط .... يكفي قلبها الي ينفطر لما تشوف بعيونه لمعة اليتم ...تحاول بكل جهدها ما تشوف ذي اللمعة ..بس ما هو بيدها هذا الشيء ... ابتسمت بحنين وهي تلمح بالشارع بنت بعمر اختها الصغيره ...ياااااه اشتاقت لها وللسانها الطويل ... متأكدة لو تروح تشوفها ما رح تستقبلها ام ريان او تسمح لها تقترب من ابنتها ..وبنفس الوقت ما رح تسمح إنها أختها تعيش يتيمه الاب وابوها موجود...بس تنتهي من سالفه سراج رح تفتح مع ابوها الموضوع ..لزوم يروح ويشوف البنت .... قطعت افكارها لما وقفت سيارة ابوها ...تنهدت وهي تتمنى تنتهي المشاكل على خير!! نزلت واعتدلت بوقفتها وهي تشوف ابو سراج نزل من سيارته واقترب لجهتهم ...ما تدري ليه خايفه من كلامه ويمنع رجوعها لسراج !! نهرت نفسها وش فيها دندنت اذانها للرجوع ... سرعان ما زمت شفتها بضيق ... بعد ما خسرت الرهان ...ما قدرت تطلعه من عقلها وقلبها ...الايام الي طافت كانت تسلاه وتنساه لأنه بعيد عنها وما تشوفخ ..بس الحين مع تواجدها بالقرب من بيتهم تحس صعب تتناسى وجوده !! ومثل ما يقولون كان مسحور ويتصرف بدون وعي ... تنهدت بوجع من ريان الي دمر حياتها وخرب كل شيء ...عجز لسانها يسامحه او يدعي له بالرحمه... الحين ارجعهم لنقطه الصفر ....لبداية زواجهم والمسافات والحواجز بينهم رجعت من جديد بعد ما تخلصوا منها ... ما تدري كيف رح ترجع العلاقه من جديد ...بس الي متأكدة منه ومستحيل تتنازل وتكون المبادرة بأي شيء ...وحتى شجاره مع زوج زينب رح تضع له احتمال إنه من باب التملك وما هو حب فيها !! انسحبت للداخل حتى تأخذ الصغار وترجع لشقتها وبداخلها ضيق ولا كأنها دوبها الي كانت تضحك ... ** ** ** مجتمعات في بيت سناء بعد ما طلبت منهم زينب يتجمعوا كلهم ... بعد ما انتهت من سرد الأحداث ...جالت نظرها بين اخواتها تشوف رد فعلهن ... وبداخلها نار من وهج ...اذا ما قهرتها ونبذتها ما تكون زينب !! سرعان ما عقدت حواجبها وهي تشوف رقيه ونور دخلوا بموجه ضحك ويضربون يد بيد بعضهم من شدة الضحك!! ناظرت سناء الي ابتسمت على ضحكهم ..ما تدري على وش يضحكون ... نطقت بانتقاد: وش هالضحك ؟! ...صدق وقاحتكم ما شفت مثلها ...نفس اختكم الخايسه طول وقتها تضحك ؟! بدل ما توقفون معي تجلسوا تضحكون!! رقيه من بين ضحكاتها : يلا قومي وقفي ؟! زينب بعدم فهم: ليش؟! رقيه بسخريه نطقت: علشان نوقف معك !! واذا تبغين نأخذ معك صوره ؛! زمت شفتها بقهر هي على اعصابها تنحرق وذي الغبية جالسه تطقطق عليها ...صدق غبيه اذا ظنت تقدر تأخذهم لصفها ... ناظرت رنا الي نطقت بحاجب مرفوع: انت كلامك الي تكلمت فيه صدق وإلا جالسه تأليف من راسك؟! زينب نطقت بملامح متسائله: ليش ؟! ما صدقتي كلامي ؟! رنا بقوة: لأنه ما في وحده صاحيه تعمل الي عملتيه ؟؟ فوق وساخة زوجك وللحين متمسكه فيه ؟! انت مجنونه والا وش مشكلتك بالضبط؟ انا لو مكان أبوي الا اذبحك واخلص منك يا عديمه الكرامه ؟! أي إهانه تعرضت لها وللحين متمسكه فيه ؟! زينب بدفاع عن نفسها: بيتي وما رح اقبل إنه يتدمر!! بيان بانفعال: جعله هالبيت للحريقه زينب تفاجأت من هجوم بيان بالكلام ...نطقت باستنكار من طريقتها : بيان قاطعتها بقوة: بلا بيان بلا بطيخ ...