اكتب ياصغيري - الفصل 35 - بقلم ضاقت انفاسي - مكتملة | روايتك

بارت ٣٥ بعد ما نام ورد تحركت للخارج تتمشى وقلبها وعقلها مع ابوها معقول يجلب معه رويد .... المشكله هنا ما في تغطيه ...قفلت الباب بشويش على ورد سرعان ما عقدت حواجبها وهي تسمع صرخه من أختها .. تحركت بسرعه للخارج تخاف قرصها شيء ...اول ما فتحت الباب وقفت منصدمه وهي تشوف صراخ ورعب اخواتها ...بدون وعي ركضت لهم تشوف وش فيهم ...ارتجف قلبها لما صرخت بنان : قرصتها افعى بسرعه بسرعه!! تحس كل جسدها تشنج من الرعب. ...ومع ذلك مضطره تكون قد المسؤولية ..اقتربت وهي تتلفت حولها من الرعب: وين الافعى!! بنان برعب ونحيب وترتجف: راحت من هنا !! نزلت لمستوى اشجان بارتجاف وهي تنطق: وين قرصتك!! اشجان المفزوعه وتبكي من الرعب والخوف: هنا هنا !! وقفت وهج لما شافت مكان القرصه ما تدري كيف تتصرف ..ما في تغطيه هنا ...ما تدري كيف وش تعمل.. نطقت وكل شيء بجسدها يرتجف من الرعب ومن هول الموقف: جيبي الجوال و ورد وتعالي بسرعه نطلع نشوف احد يأخذنا للمستشفى..بسررررررعه!!! نهضت اختها الي كانت مثل المجنونه من الرعب ...نطقت وهي تحاول تهديها وتواسيها: لا تخافين الحين نلقى احد يأخذنا ...لا تنفعلين حتى ما ينتشر السم!! توجهت فيها خارج المزرعه بدون ما تنتظر بنان ...ناظرت المكان فاضي ...لأي مكان جلبها أبوها ... من وين توصلها للمستشفى ...برفق اجلستها على الارض وهي تحس اختها بدأت تهلوس وعلى ابواب تفقد الوعي ...حضنتها وهي تنطق بغصه: لا تخافي يا قلبي الحين نتصل بالاسعاف!! وقفت مباشره لما تقدمت منها بنان المنهاره ..اخذت الجوال وهي تحاول تتصل بأبوها .. شدت على اسنانها بقوة من العجز ..ما في شبكه ..رح تحاول تتواصل مع الاسعاف بس المشكله ما في تغطيه !! وش تعمل الحين ؟! تحس قلبها ينفطر اختها تذبل قدامها ومو قادرة تساعدها !! وقفت على حيلها وهي تشوف سيارة قريب منهم .. وبدون وعي وقفت بوسط الطريق طلبت منه المساعدة ...الاهم عندها اختها تتلقى الاسعافات!! اقترب منهم ونزل من السيارة باستغراب... وقبل ما يسأل تكلمت وهج: يا عم.. اختي قرصتها افعى بسرعه بسرعه ما معنا وقت خلينا ننقلها للمستشفى! وبدون تردد اقترب حتى يساعدها بحمل اختها ... تبغى تصرخ وهي تشوف اختها فقدت الوعي وما في منها اي حركه !! ساعدها الرجال ووضعوها بالسياره وتحرك باقصى سرعته ...ووهج محتضنه اشجان وتمسح على راسها !! وتدعي من كل قلبها ربنا يقومها بالسلامه !!! * ** ** نطق باستفسار : انت وينك الحين ؟! رد وهو يتثاوب من النعاس: طلعت من المنطقة حتى اكلمك واشوف مكانك لأنه المكان ما فيه شبكه ؟! نطق بغيض من اهماله: قلت لك لا تتحرك من مكانك حتى وقت وصولي ..افرض تركوا المكان!! مط شفته بملل: وين يتركوا المكان ؟! لا تخاف ما احد طلع من المزرعه مندفسين هناك ؟! وانت وش ناوي ؟! قاطعه ريان بضجر: انت ما عليك ..لما اوصل اعرف كيف اتفاهم !! انهى المكالمة وقفل الجوال وهو يناظر علبة الأسيد ..رح يعطيها اخر فرصه اذا ما مشت معه مثل الكلبه الحين وملك عليها اليوم الا يحرقها بالأسيد وخليها تتشوه حتى يضمن ما تتزوج من بعده وطول عمرها تتحسف على الفرصه الي ضيعتها !! وما هي فارقه معه يدخل السجن الاهم يكون انتقم منها ودمر حياتها !! وخلي قلب ابوها الكذاب ينقهر وهو يشوف ابنته المحروقه ..هو هدده وحذره من قبل بس رمى كلامه بعرض الحائط وهرب !! ** ** ** بالمستشفى استندت على الجدار بعد ما خارت قوتها ...بعد ما ادخلوا اشجان العنايه المركزه...كتمت انفاسها للحظات تقوي حالها ..مسكت الجوال وللحين كل شيء بجسدها يرتجف ... مباشره اتصلت على ابوها ومن اول رنه نطقت بصوت مرتجف: يبه وينك؟! ابو زينب الي الخوف دب بقلبه وخاصه إنها المنطقه ما فيها تغطيه والحين تكلمه... معقول وصل ريان واخذهم ..وباعصاب محروقه نطق: وش فيه ؟! انت وينك؟! نطقت والعبره تخنقها: اشجان قرصتها افعى وحنا حاليا بمستشفى ****** ابو زينب تنهد براحه انهم طلعوا قبل وصول المجنون ريان ...وسرعان ما استوعب عقله كلامها نطق بفزع : كيف قرصتها ؟! وكيف وضعها؟! نطقت باختناق ما لها نفس تتكلم: ما ادري تعال ولا تتأخر علينا!!! نطق وقلبه ما هو مرتاح خايف على اشجان : نص ساعه واكون عندكم ...المهم لا تغادرين مكانك ولا تتواصلين مع احد ما ابغى احد يعرف مكانكم ...ما رح اتأخر!! انهت المكالمه وما قدرت تحبس دموعها اكثر من كذا.... بدأت تدعي ربها تقوم اشجان بالسلامه وما يصيبها مكروه!! ناظرت ورد الي التصق برجولها ....