طفلتي اليتيمه - *بارت3* *ليلة من فبراير* - بقلم لا اعلم فقط ناشره | روايتك

*ننشر جميع القصص والروايات*🤎🕰️ *حب 🤎🕰️* *حزن 🤎🕰️* *اكشن🤎🕰️* *‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏ https://whatsapp.com/channel/0029Vb5nySH77qVOUYY2kt3M *البارت3* *ليلة_من_فبراير* *☆☆ ☆☆ ☆* *عــافــونـي ودعـيت مـن الله* *يتـذكـرون* *ذكـرونـــي ودعـيت مـن الله ينسونــي* *مـــن تــواضعـت ذلـتنـي كــل الـنـاس* *ومــن اتكبـرت عـالــراس خـلــونـــي* *أبـيض مـن صرت كرهـونـي كره الـشيب* *صـرت اسود مثلـهم ..وحشـي سمـونــي* *حچيت الهـم صدگ رجموني مثل ابليس* *بــس مـن چـذبـت ..جـبـريـل سـمـونـي* ❤️ نهاوند ـ فتحت امي الباب علئ كيفهه مديت راسي اريد اشوف منو لكيت رجال واكع اباب البيت ومتمدد وبس ايدة طالعه اتقدمت امي خطوتين وصرخت فـــــــؤاد… ركضت هية وركضت وراهه شفت ابوية متمدد وحالتة تخوف فاتح عيونة وصافن علينه وجهه كلش متغير ضعفان فد مرة شعرة مزيني صفر عندة جرح يم حاجبة اليسرة وجهه اسود صاير ماعرف ليش ولا عبالك هذا بابا فؤاد كلبي رجف من شكلة امي تريد تشيلة متكدر ردت اساعدهه جريت ايدة شفت بيهه جرح كلش جبير بس بعدة ما ملتئم شكلة يخوف راسا سحبت ايدي عنة ماعرف ليش هيج خايفة منه ملابسه كلش وصخة امي من شافته ميتحرك فقدت وصارت تصيح بعالي صوتهه مثل الفاقدة وتحجي وية ابوية .. خفت من امي لان اشوفهه تبجي وتضحك بنفس الوقت طلعو خواتي الصغار يركضون ويبجون اخترعن من الصوت العالي خطية ركضت عليهن حضنتهن واخذتهن علئ جهة للحديقة التمو الجوارين علينة بصراخ امي كلهم متفاجئين من وضع بابا اليتحمد علئ سلامتة الي يسألة وين جنت ويخض بي حتئ يتحرك او يحجي بس هو ابد ميتحرك ولا ينطق بس يباوع علينه اتكابلو الجوارين وشالو دخلو للبيتنة امي ركضت قبلهم وخلت فراش بالهول جابو الجوارين ونيمو وكعدو يفركولة ايدة ورجلة بس هو ميتحرك ابد ماعرف شبي .. خواتي من شافو بابا هيج وضعه كامن يخافن منة ويبجن .. امي عاطت بية وكلتلي دخليهن للغرفة ودخلي وياهن وقفلي الباب اخذتهن ودخلت جوة .. خواتي يصرخن ويبجن ويسألن شبي بابا واني ماعرف اجاوبهن بس حضنتهن وكلتلهن ماعرف شبي بس مبين تعبان اسكتو خلو يرتاح وظيسبح حتئ نطلع يمة هدائن شوي وكامن يلعبن بملاعيبهن والتهن عن السالفة بس صياحهن عالي باللعب اريد اسمع شديصير برة لزكت بالباب اريد اسمع شنو راح يصير وشراح يحجون بس هوسة خواتي ماخلتني اسمع شي ضلينة هواي محبوسين بالغرفة اخاف افتح الباب واشوف شنو ديصير اجتني الحان وكلتلي عطشانة لكيتهه حجة حتئ افتح الباب فتحت الباب ولكيت عمامي جايين وخالو نعيم وياهم رحت للمطبخ جبت مي ورجعت مالكيت خواتي كلهن رايحات يم بابا تقربت يم الهول شفت عمو ارشد وعمو ناصر متكابلين ديشيلون بابا وامي ركضت لغرفتههه دقايق وصاحتلي ـ نووونة ـ نعم ماما ـ ديري بالج علئ خواتج هسة نجي رايحين للمستشفئ منتاخر ان شالله ناصر ـ وين تجين ويانه ؟ ضلي يم جهالج ام نغم ـ يا جهال انت صدك تحجي رجلي علئ رجلكم .. اروح وياكم للمستشفئ ونرجع سوية .. فدوة نعيم ضل انت يم البنات ناصر ـ لا لا ..