الغلط غلط ...صحيح وهج علاقتنا ما هي ذاك الزود ..بس انت بعقلك وهج تناظر زوجك والا تقبل فيه!! قبل ما تحشين بوهج تكلمي على زوجك ابو عين زايغه !! وربي لو زوجي يعمل كذا الا اذبحه بيديني ...اختك اختك ما لقى الا اختك ... استغفر الله ... ما ادري لأي حد من الانحطاط وصل زوجك ..وللحين متمسكه فيه!! صحيح انا دوم معك وحنا فريق واحد ..بس توصل الامور لهذا الحد أبدا ما اقبل بهذا الشيء!! ايمان بتأييد : كلام بيان مضبوط ..عشان وش جالسه تهينين نفسك؟! زينب بقهر من كلامهم وكأنهم استبدلوهم: اهين نفسي ولا اسمح لوهج تفوز علي وتأخذ زوجي!!! سناء بانفعال من الغباء الي فيها : ** فيك وبزوجك يا متخلفه ...تظنين وهج تقبل بزوجك ...انت عقلك حالفه يمين ما تستعمليه ...اذا وهج رفضت ترجع لسراج ...تعرفين وش يعني سراج !! الحين ترفض سراج وتقبل بزوجك الغبي!! خلاااص اصحي على نفسك واتركي عنك الحقد الي يعشعش بقلبك واتركي وهج بحالها ... لمتى وانت تسعي حتى تنكدي عليها حياتها !! زينب بانفعال وحقد: اكررررررها ...كل شيء لها ...اكره تمييز اهلي لها ....اكره حظها الي فوق الريح ... وهي مطلقه والفرص لها ما توقفت وحنا ما لقينا الا زوج منتف والحياة معه جحيم !! ليه الناس تتهافت حتى تتزوجها قاطعتها رقيه بعبوس: ما شفت احد يتهافت لخطبتها غير زوجك المفلس!! وين الحظ الي فيه ؟! عن اي حظ تتكلمين عنه؟! كافي حقد وكره لها زينب زفرت بضيق ...وزعت نظرها بين اخواتها وبعدها نطقت بقهر: تقولين كذا لأنك ما تدرين عن شيء !! تخيلي أمي الي دوم تتغنى بحبها لنا ...فلوسها عند خالي ابو ابراهيم ....وضعتهم امانه عنده يستثمرهم ووصته اذا صار لها شيء يعطيهم لوهج !! حتى الفلوس لها ؟! ليش الفلوس لوهج وحنا لا ...وش تتميز عنا وهج بشيء !! اكرررررررها !! ولما طلبت من خالي يوزع الفلوس علينا .. رفض وقال ذي الفلوس لوهج ويبغى يرجع لها الفلوس بالوقت المناسب ... سناء رفعت حاجب: على اساس قلت انها مو اختنا من الأم ؟! وخالي خبرك بهذا الشيء؟! بس ما معك دليل يثبت لنا هالشيء؟! زينب مطت شفتها بلامبالاة: كذبت عليكم حتى تكرهوها ... رنا عقدت حواجبها باستنكار: حقيره...كيف حلفت لنا ايمان مغلظه إنك صادقه!! رقيه قاطعتها وهي تناظر زينب: الفلوس انتم تعرفون عنها ؟! ختمت كلامها وهي تؤشر على الشله!! ايمان هزت راسها بالنفي : اول مره اسمع بذي السالفه !! بيان باستغراب: غريبه ما خبرتينا ..والحين طلعت السالفة!! زمت شفتها زينب بقهر ..وسرعان ما انفجرت بوجههم: انا جبتكم لي عون مو فرعون ...اشوفكم مع وهج نور ناظرتها بأسف: مشكلتك احقادك هي الي تسيرك ... حقدت على وهج علشان الفلوس ..ونسيت كم دفعت وهج لنا بالماضي ..كل فلوسها راحت للبيت ولنا ...كانت تسهر وتتعب وبالمقابل ما تأخذ فلس واحد .. أنا متأكدة امي كانت تبغى تعوضها عن الفلوس الي صرفتهم على البيت ...حتى تلقاهم بالوقت العسير ...بس خالك صاحب الامانه ليه ما ارجع الفلوس لوهج ؟! انا اخبرك ليه ... لأنه وضعهم بالاستثمار ...ويبغى يستفيد منهم اكثر قبل ما يعطيهم لوهج ...واكيد اعطاك شيء تقفلين فيه حلقك حتى تبقى الفلوس معه !! سناء بتساؤل:كم المبلغ!! زينب بعبوس: ***** رنا بتساؤل: وليه بس الحين تكلمت ؟! بيان زفرت بضيق: زينب انت تمشين بالطريق الغلط ...