كيف تجرح لك خفوق يعشقك بسكات - الفصل 28 - بقلم S3b Atrjak - مكتملة | روايتك

[ البارت الثامن والعشرون ][ ’، مرت أيام الاجازه سريعه مثل العادة وراح أسبوع أول من الفصل الدراسي الثاني في العايله بعد مازارو هبه كملوا اسبوع الاجازه بالرياض بعدين رجعوا .. أما رغد فبقت عند أهلها طول الأسبوعين بما ان الجامعات أول أسبوع مايداومون فيه فإستغلت هالشي وجلست وجا متعب وأخذها يوم الأربعاء لأن الخميس كان حفل شبكه أحمد وليلى بذاك اليوم كانت التجهيزات على مستوى عااالي بمزرعه العايله ’، كانت تحط اللمسات الاخير على نفسها راحت للصندوق الموجود بالغرفه بعجل وهي ترفع فستانها طلعت علبه منها وفتحتها اخذت طقم الذهب الأبيض وبدت تلبسه على عجل قبل يجي متعب ويخضها راحت للتسريحه بتاخذ الايشارب الا بدخول متعب اللي وترها خصوصا ان لبسها من فوق عاري كان الفستان وردي ساده والايشارب فيه تشكيله ورد بالعنابي والوردي والفوشي كان فستانها جدا بسيط بس كانت جدا بارزه بسبب الروج الصارخ اللي مستخدمته مسكت الايشارب وبدت تلفه وتربطه بشكل مايل وتستر ظهرها وكتفها بربكه من نظرات متعب متعب بعد صمت لدقايق معدوده : خلصتي رغد : ايوه متعب وهو يقرب منها خلتها تتراجع للخلف لااراديا مسك ذراعها برقه وجلسها على الكرسي ونزل تحت لعند قدمها رفع فستانها لحد نص ساقها حتى يتأكد من النعال اللي راح تلبسه ، رفع عينه بهدوء ولاحظ الحمره اللي كست ملامحها وقال بهدوء : وين نعالك رغد اشرت له : فوق الأريكه "مشى بهدوء ووقف عند الاريكه ، أخذ النعال وبدا يقلبها بيده " رماها بإهمال : ماتلبسين هذي رغد بصدمه : ليه !!!! متعب : عاليه وانت وضعك مايسمح وقفت رغد وهي تقرب منه : لا متعب والله موعاليه "رفعت الطراحه اللي على الأريكه وطلعت منها نعال ثانيه اللي كان كعبها عالي بكثير " شوف هذي فيه فرق بينهم هذذي كعبها بسيط متعب اخذ نعال ثانيه اللي عارضت عليها رغد : مستحيييل البس هذي متعب : ليه ؟!! رغد : متعب انت شايف هذي فلات ماتنفع ابد للمناسبات رجع متعب وأخذ نعال ثانيه فيها كعب بس بسيط : هذي ولاتقولين واطيه بتلبسينه ولا مولازم هالروحه رغد بالطل ألبسها هين بس : طيب متعب وهو متوجه للباب : استعجلي واياني واياك تستغفليني ترى بشوف وش لابسه بالسياره راقبت خروج متعب ونزلت لبست النعال اللي طلعه متعب "ايه هين البس هذي وبمناسبه كذا " راحت وجت بتدخلها بشنطتها بس خافت انه يفتشها توجهت للدولاب واخذت ايشارب عريض حطت النعال تحت ابطها ولفت الايشارب عليه بقوه بشكل مايل حتى ماتطيح حست انها مومرتاحه بس بتستحمل لبست عبايتها واخذت شنطتها ونزلت كانت الصاله فاضيه خرجت من البيت شافت متعب بالسياره توجهت له فتحت الباب وركبت وهي تسلم ، رد عليها السلام بهدوء وشغل انوار السياره ورفع عبايتها يتأكد وش لابسه متعب : الشنطه حمدت رغد ربها بسرها : ماحطيت شي شوف "مدت له الشنطه " بس متعب من شكل الشنطه عرف ان مافيه شي ، سمى بالله وحرك كانت الساعه تشير على 6:45 على مايووصل للمزرعه قدها 7:30 أو 7:45 بدى يدردش مع رغد ويسألها