كيف تجرح لك خفوق يعشقك بسكات - الفصل 34 - بقلم S3b Atrjak - مكتملة | روايتك

البارت الرابع والثلاثون ][ ’، طلعت لجانحها بعد ماتأكدت ان سامينا كلمت متعب وطلبت منها تروح لغرفتها وتقفل الباب عليها وأول مايجي متعب تعمل نفسها خايفه . . دخلت الجناح توجهت لغرفه النوم خلعت عبايتها ووقفت عند المرايه الطويله كان ودها تغير لبسها بس ماينفع لأنها بترجع لأهلها شوي ومايصلح تدخل عليهم بلبس ثاني غير الفستان تأملت نفسها بغرور حتى تزيد من قوتها بوقت ماتقابل متعب . . زادت الروج الأحمر وتعطرت ورجعت تتأمل ننفسها وهي تقول بثقه " وش تكون عليا عندي "ارسلت بوسه للمرايه وطلعت من الغرفه بعد مااخذت العبايه وحطتها على الكنبه الموجوده في الصاله وطلعت من الجناح وراحت لناحية الدرج وجلست على أول درجه حتى تتسمع لما يوصل متعب ولهت بجوالها بعد ما كتبت رساله بالمفكره حتى ترسلها لبدر أول مايجي متعب كلها دقايق حستها طويله وسمعت صوت خطوات وقفت بسرعه ومشت للجناح وجلست على الكنبه وهي تضغط ع لى كلمه ارسال لبدر " ربع أو ثلث ساعه وتكون عند الباب " و تقوي نفسها بكلمات وتحاول تكسي ملامح وجهها برود وثقه عند متعب اللي خاف أول ماقالت له سامينا انها تسمع صوت وانها خايفه استأذن من ابوه انه بيروح لشغله طلعت له وانه احتمال ماعاد يرجع طلع من القصر وركب سيارته وحركها بسرعه بإتجاه البيت وقلبه قلقان . . دقايق ووصل للبيت نزل بسرعه بعد ماطفى السياره ومشى بخطوات سريعه دخل وتوجه للمطبخ وماحصل أحد راح لغرفه سامينا وضرب الباب ثواني وسمع صوتها وفتحت له لما رد عليها متعب : وش فيه سامينا ؟!! سامينا : بابا انا فيه اسمع صوت هذا سوي طخ طخ فوق وانا فيه خوف بعدين سوي كول متعب : طيب خلاص انتي خلك هنا وقفلي الباب وانا بشوف هزت سامينا راسها ودخلت . . أما متعب فمشى بحذر بعد مااخذ من المطبخ سكين يحمي فيها نفسه دار على الدور الأول ماحصل شي ولا حتى أثر يدل على ان فيه أحد . . طلع الدرج حتى وصل للدور الثاني اللي كله غرف نوم . . يعني هنا اللي ممكن أحد يجي ويسرق شي توجه لجناح أبوه وفتحه حصله مقفل . . همس "تمام يعني هنا مااحد جا " وراح لجناح البنات وجناح التوأم . . وكانت نفس النتيجه مقفله " باقي جناحه مشى بحذر حتى وصله مسك المقبض ونزله لتحت بهدوء وهو متوقع نتيجه "الاغلاق" لكن تفاجأ لما حصله مفتوح وهاجمه هوا باااارد . . حس بإستغراب هو متأكد انه مقفل الجناح قبل مايطلع للزواج كيف انفتح غير كذا الباب مسكر وماهو مكسور يعني الباب مفتوح بالمفتاح تقدم حتى دخل الصاله وتجمد بمكانه . . وقف وهو متفاجيء ابد ماجا في باله انها تكون هنا وان رغد هي الشي اللي تكلمت عنه سامينا قرب منها بدون ادراك وهو مشتاق لها اكثر من شهر ماشافها والحين لما شافها يشوفها بكامل زينها هو رجل مايتحمل كل هالزين بدون اي رده فعل منه اما هي مازالت جالسه بنفس جلستها وبنفس ثقتها المزيفه ودها تقوم وترتمي بحضنه وتعاتبه على هجرانه لها نهرت نفسها لما حست انها ابتدت تنجرف ورا مشاعرها الملتهبه بالشوق " اووه رغد ركزي انتي ماجيتي هنا حتى تعبرين عن شوقك جايه هنا حتى تاخذين بحقك وتشوفين قسوه كلامك عليه