نزلت على مستواه وجلست على الارض ما عاد فيها قوة تقوم من مكانها !! احتضنت ورد بقوة وكأنها تواسي نفسها فيه او تستمد منه القوة حتى تقاوم كل المشاكل من حولها!! ** ** ** اول ما نزل من السيارة كان صديقه بانتظاره ...تقدم نحو الباب بس مسك يده صديقه: تبغى تدرعم عليهم ؟! تراهم بنات!! رمقه ريان بقرف: لا تتدخل انا اعرف اتصرف!! نزل نظره للعلبه الي بيد ريان نطق بتوجس: ريان!! تجاهله ريان وفتح الباب ودخل وعيونه تتوزع على المزرعه .. وكأنه يبحث عن فريسته حتى ينقض عليها ... استغرب الهدوء الي بالمكان ..توجه للبيت اكيد انهم بالداخل ..فتح الباب وهو يناظر بترقب ..السكون يحيط بالداخل!! بدا يبحث بارجاء البيت ... وما لهم أي اثر ... معقول هربوا ؟! كيف هربوا ؟! وبدون وعي طلع وهو ينادي على صديقه ...وقف لما اقترب منه صديقه وهو ينطق باستغراب: وش فيك؟! نطق والقهر يأكل قلبه: ما في احد هنا ؟! انت تضحك علي؟؟ تفاجئ من كلام ريان: مستحيل ..انا بعيوني شايفهم ...معقول هربوا ريان بقهر: الله يأخذك وين عيونك عنهم؟! ما اتوقع ابتعدوا عن المكان ..يمكن هربوا على رجولهم بما انه ابو زينب ما هو موجود !! هز رأسه بتأييد: وانا اقول كذا ...يمكن هربوا من الجهة الخلفيه وانا الغبي اراقب هذي الجهة!! ريان ناظره بغيض: حسبي الله على الغباء الي معشش بعقلك! والحين كيف اوصل لهم ...اذا اليوم ما كانت على ذمتي وربي الا اقوم الدنيا وما اقعدها ؟!!! ** ** ** وقفت لما شافت ابوها اقترب منهم ومعه رويد وايلين وسناء ... تراجعت خطوة للخلف لما ركض الصغار لها وحضنوا رجولها ... ناظرتهم بقلب ميت ...ورفعت نظرها لابوها الي تقدم يسألها عن حال اشجان.. ردت بخفوت: للحين بالعنايه ما احد خبرنا بشيء!! مسح على وجهه من التعب وهو ينطق : ربك كريم ..ربك كريم!! سناء الي تمسح دموعها بخفه: كيف انقرصت ؟! وينك عنها ؟! وهج ما لها خلق للتحقيق ...شدت على نفسها وردت بهدوء: كانوا جالسين بالخارج قاطعتها سناء بقهر: وكيف تتركينهم لوحدهم بالخارج؟! وش هذا الاهمال؟! ابو زينب مسك يد سناء المنفعله: ما هو وقت هالكلام؟! سناء ابعدت يد ابوها وهي تنطق بقهر: ما ادري ليه ساحبهم لآخر الدنيا ؟! كله علشان حضرة هالملاك ..وحنا بالحريقه ما عمرك اهتميت لنا او سألت ...لا حول ولا قوه الا بالله!! وهج بإمكانها ترد عليها ..بس تراعي انها مصدومه ومتضايقه على اشجان ...اختارت السكوت وخاصه انهم بمكان عام !!! تحركت بخطوات هادئه مبتعده عن سناء حتى تضمن ما تشتبك معها ..الي فيها كافيها وما هو ناقصها كلام زايد!! وقفت عند الشباك والصغار متمسكين فيها بقوة..يتكلمون معها بس ما تدري وش يتكلمون ..تحس قلبها انطفى ...اعصابها انحرقت وهي تنتظر اي خبر يطمئنها إنها أختها بخير!!! اغمضت عيونها ويوصلها بعض كلام من سناء الي للحين تتكلم بانفعال وحالتها حاله ....مطت شفتها بسخريه ذي سناء الي كانت تشوفها العاقله بين اخواتها ...هالكلام بقلبها ..عن اي اهتمام وتمييز يتكلمون ؟! تتمنى تكون على الهامش بس بالمقابل تعيش حياة هادئة بعيده عن المشاكل ووجع الرأس!! التفتت على ابوها الي وقف عندها وهو ينطق : ما عرفت نوع الافعى الي قرصتها؟ هزت راسها بالنفي: ما ادري وما شفتها!! زفر بضجر وبصوت مخنوق: كنت ابغى احميك بس ما توقعت رح نوصل للحظه افقد اختك!! انقبض قلبها من كلامه: اشجان رح تقوم بالسلامه لا تقول كذا ؟! وبعدين من مين رح تحميني ؟! نطق بضعف: ريان ما رح يتركك بحالك انا اعرفه ..بغيت اخفيك عن العالم كله بالمقابل ما يمسك اي سوء!! عقدت حواجبها باستنكار: والقانون وين راح؟! ترى في مركز تشتكي عليه والدنيا ما هي سايبه ؟! حرك رأسه باستياء: اشتكي عليه ؟! ولنفرض اشتكيت عليه ...رح يوقع على تعهد ما يتعرض لك ...وبعدها ؟! ريان يبغى يحرقك بالاسيد ويشوه ملامحك اذا ما تزوجتيه ...قولي وش تنفع الشكوى بعد ما تتشوه ملامحك؟...انا مو مرتاح لتواجدك وخاصه بعد خروجه من السجن!! علشان كذا لزوم تختفين عن العالم كله وتعيشي حياتك بأمان واستقرار...ما ادري كيف وصل للمزرعه ..بس ربي قدر تطلعون منها قبل وصوله لكم! حست وهج بقشعريرة بجسدها من كلام ابوها ...يشوه ملامحها .. تلقائيا مسحت على وجهها من فوق النقاب ..ما تدري هذا المجنون وش يبغى منها ؟! اغمضت عيونها للحظات من الرعب ما تتخيل كيف رح يكون الموقف لو دخل عليهم ريان المزرعه وهي مع اخواتها بدون ابوها ؟! زفرت وهي تحس بالاختناق يزيد عليها ..وين ما تروح المشاكل خلفها !! رفعت نظرها لأبوها وهو ينطق بخفوت: لزوم تبعدين من المكان ريان انسان مريض وما ادري لاي حد رح يوصل جنونه !! زاد انقباض قلبها من كلامه ...