طفلتي اليتيمه - *بارت 5* *شرفي عندك* - بقلم لا اعلم فقط ناشره | روايتك

*ننشر جميع القصص والروايات*🤎🕰️ *حب 🤎🕰️* *حزن 🤎🕰️* *اكشن🤎🕰️* *‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏ https://whatsapp.com/channel/0029Vb5nySH77qVOUYY2kt3M *البارت 5* *ليلة_من_فبراير* *حسبالي العدد بي ثمره من يزود* *وعن قلت الواحـــــد تفرق المـــــــية* *بس تالي ادركت طين الكلوب اصناف والعشرة الطويــــله تريد نوعــــيه* ❤️ نهاوند ـ جريتهه من ايدهه ورحت لباب المطبخ باوعت من الجامة شفت عمو ناصر وعمو توفيق يدكون بالباب وشكلهم مبين عصبي كلش… بقينة واكفين اني وخواتي يم الباب منعرف شنسوي ضلو يدكون الباب قوي وبعدين سكتو .. استغربت شنو صار خاف دخلو علينة لو كمزو من السياج رحت اركض للهول صعدت علئ القنفة وفتحت الشباك حتئ اشوف شنو القصة .. راحو لو شنو سمعت جيرانة عمو ابو حسين يحجي كلش ارتاحيت حسيت مو لوحدنة جان واكف يمهم و يكلهم استهدو بالله هاي ارملة اخوكم وهذول ايتامة ليش هيج تسوون وياهم ناصر ـ يعني تقبلهه يا ابوحسين هيج تسوي ويانة؟ ـ اهداء عمي لاتعلي صوتك بوجهي واني مثل عمك.. ـ مدتشوف صار شهرين مبهذلتنة بالمحاكم.. تريد ازاله شيوع وكل شوي دازة علينة مبلغ وفوكاهه متقبل نحجي ونتفاهم وياهه ورايحة للشرطة مشتكية علينة عبالك اعدائهه احنة ولا كأنو عمام بناتهه وبيناتنة خبز وملح هيج تنسه المعروف بلحضاات هيج البشر ينكر كلشي زين ومايغزر بي شي ام حسين ـ يااعمة خلو الله بين عيونكم نسوانكم حجت حجي يخزي وانتو لارديتوهن ولا وكفتو وياهه ونصرتوهه ليش هيج ؟ ليش سنين وهي كاعدة يمنة ماشفت منهه كلمة مو حلوة بحقنة مرة معدلة وينحلف براسهه توفيق ـ حجية هذا حجي نسوان مندخل بي ـ حجي نسوان شنو ابني نسوانكم تهمنهه بعرضهه وشرفهه يكلن ادور زلم وتريد تاخذ واحد منكم وانتو ماسكتوهن ليش ماكلتو هاي صاحبة ايتام شلون تعيش بهالزمن الاغبر ؟ تريدوهه تبقئ متبهذلة بالايجارات هي وبناتهه ياعمة وفوكاهه بنات.. هسة لو عدهه ولد نكول اطلعهم يشتغلون مينخاف عليهم بس بنات وهنة بنات اخوكم الله يرحمة دمكم لحمكم شرففكم عرضكم شلون تقبلون هيج تبقوهن متبهذلات توفيق ـ هذا شلون حجي حجية منو كلج عفناهم موو رردنة منهه تجي وتكعد بالبيت بس ماقبلت و ركبت راااسهه ابو حسين ـ لان خافت ياعمي هي كالت لام حسين بحضور ازواجهم وهيج سوون وحجن علية وراهم يذبن عليه تهمة ويصدكوهن.. ياعمي حلوهه باللتي هي احسن وبالمعروف اني اكول انطوهه حصة رجلهه خلوهه تشتري بيت وتستقر هي وبناتهه ـ ذااابتة ازاله شيووع شيجيب فلسسين تفاليس كلشي ميجيب.. نطلع بفتات الخبزز احجو وياهه ابو حسين كلولهه نبيع بس خل تتراجع عن الازاله ونشوفلنة شراية بالتراضي ـ ان شالله اليوم من ترجع اني احجي وياهه .. لاتتعصبون متسوة الدنية ياعمي تخسرون بعض علئ شنو و انتو اهل والاضفر ميطلع من اللحم وهي مهما كان مرة ارملة تريد تضمن حق بناتهه .. خلوهه عليه وان اشالله خير نهاوند ـ بعد هالحجي راحو عمامي واجتي خالة ام حسين علينة دكت بابنة طلعتلهه بالكراج وفتحت الباب .. ـ ها خالة ما رجعت امج بعدهه ـ لا والله خاله بعدهه ماكو ـ الله يساعدهه المحكمة دوخة صعدة ونزله وتعب ـ عمة شبيهم عمامي ـ لاتخافين راحو عمامج ابو حسين رجعهم ماكو شي سوالف كبار وان شالله تنحل ـ ها اي ان شالله ـ تغديتو خاله ـ ستونة كعدنة من النوم هسة اسوي ريوك لخواتي ـ تعالو يمي خاله اني اسويكلم ريوك والغدة هم جاهز جيبي خواتج وتعالي ـ ردت اروح بس اتذكرت امي متقبل تكول عيب بس بالليل روحو يمهم.. لا خاله والله هسة اريك خواتي وتجي ماما كالت متتاخر ـ يلة براحتكم واني شوي لخ اتصل عليهه اشوفهه وين صارت ـ راحت خاله ودخلت للبيت سويت ريوك لخواتي وريكتهن وغسلت ايدهن ومشطت شعرهن غسلت مواعين البيت نضيف ميحتاج انضفة بس ماما بعدهه ماكو ما اجتي مشة الوكت ونلعب اني وخواتي باوع للساعه صارت ب 2 وبعدهه مارجعت نغم ـ وين ماما ـ هسة تجي كالت متتاخر ـ والله مليت دائما تعوفنه وتطلع وتبقينه لوحدنة ـ لاتضلين تحجين غير دتشتغل وتصرف علينة لو متشتغل امي جان ماعندج دفاتر واقلام .. روحي لعبي روحي باوعت علئ الساعه مادري ليش خايفة ادري هي مو كالت متتاخر ليش اتاخرت وين راحت فجأة… الجو تغير فد مرة وانكلب كلاب صار الجو كلةة تراب احـــــمر والهوئ كلــش عاااالي كام يركع بالباب الخارجية من يوم الدفروهه الامريكان وهي تتمروج كو ثابته.. التراب دخل لكل البيت رغم كلشي سادة لا باب مفتوح ولا شباك مفتوح اختي الصغيرة اختنكت لان عدهه تحسس بالقصبات من اول ما اجتي للدنية ماعرفت شسوي لان كمنة كوة نجر النفس سديت البردات وكعدنة بالغرفة الجو صار اظلم بس همزين عدنة كهرباء فتحت التلفزيون لخواتي وكعدت اقرة بس الجو يخوف ولا عبالك ضهر ماعرف ليش هيج يصير الجو صار كم مرة هيج ينكلب تراب احمر دم مو اصفر حتئ اخاف اشوف علئ السما شكلهه يخوف طلعت كتبي اراجع بيهن ونغم ويايه نوبة تلعب ..نوبة تتعارك وية خواتي.. نوبة تدرس اخذني الوكت وية خواتي.. والدراسة ومانتبهت ساعه بيش صارت بدت الجو يتغير وكامت تمطر وتزخ وراسا طفت الكهرباء عدنة.. هو ابو السحب بس تنگط مي راسا يطفيهه علينة يالله صارت ظلمة هندس التمو خواتي يمي من الخوف وامي بعدهه ماكو ردت اطلع للمطبخ اجيب شمعه بس صوت الرعد يخوفني خواتي يبجن واني ابجي وياهن شلت الحان وصبا ونغم مجلبات بهدومي فتحت باب الغرفة اريد اروح للمطبخ ارجف من الخوف اني اصلا اخاف من الظلمة كمت اتخيل شكل بابا من ميت لو اتخيل احد ورة الباب واكف اتلمس وامشي بالبيت ماعرف شلون وصلت المطبخ فتحت مجر الكاونتر ادور شموع .. ماكو ادور جداحة شخاطة اريد اعلك الطباخ ماكو احس من الخوف جسمي يختض وين راحت الشخاطة الضهر شغلت المطبخ وخليتهه هناا وين رااحت نغم ـ صبا شمرتهه جوة الكاونتر من تعاركنه ـ طاح حظجن.. هسة وين راح الكااهه وصارت ظلمة وبعدهه امي ما اجتي ـ هسة هي وينهه ليش اتاخرت مو تعرف احنة لوحدنة خلي ترجع عاد ـ انجبي احجي عدل اكيد اتاخرت بالمحكمة لان عدهه شغل المطر صار كلش قوي اباوع من الشباك ترس الحديقة والكراج شفت ضوة قوي يم بابنة والباب اندكت ماعرف ليش يبست من الخوف لابية افتح الباب واكول منو ولا بية اضل بمكاني نغم ـ وج شبيج هيج خوافة دفتحي الباب يجوز امي برة ـ امي عدهه مفتاح والدنية ظلمة ومطر اخاف اطلع ـ اني راح اطلع لعد وخري ـ انجبيي وتعالي لاتسوين نفسج كرندايزر .. فتحت باب المطبخ وصحت منوووو ابو حسين ـ فتحي عموو فتحي الباب دناخذكم يمنة ـ سمعت صوت ابو حسين لزمت لحونة قوي وطلعت اركض اني وخواتي ونتصايح .. عمووو عموو عفية وين امي خابرتوهه ـ اي اي عمو خابرناهه صارت عدهه شغلة وتعطلت مكدرت تجي يلة امشو دخلو بالبيت يم خالتكم واني اقفل الباب روحو روحوو بسرعه ـ دخلنة كلنة يم بيت خالة ام حسين وبناتهه اتلكونه كعدن البنات يمشطن ويعدلن لخواتي مثل كل مرة وخاله سوتلنة عشة .. اكلج عفية خالة وين امي ليش اتاخرت ابو حسين ـ مو كلتلج عدهه شغل يابنتي لا تخافين تبين منا للصبح ـ اشوف وجوهم حيرانة ونضراتهم حزينة ماعرف ليش ممرتاحة .. يعني راح تبات بالمحكمة ايناس ـ لا حبيبتي وين المحكمة تنسد من الضهر ـ لعد وين راحت وين راح تبات ام حسين ـ عمة ندك علئ امج من الضهر لهسة بس متجاوب ومحد يرد .. اضطرينة نتصل علئ عمامج بس الاوضاع الجوية انكلبت بثواني وهسة صار منع تجوال ماكدرو يجون ـ يعني ليش متجاوب شنو صاير ابو حسين ـ هسة انتي ليش حجيتي وية الطفلة ـ خطية تكسر الخاطر غير اكلهة الصدك تبقئ تسأل منا لباجر لازم نحجيلهه ـ احس كلبي وكف من السمعته اشوفهم كل شوي يخابرون ويكولون تلفونهه يدك محد يشيلة ضليت طول الليل كاعدة لو اغفئ وافز من مكاني ... وين راحت امي ليش متشيل التلفون وتجاوبنة زين وين راحت .. كل شوي الحان تكعد بالليل تبجي وكوة اسكتهه صار الصبح واجة عمو ناصر لبيت ابو حسين اخذتني خالة ام حسين لبيتنة لمينة ملابسنة حتئ ياخذونة عمامي.. عفية خاله وين امي ـ منكدر نكول غير الله يردهه سالمة بلكي الله مابيه شي وترجعلكم .. ـ متحملت هالحجي راسا كمت اشهك وابجي يعني وين راحت هم راح تعوفنة مثل ابوية ـ لا ياستار لاتحجين هيج اسم الله ان شالله مابيهه شي ـ اتقربت مني وحضنتني ومسحت دموعي ـ كافي بجي خاله وين تروح قابل بس يجووز بالازدحام لو شوف شنو صار استغفر الله .. ان شالله مابيهه شي ان شالله يمة .. انتي طفلة ودعائج مستجاب ادعيلهه ترجعلكم سالمة ـ امي هم جانت تكلي انتي طفلة ودعائج مستجاب .. ضليت ابجي وادعي امي ترجعلنة اخذنة عمو ناصر بالسيارة وهو عصبي ـ وووين ولت امج؟ ـ عمو هي كالت راح تروح للمحكمة ـ الله يطيح حظهه مو مرة وحدة الف مرة متستحيي مرة شطوولهه وتفتر بنص الزلم كلهم محاميين وشرطة هي هاي شريفة التسوي هييج ـ زين عمو وين اندور امي ـ الئ جهنم .. تلكيهه شو ويامن دايحة بنت الكلب ـ ماحبيت كلامة عن امي مبين ديحجي عليهه شي موزين .. لحونة بحضني وصبا ونغم يمي وكل شوي امسح دموعي اخاف يشوفني ابجي ويحجي عليه.. وصلنة بيت جدو ونزلنة كعدنة بالهول لكيتهم دينضفون البيت من التراب ووجوهم مجفاية ومكلوبه منال ـ ووين ولت امج الدايحة ام محمد ـ رحميهم منال مو هيج الحجي ـ وطز .. ارحمهم شنو مو كلتلجن هااي دايحه متصبر بدون رجال .. تكرطلهه واحد تخلص عدتهه تطلع تفتر ادور علئ الثاني بس شسويلكم ماصدكتوني كميلة ـ عزة صخام وين راحت قابل ام محمد ـ لاتحجين هيج حجي منال مدتشوفين الوكت كلة عبوات وانفجارات ليش تتهميهه بشرفهه ـ عفية لاتبيعين شرف براسي وانتي البارحة كصيتي بلحمهه كص يمنة ـ يبووو عليج مينحجي شي يمج خلي اكمل شغلي واكعد ادرس جهالي احسنلي نهاوند ـ وكف كلبي من اتذكرت اني مجايبة كتبنة وماضل شي علئ امتحانات اخير السنة كمزت من مكاني .. عفية عمو رجعنة للبيت االله يخلييك ناصر ـ شكوو شبيج فزيتي ـ عموو نسيت اجيب الكتب الله يخليك رجعنة اجيب كتبنة ماضل شي ونبتحن منال ـ هههه خلي نلكة امكم الدايحه وبعدين نخليكم تولون للمدراس ـ يعني شنو عمة؟ شنو هالحجي ناصر ـ هسة انتو بحال مدارس وامكم مندري وينهه وويامن مهزومة كميلة ـ مدارسكم صارت بعيدة علينة منو ياخذكم ويرجعكم ـ لا عفية عمو الله يخلييك اني واختي ناجحين طول السنة وهاي اخير السنة راح ننجح مااضل شي ناصر ـ اااش اش صوت ما اسمع خلي نطلع ندور علئ الدايحه وين كميلة ـ مو عدكم تلفون اهلهه يجوز ابيت اهلهه راحت منال ـ اكص ايدي ورجلي اذا رايحة لاهله بابا شوفي هاي شو منو قاري براسهه ومهزومة وياه وكولي ماكالت مناال باجر تشوفين كميلة ـ ميخالف انطوهم علم يدورون وياكم همة اهلهه اولئ بيهه يدوروهه ويلمون عارهم ـ اخذونة لغرفة بيبي .. خليت اختي بالكاع تلعب وية بنات عمي وصاحتني عمة منال ـ تعالي نهاوند عوفي خواتج وتعالي دنغسل السطح ـ مو خواتي صغار وخصوصا لحونة شلون ابقيهه هنا ـ ما عليهه شي دعااء ماما كعدو بالغرفة وسدو الباب لاتخلون هالطفلة تطلع دعاء ـ اوك ـ خليت خواتي ووصيت نغم علئ لحونة بس ادري بيهه ثولة متنتبه تلتهي باللعب وتعوفهه .. بس اضطريت اعوفهه واروح وياهه اخاف يحجون عليه بنتهه دعاء كاعدة تتفرج علئ التلفزيون واني اخذتني تشغلني صعدنة بالسطح وضلت تصخر بية وتحجي علئ امي كدامي غسلت نص