عن حالها خصوصا انهم امس راجعين من الرياض بالليل ولما صحى الصبح لهى مع احمد ويادوب جا ولبس وهذي جلسته معها ’، بالمزرعه الكل كان مرتبش ويتأكدون من الاستعدادات خصوصا انه ماباقي شي على جيه الضيوف بغرفه البنات اللي كانت كأن اعصار جاي وضربها ملابس ، علاقات مرميه بكل مكان التسريحه عطور طايحه بنس منتشره اسلاك الفير والسيراميك اكسسوارات دخلت لينا الغرفه : ليان اتصلي على متعب استعجليه عشان رغد ، الناس بدو يجون وهم لسا ليان وهي تلبس الحلق : طيب بس اخلص لينا : استعجلي الكل خلص الا انت ليان هزت راسها وهي ساكته ، أخذت اكسسوار شعر وحطته بمقدمه شعرها وبدت تتأمل نفسها لو ناقص شي كانت طالعه بنووته ناعمة بشكل موطبيعي فستانه الليكي توب وقصير لنص الساق وشعرها الكيرلي اللي غطت فيه الجزء العاري من كتفها وظهرها ابتسمت وهي راضيه عن شكلها ، مسكت عطرها وبدت ترش بشكل عشوائي على نفسها حطته واخذت الجوال وطلعت من الغرفه وهي تدق على متعب اللي رد عليها وقال انه لسا منزل رغد ’، عند رغد اللي أول مادخلت وشافت فرح مسكتها وسلمت عليها وطلبت منها توصلها لغرفه فاضيه حتى تتأكد من نفسها دخلت رغد الغرفه وسكرت الباب خلعت عبايتها وفكت الايشارب اللي مضايقها لبست النعال وانفتح الباب التفتت تشوف من شافتها ليان ليان : اخيرا مابغيتو تجون ابتسمت رغد وهي تكمل لبس : وش اسوي انت تعرفين اني انا اللي عدلت نفسي وتعرفين عاد متى نخلص وغير كذا اخوك وقف لي ع الوحده ابتسمت ليان : ليه وش فيك انتي وياه رغد توجهت للمرايه اللي موجوده القت نظره سريعه على نفسها ووهي ترش العطر : ابد بس عشان النعال يقول عاليه ومدري ايش ليان : ههههههه طيب شوفيك بالاخير سمعتي كلامه ، كان ريحتي نفسك من البدايه التفتت لها رغد وهي تغمز لها : افا وانت موقعه اني مااسوي اللي ببالي ليان : وش سويتي رغد : ابد والله سويت حركه بسيطه وخبيتها ولما ركبت معه سوالي تفتيش للشنطه وتأكيد من الرجول ومشت عليه "رفعت فستانها" بس وش رايك ليان : هههههههه والله انك خبله لو يدري عنك ماخلاك تطلعين من البيت ، بس ماتحسينها عاليه رغد وهي تأشر على السرير : لا حرام عليك شوفي وش مخليني البس وماعندي واطيه وغير كذا كلها ساعتين بس "وبضيقه كملت " لأني سمعته بالسياره يكلم ويقول ع ال2 بيكون عندهم ليان : اوك بس انتبهي على نفسك وخلك جالسه افضل رغد وهي تمسك يد ليان : اوك يالله سرينا ’، عدت الخطوبه على خير وع الساعه 12 ونص اتصل متعب يستعجل رغد بالخروج ، ركبت رغد السياره وكان يكلم من طريقه كلامه انه رجل بس كانت تسمع صوت ناعم صحيح الكلمات مومفهومه بس نبره الصوت واضحه كتمت قهرها وهي تحاول تهدي نفسها كانت سرحانه على حالها ليه لما حبيته صار متزوج ويحب غيري حست بالدموع تملي عينها وحست بيده على كفها :رغد علامك ؟؟ رغد وهي تحاول تبلع غصتها : لا ولاشي بس شوي تعبانه ناظرها بقلق : وش تحسين فيه نروح المستشفى ؟ رغد : لا مايحتاج بس تعرف صاحيه من بدري وامس جايين من سفر عشان كذا خيم الصمت على السياره لحد ماوصلو البيت نزلت رغد من السياره وهو خلفها كانت تتمنى انه مايلحقها حتى تقدر تبكي على راحتها وتقدر تخلع النعال اللي نست تخلعها من استعجاله لها بس للأسف كان وراها فتحت باب الجناح ودخلت توجهت لغرفتها علقت عبايتها التفتت وهي متوقعه انها وراها بس ماحصلت احد حمدت ربها جلست على الاريكه وبدت تخلع حذيانها خلعت الاولى بس لما جت بتخلع الثانيه على دخلته ارتبكت رغد من نظراته المصدومه واللي تحولت بسرعه لغضب قرب منها بسرعه ومسكها مع زندها بقوه : انت تستغفليني ولا كيف ؟ رغد تحاول تظهر البرود في كلامها : مومعقول اروح الحفل بالي اعطيتني هزمها متعب بعنف : انا لما قلت لك كلمه تنفذينها انا ماجبت شي من عندي الكعب بحالك بيضرك رغد : انا ماجاني شي شوف خلاص عاد فكها سيره شي عدا وراح متعب : لا ماني فاكها سيره استغفالك لي هذا شي كبيــ.... قطع عليه كلامه صوت جواله توه استوعب انه تأخر على الموعد نفض يديه منها وتركها وراح وهو يقول بغضب : لاتنتظريني وخرج من الجناح والبيت اما رغد فكانت مصدومه مجروحه لايمكن حركه الاستغفال يمررها متعب كذا بس من المكالمه مااهتم .. غير كذا نفضه يده منها وكأنه مقروف لا هذا شي كبييير كبيييير حاولت تهدي نفسها بكلمات "لاتبكين يارغد لاتبكين شي عادي انتي متعوده عليه " بس دموعها كانت اقوى منها نزلت دموعها وهي تكابر.. ’، باليوم الثاني حست بالشمس تضايقها بنومها غير كذا ملابسها ماكانت مريحه فتحت عينها بهدووء بليييغ تحس وجهها مشدود راسها صداااع فضيييع تعدلت وهي تحس بألم بظهرها تأملت الغرفه لثواني بعدها بدت تخلع ملابسها وتروح لدوره المياه تاخذ شور سريع حتى تصلي الصلوات اللي فاتتها ، طلعت والروب عليها استقرت عينها على الساعه كانت 5 ماباقي شي على المغرب لبست جلابيه خفيفه وفرشت سجادتها وصلت اللي فاتتها وانتظرت على السجاده صلاة المغرب حتى يدخل وقتها خلصت من الصلوات طوت السجاده توجهت للتسريحه شافت وجهها باهت عينها كان فيها انتفاخ بسيط حطت كحل وروج بدون اي اهتمام بالاساس رفعت شعرها وتعطرت وطلعت من الجناح بعد مااخذت جوالها نزلت حتى وصلت للصاله كان الهدوء مخيم عليها والانوار طافيه استغربت نادت الخدامه بس مااحد رد عليها توجهت للمطبخ وكان خالي وطافي تنهدت بضيق وراحت للجناح من جديد جلست تلعب بالايباد حتى ملت وفتحت موقع الجامعه وبدت تشوف المواد وتتأمل الجدول للمستوى الاخير كان عندها 3 أيام اوف يعني راحه لها بما ان موادها هالمستوى قليله وراحت لمواد المستوى اللي فات وجلست تتأمل معدلها في المواد ومعدلها التراكمي سكرت الموقع و تنهدت حست انها جوعانه بس مومشتهيه تاكل شي راحت للمطبخ فتحت احد الادراج طلعت منه شبس ليز ماكس حار كبير وبيبسي وسكرته راحت للثلاجه وطلعت زبادي وسوت صوص للشبس وحطت ثلج بكاس كبير وتوجهت للصاله وبدت تاكل كانت مخبيه عن متعب هالاغراض اللي لو درا عنها ماجلست عندها ولا ثانيه ابتسمت بفرحه وهي تشوف الغازات من البيبسي اللي نادر ماشربته من بدايه الحمل رفعته لفمها وبدت تشرب بتلذذ على ان الجو بارد بس مااهتمت تبي شي يبرد النار اللي جواها شغلت