الفصل 23
بارت ٢٣
ما عندها نيه تخبر سراج بسرقة الفلوس ..اكيد رح يتضايق وينقهر لانه من الأساس احرجته وما اعطاها من طيب نفس ..واذا عرف انها ضيعت الفلوس ..اكيد ما رح يأخذ منها بما انها زوجته ...افضل شيء تقتص جزئية الفلوس وتدفع له فلوسه بالتقسيط بالنهاية هو ما له ذنب ...تواصلت مع عمها احمد ضابط مختص بامور السرقات ..وكملت الاجراءات الامنيه ...قبل ما تتصل مع عمها اتصلت على سراج وكان جواله مغلق ...وهذا ريحها كثير... لو فرضت إنه رح يعاتبها ليه ما خبرته بالاول ..حجتها معها ..."جوالك مغلق".وكذا تأخذ راحتها اكثر بالكتمان على الفلوس الي انسرقوا ...
بعد ما وصلها عمها للبيت ..دخلت بروح خاويه ..تحس نفسها رح تتهاوى على الارض بأي لحظة ....حمدت ربها ما في احد قابلها ..توجهت مباشره للجناح ...
رجولها ما عادت تحملها...انهد حيلها من الدين الجديد وكأنه ينقصها ..بلعت شهقتها بصعوبه اول ما دخلت الجناح ...وكان سراج جالس بالصالة ...غريبه ما شافت سيارته او من الهم والكدر ما انتبهت!!
تحس نفسها ما هي قادره تتكلم حتى السلام صعب عليها؟!
غريبه موجود هنا وسيارته ما هي موجودة!!
سراج اول ما شافها دخلت ..ما عجبه ملامحها وكأنه مصيبه صارت .. معقول صار لاهلها شيء ؟!
وجهها وكأنها طالعه من القبر ...نطق باستغراب وهو ينهض: وش فيك ؟!
وهج الي تحس بجبل مطبق على صدرها ..حاولت ترد عليه ما قدرت ..اكتفت تهز راسها بالخفيف؟!
عقد حواجبه ..كيف ما في شيء ...وش الي صار وقلب ملامحها ...لو صار لاهلها شيء اكيد ما رح تخفي عنه... معقول زعلت لانه ما اخذها من الجامعه ..نطق بتوجس: اليوم السيارة تعطلت على الطريق ما ادري وش علتها ...رجعت للبيت بسيارة اجره..حتى الجوال سقط على الارض وتكسر ...اليوم يوم الخراب العالمي ...ما قدرت اتواصل معك حتى اخبرك ...ولما رجعت للبيت اتصلت عليك من جوال امي واعطيتيني مشغول!!
وهج حست الهم تضاعف عليها بزياده ..فوق خسارته ما رح تخسره بزياده ...رح تجور على نفسها .. يكفيه الخراب الي اصابه...ضغطت على نفسها ونطقت وكأنها تتكلم من خرم ابره: اعطيتها مشغول ما كنت ادري انك انت .. ما ابغى اشغلها ...لما طلعت من الجامعه انسرقت حقيبتي
قاطعها باستغراب:انسرقت ؟! .... كيف انسرقت؟!
جلست وهج وبدأت تسرد له كيف انسرقت مع التحفظ على بعض الامور ...نطق بضيق: ما ادري الناس ذي بدون لا ذمه ولا ضمير!!
احسن شيء انك تركت الحقيبه والا كان تأذيت لو بقيت متمسكه فيها ..الحمد لله على سلامتك !!
اهم شيء انك بخير وسلامه !!
حقيبتك فيها اشياء مهمه غير بطاقتك وذي الامور؟!
وهج نطقت باختناق: لا ...جوالي كان باليد الثانيه!!
نطق سراج بتذكر: والفلوس
وهج تحس بخنجر انغرس بقلبها لما قال " الفلوس" هنا المشكله الأكبر ... نطقت وهي تضغط على نفسها حتى ما تظهر اي شيء: الفلوس استلمتهم البنت
هز رأسه براحه: الحمد لله ...
زمت شفتها وتحركت للغرفه تبدل ...وبداخلها شيء يتمزق ...هي ما كذبت لأنها استلمت الفلوس وبعدها طاروا ...
جلست على السرير ..ما فيها حيل تتحرك وتبدل ...بداخلها شهقات اذا كتمتهم رح تموت .. استلقت على السرير وكأنها ترمي حملها وهمومها عليه ...ما عندها طاقه تبدل ...غطت جسدها كامل تحت الغطاء ... شادة على شفتها السفلى بقوة حتى ما تبكي ..تخاف بأي لحظة يدخل سراج !!
**
**
**
جالسه بالمساء مع خالتها ...تزين ثغرها بابتسامة مزيفه ...بس عيونها تفضحها من شده الضيق الي فيها ...لزوم تتخطى هالعقبه ولا كأنه صار شيء ..
ام سراج ارتشفت من القهوة وهي تتابع كلامها: وبعد ما زلقت على الارض وكل الناس تناظرني ..حسيت نفسي بحجم النمله...الله لا يعيد ذاك الموقف المحرج!!
وهج بهدوء: موقف محرج قدام العالم ..ربك ستر وما انكسرت رجلك !!
ام سراج هزت راسها ؛ ربك ستر وحفظ لي سراج كنت حامل فيه ...ما ادري وش رح يصيبني لو تأذى !!
شعور الامومه متعب ومجهد ...باكر لما ربنا يرزقك طفل رح تفهمين شعوري...وسراج كان الوضع خاص لأنه ما عندي غيره ..وربنا كتب لنا ما يكون عندنا اطفال غيره!!
ما انكر كنت اخاف عليه من النسمه ....لو يطلع بيدي افتح القفص الصدري واخبيه بداخله ... وحتى لما كبر ما ابغاه يبعد عن عيني ...ابغى اشوف الابتسامه مرسومه على ملامحه على طول....
وهج هزت راسها بتعجب من تعلق ام سراج بولدها ..لو قدر ربنا وصار له شيء اكيد رح تفقد عقلها....حتى ابو سراج متعلق فيه نفس الشيء ...ما هو مثل ابوها الي رمى كل مسؤولياته وهرب ...لزوم توصل لأبوها ...بس كيف ؟!
ما في اي رقم او حساب توصل له ..كله تقفل ...وحالها مثل الي يبحث عن ابره بكوم من قش!!
لزوم يرجع لها جزء من فلوسها تخفف عن نفسها .. ما تبغى تحمل نفسها فوق طاقتها !!
التفتت على دخول عمها وخلفه سراج ...اقترب عمها وهو ينطق بهدوء: الحمد لله على السلامه ...دوبني خبرني سراج ما عندي علم!!
ام سراج مسكت يدها بحنان: اهم شيء انك بخير والباقي مقدور عليه!
وهج بداخلها حزن عميق وهي تردد " والله ما هو مقدور عليه " ...نطقت بمجاملة: تسلمي!!
سراج جلس بجانب أبوه وعيونه على وهج ...ما هو عاجبه حالها ..حتى لو ابتسمت يقدر يشوف بعيونها الكدر والضيق .. وإذا سالها تقول للحين ما تجاوزت الموقف ورعبه ...
زم شفته بتفكير متأكد ومتيقن إنها الفلوس انسرقت مع الحقيبة ...
واكيد خايفه تخبره ...بس بنفس الوقت يغزوه احساس صاير مشكله معها تخص اهلها .....ملامحها تؤكد على حصول مصيبه حصلت معها ...اي رعب وتعب الي يحملها تنام بالعبايه والشال ....
ابتسم لها لما التقت عينه بعيونها الذابله ...ردت له الابتسامه بتكلف ..واضح انها تجبر نفسها على الابتسامه فوق طاقتها ...وتخفي همومها بداخل صدرها !!
ما رح يكلمها بموضوع الفلوس ورح يشوف اذا دفعت له اول قسط والثاني معنى هالشيء الفلوس ما انسرقت وخاصه الشركه ما رح تسلم رواتب الا بعد ثلاثة شهور فما رح يكون معها فلوس للسداد ...
تحس وهج بالضيق من نظرات سراج الي تتابعها بدقه ..ما تحب احد يناظرها كذا بتأمل ...معقول شاك بسالفه الفلوس ؟!
هزت راسها تستبعد هالشيء ...ناظرت عمها لما نطق بتساؤل: ابوك للحين ما طلق ام ريان ؟!
يا كثر الاشاعات مرة يقولون طلقها ومرة يقولون ما طلقها!!..وما حبيت اساله اليوم عن هالموضوع!!
بهتت ملامحها من طاري ابوها ...بداخلها كره عميق لأم ريان الي وصلتهم لذي الحال ..على الاقل حتى لو انفصل ابوها عن امها على الاقل يكون لهم بيت ملاذ لهم إن قست عليهم الدنيا ؟!
بسببها ما بقى لابوها شيء وشفطت كل فلوسه وبكل وقاحه ريان يسأل عن ذهب امه بعد ما سرقوا فلوسهم ....
نغزتها ام سراج بخفه وهي سرحانه بعالمها: وهج عمك يكلمك!!
رفعت راسها وهي تشوف عيونهم متسلطه عليها ...زمت شفتها بضيق :اسمعك يا عمي!!
ابو سراج هز رأسه: واضح إنك تعبانه ..اطلعي ارتاحي ...ادري بك تتعبين من الدوام والدراسة !!
سراج محتار وش فيها ؟! والمشكلة ان سالها تطلع له اكثر من عذر ومتأكد كله كذب !
وقف وهو يقترب منها: تعالي نتمشى بالحديقه برا ..الجو حلو برا ..يمكن تغيرين جو من ضغط الدراسه!!
وقفت بصمت بدون ما تنطق حرف واحد ..وناظرت عمها لما نطق : على العموم ابوك يسلم عليك ...ويقول حسابك طار من عنده وما يقدر يتواصل معك؟!
فتحت عيونها بإنصات لكلامه .. وأخيراً لقت الخيط الي توصل فيه لأبوها ..نطقت بغصه حاولت تخفيها بس ما قدرت: حسابه مقفل وجواله مقفل ...
نطق بهدوء: يقول كل فترة يغير حسابه ..مضطر يعمل كذا ...ما ادري ابوك وش حده على كل هذا ؟!!
وهج اقتربت من عمها : اعطيني حسابه وانا اتواصل معه !!
ابو سراج هز رأسه بهدوء واعطاها الحساب ....بعدها توجهت مع سراج للخارج بعد ما تكتفت وكأنها تواسي نفسها لما تحتضنها!!...وعقلها يفكر بأبوها ...كيف هان عليه يترك كل شيء خلفه ؟!
رفعت نظرها لسراج وهو يتكلم ويناظر قدامه: باكر رح اروح على عمك واشوف وش صار على القضيه...تواصلت معه اليوم ما في شيء جديد ...ما شاء الله عمك رجال وينشد فيه الظهر ..
وباستدراك نطق: حتى ما انسى علشان تقطعين هوية جديده
قاطعته بتفهم : ان شاء الله
تابع كلامه بهدوء : اعمامك وضعهم المادي فوق الريح ...وحسب معلوماتي ابوك الوحيد الي مفلس ومطفر بينهم بعد ما باع كل املاكه!!
عبست ملامحها بضيق من سؤاله ..ما تحب احد يتدخل او يتطرف لاي شيء يخص اهلها .. نطقت بنبره واضح فيها الانزعاج: واكيد السيد ابراهيم الي خبرك بهذا الشيء؟!
ابتسم وهو يجلس على المقعد واشر لها تجلس : للحين حاقده عليه بعد المشكله الي صارت بينكم؟!
تتذكرين وقتها وقفت بوجهه لما كان يبغى يضربك ...ما كنت ادري إني ادافع عن قلبي المستقبلي!!
جلست بجانبه وهي تمط شفتها بملل : جالس تطقطق علي؟!
ترى تزوجنا بنفس الطريقة ..الطرفين مو راضيين ..ما له داعي تكذب وتجامل ..بلا قلب بلا خرابيط!!
ضحك بخفه على ردها : احسك إنسانه عمليه اكثر من اللازم وما عندك رومنسيه وحركات البنات .. وكأنه تشوفين هالاشياء سخافه ؟!
زمت شفتها بقلب ميت... وكأنه قلبها فاضي لذي الأمور ..خلها بالاول تخلص ديونها الي هدت حيلها ..نطقت بروح خاويه : بالضبط ...ما احب الرومانسيه وذي الحركات ..وخاصه اذا كانت مزيفه!!
ضحك بقوة على ردها وهو ينطق: احسك جالسه تضربين علي الكلام!!
الله يسامحك ربي يعلم ..بمحبتك بقلبي !!
حتى قلبي ما عاد يتسع لمحبتك بقلبي....
خزته بتكذيب: ايه وبعدين!!
قرصها بكتفها بخفه: اففف منك ومن برودك يا شيخه!!
تمنيت مرة كذا تجلبي هديه لي تفاجئيني بحفلة وحركات ...او على الاقل...اقلك خلاص روحي اقطفي ذيك الورده وقدميها هديه لي ...انا راضي؟!
زمت شفتها بضجر: صدق فاضي اشغال ...ما اشوف الهدايا منك مقطعه حالها ...
قاطعها بقوة: يا كذابه جبت لك ثلاث او اربع مرات!!
وهج يا دوب تلقى فلوس تسدد ديونها ..من وين لها تجلب له هدايا ...نطقت تقفل هالموضوع: وجودي بحياتك اكبر هديه!!
