35 والاخير
البارت الخامس والثلاثون " الأخير" ][
’،
جالسه ع السرير وبيدها كراستها اللي فقدتها من اول ماتزوجت . . كانت ترسم اشيا
عشوائيه تعبر عن حالتها وحياتها . . ظلت على هالحال مده بعدها تركت كراستها على السرير
وطلعت من غرفتها . . البيت كان هادي مافيه ولا صوت اكيد الكل كان بشبكه جنان بنت عمهم
على عبدالاله صديق بدر . . وهي ماحضرت مالها خلق غير الالم اللي تحس فيه بين فتره وفتره
مايريحها نزلت وتوجهت المطبخ شافت الخدامه . . اخذت علبه مويه من الثلاجه ولما جت بتطلع
من المطبخ
سوما : مدام في ابغى عشا
رغد : لا سوما مو الحين
وطلعت من المطبخ للصاله فتحت التلفزيون وجلست تقلب بالقنوات حتى طاحت على مسرحيه
لطارق العلي في قناة فنون . . انسجمت ودخلت جو مع المسرحيه فجأه حست بتقلص في بطنها
اخذت نفس وقلبها يدق بخوف وهي تمسح عليه وماعاد حست . . رجعت تكمل تشوف
بس من جديد حست بتقلص ثاني خافت . . وهذي حالتها من دخلت شهرها اي الم تحس فيه تخاف . .
الكل حاسب لها وقت ولادتها انها باقي لها حدود الشهر او اقل وتدخل شهرها ومااحد يعرف بشهرها الا نوره . .
التفتت تدور جوالها بنظراتها وماحصلته وقفت وهي تحاول تسرع بخطواتها للدرج
بعد ماحست بتقلصات غير متباعده وخلال ماهي تصعد وبنص الدرج
حست بألم خلاها غير قادره على المشي وجلست على الدرج
و كلمه ااااه تطلع منها
’،
عند متعب اللي اول ماخبره صقر عن الرحله وانه قدر يحصل رحله بعد ساعه
اخذ اغراضه وطلع على المطار وكلها كم دقيقه وركب الطياره . .
وبعد نص ساعه قضاها في الجو وصلت الطياره للرياض . . ماصدق يخلص
من اجراءات المطار اخذ له تاكسي وعلى طول طلب منه يروح لبيت ابوسعود . .
دقايق قضاها متعب بتوتر ولهفه . . كان متوتر لانه مايدري وش بتكون
رده فعل رغد . . هو متأكد ان رده فعلها بتكون عنيفه ومتوقعها بس
راح يحاول ويحاول ويحاول . . نبهه من سرحانه صوت سواق التاكسي . .
التفت وشاف بيت ابوسعود امامه . . اخذ نفس وطلب من السواق ينتظره
بما ان شنطته مازالت موجوده معه وراح يزيد له المبلغ . .
نزل متعب وتوجه للباب ضربه شوي وسمع صوت السايق
اللي اول ماشافه سلم عليه بفرحه وهو يتحمد له بالسلامه
متعب : عبدالواحد بابا عبدالعزيز موجود
عبدالواحد : لا بابا . . كلو في روه بيت بابا بندر . . جست مدام انتا
فيه اجلس هنا
متعب حس بقليل من الفرح ع الاقل جيته هنا من المطار بيقابل فيها رغد
متعب : طيب شوف انا يبي ادخل حتى يشوف مدام انا
عبدالواحد هز راسه : طيب بابا انا فيه كلام زوز انا حتى يفتح باب بيت لانتا
تابع متعب بنظراته لعبدالواحد اللي اتجه لباب المطبخ وضرب الباب
طلعت له الخدامه وطلب منها تفتح الباب لمتعب . . راح متعب للتاكسي
واخذ شنطته وحاسب ورجع مكانه . . شوي الا وعبدالواحد جايه وقال لمتعب
يروح للباب الداخلي وان الشغاله بتفتح الباب الحين . .
تقدم متعب للباب وثواني بسيطه الا والباب ينفتح
متعب : وين مدام رغد
سوما : في روه غرفه
متعب : طيب تعالي معي علميني وين الغرفه
هزت راسها ومشت قدامه . . لحقها متعب وهو يبي يركض حتى
يوصل لغرفتها بأسرع وقت . . كان كل مايقرب من الدرج يسمع
صوت خافت بس مااعار اهتمام ولما بدأيصعد الدرج الصوت يقوى
حتى انتبه للخدامه وهي تركض قدامه وتصرخ
سوما : مداام
اسرع متعب بخطواته لان سوما متقدمته بكثير بسبب سرحانه وتفكيره حتى اتضحت عنده الرؤيه
لما شاف رغد جالسه على الدرج وماسكه بطنها وتبكي من الالم . .
ركض لها متعب وتكلم بخوف ومسكها مع يدها : وش فيك رغد
رغد بألم : اااه . . متعب بطني وظهري يآلموني
التفت متعب على الخدامه اللي ابتعدت لما جلس متعب وجلست تراقب الموقف
متعب : روحي جيبي عبايه وملابس
ضغطت رغد على يد متعب وتكلمت بصوت متقطع يملاه الالم : شوف فيه شنطه سودا بالدولاب فيها اغراضي
التفت متعب للخدامه : ياللا بسرعه روحي وبالدولاب فيه شنطه اسود جيبيها معك
تحركت الخدامه بخطوات سريعه للغرفه اما متعب فكان خايف لانه عرف ان حاله رغد الحين ولاده . .
كان خايف من التأخير من متى والطلق جايها . . ليه مااتصلت على احد من اول ماحست بالالم
خايف يكون متأخر وتولد عليه قبل يوصل للمستشفى . . انتبه للخدامه اخذ منها العبايه ولفها بسرعه
على رغد اللي بين حين وحين تطلع منها ااه وتحاول تكتم المها وصوتها طلع بسرعه والخدامه تلحقه بالشنطه . .
متعب بصوت عالي نبه عبدالواحد اللي كان بغرفه : عبدالوااااااحدددد عبدالوااااااحدددد
طلع عبدالواحد بخوف من الصوت العالي : ايس فيه بابا
متعب وهو حامل رغد ومتعذب من بكاها : جيب مفتاح السياره بسرعه
ركض عبد الواحد وجاب المفتاح وشاف متعب ينتظره عند السياره ومعه سوما اللي حامله الشنطه
ضغط على زر الفتح من المفتاح حتى يفتح متعب الباب ويركب رغد ولما قرب عبدالواحد من متعب
سكر متعب باب الراكب بعد ماركب رغد واخذ المفتاح من عبدالواحد
جوال رغد من سوما وركب السياره وانطلق بأسرع مايمكن
للمستشفى وهو ماسك يد رغد اللي كل ماحست بألم ضغط على يده بأقوى ماعندها . .
وصل للمستشفى ونزل جاب كرسي لرغد ودخلوها على الدكتوره اللي امرت بتحويلها لغرفه العمليات
قابلها متعب : د . كيف ولادتها بتكون طبيعي او قيصري
د. : احنا هنحاول نولدها طبيعي بس لو ماستطعنا حنضطر نولدها بعمليه . . حاليا ان شاء الله كل شي تمام . .
بس احتياطا حتقي لك ورأة الموافقه بالعملية لو لاقدر الله . . حتى نعمل العملية سريعا
متعب : طيب شكرا د.
د.هزت راسها ودخلت الغرفه على انظار متعب اللي اتصل على البيت وطلب من الخدامه ماتعلم احد
واذا سألوها تقول نايمه طبعا بعد ماتقفل باب غرفه رغد
’،
بيت ابوبندر
الجده والعمات انظارهم على ام سعود بنص عين . . بس هي مطنشتهم ولو ماغلاة ام بندر
كان ماحضرت وجلست عند بنتها اريح لها بس ام بندر غاليه وجنان تعتبرها بنتها . .
التفتت وشافت رهف قربت منها : دقي شوفي وش اخبار رغد
رهف : يمه يعني وش بيكون حالها اكيد انها بخير ولله الحمد ولو فيها شي كان سوما دقت علينا وعلمتنا
ام سعود : مدري يابنتي بس مومتطمنه اني اخليها لحالها وهذا وضعها
رهف : اللي يسمعك يمه يقول انها بشهرها الاخير وتتحرى ولادتها ماكن باقي شهر عليها
ام سعود : ولو لاسمح اللي تزلق تحمل شي ثقيل ويصير شي
رهف : يالغاليه لاتجلسين تهوجسين ومثل ماقلت لك لو فيها شي كان شفتي سوما داقه
التفتت ام سعود بصمت ورجعت تتأمل المكان بصمت وهي تدعي ان الساعات تمر بسرعه حتى ترجع
لبيتها وتفتك من نظراتهم
’،
جالسين بمطعم وطول الجلسه نظراتها بعيده عنه . . ماتدري كيف بتطيخ عينه بعينها بعد مااكتشفت الحقيقه . .