احملي باقي كرامتك واتركي زوجك قاطعتها زينب بانفعال: مستحيل لو على جثتي ...لو يقطعني ما تركته وسمحت لوهج تتشمت فيني ...رح يرجع زوجي لي ورح تشوفون!! نور هزت راسها بأسف وهي تشوفها حملت نفسها وغادرت ... رقيه زمت شفتها بضيق ...ما تدري حقد زينب وين رح يوصل !! ** ** ** ** جالس بالصالة بعد ما طلع من التوقيف ..ناظر ابوه وهو يتكلم عن التنازل وكيف صار !! ابو سائد هز رأسه: قلت لك ذي الاشكال بالفلوس تشتريها...بس بعض اشكال يبغى لها تكسير رأس!! ختم كلامه وهو يخز سراج بقوة!! عبس سراج ملامحه وكأنه ينقصه عمه ...رفع عيونه بضجر لما نطق أبوه بوعيد: خلي هالحركات تنعاد ..وربي لو تخيس بالسجن ما ناظرتك ...لولا أمك رحمتها وإلا قاطعته اريام: ويهون عليك سراج!! ابو سراج بقوة: دام نهون عليه قاطعه سراج بضيق: يبه!! ابو سراج بانفعال : رح اسكت ذي المرة ...لكن مرة ثانية صدقني ما رح يعجبك تصرفي!! ومن باكر جهز نفسك رح تشوف لك امك عروس وتتزوج ...وتستقر ..والزفته وهج تنساها نهائياً ..البنت ما تبغاك خلاص يكفي تهدر كرامتك خلفها ... واذا لذي الدرجه متعلق فيها رح نشوف لك العروس يكون اسمها وهج ... ناظر زوجته وهو يؤكد على كلامه: ابحثي عن بنت حلال والشرط يكون اسمها وهج !! انقهر من كلام ابوه وسخريتهم عليه ... وباعتراض نطق: يبه ابو سراج اشر له : ولا كلمة ...انتهينا من هالموضوع ..انا سكتت لك واحترمت رغبتك بس انت ما احترمت وجودي ...انا نهايتها اراكض خلف الناس ارتجيهم حتى يتنازلوا عن حقهم !! هذا اخر شيء عندي ...واذا فيك خير اكسر كلامي يا سراج ... وقف وهو يناظر زوجته : ما نبغى لا خطوبه ولا بطيخ ..زواج مباشره ولو بدون عرس وطقطقه يكون افضل!! ختم كلامه وغادر المكان ..حل الصمت على المكان ...وكل واحد غارق بأفكاره ...لحظات وقطع الصمت ضحكات ابو سائد !! سراج زم شفته بقهر من عمه الي جالس بس يتمسخر عليه ويحش برأس ابوه عليه ....ناظر خالته لما نطقت بابتسامه: ابو سائد وبعدين؟! مط شفته بسخريه لما انفجرت خالته من الضحك ..والصالة تضج بضحكات خالته وعمه!! كتم غيضه منهم وناظر امه الي هزت راسها بأسف ...ما تقدر تقدم له شيء!!! حمل نفسه وغادر قبل ما يفقد اعصابه ويمسح الارض بعمه ..مستفز بقوة ...شد على قبضة يده بقوة ..نفسه يكسر راس وهج ..بعد ما صار مسخره بسببها ... دام تبغى كذا ...رح يضع على صدره حجر ويكمل حياته ....ما تستحق المشاعر الي حملها لها .... ** ** ** السكون يحيط فيها وهي تناظر رقيه وسناء ونور ورنا جالسات عندها بالشقه ..ما توقعت زيارتهم ....ما تكلمت معهم بشي والسكون يحيط فيها ... ما لها نيه ترجع المويه مثل ما كانت ...جروحها منهم للحين ما تعافت .. رقيه رفعت حاجب وهي تشوف سكونها ..نطقت تكسر الصمت: اذا متضايقه من وجودنا نطلع!! وهج بخفوت نطقت: بكيفك!! فتحت رقيه عيونها باستنكار: ذي طرده يا زفته؟! صدق إنك وقحه!! تسمعون يا بنات طردتنا!! سناء بهدوء نطقت: رقيه تقدري تقفلي حلقك بس شوي ...ابغى اتكلم انا معها!! خزتها رقيه : كل اخت اوقح من الثانيه ..