رفعت راسها لما شافته واقف امامها وقفت بهدوء وهي ملاحظه هدوءه وتأمله لها وهالشي فرحها وزاد شوي من ثقتها بنفسها حبت تقطع تأمله لها وتلعب شوي بأعصابه فقالت بدلع : افاا يا متعب هذا وانا صار لي شهر وزود غايبه ولا تسلم ولا تسأل ، ، ياللا بكون احسن منك وبسلم عليك " قربت منه ورفعت نفسها وباسته على خده وبدلع كملت " كيفك حبيبي " استوعب متعب وحس بنفسه وقطع تأملاته لها على ان نبضات قلبه كانت مرتبكه من شوفتها ومب قبلتها الا انه حاول قد مايقدر يسيطر على نفسه . . مسكها مع يدها قبل تبتعد : انتي شناويه عليه تكلمت ببراءه : انا ! ! ولا شي بس جيت اسلم عليك بما اني بالدمام موحلوه اجي للدمام ومااجي واتطمن على زوجي ابتعد عنها متعب وصد وبجمود حاول يظهره : انا ماقلت ماابي اشوفك . . وش جابك الحين رغد بسخريه بانت بكلامها : جابني الشوق التفت لها بعد ماعرف نبرتها الساخره : ايه صدقت رغد رجعت لمكانها وجلست : جيت بسبب دليل يثبت صحه كلامي من تهمك متعب وعلى فمه ابتسامه سخريه : وانتي مصدقه اني بصدق كلام ثاني منك ، عليا اعرفها من قبل مااعرفك درست معها سنوات وعرفت اخلاقها ومعدنها مو انتي اللي ماعرفتك الا من شهور وماادري وش طينتك وقفت بغضب وبإنفعال وهي تحط يدها على بطنها اللي المتها : الا هالشي انا مااسمح لك انك تتهمني وتنقص بأخلاقي . . انا الحمدلله صاينه نفسي واخاف من ربي بأفعالي . . وهالعليا اللي انت ماخذ مقلب فيها هي سبب البلاوي ذي كلها هي كانت ناويه على كذا شخص فيكم وهي سبب مشكله اختك واذا مومصدق اسأل صقر . . صقر يعرف كل شي انصدم متعب : صقرر كيف عرف رغد بإنفعال : انا علمته انا قلت له كل اللي عندي . . ماكان يرضيني اشوف شخص ماله ذنب يتعذب وتنهدم حياته بسبب شخص مريض بأحقاده . . يعني لو لا هالعليا ماكان اختك جات جلست عندكم بالايام ماكان اختك صابها الهم من شي هي ماتعرفه " تقدمت له ومدت يدها " عطني جوالك مده لها وهو تحت تأثير صدمته اخذته وفتحت الرمز وتعبثت بجوالها ثواني ووصلت رساله واتس لجوال متعب فتحتها واعطته اياه رغد : شوف ابتعدت عنه وهي تشوف الاستغراب على وجهه راحت ولبست عبايتها ولفت الطرحه بشكل مهمل عليها وهي تراقب ردة فعله . . شافت الجمود اللي اكتسى وجهه كانت تعابير وجهه تتغير بين فتره وفتره انتبهت انه رجع يعيد المقطع من جديد وابتدت تحس بالتوتر خلاص تبي بدر يجي هي تعتبر نفسها انها سوت انجاز على هالمواجهه تعد الثواني والدقايق تتمنى انها تطلع قبل مايتكلم تخاف يرميها بكلام قاسي لكن للاسف ماصار هالشي وماجا بدر بهالوقت اما عنده فكان مستغرب لما مدت له الجوال وجاه فضول يبي يشوف الشي اللي سوته اخذ الجوال وشافها فاتحه على محادثه واتس بإسمها وشاف الملف اللي ارسلته . . استنتج انه هذا هو الشي اللي قالت فيه شوف ، فتحه في البدايه ماكان عارف من هالبنت اللي ملقيه ظهرها وتتكلم يحس الصوت موغريب عليه رفع راسه من الجوال وهو يحاول يثبت ان كلامها اللي قالته بالاول مغلوط وكله تبلي : يعني مافيه بالبلد الا هالعليا اللي متزوجه رغد : لا فيه وفيه كثير بعد بس لما يكون فيه تهرب من سؤال محدد مثل عايله الزوج متعب باستخفاف : يعني