اكتب ياصغيري - الفصل 31 - بقلم ضاقت انفاسي - مكتملة | روايتك

بارت ٣١ ابو سراج بهدوء : انا رح اتصل بأبوك تجهزين اغراضك وتجلسين عندنا !! ام سراج هزت راسها بتأكيد: جهزت لك غرفة وسرير للبيبي رفعت حاجب وهج وكلامهم جرحها ..طول الوقت ما سألوا وحاولوا يبعدوها عن سراج حتى ما يتضايق..نطقت بملل من كلامهم: اجلس عندكم بصفتي ايش؟! حرك شفته ابو سراج يرد ..بس قاطعته وهج وهي تكمل كلامها والعبره تخنقها: انتهت عدتي يا عمي وانت تقول انتظروا ورح أحلها ؟! كيف تحلها ؟! تظن إني وجهي مغسول بمرق حتى اجلس في بيت طليقي ؟! عندي اهل اجلس عندهم معززه ومكرمه ام سراج باعتراض: بس بيتكم ما يناسب قاطعها ابو سراج بحده: ام سراج!!! ام سراج تابعت كلامها وتجاهلت نظرات زوجها: صدقيني ما يناسب يا دوب يوسع اهله ..كيف أقدر أشوفه..وعمك كيف يقدر يشوف حفيده ...ما أبغى أضايق على اهلك ...تعالي عندنا ...ومستعدين نقسم البيت ولك عهد مني سراج ما تلمحين خياله ..ورح يكون لك بوابة منفصله عنا ..تطلعين واهلك يزورنك براحتهم !! قاطعتها وهج بقلب ميت: انا في بيت اهلي وإن بغيتم تشوفون حفيدكم ما رح امنعكم .... حياكم الله بأي وقت ...وغير كذا ما عندي !! ابو سراج زفر بضيق: صدقيني اذا رجعت يمكن لما يشوف سراج الطفل يحن لأيامكم ...لا تنسين هالشيء ما هو بيده ...وانت تعرفين محبة سراج لك ... أعطوا بعضكم فرص ..باكر لما ينفك السحر رح تتندموا على اي قرار متسرع منكم وهج قاطعته بسخريه: قرار متسرع؟! عمي كم صار لي انتظر ؟! كم شهر ؟! وبالنهاية سراج يرسل لي وكأني انا الي اركض خلفه واتلصق فيكم ؟! الي بيننا انتهى يا عمي ورايتكم بيضاء ... ما قصرتم ابو سراج زم شفته بقلة حيله حتى لو اقنعها المشكله سراج الي ما هو متقبلها ..نطق بضيق: مثل ما تبغين ...ما تمنيت نهاية العلاقه كذا ..حسبي الله على الي دمر حياتكم ... عموماً انا رح ابعث لك نفقه للطفل ...واي شيء يحتاجه حنا موجودين ... هزت رأسها بهدوء ما تنطق حرف واحد. . وبداخلها تحس روحها تننزع بقوة بعد ما انتهت علاقتهم ...ما توقعت تنتهي العلاقه بذي البساطه!!؟ رفعت عيونها والدموع تتراقص بعيونها وهي تشوف ام سراج انفجرت من البكاء على الحال الي وصلوا له !! ابو سراج زفر بضيق ..وضع يده على كتف زوجته بمواساه: خلاص يا ام سراج !! ام سراج تمسح دموعها وقلبها يتمزق من فراق وهج ....خلاص كل شيء انتهى ..ما رح تسامح الي خرب بيت ولدها ...الي ذابحها وهج بعدها صغيره ..وش ذنبها حتى يصير فيها كذا ... نطقت والعبره تخنقها: ربي يعلم بمعزتك وغلاتك عني ....ابتعدت عنك الفترة الماضية ما لي وجه اكلمك .. اخاف تسأليني عن سراج واكسر قلبك بالإجابة..بس والله ما هو بيدي ...ربي يعلم ما تمنيت زوجه لولدي غيرك ...دخلت قلبي وكأنك بنت لي ... حسبي الله عليه الي دمر حياتكم ...وبعثرها ...ما في خوف من رب العالمين ؟! ما فكر بالطفل وش ذنبه يعيش كذا ؟! ما في لا ذمة ولا ضمير ...عسى حوبتك انت وسراج تجلس للي خرب بيتكم !! ختمت كلامها ورجعت تبكي بنحيب وهي تشوف حياة ولدها خلاص تدمرت!! وهج ضاق صدرها بزياده ...مسحت دموعها الي تنزل بعد ما فقدت السيطرة عليهم ... ابو سراج اقترب من وهج ومسح على رأسها وهو ينطق بمواساه: ما تدرين وين الخير ...ما نقول الا حسبي الله ونعم الوكيل!!! ** ** ** مستلقي على الكنبه على طوله ومغطي عيونه بالساعد ... بداخله بضيق ما يعلم سببه ...يحس نفسيته أحياناً مرتاحه وأحياناً يحس بالكدر بداخله وعيت الراحه تزوره ...يصيبه فتور عن كل شيء ...ما يبغى يعمل اي شيء او يشوف احد .... نزل يده عن عيونه وناظر امه الي نطقت بعتب لما دخلت الصالة : ما تبغى تروح معنا وتشوف ولدك ؟؟ رفع نفسه بخمول : متى خروجها من المستشفى ؟! ام سراج وهي تناظره بتأمل ....التعب واضح عليه ... نطقت بضيق حتى حفيدهم ما فرحوا فيه: انتظر ابوك حتى نطلع للمستشفى ... مسح وجهه ما له نفس يقوم من مكانه ...ما عنده شغف يشوف طفله ولا فرح لوجوده ..ما يدري وين حماسه يكون عنده طفل حتى قبل ما تحمل وهج كان متشوق يكون عنده طفل ..بس الحين يحس الفرحه انطفت وما لها وجود .. معقول مثل ما يقولون احد عامل له سحر ؟! ناظر امه الي تنتظر منه جواب ...نطق وهو يضغط على نفسه حتى ما يكسر فرحتها : اكيد طالع معكم ...البارحه انشغلت وما لحقت اروح وما حبيت اروح لوحدي!! هزت راسها براحه على الاقل يكون متقبل ولده!! تتمنى من قلبها ترجع علاقته بوهج ما هي طالعه من نفسها ..