حست بيده على يدها ورفعت عينها لها بتردد . . شافت على وجهه ابتسامه اخويه ريحتها شوي
عمر : وش فيك عبير
عبير بعد صمت : ماادري
عمر : عبير تنهدت
عبير والدمع بدا يتجمع بعينها : عمر ليه ماقلت لي ان امي ماهي امي واني كنت مغشوشه طول هالسنوات
تنهد عمر : عبير حبيبتي انا ماعرفت الا من وقت بسيط . . وكل ماكلمتك ماكنتي تعطيني فرصه
وكنت ناوي اجيك للشقه واتكلم معك طيب او غصب بس لهيت بالزواج وقلت اول ماارجع من السفر بجيك واكلمك
بس لما جيت فات الوقت ورحتي انتي واستعجلتي
عبير : طيب وامي
نزل عمر راسه وسكت : ....
عبير : وش فيك ؟
عمر : عبير فيه شي انتي ماتعرفينه
عبير بخوف : وش فيه
عمر : امك وابوك بعد ولادتك انفصلوا . . وامك تركتك عند ابوك
عبير : يعني امي ماتبيني
عمر : وقتها مع الخلاف ومن غضبها من ابوك تركتك بس الحين اكيد كل شي تغير يعني اكيد بتكون حنت لك وتبيك
عبير : تعرف وين بيتها ؟
عمر : ليه ؟
عبير : بروح لها . . بروح اشوف امي
عمر : ببحث لك عن مكانها وبقولك على كلام جدتي اول انها لما تزوجت انتقلت للامارات مع زوجها
بسأل عنها وبقولك عن اي خبر يوصلني . . الحين وانا واخوك انسي اللي فات وابدي حياة جديده
وبالنسبه لفلوس ابوك . . ابو متعب ماراح ياكل فلوس ماهي فلوسه . . اكيد انه حافظها بمكان امن
هزت عبير راسها وهي ساكته تفكر هالايام تشربت بالهم مايكفيها . . تدعي الله انه يشرح صدرها ويخفف عنها هالهم
’،
بالمستشفى
جالس على اعصابه رايح جاي . . بين فتره وفتره يرفع يده ويشوف الوقت يحس انه بطيء
يبي الوقت يمر بسرعه عشان يتطمن رفع يده لمستوى عينه ومازالت ضغطات وتأوهات رغد
والامها تتردد في مخيلته . . تنهد بقوه وهو يجلس على مقاعد الانتظاردقيقه تبعتها دقيقه تبعتها ساعه واثنين وثلاث . .
الساعه الحين ١ ليل ومابعد ولدت رغد . . رفع جواله يلهي نفسه الا بالباب ينفتح . . وقف بسرعه واتجه للدكتوره
متعب : هاه د. بشري
ابتسمت له : الحمدلله . . مبروك قالك بنت زي الأمر
متعب بفرحه : الحمدلله . . طيب د. وكيف حال رغد
د. :المدام والبيبي بخير ومااضطرينا نسوي عمليه
متعب : الحمدلله . . شكرا د.
د. : العفو . . وكلها نصف ساعة وتئدر تشوف المدام
هز متعب راسه بفرح وهو يحمد الله مسك جوالها بيدق على بيت ابوسعود بس طلعت الممرضه حامله بنته
توجه لها وشافها وهو يحس بمشاعر موقادر يحددها باسها واخذ لها كم صوره وهي مازالت متفخه بأول دقايق
لها على هالدنيا . . ابتعد حتى تمر الممرضه ببنته ورفع جواله . . دق على بيت ابوسعود يطمنهم . . ثواني بسيطه وسمع صوت
متعب : السلام عليكم
بدر : هلا وعليكم السلام
متعب واللي عرف انه بدر لان صوته فيه بحه مميزه : كيف حالك بدر
بدر بإستغراب بعد ماعرف انه متعب . . وش عنده داق بهالوقت المتأخر : هلا هلا متعب . . الحمدلله انت كيفك وكيف الاهل
متعب : نحمد الله ماعلينا خلاف . . بدر خالي وخالتي موجودين عندك
التفت بدر والاستغراب زايد عن حده وينتقل بنظراته لاهله اللي ماصارلهم وقت من جو من بيت ابوبندر : ايه موجودين . .
عندك شي متعب اقلقتني
ابتسم متعب والفرحه ماليه صوته : لا الحمدلله مافيه الا الخير بس حبيت ابشركم رغد الحمدلله ولدت وجابت بنت
بدر بإستغراب : رغد ؟؟ كيف وصلت لك وهي فوق !!
متعب : اليوم انا جيت للرياض وجيت للبيت والحمدلله جيت بوقتي واخذتها للمستشفى . . المهم اني الحين عندها
وهي والبيبي بصحه ولله الحمد . . بس اتصلت ابشركم على ان الوقت متأخر بس خمنت دام انكم كنتم بمناسبه اكيد للحين سهرانين
بدر : الحمدلله على سلامتها ومبروك ماجاك وانا خوك
متعب : الله يبارك فيك وعقبالك
بدر : الله يجزاك خير . . خلاص ان شاء الله الصبح اول مايفتحون الزياره بنكون عندكم
متعب : على خير ان شاء الله . . سلم ع الجماعه
بدر : يوصل ان شاء الله
متعب : فمان الله
بدر : مع السلامه
سكر متعب من بدر وعلى طول راح للواتس للقروب المخصص لعايلتهم هو وابوه وهبه والبنات وارسل لهم يخبرهم . .
وانهالت عليه التبريكات بالحفيده من خواته ومرت ابوه قرر الصبح ينشر الخبر لعمانه وعيالهم ويكلم جدته مع ربعه رفع راسه لما شاف الممرضه
تخبره انه تم نقل رغد لغرفه مخصصه . . تبعها ودخل على رغد اللي كانت نايمه ووجهها باهت وشعرها منتثر بعشوائيه
على الوساده وابره المغذي موصوله بيدها . . قرب منها وعلى وجهه ابتسامه هاديه قبل جبينها وخدها
وهمس لها : غلطان جيتك وانا بالحيل ندمان
وطلع من الغرفه وتوجه للحضانه حتى يشوف بنته اول ماوقف عند الزجاج بدأ يتأمل
البيبيهات وقلبه يخفق بشده تآهت نظراته بينهم . . التفتت للمرضه
اللي كانت عند الباب من داخل توجه للباب وراح لها كلمها ودخلته بعد ماتأكدت
منه وانه تبع أي بيبي . . دلته للبنت واشرت له على الكبسوله وقف فوقها
يتأملها وعينه امتلت دموع . . كانت بيضا ولها شعر أسود يميل للخفه . .
مسح دمعه طاحت على خده . . مسك الجوال مره ثانيه وألتقط لها كم صوره
وطلع من الحضانه . . توجه للمصلى في داخله مشاعر مايعرف كيف بيطلعها
ف حس انه يبي يصلي يحمد الله ويشكره على النعمه اللي رزقها له وانه يسهل له أموره
’،
اما عند ابومتعب
اللي اول ماسكر بدر السماعه هبت ام سعود بخوف : وش صاير
بدر ابتسم يطمنهم : الحمدلله ماصار الا كل خير . . ابشركم رغد ولدت
رهف : بس هي فوق
بدر : لا جاها متعب هنا واخذها للمستشفى واحنا عند عمي المهم تراها بخير هي وبنتها والحمدلله
ابوسعود وقف : يالله لك الحمد . . ياللا ياعيال قوموا نوموا ماعاد الا خير . . تصبحون على خير
الكل : تلاقي خير
راح ولحقته ام سعود . .
التفت بدر على رهف : الحين انتي وش جابك ليه مارحتي مع زوجك
رهف : وانا جالسه فوق راسك
بدر وهو يسترخي بجلسته اكثر : لا بس يااختي ملينا منك كل يوم نشوف خشتك ولو مانمني
جيتي خلاص نبي نرتاح منك ونشتاق لك مايكفي بعد شهرين او ثلاث بنقابل وجهك اكثر من ٤٠ يوم
رهف : وجع يوجع العدو وش فيك هبيت فيني . .
ضحك بدر وهو بوقف والجوال بيده : وخري بس بروح اكلم الحب كله
رهف تكلمت وهي تشوفه يمشي : اقول ترى بكره عليك دوام لاتسحبها نومه
’،
اليوم التالي . .
ضرب الباب كم ضربه وانتظر كم ثانيه وفتح الباب وهو يدخل راسه : ريدووو
سمع صوتها تطلبه يدخل . . دخل وهو يشوف كيف الغرفه عفسه . .
أحمد : يابنت وينك
ريدآ اللي كانت في غرفه التبديل : بغرفه التبديل
أحمد : أجي ؟!