وما هي مرتاحه ...وين تروح وتهج عن العالم ....وخاصه وضع اختها ما يسمح ...ناظرت الاطفال وهي تحس جسدها تقشعر لو اذاهم ريان ..ما تستبعد عن هالانسان المريض يعمل كذا!! نزلت لمستوى رويد الي بدأ يبكي يبغاها تحمله ...يا رب رجولها ما تحملها وما فيها حيل تتحرك...وخاصه بعد كلام ابوها عن المحنون ريان ....رفعت نظرها للأعلى وقلبها يدعي السلامه ...فقط تبغى السلامه !! ** ** ** ريان ساعات انتظر بالمنطقه وهو ينتظر رجوعهم ... تمنى لو يقدر يرجع ودخل المزرعه ويشوف اغراضهم موجوده او لا... المشكلة لما دخل ما انتبه على شيء ...والحين ما يدري من وين طلع لهم صاحب المزرعه ... واضح انهم هربوا وكملوا طريق الهرب!! بداخله قهر كيف يوصل لها الحين ...يحس وصل لمرحله ما يبغاها... بس يبغى شيء واحد يشوه وجهها المبسوط عليه!! قرر يرجع للبيت وبعدها يصير خير ...عنده تصفيه حسابات مع بعض الاشخاص ...ما رح يسكت لهم بعد ما بهدلوه وورطوه ...للحين ما عرفوا ريان ...رح ينتقم من كل شخص ضايقه !! شغل السيارة وتحرك راجع لبيته وعقله بدوامه ما هو عارف يرتب امور حياته!! ** ** ** متمدد على الكنبه وهو يفرك مقدمه رأسه لعله يخف الصداع ...اليوم الضيق والكدر الي بداخله عجز يتحمله .. رفع نظره لامه الي نطقت باستفسار: ما قال ابو زينب متى يرجع رويد؟! حرك راسه بالنفي والعبوس مرتسم على ملامحه: لا ..يقول عندهم ظرف طارئ ورح تنام وهج عند اخواتها وتبغى الولد يجلس معها قبل ما ترجع! ام سراج قلبها ما هو مطمئن لهم: يا خوف قلبي يضحك عليك واخذ الولد وهرب من المكان؟! سراج باستبعاد: لو عملها ما كلف نفسه يرد علينا ...كان عمل حظر لنا او قفل خطه وانتهى كل شيء ..بس يقول رح يجلس رويد عند امه لوقت رجوعهم!! ختم كلامه وغمض عيونه وصورة رويد بعيونه ..سبحان الله نفس شكل أمه ... وكأنها ذكرى له حتى ما ينساها !!! ** ** ** اليوم الثاني رفعت حاجب وهي تشوف اخواتها الكل متواجد بالمستشفى ... وكأنهم كتيبه اكيد سناء خبرتهم .. للحين وضع أختها ما هو مطمئن ...ومثل ما توقعت لحظات وكانت زينب بالمقدمه اقتربت عليها بهجوم ما لقت له مبرر: انت وش تبغين منا ؟! ذبحتي امي وقهرتيها والحين وصل الدور لأشجان!! ذي طفله ما راعتيها ولا اهتميت فيها؟! والله ان اصابها شيء ما اسامحك ...تقتلين القتيل وتمشين بجنازته ..اوقح منك ما شفت!! وهج رفعت حاجب وهي تشوف هجومها بالكلام وانفعالها ...نطقت ببرود: لا يطق لك عرق!! رجاء المكان عام عندك كلام ابلعيه يكون افضل!! زينب والشر يسري بدمها :لا والله خفت منك!! ابو زينب اقترب من زينب ونطق بحده: خلاااااص!! ناظرت ابوها وقلبها رح ينفجر وخاصه بعد الكلام الي خبرها فيه خالها ابو ابراهيم ...وبقهر نطقت: ما خلصنا !! لمتى تميز وتفضلها عليها ؟! خلاااص ملينا من معاملتك معها وكأنها ملااااك !! كل هذا لانها بنت حبيبة القلب !! قاطعها ابو زينب باستنكار لكلامها: انكتمي رح نتفاهم على هالكلام بس مو هنا!!.. الواضح عقلك ضارب وما عدت تعرفي تتكلمين!! ناظر سناء بغضب: قلت لك لا تخبرين احد سناء وخلاص طق قلبها من ابوها: ذي اختنا وما احد يمنعنا عنها!! بيان بكره وحقد لوهج : حسبي الله ونعم الوكيل فيك ...وربي لاشرب من دمك ان صار لأشجان شيء.. كله بسببك !! ابو زينب صك على اسنانه بقوة: قلت لكم خلاااص!! ترى هنا ما هو لتصفيه الحسابات!! زينب بقوة : اذا ما كان لتصفيه الحسابات... رح يكون حتى نعلم بعض الناس المتطفله قدرها!! تراك مو اختنا تفهمين هالكلام ؟! والحين احملي نفسك وانقلعي من هنا !! انقلعي لأهل امك سكتت لما لطمها ابوها على وجهها بقوة وهو ينطق بانفعال: قلت انكتمي!! انت اكيد عقلك ضارب وصرتي تخبصي بالكلام!! زينب مستنكره كيف يضربها ابوها بهذا الشكل ..تحس وجهها انكسر من الالم ..وبانفعال نطقت: خالي ابو ابراهيم ما يكذب ..ترى خبرني وطلع المستور ...خبرني بالمستور الي ماتت امي وما عندها علم فيه !! على بالك تدفن هالسر وما يطلع ؟! وهج واقفه تناظرهم بضياع ...كلامها مثل السكاكين الي تنغرس بوسط صدرها ...ومحاوله ابوها حتى يسكتها يدلها على إنه في شيء مدفون بينهم ويخصها ...ما تدري ليه تحاول انها ما تفهم كلامهم بالرغم انه واضح بس شيء بداخلها يرفض يسمع هالكلام ... زفرت باختناق وكأنها تتنفس من خرم إبره ...وناظرت رنا الي نطقت بانفعال وهي تكلم ابوها: رجعها لاهلها ما نبغاها ..يكفي اخذت كل شيء ...وحنا ننحرم من كل شيء ..