قطعتي الشك باليقين بهالسؤال رغد وهي تركز بنظرتها عليه : ولما يكون رقمها عندك ومسجل بإسم علوي حس برجفه من كلمتها وبدون استيعاب : يعني رقم عليا هو اللي اثبت لك رغد : ايه الرقم تذكر المره اللي رحت فيها لوحده وانت كنت معارض كانت عليا وانت دقيت وشفت رقمك ولما جيت البيت طلبت جوالك وشفت المكالمات ولقيت رقمها فمافيه دليل اقوى من كذا ان عليا زميلتي بالجامعه هي نفسها زوجتك متعب : بس كيف تقدر تدخل جامعه هنا وهي اساسا متخرجه رغد : الامور هذي مالي علاقه فيها انا قبل لما قلت لك كنت ناويه احافظ على بيتي وانه يكون لي بيت مااحد يشاركني فيه . . حاليا بس ابي عليا تبتعد عن هالبيت لانها ممكن تسبب اذى لكل فرد هنا هي ابتدت بك وانتقلت للينا واحتمال بعد ابتدت ترسم هي وعبير على ليان والتوأم وباقي العايله انصدم متعب ورجع يشغل الفيديو بسرعه ولما سمع الصوت صح هذا صوت عبير . . عبير صديقه عليا . . لا يمكن اغلط بصوت قريب سمعته استغربت رغد لما رجع يفتح المقطع بس مااعارت اهتمام هي حاليا خلاص سوت اللي عليها وشافت اللي تبيه اخذت شنطتها بعد ماسمعت جوالها يرن باسم " بدر " اعطته مشغول وقربت عنده : انا هنا انتهت مهمتي وانتهى كل شي اقلق راحتي بالشهور اللي فاتت . . حاليا الدور انتقل لك حتى تحمي هالعايله مشت وتركته سارح بأفكاره وهي متطمنه لكل شي سوته وببالها الحين شي واحد ولازم يصير الطلاق ولاغير الطلاق ’، بالقاعه انظاره كلها موجهه لهالطفل وحس بفرح لهالشي الحين يقدر يقول ان كل شي بينحل ان شاء الله . . التفت للشخص اللي بجانبه وكان فارس اللي من اول الزواج كان معه حس بإستغراب بس بعدها طنش : فارس التفت فارس له : هلا تكلم وهو يشوف الطفل : من هذا البزر فارس : هذا عبود ولد اخوي محمد اخو متعب والفرحه غمرت قلبه : ماشاء الله . . الله يحفظه استأذن وطلع من القاعه وهو يفكر ببكره ويتخيل احداثه ’، بصباح اليوم التالي الكل متجمع على طاولة الطعام يفطرون ويدخله بعض الكلام عن الزواج واحداثه ، سمعوا صوت الجرس ابومتعب بإستغراب : من بيجي هالوقت "التفت على متعب " شوف السواق اسأله من اللي عند الباب وقف متعب وكلم السواق ورجع : يبه يقول حريم اشر للشغاله تفتح الباب ، شوي الا صوت الكعب يملي الغرفه الكل رفع عينه بوجه هالشخصين اللي كانو لابسات عبايه مخصره ومفتوحه وريحه عطر خفيفه ملت الغرفه واحد منهم الصدمه اعتلته متعب كيف جات عليا هنا ليه جايه ووش تبي، حس بالغضب يعتليه ووقف وهو يصرخ : نعم وش جابك انتي وياها الكل استغرب من هاللي يصرخ عليها متعب ابتسمت عليا بسخريه : انا ماجيت لك انا جيت لهالشايب وقف متعب بغضب وتقدم لها بسرعه رهيبه ومسك زندها : احترمي نفسك لاأدفنك مكانك عليا : مسوي رجال كف بأقوى مايملك هذي كانت رده فعل متعب اللي الجمت كل من بالصاله وأولهم عليا اللي ماتوقعت ابد من متعب هالاسلوب ابومتعب بصرخه : متتتتتتتتتتتتعععععععب وش سويت متعب بقهر : يبه انت لاتتدخل الله يخليك ابومتعب بعد ماعرفهم : وش بينك وبينهم عبير جاوبت بسرعه : زوجته صدمممممه على وجه الكل متى متعب متزوج وحده ثانيه ابومتعب : صدق هاللي تقوله نزل متعب راسه بخجل من ابوه ، تقدم ابومتعب لمتعب ورفع راسه بيده : صدق هاللي تقوله هز متعب راسه بإيه وهو ساكت ناظره ابومتعب بقوه كان بيسوي شي لمتعب بس ماحب يسويه قدام الكل صد ابومتعب : وش تبون عبير: ابي حقي ابومتعب بغضب : مالك حق عندي عبير بإنفعال : وكيف مالي حق ، وفلوس ابوي وينها ابومتعب : فلوس ابوك محفوظه عليا : أجل اعطيني اياها ابومتعب وهو يجلس ع الكرسي : مولك عبير بحقد : اخبرك انا معي اوراق تثبت اني متنزل عن الشركه كلها ابومتعب ابتسم بخفه : بليها واشربي مويتها تنرفزت عبير من ابتسامته : يعني ماتخاف اروح واجردك من أموالك ضحك ابومتعب : ههههههههه قلت لك بليها واشربي مويتها ، لأن أساسا ماعندي شي الكل انصدم . . كيف ابومتعب ماعتده شي عليا : كذااااااب أبومتعب : تتوقعين اني نايم على اذني ، لا اعرف ان ميشيل طرف منك . . انا ماأملك ولا ريال . . حتى هالبيت اللي انتي تشوفينه مااملكه البنات وهبه ومتعب الكل في راسه أسئلة كيف أبومتعب مايملك شي انهارت عبير ومسكته عليا : لاااا كيف كذااا مابيصير ابومتعب : شوفي يابنت عبدالرحمن ابوك غالي علي ولا بإمكاني أدمرك بسهوله ، الخال اللي يلعب براسك ويفره موخالك هذا والام اللي تتوقعينها امك ماهي امك الحقيقيه عبير بعدم تصديق : كيف هذااا، انت بتكذب ابومتعب ببرود : لا مااكذب هذي مرت ابوك ، والكل عارف بس انت اتبعتي اللي تسمينه خالك وهو يلعب عليك ويحشي راسك بالكلام . . ابوك دخل بمناقصه وخسرها وهذا الشي ادت لجلطه له انا ساعدته وضمينا انا وهو الشركه مع بعض بس ابوك توفى بعد الجلطه بفتره بسيطه وانتي رحت مع مرت ابوك لأهلها وماعاد تجين الا والحقد مالي قلبك ، ابوك كان صاير له خلاف مع امك وطلقها واخذك منها عبير: يعني امي مانها امي ابومتعب : لا امك عايشه وبالامارات مع زوجها وعيالها عبير ابتدت تصارخ : انت كذاااااااااااب كذاااااااااااااااااااب ابومتعب وهو يلقي القنبله : اذا مومصدقتني اسألي جده عمر ، اظن تعرفينها عمر اخوك عليا : وانت كيف عرفت أبومتعب : عبدالرحمن كان صديقي وماكان يخبي عني شي وجدة عمر كانت جارتنا زمان وماكان يخفى أول عليها شي عبير تبدل حالها بعد ماكانت داخله وهي مفتخره بنتايج تخطيطها والفرحه ماليه وجهها صدمتها حقائق ماكانت متخيلته ولا حتى عليا ماكانت متوقعه هالشي الكل فرحان ومحتفل بهالنجاح لدرجه حاجزين طياره لأمريكا بعد ساعتين حتى يلتقون بالخوال . . لكن صار العكس وطلعوا من البيت بخفي حنين ’، فتحت عيونها واستقرت بالسقف لثواني التفتت بجنبها شافت السرير الثاني فاضي تعدلت ووقف راحت لدوره المياه غسلت وطلعت صلت غيرت لبسها بعدها طلعت شافت الكل صاحي وجالسين بالصاله رغد : الله الله الحبايب كلهم صاحين ومخليني نايمه بدر : عاد هذي وصايه الوالد كل ماقلنا بنروح نصحيها قال لا خلوها مسكينه تعبانه جلست رغد بعد ماقبلت راس ابوها وامها : ياعلني ماخلى منك يالغالي . . ايه مومثلك لو عليك ماخليتني انام بدون ماتزعجني بدر : افا هذا وانا اقولهم خلنا ننتظر رغد تصحى وننزل نفطر وهم يقولون لا ننزل الحين رهف : شه النصاب مدري من اللي صاجنا من صباح ربي جوعان وجوعان وننزل ناكل ولما تصحى رغد نجيب لها فول