الفصل 3
*روايات يمنيه عربيه مميزه 🇾🇪*
*بإدارة : شـٰٓمـُـس⁞♩⁽📚🖊️₎⇣℡*
*رقم الروايه 16*
*الفصل (3) ☆*
* جرح القريب😔غريب💔*
*تفاعلوالنستمر😍* *قراءة ممتعةلاتلهكم الروايه عن ذكرالله اللهم اني بلغت اللهم فاشهد 🥹💗⃟🎀*
.
عزام: خلاص، رجعوا القصب زي ما كان، (وشاف لصاحب الدينا) وأنته انتبه مرة تانية تعترض على التفتيش، سمعتنا..
( طبعاً معروف أن باللهجة العدنية " الثاء " بالكلمات ينطق " تاء " مثلاً، اثنين، ينطقُنه " اتنين "، كمان حرف" الذال " ينطق " دال " زي " ذا " ننطقه " دا " بس أنا ما اكتبه كتير هنا لأن أحياناً احسه مش واضح، لذلك بتلاقوا بعض الكلمات اكتبه بحرف الذال أو الدال، أو الثاء اكتبه بالتاء، فلا تستغربوا 💖)
صاحب الدينا بخوف: ت..تمام سيدي تمام..
وراح عزام وطلع الطقم، والعسكر رجعوا القصب وكل واحد راح بطريقه..
@@
خلص جراح والشلة حقه الغداء، وكل واحد رجع لبيته، دق الباب وهي فتحت له، امرأة ببشرة بيضاء وحواجب مقوسين، انفها عريض وعيناها ساحرتان، وبنبرة خوف:
_ مله فين كنت يا ابني خوفتني عليك..
جراح ابتسم: مله يا أم جراح قد رسلت لك رسالة إن انا بجزع مع العيال نتغدي بالمطعم..
نوال: مله يا ابني قدك عارف إنني اخاف عليك من نسمة الهواء..
جراح دخل وغلق الباب، وباس يد أمه: ما عاش يلي يخوفك يا نبع الحنان، بس تعرفي أصحابي، حلفوا يمين إلا اروح معاهم المطعم، وأنا رحت..
نوال هزت رأسها: عادي، أهم شي إنك بخير يا روح أمك..
ودخلوا الديوان، وكانت حرمة كبيرة جالسة هناك لابسة نظارات ومرتاحة شويتين وبشرتها كمان بيضاء، ودخل جراح مبتسم:
_السلام عليككككم...
راوية بنفس الابتسامة: وعليكم السلام ورحمة الله وبركاته، حيا بابني جراح..
جراح راح وسلم عليها فوق الراس: مله فديته جدتي الغالية، كيفك يا جدة؟
راوية: الحمد لله يا ابني، فين تأخرت وخوفتنا عليك..
جراح: الييية، شكل رغد بزت جوالك يا اماه زي عادته ما قالت لكمش بالرسالة يلي رسلته للجوال
نوال جلست: والله شكله نست، قد فرحته نسنُه نحنا بكلنا..
جراح: فرحته!!، ليش أيش حصل وليش فرحانة؟
راوية ضحكت: مله البنت أعطوُنّه الشهادة حقه، وهي جت الأولى ما شاء الله
جراح فرح: من جد!!..
نوال وهي تضحك: أيوة يا حبيب أمك، وهي فارحة ولا معطية لأحد فرحته، وجلست مراعية لك متى تجي وتقول لك..
جراح ضحك: أنا بروح اشوفه الآن..
وخرج وراوية ضحكت: فديته مله، الله يحفظه، يموت على أخته..
نوال: أيوة يا اماه، الله يخليهم لبعض ويحفظهم، قد ما مع رغد بعد الله إلا هو..
راوية: على الله يا بنتي، ربنا كريم...
دخل جراح الغرفة الثاني بعد ما دق الباب، ودخل وشافها مسوية سماعات على اذونها وتغني وهي ماسكة المشط وتشوف لنفسها بالمراية وشعرها منثور على ظهرها، بنت بشرتها بيضاء انفها صغنون وشفايفها صغار وهي ثالث ثانوي حاليًا، والعصريات تدرس انجليزي في المعهد
جراح حط يد فوق الثاني ودكى للجدار وهو يشوفها ويضحك بهدوء، ويشوفها كيف تتفاعل مع الأغنية وباينة بعالم آخر، وهي ما انتبهت له، ومشى لعندها ووقف خلفها وهي كانت مغمضة عيونها وهي تغني، وهو أطول منها، وأول ما فتحت عيونها شافته يتمايل وهو يقلدها وهي شهقت بخوف ورجعت لليمين بهلع، وجراح فطس ضحك:
_ متفاعلة شكلك وبقوة...😂..
رغد بعدت السماعات ويدها على قلبها وهي ترجف: واي يا جراح قلعوا ابليسك مله، والله العظيم وقعت قلبي، واي يا ربي بموت..
جراح: الآن خفتي مني وما خفتيش يطلع لك جني اضراسه طوال ووجهه يخوف!!😂
رغد: اعود بالله منك ومنه، اوف منك، متى رجعت؟
جراح شد انفها: مله قد قلت لك بالرسالة إن انا بتأخر عند العيال ما استلمتيهاش؟
رغد شافت للجوال حق أمها: قل والله، أصلًا الجوال طيران، ما كنت اشتي أحد يعطل فرحتي..
جراح وهو يسوي نفسه مش عارف ورفع حاجبه اليسار: هممم، وأيش من فرحة إن شاء الله يلي ما تشتيش أحد يخربه؟
رغد بغرور وابتسامة: راعي قليل..
وجرت بسرعة وفرحها يسبقها، وفتحت شنطتها وخرجت شهادة منها، وضمتها وراحت لعنده وهو يشوف لها وهو يبتسم:
_ احزر أيش؟
جراح: اممم، اكيد خسرتي الرهان وفشلتي..
رغد طبعته: اعود بالله منك، فال الله ولا فالك، لا يا روح أمك، اني كسبت الرهان وجيت الأولى كمان، ودي شهادتي..
ومدتها له وهو أخذها وشافها، وهي يداتها خلف ظهرها تبتسم وهي تهز نفسها، وشاف درجاتها كاملة والمرتبة الأولى وهز رأسه وهو رافع حواجبه:
_ اوهووووو، والله قوة يا بنت..
رغد بغرور: أكيد، عشان تعرف إنك مش دكي العائلة الوحيد، حتى اني دكية..
جراح شد انفها وهي صاحت: ااااح فلت لي مله..
وسحبها لحضنه وضمها: فديته الدكي أنا، والله كفو
رغد بفرح: فديتك مله، بس هاه، لا تنساش يلي وعدتني فيبه..
جراح: ولا يهمك، دامك كسبتي الرهان وجيتي الأولى، فأنا كمان عند وعدي، وما لك إلا هدية تعجبك..
رغد بفرح ضمته: واي فديتك يا جراح، والله إنني أحبك...