وللحين تضحي بحياتنا علشانها ....هذي اشجان ضحية حماية وهج ...رجعها لأمها ما نبغاها قاطعها ابو زينب بملامح منتفخة: الي وصل لكم الكلام كذاب !! وهج اختكم غصب عنكم وما اسمح لاحد يتكلم عليها بهذا الكلام!! تعالي وهج مد يده وهو يمسكها من عضدها وجذبها له وهم يغادر المكان ...بس وقفت بوجههم رقيه وهي تنطق بعيون تقدح شرار: انسانه انانيه ضحيتي بأخواتك وما اهتميت لمصلحتهم كل هذا علشان مصلحتك الشخصيه ...لو تزوجت ريان كان ما صار الي صار ...انسانه مدلعه انا اكرهك ...ومن الحين ما عندي اخت اسمها وهج بعد الكلام الي سمعناه عنك صدق إنك ما تستحقين الايام الي قضيناها معك !! مطت شفتها وهج بسخريه وهي تنقل بصرها لنور الي صدت عنها !!! الحين نجحوا شلة الجن بقلب اخواتها عليها ...ومعهم سالفه ما تدري عن مصداقيتها ...وطلعت قدامهم بدور الشريره الانانيه!! تحس ما يستحقوا منها تبرر لهم او تجادلهم او تناقش .... صدق لما قالوا المواقف تكشف معادن الاشخاص ... اخواتها متقلبات وهذا اسوأ شيء بالانسان ...مرة يطلعك فوق السحاب ومره ينزلك تحت الارض ...دام معهم شلة الجن الكلام معهم مضيعه للوقت...تم غسيل عقلهم بنجاح!! ناظرت ابوها وقلبها يتمزق من الالم ...قبل ما تنطق حرف واحد سحبها معه والبزران خلفها يناظروا المشهد بصمت!! اول ما ابتعدوا عن المكان نطقت وهج وهي تبعد يد ابوها عنها بقلب ميت: يبه قاطعها قبل ما تقول شيء: لا تسمعين لهم ...انت ابنتي غصب عن الكل ... قاطعته بخفوت : ادري اني ابنتك ..الشبه الي بيننا كبير ...بس مين امي؟! رفعت حاجب بملامح بائسه لما شافت سكوته ..وبغصه نطقت : كلامهم صحيح ؟! زفر بضيق وبعدها نطق : قلت لك لا تشغلي بالك بكلامهم قاطعته بإصرار: يعني كلامهم صحيح ؟! تنهد وهو عابس ملامحه ... بعدها ناظر وهج والدموع تلمع بعيونها: بعدين نتكلم بذي الامور ...الاهم عندي الحين تبتعدين عن هالمكان ..وصدقيني ما عندهم سالفه ..يبغون يقهرونك بالكلام ..ترى الحسد ما ييجي الا من الاقارب !! الحين رح اشوف لك مكان .. حسب معلوماتي جاء ريان للمزرعه البارحه ... الحين رح ارجع للمزرعه واجلب اغراضكم وادبر لكم مكان تجلسون فيه لوقت يتعدل فيه صحة اشجان ..ما رح اتأخر ...اجلسي بمكان بعيد عن اخواتك ما ابغى شجار بينكم ... وانا بنفسي رح اتفاهم مع زينب!! حسبي الله انا ابوهم وما كلفوا يسلمون علي؟! لذي الدرجه الحقد ؟! هذي امهم تزوجت وما زعلوا ولا قاطعوها !! لكن يصير خير!! ** ** ** بعد وقت رجع لهم ابوها... كانت على اعصابها خافت ابوها يلتقي بريان ويصير بينهم شجار ..انسان مريض ما تضمنه ...ناظرت بنان الي رفضت تروح معهم وملتصقه مع اخواتها !! ابو زينب ويحاول يمسك اعصابه: ترى رح نجلس بشقه قريبه هنا ما هي حلوة جلستكم كذا بالمستشفى!! زينب بتحدي: ما رح نغادر شبر واحد من هنا !! وبنان معنا !! تبغى تأخذ ذي الله معاك ..بس اخواتي ما رح اسمح تدمر حياتهم أكثر من كذا !! وهج تحركت مبتعده محتاجه للشقه ..البزران من البارحه مشتتين هنا وهنا .... وصوت بيان يوصلها: استأجر لنا شقه ما نبغى نجلس مع هالحربايه!! أبو زينب بقوة: ما في غير هالشقه الي ما هو عاجبه يطق راسه بالجدار!! وتحرك مبتعد عنهم خلف وهج ....والبنات يناظرونه بقهر كيف ما اهتم لهم وتركهم ..اهم شيء عنده الملاك وهج ..وهم بستسن داهيه .... ** ** ** بالشقه صحيت ثاني يوم وهي تحس ارتاح جسدها بعد هالنومه الطويله بعد احداث متعبه ...ناظرت البزران يغطوا بالنوم ؟! حازلت بكل جهدها ما تفكر بكلام اخواتها ..نا هو وقته الحين .... رح تتحرى وبنفسها تعرف مين طلع هالكلام وش مصلحته يطلعه الحين ..واذا كان خالها ابو ابراهيم وش مصلحته يطلع هالكلام الحين ؟! تحركت بخطوات هادئه لجهة الباب..ما رح تشغل فكرها بكلام نسبة كذبه كبيره .. حست رجولها تيبست وهي تسمع ابوها يتكلم بالجوال بصوت منخفض: قلت لك بالشقه ...الوضع ما هو مناسب .....قلت لك اعطيني مهلة شهر ... ما عليك انت...شهر وتكون عندك ...ما رح اهرب صدقني ... وأنا عند كلمتي ...ان شاء الله مع السلامه !! قفل الخط وهو يزفر من الديون الي تلاحقه هنا وهنا ...لزوم يدبر الفلوس نهاية الشهر .... غمض عيونه وهو يفكر كيف يدبر الفلوس!! اما وهج رجعت خطوة للخلف بحذر .. ورجعت ادراجها للداخل .. وقلبها مقبوض ...واضح من المكالمه وكأنه يرسم عليها ... نهايه الشهر ؟! معقول يبغى يزوجها لريان وملتصق فيها حتى يضمن انها ما تهرب..او يبغى يزوجها لشخص ثاني واضح من كلامه كذا !!! صكت على اسنانها وقلبها ما عاد يتحمل اي شيء من حولها ....