ابتسم ابتسامه واسعه: اكيد بما إنك الملاك الي ما يزوجها ابوها الا لملاك !!
عقدت حواجبها واضح ابراهيم كل شيء بحياتهم نقله لسراج ..الله اعلم وش نقل له بعد ...نفسها تقص لسان ابراهيم ..مين سمح له ينشر خصوصياتهم هنا وهنا..صدق عديم ذوق ...
نطقت بجديه تغير الموضوع : وش رايك باكر
قاطعها : وش رايك تقومي تقطفين ورده وتقدمينها لي ؟!
وهج ما تدري وش فيه مستخف اليوم: ترى الرجال هم الي يقدموا الورد للبنت ...مو العكس!!
سراج بإصرار: وربي الا تقطفين لي ورده!!
وهج بضيق: وش فيك اليوم؟!
ابتسم بإصرار : وربي الا تقومين وتقطفين ورده باللون الي يعبر عن مشاعرك نحوي!!
ابتسمت بقلة حيله ما تدري وش فيه عقله ..وقفت مع إصراره وتوجهت للورد ..ما تدري اي لو تقطف له ...دارت عيونها بالمكان بحيره ...تنهدت ومنظر الورد يبعث بالنفس راحه عجيبه ...تقدمت من اللون الابيض وقطفت ورده ..وعادت ادراجها له وهي تبتسم بتعجب من طلبه ...
تقدمت وهي تمد الورده له : تفضل
نطق وهو ممسك جواله بثبات بحيث ما تنتبه انه يصورها من لما توجهت تقطف الورد ... نطق بروقان: ليه اخترت اللون الابيض؟!
مطت شفتها بسخريه: ما لقيت لون اسود يعبر عن لون قلبك ..قلت احضر نقيضه!!
ختمت كلامها بابتسامة واسعه وهي تشوف الصدمه على ملامحه من كلامها !!
سحب الورده منها بعد ما قفل الجوال : ادري بك تعشقين الارض الي امشي عليها بس تكابرين!!
ابتسمت وهي تجلس: واثق من نفسك !!
سراج وهو يحرك الورده بيده بهدوء: لو انا قدمت لك ورده كان قدمت لك باللون الاحمر تغبر عن محبتي لك!!
بس وش اقول...الله يعيني عليك يا جليد!!
ضحكت على تعليقه ... لحظات وانمحت ضحكتها عن ملامحها ...ورجعت لسكونها وعقلها رجع اسير التفكير بالدين وابوها ...اخخخ من ابوها كل الي صار لها بسببه!!!
**
**
**
جالس يدخن بروقان والإبتسامة شاقه الحلق وهو ينطق: ما توقعت تمشي الخطه بدقه وتنجح!
قاطعه باستغراب: ما توقعتك عبقري كذا ...كيف فكرت كذا ...
نطق ريان بعد ما نفث الدخان من فمه : ما رح تكون غبيه اول واحد يتواصل معها ويقول لها انا ابوك رح تصدقه ...بس لما تكون عن طريق عمي ابو سراج رح تصدق فعلاً انه ابوها ...وما رح احتاج لاي طريقه حتى اثبت لها إني فعلا ابوها!!
نطق وهو زام شفته: تتوقع تتواصل معك ؟!
نطق بابتسامة مستفزه: يوم يومين ورح القى رسائل منها !!
قاطعه بترقب: على وش ناوي؟!
نطق بابتسامة واسعه كلها خبث: رح اطبخها على نار هادئة وما رح استعجل واحرق الطبخه ...ابغى الخطه تكون مدروسه من كل النواحي بالضبط ..وما ابغى ولا غلطه ...الحين اول ما تتواصل رح تكون محادثه عاديه وبعدها توقع بالفخ الي يوديها بستين داهيه!!
**
**
**
من الصباح ارسلت لابوها بعد خروج سراج حتى تأخذ راحتها ....
وللحين ما رد عليها ...كل ثانيه تفتح تشوف اذا شاف الرسائل او لا .... بعد ما كملت صلاة وصلها صوت مسج ..تحركت مباشره تفتح ...انقبض قلبها بقوة لما شافت رساله من ابوها
فتحتها وقلبها تتسارع نبضاتها ...كتبت بعد ما شافت سلامه عليها ...كتبت بيد مرتجفه: انت وينك اختفيت؟!
عقدت حواجبها لما كتب "ظروفي صعبه يا وهج وما اقدر اتواصل طول الوقت !!"
سرعان ما عبست ملامحها اي ظروف تجبره يخرج بذي الطريقه...اكيد كل شيء وله حل ...كتبت له : مب ناوي ترجع ؟!
زمت شفتها لما كتب لها " لما تتحسن الظروف ارجع ان شاء الله"
كتبت وبقلبها قهر : لما اعطيتك ذيك المرة فلوس وكنت محتاج وبعدها اختفيت ..انا بحاجه لفلوس الحين ضروري!!
انقهرت من رده" جالسه عند بنك متحرك وتبغين مني فلوس"
كتبت بطول بال: يبه ارسل لي مبلغ (...) ضروري ما اقدر انتظر اكثر من كذا !!
زفرت بضجر على رده يا حبه للفلوس" وش تبغين بهذا المبلغ ؟! "
كتبت : ما عليك ارسل لي واعتبره من مهري !!
عضت على شفتها بقهر من رده" تمنين علي بفلوسك ...اخخ من الزمن الي حدني لك"
وهج تنهدت وهي تحاول تضبط أعصابها: ما أمن عليك ..انا محتاج هذا المبلغ ضروري
تسلسلت الراحه لما كتب لها" تم رح احول لك الفلوس ...بس كيف تبغين ارسلهم لك !!
ومن الحين لا تطلبين غيرهم ظروفي صعبه "
زمت شفتها بضجر .. رجع يقول ظروفه صعبه ...اتفقت معه على طريقه ارسال الفلوس ...
انهت المحادثه وهي تؤكد عليه ما يسحب عليها وما يقطعها !!
ضمت الجوال لصدرها واخيرا رح تنفرج عليها بعد الضيق والمرار الي تجرعته ...طلبت منه أكثر من ديونها بجزء ..حتى تقدر تدفع لسراج القسط الاول قبل نزول الراتب!!
**
**
**
مرت الايام عليها بهدوء .. تحاول قدر المستطاع تكون طبيعيه ...بس من الداخل عجزت ترمم نفسها ...بالرغم انها حاولت قدر الامكان ما تظهر لسراج أي شيء وما كان عليها سهل تحول الضيق والحزن لابتسامة تزين ثغرها ...
للحين ما هي مصدقه ابوها ارسل لها الفلوس ..توقعت يسحب عليها ...بس الحمد لله تخلصت من ديونها وما عليها الا تدفع لسراج ...ذابحه نفسها بالكتابه حتى تحصل على اكبر قدر من الفلوس!!