خلي يروح ارشد ونعيم وياكم واني اضل وية البنات بين مترجعون ـ عادي براحتك .. نعيم ـ اخذتي هويته خاف يطلبوهه بالمستشفئ ـ اي اي اخذتهه يلة شيلو خلي نشوف شبي شمسوين بي ليش مينطق ولا يتحررك كسر بأيدهم الله لاينطيهم للسوو بيك هيج وين جانتلك سودة عليه .. ديري بالج علئ خواتج ماما لا تتعاركون ـ اي ماما.. راحو وضل عمو ناصر يمنة جانت الكهرباء طافية واجة السحب وعمو ناصر كاعد يلعب وية نغم وصبا لحونة دخلت لغرفة بابا وطلعت بيدهه اوراق وجناسي ركضت عليهه واخذتهن منهه .. عفتهم ودخلت بغرفة بابا شفت مجموعه اوراق مطشرة لميتهن وشفت هوية بيهه صورة بنية صغيرة اخذني الفضول واخذت الهوية اكيد هاي نور بنت ماما ازدهار شكد حلوة وجهه مدور ومسوية كصايب وتضحك بالصورة لزمتهه وضليت اقرة بيهه اريد اعرف شكد مواليدهه صدك بالصيف .. اسمهه نور احمد مواليد 15/7/1990 ابتسمت بقهر .. تدرين جنت احتفل بعيد ميلادج كل سنة نيالج عندج هيج ام تحبج حتئ وانتي ميتة تتذكرج وتبجي عليج ليش اني مو مثلج ليش امي عافتني مو مثل امج ليش ابوية هيج حاله وميحبني ليش مكتوب عليه اعيش حياتج حتئ الوان هدومي لازم مثل الالوان الانتي تحبيهه .. مو الالوان احبهه.. نور اني ماحب لون الوردي وكرهت اللون البنفسجي بسببج اني احب الاحمر والاخضر كل الالوان احبهن الا هاللونين كرهتهم كل هدومي وقراصاتي منهن لان ماما ازدهار متقبل اشتري الا هالالونين شفتي ابوج شكد يحبج و اخذج يمة نيالج والله احسدج .. كلهم يحبوج حتئ وانتي ميته.. احجي وية الهوية ومحاسة بروحي احجي وية بنية ميته احسدهه لان ابوهه وامهه يحبوهه ماعرف ليش خفت اخاف من سيرة الموت .. شمرت كلشي وطلعت اركض من الغرفة ورحت كعدت يم عمو ناصر ـ وين جنتي ـ بغرفة بابا ارجع الاوراق خاف تنشك بيد لحونة ـ دخت من هوسة خواتج ـ ليش مارحت وياهم عمو ـ لا شلون تبقون لوحدكم بهيج ضروف ـ لا منبقة لوحدنة ماما كالت خالو نعيم راح يبقئ يمنة ـ ميصير عمو.. انتي كبرتي ونعيم يحل عليج مترهم يبقئ يمكم لوحدكم ـ شنو يحل عليه؟ ـ يعني يصير يتزوجج ـ استغربت واتعجبت بهالكلام ضليت ساكته وصافنة علئ عمو هذا شديحجي .. بس هو خالي شلون يتزوجني ـ لا مو خالج الحقيقي.. اخو زوجة ابوج .. فـعادي يصير يتزوجج لذلك ماقبلت يضل يمكم .. كومي جيبيلي كلاص مي بارد كتلني العطش ـ رحت للمطبخ وجبتلة المي .. ضلينة كاعدين ننتضر وعمي يلعب وية خواتي لو يكلب بالتلفزيون تقريبا ساعه ونص وخابر عمو ناصر كلولة اخذهم وروح للبيت لان فتحو تحقيق بالمستشفئ وراح يضلون بايتين ميرجعون اليوم فؤاد كلش متاذي مو مال يرجع للبيت.. من غرفت راح ياخذنة لميت ملابس خواتي وملابسي واخذنة عمو ناصر لبيت جدو منال ـ شنو هاي اشو جبتهم ؟ ـ وين ابقيهم لعد ؟ امهم وابوهم بالمستشفئ بقو عاد جبتهم واجيت كميلة ـ ياا خطية يعني متأذي هواي ـ لايحرك ايد ولا رجل .. بس يرمش بعيونة وكلشي مفاهمين منه جسمه بي هواي جروح .. مأذي خطية الله لايوفقهم منال ـ زين ميكدر يحجي مكال وين جان منو اخذة ـ لا وين ياريت يحجي.. جان علئ الاقل افتهمنة شصارلة ومنو اخذة.. ـ كلهم التهو يسولفون ويسألون عمو ناصر عن ابوية.. بس محد سألنة احنة الجهال جوعانين عطشانين شنو محتاجين .. حاطة خواتي يمي ولحونة الصغيرة بحضني وكاعدة .. الحان ـ نونة جوعانة ـ اش عيب لايسمعوج .. هسة يخلون العشة ـ جوعانة اريد اكل ناصر ـ اي عمو اي صار .. كومي كومي منال سويلهم عشئ الجهال جاعو خطية يكفي خضة اليوم عليهم ـ لا ماكدر ايدي محتركة بالمي الحار وكلش تأذيني ـ دعاااء بابا دعاااء ـ شتررريد من دعاء انوب ـ شنو شأريد ؟ خليهه تحضر العشئ ـ لا والله دعدوع تحضر عشئ من شووكت بنيتي تدخل للمطبخ ـ صارت مرة جبيرة خليهه تتعود علئ المطبخ ـ لا عييني لاا .. لا صارت مرة جبيرة ولا شي شنو شهالحجي اليسمعك يكول عمرهه عشرين سنه ترة ستوهه 14 سنه يعني كوة تكبرهه كميلة ـ يالة يابة لاتختلفون اني راح اكوم اسوي العشة ونتعشئ سوية اليوم طبخي علئ طبخج يكفي ونعشي هالجهال علئ شنو هوستكم بعد .. ـ مو ماضل من الغدة شي كلة خلص ـ عادي اكو بتيته طماطة بيذنجان وعندي خبز وضل من الغدة شوي وخير من الله يصير منال ـ اي زين.. اكلج اخذي بنت رحمة وياج تعينج بالمطبخ صارت جبيرة كميلة ـ مو ستوج تكولين دعاء بعدهه طفلة وهي اكبر من نهاوند بسنتين شلون رهمتيهه بنت رحمة كبرت ؟ ـ الماعندة ام .. ينجبر يكبر قبل وقتة ـ هالكلمة كلش اثرت بية.. رغم امي ازدهار موجودة بس يعبتروني بدون ام! ماعندي لسان ارد ولا اصلا اخاف ارد بهيج مواقف بس ضليت ساكتة واستمع للينحجي كميلة ـ اي والله هم صدك حجايتج .. كومي عمة كومي ويايه ـ خليت خواتي بالهول يم عمو ناصر وزوجته واولادهم ورحت للمطبخ وية مرة عمي كميلة .. نطتني بتيتة وبذنجان اكشرهن وهي تقليهن وترتب بالمواعين حمت الغدة مالتهم وصارت صينية عشئ جبيرة وكعدنة .. ضليت اعشي بخواتي اعرف بيهن ميعرفن ياكلن ويلتهن وتالي يكولن جوعانات .. فرشولنة اني وخواتي بغرفة بيبي القديمة.. وية بنات عمو ناصر نمنة جنت كلش خايفة اول مرة احس نفسي مسؤلة عن خواتي الصغار مادعرف شلون اتصرف وياهم اختي لحونة اتنحست علئ امي وضلت تبجي وتصيح ماما واني شايلتهه وافتر شراح يخلص هالليلة احس روحي هلكت مو بس تعبت اريد اخلي راسي علئ المخدة وانام ماعرف ليش خايفة والدمعه طرف عيني صارت ساعه ثنتين بالليل يلة نامت الحان .. خليت راسي علئ المخدة مثل الفاقدة من التعب راسا نمت ماحسيت بشي .. صار ثاني يوم وامي خابرت عمو ناصر حتئ يجيبنة رحنة للبيت شفت امي موجودة بس ابوية مموجود .. ماما وين بابا ـ ماقبلو يطلعو حالته صعبة ـ شنو شبي ـ كولي شنو المابي .. حسبي الله ونعم الوكيل عليهم.. ـ مفهمت شي من كلامهه ـ معليج ماما بهالحجي التهي بخواتج وخلي المصايب علئ راسي .. ـ زين منو بقئ يم بابا هناك ـ توفيق هو مرافق اله لان ردهه رجاليه خلي اروح الم جم هدمة وانطيهه لناصر ياخذهه الهم ـ مر اكثر من 10 ايام يلة جابو بابا للبيت ووياهم ممرض حتئ يسبحو لان ضهرة مكسور لازم شخص عندة خبرة يسبحه.. خطة امي كلش مخبوصة راحت تركض للحمام حضرته وطلعت كلتلهم يلة جهز الحمام دخلو اخذو عمامي والممرض وسبحو وخلصو دخلت شفتهم مغيرين ملابسة وشايلي وحاطي بفراشة .. بعدين عرفت هالممرض هو كراايب بابا من اولاد عمة.. جنت متصورة راح اشوف بابا كاعد او يسولف ويتحرك.. بس استغربت ابد مديتحرك شنو صاير بي ليش هيج .. كل شوي يصيحن عليه خواتي لو تكب العيطة بيناتهن واروح اركض عليهن وارد ارجع يمهم اريد اعرف بابا شبي وية العصر اجو نسوان عمومتي جابهم عمو ناصر ودخلو للبيت منال ـ ياعيني خوية فؤاد الله يعينك هاي شمسوين بيك الظلام .. كميلة ـ الله يشافي ويعافي بس لو. يحجي ينطق حتئ نعرف منو هيج مسوي بي ازدهار ـ الحمد لله علئ كل حال ان شالله يتحسن علئ العلاج ويكوم علئ رجليه مرة ثانية منال ـ اي ان شالله ـ الجهال خو ماضوجوكم من باتو يمكم ـ يا مو عيب هيج تحجين هذني بنااتنة وداعتج وانتي مامحلفتني اعز بناتج مثل ما اعز بنتي دعاء واكثرر وداعتج بعيوننة خليناهن .. وسإلي كميلة ..