بس وش يطلع بيدها!! بعد وقت كان بالمستشفى مع امه وابوه ...توقف وهو يشوف وهج برفقة ابوها الي مستنده عليه ويا دوب تقدر تمشي ... حس قلبه نغزه وهو يشوف تعبها وضعفها من عيونها .... كتم ضيقه وهو يحس بمشاعر مختلطه لها ... ناظر الي تحمل الصغير توقع تكون من اخواتها ...ليش ما يحس بمشاعر لهذا الصغير ... وكأنه مجبور يجامل امه وابوه!! ناظر ابوه الي تقدم منهم وهو يسلم عليهم وينطق بعتاب ليه ما انتظروا!! ناظر ابوها الي توظف عندهم بالفرع الثاني وما يشوفه ينطق بتبرير: كتبوا لها خروج ولزوم نفضي المكان يوزع نظره بين أبوه وابو زينب وهو يحاول ما يسترق النظر لوهج ...قلبه يوجعه منها ما يبغى يشوفها !! اقتربت منه ام سراج لما اخذت الطفل من خالته وهي تنطق بابتسامة: شوف ولدك يمه !! توهق سراج ما يعرف يحمل الاطفال ..حمله بشويش وهو متوهق يخاف يسقط منه ...قبله على راسه بخفه وناظر امه بابتسامة: يمه اخاف يسقط من يدي!! اخذته ام سراج منه وهي تقبل الطفل ولو يطلع بيدها تحطه داخل ضلوعها ..ما اغلى من الولد الا ولد الولد !! يناظر امه ويبتسم لها الي وجهت وجه البيبي له حتى يشوف الصغير وهو بحضنها !! اما وهج مستنده على ابوها ما فيها حيل توقف ...من لما شافته وقلبها ينبض بقوة ...كيف تبدلت الاحوال ...والحين صاروا اغراب ...تحس باختناق على طفلها الي انكتب عليه ما يعيش مع أم وأب ... لمحت سراج يبتسم لأمه ومتأكده ابتسامه مجامله وما هي طالعه من قلبه !!.. غضت نظرها وهي تردد بداخلها " لا تسترق النظر لم تعد الديار ديارك" ... خفق قلبها لما وصلها صوته وهو يكلمها : الحمد لله على سلامتك ..وسامحيني على اي تقصير او غلط بدر مني!! حست وكأنها سمعت غلط ...بعد رسالته ويطلب منها السماح ..بعد ما حول لقلبها لأشلاء ...جاي بكل بساطه يطلب السماح ...ما ردت عليه وهمست لابوها بخفوت: مشينا يبه مب قادرة على الوقوف!! حس كأنه احد سكب بوجهه مويه بارده لما تجاهلته وما ردت عليه وغادرت برفقة ابوها الي استأذن وتحرك ... ابو سراج اقترب من زوجته يناظر حفيده : يلا تحركنا ...نوصلهم وأي شيء يبغونه نأخذ لهم !!! سراج تضايق من حركتها فشلته قدام الكل ...قبض على قبضة يده بقوة ونطق بخفوت وملامح عابسه: انا راجع للبيت!! "" "" " جالسه بفراشها على الارض وهي مغمضه عيونها من شدة التعب ...وجع بطنها وكأنه سكاكين تقطعها ....شدت على شفتها من شدة الالم ..ومكان العمليه شيء ثانيه ...تحس يضيق عندها النفس من شدة الالم !! فتحت عيونها بعبوس وهي تشوف رقيه داخله وهي تلقي الشال بعشوائية بعد ما اعطت لحنان ابنتها وجلست على الارض بملل: افففف حر !! ناظرت بنان وهي تنطق بأمر : اغراضي رتبيهم بذي الخزانه.!! وهج رفعت حاجب وهي تشوف حقيبه كبيره من الملابس ..نطقت باستغراب: ليش ذي قاطعتها رقيه وهي تثاوب من النعاس: اغراض .. ترى زعلانه عندكم !! زادت عقده حواجب وهج وهي تنطق باستنكار: زعلانه ؟! رقيه هزت رأسها بقوة: خلاص انا اكتفيت منه سكتت رقيه لما دخل ابوها وهو ينطق بغضب: ما شاء الله تزعلين من زوجك لانه رفض تنامين عند اختك بالمستشفى ..تخربين بيتك علشان هالحجه التافهة!! ذي اختك ما فيها شيء وما نقصها رجل ولا رأس بجلستها بالمستشفى.. رقيه بإصرار: ذي اختي وما اسمح له يبعدني عنها ...لزوم يعرف أخواتي خط احمر! قاطعتها وهج وهي تخزها بتكذيب : خط احمر ابو زينب بضجر نطق: والله ذي نهايتها وحده مطلقه والثانيه على الطريق والله اعلم باقي الفريق وش وضعه؟! رقيه زمت شفتها تمثل الزعل والبكاء: اذا متثقل مني يبه الحين اهج من هالدنيا ..اذا بيت ابوي ما انفتح لي وين اروح ؟! وين اروح ؟! ...اذبح نفسي حتى ارتاح من هالحياة قاطعها بضجر وهي منفعله بزياده: خلاص انكتمي واندفسي هنا اشوف نهايتها معك!!! رقيه من اول ما طلع ابوها وخلفه بنان ....وتأكدت خروجه ضحكت من قلبها ...هزت راسها وهج بأسف من تصرفاتها ..ممثله بارعه .... رقيه بسعاده نطقت: واااااه وأخيراً!! وهج رفعت حاجب بتكذيب لسالفتها .. لأنها متأكدة ما رح تحمل قشها وتزعل لأنه رفض تجلس عندها بالمستشفى..وبتحقيق نطقت: وش سبب المشكله رقيه بسعاده: انا افتعلت المشكله واخيرا حققت امنيتي..من زمان وعندي فضول اعيش نفس شعور البنات المتزوجات لما يحملون قشهم وعلى بيت ابوهم يزعلوا ... وأخيراً حققت هالامنيه ...بصراحه شعور حلو وما توقعت يكون كذا ؟!! وهج تناظرها بصدمه بعد كلامها ..صدق عقلها فاضي تعمل هالبلبله علشان تجرب هالشعور ...ما تدري عقلها كيف يفكر ..