الايباد وجلست تشوف فلم بإندماج تحركت من مكانها واستقر نظرها على الساعه كانت 9 ونص فجأه حست بوحشه المكان البيت خالي من كل الاشخاص عداها يوم كامل لحالها بالبيت شكل خالها قرر ينام بالمزرعه والمسمى زوجها نايم عند عليا غمضت عينها بقهر وهي تنفخ الهوا من فمها قامت وراحت للغرفه صلت وقررت تدق على عبير شوي ووصلها صوتها عبير : أهلين رغود رغد : أهلا عبير كيفك عبير : الحمدلله انتي أخبارك وأخبار حملك معك رغد : الحمدلله عبير : من وين طالعه الشمس طرينا على بالك رغد : هههههههه والله يااختي فاضيه فقلت أدق أسولف معك شوي عبير : ههههههه زين والله دام فضيتي ودقيتي جلست تسولف معها شوي وبعدين سكرت منها ابتسمت بهدوء وهي تحس براحه تجاه عبير اللي عوضتها عن نورة صحيح تفقدها لما تتغيب عن الجامعه بس الحين انضافت لهم انسانه جديده ثالثه من طرف عبير .. تذكرت أول يوم قابلت البنت . . بأيام الاختبارات كانت هي وعبير متفقات يحضرون قبل الاختبار بنص ساعه يراجعون الأشياء المهمه مع بعض . . كانت رغد جالسه بمكانهم المعتاد تراجع انتبهت لعبير جايه نحوها ومعاها بنت وقفت وسلمت على عبير وعلى البنت . . عبير بعد ماجلست : رغد أعرفك هذي بنت صديقه أمي "عليا " ... عليا أعرفك على رغد عليا بلإبتسامه هاديه : أهلا رغد .. تشرفت رغد وهي ترد الابتسامه لها : هلابك حبيبتي الشرف لي عبير وهي مبتسمه : ماكنت صراحه اقابلها لأني ماكنت متوقعه انها معنا بالجامعه . . لسا الحين قابلتها بالصدفه . . أمي كانت تقولي انها كانت تجلس لوحدها ومامعاها رفقه "وجهت كلامها لعليا " من الحين هذا مكانا المعتاد أول ماتخلصين محاضره دايركت تعالي هنا ومن بعدها وعليا فرد جديد انضم لها ولعبير وتعددت المقابلات بأيام الاختبارات وتبادلوا الأرقام وفيه تواصل خفيف بالواتس بما ان تم انشاء قروب لهم الـ3 "عبير - رغد - عليا " تنهدت وهي مقرره تدق على متعب تبيه يجي لايمكن تجلس باقي الوقت لحالها رفعت السماعه لأذنها وانتظرت لفتره حتى وصلها صوته البارد : هلارغد رغد : كيفك متعب ببرود : الحمدلله وانتي رغد : الحمدلله ، متـ... انقطع صوتها وهي تسمع صوت خفيف بس كانت الكلمات واضحه "متعب بس هاي اللعبه الله يخليك بعدها نروح للمطعم" متعب بإستغراب لما طولت ماتكلمت : رغد فيك شي تبين شي رغد بغصه وهمس : لا لا خلاص ولاشي بس حبيت اتطمن عليك باي سكرت رغد السماعه بدون ماتسمع لمتعب بدت تبكي بصوت عالي خلاص ماتقدر تستحمل ليه حظها كذا ليه كل اللي تحبهم مايكونون من نصيبها بالأول تركي والحين متعب ليه كذا ’، عند متعب اللي استغرب في البدايه بعدين مااهتم لأنه ماتوقع ان رغد سمعت شي لأن عليا لما كانت تكلمه كانت تكلمه من بعيد ع الساعه 11 ونص خرجواعليا ومتعب من المطعم متعب : هاه حبيبي وش رايك بالمطعم عليا : وااااو مره لذيييذ ، احلى يوم بعمري الله يخليك لي حبيبي ابتسم متعب وقبل مايتكلم رن جواله كانت ليان : اهلين ليونه ليان : اهلين متعب كيفك متعب: الحمدلله انتو كيفكم ليان : الحمدلله ، الا اقول متعب أدق على رغد ماترد متعب : طيب روحي