وتميس بدر باستهبال شهق : انا يا رهيف البطريق رهف : ايه يابدو الزرافه الكل التفت ناحيه الضحكه اللي ملت الصاله وارتسمت على شفاههم ابتسامه لهالضحكه العاليه بدر : الله شنذا الوالد يضحك كذا عجيبه ضربه بعلبه المنديل اصابت كتفه من ام سعود : وجع بالعدو اذكر الله بدر وقف وراح لايوه وباس راسه وهو ينفث عليه : بسم الله عليك يا عزوز يارجل ساره . . ماشاء الله ياجعلها ضحكتن دايمه وباس راس امه : هذي بوسه على راسك بس يالغاليه الا البريستيج لايخرب انا دكتور وبعد كم شهر بعرس وكذا مايصلح تضربيني وبعدين انا عيوني بارده ام سعود : مافيه شي اسمه عيون بارده وعيون حاره العين حق امل : اكشخ يايمه محد قدك يابوي امي تدافع عنك ابوسعود : ماتشوفيني ساكت واسمع هالكلام الزين ام سعود بإحراج : ابوسعود رغد : مااقول الا الله يعين ايلاف عليك ام سعود : ايه بالله البنت وش حليلها هاديه وابتلت بواحد مطفوق تنهد بدر بحب : اااه يازين هالطاري ابوسعود : بدير موانت جوعان يالله قدامي انزل بدر : يبه يعني يوم جت طاري زوجتي قلت ننزل نفطر ويوم زوجتك تدافع عنك ماقلت شي الكل : هههههههههههههه ’، اسبوعين مروا عايله ابومتعب بس اللي عرفوا بزواج متعب الثاني ابومتعب بعد ماطلعوا عبير وعليا نادى على متعب بالمكتب والبنات وهبه بالصاله ليان : تتوقعين رغد كانت عارفه لينا : والله شكل زعلها الاخير بسبب هالشي ليان : اخوك عسا مايهدم بيته بيده لينا بضيقه صدر : هذا اذا ماانهدم وخلص اما هبه فسرحانه برغد معقوله تخبي شي كبير مثل هذا على اهلها اللي يترجونها عشان تقولهم وهي ساكته ومتحمله . . كيف الوحده تقدر تشوف زوجها مع حرمه ثانيه وتكون هاديه انا اذا على ام متعب الله يرحمها افكر فيها احس بغيره وهي ميته فمابالك بهاللي حيه وسفرات متعب لها الله يعينك يارغد ’، بالمكتب ابومتعب جالس ع الكرسي ولاف به يشوف الجدار وهو ضايق ومتعب خلفه خلف المكتب ومنزل راسه وهو متضايق من صده ابوه له يكفيه اللي فيه يكفي انه عايش سنوات من عمره متوهم الحب وعايش بالخداع والغفله رفع راسه لما سمع صوت ابوه ابومتعب : انت جيتني وقت دراستك وفاتحتني بالموضوع وش كان ردي ؟ متعب بعد سكوت بسيط : الرفض ابومتعب بصوت اعلى شوي : ودام انه الرفض ليه سويته متعب سكت ماعرف وش يقول ابومتعب : انا مارفضت لاني ماابي سعادتك ولارفضت لاني ماابيك تتوج حبك بالزواج " دار بالكرسي حتى واجهه" رفضي كان لان عليا هي صديقه عبير . . وعليا مرسوله من خوال عبير المزعومين . . "سكت شوي وبعدين كمل " طول فتره سفرك كنت معين اشخاص يقولون لي كل تحركاتك ووين تروح ووين تجي " رفع متعب راسه بصدمه " ابو متعب كمل : مب عدم ثقه لا لاني واثق بتربيتي لك لكن عشان اتطمن عليك وانت هناك واعرف اخبارك اول بأول واعرف من كنت مصاحب لانك كنت مراهق ماتعديت ال١٩ ومثلك عارف الصاحب ساحب . . لما رجعت هنا تطمنت عليك لانك تحت عيني وقدامي اغلب يومك وعارف ربعك اللي هنا وعارف اهلهم ووش اخلاقهم كنت احسبك ماتخطي خطوه الا وانت مفكر فيها ودارسها وعارف او نقول متوقع بنتايجها سواء الحاليه او المستقبليه لكن للاسف تفكيري طلع خطأ . . حس متعب بإحراج من ابوه ومن