ريدا :ايه تعال
راح أحمد لغرفه التبديل ولقا ملابسها مرميه حولها وهي بينهم
أحمد : أوف أوف وش هالاعصار اللي ضارب غرفتك
ريدآ وهي متمدده وبيدها قميص تقلبه : أبد والله أمس نمت بدري ولما صحيت
مروقه وكذا قلت خلني انفض غرفتي وأطلع الأشياء اللي ماابيها وانظفها
أحمد مسكها من يدها وسحبها : طيب تعالي ابيك
لحقته وهو ماسك يدها : طيب فك يدي وبمشي وراك
فكها أحمد عند الطاوله اللي بالغرفه : اجلسي خلنا نتكلم
جلست ريدا : وهذي جلسه . . وش عندك
أحمد جلس بالكرسي المقابل : بقولك على طول وبدخل بالموضوع . .
شوفي بالنسبه لخطبتك بصراحه أنا موراضي عليها من الأساس
ريدا : ليه ؟
أحمد : خلك الحين من ليه انتي تبين سلمان او عادي
ريدا : أنا قلت لك قبل اني ماكنت افكر بالزواج بس ابوي موافق ومن كلامه
حسيت انه مصمم على هالزواج
أحمد : يعني ؟!!
ريدا : أنا لو علي حاليا ماابي أتزوج
أحمد : أعتبره رفض
ريدا هزت راسها بصمت : طيب ليه ماانت بموافق على سلمان على ان الكل يمدحه
تنهد أحمد وسرح بيوم الزواج لما كان جاي للبيت حتى أجيب أغراضك اللي
طلبتها ريدا كان فيه سلمان مع أبوه واللي سمعه من كلامهم ان ابوه هو اللي طلب
من سلمان هالزواج وانه احرج سلمان وماقدر سلمان يرفض وحس من صمت
وتردد سلمان في بعض المواقف انه فعلا متوهق بهالزواج . .
أحمد : ولا شي بس انا رايي مثل راي امي
وقف أحمد : يالله انا تأخرت على الدوام أشوفك على خير . .
ريدا: ان شاء الله . .
بنفس البيت لكن بالدور الأول . .
ابوأحمد جالس ويهوجس بالموضوع . . تذكر جيه الجده له وكيف كانت قوتها وهي تتكلم معه وتطلب
منه يفركش زواج سلمان مثل مابدا ، استغرب كيف درت انه هو اللي طلب من سلمان هالزواج
وكيف خبرته ان كان وده يزوج ريدا فهي عندها الرجال المناسب اللي شاري ريدا وبيحطها بعيونه
سلمان اللي كان يعتبره ولده لأجل كذا طلب منه الزواج من بنته . . مافكر الا برغبته هذي
تذكر لما قال لسلمان عن الزواج وكيف انه تردد بإعطاءه الموافقه
يعني هذا دليل انه احرج سلمان بالزواجه بعد . . الحمدلله ان الجده درت وقدرت تفكه من الموضوع
الحين لازم عليه يكلم ريدا ويتمنى انها رافضه . . حس بأحمد اللي جلس بجانبه التفت له
أبوأحمد : وش فيك يابوك
أحمد : يبه بصراحه ريدا موموافقه على الزواج . .
حس ابوأحمد بالفرج وحمد ربه بس مابين : طيب ليه وش السبب
أحمد : ماتحس انها ارتاحت للموضوع
أبوأحمد : خلاص يابوك لها ماطلبت . . أنا بكلم سلمان وأقوله . .
ابتسم أحمد وقام باس راس ابوه : الله يخليك لنا يالغالي . . يالله بالاذن تأخرت على الدوام
رد ابوأحمد الابتسامه لولده وهو يشوفه طالع من المجلس
’،
بالمستشفى
فتحت عينها بتعب وهي تحس بألم في جسمها رجعت تغمض وتفتح عينها وهي تتأمل السقف بدون استيعاب
التفتت على جنب وشافت متعب جالس على الكرسي ومكتف يدينه ونايم . . صدت عنه وهي تحاول
تستوعب المكان كله وليه هي هنا ومع متعب . . انتبهت على بطنها ومسحت عليه وهي تتذكر اللي صار
لما جلست بنص الدرج بعدين شافت متعب اللي ماتدري وش جابه ولما حملها وجابها هنا
هي ولدت وجابت بنت تذكر الدكتوره لما شالت البيبي أول ماسحبتها وحطتها امامها وأول ماشافتها
ارتسمت ابتسامه هاديه على شفاتها بعدها بكم دقيقه ماعاد حست بشي لأنها راحت بنوم عميق بعد
التعب والمجهود اللي بذلته . . حمدت ربها بسرها على انه كتب لها عمر حتى تشوف بنتها
وتتعذر من أمها على اللي كانت تسويه لها . . بعد الآلآم الفضيعه اللي حست فيها أمس وقت الولاده
انتبهت على تحرك متعب وعلى طول غمضت عينها . . ماتبي تشوفه . . كل اللي تبيه الحين واللي تبيه
تشوفه هو شخص واحد . . امها . . تحس انها تبي تبكي ماتدري ليه . .
حست به قرب منها وقامت دقات قلبها تزيد . . حست بقبله رجفت من خلالها جفنها
وأنفاس ساخنه قريبه من اذنها
متعب بهمس : الحمدلله على سلامتك حبيبي ومبروك ماجبتي
واستدار متعب طالع من الغرفه بعد ماحط جوال رغد على الطاوله اللي بجانب السرير
فتحت عينها لما سمعت صوت الباب وشافت الغرفه خلت . .
مسكت جوالها وشافت الوقت كانت تشير على 9 دقت على بيت أهلها
تبي تكلم أمها تطلبها تجي . . تبي تطلع اللي بداخلها حتى ترتاح
أما عند متعب اول مافتح عيونه اللي طاحت على عين رغد الصاحيه بس بجهه ثانيه . .
تحرك ولما شافها تغمض عينها بسرعه حز بخاطره وتضايق بس حاول يهون على نفسه
انه يستاهل اللي يصيرله وماراح يلومها . . قرب منها وقبلها وهمس قريب من اذنها
وطلع من الغرفه وراح لدورة المياه يغسل وهو يحس بصداع فضيع في راسه . .
خاف ان النوبه اللي تجيه بين فتره وفتره تصيبه عاد الحين ماعنده صقر حتى يسعفه . .
أخذ نفس وهو يطلع وصادف له وهو راجع لغرفه رغد آله مشروبات . .
أخذ له كوفي ومويه وهو يحاول يتحامل على نفسه بس يبي حتى يوصلون
أهل رغد ويسلم عليهم وبيروح يآخذ له فندق يرتاح فيه . . جلس بالكراسي القريبه
من غرفه رغد وهو يشرف الكوفي . . خلص منه وهو مازال يحس بهالصداع تنهد
بيلجأ لطريقه ثانيه . . وقف بسرعه ومشى بخطوات سريعه برى المستشفى لما طلع وقف على جنب
ودخل يده بشنطته الصغيره طلع بنادول اخذ له حبتين واكلهم وطلع باكيت السجاير والولاعه
أخذ وحده من3 وابدأ يدخنها تبعتها ثانيه وثالثه رمى الباكيت بعد مافضى بالولاعه
ودخل المستشفى من جديد بعد ماحس ان الصداع خف عن أول . . صحيح موكثير بس بدرجه
يقدر يسيطر على نفسه فيها . . ضرب باب الغرفه بعدين دخل . . شاف رغد والبيبي معها
ابتسم على أشكالهم كان وده يآخذ صوره لهم كذا . . قرب لرغد وجلس على نفس الكرسي
اللي كان نايم فيه . .
بعد ماقربه : حاطه ببالك اسم لها ؟!!
رغد سكتت هي بالاول كانت تفكر بإسم "ريم " بس بعد ماجلست مع رهف اللي حلفت
أنها تكون أول من يسمي بهالاسم ومااحد يسمي قبلها . .
قالت بعد صمت طويل نسبيا : لين
متعب اللي كان سرحان فيها وهي ماسكه البنت ساحرته فلا اراديا
أخذ جواله وصورها بدون لاتحس وجلس يتأمل من جديد أول ماتكلمت فاق
من تأملاته بس ماسمعها زين : نعم
التفتت عليه رغد : أقولك لين
ابتسم ووقف وقرب منهم وحط يده على كتف رغد وقربها حتى لصقت فيه : أحلى اسم . . الله يجعلها باره ومن حفظة كتابه
جمدت رغد من قربها وماردت ، سمعوا صوت ضرب الباب وهذا الشي خلى متعب يبتعد
عن رغد وهو يقول : تفضل
انفتح الباب وشاف ابوسعود وام سعود وسعود وبدر : دخلوا وسلموا وهم يتحمدون بالسلامه
لرغد . . ويتأملون البيبي
وقف متعب بعد ماحس ان لصداع بدا يرجعله من جديد . . لازم يطلع ويرتاح بأسرع وقت
قبل يطيح بينهم . . الكل التفت له لما وقف
أبوسعود : وين ياولدي
متعب بإبتسامه باهته وبصوت انبح من التعب : ابد ياخال بس بروح ابدل ملابسي واريح شوي
وأرجع
ابوسعود : الله يحفظك ياولدي . . رح للبيت بالملحق ونام هناك وخذ راحتك بالنوم من أمس وانت
سهران وأكيد انك تعبان
متعب : لا يالغالي بروح لفندق وبرجع ان شاء الله
ام سعود : أفا يامتعب تروح لفندق وبيتنا موجود
متعب اللي اضطر يكذب : لا ياخالتي بس انا ماجيت لحالي جاي معي نسيبي
وصعبه اخليه . .