وبانفعال نطقت: الله يعوض علينا ...مجنونه انت تخربين بيتك علشان ذي الخرابيط ؟! وتخيلي كبرت المشكله ووصلت للطلاق وش رح تستفيدين ؟! رقيه بلامبالاة: ما رح توصل لهذا الحد ...يا عمي خلينا نجرب ونعيش هالجو !! رفعت وهج نظرها للسقف تصبر نفسها على هالمتخلفه ذي !! تنهدت والسكون يحيط فيها ...التفتت على اختها الصغيره الي تبكي ...ما فيها حيل تتحرك من مكانها ...ناظرت رقيه الي نادت بأعلى صوتها: حنااااان يا حنااااان ..اشجاااااان يا زفت!! دخلت حنان بعبوس: نعم ؟! رقيه بأمر: ما تسمعين صوتها وكأنها صافرة انذار!! ناوليني اياها واعملي لها حليب!! يلا تحركي!! حنان بضجر من الصغار اعطتها الصغيره وهي تنطق بانفعال: لا احد ينادي علي !! كشت عليها رقيه بعد ما طلعت وهي تنطق: والله جيل !!! وانت خلاص قفلي حلقك !! اعوذ بالله من صوتها ؟! وانت ليه تستقبلينها ..ارميها على امها قليلة الخاتمه ... خلااااااص اسكتي وكأني طايق امك علشان اطيقك!! وهج انزعجت من صراخها والي بسببه صحي ولدها وبدأ يبكي ... نطقت وهي شادة على اسنانها بقوة: رقيه وربي اذا ما انكتمت واشتغلت وانت منخرسه الا اقوم واحوسك حوس!! ذي طفله ما تفهم شيء !! حنان دخلت واعطت رقيه الرضاعه : خذي!! وهج اشرت لها تناولها ولدها ...حنان بضجر منهم بس شغل اوامر عليها: يا رب منكم ؟؟ سكتت وهي تشوف سناء داخله عليهم ومعها حقيبه متوسطه الحجم ... وهج عقدت حواجبها باستنكار وبتوجس نطقت: لا تقولين انت بعد زعلانه!! سناء ابتسمت : لا تخافين بس رح اجلس هنا فترة ..زوجي طلع عنده دوره خارج المنطقه ورح اجلس عندكم ذي الفترة ..واساعدك على البزران ما شاء الله حضانه !! وهج هزت راسها بإحباط متأكدة ابوها رح يهج من البيت لما يشوف 5 بزران باعمار متقاربة ... وكأنهم بحضانه !!! سناء نطقت وهي تؤشر على حنان: خذي البنت خليني اريح شوي ..طول الليل هالزفته ما خلتني انام ..وربي احس بعيوني ملح!! حنان فتحت عيونها بصدمه من كلامها.. وكأنه ينقصها يهتموا ببزران اخواتها؟!!!! وقبل ما ترد ناظرت نور الي دخلت بعبوس ...وهج تتابع الموقف وهي ترسم ابتسامه خفيفه على شكل حنان المفجوع !! وبنبره هاديه نطقت وهي تناظر نور: لا تقولين زعلانه بعد نور وضعت اغراضها على الارض وهي تكلم حنان: رتبيهم وبعدها تقدمت وتمددت على طولها وهي تنطق بعبوس: اقرفني الوحام تعديت الشهر الثالث وللحين ما فارقني ...كرهانه زوجي ومو طايقه اناظر وجهه ...اقترحت عليه اجلس هنا فتره اغير من نفسيتي!! حنان بقهر من اخواتها نطقت: ما بقى الا رنا ؟! نور ردت وهي تثاوب من النعاس: رنا على الطريق مسافة الطريق وتكون هنا ...متشاجره مع حماتها وزوجها اعطاها طراق علشان تحترم امه ...والاخت العزيزه ما صدقت خبر ..حملت قشها ...قريب توصل !! ختمت كلامها وناظرت حنان الي واقفه تناظرهم بقوة: انت بعدك هنا واقفه ؟! خذي اغراضي ورتبيهم ..وخذي معك ذي القرده !! ختمت كلامها وهي تؤشر على اختها الي بحضن رقيه !! رقيه هزت راسها بتأكيد: خذي الاغراض وارجعي خذي هالقردة وكملي رضاعتها ....ولما يصحى القرد الثاني تأخذينه ما ابغى ازعاج ..ويا ويلك لو ابنتي بكت بسببكم !! سكتت وهي تناظر وهج انفجرت من الضحك وهي واضعه يدها على بطنها من الوجع الي حصلته بسبب الضحك !! سناء خزتها: مجنونه لا تضحكي عمليتك الحين تنفتح يا غبيه!! انحنت وهج وهي مستمره بالضحك ...صدق اخواتها نهفات والنكته ملامح حنان الا رح تنفجر من القهر !!! لو يدري ابوها بتواجد هالكتيبه عنده وش رح يقول ...يا دوب يوفر مصروف لاهل البيت فكيف الحين مع استقبال اخواتها ... والازعاج لوحده سالفه ثانيه !!! ** ** ** ناظر جدته الي تتكلم بهدوء: ايه انجبت ولد ...زوجة عمك تقول يجنن تبارك الرحمن ...اكيد رح يطلع مثل ابوه!! مط شفته وبداخله دام وهج امه اكيد رح يطلع ملاك ...زفر بضيق رح ينتظر فترة ويطلبها من ابوها ..رح يحاول يلقى اي شيء يضغط فيه عليه ...لعل انه يقبل .... تنهد وهو يناظر جدته وهي تسأل: واختك ما رح ترجعها لأمك ؟! نطق وهو يفكر بعمق: خليها عند ابوها ...ما رح نتحمل مسؤوليتها ... نطقت بمحاولة اقناع: ليه تحرق قلب امك عليها .. بالنهاية هي طفلتها واكيد ما رح تقبل تبعد عنها !! مط شفته بلامبالاة: مسألة وقت ورح تتعود على فراقها ..تعتبر نفسها ما تزوجت بعد ابوي..عندها اخواني تكتفي فيهم !! ** ** ** قفل اللاب وناظر امه الي دخلت البيت ..كانت اليوم بزياره وهج .... اقتربت وهي ترد السلام عليه ..