اليوم رح تجتمع مع اخواتها عند سناء...تشتاق لجمعتهم وتحب تجلس معهم ومتشوقه لولادتهم ...بما انهم تزوجوا باوقات متقاربه ..رح يكون اطفالهم بالمستقبل اعمار متقاربه ....
رفعت راسها بابتسامة لما دخل سراج بضجر : يا ربي وش ذي الحوسه؟!
ناظرت كتبها واوراقها منثوره على السرير ..كذا عادتها من لما كانت بالمدرسة .. لما تدرس لازم تنثر كل الكتب من حولها بذي الطريقه ..تحس نفسها تنجز اكثر!!
حكت راسها بضجر: سراج وبعدين؟!
خلاص تقبل ارض الواقع ؟!
عقد حواجبه باستنكار: وليه اتقبل ارض الواقع ..ليه ما انت تتقبلين ارض الواقع وتصيرين مرتبه!!
ابتسمت : ترى انا كنت اكتب بالغرفه الثانيه وانت الزمت علي اجلس هنا ...فتحمل نتائج اختيارك!!
نطق وهو يخزها: والله
اقول اترك هالخرابيط وتعالي نجلس
قاطعته وهي تناظر الوقت: وكأنك نسيت اليوم رح اجتمع مع اخواتي
زفر بضجر: نسيت هالاجتماع ...ضروري تحضرينه ترى ما رح يصير شيء بالعالم لو ما حضرت؟
بدأت تجمع كتبها : ايه ضروري ...يكفي امي ما ازورها الا بطلوع الروح بحجه البعد ..اخواتي قريبات
سكت للحظات ما ينكر انه يحاول بأقصى جهده يبعدها عن امها ...بعد ما حاولت تفرق بينهم ..ما يضمن انها تخرب بيتهم ...خلال الشهر الي مر عليهم ارسلها مره ولمده ساعتين ...ما عاد يثق بأمها ...
وما هو مستعد يخسر بيته علشان امومه مزيفه ...نطق بهدوء: انا ما امنعك عن اخواتك ..بس ما احب ادخل الجناح بدونك !!
وتعرفين انشغال كل واحد فينا ...والوقت الي يجمعنا قليل بسبب انشغالي بالشغل وانت بالدراسه!!!اخواتك ملحقه عليهم باي وقت تقدري تزورينهم!!
نطقت برفض : ما اقدر ...ما هو السهل نجتمع كلنا بوقت واحد!!
ختمت كلامها وسرعان ما عقدت حواجبها باستنكار لما شافته استلقى على السرير: ما رح توصلني؟!
تثاوب بنعاس: رح اغفى لوقت تجهزين ..ساعه ويا دوب تجهزين ..ومن الحين اقولك لما تجلسين بالسيارة اتصلي على جوالي ..علشان اضمن إنك جهزت تماماً!!
ابتسمت وهج وهي تحسه يبالغ ... يعني ما تتأخر مثل ما يقول ...نطقت وهي تتوجه لخارج الغرفه ترجع كتبها واوراقها: يا حبك للمبالغة!!
مط شفته بملل بعد ما طلعت ..اي مبالغه وهي تطلع روحه حتى تجهز...
غمض عيونه وهو ناوي يغفى شوي ...عبس ملامحه لما رجعت وبدأت تفرفر هنا وهنا ...ما تعرف تشتغل بصمت بدون ما تزعجه ...يعشق الهدوء بس دوم تعكر صفو الهدوء ...
عكسها يحسها لو تقوم الدنيا فوق راسها ما اهتمت وتكمل كتابه ودراسه وكأنها بعالم اخر..كيف تقدر تكون كذا ..تركيب عقلها غريب وعجيب ...
فتح عيونه وناظرها بسخريه: ما تبغين تسرحين شعرك!!
التفتت عليه وهي تناظره بحاجب مرفوع ... تبغى تأكله بأسنانها ما رح يترك حركاته والتنمر الي يمشي بعروقه ...نطقت بعبوس: ابفهم ليه انت كذا تغار من شعري ؟!
اذا ما هو عاجبك انا عاجبني ويجنن!!
نطق بجديه : بالله عاجبك شعرك كذا ؟!
وهج ناظرت نفسها بالمرآة بثقه : لما يطول شوي بعدها يصير تمام ..ما احب الشعر الطويل !!
تنرفز من ردها : ابفهم مين الي كذب عليك وقال إنه شعرك كذا حلو!!
او الشعر القصير حلو ؟!
ناظرته وابتسمت باستفزاز: ما احتاج احد يقولي ...عندي نظر واشوف فيه الجميل والقبيح!!
كش عليه ورجع اغمض عيونه وهو ينطق: صدق ما عندك نظر!!
فتحت عيونها باستنكار من كلامه ...نطقت متعمده تستفزه: صدق ما عندي نظر يوم قبلت فيك!!
نهض رأسه وهو يستند على يده ...ناظرها بعد كلامها الي واضح فيه الشتيمه...نطق بقوة: ما اتوقع انك كان لك خيار حتى تقبلين فيني ..لو اعطوك الاختيار بنفسك الله اعلم اي شيفه رح توافقين عليه!!
ختم كلامه ودفن نفسه تحت الغطاء وهو كاتم الضحكه بعد ما انقلبت ملامحها 360درجه !!
فتح الغطاء بخفه ما لها صوت ولا حس غريبه ...نقز لما شافها بوجهه وعيونها تقدح شرار ...حركت اصابع يدها وهي تنطق بوعيد: وربي الا ييجي يوم واشوه وجهك المبسوط فيه بأظافري!!
ضحك من كل قلبه ...نطق من بين ضحكاته: امزح معك !!
خلصيني اجهزي ترى وقتك محسوب ومن الحين بدأ!!
ارتخت يدها وناظرته بتقييم ...ختمت نظرته بملامح عابسه ..وتوجهت تكمل تجهيز نفسها بهدوء.... ولا كأنها دوبها كانت رح تفترسه... وكأنها خافت يكنسل طلعتها ويمنعها زياره اخواتها ..بالرغم هالشيء مستحيل ..ما رح يمنعها عن اخواتها دام ما احد يحرضها عليه ...
بعد وقت اعتدل وهو يتثاوب .. ناظرها لما جهزت ..واضعه مكياج خفيف ..يا جمالها بالمكياج ..تجنن ...يحس انه شافها من قبل ...تشبه احد بس ما يعرف ...وين وكيف ....مع الايام يحس وجهها صار فيه تغيير بالنسبة للاول ..بس للحين فيه ارهاق وتعب ...عنده فضول يشوف صورتها قبل الزواج ..سوار تقول قبل الزواج ما كانت كذا لما زارتهم وما كانت واضعه شيء على وجهها ...