كلامه اللي يلقيه على مسامعه ابومتعب : للاسف ياولدي ماتوقعت منك هالتصرف ولاتوقعت انك تظلم بنت الناس وتوصل بهالدرجه والله لو انك صامل على رفضك كنت انا اقتنعت كل اللي كان ودي به لما ضغطت عليك اني افرح بك ونصير قراب زود من ابوسعود . . كنت واثق انك بتعيشها احلى حياة لكن خيبت ظني يابوك وين اودي وجهي من ابوسعود وهو اللي مسلم لك امانه وانت خيبت الظن سكت ابومتعب ولما شاف متعب ساكت تأكد من الكلام اللي قاله كان وده ان ولده ينكر ويعترض على كلام ابوه ويقول انت ماني ظالم انا كنت قد الامانه بإني عدلت حتى وانا متزوج وحده ثانيه بس سكوته حز في خاطره ماتوقع بيوم ان متعب ولده اللي يفتخر فيه قدام الناس يسوي هالعمله متعب ساكت لأنه فعلا حاس انه ظلم رغد كثييير وهي متحملته ’، اما عند عبير فكانت مصدومه من الكلام اللي سمعته عاشت طول عمرها بكذبه وان امها لبنانيه ومتزوجه سعودي وصارت اللي كانت تسميها امها مرت ابوها واخذتها من هي صغيره وانحاشت من عند ابوها بعد مانصبت عليه وسرقته واخذت اوراق ثبوتيه بعقد الزواج . . طول عمرها اللي عاشته عند امها كان راسها ينحشى بفكره الانتقام والحقد على ابومتعب اللي سرق فلوس ابوها واللي كان هذا سبب في انه يموت وسبب ان امها ماتلقى علاج وتموت كيف جرت ورا كلامهم ليه ماسمعت كلام الناس اللي نصحوها عمر وجدته اللي كانت دايم تقولها "يابنتي لو لك حق بتاخذينه وخلي حساب الظالم ليوم القيامه . . عيشي وانتي صافيه القلب" عمر اخوها من الرضاع اللي كان ملازمها من يومه صغيره وهم كانوا قراب بحكم انهم كانوا عايشين بأمريكا عمر اللي تهاوشت معه وقطعته بس هو ماقطعها ظل متواصل معها ويكلمها وهي تصده . . تذكرت كلام امها ام عمر لما كانت طفله وكانت بايته عندهم لان امها المزيفه منومه بالمستشفى كانت زعلانه على عمر اللي ضربها وكسر لعبتها من كم يوم وصار لها وقت وهي ماتكلمه وهو وراها يراضيها وهي مومعطيته وجه وحاقده عليه وهالشي تعلمته من امها اللي كانت تقولها اذا احد غلط عليك مابتسامحيه لحد ماتاخدي بتارك منه جلست بجانبها ام عمر : عبوري حبيبتي التفت لها عبير وهي ساكته ابتسمت لها ام عمر : وش فيك حبيبتي ماتروحين تلعبين مع عمر عبير وهي مازالت مبرطمه : اثلا انا ذعلانه من عمور ام عمر : وليه حبيبتي ذعلانه من عمور عبير : عمور ضربني وكثر لعبتي مابثامحه حتى اضربه واكثر العابه ام عمر : بس حبيبتي هذا مايصير . . الله ومحمد عليه الصلاه والسلام يحبون اللي يسامحون والرسول عليه السلام كان يسامح اي احد يغلط عليه وماكان يزعل منه حتى لو اذوه عبير بفضول طفولي : كيف ؟!! ام عمر : الرسول سامح قريش على انهم كانوا يأذونه ويرمون الشوك في طريقه ويحطون على ظهره القاذورات لما يسجد بس مع ذلك سامحهم لما فتح مكه . . عبير ماما انتي بنوته حلوه لما يصير قلبك ابيض وتسامحين بس لما ماتسامحين تصيرين موحلوه وقبيحه والناس مايحبون الانسان اللي مايسامح عبير : ماما يعني انا الحين قبيحه لاني ماثامحت عمر ام عمر : اممم انتي حلوه بس شووويه . . ولو سامحتي عمر بتصيرين حلوه وااااااجد وبتصيرين اميره نطت عبير بفرح : خلااث ماما انا ثامحت عمر بروح العب