مو كميلة ـ اي .. نفس المعزة بالكلب ازدهار ـ لا ميحتاج اسأل بناتكم هنة .. منال ـ ذمة بكربتج هاي كدام رجلج فؤاد واخوته اي شي تحتاجين انتي والبنات خابرينة وتددللين ـ متقصرون ـ امي تحجي ببرود وياهن لان تعرفهن شنو من بشر.. وتعرف حجيهن كلة كذب ضليت مستغربة من كذب عمة منال شبون قابلية عدهه .. للمغرب ماضل احد بالبيت وقبل لا يروحون عمامي نطو امي فلوس كالولهه خاف تحتاجين شي وراحو عيني علئ ابوية ابد مانزلتهه اشوفه ملفلف ونايم شكلة غريب شفت امي حطت سجادتهه وكامت تصلي وتبجي.. الاطفال من يشوفون امهم تبجي ومنهارة بوقت يعتبرون الام هي مصدر قوتهم ينهارون وياهه.. خواتي بحكم عمرهن الصغير ميعرفن شديصير من يشوفون امي تبجي يبجن علئ بجيهة ويضلن يسألنهه .. بس اني افهم ليش ماما تبجي مو مثل خواتي ابوية كلش متإذي و راح يموت وهيج دتبجي .. شبيج ماما كالو شي عن بابا حجو الاطباء شي ـ ماكو شي .. عشيتي خواتج بنتي؟ ـ اي تعشن وشبعن ـ زين تسوين فرشيلهن خلي ينامن ـ اي .. ذيج اللية كلنة فرشنة بالهول ونمنة ... طفينة الاضوية القوية وبقينة ضوة خافت علمود خواتي لا يخافن من الظلمة بقينة اني وامي كاعدين مكدرنة انام يمكن امي احتاجت تفضفض وتحجي وكعدت تسولف ويايه ـ عندة كسر بالجمجمة .. وكسر بالفك وضهرة مكسور وصايرة عندة جلطة ونزيف يكول الطبيب بمعجزة بعدة عايش واحتمال ميعيش اكثر من هيج ـ امي تحجي وعيونهه تجري دمع..بس من كالت احتمال ميعيش اكثر انفجرت بالبجي .. جنت ابجي علئ بجي امي مو لان مقهورة علئ ابوية .. هذا احساسي بوقتهه ـ هالرجال مسالم لا مأذي احد ولا مقترب الاحد ملتهي بألحانة وشغلة منو ممكن هيج يسوي بي ـ يعني الطبيب ماعرف منو هيج مسوي بي ـ لا ماما شعليه الطبيب هذا مو شغلة ..شغل الشرطة بس احنة وين عدنة شرطة بهالزمن مثل الناس .. سوولة تقرير طبي ورادو ياخذون افادته بس ماكدر يحجي وقيدوهه ضد مجهول ـ ضلينة علئ هالحال اكثر من اسبوع يومية يجون علينة واحد من عمامي او خوالي .. يشوفونة شنحتاج ويطمنون علينة ويروحون بابا طول هالفترة جان ميتحرك ابد بس عيونة يحركهن ماعرف ليش اخاف اباوع عليه دائما اتجنبة وما اشوف بوجهه لان كلما عيني تصير بعينة اشوفه يدمع عبالك يبجي ماعرف ليش.. جنت انقهر عليه لان ميكدر يتحرك والحاجتين جواه الاطباء مشكليلة كيس وامي تغيرة من ينترس وتنضفة وتغسلة بمكانه وفوكاهه ميكدر ياكل شي ابد عايش علئ المغذي المعلكي بالبردة ... امي تعلمت شلون تخلي المغذي تكول لازم نعتمد علئ نفسنه مترهم كل شوي صايحين جوارينة المضمد زحمة .. خلي هو بس يضربة ابرة بالوريد والباقي علية .. احس امي هواي تعبت بهالفترة شعرهه انترس شيب وجهه ذبل صارت مهتم بنفسهه ابد .. ماعرف مين اجاهه هالكد شيب ترس شعرهه ترس حتئ شكلهه تغير وكلش ضعفت وعيونهه غارت جوة وصار داير مدايرهه اسود .. مر تقريبا اقل من شهر و هذا روتين حياتنة ومثل كل مرة .. طلعت امي حتئ تتسوك وتجيب العلاجات لبابا.. وكالت مناك تروح تسجل اختي نغم بالمدرسة لان استحقت هالسنة ادوام اول ابتدائي اخذتهه وراحت وضلينة اني وصبا ولحونة وبابا نضفت البيت وخلصت واسمع ابوية يون وكفت متخشبة بمكاني مو بيدي كلش اخاف منه وكلبي يرجف من اشوفة واتقرب منه حتئ ما مركزة بشكلة هسة لان راسا ادير وجهي عنة.. ماعرف لان هيج مكسر ومتأذي خايفة منة لو لان جان قبل يخوفني وميريدني خواتي بالغرفة يلعبن وهو يون صوتة واضح رحت اتسحب للهول علئ كيفي خطوة تاخذني وعشرة ترجعني شفايفي ترجف وايدي ترجف واحس كلبي يريد يطلع من مكانه وكفت ابمكاني بنص الهول احاول ما اباوعله.. كلتلة ها بابا شتريد .. تالي اتذكرت هو ميكدر يحجي رفعت عيوني كوة عليه شفت عيونة