وهذا أنا قفلت حلقي اشوف وش يطلع معك ؟! بس انتبهي واضح من عيونها حاقده علينا بقوة!! ختمت كلامها بابتسامة متورطه وهي تشوف جمود وهج ..مجرد شبح ابتسامه ما رسمت على محياها !! سناء نطقت وعيونها مركزه على وهج بجديه: اسمعيني وهج ...في شيء لزوم تعرفينه ...ما احد خبرك فيه ... متأكدة من هذا الشيء رقيه مطت شفتها وهي تشوف سناء كيف قدرت تجذب انتباه وهج لها ..تناظر وهج لزينب بكل حواسها وكأنها تترقب شيء ...او خايفه تسمع شيء ...بس لحظة ما عندها علم بالموضوع الي رح تخبر سناء فيه ... معقول قصدها عن الفلوس .. وهج ما تدري ليه قلبها يخفق بقوة ...ما تنكر الخوف سكن بأعماقها ..خايفه تسمع شيء ويكون القشة الي قسمت ظهر البعير..ما لها حيل لأي شيء ...اكتفت بالصمت تستمع لها ونبضات قلبها تزداد .... سرعان ما جحظت عيونها باستنكار لما نطقت: شعرك وهو قصير أحلى ..يكفي كنا نحس عندنا أخ يحمينا !.. ما هو لايق عليك تكونين أنثى!! ختمت كلامها بابتسامة عبيطه!! شدت وهج على قبضة يدها بقوة ما تسددها بنص وجهها ...حرقت لها اعصابها وبالنهاية ذي سالفتها !! ناظرت اخواتها لما انفجروا من الضحك وهم يناظرونها !! تلقائيا وضعت يدها على غرتها وارجعتها للخلف ..وقبل ما تنطق قاطعتها رنا : لا تصدقيها ..وربي اختلف شكلك ٣٦٠ درجه ...معطيك كذا جاذبيه غير !! نور بابتسامة: بصراحه بكلا الحالتين حلوة !! رقيه مسكت طرف شعر وهج : والله ما توقعت يكون كذا كثيف ..وربي لو تشوفه زينب الا تقطعك!! ختمت كلامها وهي تضحك بقوة!! هزت راسها بملل ...وناظرت رنا الي نطقت بتساؤل: وش عملتِ لزينب ..وربي لو تشوفينها ما تعرفينها!!! رقيه بسخرية: شفايفها عملت لهم نفخ ...وفوق عيونها ألوان قطعت كلامها وناظرت وهج الي بدأت تضحك بقوة ... ناظروا بعض باستغراب وش فيها تضحك!! وهج تذكرت شكل زينب ...للحين كلما تتذكر الموقف ترجع تضحك عليه !! نور ابتسمت: بدأت تنفك عقدتها. .والحين مهمتك يا رقيه استلميها ..ما رح نطلع الا لما نرجع علاقتنا القديمه ...وننسى الماضي ... ونفتح صفحة جديدة ..ناظري عيالنا كم عمرهم وما يعرفون بعض ... ابغى نجتمع ونتشاجر ولدك ضرب ولدي وذي تصارخ ولدك شتم ولدي ..ونتضارب علشان عيالنا ...سنوات هجر وكل وحده انشغلت بحياتها ...وكأننا ما نعرف بعض .. ولا كأنه كان صحن واحد يجمعنا !! ما انكر حنا غلطنا بحقك ...ما ادري وش أصابنا ..وكيف قدرت زينب تنزغ بيننا ...طول عمرنا شلة وحده ...كيف تفرقنا قاطعتها وهج بغضه وعقلها يستحضر لما تخلو عنها بأكثر من موقف: انتم الي تخليتم..انا طول عمري يدي ممدوده لكم ..بس انتم وش عملتم؟؟؟ أنا عشت حياة ما احد فيكم عاشها ..وفوق هذا حاسديني على اهتمام ابوي الي يجرح اكثر من إنه يداوي ... انا ما اذيت أحد فيكم ..طول عمري احمل همكم واشوف وجعكم وجعي ..بس بالمقابل حاولتم تكسروني ...بحجة الغيره والحقد من حب مزيف رنا قاطعتها: لا تنكرين ابوي يحبك ويفضلك على الجميع قاطعتها بمرارة: ليته ما حبني ولا ميزني على أحد ...انا حياتي تدمرت والسبب أبوي ....انا بداخلي انكسارات سببها أبوي ...كسر بداخلي اشياء كثيره ... لما كنت احتاجه ما كنت ألقاه ... ومع ذلك اغض النظر لأنه بكل بساطه بالنهاية هو أبوي وما اقدر سكتت لما خانها التعبير ما لقت كلمه مناسبه توصف الحال ....