لزوم تتغدى فيه قبل ما يتعشى فيها ...اندفست بسرعه بين صغارها....واغمضت عيونها مباشره لما سمعت خطوات ابوها قريبه للغرفه ... طرق الباب بخفه ودخل ..ناظرها نايمه وحولها الصغار ما كذب لما يطلق عليها لقب "الملاك" ما يبغى يزعجها ..رح يرجع للمستشفى يشوف كيف وضع اشجان ... حمل نفسه وغادر الشقه وهو يتمنى ربنا يحفظها من كل سوء...ويرد كيد ريان على نفسه!! ** ** ** ما هو مرتاح لأبو زينب ..نطق بقلة حيله : للحين يقول ما غادروا على نفس كلامه رح يرجع الطفل اول ما يغادروا!! ام سراج بضيق: وربي ما ابغى احرمها من ولدها ..يبقى ولدها وانا اعرف غلا الضنى...وبنفس الوقت هذا حفيدنا وقلبي متوله عليه ..اتمنى لو نلقى حل وسط بيننا ...بحيث ما احد يجور على الثاني!! نطق بضجر: ما ادري وش سبب هالرحيل ...تجلس تنطق هنا بذي المنطقه وكل الاطراف تكون راضيه !! بس وهج احسها ما رح ترسيها على خير!! ام سراج بحرص واهتمام: قرأت اذكارك ووردك يا ولدي!! هز رأسه : ايه قراتهم قاطعته بقلب محروق: والله على صلاة الفجر دعيت من كل قلبي على الي فرق بينكم ..ويرد كيده بنحره ..ونلقى السحر سكتت وهي تناظر زوجها نزل والفزع واضح عليه ...وقفت على حيلها بخوف: وش فيك؟؟ ابو سراج ناظر سراج: تعال ريان ولد عمك بالمستشفى وضعه حرج!! عقد حواجبه بلامبالاة: وش صاير معه؟! ابو سراج بانفعال: يا برودك ولد عمك وضعه حرج وانت بعدك جالس !! قووووووم تحرك!! وقف سراج بملل وكأنه يهمه امر هالساقط وهو يسمع أبوه يكلم أمه عن الشجار الي صار بين ريان ومجموعة شباب!! تحرك مع ابوه للخارج وامه منفعله وتنبه عليهم يطمئنوا قلبها عليها !! توجه للمستشفى والسكون يحيط فيه ...ما نطق بحرف واحد .... بعد وقت كان يمشي خلف أبوه الي يحسه وكأنه يسابق الوقت يبغى يوصل بأقصى سرعة لريان .... ما يدري ابوه لذي الدرجه ما يشوف اغلاط ريان وحقارته ... شد على قبضة يده بقوة وهو يتمنى يكسر رأسه ..كيف يتجرأ ويخطب وهج ؟! النار بداخله تأكله ...اكيد كان مخطط لزواجه منها ..صدق جنس حواء ما فيهم الوفاء!! دخل غرفه ريان والي كان بالعنايه المركزه ...بالرغم انه كله شاش بس ما يدري ما كسر خاطره او حس بالتعاطف معه بالعكس يحس إنه حاقد عليه بقوة..مط شفته بسخريه ..الحين رح يتم تأجيل زواجهم إلى اجل غير مسمى !! يناظره وابو سراج يتفقده ويتحمد له بالسلامه ...وريان بصعوبه يرد عليه!! واقف ينتظر متى يرجع للبيت ما له خلق يقابل ريان اكثر من كذا.. سبحان الله ولا كأنه يحمل نفس الدم !! وقف لما نطق ابو سراج: انا الحين طالع ورح اشوف محامي يتولى القضيه وما رح نسكت لهم ...بس كل الي ابغاه منك تكون متعاون مع المحامي...والحين رح اطلع وهذا سراج عندك رح يرافق معك اي شيء تحتاجه ما رح يقصر !! وناظر سراج قبل ما يعترض: اذا تبغى اغراض كلمني وانا ارسلهم لك!! ختم كلامه ابو سراج وهو يعطي سراج نظرات لو اعترض على كلامه!! مط شفته بضجر وكأنه هذا الي ينقصه ..اصلا بالعنايه ما يحتاجون لمرافق ..ما يدري ابوه كيف يفكر!! جلس والعبوس مرتسم على ملامحه ...وهو يتمنى انه ما جاء لهنا !!! رفع نظره لريان وهو ينطق بصعوبه: اذا متضايق روح قاطعه سراج بعبوس: علشان ابوي جالس ما هو لسواد عيونك والا انت ما تستاهل!! تدري يسلم يد الي كسرك كذا !! ريان بضحكه متعبه بس مستفزه لسراج: كل هذا الحقد علي لاني خطبت وهج!! ناظره سراج باشمئزاز: خلاص انكتم ترى صوتك يجيب لي الغثيان!! ريان بصوت مثقل رد عليه:عاد تكسر خاطري بعد ما تزوجت وهج !! قاطعه بتساؤل دوبه اليوم اتصل بأبو زينب وما جاب له سيرة شي..وبانفعال نطق: تزوجت ؟! متى ؟! ريان بحسره: هالكلب ابو زينب ضحك علي ..اتوقع العريس الجديد دفع له مهر اكثر ....بالرغم انها البنت تبغاني ..بس انسان طماع وكذاب ...اليوم خبرني انه زوجها لمنطقه بعيده ورحلت مع زوجها .. وحتى ما احد يوصل لها زوجها بدون تسجيل العقد بالمحكمة ...يعني زواج شرعي بدون ما يتم تسجيله بالمحكمة!! سكت للحظات وهو يحس بالتعب من الكلام !! سراج يحس الصدمه اخرسته ... وهج تزوجت عمره ما توقع هالشيء...يحس وكأنه شيء ينهش روحه وما هو مصدق انها تزوجت واختفت!! لحظة ورويد وين رح يكون ؟! معقول اخذته ؟! والله ما يسكت لها ورح يطلعها من تحت الارض اذا كان هالكلام صحيح ...يمكن ريان كذاب ويبغى يستفزه!! ناظر ريان الي تابع كلامه بسخريه: يقول ابو زينب .. تزوج وهج واحد عقيم... ورحب بفكره يربي معها البزران الصغار ..وولدك من بينهم ..