جلست وهي تناظره رد عليها بهدوء ... تنهدت وهي تنطق باستغراب: سراج فيك شيء ..وجهك ما هو عاجبني؟! ابتسم بدون نفس: ما فيني شيء ...كيف الصغير!! ابتسمت بوجع: تمنيت تجتمعون في بيت واحد بس وش يطلع بيدي!! الحمد لله بخير ..تبارك الرحمن يجنن هالولد ..وربي اخاف عليه من العين !! احسه نسخه من امه !! هز رأسه بهدوء وما علق ....والعبوس مرتسم على ملامحه... ام سراج تسترسل بكلامها : ما توقعت بيتهم كذا بسيط ...وفوق هذا إخوانها الرضع عندها ؟! ما ادري ولد عمك كيف يفكر ؟! كيف تسول له نفسه يرمي أخته كذا ؟! حتى اخوها من أمها...إخوانه رفعوا يدهم عنه ..لو تشوفه يمه نسخه جميله من وهج ...والشبه بينه وبين حفيدنا كثير واضح !! نطق بلامبالاة لكلامها: الاطفال ملامحهم تتغير بهذا العبر !! ام سراج وهي تشوفه رجع لصمته .. نطقت بتردد: مو ناوي ترجعها لذمتك!! هز رأسه بالرفض: انتهينا يمه ..كذا افضل !! ما ابغى اظلمها معي !! ام سراج ما عجبها كلامه : والطفل وش ذنبه ؟! جمع اغراضه وهو ينطق بحزم : ذنبه برقبة جده الي اصر على هالزواج الفاشل!! فتحت عيونها بصدمه من كلامه وتابعته بنظراتها لما طلع من المكان!! ** ** ** ابتسمت ابتسامه واسعه وهي تشوف حنان تردح لهم: تراكم زودوتها ... شايفيني هنا الشغاله حقتكم!! سناء اشرت لها: بدون لسان طويل تفقدي البزران وبدون صوت!! رقيه حركت عيونها تحثها على المغادرة: اقول تحركي بسرعه !! حنان ناظرتهم بقهر : انا اراويكم ببزرانكم !! ضربت الارض بقوة وغادرت لداخل البيت!! وهج ضحكت بخفه وهي راحمه حنان ...اخواتها كرفوها كرف .. بالاسم جايين يهتموا فيها .. طول الوقت مستلقيات بالفراش واخواتها الصغار يهتموا بالعيال !! ابوها يحاول قدر الامكان ما يدخل البيت من الازعاج والازدحام الي فيه ...ما تلومه كان 3 بزران والحين 6 بزران!! رقيه خزتها بقوة : اشوفك مبسوطه !! وين سراجوووو يشوف هالغزال!! صدق ما عنده نظر يوم طلقك !! انمحت الابتسامه من ملامحها من ذكر سراج ..طول الوقت تحاول تتناسى امره ولا تفكر بأي شيء ... برمجت نفسها على انه خروجها من حياته شيء عادي ... تتخيل نفسها ما تزوجت ...طول عمرها ضد فكره الزواج ..والحين ما تغير شيء ...اقنعت نفسها انها ما تزوجت وربنا عوضها باجمل ثلاث اطفال ...رح تربيهم احسن تربيه وتهتم فيهم ..وتنسى انها بيوم من الايام تزوجت ...وقلبها الغبي مع الايام رح يتأقلم على الوضع ... سناء تناظر وهج بضيق على حالها ...معقول ما تأثرت على طلاقها ... معقول ما حملت مشاعر لزوجها ؟! وخاصه سبب التفريق بينهم ما هو مشاكل ...الي فرق بينهم ناس حاقده وحاسده وبكل اسف نجحت تفرق بينهم ... خايفه على اختها تنتكس حالتها اذا تزوج سراج من بعدها .. متاكده من هالشيء ..وما رح يجلس على ذكراها ... متاكده رح تدمر نفسيتها ... الحين هي بنفاس ولزوم نفسيتها تكون مرتاحه علشان كذا قرروا يجتمعوا عندها .. وبطلوع الروح حتى كل وحده احذت الموافقه من زوجها ...وقدام وهج كذبوا عليها كل وحده حجه ... خاصه بعد ما ولدت وهج بالمستشفى وهم راجعين خبرهم ابوها إنه خائف على وهج تدخل حالة اكتئاب بعد الولادة ..علشان كذا اصر عليهم وحده منهم تتفرغ وتجلس عندها تسليها ...بس هم اجتمعوا وقرروا يجلسون عندها كلهم بذي الكذبات حتى يغيروا نفسيتها وتنشغل فيهم وبمشاكلهم عن التفكير بطلاقها بهذا العمر !! للحين نفسيتها تمام .. وطول الوقت جالسه معهم .....وما هو ظاهر عليها انها متضايقه من طلاقها .... ** ** ** مرت الايام والحياة ما توقف على احد ..وهذا كان نهج وهج بذي الحياة ... حياتها ما رح توقف على سراج واهله ...رح تعتبر نفسها ما عرفتهم ...رح تتخيل نفسها حلمت حلم قصير وكان جميل ...تبتسم كلما تتذكره ...ما تنكر بقلبها شرخ ما نسيته ورح تبقى تتذكره وخاصه لما تشوف صغيرها ...بس كذا سنه الحياة ..تمشي وما رح توقف على احد ...ما رح تعيشها بالنحيب والحزن على شيء ما رح يتغير .... وبداخلها يقين اذا تقفل باب بوجهها ..ربنا رح يفتح لها ابواب ثانيه ..ما تدري وين الخير بذي الحياة ..