صحيح وقف معها لما حاول ريان يؤذيها ..بس من قبل ما وقف معها ..للحين ما نسيت لما طردها علشان ام ريان ...تخلى عنها بكل بساطه ...حرمها من حقها باختيار شريك الحياة ..وفوق هذا تركها باليوم الي تحتاج فيه البنت لأهلها ... ايام تحضيرات زواجها كانت من اصعب الايام ...للحين غصه بوسط حلقها ...ما نسيت مسخرة سراج على ملابسها انها مستعمله ..ما فكر فيها كيف تتزوج بعد ما بلع مهرها ...ولا فكر يعوضها ...تحس بداخلها ندم على حياتها الي ضاعت كذا .. وهي تراكض حتى تسد ديون وتحل مشاكلها ...بالمقابل الي بعمرها مرتاحين في بيت اهلها ...ندمانه لأنها ما عاشت لاجل نفسها ....تحس نفسها مثل الشمعه احرقت نفسها حتى تضيء الغرفه لشخص اعمى ....وهذا الي صار معها ... زفرت بضيق لما حست العبرة تخنقها ...ناظرت رقيه الي اقتربت منها واحتضنتها بقوة وهي تنطق بصوت حزين: والله اشتقت لك ... البارحه شفتك بالمنام فارقت الحياة ...ما تتصورين وش صار فيني ...وربي للحين مخنوقه من هالحلم وخايفه عليك ...وهج بالرغم من البعد بس بداخلي احمل لك محبة ما يعلم فيها ربنا ..انت كنت اخت وام واب واخ وكل شيء ...كنت دنيتي ....ما ابغى افقدك ...وربي اموت لو يصير لك شيء ...والله نحبك بس ما ادري كيف انطمس على عيوننا ...حنا قطعت كلامها ودخلت بنوبة بكاء قويه ...سناء مسحت دمعه تسللت على خدها وهي تناظر رقيه محتضنه وهج وداخلين بموجه بكاء ...ما تنكر إنها غلطت وقصرت بحق وهج ...بس بعد اليوم مستحيل تدخل الحزن لقلب وهج عن طريقها ...تبغى تعوض الايام الي فاتت ...وترجع البسمه لثغر الجميع ..... ** ** ** صك على اسنانه من القهر وهو يحاول يظهر ملامح هادئه بس أبوه جالس يستفزه ...نطق يحاول نبرته تكون هاديه: يا يبه قلت لك هذا الموضوع منتهي بالنسبة لي ...زواج ما ابغى اتزوج!! ام سراج ناظرته : فكر بولدك انا ما رح ادوم لكم ..يبغى ام ترعاه هنا قاطعها وبصعوبة ماسك اعصابه: انا اربيه بنفسي!! ابو سراج بسخريه : عز التربيه ...عاد تربيتك كيف رح تكون ؟! خريج سجون ؟! ...تعلمه اذا احد اخذ شيء كان له يروح يكسره تكسير؟! سراج بإصرار على رأيه: رح اعلمه يذبحه ويخلص عليه نهائياً!! ابو سراج بتحذير: انتبه لكلامك تراك تجلطني بهذا الكلام ...من متى انت بذي العقليه؟! بس تدري انا الغبي الي فكيت السحر !! ام سراج بلوم وعتب : وش هالكلام يا ابو سراج!! نطق بنرفزه: ما تسمعين كلام ولدك ؟! اسمعني سراج نهاية الأسبوع رح تملك على البنت بالمحكمة ...وتأخذها مباشره لأنه ما في لا طقطقه ولا شيء ... قاطعه بانفجار: قلت لك ما ابغى اتزوج ...ما ادري ليش الزواج عندكم بالغصب ؟! قاطعه ابو سراج بقوة وتحدي: ايه بالغصب واذا فيك خير اكسر كلامي؟؟ سراج نفث نفسه بضجر من هالحياة : يبه انا قلت لك ما رح اطلع من باب البيت ولا رح ادخل المحكمه ولا رح اخطي خطوة واحده ...الزواج بالنسبة لي منتهي موضوعه ...لا تحرج نفسك وتروح للمحكمه لاني ما رح اروح!! ابو سراج زم شفته بلامبالاة: بكيفك ..تروح ولا عمرك رحت ...انا بالوكالة الي معي رح اتمم موضوعك قاطعه يعرقل الموضوع..