اخذته وهربت !! ليتني قدرت اعمل لها السحر ما هو لك !! كان خليتهاوطول الوقت تراكض خلفي!! غبي ما استفدت شيء!! سراج الي وقف على حيله ويحس بطنين قوي بإذنه من ا الكلام الي يسمعه ...نطق وهو يحس ريقه نشف: وش تقول؟! ريان ابتسم باستفزاز: تدري كنت ناوي بعد ما اتزوجها افك سحرك علشان تتعذب طول حياتك وانت تناظرها معي ...بس ما ضبطت معي ... والحين بما انها طارت من يدي ..ما في فائدة من السحر الي عملته لك..بالعكس الحين تحلى اللعبه أكثر ...ترجع لطبيعتك وتنحرق بنار بعدها وما رح توصل لها !! السحر وضعته في بيتنا عند مدخل البيت الجهة الشرقيه ...عند شجرة الياسمين .. احفر هناك ورح تلقاه ... واستمتع بعذاب العاشق الي تجرعته !! سراج يحس ما هو قادر يأخذ النفس ..ما توقع في ناس حقيره كذا .. وقبل ما يصدر منه أي فعل ناظر ابوه الي دخل وعيونه على ريان بعد ما سمع كل شيء .....اقترب وهو يناظره بخيبه وعتب: ليه يا ريان تعمل كذا ؟! انا وش اسأت لك حتى تؤذي ولدي الوحيد؟! ما توقعت إنك بهذا الانحطاط ! لما قال لي سراج من قبل انك الي تبغى له الاذى وشاك فيك انك عملت السحر .. وقفت بوجهه انا وام سراج مثل السيف وحنا ندافع عنك !! طول الوقت نبحث عن الغريب وطلع خراب البيت من القرايب !! لأي حقد وصلت حتى تدمر بيت ولد عمك ؟! كانوا عايشين ومبسوطين وفرحانين بالحمل ..رسموا احلام لحياة جميله مع طفلهم ..وانت بكل بساطه دمرت كل شيء!! قاطعه ريان بقهر: وهج لي انا !! ما تدري كم اتعذب قاطعه بقرف: انكتم يا خسيس !! ما لقيت الا زوجه ابن عمك تحط عينك عليها !! حسبي الله ونعم الوكيل فيك !! ما رح اسامحك بعد ما دمرت كل شيء ... جعلك لهذا الحال واردى ...صدقني انا الي رح اوقف بوجهك واضيق عليك الدنيا. ..رح انتظر تطلع من المستشفى وبعدها يصير خير يا منحط !! تفل عليه وسحب سراج من كتفه : صدقني ما يستحق توسخ يدينك فيه ... وقف ابو سراج لما دخلت الممرضه وهي تنطق بهدوء: لو سمحت يا عم ممنوع الزيارات ..حالة المريض سيئه !! هز راسه وطلع بدون اي كلمه وتوجه لخارج الغرفه وهو ممسك بسراج بقوة ..ما يبغاه يتهور ويضرب ريان بذي الحاله السيئه ..ان صار له شيء تقع على راس سراج ....ومستحيل يفرط بولده علشان هذا الخسيس ..كلما يتذكر إنه تمسخر على كلام سراج ينقهر من نفسه !!! طول الوقت ريان قدام عيونه ولا شك لو لحظة إنه الفاعل ...يالله لذي الدرجه الحقد والحسد تعمي قلب الانسان ... كيف ينسى او يتناسى حكم الي يروح لذي الأماكن !! وقف وهو يناظر سراج وكأنه بعالم ثاني ..نطق وهو يشد على كتفه بمواساه: الحين رح نتأكد من كلام هالكلب ونشوف مكان السحر ...وبعدها نقدر نتصرف!! ** ** ** ** من لما انفك السحر بعد ما احضر ابوه شيخ ثقه حتى يكون مطلع على الوضع .. لأنه بعض من السحر يكون مؤذي ... ما يدري وش المشاعر الي تسكن بأعماقه ...الي يعرفه شيء واحد لو ابو زينب قدامه الا يطلع روحه ... النار تأكل صدره من فكرة زواجها ...يحاول يهدي نفسه يمكن ريان كذاب ..لزوم يتأكد من الكلام ..وبدون تردد اتصل على ابو زينب ..واول ما انفتح الخط نطق بهجوم ما قدر يكتمه: انت كيف تزوج وهج !! ابو زينب مط شفته بسخريه ...الظاهر وصله الخبر الحين...نطق بهدوء استفز سراج بقوة: اتوقع انها ابنتي وازوجها مثل ما ابغى..تراك طلقتها من زمااان والا حضرتك ناسي ؟! ما لك حق تحاسبها خلاص كل واحد فيكم بطريق!! قاطعه والنار مشتعله بداخله: دام عندي ولد منها اتحكم بكل شيء ...وين رويد ؟! على اساس كم يوم وترجعه ؟! كيف تأخذ رويد وتهرب فيه ؟! تظن البلد سايبه على كيفكم ؟! وربي الا اشتكي عليك قاطعه ابو زينب ؛ يا اخي ذيك المحكمه واشتكي عليها ..انا وش دخلني ؟! ام واخذت ولدها نطقت بقهر من بروده: حضانتها سقطت بمجرد زواجها!! ابو زينب وهو يتثاوب بنعاس: اذا حصلتها خذ الولد منها ..والحين لا تأكل رأسي ..مع السلامه وقفل الخط !! ناظر سراج الجوال بعد ما قفله ابو زينب ..يتمنى يكون قدامه ويطلع كل حرته فيه...اخخخخخخ بداخله بركان وش يطفيه !! نزل وهو يفكر وين يلقاهم ..وقف بمنتصف الدرج وهو يناظر امه وهي تردد بشهقه: انا لله وإنا اليه راجعون!!! عقد حواجبه لما التفتت له ونطقت بغصه ما تدري وش سببها بالرغم من الاذى الي تلقوه من ريان ..بس صعب عليها موقف ام ريان كيف تلقت الخبر ...وبنحيب ما قدرت تكتمه : ريان توفى!! رفع حاجب ما توقع هالشي: كيف ؟! كان وضعه قاطعته وهي نجلس على الكنبه بتعب : اصابه نزيف على الدماغ قطعت كلامها ودخلت بنوبه بكاء ....ما تتصور تتلقى خبر عن ولدها ... تتمنى من ربها يحفظ لها سراج من كل أذى !! زفر بضيق بعد هالخبر ...