والاهم تعيش علشان نفسها والاشخاص من حولها عبارة عن نكهات للحياة قطعت أفكارها بابتسامه لورد وهو ينطق بضجر: ماما كسرها !! مسحت على راسه وهي تنطق : رح اجيب لك غيرها !! والزفت حسابه عندي!! لمحته يناظرهم من خلف الباب يشوف رد فعلها .. نطقت بحده وحزم: تعال هنا ايلين اقتربت منه وهي تسحبه بقوة... وهو متمسك بالباب بقوة: تعال على ماما يا دب!! وبكل قوته ضربها على وجهها : اندلعي!! ايلين انقهرت منه وبدون تردد هجمت عليه وشدته من شعرها !! رفعت نظرها للسقف بضجر من هالبزران حياتهم كلها مشاكل وما في بينهم وفاق !! نطقت بكسل ما فيها حيل تقوم من مكانها : تعالوا هنا !! وقفت لما شافت ما في استجابة منهم وصوت صراخهم طالع .... اقتربت منهم وفرقت بينهم وبعصبيه نطقت : كم مره قلت لكم ما تتشاجرون!! ايلين وهي تبكي وتمسح دموعها: هو الي ضربني!! ودفنت رأسها بحضن وهج الي جالسه على مستواها !! مسحت على رأسها وهج بحنان: خلاص يا ماما لا تبكي الحين ازعل قطعت كلامها وهي تشوف رويد ضرب ايلين بنص ظهرها من الغيره وهو يشوفها بحضن وهج !! سرعان ما نهضت ايلين متألمه من الضربه وبدون تردد عضته بكل قوتها ..ورجعوا اشتبكوا من جديد!! وبدون وعي صرخت وهج بكل قوتها والغضب يتطاير من عيونها ..ترجع من الدوام ما تشوف من التعب وتجلس بس تحل مشاكلهم الي ما تنتهي ... وبكل غضب نطقت: وربي الحين بالعصا ..يا ويلكم اسمع نفس واحد فيكم ...بسرعه كل واحد عند الجدار معاقبين !! وقبل ما احد يعترض نطقت بعيون تقدح شرار: تحركوا!! رجعت مكانها وهي تناظرهم كل واحد وقف بجهة ودموعهم تنزل بخفه ...ضحكت بداخلها على منظرهم ...يستاهلوا طلعوا الشيب براسها ... ناظرت ورد الي يناظرهم ويمد لسانه لهم يجاكرهم وهو يلتصق فيها ما يحب احد يقترب من وهج غيره هي امه لوحده .. كتمت ضحكتها على ملامحه وهو يجاكر فيهم ....وبدون تردد أمسكته من أذنه وبأمر حازم: بسرعه وقف هناك مثلهم ويا ويلكم الي اسمع لك صوت ... وبدون تردد توجه لأنه يعرف اذا قالت شيء مستحيل تغير رايها!! هزت راسها برضا وهي تناظرهم الثلاث واقفين ويناظرونها والدموع اخشت مجراها على خدودهم ...ما رح تحزن عليهم لانهم يستاهلوا ...رجعت وضعت اللاب بحضنها ..عندها شغل لفوق راسها ...ولزوم تنجزه !! عبست ملامحها وهي تشوف رقيه داخله وبحضنها طفلها ومن خلفها ابنتها تبكي بقوة... وكأنه ينقصها ازعاج رقيه ...لزوم تكمل شغلها ما هو وقتها الحين !! رقيه جلست وهي تناظر البزران معاقبين ...نطقت بحاجب مرفوع: معاقبين!! هزت راسها وهج وعيونها على بنت رقيه مستمره بالبكاء: وش فيها هذي؟! رقيه برجاء: بالله عاقبيها ..ترى طق كبدي منها ....ترفع الضغط!! وهج ناظرت بنت رقيه بنظره ناريه وصوت غاضب: وبعديييييين ؟ انكتمي اشوف !!! بنت رقيه تخاف من وهج بلعت البكاء وهي تناظر امها تستنجدها من هالوحش!! وهج اشرت على ورد : بسرعه عند ورد وقفي هناك .. والا وربي العصا تعلم على جلدك ...تراها ما هي صغيره للحين تبكي! وبنبره حاده نطقت وهي تشوفها ملتصقه برقية: تحركي!! وبدون تردد تحركت للجدار وهي تمسح دموعها بخفه!! رقيه ناظرتهم وهم يبكون ويمسحون دموعهم : يا قلبي كسروا خاطري..اااخ منك يا شريره ..حرام عليك سامحيهم !! وهج بلامبالاة لكلامها لأنه بنظرها لزوم تكون حازمه معهم : اتركينا منهم وقليل عليهم !! رقيه ابتسمت بشماته: ليتك عندي بالبيت علشان تربين لي هالزفته ما احد قادر لها.. حتى ابوها ما تحسب له حساب...تدرين لما اقوله عن خوفها منك ..ينقهر يقول الحين تخاف من خالتها وهو ما تحسب له حساب!! ابتسمت وهج: ما ادري ليه صرت شريره كذا ..كله بسبب هالثلاث ...ما عاد عندي صبر لمشاكلهم ...على كل شيء يتشاجروا ويتذابحون ...قهروني بمشاكلهم .. علشان كذا لزوم اكون حازمه معهم ...التفتت عليهم وبقوة نطقت: ادخلوا للغرفه العبوا ويا ويلكم تتشاجروا!! ما صدقوا خبر وتوجهوا للغرفه بسرعه !! رقيه نطقت بعبوس:قفلي الزفت جايه اجلس معك !! وهج مضطره قفلت اللاب ما رح تعرف تشتغل بوجود هالثرثاره: ان شاء الله .. تفضلي!! رقيه ابتسمت بروقان: اخواتك وين ؟! وهج بهدوء : وكأنك ما تعرفين وقت سباتهم الحين !! بعد الغداء كل وحده تحط راسها وتنام !! رقيه خزتها : كان ضبعتيهم ...مو شاطره الا على البزران!! وهج هزت راسها بضيق: وش ذنبهم يبتلشوا بشيء ما لهم علاقه فيه...ما احب اضغطهم فوق طاقتهم ... بالنهاية من حقهم يعيشوا عمرهم بدون ما يبتلشوا ببزران !! رقيه هزت راسها بالرفض: بالعكس لزوم يتحملوا مسؤولية .. تراهم السناعه بجهة وهم بجهة!! ضحكت وهج : قلبك مليان عليهم لانهم يرفضوا يبتشلوا ببزرانك !! رقيه بعبوس: مالت عليهم !! المهم وين ابوك بالعادة جالس مسنتر بذي الصالة!! وهج هزت كتوفها : ما ادري عنه ...يقول يبغى يبحث عن شغل بعد رجوعي للبيت ..اروح اجهزلك شيء تشربينه !! رقيه ناظرت وهج لما غادرت ...تستغرب منها لما تشوفها رايقه ومبتسمه .. لو مكانها الا تموت بأرضها ...