وهو ينطق بسخريه: والفحص رح تروح مكاني بعد تفحص بالوكاله ؟! والا وش رايك تأخذ عينة الدم قاطعه بلامبالاة: ذي محلوله اي احد يحلل مكانك ...انا اضبط الوضع لا تخاف من ذي الناحيه!! ختم كلامه وهو يناظره بتحدي !! مسح وجهه سراج من تدخلات ابوه ...نطق كآخر محاوله: ترى انت تظلم بنت الناس معي قاطعه ابو سراج: ما رح تظلمها وما احد طلب منك تحبها !! نطق سراج بانفجار من ضغط أبوه عليه: وربي الا اراويها نجوم الظهر ...وربي الا اخليها تندم على اليوم الي ارتبطت فيني !! نطق بحاجب مرفوع: وربي اذا جاءت تشتكي منك يا ويلك !! البنت امك مدحتها كثير ... ختم كلامه وناظر وةجته بابتسامة خبيثه!! وقبل ما يكمل كلامه ...قاطعه سراج باختناق وهو ينسحب من المكان: لو كانت الملاك نفسه ما ابغاها ..ورح تندم على تواجدها هنا ... تحرك حتى يطلع سرعان ما التفت عليهم بتساؤل طرى على باله الحين: وبعدين هي ليش مستعجله هالكثر ؟! حتى حفله ما تبغى وش هالتلزق إلي فيها؟! وإلا حضرتها نازله على طمع .. وتبغى تستعجل حتى ما يتكنسل الموضوع!! ابو سراج يناظره يشوف رد فعله ...نطق بروقان : البنت لها تجربه فاشله من قبل ... حرك رأسه بتساؤل : يعني مطلقه؟! ام سراج رفعت حاجب : وش فيها المطلقه ؟! تراها انسانه مثلك مثلها ...ويمكن تكون انظلمت قاطعها سراج والنار تشتعل بداخله : ويمكن تكون ظالمه وزوجها ما تحملها وطلقها ....انا نهايتي رح اموت بقهري والسبب أنتم ...جالسين تقهروني بدم بارد ...بدل ما اتزوج مطلقه ارجع طليقتي افضل قاطعه ابو سراج بسخريه: ليش هي قابله تناظر وجهك !! الحين اترك كل هالسوالف وجهز امور زواجك ...ورتب الجناح قاطعه بوعيد: وربي ما يتعدل شيء ..هذا الموجود ..ما عجبها ستين داهيه خلفها ... تحرك يغادر سرعان ما التفت لهم وهو ينطق بتحذير: انا حذرتكم .. وذنب البنت برقبتكم!! بعد خروجه مط شفته ابو سراج بملل من مراهقه ولده المتأخره؛!!! ام سراج خزته بقوة: عليك حركات تجلط .. ليه كل هاللف والدوران!! ابو سراج ضحك بخفه: ابغى احرق اعصابه!! ** ** ** ما تدري قرارها صح او غلط ...بس كل شيء من حولها يحثها ترجع له وتعطيه فرصه بما إنه ما كان بوعيه ... خايفه من ذي الخطوة ... بالرغم إنها اعطت موافقتها لأبوها بس قلبها ينبض بقوة .. والخوف متلبسها ..ما تبغى ترجع لتجربه فاشله جديده !! ابتسمت لورد الي اقترب منها وجلس بجانبها وارخى رأسه على كتفها ..تحمد ربها ما عارضوا على تواجد ورد معها .. لأنها بكل بساطه ما تثق تتركه خلفها عند أحد...رح تربيه مع رويد ويكونوا إخوة وتخلي الرابط الي يجمعهم قوي!! بس الي يذبحها الغيره الي بينهم ...وهذا الشيء الي ما تبغاه بينهم ..ما تبغى نفس سيناريو زينب يتكرر هنا ... لأنها ما متأكدة تصرفت كذا من غيرتها وتفضيل ابوها عليهم ..زمت شفتها بملل ..ليته ما فضلها يمكن عايشه افضل من كذا !! رفضت زينب تطلع من بيتها ..وزوجها رجعها لذمته ...ما تدري كيف وضعها الحين ...بس الي عرفته مانعها تطلع من باب البيت وممنوع رجلها تعتب بيت اي احد من اهلها او تتواصل معهم .. وحتى شلة الانس منعها عنهم ... غريبه هالانسانه وللحين متمسكه فيه ..عجز عقلها يفهم تركيب عقلها ... هي الغلط والا زينب بالغت برد فعلها ...