معه ابتسمت ام عمر وباستها : شطوره حبيبتي رجعت عبير لواقعها وعلى وجهها ابتسامه بالرغم من الدموع اللي كانت ماليه عينها من ذكرى ام عمر اللي تحس بحنانها اكثر من امها المزيفه وقتها مسحت دمعها ووقفت اخذت جوالها ووقفت على رقم وهي تتأمله حنّت لأيام الطفوله كثير لذيك الايام البريئه اللي ياليتها تعود . . ’، كانت لوحدها بالشقه تشوف التلفزيون تنهدت بملل صار لها وقت وهي لحالها وبدر لحد الحين مابين مسكت الجوال ودقت عليه شوي ووصلها صوته : بدير وينك تأخرت جاني النوم بدر : يااختي اصبري المطعم زحمه الحين توني استبمت طلبي وجايك رغد : طيب انتبه على نفسك ولاتسرع بدر : طيب سكرت منه وهي تفكر بنفسها صار لها اسبوعين هنا مع بدر اللي ربطته معها . . تحمد ربها انه صارت له اجازه شهر حتى يكون معها لانها ماتدري وش تسوي لو مااحد كان بيقعد معها هنا عشان دراستها بس بعد ماتخلص اجازته ماتدري وش تسوي . . ماتبي تقدم اعتذار وهي ماباقي لها الا شهر تقريبا وحرام يروح عليها مستوى عشان شهر . . تنهدت وهي تحس بمغص اعتادت عليه هالايام بسبب انها بشهرها فالمغص يجي ويروح . . حاليا قلقانه كثير من سالفه الولاده وكل ماجالها مغص خافت دخلت بالفتره اللي قالت لها الدكتوره انها بتكون فيها ولادتها فطول اليوم تحاول ان بدر يكون عندها ومايطلع للناس اللي يعرفهم هنا بالدمام حتى لو جالها الطلق يكون قريب . . صحيح مايتأخر عليها لما يطلع بس هي خايفه . . حست بالباب يفتح وشافت بدر داخل وهو يكلم بس ماعرفت من بدر وهو يحط الاكل على الطاوله والجوال بإذنه : خلاص ياابن الحلال بشوف . . ايه بحاول بس مو اكيد . . على خير ان شاء الله يالله ياخوك تامري على شي . . سلم ع الجماعه اللي عندك . . فمان الله نزل الجوال واسترخى على الكنب حاس براسه بينفجر من الالم . . التفت على رغد وفتح العشا وحطه امامها ووقف رفعت راسها باستغراب له رغد: ماراح تتعشى بدر وهو متوجه لغرفته : لا مااشتهي راسي بينفجر واحس اني برجع لو اذوق شي باخذ بنادول وبنام يمكن يخف واذا بغيتي شي صحيني هزت راسها وهي تفتح وجبتها : طيب بس لو ماقدرت تنام كلمني بدر وهو عند باب الغرفه : طيب وانتبهي لنفسك ’، دخلوا الشقه بعد مارجعوا من السفر . . اول يوم يكونون مع بعض في بيتهم الصغير . . التفت لها : ليلى انا بروح لأمي الحين بتروحين معي ليلى : لا انا تعبانه بكره ان شاء الله . . مابترتاح ؟ احمد : لا بروح اسلم على امي وبجلس شوي وبجي تبين شي ؟ ليلى : لا سلامتك احمد باس راسها بحب : ياللا ديري بالك على نفسك لين ارجع ابتسمت بحب متبادل وهي تحمد ربها على كرمه لها : ان شاء الله وانت انتبه لنفسك وقت السواقه احمد : ياللا لو تبين شي دقي علي ، وبجيب معي عشا اذا اشتهيتي شي كلميني طلع من الشقه وهو مرتاح وسعيد بحياته مع ليلى ومافيه اي شي يعكر على مزاجه . . بالاول صحيح مرتاح ومبسوط معها بس لما يفكر انها متزوجه يتضايق ويحاول يبعد التفكير بهالشي . . بس لما اكتشف انه الاول بحياتها مايدري كيف الراحه انتشرت بصدره وصار يعيش الدقيقه اللي معها ويتمتع فيها . . وصل للبيت ودخل وهو ياخذ نفس عميييق ويزفره براحه وشوق دخل للمجلس وماشاف