قرب متعب من رغد وباس راسها وهمس لها : اذا تبين شي اتمنى تدقين علي . .
وبصوت عالي : يالله بالاذن
الكل: اذنك معك
طلع متعب وهو يحاول يسرعه بخطواته . . حس بأحد يناديه
التفت : هلابدر
بدر: تعال اوصلك اكيد مامعك سياره
متعب : مايحتاج بآخذ تاكسي . . لأني بمر بيتكم بآخذ اغراضي
استغرب بدر وش يجيب اغراض متعب لبيتهم دام انه جاي مع رفيقه
واكيد حاجزين فندق مااهتم : تعال يارجال عادي ماوراي شي بوصلك لبيتنا تاخذ شنطتك
بعدين نروح للفندق
متعب بقله حيله : ياللا
طلعوا وراحوا لبيت ابوسعود واخذوا اغراض متعب وراحوا لفندق اللي يتعاملون
معه عايله ابومتعب لما نزل متعب ارسل لصقر يطلبه يجي
لأن متعب يخاف انه يتعب زياده وهو لحاله
العصر
فتح عينه بعد معاناه . . متى قدر ينام يحس بأرق موطبيعي مانام الا بعد مااكل
حبوب منومه اخذ نفس وقام للشنطه وهو يتمايل بمشيته وهو يحس بغثيان . . يحتاج كميه راحه كبيره . .
يبي اموره تمشي مثل مايتمنى . . يبي ترجع علاقته مع ابوه مثل اول
ومع زوجته وبنته اللي خذت قلبه من اول ماطاحت عينه عليها . .
اخذ فوطه وملابس واخذ له شاور وطلع يصلي لانه نام نومه وحده بسبب المنوم . .
بعد ماخلص ولبس مسك جواله وشاف اتصالات من صقر بس مارد عليه لانه حاطه صامت . .
دق عليه وعلى طول رد صقر بخوف : الوو متعب انت بخير
متعب : هلا صقر ايه الحمدلله بخير
صقر : الحمدلله . . طيب وينك ماترد حرقت جوالك
متعب وهو يتعطر : كنت نايم والجوال صامت
صقر : شخبارك الحين
متعب : الحمدلله
صقر : والصداع ان شاء الله اخف
متعب : والله ياخوك يمسكني شوي ويخف
صقر : الله يهديك يعني كم مره اقولك لاتجهد نفسك انت كأنك ترتاح لما تتعب . .
لما ترجع للدمام بنسوي فحوصات من جديد لراسك نشوف وش وضعه مع هالصداع
المهم قولي الحين كيف وضعك
متعب اللي خرج من الغرفه : لما يكون شي بيدي قولي الحين الحمدلله احسن
صقر : زين انا كلها ساعه واكون عندك
متعب : خلاص انا الحين بروح للمستشفى عند الأهل وانت عارف الفندق نفسه . .
اخذ غرفه ثانيه لي ولك وانا لما اجي بكنسل هذي وانتقل معك
صقر : طيب يالله اشوفك
متعب : على خير ان شاء الله
’،
بالدمام
ابواحمد كان مجتمع مع سلمان
ابواحمد: شوف ياولدي انا افكك الحين من الخطوبه انا عارف اني احرجتك وماالتفت لرغبتك
سلمان : لا ياعمي لاتقول كذا . . انا يشرفني اني اكون زوج بنتك
ابواحمد : لاتجاملني ياسلمان انا غلطت واعترف بهالشي بس كنت ابي أأمن لبنتي وكنت اناني
لما شفت الشي اللي انا ابيه وماالتفت لرغبتك ولا لرغبه بنتي
سلمان سكت ماعرف وش يقول
ابواحمد : شوف انا الحين بنشر خبر فك الخطبه بين العايله وانت حلفتك بالله ان مااحد يخطب لك
غيري شوف البنت اللي تبيها وكلمني ياولدي واروح اخطبها لك انت ولد فهد ولد الغالي
قام سلمان وباس راس ابواحمد : الله يخليك يا عمي . . بس بالله ياعم لما تنشر خبر الخطبه
قول ان ريدا هي اللي رفضتني ولاتحطها مني . .
ابتسم ابواحمد بفرح : الله يرزقك ياولدي
’،
دخل المستشفى ومعه باقه ورد بما انه ماجاب شي الصبح . . كان شايل هم ان اهلها
يكونون عندها يبي يختلي لو نص ساعه بها بس هذا من سابع المستحيلات . .
وصل عند غرفتها وضرب الباب . .
ثواني بس وانفتح الباب ابتسم متعب بمجامله لما شاف سعود . .
سعود وهويسلم : هلا بالنسيب . . مبرووك مبرووك ماجاك تتربى بعزك ان شاء الله
متعب : هلابك . . الله يبارك فيك وعقبالك ياارب
سعود : الله يسمع منك . . انتضر بس ثواني اخلي لك الغرفه من الشعب حتى تدخل بس هاه لاتطول . .
احنا بنروح نحومي في انحاء المستشفى وبعدها بنجي
ضحك متعب : ههههههه الله يجزاك خير
دخل سعود داخل الغرفه وابتعد متعب على جنب الباب شوي الا وسعود وبدر وامل ورهف
ونوره وام بندر وام سعود طالعين من الغرفه . .
سلم بدر على متعب وسعود قاله سعود : يالله الحين الجو امان بس هاه لاتفلها
متعب : رح بس رح وحاول تطول
ودخل داخل الغرفه وسكر الباب تقدم بخطوات هاديه شاف رغد حامله البنوته بين يدها
ومركزه بنظرها عليها
متعب وهو يحط الورد على الطاوله اللي بجانب السرير : السلام عليكم
ردت رغد بهمس : وعليكم السلام
متعب بعد ماباس جبينها : كيفك الحين
رغد: الحمدلله
جلس متعب ع الكرسي وهو يشوف رغد اللي من اول مادخل مارفعت عينه له
كل نظرها موجه للبنت . .
مد متعب يده وطلب منها تعطيه البنت : عطيني ليّون
مدتها له . . حملها وحطها بسريرها الموجود بجانب سرير رغد ورجع يجلس ع الكرسي
ومد يده ومسك كف رغد . . بس رغد افلتت كفها منه وقف وجلس على السرير مقابلها ومسك
يدينها الثنتين بيدينه
وهمس لها : رغد
بس رغد مارفعت راسها ولا جاوبته . .
فلت متعب يد وحده ومدها لذقن رغد ورفعه . . حتى طاحت عين رغد بعينه . .
متعب : رغد انا ماني عارف وش اقولك وكيف اعتذر لك بس انا
رغد مقاطعته : متعب . . ماعاد بيننا شي
انصدم متعب ابد ماجا بباله ان رغد تنهي الامور بينهم وتصده : رغد مايصير . . احنا بيننا حياه عشناها
مع بعض بيننا ليون بيننا ايام بنعيشها
رغد : ايام كانت بالماضي وماراح ترجع
متعب : رغد عطيني فرصه
رغد : اسفه لايمكن اضيع ايام جديده من حياتي معك
متعب توه بيتكلم الا وصوت الباب ينضرب اللي قطع عليه . . وقف بيروح يفتح الباب بس سمع جمله
من رغد خلته يوقف وهو مبلم ومصدوم لهالدرجه هي ماتبيه وقف يستوعب جملتها اخذ نفس وزفر
بضيق ووجه منقلب . . كمل طريقه للباب
’،
مرت الايام سريعه ع البعض وبطيئه ع الاخرين
اسبوعين مروا . . وحاله متعب سيئة . . اخر مره شاف فيها رغد كانت بالمستشفى بعدها نفذ طلبها
كانت جملتها تدور في مخيلته ومافارقته يحاول قد مايقدر يشغل نفسه بأي شي حتى مايفكر بجملتها اللي حطمته
وحطمت امال كان بانيها برجوعها جمله حس فيها من الكره الكثيييير جمله كانت امنيه برفض بجيته من جديد وشوفته . .
جمله مكونه من ٤ كلمات لكن كل كلمه احتوتها هالجمله قاسيه عليه
جمله كانت ( ياليت ماعاد اشوف وجهك ) . .