السطح من التراب الاحمر احس ضهري اتشنج من الغراض الثكيلة الاشيلهه كلهه غراض مال عمامي وسكراب ماعرف مالت شنو اشيلهن من مكانهن وانظف جواهن وارد ارجعهن منال ـ اشتغلي اشتغلي لاتسوين هالحركات ويايه عود ازدهار خاتون ماجانت تشغلج وتكرب عليج ـ اي تشغلني امي بس مو هيج متخليني اشيل شي ثكيل هي تشيله ـ اي ذني مو ثكيلات شنو شيرادلهن هنة تايرات براميل فارغة يلة يلة اشتغلي حتئ تنسين فضيحة امج ـ عمة امي ماسوت شي ليش تحجين هيج عليهه ـ لعد وين راحت .. يلة كولي احجي وين ولت وعافتكم ـ راحت للمحكمة ـ انتي كلتيهه للمحكمة والاخبار والناس كلهه تكول ماكو شي يم المحكمة لا انفجار لا مفخخة لا صخام بعين امج ولج فضحتنة بين الناس المن ننطي وجهنة بعد شنحجي شنكول .. لاا وفوكاهه عدهه بنات منو بعد ياخذهن من يعرفون امهن شاردة وية واحد وهي ذاك اليوم طلعت من عدتهه ـ امي ماشاردة وية احد امي عدهه معاملة وراحت تسويهه ـ اي تريد تشيلنة من البيت .. شوفي منو شجعهه علئ هالشي ليش بوكت ابوج ماطالبت بحصته حك المات اكيد اكو واحد جوة ايدهه وقشمر عليهه حتئ ياخذ فلوسهه ـ باوعتلهه بطرف عيني كلش كارهتهه وكارهه كلامهه لو بيدي اعوفهه وانزل جوة بس اخاف ـ زين بلة سؤال ... المن جانت تخابر ـ تخابركم وتخابر اهلهه ـ يعني متخابر احد غرريب معقولة ـ لا ـ والله ولا اصدك كملي كملي وكافي لغووة يلة غسلي السطح زين يلة بسرعه ـ هاي شبيهه هيج تحجي علئ امي كلش حقدت عليهه كملت غسل السطح ونزلنة شفت خواتي يبجن ركضت عليهن .. شبيجن نغم ـ كتلونة هذوول ـ شفتهن مخرمشات من وجهن وايدهن معضوضة .. احترك دمي لان دعاء كاعدة وتضحك وهي جبيرة عود ليش تضحك عليهن.. ادري ليش متوخرين اخوتج عن خواتي شوفي شمسوين بيهن ـ جهال بيناتهم ليش تدخلين ـ دشوفي مو هيج مطلعين دم منهن ومأذيهن ـ ديلا هي عضة قابل شسوولهن عادي الولد يضرب وياذي هو قوي يصير اخوتي اقوياء وخواتج عنيدات وكتلوهن ـ ماتحملت هيج تحجي ويايه رحت ضربت اخوتهه ودفعتهم بالكاع هم شوي اكبر من خواتي بس يفتهمون دعاء ـ يمةةةة ووج يمةة تعالي شوفي هاي شسووت باخووتي ذبحتهم كتتل منال ـ يمةة وولدي شسوويتيلهمم ولج ـ عمة همة كتلو خواتي شوفي ايدهم شلون عاضيهه ومخرمشين وجهم دعاء ـ يمةة والله كذابة هي ضرربت اخووتي شوفي شسووت بيهم ـ عمة والله همة اذو خواتي .. ضلت تصيح وتعيط عليه عمة منال وتتوعد بية اذا اقرب اني وخواتي علئ ولدهه يكون تحمي السجينة وتخليهه علئ ايدينة خفت من هالحجي خاف صدك تسوي جانت قبل بيبي حورية تكعدني يمهه وتحميني هسة منو يحميني اني وخواتي طلعو من الغرفة كلهم وضلينة لوحدنة اباوع لهدومي مبللة طلعت دشداشة ولبستهه وبدلت لخواتي اخذت ملابسي وغسلتهن بيدي وشريتهن بالسطح .. يارب هاي بعدنة ستونة اجينة وهيج يعاملونة ويخوفونة