كيف تعيش عادي بعد ما كانت تتصبح بوجه الملاك ...والخدم من حولها وبيت يفتح نفس ... فجأة تلقى نفسك بخرابه وبزران تهتم فيهم وفوق هذا تشتغل من صباح ربنا ومن لما ترجع تشتغل على الموقع ..غير مشاكل الصغار والاهتمام بالبيت ...ومع كل هالتعب ما تأخذ فلس واحد لجيبتها .. كل تعبها تصرفه على البيت ...ويا دوب يكفي مصاريفهم وخاصه بعد مرض ابوها وما عاد فيه حيل للشغل ...جلس بالبيت ووهج لوحدها تشتغل !! تحس وهج ما عندها وقت تلتفت لنفسها وكأنها اندفنت بهذا البيت .... تنهدت لو مكانها ما رح تتحمل كل هالضغط الي تعيش فيه ... بعد وقت ناظرت وهج الي رجعت ومعها قهوة وهي تبتسم لها : حماتك تحبك ...اخر ملعقه من القهوة!! رقيه عبست ملامحها: كذابه ترى حماتي تموت مني ... وكأنها شايفه جني!! ضحكت وهج بخفه على رقيه الي مشاكلها مع حماتها ما تخلص ...وضعت قدامها القهوة وهي تنطق بنصيحه: ترى الحياة ما ينفع معها تحملين السلم بالعرض ...وزوجك مهما كان يحبك ما رح يسمح لك تتكلمين على اهله ..او تتطاولين على امه ويسكت لك ...حاولي يكون لسانك دافي .. رقيه عبست ملامحها: تراك ما تدرين عنها ..ذي حية من تحت التبن ...لزوم تطلع لي مشاكل من تحت الارض !! ارتشفت من القهوة .. سرعان ما عفست ملامحها بقرف: الله يأخذ عدوك وش هذا ؟! والله قلت لك حماتي ما تحبني !! ليه القهوة خفيفه كذا !! وهج ضحكت من قلبها على ملامحها: قلت لك ما عندنا قاطعتها بعبوس: حسبي الله على عدوك ..لو قلت لي كان جلبت معي !! امري لله رح اشربها !! اقتربت ايلين بشكوى : ماما تعالي شوفي قاطعتها رقيه وهي تمسكها من كتفها وهي تتأملها ..ناظرت وهج بضحكه: تدرين خاطري اعمل بوجهها خرائط انتقام من الكلبه أمها !! ايلين تحاول تفلت نفسها: ماما مو كلبه!! ماما شوفيها وهج ابعدت رقيه عنها ..وبنبره عتاب: ترى ما لها ذنب بأمها !! رقيه مطت شفتها : يا اختي المحبه من الله ..ولا دخلت قلبي هالبنت ..بالعكس احس قلبي مليان عليها ..بسببها خربت حياة اهلي ...شوفي امها عايش حياتها ولا سألت عنها !! وهج بحزن وهي تمسح على شعر ايلين: علشان كذا تكسر خاطري ... بالنهاية ما لها ذنب بأي شيء!! رقيه ضحكت بخفه : شوفي جاء المكيود ما يبغى احد يشاركه فيك !! ** ** ** منغمس بالملفات والشغل ... رفع حاجب لما دخلت عليه امه الجناح ...يضيق صدرها لما تدخل هالجناح ...مر سنتين وما تغير شيء ...كل واحد فيهم مشى بطريق ..كل فترة يأخذوا حفيدهم عندهم يقضي نهاره عندهم ...قلبها متعلق بحفيدها لو يطلع بيدها ما يغادر بس بنفس الوقت أمه احق فيه منها ... نطقت وهي تشوفه ينتظرها تتكلم : جدتك عندنا وتبغى تسلم عليك ..تعال اجلس وريح نفسك شوي!! قاطعها بضجر: مقابلة الملفات اهون علي من كلامها الي دوم تعيد وتزيد فيه كل ما شافتني !! تدرين ابغى اكتب على جبهتي هنا " عازف عن الزواج" " وابني ما ابغاه " قاطعته بعتب: يا ولدي حرمه كبيره تبغى تلاحقها بكلامها ..اتركها تتكلم الي تبغاه ..هي تبغى تشوفك مبسوط ..ما احد عاجبه حياتك كذا ؟! نطق وهو يزفر بضيق:انا مرتاح اكثر مما تتصورين !! يكفي ما في احد يخرب علي خلوتي والهدوء الي يحيط بالجناح والاهم كل شيء مكانه مرتب وما احد يغير شيء !! زمت شفتها بعدم رضا: بس حياتك ذي ما هي حل ...إما ترجع زوجتك ويلتم شمل هالصغير قاطعها بعد ما عزم امره : خلاص ابغى اتزوج ...ابحثي لي عن عروس حست وكأنه احد سكب على وجهها مويه بارده ... ما توقعت يقبل الزواج بعد وهج ..توقعت البعد رح يغير النفوس ويعدلها ... رفع حاجب وهو يشوف سكوتها: وش فيك سكتي؟! مو تقولين حياتي ما هي عاجبيتك ؟! يلا زوجيني!؛ ااااه نسيت ما تقبل على وهج !! ترى الي بيننا انتهى وانت للحين عندك أمل ارجعها ؟! لو بغيتها ما طلقتها !!! قلت لك لا تتأملين كثير من ذي الناحيه ...وشوفي لي عروس !! ناظرته ام سراج بصمت للحظات وبعدها غادرت بهدوء...وكأنه شيء اطبق على صدرها!! زفر بضيق والغيره تأكل قلبه من اهله الي يحسهم يفضلونها عليه ...ويقدمون مصلحتها عليه!! ** ** ** ** ناظرت ابوها الي مستلقي بتعب على الفرشه وهو ينطق بروح خاويه: ما لقيت وظيفه !! ما ادري كيف القى وظيفه!! زمت شفتها بضيق ..بعدها نطقت بهدوء : ما عليك يبه ..كل الي ابغاه منك تكون مع اخواتي بالبيت حتى اطمئن انهم بخير...لا تنسى رح اشتغل شغل اضافي بالتصوير حسب فراغي .... قاطعها باعتراض: لا تحملين نفسك فوق طاقتها ... سكت للحظات وبعدها نطق بتردد: اليوم التقيت بريان عبست ملامحها من طاريه ..