نفذ رغبتها يكفي اللي سواه طوال هالسنه فيها ماله اي حق يعترض . . اللي سواه مو شوي . . بعد خروج رغد من المستشفى
اخذ الأغراض اللازمه لبيت اهلها
(اغراض البيت هنا هي عاده موجوده عندنا مااعرف لو موجوده بس بمنطقتنا او بالسعوديه
او بباقي الدول . . بوقت النفاس "الـ ٤٠ يوم " الزوج يشتري اغراض للبيت من مأكولات مثل الرز وطحين والفاكهه وغيره . .
يعني كأنه شاري أغراض لبيته بس يوديها لبيت اهل الزوجه بحكم ان زوجته هناك . . يارب انكم فهمتوا ^_^ )
وبعدها جلس كم يوم بالرياض خشيه من ان رغد تحتاج شي وكان يتأمل انها تدق عليه بس للأسف كان يدق عليها
وماترد فيضطر يدق كذا مره حتى تتكرم وترد عليه بنفس شينه تخليه ينحسف على انه دق . . بعدها قرر انه يرجع
للدمام بما ان جلسته مالها اي فايده بس اجل مواعيد مرضاه ومااستفاد شي
’،
اما رغد فكان جايتها قسوه قلب ماتدري من وين . . كانت تحن على متعب بس فجأه اول ماتشوف رقمه
او تسمع صوته تنقلب . . بنتها لين كانت تحاول تلتهي معها وماتفكر كثير ب متعب لانها لحد الحين
مصممه على رايها . .
’،
بالدمام
ابواحمد فعلا سوا اللي اتفق عليه هو وسلمان ونشر خبر فك الخطبه بنفس اليوم اللي تم الكلام
فيه الكل كان مستغرب ويسأل بس كان اجابتهم ان ربي ماكنب نصيب بينهم
الجده كلمت بسمه على طول بموضوع سامي وريدا . . لانها ماراح تنتظر اكثر تخاف هالمره يجي
واحد ثاني لريدا ويتم الموضوع ويروح سامي من بين يديهم وبسمع واعدتها خير . .
’،
اما عند عرسانا . .
ليلى واحمد حياتهم هاديه ومن اروع مايكون
دينا وعمر . . دينا كانت تلاحظ على عمر في بعض الاحيان شرود وكثيره اتصالاته بعبير وهذا الشي
كان يشب غيره فيها بس تحاول تخمدها وتقول بنفسها انها اخته وعليها حق لكن ماكانت تقدر تطنش
وكذا مره تتأثر بهالغيره ويتكر مزاجها . . عمر اللي لازال يبحث عن ام عبير ويكلم ناس يعرفهم
يساعدونه بالبحث ولحد الان مافيه اي نتيجه لبحثهم هذا
’،
بيت ابومتعب
الكل متحمس يشوف الحفيده الاولى بهالعايله واغلب كلامهم يكون عنها وماكانويدرون وش الاحداث
اللي صايره واللي صارت بخفاء عنهم . .
ابومتعب لازال على معاملته مع متعب وتطنيشه له وهذا مأزم متعب زود كذا مره حاول يراضيه بس
ابومتعب يصده وماكان يرد عليه او انه يطرده من المكان اللي هو فيه طبعا يكون بالبيت
متعب اللي من بعد مارجع من الرياض وكل وقته بالشغل ارهق نفسه فيه ماكان يبي يجلس ويفكر ويهوجس . .
فكان احيانا يضطر ياخذ شفتين مابينهم ايام كثيره يبي اول مايرجع ينام من كثر التعب بس ماصار هالشي . . الهالات السودا زادت . . شحوبه واصفرار الوجه نحافه الجسم بسبب سوء التغذيه والمشاكل والضغوط النفسيه
للي واجهته . .
صاير كثير التدخين بشكل موطبيعي الباكيت يادوب يكفي يوم . . وهذا الشي ادى بإنه يروح للطبيب اللي فحصه
بالمره الاولى . . ويراجع عنده . .
د. : لأه دا مش معؤول اللي بتعمله بنفسك يامتعب
متعب : وش فيه
د. : انت فاكر المره الأولى اللي قيت واكتشفنا ان فيه جزء بسيط من وظائف الكبد متعطله
متعب : ايوه
د. : ولكده صرفت لك ادويه مدره لإخراج الفضلات من القسم "الجسم " لفتره معينه وتركناها بعد كده
متعب : طيب وبعدين
د. : دا انتا حاليا محتاقها وبشده كمان . . الكبد حاليا ضعيفه أوي ولابد من مساعدات حتى تخرق السموم من القسم . .
وانا بؤول لك احتمال لو استمريت كده راح يصيبك امراض اخطر لاسمح الله وانتا عارفه أمراض الكبد ايه هيّ . .
متعب ياابني دا انتا دكتور بسم الله ماشاء الله وعارف خطوره التدخين وعلى القسم والامراض اللي بتسببها انت كده
بتكون بايع نفسكل ما بتاخدها . . والقسم ليه حق عليك ياابني . . عموما حصرف لك دي المره حبوب مدره للفضلات . . لكنها حتكون بشكل اقوى لان حالتك دي مش حتفيدها
الحبوب الخفيفه اللي كنت تستخدمها . . ولابد تقيني بعد شهر حتى نتأكد اكتر واكتر ونشوف حنعمل ايه بعدها
’،
سليمان في باله موضوع ومتردد فيه مثير . . امه كانت تشجعه على هالشي بس التردد كانه منه
هو بسبب خطبتهالاولى لحد ماقالت امه ان اللي صار قيمه ونصيب وربي رايد لك هالشي
الا لخير لك توكل على الله ونفذ اللي ببالك . .
بعد شهر
في مجلس بيت ابومتعب
كان متعب وصقر وابو متعب موجودين مع ابو احمد وسلمان الكل مستغرب من هالجيه
وينتظر تفسير لها حتى تكلم ابومتعب
ابومتعب : وش فيك يا ناصر
ابواحمد : ابسألك سؤال يابومتعب
ابومتعب : تفضل
ابواحمد : وش قولك عن سلمان
أبومتعب : رجال والنعم فيه والكل يشهد له ويكفي انه مارضى عن الغلط ووقف مع الحكومه
بقضيتك ودلهم على المجرمين
تنهد سلمان براحه . . هذا كلام طيب وبدايه جميله
تكلم ابواحمد وهو مبتسم بعد ماسمع تنهيده سلمان : اجل ياخوي احنا جايينك هنا اخطب بنتكم ليان لولدي سلمان
فز متعب : وشووووو
نظر له ابومتعب بقوه خلاه يرجع يجلس وهو ساكت
ابومتعب : والله سلمان رجال بس اذا ربي كاتب له نصيب عندنا فهو بياخذه
ومهما صار سلمان بيبقى ولدنا
سلمان وهو مبتسم : الله يخليك ياعم
وقف ابواحمد وسلمان واستأذنوا خارجين . . كل هذا ومتعب ضاعط على يده بقوه يحاول
يكتم غيظه من هالسالفه ماباقي الا هالسلمان ياخذ ليان . .
بالمجلس ماباقي الا صقر ومتعب اما ابومتعب فهو خرج حتى يوصل ابواحمد وسلمان
صقر : اهدا ياخوك وش فيك
متعب بغيض وحرقه داخله : وش فيني هذا كان له علاقه بمجرمين وجاي بكل قوه عين يخطب
لو تنطبق السما ع الارض ماتاخذه ليـ. .
قاطعه صوت ( ومن انت حتى تقرر تاخذه او لا )
التفت متعب على ابوه : انا اخوها
أبومتعب ببرود : لما تكون بنتك قرر بكيفك اما هنا وبهالبيت مالك راي ولاكلام " وخرج تاركهم بالمجلس "
صقر ناظر متعب بخوف من قوه الكلام ينتظر منه رده فعل . . بس متعب كان متجبس . . هذا الشي فوق
طاقه كل شي يصير ماعاد يقدر يستحمله . . غلطه وحده قلبته فوق تحت قلبت حياته مع زوجته وبنته
ومع ابوه ومع جسده ونفسه التعبانه . .
شهيق وزفير شهيق وزفير هذا اللي سواه كأنه بهالشهيق والزفير يقلل من الهم اللي جاثي على صدره
واللي يحسه بيوم بيذبحه . . كان يقول بنفسه مايكفي يايبه الكلام اللي سمعته من الدكتور قبل كم يوم
مايكفي علي حياتي المشتته جيت تكملها علي انت . . جيت تنهيني
خطوه ورى خطوه تبعتها خطوات سريعه من متعب اللي توجه بسرعه لسيارته . .شغلها ومشى بها بسرعه
مااهتم لنداءات صقر ولا لمحاولاته في انه مايحرك السياره بعد ماركبها وهو يخبط على الشباك حتى يفتح له . .