تباوعلي بنضرة غريبة عيونة بيهه كومة حجي ومديكدر يحجي احس جسمي كام يختض من الخوف عيونة اليمنة صارت تجري دمع وينج يا امي وين صرتي مادعرف شيريد ابوية باوعت كيس الفضلات مامتروس بعدة نضيف المغذي ماخلصان قبل لا تطلع خلتة زين ليش يون ويباوع عليه مر اكثر من دقيقتين واني واكفة يمة اتجرئت واتقربت اكثر عليه صار بيني وبينة اقل من متر وين راح الخوف مني… مادري اول مرة اركز بوجه ابوية هيج .. بحياتي كلهه مامركزة بوجهه عدل عيونة كبار مثل عيوني وجهه مدور مثل وجهي خشمه عريض اكبر من خشمي بهواي وشفايفة مرسومة بالضبط مثل شفايفي حواجبة ثخينة ومعكودة حواجبي تختلف عنة مفتوحة مو معكودة .. لون عيونة اسود وعيوني هم سودة يعني اني اشبه ابوية لعد ليش يكولون تشبه امهه ملامحي نفس ملامح بابا لعد ليش يكول هاي مثل امهه ونفس صوت امهه ويكرهني لهلدرجة معقولة مااشفني اشبهه معقولة اصلا مشايفني وعبالة اشبه امي .. يجوز لان شعري سرح ومو مثل مثلهم معكد كالو تشبه امهه يعني عافو شبه عيوني ودورة وجهي وشفايفي التشبه بابا وعلمود شعري حكمو عليه اشبه امي رحمة.. باوعت عليه ..نضرات عيونة تحير مكدرت افهمهه ابد شنو يريد وليش يون وليش هيج يباوع اقل من دقايق وصار يشخر كلبي رجف وارتبكت ورجعت خطوتين ليورة .. زادت شخرتة بصوت عالي صرخت ورحت اركض لخواتي بالغرفة وقفلت الباب علينة احس الرعب لزمني وجسمي يختض .. شبي بابا ليش يشخر قربت راسي من الباب ماسمعت صوته بعد .. اي همزين بعد ماكو صوت .. يمكن نام رجعت كعدت يم خواتي انتضر امي شوكت تجي بس بعدني قافلة الباب واخاف افتحه حتئ صبا ولحونة رادو مي اكل مقبلت افتح الباب ضليت الهي بيهن بين متجي ماما ماعرف شكد مر من الوكت وسمعت الباب الخارجية مالتنة انفتحت خليت اذني علئ الباب سمعت صوت نغم تحجي وية ماما فتحت الباب وطلعتهم اركض من باب المطبخ .. هـلو ماما ـ هلو بنيتي شلونهن خواتج خو ماتوكحن وضوجن ابوج ـ لالا كاعدين بالغرفة يلعبن ـ اي زين ـ ليش اتاخرتو ـ علمود الاستمارة رحنة للمستوصف وردينة رجعنة للمدرسة ومسواك والصيدليات مو كلهه تفتح بالتسعه الصبح.. شنو ولج صاير شي ـ بابا ماعرف شبي ـ شبي وج احجي ـ شمرت العلاكات بالمطبخ وراحت تركض للهول فؤاااد فؤاااد ـ كعدت يمة وتخض بي بس ميتحرك بابا ولا فتح عينة من لزمته صفنت بالبداية وبعدين انهارت بالبجي وكعدت بالكاع .. ماعرف شبي ماما جان يون رحت يمة كلشي مفتهمت منة وعيونة تدمع وبعدين شخر شخرة قوية شلون النايم ويشخر اني خفت ودخلت اركض يم خواتي وقفلت الباب .. شبي بابا ليش شخر.. ماجاوبتني وبس تبجي جرت تلفونهه و خابرت لاخوهه نعيم وهي كوة تحجي ومنهارة ـ نعيم فؤاد رااااح راااح وعافني لوحدي راح وعاف بركبتي كوم للحم جسمة صاير ثلـــج وگ نبيل الحگني ـ عرفت ابوية مات .. ضلينة اني وخواتي صافنين علئ بابا ماعرف ليش ما خفت ولا بجيت احس روحي مصدومة من جان عايش جنت اخاف منه اشو هسة ميت وماخايفة يمكن لان ماما يمي ماخايفة اتمعن بملامحة .. عبالك واحد نايم هو هيج الموت ؟ اشو ميخوف ! دقايق وراحت امي لغرفتهه ولبست اسود .. الباب اندكت وطلعت فتحتهه لكيت جيرانة عمو ابو حسين وكم واحد من جوارينة ووياهم نسوان المنطقة ابو حسين ـ شبييي ابوج عموو هسة خابررني عمج ارشدد .. شو شو سوو طرريق خلي نفوت ـ ماخلاني احجي سويتلهم طريق وكلهم دخلو امي تلفلفت بالعباية وكعدت تبجي ابو حسين ـ ليش ماحجيتو ليش ماكلتو شبي اتخربط ؟ جان نطيتونة خبر ناخذة للطبيب ـ عمو ابو حسين يحجي وامي ساكته وتبجي .. انخبص البيت واجو عمامي ونسوانهم وخوالي ونسوانهم شالو ابوية واخذو للمستفشئ النسوان كلهم كعدو وام حسين جيرانة جابت مسجل وشغلت قرأن ناصر ـ امشي ام نغم انتي والبنات ناخذكم ونسوي الفاتحة ابيت ابوية ـ لا ابو دعاء .. لو الوالد والوالدة عايشين الله يرحمهم اروح ماعندي مانع ... بس هو عاش بهالبيت ولازم الفاتحة اتصير بهالبيت توفيق ـ شنو هالحجي ام نغم هذاك بيت ابو ..والناس كلهه تندلنة ـ ابو وامه الله يرحمهم.. وهذا بيته وهم الناس تندلنة ما اطلع من بيتي يا اخوية ـ امي صممت تصير فاتحة النسوان ابيتنة ماقبلت نروح لبيت جدو حمزة فـ اضطرو يسوون فاتحة الزلم هم ابيتنة .. كلتلي ماما اغير هدومي والبس القميص الاسود والبنطلون الكابوي العندي لان ماعندي بنطلون اسود غيرت ملابسي ولزمت خواتي.. اجني عماتي وخالاتي خوات ماما ازدهار يطبخن ويقيمن بالفاتحه اول يوم خلص سلامات بس ثاني يوم صارت لغاوي هواي لان جانن كلهن موجودات بلمطبخ وصارت عركة بين عمة سهير وخاله وداد سهير ـ سووودة عليية يا اخوووية راح وماشااف الولدد مااجابتلة مررتة وولد يشيل اسمة مثل بااقي اخوته اخذ اثنين وماعرفن يجيبن الولد مثل باقي النسووان سوودة عليه يا عيني منو يشيل اسمك بعد… راح وماشاف اليشيل اسمة وداد ـ بلا انتي كل عقلج ! هو هذا وكت هالحجي ؟ ـ اي وكتة ليش مو وكته لعد شتريدين اضل ساكتة ـ البركة ببناته يكبرن ويشيلن اسمة ويرفعن راسه ـ لاتغشمين روحج البنية مو مثل الولد سووودة عليه شكد جان يتمنة يخلف ولد ـ ليش هو اشتكالج ؟ ـ اخوية قابل ماعرفة .. وبعدين اي جان يشتكي ليش ميشتكي ـ والله الاعرفة علاقتج بأخوج مو كلش قوية فشوكت لحك يشتكيلج ـ وانتي شعليج عيوني علاقتي باخوية قوية مو قوية خربانة انتي شكو بيناتنه ـ لعد كاعدة وتتشكين بأخوج وتسمعينة حجي علئ اااختي وتريديني اسكتلج و ماردج؟ شفاء ـ كافي يمعودات اسكتو هاي فاتحة منا العالم تسمع شتحجي علينه وداد ـ سكتي اختج عيوني مو هسة جاية تبيع حنية براسنة سهير ـ غصبا عليج حنينة علئ اخوية قابل مثلكم تبيعون اختكم علموود جم فلس ـ تعااي تعاي .. مين جبتي هالحجاية ؟ احجيي لا اوصلهه لاخوتي ـ قاابل خاايفة منكمم .. مو رادت اختج حصتهه من ورث ابوهه حتئ تشتري بيت يلمهه وتالي مقبلتو تنطوهه ـ اولاا انتي شدخلج بهالمووضوع ورثنة وبكيفنةة ثاانياا انتو هم مقبلتو تنطون حصة ابنكم من بيت اهلة لو هاي تسكتين عنهه ومتذكريهه لان متفيدج وثالثاا وهذا الاهم مو احنة الانبيع اختنه علمود جم فلس طول هالفترة اختي تاخذ من حصتهه وتدفع ايجار بيت اخوج.. الي المفروض انتو ادفعون ايجارة مو من جيب مرتة يندفع ومكيفين ؟ سهير ـ وانتي شعلييج يابة من جيبة من جيبهه .. همة متفاهمين بيناتهم شدخلج ـ كولي لنفسج حبابة و انتي هم شعلييج عده بناات ماعندة ولدد همة متفاهمين بينااتهم وهمم شعليييج بسالفة نطينة حصتهه او ما نطييينة هالشي خااص بينةة فــلاتدخليين لان تشوفين شي ميعجبج سهير ـ لا اشو ادخلل وبكييفي مو كاافي ساكتين لاختتج مسوية بنت اخووية نهاوند نسخة من بنتهه الميتة تلبسهه ملابسهه وذبت الملابس الجبناهه سكتنةة كلشي ننطيهه تذبة ومتقبل تجيب الا علئ ذوقهه ومرام بنت اختج الميتة وسكتنة ولج حتئ عيدد ميلادهه غيرتة من الشتة للصيييف لان تسويي علئ عيد ميلااد بنتهه الميتةة لا استحت من عدنةةة ولا خجللـــت وداد ـ وشبيكم انتو ؟ ناقصين ايد رجل عقل بيكم خيررر سوو ميلاد بنتكم ذكروهه .. جيبولهه كيكة وهداية مو اخذتهه من عدكم حال الظيم حالهه مثل بنت المجادية وبعدين اختي سوت لبنتهه الله يرحمهه ميلاد وشفقت علئ بنتكم وكلتله هذا ميلادج حتئ متكسر بيهه واصلاا اختي ممجبورة ببنت اخوج فـلاتبيعين حنية براس اليتامة عيوني نهاوند ـ صار الحجي علئ المكشوف بيناتهم .. واصواتهم صارت عاليه الحجي قلبلي راسي يمكن صدك امي متحبني وتشفق عليه اي اكيد صدك .. خاله وداد حجت واكيد سمعت هالحجي من ماما ازدهار من صار الصوت عالي بينهم ركضت عمة شفاء وسدت باب المطبخ البين الهول والغرف حتئ ميسمعون الناس الغربة هواي امور جنت ماعرفهه وانكشفت الي بهالعركة وضلت لاززكة براسي لا اكدر اتخلص منهه ولا اكدر انساهه بس رغم كلشي جنت ضايجة من كلام عمة سهير ليش هيج تتفاول علينة وتكول راح نضيع اشو من بابا انخطف ضلينة وية ماما ماصار بينة شي ... ردت اضل اسمع حجيهم بس اختي لحونة كامت تبجي يمكن خافت من الصوت العالي .. لميت خواتي وطلعت من المطبخ لمحت ماما كاعدة بنص النسوان صافنة وايدهه علئ راسهه شكلهه يقهر الحجي السمعته كلب راسي وخلة مشاعر متضاربه تجاه امي خلصت ايام الفاتحة وكلمن راح لبيته والتهه بعيشته وصفينة اني وامي وخواتي بالبيت امي عافت غرفتهه وكامت تنام يمنة بغرفتنة بداخلي هواي حجي اتمنئ احجي وياهه وافتهمة بس اخاف .. خاف متقبل تسمعني او تتغير معاملتهه ويايه ازدهار ـ شبيج نونة ليش دائما صافنة ومو علئ بعضج من يوم وفاه ابوج وانتي متغيرة وياية حجي متحجين مقهورة وتبجين.. انتي بوفاه ابوج مابجيتي هالكد شنو صاير ماما احجيلي ـ فرحت من سألتني ولكيتهه فرصة حتئ احجي وياهه وافتهم منهه .. يمة ... انتي تحبيني ؟ ـ شنو هالسؤال؟ وبعدين معقولة تسألين هيج سؤال الي ـ خجلت من نفسي ودنكت راسي ـ احجي ماما شبيج شنو سامعه عني ومتغيرة عن قبل وجاية تسأليني هالسؤال ـ يمة .. انتي صدك جنتي تشفقين عليه ـ شلون يعني ؟ مفهمت ـ يعني لان تسوين عيد ميلاد نور وتوهميني هذا عيد ميلادي وتلبسيني ملابسهه والالوان لازم وردي وبنفسجي ـ اني ماوهمتج اي صح اعترف اني اخطأأت بحقج بهالشي .. بس ماراح تحسين بمرارتي من فقدت بنتي .. والله لا يخليج تحسين هالاحساس اتصرفت وياج بعفوية مو بقصد الاذية ماجنت اعرف هالامر راح ينعكس بشكل سلبي عليج الدنية هواي كسرت بية بس هالكسرة كلش ثكيلة لان عندي 3 بنات وانتي رابعتهن خلتني ارجع لعقلي واندم علئ السويته وياج بس ممعقولة تكرهيني علمود هيج تصرف اتصرفته يعني ماكو شي يشفعلي عندج ـ لا ماما ليش هيج تحجين بالعكس والله احبج اكثر من امي الجابتني لهل دنية وشمرتني .. بس ضل الكلام بكلبي وردت اعرف .. شفتهه غصت بالبجي متحملت راسا بجيت وياهه وكمت ارتميت عليهه وحضنتهه والتمن خواتي ويايه ـ وعد مني بنتي هالسنة اسويلج عيد ميلادج بنفس الشهر ـ ابتسمتلهه بقهر .. وبابا ـ راح لرحمة الله .. ارتاح من الالم البي يكفي كسرة ضهرة اكيد جان يحس بألم مينحمل .. وبعدين اذا فرحنة بابا راح يفرح ويانه ومو الا احد يعرف يعني نسوي عيد ميلادج بيناتنة ومنكول لاحد بين ماتخلص السنة واسويلج عيد ميلاد واعزم بي خالاتج وعماتج ـ بس هالسنة مو كبيسة ـ اي نيالج عمي انتي مبخوته كل اربع سنين تنحسبلج سنة يعني انتي هسة عمرج 3 سنين بكد لحونة ههه ـ حضنتنة وضلت تضحك ويانه وتلاشينة رغم وفاه بابا والمسؤليه صارت كلش ثكيلة عليهه بس ماحسستنة بشي اجتي المدارس وداومنة اني واختي نغم هي صف اول ابتدائي واني اول متوسط مدرستي يم مدرستهه