لها الجناح يمكن الجوال بعيد عنها ليان : بس احنا من امس بالمزرعه نايمين متعب بصدمه : اييييييييش نايمين بالمزرعه ليان : ايوه ليه ماتدري متعب وهو يحرك السياره بسرعه حتى يروح لرغد يوم كامل لوحدها بالبيت خاف لما قالت ليان انها ماترد على الجوال : طيب انا بروح الحين وبشوفها باي عليا بقلق : شو مستوي متعب متعب بذهن مشتت : ولا شي بس بروح اشوف رغد لوحدها بالبيت لوت عليا فمها بضيق : مافيها شي قبل ساعه متصله عليك متعب بضيق وهو يوقف عند العماره : خلاص عليا ، يالله انزلي وسكري الباب زين عليا : بتجي اليوم تنام عندي متعب بإستعجال : لا عليا طلعت من السياره ودخلت العماره كل هذا تحت انظار متعب حرك بسرعه متوجه للبيت اللي وصله بوقت قياسي وطول الطريق يتصل على رغد بس مايلاقي رد ركض لجناحه وهو يفكر يوم كامل ورغد بالبيت بدون اي ناس موحش فمابالك برغد اللي ماتعودت ابد تكون لحالها دخل للجناح وشاف الصاله الكنبه مومرتبه فيها مفرش والطاوله عليها علبتين بيبسي صحنين فيها بقايا شبس والايباد والسماعه بجنبهم لو كان بحاله افضل من كذا كان حاسبها بس الحين كل اللي في باله انها تكون بخير ومايكون صار لها شي . . مشى للغرفه وفي باله اسوأ التخيلات فتح الغرفه بهدوء وهو يدخلها حتى استقر نظره على السرير وهي نايمه ومتكوره على نفسها من البرد تقدم لها حتى صار فوق راسها هز كتفها بخفه وهو يناديها بصوت واطي انتبه لها تفتح عينها وترجع تسكرهم بعدم استيعاب كرر نداءه لها ونفس النتيجه علا بصوته حتى فتحت عينها وتعدلت بوضها بشكل سريع وهي تحس بألم غير طبيعي بظهرها متعب : فيك شي رغد وهي تحس ان الالم فوق احتمالها الم بظهرها والم براسها بسبب نومها وهي تبكي قاالت بصوت مبحوح : لا متعب انتبه لعينها الوارمه لعن نفسه مليون مره : طيب قومي غسلي وتعالي ابيك وتحرك خارج الغرفه ينتظرها بالصاله تأملته وهو خارج جلست بمكانها بضع دقايق وتحركت رغد بهدوء ومشت لدوره المياه كانت تحس ببروده ورطوبه على رجلها كامله موعارفه سببها نزلت راسها راسها على لبسها وانصدمت من اللي شافته التفتت بسرعه للسرير اللي كان فيه بقعه حمرا ’، عند متعب اللي حس بتأخر رغد قام وراح فتح الباب والتقت عينه بعين رغد الدامعه اللي قالت : متعب دممم ’، دخلت الغرفه عليها : هاه كلمتيها هزت راسها بلا : اتصلت عليها ماردت كلمت متعب بس مومعها شكله بالدوام قال شوي وبيتصل لينا : طيب انت وش تبين فيها ليان : كنت ابيها تتأكد لي من الشعب في الجدول مع البنات . . لأن البنات الحين يقولون فيه عفسه بالجداول لينا : طيب هنا تأكدي انت ليان : الشبكه ضعيفه هنا وانت عارفه انه زحمه فماينفع يجتمع الاثنين مع بعض ، متى بنرجع البيت لينا : بكره العصر ان شاء الله تعرفين خلاص اليوم اللي بعده دوامات ليان هزت راسها وهي ساكته ’، كان جالس ينتظر الدكتوره تطمنه مايدري كيف وصل هنا من اول ماقالت له متعب دم وهو موعارف كيف يتصرف قطع تفكيره الدكتوره وقف لها متعب : هاه يادكتوره وش فيه الدكتورة وهي تجلس على المكتب : الحمدلله الجنين بخير وهي تقدر تطلع ماله داعي بقاءها بس هاليومين لازم تجي تاخذ مغذي متعب براحه بسيطه : طيب النزيف وش بسببه ؟ الدكتورة تكلمت على دخول رغد : فيه كذا سبب للنزيف بس ع الغالب انه بسبب حاله النفسيه أوالتغذيه التفتت الدكتورة لرغد : سبق وصار لك نزيف او هذي اول مره متعب توه بيتلكم بينكر الا صدمه جواب رغد : ايوه لما كنت بالشهر الثاني وبعدها بشهرين أو ثلاث هزت الدكتوره راسها : شوفي يارغد صراحه هو أعتبره أنا مكرمه من ربي انك لحد هالوقت مااجهضتي لأن نزيف 3 مرات طول مدة الحمل صعب ماتنتهي بإجهاض . . هالمره ربي سلم والحمدلله بس مره ثانيه مااضمن لك بقاء الجنين لازم تهتمين بنفسيتك وبتغذيتك ، وماتتحركين كثير أو تجهدين نفسك اما لو استمريتي كذا فراح يكون ياولاده مبكره يااجهاض كش جلد رغد من طاري الولاده والاجهاض : اوك الدكتوره : بالسلامه ان شاء الله ’، مقتطفات سريعه .. # حال رغد تحسن شوي مع اهتمام متعب فيها وقوت علاقتها بعبير وعليا ، # لينا وضعها مثل ماهو رجعها صقر ويوم يكون مافيه أحلى منه وأيام نفس قبل # هبه رجعت للدمام بالضيف الجديد والكل طاير به والكل يشبه فيه مره يشبه فيصل ومره ليان ومره لينا ومره التوأم ، # رهف الكل طاير بها بسبب هالحمل اللي أدخل على البيت قليل من الفرح وكل البيت شايلها توصيات لاتشيلين ، لاتسوين ، لاتتحركين # ليلى وأحمد - دينا وعمر .. علاقتهم مافيه أروع منها وعايشين بهدوء ويخططون لمستقبلهم مع بعض # سعود ونوره تقبلت نورة سالفه الاجهاض وأم فواز وفواز عرفوا بسالفه تحرشات راشد بنوره من الأول وعاتبوها على صمتها ، ام فواز تطلقت بعد مااجبر فواز راشد اللي مقطوط بالسجن من ذاك اليوم بسبب التحرش # بدر تقدم لخطبه ايلاف بعد مافاتح أهله ولاقى قبول ماكان متوقعه بسبب أوضاع أهل ايلاف المعيشيه .. ايلاف اللي كانت بآخر فتره من فترات الابتعاث مع شقيقها هاني وينتظرونها تنتهي من آخر المواد حتى تتم الملكه ’، بأحد صباحات الدوام توها طالعه من المحاضره ولمحت عبير اللي كانت بمكان صاد عن البنات وماهي منتبهه لها ابتسمت وهي تطلع جوالها وتشغل تسجيل الفيديو وتقرب منها بخفه وهي ناويه تخرع عبير حتى تشوف عبير شكلها ولما قربت وضح صوت عليا وهي تتكلم واللي صدمها عبير : هههههه لا ياحبيبي مابتخاف ماحدا بيعرف اصلا ، من حكي لعليا ان اخته عندهم بالبيت ونادر تروح لبيتا عبير : يزيد مضبط كل شي وغير هيك اللي يأكد لي نجاح الخطه هي من كلام جوز عليا المصون عبير : ههههههههههههههههههههههه هو متل الخاتم بإصبعا . . خالي احس اني كل مابشوفو يحسسني بالقرف آآآه متى بس آخذ بتاري منهم عبير : انا ابتديت بأخته وشوف حياتا كيف لما ارسلنا لجوزا صور الها وشوف كيف انألبت حياتا وهي لساتا عروس ياحياتي عليا هو عليا مسيطرا عليه وكل الأخبار بتوصل لإلي ، مرت بيوه عند عمر أدله بتسبت حركاتا الملتويه وكمان عنده صور لإلها بس آآخ لو عمر يسلمها لإلي ومابائي الا خيتو لصغيره وهي دورها أريب ان ماخليت سمعتهم بالأرض مااكون أنا عبير عبير : مابتخاف خالي عليا رفيئتي وأنا بعتمد عليها بأمور كتير لما