كل هذا مااعاره متعب اي اهتمام خرج من البيت بسيارته وبدون اي تفكير مسك خط الخروج من الدمام للرياض
اخذ جواله واتصل على رغد مره ومرتين وبالثالثه تكلمت بتفس النبره اللي تعود عليها بالفتره الاخيره
رغد : نعم
متعب كان بس يبي يسمع نبره ثانيه النبره القديمه اللي تطفي حرقته وقهره : وش انا بحياتك
رغد ماتوقعت سؤاله فسكتت
متعب اعاد سؤاله : وش انا بحياتك
رغد نطقت بدون تفكير همها بس تجرحه : ولا شي
ابتسم متعب بألم : حلليني يابنت الناس
رغد بخوف : وش فيك
متعب : حلليني بفعايلي فيك يابنت الناس
رغد : متعب " ألووو متعب وينك "
بس متعب بعد كلمته الأخيره سكر السماعه . . ماكان يبي يسسمع شي ينهيه فسكر السماعه على طول
لو تدرين يارغد قد ايييش فقدتك واشتقت لك. . حتى لما كنت مع عليا ماكنتي تغيبين عن بالي . .
بس كنت اكابر بشوقي ولهفتي وليتني ماكابرت . . اعترف لك بإعتراف كنت مخبيه بصدري حتى عن
صقر . . معك حسيت بشعور لذيذ ماحسيته مع اي شخص كان ودي اني دوم تكونين تحت ناظري واتأملك
لكن اصراري على اني احب عليا كان حاجز بيني وبين نفسي واعترافي لو تتخلين
قد ايش أتمنى بس أرجع الزمت لورى حتى أعوضك واعوض نفسي عن كل شي
هدأ من سرعته لما حس ان الصوره امامه بدت تكون ضبابيه وماهو قادر يركز فيها . . وضربات قلبه
يحسها غير منتظمه . . أول ماوقفت السياره مسك جواله بيده المرتجفه البارده وهو يحاول يمسك نفسه لأنه يحس
انه راح يغمى عليه حاول يفتح الجوال ويدق لكن طاح الجوال من يده وارتخى جسمه على الدركسون
وضاغط على "بوري -هرن" السياره مما سبب صوت مزعج للماره
’،
بيت ابومتعب
البنات كانوا يخططون على روحه رغد ووش راح ياخذون . . لأنهم ماراحولها الا بيوم سابع
ولاعاد راحوا لأنهم ماقدروا بسبب انشغال الرجال . .
لينا : شوفي انا رحت مع صقر وشرينا غوايش ذهب لليونه
"الغوايش هي الاسواره الذهب اللي تكون دائريه كامله
اللي مافهم يروح لقوقل ^_^ "
مع حلق وسلسه ورحت سويتها بمجسم مع مبلغ من الفلوس . . راح تكون مني ومنك
لرغد وليون
ليان : الله يعافيك والله كنت شايله هم وش اعطيها زين انك حسبتيني معك
لينا : ان شاء الله اليوم قبل مانمشي للرياض بمر واخذها ونمسك الطريق
ليان : الا متى راح نمشي
لينا : على كلام صقر العشاء ان شاء الله نصلي ونمشي
’،
صقر اللي دار الأماكن اللي يتوقع انه يلاقي متعب فيها بس للأسف ماحصله
مسك جواله بمحاوله يائسه ودق عليه مره ومارد لما دق بالمره الثانيه انفتح الخط
تكلم صقر بفرحه : متعب وينك الله يهديك أقلقتني عليك
..: اخوي انت تعرف صاحي هالجوال
خاف صقر من هالمقدمات المعروفه : ايه وش صار
..: والله قبل شوي نقلنا صاحب الجوال للمستشفى . .
صقر بروعه : متعب صار له شي
..: لا ان شاء الله مافيه الا العافيه تعال بمستشفى الـ... وتحصله
صقر: ان شاء الله تسلم
سكر صقر ومشى بسرعه دقايق ووصل للمستشفى دق على جوال
متعب ورد عليه نفس الشخص اللي قاله بالمكان . .
راح صقر للقسم اللي قاله الشخص . . وشافه واقف متسند على الجدار وبيده الجوال
ركض له صقر
صقر : السلام عليكم
التفت له وتعدل : هلا اخوي وعليكم السلام
صقر : أنا الشخص اللي كلمتك
مد يده : هلا اخوي . . معك ابراهيم
صقر : هلا اخ ابراهيم . . وش صار وش اخبار متعب
ابراهيم : والله يااخ صقر انا كنت ماشي من طريق الدمام متوجه للرياض
ولاحظت سياره متعب موقفه على جنب والفليشر مولع في البدايه مااهتميت بس
استغربت لما سمعت صوت بوري السياره فوقفت وشفت متعب متسند على الدركسون
صقر بخوف : صار له شي
ابراهيم : الحمدلله الاسعاف جا ونقله ومافيه ان شاء الله الا العافيه
صقر :مشكور اخوي
ابراهيم : ولو واجبي
راح ابراهيم وصقر وقف اما الغرفه متوتر وخايف مايدري وش حال متعب
كلها دقايق وطلع لدكتور . . راح له صقر
صقر: هاه د. بشر
د. المريض حالته جدا سيئة الاغماء اللي حصله كان بسبب انخفاض شديد بضغط
الدم . . والحمدلله ما أدى الى الوفاه أو غيبوبه لاقدر الله . . حاليا راح يكون تحت الملاحظه
ونتابع حاله خلال ال48 ساعه المقبله . . ونحاول نعدل مستوى الضغط عنده
صقر: يعني مافيه خطر عليه
د. مااقدر اجزم لك بشي بس الحين نقول ان شاء الله ان الامور تمام
صقر : أقدر اشوفه
د. ايوه بس بهدوء ولدقايق قليله
صقر : شكرا د.
د. العفو . .
راح صقر ودخل على متعب اللي كان الجزء العلوي من صدره مكشوف وأسلاك مشبوكه
فيه . . مع الأكسجين . . وملقى على السرير بدون حركه
وقف صقر فوق راسه ومسح على شعر متعب والدموع ملت عينه من حال صديقه واخوه
باس صقر جبينه ودعا أستودعتك الله . . وطلع من عنده وطلب اخلاء لمتعب
وخلال ساعه . . كان متعب بالمستشفى اللي يشتغل فيه بس بمسمى مريض
’،
بالامارات . .
حطت الطياره اللي كانت تحمل عمر وعبير للأراضي الاماراتيه
عمر بعد بحث طويل قدر يحصل عنوان بيت أم عبير واللي عرف من خلاله
ان امها تزوجت امااراتي وتوفى وأنجبت منه ولدين وبنت . . أكبرهم بعمر الـ20
عبير كان في داخلها شعور من الخوف بعدم قبول امها لها بعد مشكله ابوها
كانت مقرره لو امها قبلت فيها وضمتها بتجلس معها . . لأنها تبي تغيير جذري بحياتها
و تمحي كل الأيام اللي فاتت بحلوها وبمرها تبي تعيش عمر جديد مع امها واخوانها
وكم تأمل بهالشي . . والدليل بتغييرها ابتدت أول شي بالحجاب الكامل اللي لبسته مع غطاتها
وصل التاكسي أمام بيت كبير حط عمر يده على كتف عبير ينبهها
عمر: عبير
عبير ارتجفت وحست بشعور مخيف ، توكلت على الله ونزلت من السياره
نزل عمر بعد ماحاسب التاكسي ومسك يدها يشجعها وقف أمام الباب وضرب الجرس
وبعد مكالمه من الخدم والحارس سمحوا لهم بالدخول . .
عبير كل خطوه تخطيها يرجف معها قلبها تأملت بديكور الصاله الفخم
جلست على الكنبه بجانب عمر ورجلها تهتز بتوتر . . مسك عمر كفها وضغط عليه
التفتت له بعيون تايهه . . سمعوا صوت سلام ينبههم ويقطع تواصل الأعين اللي حصل
التفتوا كلهم وشافوا امرأه شكلها صغير بالعمر . . فيها من ملامح عبير الكثير كانت
لابسه عبايه ع الكتف ولافه حجاب محكم . .