مو بعيدة عنهه جنت اطلع وية صديقاتي اروح لمدرسة نغم اخذهه ونرجع للبيت ارجع الكة امي طابخة نغير ملابسنة وتغدينة وتكعد تقرينة جنت اشوفهه تسوي كيك وكليجة ودائما تحاول تفرحنة تخليلنة شمعه علئ الكيكة وتحتفل بينة واحنة نتعارك حتئ نطفيهه .. كل هذا حتئ تغيرلنة جو ومنضل كئيبين راح الصيف ورد رجع الشتة شهر الـ1 ملتمين يم الصوبة وكاعدين نحل الواجبات اني واختي وخواتي الصغار يلعبن يمنة امي سوتلنه حليب وخلت خبز علئ الصوبة وتكلب بي حتئ يتكسب وناكلة وكاعدة تتفرج مسلسلة علئ الستلايت واجاهه اتصال من خالو نبيل ـ الو ـ شنو هالحجي السمعته يابة ـ شسمعت ؟ ـ كايلة لوداد ونعيم تريدين حصتج من بيت ابوج ـ اي اريدهه اريد اتشري بيت والم بناتي ـ ومنو كلج نبيع شي من املاك ابوية ـ اكلك انت شتريد بالضبط ؟ هذا حقي واملاكي ترة ما اجدي منك ـ لاتعليين صوتج من تحجين وويايه ـ لعدد شلون تريدني احجيي اني كاعدة ابييت ايجار ابو الايجار كل شهر يزيد عليه الفلوس لان شافني مرة لووحدي انت شنوو مترحمم ـ ومنو جاابرج تضلين هنااك ـ بنااتي جابراتني اضل خصم الحجي يا نبيل اريد حقي حتئ اشتريلي مشتمل بيت صغير شقة اريد استقرر لشوكت ابقئ هيج ـ العقارات متنباع هسة الاوضاع مخربطة ـ هذا كلامك جنت اسمعه من التسعيناااات تتذكرر لو لاااا نفسس حجيك ونفس كلاامك ماغيرت شي منه واذا جنت قبل اااسكت هسة لا والله بعد مااسكت ـ وشتسووين بلة؟ ـ كلشيي اسوي كلكم كاعدين ببيوت ملك من خيررات ابوية بس تصير يمي تصفر ايديكم وماعدكم فلوس بعد ولا العقارات دتنابع وكلشي ماعدكم وفلستوو وادكولي اليتيمة ـ هذني خواتج وياج اشو ماطلبن شي ؟ ـ لان الله مفضل علئ زلمهن وممحتاجات كل وحدة بيت وسيارة وخير من الله ـ والله ماجبرناج تتزوجين الفكورة ـ احترم نفسك خوية وعيب هالحجي كلمن وقسمته اسمع نبيل انت عندك بنات واني عندي بنات .. بس الفرق بناتي يتيمات وابوهن جوة التراب وبناتك انت علئ راسهن وحرام عليك تاخذ حق يتيمات ـ لا ادخليني بمتاهااات ياحق يايتمات قابل ورث الخلفووهن ـ اااي ورث امهن الخلفتهن كل هالسنين ساكته لان ماريد اخرب علاقتي بيكم ومن طلبت منكم حصة ابوية قبل لا يتوفئ فؤاد .. كلتولي عندج رجال هو يحير بيكم هو يشتريلكم بيت وسكتت حتئ نتخارب هسة الرجال راح جوة التراب وبركبتي ارربع بناات اريد اشتريلهن بييت وائمن عليهن الدنية متتأمن نبيل اني اختك وهذني بناتي مو غربة وهيج تعاملني ـ رجعي بنت رجلج لاهله .. وتعالي يمنة ـ وووانت شعلييك ببنت رجلي هي عمرهه ماكانت مشكلة بالنسبة الي ؟ ـ لعد شتريدين تجيبيهه وياااج ابيت ابووج ـ ااگلك انت بس تتحجج عليه ومنوو كلك اقبل ارجع يمكم ـ لعد شتريديين تشترين بيت وتمشين علئ حل شعرج انتي ارملة وعندج بنات صغارر ورجال ماكو بالبيت وياج كل عقلج ايج تشترين بيت؟ ـ لعد اني شلون هسة عايشة! ماعايشة لوحدي وية اربع بنات ؟ لو لان ايجار ساكت وممهتم وممشتغلة الغيررة عنددك من سمعت حصة وورث وفلووس ضبطتهن علييه ـ اااسمييي لــــج هذا اخرر حجي عــــندي رجعي بنــــت رجلـــــج لاهلــــه وخلصيينة منهه وتعالي انتي وبناتج ابيـــت ابوج معـــــززة مگــــرمة محد يندك بيج والغرفة الفوك اسويلهه حمام و تواليت ومطبخ وعيشي انتي بنــــــاتج بيه عجـــــبج اهــــــلا وسهــــلا ماعبجـــــج طـــــــــززز بــــييج من هالشهر بعد ولافلسس تشوفين مني ووااااريد اشوف شلون اااادبرين عيشتج وعيشة بنااتج وية الايجارااات وللحكاية بقية………… 🥀