ياربي رجع امي عفية هي وين راحت معقولة عافتنة وانهزمت وية واحد مثل ميحجون .. ضليت ابجي واكول امي متسويهه لان كلتلي راح ارجع ما اتاخر .. نزلت ولميت خواتي وكعدت ماريدهن يلعبن وياهم خطية هنة مثل حالي اتذكر شلون جانو ميردوني ويضربوني ومحد ياخذ حقي منهم .. صار الضهر ورجعو عمامي طلعت اركض عليهم… عفية عمو توفيق مالكيتو امي ـ ماكو خابرنة اخوتهه وهم ديدورون عنهه كميلة ـ مارحتو لمستشفئ للشرطة اسالو ـ رحت اني واخوهه نعيم للطب العدلي مالكينة شي منال ـ والله انتو خطية هيج شكول متموت .. اذا ماطلعت لاكيتلة واحد ومهزومة وياه تريد تتونس وعايفة هالنغولة علينة فلا اسمي منال ناصر ـ اخوهه نبيل كال بس يلكة اثرهه ينطينة خبر .. حطولنة غدة ترة كلش تعبان من الفرة ـ صبو الغدة وتغدينة .. بحضني نامت الحان احسهه تعبت هالطفلة بس شبعت اكل نامت خليتهه بالغرفة اريد انيمهه منال ـ خليهه لاختج وتعالي غسلي مواعين ـ ماحجت بس هزيت براسي خليت اختي بالفراش ويمهه نغم وصبا وطلعت للمطبخ.. مطبخ بيت جدو مشترك بس كل واحد من عمامي اله طباخ وحدة والسنك بس واحد و مشتركين بي كلهم وكل عائلة الهه سلة مواعين خاصة بيهه غسلت المواعين وخليتهن كلهن سوية بسلة وحدة وعاطت بية عمة كميلة كميلة ـ لالا هذي مواعينة حطيهن بالسلة الوسطانية وهذني مالت بيت ناصر وهاي الخواشيك لام محمد خليهن هناك ـ دخت بين مرجعت الاغراض للسلة مالتهم .. ستوني طلعت من المطبخ وصاحتني منال ـ نهااوند سووي جاي لعمامج ولا تخلين هواي بثل جااي يصير ثكيل مو طيب ناصر ـ خاف مدبرهه لو تحترك يمعودةة ـ كلشي تعرف لاتخاف عليهه ـ دعاء اكبر منهه ومتعرف شي ـ مو كلتلك الماعندة ام .. ينجبر يكبر قبل وقتة بعد لاتقارن بنتي ببنت رحمة .. لان ما اقبل هيج مقارنة ـ اكيد متندل الاغراض وين علئ الاقل خلي دعاء ادليهه ـ قابل الستكاين والمواعين بغير محافظة؟ هو هالكدوتة المطبخ عوفهه شبيك هيج مخضوض عليهه جبيرة تفتهم قابل صغيرة ـ اسمع حجيهم وميته قهر بس مابيدي شي سويتلهم الجاي وضليت ساعه ادور علئ الجاي وين والاستكانات وين خليته بصينية واخذته الهم ـ ها مو كلتلك ادبرهه ام محمد ـ ازدهار معلمتهه البنية تفتهم نادرة بهالسوالف ـ قصدج كاربة عليهه مشغلتهه خدامة ـ اني مو خدامة عمة اني اساعد امي وخواتي منال ـ وعدهه لسان تجاوب هم بنت رحمة الله يستر منهه ـ اريد اروح اكعد بغرفة بيبي بس خواتي ميقبلن يريدن يبقن يم عمامي بالهول واني ما أئمن عليهن يبقن لوحدهن خاف يتعاركون لو يضربوهن وكلام عمتي منال مثل السم ماعرف شلون خلص هالليوم وياهه هي الوحيدة بين نسوان عمومتي التاذيني بحجيهه وتصرفاتهه ثاني يوم اجتي عمة شفاء وعمة سهير عمة شفاء حبابة وحنينة علينة اخذت خواتي ودارتهن وسبحتهن بس اني مقبلت تسبحني احس نفسي صرت جبيرة عيب