ما يدري ليه تكدر خاطره ...يمكن من بكاء امه ما يحب يشوف الدموع ..يضيق صدره .... اخر شيء توقعه موت ريان ...كان ينتظر اللحظة الي يطلع منها من المستشفى ويصفي حساباته معه ...ما قدر يدعي له بالرحمه او يسامحه ...كيف يسامحه بعد ما دمر بيته وحياته واستقراره!! ** ** ** قفل الجوال من سراج والضيق يخيم عليه ..كذبه كذبها حتى يبعد الاذى عن وهج وبنفس الوقت حجة لتبرير غيابها ...اخخخ منك يا وهج ..ما قصر معها ..كيف تهرب كذا ... اكتفت برساله تخبره انها غادرت وما رح ترجع وانها بخير وما يقلق عليها ... وين يلقاها بهذه الدنيا .. وكأنك تبحث عن ابره بكوم من القش ... لزوم يلقاها ويتأكدبنفسه انها بخير ...قطع أفكاره وناظر نور الي نطقت بعبوس: اذا تبغى تدخل عند اشجان سمحوا بالزيارة لها!! هز رأسه بدون ما يرد عليها ..للحين ما تكلم وتفاهم على كلامهم وطريقه تعاملهم مع وهج .. متأكد تركت المكان بعد ما جرحوها ..ما رح يسامح اي احد يزعلها ... يتمنى من قلبه يتخلص من الشبح ريان حتى يضمن انها وهج تكون بخير !! وبنفس الوقت زعلان منها كثير على تصرفها ** ** ** مرت الأيام عليها بعد ما ايقنت تصرفها هو الصح ...خلاص تعبت من كل شيء حولها ....مرتاحه بعد ما تركت كل شيء خلفها ...لحظات عصبيه ومريره مرت فيها ...حركت رأسها تطرد الماضي من عقلها ...وابتسمت لأروى الي نطقت : كأنك يا وهج عجقت الرسمه ؟! رفعت حاجب وهي تتأمل الرسمه بتقييم: لا حلو ؟! العروس برضا: بالعكس حلو ..تمام كملي!! هزت راسها بابتسامة مزيفه...وتابعت الرسم وهي ترثي نفسها ...ما شاء الله من جامعيه لنقاشه ومصورة ..هذا شغلها الحالي تخاف إن توظفت يقدر يوصل لها سراج وابو سراج وأبوها وريان ...وهذا الشيء ما تبغاه ...خلاص اكتفت بعد ما تدمرت حياتها وما عادت تشعر بالراحه والامان ... الي عندها الحين اهم شيء عيالها الثلاث معها وهذا يكفيها !! اقتربت ايلين بحذر منها وهي تنطق: ماما عادي نشتري من البقاله!! ما ردت وهي كاتمه انفاسها حتى ما تغلط بالرسم!! ايلين بضجر من تطنيش وهج: ماما وش قلت؟! اروى بضجر منها: اففف منك ما تشبعين ..ما تشوفينها منشغله !! تخصرت ايلين بضجر: يا ربي بس تقول اه او لا؟! نقزت وهج لما صرخت اروى بانفعال: لاااااا وسرعان ما ضحكت على شكل ايلين الي تناظر اروى بغيض !! وهج نطقت بلطافه وهي تناظر ايلين المقهوره من اروى: لما اكمل شغل اطلع معكم!! اروى خزتها : وربي ما احد يخربهم غيرك!! اقول كملي شغل اشوف!! رجعت تكمل شغلها وهي تحاول ما تتسارق النظر لرويد الي دخل المكان ...لانها متأكده رح يشتت ذهنها اذا ناظرته!! كتمت ضحكتها على اروى الي نطقت بغيض : انا قلت لا تطلعون من الغرفه !! كتمت انفاسها لما وضع يده على كتفها بنبره على وشك البكاء: ماما !! زفرت بضيق ووضعت الي بيدها جنبها وناظرته والدموع تلمع بعيونه .... ما تقظر تتجاهله....مسحت على راسه بخفه: عيون ماما !! نطق وهو زام شفته : نلوح!! رويد ما تقدر تقول له لا ...عن باقي الصغار ... لأنها اخذته يعيش معها حياة الفقر ...حرمته من ابوه ...لو كان عايش عند ابوه كان الحين كل شيء متاح له ....تحس لزوم تعوضه عن الحرمان الي تعرض له بسببها !!! هزت راسها وهي تنطق بهدوء: اروى كملي عني ما رح اتاخر .. اشتري لهم وارجع!! اروى ناظرتها بغيض: ايييه ابن الحبيب ما نقدر نقول له لا !! ضحكت بخفه وبداخله غصه .. أي حبيب ؟! متأكدة سراج وابوه لو يمسكوها الا يذبحونها بيدينهم !! وقفت وهي تعتدل بوقفتها : تراك تتوهمين !! يلا ماما نروح!! تحركت تجهز نفسها وعيون العروس عليها ...بعد ما غادرت نطقت بانبهار: وش تقرب لك؟! اروى وهي تبدأ شغل: من قرايب زوجي !! هزت العروس راسها وهي زامه شفتها: تبارك الرحمن!! ما هو باين عليها عندها ثلاث بزران ..يا دوب باين عليها ١٩..كم عمرها ؟! اروى وهي مركزه بالشغل: ما ادري بالضبط يمكن .. والله ما ادري بالضبط هزت راسها بابتسامة: ما شاء الله حلوة ...وشعرها لوحده حكايه !! حتى عيالها الاولاد نسخه منها ..يا رب ترزقني اولاد بجمالهم!! ** ** ** اشترت من البقالة وبدأت تمشي وهي تناظر الطريق ...مر سنه ونص .. بالبداية ما هو سهل تستقر بمكان بعيد عن المنطقه الي عاشت فيها طفولتها ومراهقتها وشبابها!! بس أحياناً نوصل لمرحله خلاااااص ...لما يفيض المر على المرار!! ابتسمت بمراره وهي تشوف ايلين تركض وتناظرهم وصوت ضحكاتها يتردد بالمكان ...لما تبتسم وكأنها نسخه عن رقيه !! حست قلبها يعتصر وعقلها للحين رافض فكرة فقدانها .. خاصه رقيه ما توقعت بيوم من الايام تنفطع العلاقه بينهم كل هالمده... ايام الطفوله والمراهقه عاشوها مع بعض ..