واضح الحين متنرفزه ما رح يطلب منها يشوف صورتها ..رح يتم تأجيل الموضوع ليوم تكون فيه رايقه ...الحين يمكن تظن أنه يبغى يتريق عليها!!
**
**
**
**
رقيه تتنفس بضجر من تعب الحمل: والله يا بنات إني استفرغت كل الي بطني!
انا توقعت الاكل يكون فوق الخيال من كثر ما يمدحونه ...وكم ألحيت على زوجي يشتري له منه ...وهو يتهرب ويقول اسعارهم نار نار وانا مصره عليه ..والوي ذراعه واقوله اخاف يطلع الاكل بوجه الولد ..هذا وحام!!
خزتها سناء: الوحام يكون بدايه الحمل ما هو الحين!!
رقيه كشت عليها اسكتي علشان يجيب لي!!
وبطلوع الروح حتى احضرها ...ولما وضعها قدامي جالس ينافخ ومقهور حالته حاله ...انا اكلت لقمه من هنا ومباشره استفرغ من هنا ...ابشع اكل يمكن تاكله بحياتك!!
نور خزتها بعيونها بقوة : اكيد نافسك عليهم !!
رقيه هزت راسها بتاكيد : وأنا اقول كذا ...نفسني لانه ما هو من نفس احضره لي!
حسبي الله على عدوه...حامل بولده ببلاش
غصب عنه يلبي كل الي ابغاه !!
قهرني يقول" انت يبغالك راتب شهري متحرك حتى يلبي طلبات كرشك"
ختمت كلامه بعد ما قلدت صوته بالكلام!!
وهج ابتسمت طريقه رقيه بالكلام تضحكها ..نطقت تخفف عنها: يا رقيه ..لزوم تراعين ظروف زوجك ..وعلى قد لحافك مد رجلينك !!
ليه تكلفين الرجال فوق طاقته ..ولا تنسين باكر لما يصير عندك بيبي رح تزيد المصاريف ...يرحم ايام ابوي الي كل شيء غالي ظل بنفسك وهذا انت لسانك وش طوله ما صار عليك شيء!!
رقيه خزتها بقوة: يا شينك لما تتفلسفين!!
رنا نطقت بحسره:, انت وش عليك يا حضرة وهج ..واقعه على كنز واي شيء تتمنيه بس اشاره ويكون عندك!!
مطت شفتها وهج بسخريه من تفكير اخواتها السطحي ..عمرها ما استغلت ذي النقطه ...عندها قناعه من بيت اهلها وما هي مشفوحه حتى تجلس تتطلب من الناس ويقولون عنها مشفوحه وما شافت خير ...بالعكس ما تكلفه وما تطلب منه أي شيء ...تعيش نفس الحياة الي كانت فيها ....وحتى من فلوسها ما تصرف اي شيء كله تجمعه حتى تدفع القسط لسراج ...ما تذكر متى اخر مرة اشترت فيها مصروفها او اشترت من مطعم او اي شيء خاص فيها ...
بنظرها في أولويات ولزوم تشتغل عليها ...نطقت بهدوء: واذا زوجي معه فلوس ضروري اكون قدامه مشفوحه وكأني ما عمري شفت خير!!
انا شبعانه من بيت اهلي ..
نور كشت عليها بسخريه: شبعانه في بيت اهلك يا بعد قلبي ..ما قلت لنا وش شبعت؟!
يمكن حنا ناسيين ..ذكرينا بحياة اهلك الي تجيب الفخر!!
وهج ردت بهدوء: بالنسبة لي فخر ...خبزه وبصله ولا افخر انواع الاكل عند الناس!!
اعتبره فخر بالنسبة لي لأني لو اموت ولا اذل نفسي لأي احد ...ويجلس يتمنن علي !!
سناء بحاجب مرفوع: وليه يتمنن عليك ..غصب عنه يصرف عليك ويشتري اي شيء تبغينه!!
وهج هزت راسها: مجبور يصرف علي بالمعروف وحسب استطاعته ..ما هو تكلف عليه مثل رقيه
رنا ما عجبها كلامها: يعني اشتهت ما تاكل ؟!
وهج خزتها : وكاني ما اعرفكم ..لو اعطاها عين الا كل شوي تنشب له ابغى وابغى
رقيه ضحكت بخفه: والله نفس كلامه ..يقول لو اعطيك الضوء الاخضر الا اشحد الملح بسبتك!!
رنا تنهدت بحسره: يعني في بيت اهلنا حرمان وما في فلوس ..حرام نتمتع بعد الزواج؟!
ناظري امي حرمت نفسها من كل شيء حتى توفر لأبوي وتخفف عليه بالمصاريف ... وبالنهاية وش عمل ؟!
رماها رمية الكلاب!!
وهج ما عجبها المثل الي قالته ...وحسته انه فيه اهانه لامها ..نطقت بانفعال: ما احد كلب غيرك!!
وخلينا واقعيين .. ترى امي الي اصرت على الطلاق وهو حاول معها لاخر نقطة حتى ما تتطلق ...بس هي سمعت لشلة الانس وتطلقت
رقيه بعبوس: لا والله ..وش رايك تجلس وتصفق له وتجلس مع ضره ؟!
هذا هي ربنا عوضها وتزوجت وباكر يصير عندها عيال. ...عساه يكون ولد ..حتى ينقهر ابوي!!
نور ابتسمت بحماس: والله كانت امنيتي كذا ..بس الدكتوره اكدت لها بنت !!
قولي عساها زوجة ابوي تنجب توأم بنات!!
صحيح على طاريها ...وش اخبارها بعد ما تركها الفارس وهرب !!!
زمت وهج شفتها بملل لما كل الانظار توجهت عليها ...تندمت انها خبرتهم عن القرابه الي بين سراج وزوجه ابوها ...نطقت بملل : ترى قلت لكم ما في علاقه قويه بينهم.. بالمناسبات ويا دوب ؟!!
سناء بتساؤل: هو طلقها والا بعدها؟!
هزت رأسها: والله ما ادري عنهم؟!
رنا حركت حواجبها: ادري بك كذابه كل العلوم عندك بس تتكتمين ..تبغين تقنعيني ما تعرفين وين ابوي وما في تواصل بينكم؟!
تنهدت وهج كل فترة ترسل له أحياناً يرد عليها وأحياناً يسحب عليها ..وكل فترة يكتب لها انه رح يحتاجها ...بالوقت المطلوب رح يعطيها تفاصيل المساعدة ..تتمنى ما تكون مساعده ماديه لانها مباشره رح تعمل له حظر ..اكثر من كذا ما تقدر تعطيه !!
توسعت ابتسامتها لما نطقت نور وهي تخزها: شفتم سكتت هالكذوب!!
وهج نطقت بهدوء: ترى تركت سراج وجيت اتونس معكم ..ومن اول ما جلست ومواضيعكم تلوع الكبد!!