عمر : الشيخه فاطمه ؟
فاطمه : وصلت منو انتو
عمر : كيف حالك الشيخه فاطمه
فاطمه : الحمدلله بس ماقلت منو انتو
وقفت عبير اللي خلعت الغطاة وعيونها مليانه دموع بعد مالاحظت الشبه الكبير بينهم : يمه . .انا عبير
جبست فاطمه بمكانها ودقات قلبها ارتفعت . . قطعت الأمل للأبد في انها تشوف بنتها اللي تركتها
مع زوجها الأسبق بضغط منه . . كم مره راحت له وترجته تشوفها بس كان يرفض
حتى هاجرت من السعوديه وبنت لها حياه جديده هنا مع زوج جديد وأسره جديده
وقفت فاطمه ومدت يدها تطلب عبير بحضنها : عبير يمه بنتي
مشت عبير بسرعه وطاحت بحضنها ودخلوا الثنتين ببكاء عميق
بعد فتره من الزمن
عبير جالسه بجانب أمها
عبير : ليه يمه تركتيني ورحتي
فاطمه : والله يابنتي موبيدي ابوك أجبرني على هالشي كل مره اطلبك فيها كان يرفض حتى
تركت السعوديه بكبرها لما قطعت الأمل بأني أشوفك من جديد
عبير توها بتتكلم الا قطع عليهم دخول شاب : سلاام عليكم
فاطمه : تعال يامازن شوف اختك عبير اللي رمست فيها
اقترب مازن من امه : اميه شو تخربطين كيف عرفتي انها بنتج عبير
فاطمه : ايا جليل الحيا هاي رمسه تقولها لأمك أنا أخربط
مازن باس راسمها : السموحه يالغاليه بس كيف عيل عرفتي انها بنتج
فاطمه هي تخبطه على راسه : من اسمها يالثول
مازن حك راسها ووقف : آسف أميه . . "التفت على عبير " اهلا اهلا بأختيه حبيبتي
ضحكت عبير : هههههه هلا بأخوي
مازن : شو اخبارج
عبير : الحمدلله انت كيفك
مازن : بخير عساج بخير
عبير : مازن شوف هذا اخوي عمر بالرضاع
مازن وهو يسلم على عمر : هلا بأخو أختي
ابتسم عمر : هلابك
وبعد التعارف وترحيب ام عبير فيهم تطمن عمر ان عبير الحين بأيدي أمينه
وانها راح تبتدي حياه جديده بالامارات . . سلم عليهم واخذ تاكسي
يرجعه للمطار حتى يرجع من جديد لدار أبوفهد
’،
بيت أبومتعب
الكل كانوا ينتظرون صقر حتى يمسكون طريق الرياض . .
وقف ابومتعب : لينا دقي على زوجك واخوك خلهم يجون تأخرنا
لينا : ان شاء الله يبه
دقت لينا على صقر بس مارد ودقت مره ثانيه واعطاها مشغول
استغربت . . توها بتتكلم الا سامينا داخله تطلب من هبه وليان يتغطون عشان صقر بيدخل
وقف ابومتعب: لا وشوله يدخل احنا بنطلع له
تو ابومتعب مكمل جملته الا ونحنحه صقر
صقر بصوت متغير : ياولد
تغطت ليان وهبه
لينا : ادخل صقر
دخل صقر والكل خاف من حالته . . عينه حمرا وذابله . . وقفت لينا بخوف
لينا : وش فيك صقر
صقر توجه لأبو متعب : كيف حالك ياخال
ابومتعب حس بخوف وفجأه : متعب وينه
غمض صقر عينه وزفر : متعب ان شاء الله انه بخير
لينا : متعب صار له شي تكلم صقر
صقر : متعب تعبان شوي وهو الحين بالمستشفى
شهقه انطلقت من الجنس الأنثوي الموجود بالصاله . . أما ابومتعب حس بالدنيا تدور
فيه . . اليوم الظهر دخل عليه المكتب وطلب السماح منه بس ماالقى له بال وطرده كَ العاده من المكتب . .
اليوم العصر كان عنده وسمعه كلام زي السم ومااهتم لحال ولده ولا لقوه تأثيره
أبومتعب بتأثر وحزن : وش من اخبار ياولدي
صقر : ابد ياخال بس اهمال لنفسه سبب له انخفاض بالضغط وهو الحين بالمستشفى . . لاتخاف
بسيط ان شاء الله بس يبي له كم يوم نتأكد من حالته وصحته
ابومتعب : لاحول ولا قوه الا بالله . . يارب صبرني يارب صبرني
أما البنات فقاموا يبكون متعب يبكون اخوهم اللي دوم كان همه رضاهم واسعادهم
ولما كل وحده ارتاحت . . ماعاد سألت عنه ولا عن حالته السيئه اللي كانت واضحه وأمام اعينهم
’،
باليوم التالي . .
الصبح . . رغد قامت تتجهز لخوالها "حمولتها" كانت متحمسه لهم من زمان ماشافتهم
وماشافت متعب تبي تشوفه اليوم لو لمحه . .
نزلت تحت وشافت وجه بدر متغير وامها وجهها واضح انها كانت تبكي خافت ودخلت بسرعه
رغد : وش فيكم
لما نطقت رغد بهالكلام دمعت من جديد عين ام سعود
رغد بخوف : يمه وش صاير
ابوسعود : اجلسي يابنتي ماصار الا الخير
رغد التفتت لأبوها: كيف ماصار الا الخير وامي تبكي
أبوسعود : يابنتي اجلسي وتفهمين كل شي
جلست رغد بجانب بدر : هاه يبه وش صار
بدر لف يده على كتفها قبل ماينطق ابوه
أبوسعود : يابنتي رجلم متعب بالمستشفى
شهقت رغد بخوف وبهمس : كيف
ضمها بدر : يااختي ان شاء الله بخير هدي
رغد ودمعها طاح على خدها: امس حاكيته ام مكلمته كيف بالمستشفى
بدر : بس رغد اهدي ان شاء الله انه بخير عمتي تقول انه بس كان مهمل نفسه والحين بخير
رغد تهز راسها يمين ويسار : امس حاكيته كيف كيف بالمستشفى والله امس كلمتـ...
قطعت رغد كلامها لما فكرت وعاد بذاكرتها كلامها معه امس لما سألها وِ أنا بالنسبه لك
وكيف ردت عليه برد قاسي . . وقالها كلمه "حلليني"
ابعدت رغد نفسه عن بدر وهي تبكي : بدر متعب مات صح
شهقت ام سعود وهي تبكي بعد كلام رغد
أما بدر فقال بروعه : لا بسم الله عليه والله الرجال بالمستشفى لاتفاولين عليه
وتو ابوي حجز لنا ورحلتنا العصر
رغد : لا الحين نروح له . . بدر قوم شغل السياره نروح انا ماراح انتظر للعصر . .
نروح الحين ونوصل الظهر قووم
التفت بدر لأبوه اللي هز راسه بمعنى رح معها
بدر: طيب ياللا جيبي عباتك وبنتك واغراضها
رغد : لين أمي تجيبها معها
أم سعود هي تمسح دمعها : خلاص يابنتي روحي وانا واحنا جايين العصر اجيبها معي
راحت رغد ركض لغرفتها وجابت عباتها وجوالها وشنطتها الصغيره ونزلت
شافت الصاله خاليه من بدر ، استأذنت وطلعت شافته بالسياره
أول ماركبت انطلقوا ماسكين خط الدمام
العايله كلها درت باللي صار لمتعب وكانوا مستغربين من اللي صار له خصوصا من انقلاب
حالته بالفتره الاخير
ابومتعب كان حاس بالذنب ويحس انه هو السبب باللي صاير لولده وانه ماراعاه ولا راعا شعوره
واحساسه بالذنب تجاه رغد وجا هو وزاده
اما رغد فكانت حالتها حاله. . واحساسها بالذذنب لايقل عن ابومتعب . . طول الطريق دمعها ماوقف
واول ماوصلوا للشرقيه قالت لبدر يروح دايركت للمستشفى بعد مااخذت اسمه من لينا . .
لما وقفو عند المستشفى
بدر : رغد الحين الساعه 1 ونص مااعتقد فيه زيارات . .
رغد وهي تفتح الباب : مالي شغل بدخل طيب او غصب
ونزلت وسكرت الباب بدن اهتمام
اما بدر فهز راسه بقله حيله وطفى السياره ونزل لحقها لما شافها اختفت عن انظاره . .
دخلت رغد المستشفى وتوجهت للريسبشن
رغد : لوسمحت اخوي ابي غرفه د. متعب
رفع الموظف راسه ورجع ينزلها : الزياره حاليا ممنوعه مووقتها
رغد بصوت اعلى من النرفزه : انا ابي غرفته ما قلت علمني بالقوانين
الموظف : لوسمحتي أختـ..
قاطعه صوت من ورى رغد : وش فيه ياعبدالسلام
التفتت رغد بقوه للصوت : صقررر
صقرالتفت لها بإستغراب : نعم !!
رغد : صقر انا رغد زوجه متعب
صقر :هلا هلا رغد
رغد توها بتتكلم الا وبدر جاي وسلم على صقر ودلهم على غرفه متعب طبعا دخلوا
بالواسطه بما ان ابوصقر يعتبر من اهل ملّاك المستشفى
دخلت رغد على متعب وهي موقادره تمسك دموعها قربت عنده حتى وصصلت فوق راسه
مسكت يده اللي كانت اللي كانت موصوله بالمغذي وضغطت
عليها
رغد : متعب قوم قوم شوف ليونه . . متعب حبيبي قوم والله آسفه على الكلام والله من قهري طلع
"شهقت من البكى " قوم حبيبي والله انت كل شي بحياتي بس قوم لاتخليني متعب
متعب قوووم انا رجعت ومسامحتك بس ابي اعيش معك قوووم ومع بنتنا قووووم
آآآآه يامتعب . .