كنا ندرس مع بعض في كندا انصدمت رغد صدمه عمرها ماتخيلت عبير كذا رجعت بسرعه حتى ماتنتبه لها عبير جلست بأحد الطاولات تحاول تستوعب منهم اللي تحاول تدمرهم هي وعليا وتنتقم منهم معقوله زوج عليا ، لا لا مااعتقد مافيه وحده بتلعب على زوجها وتكذب عليه ، يوووه انا وش دخلني بكيفها ، لا لا ياررغد انت موكذا هذي فيها سمعه عايله لو صار لها شي بتروح فيها وهي مالها ذنب كله بسبب هالخبيثه ، بس لحظه لحظه كيف عبير درست برى هي وعليا يعني الحين المفروض ماتكون هنا . . يااارب . . طيب كيف بعرف عايله زوج عليا كيف يارغد كيف آآآآآه ماني قادره افكر من الصدمه حست بشي قطع تفكيرها التفتت شافت عبير : رغوود وين رحتي جلست رغد تتأمل عبير وهي تفكر حتى قطعت عبير تفكيرها من جديد : يااهووووه رغد بنفسها ، خلاص يارغد لاتفضحين نفسك : هلا هلا عبير عبير : وينك من زمان اكلمك رغد : سامحيني عبير بس سرحت شوي ، الا انت وينك دورت عليك مالقيتك عبير : ابد بس كنت ادور لحد ماتطلعين من المحاضره ، عندك محاضره ثانيه ؟!! رغد : ايه بس شكلي مابحضرها بطلع عبير : ليه عسى ماشر ؟ رغد : لا ابد بس احس بتعب شوي وامس مااحس اني نايمه كويس عبير : طيب اتصلتي بزوجك رغد : لا الحين بتصل ، وانت عندك محاضره عبير وهي تضحك : هههههه وش فيك نسيتي اني اليوم محاضره ثانيه معك رغد بابتسامه مغتصبه : ايه صح نسيت ، طيب بتحضرين عبير : لا دامك بتسحبين بسحب رغد : وين عليا عبير : عليا امها تعبانه فتغيبت اليوم رغد : الله يشفيها . . طيب انا بدق الحين على زوجي عبير : أجل انا بطلع الحين السواق اكيد برى ينتظر رغد : طيب اشوفك بكره على خير ’، العصر كانت جالسه بالصاله تفكر ماتعرف كيف تلقى حل للكلام اللي سمعته ، رفعت الجوال لأذنها بعد مادقت على نورة وقررت تستشيرها وصلها صوتها المحبب نوره : مرحبا الساع ولايسدن رغد : ههههههههه مراحب وش فيك انقلبتي اماراتيه نوره : أكيد ياعزيزتي بنقلب اماراتيه ماهو انا من يومين عندهم رغد بمفاجأه : احلفي بالله نوره : ههههههه والله سعودي حبيبي الله لايخليني صار عنده سفره لدبي شغل وتمشيه وقرر يوديني فديت قلبه رغد : هههههه الله يخليكم لبعض نوره بحب : امين ياااارب رغد : احم نوره انت مشغوله او سعود عندك نوره : لا سعود مايجي الا قريب المغرب ليه فيك شي رغد : لا بس ابي مشورتك نوره : بإيش رغد : قالت السالفه لنوره نوره : اياااك يارغد تتدخلين رغد : بس يانوره هذي سمعه نوره بغضب : وانت وش عليك منها يمكن تدري ان لك طرف بالسالفه بعدين وتوهقك والله ماتفكك من مشاكلها انتي صاحيه وابتعدي عنها رغد : نوره الله يخليك قولي كلام غير هذا انا مااقدر اشوف شي زي كذا واسكت عنه نوره : رغيد بلاهبل هذي حقوده ممكن تدمر حياتك يااختي رغد بعدم اقتناع : انا ماراح اسكت نوره هزت راسها بقله حيله : طيب تعرفين اسم زوجها رغد : لا نوره : اجل كيف بتوصلين لها رغد: مدري والله انا ماني لاقيه طريقه بس هالفتره راح استمر معها بس بحذر نوره : رغد مالك دخل بالسالفه لاتتدخلين وبعدين تروحين انتي بداهيه رغد : مااقدر