سكتت لما الكل انفجر من الضحك ...ما قالت نكته حتى يضحكون ؟!
نطقت باستغراب : وش فيكم؟!
نور من بين ضحكاتها نطقت بترييقه: سراااااج!!
رقيه ضربت كفها بكف نور وهي تنطق بسخرية: تركت سراجووووو ...
عقدت حواجبها ما تشوف شيء يضحك بالموضوع ...ناظرت سناء الي نطقت بابتسامة عريضة: بصراحه ما هو لايق عليك يكون عندك زوج وحركات !!
للحين ما احد مقتنع انك تزوجت ؟!
رفعت حاجب وهي تناظرها بتحقير: وليش يعني ؟! قالوا لك
قاطعتها رنا: طول عمرك تنقدين علينا والحين واضح عليك غرقانه وما احد سمى عليك!!
حركت شفتها بتعجب من تفكيرهم ..الحين لانها قالت هالكلمه ..عملوا لها سالفه طويله ... نطقت بأسف لتفكيرهم:سخيفات!!
سناء خزتها : بس ابغى افهم ..كرهك للرجال وين راح؟!
وهج بهدوء: ترى
سكتت ما فيه فايده تتكلم معهم خاصه لما رجعوا ينغزوا ويضحكون بصوت عالي!!
يا حبهم للثرثره والسوالف الي بدون معنى ..ومع ذلك تحب تجتمع وتجلس معهم ....على الاقل تعرف قلبهم نظيف ويتمنون لها الخير .. بخلاف شلة الانس!!
**"
**
**
ريان جالس يكتب ويمسح صار له اكثر من اسبوع يحاول يصيغ الكلام حتى ما يكون فيه اي غلط!!
قاطعه بضجر: تراك تبالغ ..مليت وانا انتظرك تنفذ خطتك ..ترى مر على السالفه شهر ..كل هذا وانت تطبخ فيها ؟!
خلاص ارسل لها 1,2,3
قلده ريان: 1,2,3 ..اقولك ما ابغى اتسرع !!
قاطعه بتنبيه: لنفرض ابوها اتصل فيها او ارسل لها بهذا الوقت ..رح يخرب كل مخططك ..وتضيع منك الفرصه مثل ما ضاعت غيرها!!
شد ريان على شفته بقوة ...كيف فاتته ذي النقطه ..لزوم يستعجل ....
مسح على وجهه بضجر ...خايف ما تضبط الخطه ...رح يموت لو ما انتقم منها ..حتى يواريها كيف تتكلم على امه كذا !!
هز راسه رح يبدأ ينفذ جزء من الخطه ...كتب لها " اسمعيني انا مضطر اقفل حسابي هذا ..مثل ما قلت لك ما اقدر استمر على حساب واحد ...هذا حسابي الثاني تواصلي معي منه ...في شيء لزوم اخبرك فيه بالوقت المناسب ..
كتب لها حسابه الجديد ...تنهد وهو يعيد قراءة الرسالة اكثر من مره حتى يتأكد ما في اي غلط !!
ابتسم برضا كل شيء مثل ما يبغى وأفضل!!
**
**
**
رن جوالها وكان سراج ...ابتسمت باحراج لما لقطت نور الاسم : واووووو شارل يتصل على سندريلا!!
تحركت مبتعده عنهم متجاهلة سخريتهم وضحكهم عليها ...فتحت خط ونطقت بخفوت حتى ما يسمعوها البنات: هلا
سراج بهدوء: اهلين ...كيف حالك ؟! وش اخبارك ؟!
عقدت حواجبها متصل حتى يسالها عن اخبارها ..نطقت بتسليك: هلا ..الحمد لله !!.
سراج زم شفته بضجر : ان شاء الله دوم!!
وهج بتوجس: في شيء ؟!
رد باعصاب منفلته : لاااا ابد سلامتك بس اتصلت اطمئن عليك ...بما انك بخير ..خلاص مع السلامه
وهج باستغراب: الله يسلمك
سرعان ما عبست ملامحها لما نطق بغضب: لا يا شيخه!!
وهج تضايقت من نبرته معها . وش فيه يكلمها كذا ..نطقت بضيق: انت وش فيك ؟! بس متصل علشان تصارخ؟!
قاطعها بسخريه غاضبه: إلا قولي متصل .. اطمئن اذا اختك عندها فراش لك او لا ..اخاف تبردين بالليل!!
وهج ابعدت الجوال وهي تناظر الساعه ..سرعان ما عضت على شفتها بقوة وهي تشوف الساعه ١ بعد منتصف الليل ...ما تدري كيف انقضى الوقت بسرعه ..خبرها قبل ما تنزل كحد اقصى ١٠ تنتهي الزيارة... نطقت باحراج : ما انتبهت على الوقت ..انت وينك؟!
نطق بتحذير: دقائق واكون عندك ..وربي اذا تأخرت بالنزول ما رح يحصل لك خير ..سلام!!
عبست ملامحها ما تدري ليه منفعل هالكثر ..وتأخرت وش فيها يعني؟!
في ناس كثير عندهم هذا الوقت مبكر!!
تذكرت وعيده وهي للحين واقفه .. تحركت بسرعه حتى تجهز ...ما هو خوف بس ما تبغى تزيد مشاكل!!
استاذنت من اخواتها وطلعت وهي تلبس النقاب وهي طالعه من العجله ..تحت نظرات الاستغراب ...
سرعان ما استدركت تصرفها ..وش فيها طايره كذا ؟!
واذا جاء وهي للحين ما جهزت..خير يا طير؟
الحين إن شافها منزرعه تحت قبل وصوله ..رح يظن انها خافت من تهديده ..وهي اكره ما عليها التعامل بين الزوجين بالقوة والتهديد...
اخذت نفس ونزلت بخطوات هادئه ..لو تعثرت من السرعه وش رح تستفيد من سراج ....
طلعت للشارع وهي تشوف سيارته واقفه ...عبست ملامحها بترقب الحين رح يفتح لها موشح ...
اول ما ركبت ردت السلام بهدوء!
رد وهو يناظرها بحاحب مرفوع: وعليكم السلام!!
كان نمت
قاطعته وهج ما لها خلق لمحاضرات وعتابات: سرقني الوقت وما حسيت فيه!!
قبل ما يحرك اشر على الرصيف : ذاك مو زوج اختك ؟!
طاردين الرجال من بيته علشان حضرتكم لطق الحنك!!
وهج ناظرت زوج اختها واقف بالشارع ويكلم بالجوال ومعه اخوه ..يمكن يكلم اختها يشوف انقلعوا او لا ...حست بثقل طينتهم اكيد زوجها الحين يشتم فيها ..مسكين رقيه جالسه ومبلطه ما ظنت ترجع للبيت الحين ...
نطق وهو يحرك السيارة بالخفيف : هذا اخوه اتوقع لأنه يشبه له كثير!!