ما تدري وش فيه زوجها شيء تتعلق فيه لذي الدرجه ...وش مفهموم البنات لذي الامور ..تحس نفسها من عالم مختلف ولا كأنها من جنسهم .. هزت رأسها وهي تتنهد ...ما تبغى تفكر بأحد ..تبغى تعطي نفسها حقها ... ما يهمها أحد إلا ورد ورويد وغيرهم ما في احد بقاموس حياتها!! تتمنى تثبت على ذي القاعده وما تنجرف عن اولوياتها وقوانينها!! ** ** ** ابو ليث عقد حواجبه وهو يناظر ما في إلا ابو سراج واخوه ...وين سراج ما هو موجود معهم !! التفت على وهج الي جالسه على مقاعد الانتظار وصاده للجهة الثانيه !! يحس هالمشهد يتكرر مرة ثانية ...نطق بتوجس : وين سراج؟! ابو سراج تنهد من غباء ولده الي رفض ييجي هنا ...وعلى نفس الكلام ملك عليها بالوكاله ورح يحول حياتها لجحيم!! تعمد ما يخبره بموافقة وهج ..يبغى يحرق اعصابها ويراويه كيف يفتعل المشاكل ..ما يدري كيف رح تكون رد فعله لما يعرف بالموضوع ...نطق يرقع عن غياب سراج: صار امر طارئ بالشركه ...الوكاله معي ..ما في مشكله!! مط شفته على مضض وما عجبه هالتصرف ... بعدها اقتربوا من وهج ...وقفت وسلمت على عمها بهدوء ..وهي مستغربه سراج ما هو موجود!! ابوها الي فهم نظراتها المتسائله ..نطق بتبرير: حصل له امر طارئ ...ابو سراج معه الوكاله!! حست وهج بصفعه قويه تلقتها من تصرف سراج .. ذي المرة الثانية يعملها فيها ... وكأنه يرسل لها رساله بالرفض مباشره .. وإنه ما يبغاها واهله جبروه عليها ...المرة الاولى طوفتها له ..بس ذي المرة ما رح تقبل بذي المهزله ...نطقت برفض : لما ييجي عريس الغفله اتصلوا فيني ... ختمت كلامها وتحركت حتى تغادر ...مستحيل تقبل بذي المهزله .. وش هالشغل الي يمنعه يحضر ملكته !! ابو سراج مسك يدها وبهدوء نطق: امر طارئ واضطر يروح له قاطعته وكل تبريراتهم ما دخلت راسها: امر طارئ ..ليش ما راح عمه .. مين اولى يحضر عمه والا حضرته!! ابو سراج بترقيع: عمه شاهد نبغاه قاطعته وهي كاتمه قهرها من ذي الحركه: ترى حضور العريس اهم من الشاهد ...هنا تلقى ألف شاهد ....اسمح لي يا عمي ابو سراج قاطعها قبل ما تنسحب: وربي ما ترجعين ... اقولك موضوع طارئ ... صدقيني ما رح تندمين !! انا رح تصيبني جلطه والسبب انت وسراج!! خلاص مليت من مشاكلكم !! عقدت حواجبها باستنكار: مشاكلنا؟! ترى ما احد قاطعها ابو سائد بملل : ما رح نخلص ؟! دام أبو سراج معه توكيل انت وش مشكلتك؟! تكلم يا أبو ليث ؟! ابو ليث نطق بالرغم ما عجبه تغيب سراج ومع ذلك يبغى يمشي الموضوع ..بعد ما قرر مع ابو سراج يرجعونهم لبعض اختصار للمشاكل لانه سراج ما رح يرسيها على خير : وهج اذا لي عندك خاطر خلاص مشيها ...لا تنسي تراه مو زواج اول مرة ...كنت زوجته والحين رح ترجعين ما له داعي تعقدين الموضوع!! ما تدري كيف يفكرون ...وش هالموضوع المهم الي منعه من الحضور ...اذا من بدايتها اهانه ما رح تقبل بهذا الشيء ..اذا ما جاء بنفسه ما رح تكمل بهذا الموضوع ..وبإصرار على رأيها: اذا ولدك يا عمي رافض الموضوع ما له داعي تجبره ...الزواج بالنهاية اختيار وما تنجبر نفس على نفس ...اتصل فيه يحضر بنفسه الملكه ..