يا كرهها لهذا الانسان ... هزت راسها تنتظر ابوها يكمل كلام !! نطق بتوجس وهو يشوف ملامحها انقلبت بس من مجرد ذكراه : يبغى يخطبك ...يقول مستعد ينتظرك طول العمر!! حركت شفتها تعترض بس سكتت لما تابع كلامه: يقول كل تصرفاته الطايشه من كثر تعلقه فيك ...وهو يبغاك على سنة الله ورسوله ما يبغى الطرق الملتوية ... واخوانك معك وهو مستعد يصرف علينا وما رح تضطرين تشتغلين قاطعته بعبوس ما تتخيل نفسها تتزوج هالانسان: يبه قلت لك من قبل ما ابغى اسمع سيرته ..لو ما بقى رجال بالعالم غيره ما قبلت فيه!! نطق يقنعها: انت ليه رافضه ....رح يوقع على مبلغ (...) ومستعد يدفعه اذا اخل بأي شرط من شروطك ...يقول تسجل كل شروطها بالعقد حتى تضمن حقوقها !! ومستعد ينفذ لك أي شيء تبغينه بس اطلبي!! تحس نفسها بحلم ..هذا ابوها الي دوم كان يرفض ويمسح بريان الارض ... الحين واضح من ملامحه الرضا ؟! وش الي تغير ؟! كيف تغير رايه بكل ذي السهوله... وبكل قهر من تصرف ابوها كيف يناقشها بالموضوع وهو يعرف ريان ويعرف حقارته ...نطقت بغضب:ما كان كلامك كذا من قبل ؟! وش الي تغير؟؟! نطق يقنعها: خذ الشخص الي يحبك ما هو الي تحبينه...وريان كم صار له ينتظرك وما مل من الانتظار !! انا معك ما رح تخسرين شيء؟! رفعت حاجب بعبوس: واكيد يبغاك ترجع امه لذمتك؟ هز كتوفه ابو زينب : ما ادري ما تكلمنا بهذا الموضوع!! وقفت وهي تنطق بصرامه: لو على جثتي ما قبلت فيه زوج لي ؟ على أساس كنت تتوعد وحالتك حالة اذا رجع مرة ثانية!! نسيت لما دخل البيت ..نسيت وش عمل فيك ؟!! لا تقول يبه إنه يلوي ذراعك بالذهب ؟! ترى ما معه دليل قاطعها بضيق: ما هو كذا ..بس انا اشوف زواجك منه رح يحل ازمة كبيره بحياتنا ...ناظري نفسك لها عليك حق قاطعته وهي تحس بالاختناق من كلامه ...ما تدري وش الي غير رايه ...نطقت بقوة: لو على جثتي ما وافقت عليه !! وتركته وغادرت وبداخلها قهر من وقاحته ..وش يبغى منها ما تدري... متاكده يبغى ينتقم منها !!! دخلت الغرفه وناظرت الصغار يتشاجروا على الالعاب ...وصغيرها مستحوذ على ألعابه الي يحصلها من بيت جده وما يبغى احد يلمسها ...كسر بخاطرها إخوانها ما عندها إمكانية توفر لهم نفس ذي الالعاب الغاليه.... تقدمت منهم وجلست على مستوى صغيرها وبنبره هاديه نطقت وهي تمسح على رأسه بخفه: يا ماما إخوانك تلعبوا مع بعض!! قطعت كلامها وهي تشوف اخوها ابعد يدها عن شعر رويد من الغيره وتمسك بيدها حتى ما تمسح على شعر رويد !! ضحكت بخفه من تصرفه بالرغم من قهرها من خطبة ريان لها ....رفعت يده الصغيره الي متمسكه فيها ..وقبلتها بابتسامة : اموت على الغيور!!! قاطعها رويد وهو يسحب يدها وهو ينطق : ماما !! وزعت نظرها بين ورد ورويد الشبه بينهم كبير وكأنهم أقرب يكونوا توأم ..والسبب لأنه ببسااطه الاثنين يشبهونها كثير ... قاطعت تأملها إيلين وهي تنطق بضجر: ماما ابغى ألعب واشرت على الألعاب!! هزت راسها وهي تناظرها بما انها اكبرهم وقريب من عمر ٣ سنوات ولسانها ما شاء الله طويل وطليق ...بعكس ولدها الي عمره ٢ واغلب الكلام ما تفهمه ..يعطيها كلام وهي ترتبه او كلمات مكسره!! تنهدت وهي تحمل رويد وتنطق حتى يترك اخوانها يلعبوا بألعابه: تعال معي نروح قطعت كلامها لما وقفت إيلين وورد بحماس: نروح معك ماما !! رفعت نظرها للسقف بضجر كيف تحل ذي المشكله ... زمت شفتها بتفكير لما لمعت بعقلها ..ما لها الا تخفي كل ألعاب رويد ورح تطلب من ام سراج ما تبعث معه أي شيء ...وكذا يعيشوا الثلاثه بنفس الطبقه بدون ما احد يحس منهم بالتفاوت او بالنقص ...ما عندها غير هذا الحل... هي متأكده جالسه تهدم طفولة ولدها .. ألعابه وما لها حق تحرمه منهم بس بنفس الوقت وش ذنب اخوانها يناظروا ويتجرعوا طعم الحرمان ...وما عندها القدرة توفر لهم ذي الالعاب !! التفتت على أشجان الي تقدمت منها وهي تنطق: وهج متى نطلع للسوق نشتري فساتين لخطوبة حنان !! ترى ما بقى وقت!! وهج عبست ملامحها كل ما سألوها تعمل تأجيل حتى تقدر توفر فلوس للفساتين ...والحين ما بقى وقت للحفله...نطقت بضيق من الدنيا الي ما رحمتها والكل يقول لها " هاتي" : ترى ما يصير شيء لو لبست فستان من عندك قاطعتها بهجوم: نعم نعم ..بأحلامك وربي اذا ما اشتريت فستان جديد الا يحرم علي احضر الخطوبه!! وهج ناظرتها وقلبها باط من دلعها ...الشاطر يدلعها بعد موت امها وحضرتها اندلعت بزياده ..نطقت بقرف: بالناقص منك ..عمرك إن شاء ما حضرتي ..