وهج تناظرهم بدون قصد وعقلها يفكر بسناء الي متوهقه الحين بين زوجها الي يبغى يرجع للبيت وبين اخواتها الي ملتزقين وما عندهم نيه يرجعون ...نطقت بعد كلامه : ايه هذا اخوه!
رفع حاجب : ما شاء الله تعرفين العائله!
وهج ببراءه : ايه اعرفهم
قاطعها بانفعال: من وين هالمعرفه
عقدت حواجبها باستنكار وش فيه كذا معصب ..نطقت بضجر من اسلوبه: كان يبغى يخطبني
التفت عليها وهو يناظرها بقوة ... وبكل وقاحه تقولها ...يا كذب البنات ...تلقاها تخلي كل العالم خطبوها ..علشان ترسل للطرف الثاني ترى انا علي طلب ومن حظك اني وافقت علي ..ترى حافظ ذي الحركات ... يعني ما يشوفها بذاك الجمال حتى يخطبها ..ومتاكد لو كان في نظره شرعيه على الاغلب ما رح يرضى فيها من ناحيه الشكل ...ما ينكر إنه يحب روحها مو شكلها ...واغلب شباب اليوم يطيروا على الشكل ...نطق بسخريه: وليه ما خطبك ؟!
لا تقولين رفضك بعد الشوفه الشرعيه؟!
بهتت ملامحها وهي تناظره من رده ..وش فيه قالب عليها ؟!
زمت شفتها للحظات تبلع قهرها من كلامه ...لذي الدرجه يشوفها شيفه ..بس ما هي وهج الي تسكت له ...نطقت بهدوء: تظن كل الناس سطحيه وتحكم على الظاهر...ويكون بعلمك خطبني اكثر من مره واهله مصرين علي ... لولا ابوي ملك لي عليك والا كان
سكتت لما حست كلامها ما هو طيب وما يليق فيها تتكلم بذي الطريقه ...اذا هو أساء لها ما له داعي تنزل من مستواها وترد عليه ...
نطق بحاحب مرفوع : وش فيك سكتي؟!
كملي وقولي كان الحين زوجته؟!
يمداك تروحين للمحكمه وتتطلقين
قاطعته حتى تنهي الموضوع : تراه متزوج الحين
عضت على شفتها لما شافت ملامح وجهه ..بدل ما تكحلها عمتها !!
ما قدرت تكبح ضحكتها لما نطق بكل قهر: وقحه!!
تقهره ببرودها وتتكلم وكأنه الموضوع عادي ...التفت عليها لما نطقت : هذا مطعم
قاطعها بانفعال: جعلك بالسم ان اشتريت لك شيء!!!
ناظرته وهي تحس بداخلها شيء انكسر من رده وانفعاله ..ما طلبت منه شيء ..كل الي تبغاه تقول هذا مطعم لها شعبيه على مواقع التواصل ...تبغى تغير الموضوع وتقفله حتى ما تكبر المشكله!!
ما توقعت رده كذا ...الي يسمعه يقول من مطعم لمطعم ...
التزمت الصمت وما علقت بحرف واحد والدمعه تحسها معلقه برموشها ...الحين حست بشعور رقيه لما كانت تشكي عن زوجها وهي مشتهيه الأكل !!
ما التفتت عليه لما وقف على جنب الطريق ..ونطق بجمود: وش تبغين اشتري لك من المطعم!!
نطقت بهدوء يناسب شخصيتها': ما طلبت شيء!!
قاطعها بإصرار فيها حده: قلت لك وش تبغين ؟!
نطقت وللحين محافظة على هدوئها: ما ابغى شيء ..كنت اكلمك إنه له شعبيه على النت ...
قاطعها مو مقتنع بكلامها : قلت لك وش تبغين ...مو متحرك حتى تطلبين!!
وهج مطت شفتها بضيق ..واضح كسرت خاطره وحس بالندم ...نطقت وكأنها تتنفس من خرم ابره: ابغى سم الهاري يمكن اموت وترتاح مني!
انت وش تبغى مني بالضبط ...من لما اتصلت وانت تنافخ علي!!
حرك السيارة ..وبداخله ندم وش فيه عليها ...نطق بتبرير: انقهرت لما شفت الرجال واقف بالشارع
قاطعته وهج بقهر : اذا الرجال ما اشتكى ..انت وش الي حارك
قطعت كلامها وحركت شفتها بقرف ..الكلام معه ضايع ..ما تدري وش فيه طينته ثقيله كذا ..ما كان كذا !!
زفرت باختناق لما سحب يدها ... أحياناً تفكر تقطعها وتعطيه اياها ...ناظرته لما نطق بملامح معفوسه: وهج لا تزعلين مني ...كم صار لي بالبيت انتظرك ..وانا اقول الحين تشتاق وترجع ..اكيد رح تتصل حتى ارجعها .. تفاجأت لما سحبت علي كذا ...انت متخيله من اي ساعه طالعه من البيت ؟!
وطول الوقت جالس لوحدي!!
رفعت حاجب يبغى يلتف عليها بطرق ملتويه ..يظنها غبيه تصدق شوقه ووهله عليها ..نطقت بهدوء: كان جلست مع خالتي وعمي
قاطعها : بس انا ابغى اجلس معك .... انتظر بالعطله بس حتى نجلس مع بعض ونقضي وقت مع بعضنا ..بس حضرتك وقت العطله مباشره تنسقي مع اخواتك وتقضي وقتك معهم ...لمتى تهملين وجودي ..انا زوجك وأحق واولى من اخواتك !!
عقدت حواجبها وهي تشتم رائحه غيره ...معقول يحس بالنقص لأنه وحيد وما عنده اخوة واخوات ..ويغار لأنه عندها اخوات تقضي وقت معهم ...ما في تفسير غير كذا ...وجالس يتحجج بمحبه مزيفه ...دوبه ضربها بالكلام وانه لو شافها سلف سناء اكيد ما رح يقبل فيها ...والحين عامل حاله العاشق الولهان ..متاكده تورط فيها وما يدري كيف يتخلص منها ...للحين ما نسيت كلمته " الله يلعنك"
بلعت قهرها من ذي الكلمه ...للحين ما قدرت تنساها ...نطقت بهدوء : انا انتظرتك تتصل فيني حتى ارجع ...ما حبيت ازعجك وتكون مشغول مع احد
قاطعها بإصرار: انا ابغى تزعجيني ...انا اذا ما ازعجتيني احس يومي ناقص ...وهج انت جزء كبير بحياتي ...والحياة بدونك بدون طعم !!!..انت الحب الي انتظرته بالحلال !!!
انت من اجمل الاشياء الي وهبها ربي لي!!
مطت شفتها وش المطلوب منها الحين تغرق ...واو يحبها !!