ضحكوا وزعلوا ...مواقف طريفه مرت عليهم ... كم مرة ناموا على السطح وهم يعدوا النجوم ...وكم مره تضاربوا .. ايام جميله جمعتها مع اخواتها وخاصه رقيه ونور ..كانوا قريبات لقلبها كثير???? ...بس كسروا بداخلها اشياء كثيره ما قدرت تنساها او تتجاوزها ...ما تتوقع لو تشوفهم قدامها تسلم عليهم وتنسى الماضي!! وقفت وهي تناظر حرمتين جنب بعض يمشون ويتكلمون بالشارع ...واضح انهم اخوات ....اخذت نفس وهي تشعر قلبها يعتصر من الالم بعد ما طردوها اخواتها ؟! يا قلة عقلهم ينسبون الي صار لاشجان بسببها...وفوق هذا طلعوا لها بسالفه ما تدري للحين عن صحتها ..وما كلفت نفسها تفكر فيها .. لأنها بكل بساطه خلاااص تعبت من كل شيء حولها!! مرت سنة ونص على الحادث لكن للحين قلبها ينزف من الألم .... ردات فعلهم كان وقعها اليم على قلبها !! رفعت عيونها للسماء وهي تحس دموعها بدات تتراقص بعيونها .... من بعد ما غادرت وقررت الرحيل ...طوت صفحة الجميع من حياتها ..ما عادت تعرف ايش صار فيهم ولا تعرف اخبار أي احد فيهم!! بس الي خايفه منهم لما يكبروا ويدخلوا المدرسه اكيد رح ينكشف مكانها ... خايفه تفتح عليها الأعين ...تخاف للحين سراج واهله يبحثون عنها حتى يستردون رويد منها ؟! ما تدري اذا كانت انانيه حتى تحرم رويد من اهله .. بس الظروف حتمت عليها هذا الاختيار!! بعد تعب اشجان ضاقت عليها الدنيا بما رحبت !! وقررت تنتقل عند اروى الي تسكن بمنطقه ابنتها الارمله .... الناس الي تعرفهم احسن من الي ما تعرفهم ...واروى عاشت معها من قبل وما كانت بهذا السوء ... ابتسمت على نفسها وهي تتذكر كيف كانت تشوفها بشكل مخيف ..من شدة خوفها ورعبها انعكس على حياتها وما عادت تفرق بين الحقيقه والخيال!! ** ** ** جالسه بالغرفه على الارض وبحضنها اللاب ..كل فترة لزوم تفتح موقع الشركه ...تبتسم بسخريه بعد ما تم طردها من الموقع ... للأمانة ما توقعت هالحركه منهم ...اذا بينهم مشكله واختلاف الوظيفه وش علاقتها؟! ليه قطعوا رزقتها؟! الشغل هنا قليل ويا دوب تقدر تصرف على البزران ومع اجرة البيت ... كل يوم تدعي للعزابيه بالزواج حتى تشتغل بنقش الحناء والتصوير ... اروى تلف وتحوم حول الرجوع لبيتها وخاصه بعد ما تزوجت ابنتها من سلفها ..وجودها ما له داعي هنا ... بدل ما تدفع اجرة بيت وعندها بيت ...متردده تنقل معها او لا .... رفعت راسها على دخول اروى وهي تنطق بتساؤل: ما فكرت بالموضوع ؟! وهج باستغراب: دام انك قريبه من ابنتك ليش تبغين تبتعدين قاطعتها اروى بلامبالاة: ابنتي وش اعمل لها متزوجه وعايشه حياتها!! خلااص مليت من هنا ابغى ارجع لبيتي...حمدت ربي الف مرة إنه تفركش موضوع بيع بيتي والا كان الحين اقضي عمري استأجر هنا وهنا !! وبعدين هناك رزقتي افضل من هنا بألف مرة !! وهج برفض: ما ابغى قاطعتها اروى بإقناع وهي تستند على الباب: تظنين حضرتك سندريلا الي لف البلاد وهو يبحث نعالها ؟! ضحكت بخفه وهج : الا قولي لف البلاد وهو يبحث عن ابنه ومتاكده رح يقص رقبتي اول ما يشوفني ...من قبل ما اخطف الولد وهو كارهني ويبغى يدفني والحين بنظره استحق الموت ..فخليني هنا افضل اربي هالبزران !! اروى رفعت حاجب: اشوفك طول الوقت خايفه من طليقك يعرف مكانك بس ابوك ما عندك مشكله؟! وهج ابتسمت: ابوي بالنهاية ابنته ومهما قسى ما رح توصل فيه يدفني ابتسمت اروى : بصراحه قلبك قوي يوم هجيتي كذا ...بس ابوك صعبه عليه قاطعتها بوجع: كل الي عشته بسببه ...لو ما تزوج من ام ريان كان ما نشب لي ريان الزفت ... اروى خزتها : تستاهلين ما عرفت تقولين لابوك عني ويتزوجني على الاقل ما تبتشلين ببزرانه كذا تكوني ضامنه ما رح انجب ..كان الحين مصفيه راسك من هالدلعه إيلين!! ابتسمت وهج : لو زوجتك لأبوي وش يضمن لي تنجبي طفل معاق وابتلش فيه طول حياتي ...على الاقل ايلين تقوم بنفسها!! اروى فتحت عيونها باستنكار: وربي ما احد معاق غيرك...اسمعيني رتبي امورك رح نرجع لبيتي وما تخافين انا ادبر امورك والذبان الازرق ما رح يعرف مكانك. .وبعدين الحين تلقينهم يبحثون عنك خارج المنطقه لانهم متأكدين انك طلعت خارج المنطقه ..ما احد رح يبحث عنك بنفس المنطقة!! وقبل ما تعترض نطقت اروى تنهي الموضوع: ما عليك انا أتدبر الأمور !! ابتسمت بعد ما غادرت اروى .. تتذكر لما خبرتها بالحقيقه وانها من نفس المنطقه وقتها مسحت فيها الارض ...انفعالات اروى تضحكها!! ** ** ** انتهى البارت دمتم بخير ❤️