توفرين علي!! قاطعتها بنان بعبوس بعد ما سمعت كلامهم كانت قريب من الباب: امي ما كانت تحرمنا من شيء ..وين امي تشوف الحياة الي نعيشها معك ..انسانه بخيله وتحرمينا من كل شيء !! ختمت كلامها وسحبت اشجان وطلعت من المكان!! كلامها كان صدمه كبيره بالنسبة لها ...ما قصرت معهم وتحاول بأقصد جهدها توفر لهم كل احتياجاتهم....طول الوقت وهي تشتغل هنا وهنا بس حتى توفر لهم لقمة العيش ... وبالنهاية يجحدوها بذي الطريقه !! ما تذكر متى اخر مرة اشترت شيء خاص فيها من اكل او ملابس او أي شيء ... كل فلوسها تروح لهذا البيت وبالنهاية هذا كلامهم ...صدق لما قالوا الكلب اوفى من بعض البشر!! دام إنهم كذا وربي ما تشتري لهم !!! ** ** ** زفر بضجر وقهر ..له سنتين وهو يخطبها ورافضه ...اخخخ نفسه يشوه وجهها الي فرحانه فيه !! متى تصير على ذمته ...إلا نذر عليه يحول حياتها جحيم حتى تعرف مو ريان الي ينرفض ....بالوقت الحالي متأمل بموافقتها بعد ما اعطاه ابو زينب أمل ...يعرف كيف يلوي ذراعه ...وفوقها اعطاه احلام ورديه رح يقدمها لابنته ... رح يطلع حركات رفضه من عيونه ...رح يراويه إنه ريان ما ينرفض..حضرته ما رضي الا لما لوى ذراعه وبطلوع الروح .... اول ما تكون تحت عصمته رح يكون ابوها بالسجن ...ولدها يرميه على سراج واخوها الزفت يرميه على اخوانه واخته الكريهة رح يرميها على امه .... وبعدها تبدأ تصفية الحسابات....سنتين وهو يطبخ على نار هادئة ... لزوم تستوي الطبخه... ضحك بخفه على مخططاته وسرعان ما بدأ يقهقه بصوت مرتفع ..وبداخله حماااس كبير للتنفيذ!! ** ** ** ** تناظر الفيلم الحزين بحاجب مرفوع ...مطت شفتها بسخريه لما ختمت كلامها بنان : يعني الكل يشتري فساتين جديده الا حنا محرومين من كل شيء!! ابو زينب ناظرها واقفه تناظرهم بصمت : ليه رافضه تشترين لأخواتك ؟! اشجان وهي تنزل دمعتين: تقول بالناقص منكم ما هو لزوم نحضر!! حنان بعبوس: وربي اذا اشجان وبنان ما اشتروا فساتين وحضروا الحفله يحرم علي احضر الحفله!! تراهم اهم منك بالحضور ..فرحتي رح تكون ناقصه بدونهم !! زمت شفتها من كلام هالبزر يا شينهم لما يتفلسفوا ...عمرها ما نقصت عليهم شيء ....بس واضح دروس شلة الانس جابت نتائجها ..قبل كم يوم كانوا بزيارتهم ... ناظرت ابوها الي نطق بتساؤل: ما جاوبت ليه رافضه تشترين لأخواتك ؟! وهج تكذب اذا قالت ما تضايقت من كلام اخواتها ...اصعب شعور لما تخلص لشخص وبالمقابل ما يشوفك بعيونه ...مثل الشمعه تحرق نفسها حتى تضيء المكان لشخص أعمى ..وهذا هو حالها ..كتمت ضيقها وبهدوء نطقت : ما معي فلوس .... ابو زينب قاطعها: بس هذا الأسبوع تستلمين فلوس الموقع!! رفعت حاجب ما شاء حاسبين فلوسها .. نطقت وبداخلها ضيق من كلام أبوها: الفلوس ما تكفي...عندي ملتزمات ثانيه! نطق وهو يناظرها: خلاص اشتري فيهم لأخواتك الصغار ...خليهم يفرحوا ... اشجان بانفعال وهي تشوف الرفض بعيون وهج.. نطقت بقهر: اكيد تبغى تشتري فيهم فستان لها! ناظرتها وهج بعيون مفتوحه ..صدق شر البليه ما يضحك ... وكأنه ممنوع تشتري لنفسها !! ابو زينب بأمر: وهج الليله تأخذين اخواتك وتشترين لهم كل شيء يبغونه... بداخلها نار تغلي غليان: قلت لك ما في فلوس ...انا ما معي فلوس قاطعها بانفعال: والحل يعني؟! ردت ببرود : انت ابوهم ودبر لهم الفلوس ...انا ما احد يناظرني ..مو مستعده اصرف تعبي على حفلة تافهة !! اعطت اخواتها نظره احتقار وانسحبت من المكان ... خلي ابوهم الي مدلعهم يدبر لهم الفلوس ... خلاص اكتفت وما رح تحمل نفسها فوق طاقتها لناس ما تستاهل !!! * * * * ام سراج تحس يدينها ترتجف من الخبر الي وصلها ...كيف ريان خطب وهج ؟! معقول هالكلام ؟ ناظرت زوجها بعدم تصديق: صدق هالكلام؟! ابو سراج والضيق واضح على ملامحه: هذا الي سمعته ...وعلى الاغلب نهاية الشهر خطوبتهم !! ام سراج عقلها ما هو قادر يستوعب ...للحين عندها امل ترجع لسراج ...نطقت بخفوت: وسراج ؟! نطق وهو يمط شفته بسخريه: ما رح تجلس طول حياتها تنتظر ولدك !! قاطعته بانفعال: يعني انت راضي بذي الخطوبه!! ابو سراج بداخله قهر ما يبغاها الا لسراج ..بس ما يقدر يوقف بوجهها ..وبنفس الوقت مر بعقله الموقف الي جمع بين ريان ووهج ..زم شفته بقلة حيلة : الله يوفقها !! رفع نظره على سراج الي يقترب منهم وكأنه يسألهم بعيونه وش السالفه!! ام سراج نطقت بقهر:ريان ولد عمك خطب!! سراج بلامبالاة: طيب وين المشكله ؟! ام سراج نطقت بانفعال: المشكله ما لقى الا وهج يخطبها ؟!! انتهى البارت..دمتم بخير ????