قصصه حافظيتها متاكده انتقام للماضي ..يبغاها تتعلق فيه ويذلها بالحب ...حلفت واقسمت من قبل الا تخليه يهوجس باسمها ...وما هي وهج الي تغريها كم كلمه منه ...تلبست الصمت وهي تناظره يردد اشعار غزليه ... واضح الاخ محموم !!
**
**
**
باليوم الثاني جالسه بالمكتبه ويدها تحت خدها ...تعيد قراءة رسالة ابوها للمرة العاشره!!
ليه يغير حساباته ؟!
هو مطارد من احد ؟!
وش عمل حتى يهرب؟
دخلت على حسابه الجديد وارسلت له السلام ..تشوف نهايتها معه ...
انتظرت وقت وما قرأ رسالتها ...نفسها تدخل عقله وتعرف كيف يفكر ...بعد ما هدم بيته بدون مقابل !!
وصلتها رسالة من سراج ...عقدت حواجبها باستغراب .. ما تدري وش فيه نزل عليه الحب مرة وحده..صحيح علاقتهم خلال الشهر الأخير حلوة ...وتناست شجارهم الاخير وحياتهم اجمل ما تكون ...بس من البارحه زايد عيار المحبه عنده ...ما عادت تقدر تعرف تميز هو صادق والا كذاب !!
قفلت الجوال بدون ما ترد على رسالته ...وش يبغاها تكتب له ابيات شعريه ...
لزوم تثقل وخليه يراكض خلفها...وتراويه المسترجله وش عملت فيه !!
اليوم على الغداء رح تكون جدته وسوار موجودات .... تحس سوار لغز عجزت تفكه .. غريبه ما تزوجت للحين ؟!
معقول علشان تكون ونس لأمها ....او يمكن محيره لأحد لوقت يجهز!!
فتحت جوالها لما وصلها اشعارات ...مباشره فتحت رسالة ابوها وعقدت حواجبها وهي تشوف المحتوى!!
**
**
**
حس سراج بالانتكاسه لما شافت الرسالة وما عبرته ...يا برودها ...كيف تصدق انه يحبها من صميم قلبه وما عنده نيه سيئه لها ...المشكله كل المواقف السيئة حافظيتها ...ووضعت حاجز بينهم. ...ما تقول هالرجال معصب ..له وجهة نظر ...من حقه يتنرفز ...ابدا لا حافظه كل موقف سيء ...كيف تقتنع إنه ما يكذب عليها ومشاعره لها حقيقية ...
قفل الجوال لما سمع طرقات خفيفه على مكتبه ...عقد حواجبه بعد ما دخل ريان بابتسامة عريضة بالنسبة له مستفزه ...
نطق وهو يقترب: السلام عليكم !!
ناظر سراج السكرتير عند الباب ..اشر له يطلع ويقفل الباب خلفه ...
رد السلام بجمود وهو يناظر ريان جلس بكل وقاحه وهو ينطق: كيف حالك يا ولد العم!!
سراج بجمود: الحمد لله!!
ريان باستفزاز: وانا بعد بخير!!
كيف الاهل ....جدتي ذيك المره كانت تتكلم عليك عتبانه عليك ...تقول من بعد العزيمه ما رجع علينا!!
سراج رفع حاجب : ما اتوقع جاي علشان تنقل عتب وزعل جدتي ...رساله تكفي ما له داعي تكلف على نفسك ...واتوقع انك مو مهتم لزعل جدتي وعتابها ..عندك شيء تكلم بدون لف ودوران ...عندي مشاغل لفوق راسي!!!
ريان مط شفته بسخريه: اوووووه وش فيه ولد العم منفس؟!
سراج بعبوس: وش تبغى يا ريان!!
ريان هز رأسه : ما ابغى الا الخير ...ابغى منك فلوس دين لوقت وارجعه لك ...انت تعرف الظروف الي نعيش فيها ..تجهيز بيت ومصاريف اخواني ... وباكر يصير عندنا اخ جديد يبغى مصاريف بعد ما هرب أبوه ...وكل المسؤوليات فوق راسي لوحدي ...واكيد تعرف راتبي يروح على القروض
قاطعه سراج بعبوس: وعلى البنات!!
ريان ناظره بعتب متقن: تراك فاهم الموضوع غلط ...كانت نزوه وانتهت ...وانا قصدي الحلال. ...وللحين ابحث عن البنت الي شفت صورتها حتى اخطبها بالحلال ... أنا صحيت على نفسي للحظة كنت رح اسقط بالوحل ..تذكرت أختي ونويت احافظ عليها ... لأنه مثل ما يقولون العرض دين ... المهم اتركنا من ذي السالفه !!
سراج ناظره بجديه : وكيف للحين ما قدرت توصل لها ؟!
ريان بصدق: وربي ما قدرت اوصل لها للحين ..كل الي اعرفه اسمها فجر وتدرس بجامعه ********
سراج زم شفته بتعجب : يمكن تخرجت ...طيب اسأل البنات الي كانوا معها بالسكن
هز كتوفه ؛ ما اتوقع تخرجت ...والبنات تخرجوا وذابوا مب قادر اوصل لهم !!
اذا عندك طريقه تعرف مكانها ...وحتى تتأكد من صدق نيتي لا تعطيني عنوانها ..اعطيه مباشره لاعمامي
ويروحون يخطوبنها لي على سنة الله ورسوله!!
سراج بتفكير ...يمكن لو يخطب ويتزوج يعقل ويبعد عن طريق البنات ..رح يتحرى عن الموضوع ويتأكد من صدقه او كذبه ..نطق بهدوء: رح اشوف بعض معارفي يمكن نتوصل لها!!...رح نتفاهم عن هذا الموضوع بعدين!!
ريان بامتنان: مشكور ما تقصر وما رح انسى لك هالمعروف ...انت ما تعرف هالبنت كم قلبي متلعق فيها...
وبالنسبة للفلوس ؟!
سراج بهدوء: اشوف ابوي يعطيك انا حالياً ما اقدر
قاطعه ريان وهو يوقف : لو بغيت عمي كان طرقت بابه ...خلاص مشكور
سراج بتعجب الي يشوفه يقول انسان مسكين ... معقول تغير ؟! ...نطق يشوف نهايتها معه : كم تبغى؟!
عقد حواجبه لما طلب مبلغ مقارب للمبلغ الي طلبته وهج ..يزيد شيء بسيط ...نطق وهو ناوي ياخذ من أبوه ويخبره عن ريان وطلبه للفلوس : خلاص تمام ..اعتبر الفلوس اليوم تكون بحسابك ... كذا
تمام!!
ريان ابتسم بامتنان وهو يخفي ابتسامه خبيثه ..بعد ما قدر يسترد الفلوس الي اعطاها لوهج ...كذا تحلى اللعبة اكثر !!!.
انتهى البارت..دمتم بخير ????