دخل بدر عليها لما شافها انهارت وحضنها وهي تمسكت فيه تبكي
وتقول: بدر قوله يقوم
والله احبه والله هو كل شي بالنسبه لي قوله يقوم خلااص برجع معه ماراح ازعله
بدر: اوووش خلاص حبيبتي بيقوم ان شاء الله بس هو نايم الحين . . تعالي حبيبتي نطلع برى
مسكها بدر وادها لبرى الغرفه ومن برى الغرفه لبرى المستشفى بكبره . .
’،
بعد يومين . .
متعب بصبح اليوم الثاني صحى من غيبوبته المؤقته وهو يحس بتعب وموذاكر وش اللي صارله
شاف صقر اللي دخل عليه وقرب منه بفرحه : أخييرا قمت كل هذا نوم
رد عليه بإبتسامه متعبه وبصوت مبحوح : وش صار
صقر : كل خير
متعب : كم صارلي ؟!
صقر : يومين وكنت نايم فيها . . خلصت النوم ياولد
متعب توسعت ابتسامته . . : صقر
صقر : لبيه ياخوي
متعب بتردد : أناا "وسكت"
صقر استغرب : وش فيك
متعب اخذ نفس : لا لا ولاشي وين ابوي
صقر: عمي شوي وجاي . . أنا بروح وانادي دكتورك يشوفك وراجع لك
متعب : قولي أول وش فيني
صقر : اهمال وهذا السبب . . وقبل أنسى ترى سوينا لك تخطيط لراسك وأسباب الصداع
الحمدلله مافيه شي بس بسبب الاجهاد يصير لك الصداع . . يعني نفس التخطيط الأول . .
ياللا بروح انادي الدكتور ونتكلم بعدين
’،
الظهر . .
بدر كلم صقر اللي خبره عن وقظه متعب ومنها قال لرغد اللي اصرت تروح وتشوف متعب
صقر قال انه بيدخلهم بهالوقت
متعب اللي كان يهوجس هل رغد فعلا جات وتكلمت معه وقت نومه او لا يخاف يسأل ويحس
بعدها بالشفقه في عيونهم . . سمع ضرب الباب
متعب بصوت مبحوح : تفضل
انفتح الباب ودخلت مرأه فز لها قلب متعب . . وعيونه طارت فيها هي والله هي مايحلم
هي جات له يوم كان نايم . . حس فيها وحس بلمساتها
متعب بدون استيعاب : رغد
رغد وهي تبعد النقاب : عيون وروح وكل رغد
قربت راغد منه وسلمت عليه بس متعب اخذها بحضنه كأنه يبي يتأكد منها
وانها حقيقه . . لما ابتعدت
متعب : كيف كذا ؟ موانتي قلتي اني مااعني لك شي
رغد وهي تضربه بخفه على صدره : انت غبي لما صدقت . . انت كل شي بحياتي
متعب بعدم تصديق : بس انتـ. .
قاطعته رغد : أحبك
’،
بعد مضي أيام . .
بيوم شبكه سامي وريدا - سلمان وليان
’،
لبست عبايتها بسرعه قبل يعصب عليها . . حذرها من التأخير لكن غصب لين
متى رضت تسكت وعلى مالبست هي وعدلت نفسها . . حملت بنتها ولما طلعت
من الجناح الا هو مقابلها . . حست بخوف ف بسرعه مدت له ليون اللي كانت
مفتحه وقالت : والله كله من بنتك طول اليوم تبكي
ابتسم وهو مسحور ببنته اللي لما شافته ضحكت ، أخذها منها : فديتها حبيبه أبوها
يفداها كل شي
نزلت وراه : ياسلااام يعني عشان لين هالمفعوصه يفداها كل شي وهديت لو انه انا كان
وريتني نجوم الظهر
متعب وهو يلتفت لها : افااا . . ماصارت لين غاليه الا بسبب امها وبعدين كل هذي غيره من بنتك
دفته : ايه ايه امش بس اركب تأخرنا
لما وصلوا ك العاده رغد كانت آخر الواصلين . . سوت معهم بعض الأشياء البسيطه
جدا وماقدرت تكمل بسبب بنتها اللي ماتبي أحد وتبكي أول ماتبتعد عنها
دق متعب على رغد واعطاها خبر انهم بيدخلون سلمان على ليان
الي أول مادرت جتها نفاضه . .
’،
لينا وهي تمشي بشويش لأنها في بدايه حملها : ليان ياللا عاد بلادلع
ماراح يسوي لك شي الا جلسه بجانبك وتلبيسه وخلصنا
ليان : طيب وحده منكم تلبس عباتها وتجي
دينا : تخيلي بس يازينا والله واحنا لابسات العبايه وداخلات
وقالت حتى تبي تقهرها : بروح اشوف ريدا حبيبتي اككيد الحين بيدخل سامي
ليان بصرخه : دينا يالزفت
ضحكه علت من دينا : ههههههههههه
ليلى : ههههههه يااختي تبي تحرك انتي اهدي بس الوضع عادي جدا
ياللا حبيبتي بنطلع اكيد الحين بيجون . . نشوفك تالي الليل
وفضت الغرفه الا من ليان ودقات قلبها اللي تحسها مسموعه شوي وانفتح
الباب الثاني ودخل متعب ومعه سلمان . . وقفت ليان وهي ترجف سلم عليها متعب
وبعده سلم سلمان اللي مااحد قدب بالفرحه وظل ماسك يدها
متعب : ياللا لا تفلها بس ياسلمان شوي وجاي
سلمان : ان هوينا ويصير خير
طلع متعب وسكر الباب وراه والتفت سلمان لليان بسرعه وجلس يتأملها وليان
مولعه من الاحراج
سلمان : تدرين انك أجمل ماخلق ربي . . أحلف لك بالله أجمل مارأيت . .
ليان : .....
سلمان : ماادري كيف اعبر ووش اقول بس أول ماشفت فيها عيونك لما بغت تصدمك
السياره وانا اللي سحبتك قسم ماغابت عيونك عن بالي . . وماتتخيلين الفرحه اللي عشتها
لما شفت عبود بزواج عمر وأحمد وعرفت انه اخوك . .
ليان : . . .
سلمان قرب وباس خدها : ههههههه انا عارف والله اني جريء بس تحمليني شوي
وتحملي جراءتي . .
انضرب الباب وعرف سلمان انهم اهله قرب من ليان وهمس : احبك يابنت
’،
عند سامي وريدا . .
سامي اللي ماكان اقل من سلمان بالكلام ونفس الكلام اللي انقال تقريبا
لكن سلمان كان متهني بما ان ماعنده دينا تنكد عليه . .
سامي اللي مايمديه يصفصف كلام ويحكيه الا ودينا داخله
حتى تنرفز منها
سامي : دوين جعل ربي يصلحك روحي خليني اتكلم زي الناس
دينا وهي جالسه : نو سوري . . ماتهون علي حبيبتي ريّود تجلس لحالها معك
سامي : ليه وحش بآكلها
دينا : يمكن من حلاها
ناظر سامي ريدآ وبحب: وانا أِشهد انه من حلاها الواحد وده ياكلها
ولعت ريدا وابتدت تسب دينا في سرها
سامي : طيب الحين ماودك تهوينا
دينا : لا والله الجو هنا احسن من برى
وقف سامي وهو متجه لدينا اللي اول ماشافته قام وقفت وهربت من المجلس
ضحكه انطلقت من ريدا: هههههههه
التفت سامي بسرعه : واافديت هالضحكه ياناس
استحت ريدا وسكتت
سامي : خلاص خلاص ياكلمه ردي مكانك بس تكفين اضحكي
’،
بالليل بعد ماانتهت الشبكه والكل رجع بيته
بجناح متعب ورغد . .
رغد قبل ماتطلع كانت مجهزه المكان لسهره مع متعب بسبب يوم زواجهم اللي عدا عليه
كم يوم وانشغلت مع متعب وتعبه بعدين مع ريدا وماقدرت تسوي شي فأول ماوصلوا
طلعت لغرفتها وحطت لين بسريرها . . ورتبت نفسها وجلست تنتظر متعب
اما متعب اللي لما وصلوا حمل عبود اللي كان نايم لغرفته بعدين توجه لجناحه . .
شاف تحت الباب الاضاءه مسكره . . استغرب ان رغد نامت قبل مايجي دخل
الجناح وسكر الباب وشاف رغد وقفه تنتظره بأبهى حله لها . . توه يشوفها
لما جو يطلعون ماشافها كانت أجمل من الجمال . . قرب منها وهو مسحور
رفع راسها اللي كانت منزلته واستقرت عينها بعينه
متعب : قد انقالك انك آيه من الجمال
ابتسمت رغد ولا تكلمت : . . . .
متعب قبلها وابتعد عنها
رغد وهي تلف يدها على رقبته : كل عام وانت في حياتي ياحياتي
متعب : وكل عام وانت في حياتي " أحبك "
’،
" لا إله إلّا أنت سُبحانك . . إني كنتُ من الظالمين "
the end