احد توجه للمطبخ بعد ماسمع فيه حسيس حركه دخل وشاف امه مليقيه ظهرها للباب وعندالمجلى تنظف الصحون . . دخل بخفه حتى صار خلفها غطى عينها بيده وهو يقول أحمد : من انا فزت بسمه بفرح وهي تحط يدها على يده وتنزلها وتلف تواجهه : يمه احمد باس احمد راسها وهو مبتسم : شخبارك يالغاليه بسمه: الحمدلله يايمه انت كيفك وكيف ليلى احمد : الحمدلله يمه كلنا بخير بسمه وهي تطفي المويه وتمشي مع احمد برى المطبخ : اجل وين ليلى احمد : والله تعرفين يايمه جايين من السفر وكذا فقالت بكره ان شاء الله بتجي وتسلم وانا قلت دامني طالع اجيب العشا مريت اسلم بسمه : وليه ماقلت لنا عن موعد وصولك نرسلك احد احمد: مايحتاج يالغاليه سيارتي وموقفه في المطار بسمه بحنان وهي تحط يدها على فخذه : وكيف هي حالكم ياولدي ان شاء الله مرتاح ابتسم احمد والراحه باينه بوجهه : الحمدلله يالغاليه امورنا ووضعنا من احسن مايكون بسمه : الله يتمم عليكم ويديمها لكم من راحه احمد : امين . . وين ابوي وريدا ؟ بسمه : ابوك طلع مشوار وبن عاد مدري اما ريدا فوق تقول بتتروش وبتنزل احمد انقبض قلبه من مشوار ابوه هذا : طيب وموضوع ريدا وش صار فيه بسمه : على حطة يدك مثل ماهو احمد : انتي مقتنعه يمه بسمه بضيق : وين اقتنع وانا عارفه ان هالسلمان كان مع ابوك بنفس المقر بيوم خرابه احمد هز راسه : ولايهمك يمه ان شاء الله مب صاير الا اللي انتي تبين ’، بالكوفي . . خامس سيجاره يشغلها . . تكونت تحت عينه هالات سودا . . بشرته بهتت ومالت للاصفرار جسمه هزل ونحف كثيير وطلعت له عواض بهالاسبوعين كان مهمل لنفسه صدمه تلقاها من عليا . . ومن أبوه اللي لازال زعلان عليه . . طول يومه كذا سرحان ويتأمل بالرايح والجاي ع الصامت انتهت السيجاره من بين يديه وفتح الكرتونه ناوي بالسادسه الا بيد تمنعه وتسحب الكرتونه منه صقر بغضب : صاحي انت تبي تموت نفسك هذي ثالث سيجاره من جيت انا لك وانت تشربها والله العالم قبل كم شربت ناظره بذبول ورجع يصد : . . . صقر : متعب لاتسوي بنفسك كذا احمد ربك انه ماجالك منها عيال . . اهتم بنفسك وبمرتك وبولدك اللي بعد كم يوم بيشرف على هالدنيا حاول تعدل وضعك مع زوجتك متعب وعينه لمعت لهفه قدر يكتشفها صقر : وتتوقع ان رغد بتوافق ترجع لي صقر : ان شاء الله انت بس حاول ولا تيأس وتجلس لي هنا وتشرب من هالسم اللي بيدمرك بيوم وتبي كل حياتك تزين حارب عشان هالحياه حارب عشان ولدك اللي مدري وش بيكون وضعه لو تم الانفصال . . متعب : بس مااتوقع رغد ترجع انت شايف كيف كنت اعاملها وكيف كذبتها بسالفه الكلام صقر : روح لها مره ومرتين وثلاث وعشر لاتيأس حاول تحن قلبها بالولد وحالته متعب بتردد : بس قاطعه صقر : لا بس ولا شي انت قوم الحين ورح عدل من نفسك ورح لها وقف متعب بعد كلام صقر وهو ناوي ينفذ اللي قاله صقر: شوف ترى هي رجعت للرياض أنا بشوف على اقرب رحله وانت رح جهز نفسك وبعطيك خبر هز متعب راسه وهو ياخذ أغراضه ويروح . . وصقر يتبعه بنظراته ويدعي ربه انه يسهل امره ’، ][ همســة ][ كلما استغفرت الله انحلّت عنك عقدة من عُقد همكْ . . وانهلّت على قلبك النعم . . أستغفر الله العظيم وأتوب إليه . .