يانورة حاولت بس ماقدرت نورة بقله حيله وهي عارفه رغد وعنادها: طيب انتبهي وعلميني أول بأول وكل شي ببالك قبل ماتنفذينه رغد : ان شاء الله ’، جلس على الكنبه وهو ماسك يدها : هاه وش قلتي كانت منزله راسها من الخجل خصوصا انها جالسه بجنبه وماسك يدها : بس يااحمد صعبه انت عارف اني سبق وتزوجت والناس بعد عارفين أحمد وهو يناظرها بحب : وانا وش علي من الناس ، انا علي منك انت ، غير كذا زواجك هذاك ماهو زواج ، انتي حياتك معي انا وانا ابي أعيشك بفرحه مثلك مثل اي بنت بليله عمرها ليلى : بس يااحمد شهرين مره قليله وش يمديني اسوي واجهز أحمد بفرحه من اقتناعها : حبيبي انت اشتري الأشياء الضروريه وباقي الأغراض عادي أكملها لك بعد الزواج بس أهم حاجه تكونين معي بأسرع وقت أنا الود ودي أخذتك من أول مامكلنا بس آآآآه لازم من هالشكليات ليلى ولع وجهها من كلامه : احم خلاص مثل ماتبي أحمد وهو يقوم : الحمدلله واخيرا ليلى : ههههههه أحمد : يالله حبيبتي اأنا الحين بروح الحين انت تشوفين تو جاي من الدوام وغير كذا اطلع بكرامتي قبل يجي اخوك النشبه ويعكر مزاجي بعد اللي سمعته منك ليلى : هههههه طيب انتبه لنفسك أحمد وهو يبوس جبينها : ان شاء الله وانت بعد انتبهي على نفسك واي مكان بتطلعينه ارسلي لي رساله بس حتى اعرف وينك فيه مجرد اطمئنان ليلى وهي مبتسمه : ان شاء الله ’، بعد مضي عده أسابيع .. وقفت أمام المدخل تلبس عبايتها جا من وراها : يعني لازم تروحين بيت صديقتك قربت من المرايه حتى تتأكد من وضع نقابها : متعب انا قلت لك من قبل بس انت اللي مااعرف وش فيك متردد متعب : رغد انا خايف عليك هي مجرد زميله بالجامعه وغير كذا انت امس تتشكين من ظهرك والدكتورة محذرة من الجلسه الطويله وانتي الحين بآخر شهورك تلزمك راحه طويله أنا لو الود ودي ماتروحين هاليومين اللي بالجامعه التفتت له : انا ماراح اطول كله ساعه ان شاء الله وراجعه وبعدين عيب علي البنت كذا مره تعزمني وأنا اتعذر لها تنهد متعب بقله حيله : طيب بس انتبهي على نفسك ودقي علي وقت ماتخلصين منها لو ماكنت نايم بجي أنا وأخذك هزت راسها وهي مبتسمه رفعت غطاها وقربت منه ورفعت نفسها وباسته بخفه وابتعدت وهي خجلانه اول مره تبادر هي من نفسها وتسوي كذا رغد والحمره كاسيه وجهها : انتبه على نفسك ونوم العافيه حبيبي وخرجت بسرعه من الباب ، اما متعب اللي ظل ساكن بمكانه مومستوعب اللي قامت فيه رغد كانت نبضات قلبه مومنتظمه تنهد وهو حاس بشعور جميل تمنى انها ماتروح وتظل معه هز راسه ومشى قاصد الدرج حتى يتوجه لمكانه اما عند رغد اللي ماكانت مصدقه اللي سوته من كم اسبوع بس حسمت أمرها وراح تحارب على حبها ماراح تستسلم راح تثبت نفسها بقلب متعب لأن متعب لها وحدها مولعليا هي معترف فيها أمام الناس هي صحيح انها الثانيه بحياته بس بتخلي نفسها الأنثى الوحيده في حياته قطع تفكيرها سلسلة أفكارها السواق لما قال : مدام هذا بيت ’، ][ همســـة ][ عبارة دتفئة جدًا . . لا تحزن - ان الله معنا - اللهمّ لاتجعلنا بحاجة لـِ غيرك وَ أنت أقرب إلينا من حبل الوريد . .