الفصل 95
*روايات يمنيه عربيه مميزه 🇾🇪*
*بإدارة : شـٰٓمـُـس⁞♩⁽📚🖊️₎⇣℡*
*رقم الروايه 16*
*الفصل (95) ☆*
* جرح القريب😔غريب💔*
*تفاعلوالنستمر😍* *قراءة ممتعةلاتلهكم الروايه عن ذكرالله اللهم اني بلغت اللهم فاشهد 🥹💗⃟🎀*
رضوان وراوية يحاولوا يخففوا صدمتها، وهي بس تشوف لمنصور ودموعها يقطروا، رغد مسكت بكتف جراح:
_ جراح ما له أمي؟
جراح شاف لأمه وهي تشوف لمنصور، ورجع شاف للتلفزيون والكل شاف لهناك، ومنصور يضحك، والمذيعة وجهت له سؤال قتل نوال..
_ إدًا ما هي خطوتك التالية سيد منصور؟
منصور شبك يداته ببعض: والله بما إن انا جيت لمصر وتغربت عن بلدي الحبيبة، وحققت كل دا النجاح بعيد عنه، فأنا قررت أهديه جزء من نجاحي..
_ وكيف ذلك؟
منصور: بسوي جزء من مشاريعي هناك، يعني برجع لليمن بلدي الحبيبة من جديد، وخاصة مدينتي الحبيبة وأم المساكين، عدن...
نوال هنا حست الأكسجين انعدم في المكان، تسحب النفس بقوة وبحشرجات متقطعة، ويداها عند خديها تهتزان بقوة، جراح خاف ومسك يداتها:
_ اماه ما لك؟
رغد بدأت تبكي: اماه ما لك؟
رضوان يهزها: نوال اهدأي يا نوال..
راوية تبكي: نوال يا اماه امسكي نفسك..
نوال تشوف له وحده لا غير، ترددت كلماته الأخيرة مثل انذار خطر بعقلها، حست عيونها يومضوا احمر، ليعلن عقلها عن حالة الطوارئ، حست كل شي يميل ووقعت للخلف مغشيًا عليها والكل صاح بخوف..
رغد وجراح: اماااااااااه
رضوان وراوية: نوااااااال..
خالد كان يتصل: خلاص تمام، طيب..
وغلق وجلس ينفخ ويمسح وجهه، سمع الصياح والأصوات يلي تطلع، ووقف يتسمع:
_ أيش دا الصوت؟
وطوالي خرج جري زي المجنون، ودفع الباب لمن رنحه، وشاف الصياح والبكاء وهم متجمعين حول نوال يلي مثل جذع اجوف لا روح ولا شي، وجرى لعندهم وبخوف:
_ م..ما له نوال أيش حصل له؟
رغد تبكي: اماه اهئ اهئ، اماه قومي اماه..
جراح يهز رجلينها: اماه ما لك اماه..
راوية تبكي عند رأسها: نوال يا اماه قومي أيش حصل لك اهئ اهئ..
خالد يشوف لها بحواجب مرفوعة بصدمة ولا عارف أيش حصل
_ أيش في أيش فيبه نوال اتكلموووا..
رضوان يلطم خدودها، نوال يا روح ابوك، نوال، نواال..
رغد تبكي وجراح يهديها، راوية تبكي: ويلي عليك يا بنتي اهئ اهئ، قومه يا رضوان قووومه..
رضوان صاح بخوف: اهدأي يا مرة اهدأي..
خالد شاف لجراح ووجهه ممتقع، وشاف لرغد وهي تبكي:
_ أيش حصل له أُمكم يا جراح اتكلم..
جراح بلع ريقه بخوف: و..والله مدريش يا خال، ك...كنا نتفرج التلفزيون و..وهي جت وشافت له و..وبعدين مدريش أيش حصل له كدا وقعت فجأة زي ما تشوفه..
رغد تبكي: اماه اهئ اهئ، صحه يا خال صحه اهئ اهئ..
خالد بلع ريقه ويهز رأسه: ك...م....
ورجع شاف للتلفزيون، وهنا جحظوا عيونه وهو يوقف، وسمر عيونه للشاشة، كان منصور يصافح المذيعة، ويلي شكرته على حضوره، ومنصور شاف للكاميرا وهو يبتسم، وخالد تعابير وجهه ما تتفسرش، وبصوت متقطع وهو يضيق عيونه:
_ م...من...منصوور!
ورجع شاف لنوال والكل يبكي حولها وهي ولا حركة كالخشبة تمامًا، عيونها يلي يذرفوا الدموع كانت نار وولعت قلب خالد يلي مسك رأسه ورجع شاف للشاشة وفرك شعره بعدم تصديق..
@rewayatyamania المصدر الأول للروايات
في مصر، وقفت بعدم اسيعاب، بينما شيمَاء وبشار حضنوا بعض، وسامر باين تضايق وهو يمدد شفايفه، ونجوى صاحت:
_ أيش أييييش، أيش قال دا؟
سامر حط يده فوق الكنبة: قال بيرجع اليمن، قد قلت لك بيتأخر بالرجعة لكن مستحيل ينسأه..
بشار: بحب بابا اوي، نحنا هنروح نشوف اليمن يا شوشو، وهنشوف عيال خالو..
شيمَاء بفرح غامر وهي تضم يداتها: أيوة، أني فرحانة كتير يا بشار..
بشار رفع حواجبه باعجاب: الله على الكلام اليمني بقا، ايه دا يا بنت، انتي تعلمتي اللهجة اليمنية أمتى؟
شيمَاء بغرور: دنا عدنية الأصل يمنية المنبع، بعدين معي أصحاب كتييير من اليمن، مش زيك مفلس..
نجوى ما كان تفكيرها معاهم، كل بالها عند منصور يلي قرر يرجع اليمن وهي يلي على بالها قد نسيها لمن صار أغنى يمني، وبتهديد:
_ طيييب يا منصور، كدا تسوي فيبي، الآن بوري لك..
وطلعت جوالها تشتي تتصل، سامر صاح:
_ يا اماه لا تتصليش له، بعدين ما بيردش عليك أبدًا، راعي لمن يرجع وهبي له😂
بشار: وهبي له دي اية؟
سامر كان يشتي يتكلم بس شيمَاء سبقته:
_ هبي له دي معناته استلميه امم، أعطيه حاجة زي كدا يعني..
سامر: الله الله، وطلعتي تعرفي اللهجة العدنية..
شيمَاء بغرور: أكيد، أصلًا عادك ما شفتش حاجة
نجوى اقتنعت قليل: طيب طيب، براعي لمن يجي، بعدين نتحاسب، بعدين..
شيمَاء طلعت جوالها، وفتحت الواتس طوالي وتكتب رسالة بفرح:
_ مساء الخير، ازيك؟، احنا هنرجع اليمن، بابا قرر نرجع عدن تاني، يعني بنلتقي أكيد، مستنية متى نرجع والاقيك، من جد نفسي اتعرف عليكو كلكو، كله كم يوم ونرجع إن شاء الله، بكلمك لمن نقرر..
وغلقت وهي تبتسم بفرح، بينما نجوى تتوعد لمنصور لمن يروح وتهب له😂