سهير ـ مالكوهه بعدهم مو منال ـ راحت وكالت عدوولي وين تلكي بعد يمعودة شمرت جهالهه وركضت ـ هههههههههه والله انتي مصيبة ـ والله عبالكم غشيمة مثلكم لا عيني اني متفوتني هيج سوالف راسا عرفتهه من اجتي تريد تكعد ويانه ام عطوب تريد مكان تسكن بي وهي بيت اهلهه تكولين القصر الجمهوري بس هناك متحصل عريس ـ ااامي مووو هيج واالله مو هيج سهير ـ والله بخت اني شايفة البنات يكرهن مرة ابوهن اشو تموت عليهه منال ـ لعد شلون شريفة زمانهه سولفينه ليش متروح تكعد ابيت اهلهه وتنجبب ـ كمت ابجي واحجي بصوت عالي اصلاا امي تحب عمامي مثل اخووتهه وراااحت ترويد تكعد ووياهم بس خااالو نبيل مااااقبل يبقيني يمهم يكلهه هاي غريبة رجعيهه لاهله وهي ماقبلت سهير ـ صدك والله؟ منال ـ مدرستهه خوش تدريس شفاء ـ كافي حرام عليجن تاخذن بغيبة المرة ولجن خافن الله كافي عاد سهير ـ اي بلة كملي نهاوند وبعدين ـ والله عمةة ماما مو هيج حتئ جابت عمهه ودخلته بينهه وبن اخوتهه بس همة ميردوني يردون تذبني عليكم وماقبلت ومن شافت متكدر تدفع ايجار اجتي عليكم والله جانت ادافعلكم من كلولهه اخذي حصة فؤاد تكلهم املاك بيت فؤاد مو مثل املاك اهلي وين اطشرهم منال ـ بيينت الجذبةة لعد ليش ذابة بيتنة بالازاله كافي جذب ولج خوش مدرستج ام عطوب سهير ـ مينعرف الجذب من الصدك منهن ـ والله عمة ماكذب والله ماما تحبكم محد سمعني منهن ولا اهتم ولا تعاطفن وية امي بس عمة شفاء وام محمد شوي تعاطفت مر اكثر من 3 ايام وهمة يدورون علئ امي وماكو خبر منهه هلكنة اني وخواتي من النسمعه والمشاكل مالت الجهال ماعرف شسوي وشلون اتجنب بيت عمي ومشاكلهم ويانة ماضلت كلمة ماسمعناهه من عمة منال كوة الزم خواتي حتئ لايلعبن وية ولد عمامي وتالي ينكتلن مادري احس روحي متورطة وبس ابجي بس اريد يجينة خبر من امي واعرف وين راحت وترجع تاخذنة خواتي ممتعودات علئ هيج معاملة وخصوصا نغم وصبا ممتعودات احد ياذيهن ويسكتن لازم يردن الاذية وخصوصا ولد عمو ناصر هواي يضربون خواتي ولازم نسكت ومنرد الضربة والاذية الهم ونغم تبقئ تحرك بروحهه وتملخ روحهه بالبجي تريد تتعارك وياهم مادري شلون اتعامل وياهه علمود لايضربوهه وياذوهه حاولت اسكتهه متسكت احس روحي انضغطت من الضروف الامر بيهه صرت عصبية عليهه ولزمتهه وضربتهه علمود تصير عركتهه ويايه وتضربني وترتاح وتسكت .. وصدك ضربتني وتعاركت ويايه يلة سكتت وارتاحت اني اختهه احبهه حتئ لو اضربهه ماضربهه مثل ولد عمي ضربهم هواي ياذي ايام مرة ماعرف شوكت تخلص كعدنة الصبح علئ صوت عمة منال تحجي بصوت عالي ـ هااا شكلتتت موو كلتلكممم مهزوومة وية واااحد هالمصخمة الوجه ام الرجوولة راايحة تتونس وشامرة جهالهه عليينة هااي علموود مرة ثانية من تحجي مناال تصدكوون شفتوو وين لكووهه وللحكاية بقية…………… 🥀