واذا رفض انا آسفه ما رح اكمل بهذا الموضوع !! ابو ليث بتأكيد: اتصل فيه يمكن انحل الموضوع !! زم شفته وقرر يتصل فيه ويخبره بالموضوع لأنه متأكد اذا ما خبره بهويه العروس ما رح ييجي ..خرب مخططه بغى تكون مفاجأة وبنفس الوقت قهر وهو يرفض البنت الي يراكض خلفها ...بس الحين مضطر يبغى يخلص من مشاكل هالمراهقة..ما يضمن المرة الجايه تكون مشكلته أكبر ...اتصل عليه لحظات وعبس ملامحه لما اعطاه انه مقفل ... متأكد قفل الجوال متعمد حتى ما يضغط عليه ...الحين ذي المجنونه اذا خبرها انه جواله مغلق مين يقنعها تجلس وتكمل الموضوع ..بس هو يعرف يحلها ...وبدهاء أتقن دور إنه يتكلم بالجوال : هلا سراج ...وينك ما ترد ....وش صار ...لا حول ولا قوه الا بالله... إن شاء الله ينحل الموضوع ...وينك الحين...وليه طلعتم خارج المنطقه ...حسبي الله ونعم الوكيل فيه ...ايه ايه قلت لك من قبل مو مرتاح له ...انا رح اتصرف ....اسمعيني حنا بالمحكمة ننتظرك ...ايه ايه رح ننتظرك ما في مشكله ...بالسلامه ! قفل الخط ونطق بهدوء بعد ما اشر على كراسي الانتظار: خلينا نجلس لوقت وصوله! ابو سائد متأكد اخوه جالس يطقطق عليهم لا كلم سراج ولا شيء ... نطق بتساؤل:وينه سراج!! ابو سراج وهو متأكد اخوه فاهم عليه .. نطق بهدوء: بمنطقه***** قاطعه ابو سائد بضجر متقن: اقل شيء يبغى له اكثر من ساعتين ... ابو سراج اشر لأبو ليث : اجلس اجلس ..ننتظر اهم شيء عندنا العروس تكون راضيه! ابو سائد باعتراض: يا جماعه الخير ..ليه تعقيد الامور ..انت متخيل نجلس كل هالوقت؟! ترى تعقدوا الأمور ... خلاص يا ام رويد مشيها ..والله عندي مشاغل لفوق راسي!! ردت بهدوء: ما رح نعطلك ...الله يسهل دربك !!! فتح عيونه بصدمه من كلامها ...ما توقع هذا ردها ... وكأنها طرده غير مباشره ... ناظر ابو ليث الي انحرج من ردها لابو سائد: خلاص توكلنا على الله ..دام العريس عنده عذره ما له داعي نعطل الجماعه ..يلا يبه على بركه الله!! ناظرت ابوها بعدم رضا لحركته ...رفضها حتى تتأكد من موافقه سراج ..ما تبغى تبني حياتها مع شخص ما يبغاها .... زمت شفتها لما اجتمع فوق راسها الثلاث ..وما تركوا لها فرصه تعترض ...وخلال وقت قصير كانت تكمل الإجراءات ... غمضت عيونها لما اقترب ابوها وقبل راسها وهو ينطق بهدوء: مبروك وهج!! زمت شفتها والاختناق سكنها ...ما تدري ليه تشعر بالحزن ...نفس المشهد يتكرر عليها قبل سنوات .... ناظرت عمها وهو يبارك لها ويعبر عن محبته لها...زمت شفتها بضيق لما نطق: الحين نأخذ اغراضك وتروحين معي للبيت ..ام سراج تنتظرنا!! ** ** ** متمدد على الكنبه بصالة الجناح .. ويناظر المكان بضيق ...قفل جواله حتى أبوه ما يحرجه بأي شيء ...يوزع نظره بالمكان رح تسكن انسانه ثانيه مكانها ....ما يتصور وجود احد بحياته ....ترك كل شيء مكانه وما غير أي شيء ..نفسه ما تغير على لمساتها القديمه ...بالرغم إنه متأكد ما رح ترجع له ولا رح يجتمعون من جديد وخاصه بعد زواجه ... ما يدري ليه متحامله وهج عليه هالكثر ...اخخخخ من عنادها ..وش ينقصها لو رجعت وجمعهم سقف واحد !! قرر يطلع من البيت قبل رجوع أبوه ...ما يبغى يشوف احد ولا يستقبل احد... هو اعطاه رأيه بالموضوع بس هو اصر على رأيه ...يتحمل نتائج اختياراته!!! انتهى البارت..دمتم بخير ????