الفصل 9
*قـصـص وروايـات عـالـمـيـة💙📚📖*
*بإدارة* *يـامـن💙*
*❴📖❵↵* *حب.ساحر.tt* 💙🖇️
*❴🔢❵☟الـــبـــــــــــ❴9️⃣❵ــــــــــــارت☟*
➖➖➖➖➖➖➖➖➖
*
*❴📖❵↵*تنسيق مشرفين مجموعة:*
*❴📚❵↵*قصص وروايات عالمية📚💙*
*❴💙❵↵*ننشر جميع انواع القصص والروايات العالمية*
حـب💙.
حـزن💙.
اكشن💙.
رعب💙.
*❴👑❵↵*أن كنت من عشاق ومدمني القصص مكانك عندنا💙*
*❴💙❵↵*رابط المجموعة للاشتراك:*
```https://whatsapp.com/channel/0029VaQogP17YSdATvOUwa1h```
➖➖➖➖➖➖➖➖➖
حب ساحر
"الجزء التاسع"
"بقلمي مرام
بقيان يوم على موعد العرس ،،،
وخلصنا التجهيزات ،،،والتوتر الف،،،كلنا متوترين بالبيت ،،،وامي نفسيتها صفر ،،،اجا العرس بسرعة كبيرة
ــــــــــــــــــــــــــــــــــــــــــــــــــــــــــــ
(اغيد)
".كل ماقرب موعد العرس،،، عم حس حالي عم اختنق،،،،مو حابب هالزواجة ،،،بس بتضل اهون من الزواج الحقيقي ،،،،ااااه لو بيتركوني بحالي ،،،وبلا هالزواج من اساسو،،،،عم اشتغل ليل نهار لحتى مافكر بالموضوع،،،،بس التفكير دبحني،،،،شو مصلحة رفيف تتزوجني،،،قطع افكاري رنة الجوال.."
أغيد:"اهلين طلال."
طلال:"كيفو العريس ،،،شو عم يعمل"
أغيد:"بلا كلمة عريس،،،عم اشتغل "
طلال:"طيب يازلمة صار المغرب،،، فيك تجي ضروري."
أغيد (بقلق):"فيك شي طلال."
طلال:"بدي ياك ضروري."
أغيد (وقف):"بعتلي عنوانك جاية."
طلع بسرعة ،،خاف يكون صاير شي ،،،راح عالعنوان اللي بعتو طلال،،،كان مزرعة ،،،دقلو "
أغيد:"انا عالباب ،،،انت وين؟؟
طلال:"خليك جاية"
طلع طلال فتحلو الباب ،،،سكر السيارة وانزل معي،،،
أغيد :"شو في ،،،شو بدك"
طلال:"يا زلمة شو بصلتك محروقة ،،،سكر السيارة خلصني"
"سكر اغيد السيارة ونزل"
اغيد:"وهي نزلت ،،،قلي شو في"
طلال:لحقني"
"فات عالمزرعة واغيد وراه،،،،كان في رفقاتهن الشباب ومجهزين القعدة من نقرشة،،،واراكيل،،،وعصائر ،،،وحلو."
أغيد:"شو عاملين."
طلال:"توديع عزوبيتنا."
أغيد (عم يحاول يسيطر على غضبو):وليش ماحكيت هيك."
طلال:"لو قلتلك كنت اجيت."
أغيد:"طبعاً لا."
طلال:"كرمال خاطر رفقتنا فوت،،،لاتمشي."
فات أغيد كرمال طلال وبلشت السهرة،،،ضيفوه اركيلة.."
أغيد:"شكراً ،،،مابشرب."
كانو عم يمزحو ويضحكو ،،،واغيد مبتسم لرفقاتوو،،،كان الو زمان مو مبسوط هيك،،،حس وكأنو شوفة الرفقات متل الدوا إلو،،،وبنص القعدة قام بدو يشرب مي،،،،قبل مايفوت عالمطبخ سمع تنين جوا عم يحكو،،،
(يازلمة لو صحّت لجدي ماكان مات اييي ياعمي العز للرز،، وشايف حالو كمان ) ردلو التاني(لك لمين بتصير هي،،،،قال زواجتين بسنة وحدة) رد(اييي وعامل حالو شريف مكة،،،وعم يتقل حالو )ردلو التاني(لك لا تسدق ،،،هي مظاهر ،،،في حدا بصحلو يتزوج ،،،وبقول لا ،،،،لك على قولة المتل اعزب دهر ولا ارمل شهر) رد(اي تركو عامل حالو زعلان،،،لو زعلان ماكان اجا)
ماعاد يقدر يسمع اكتر من هيك،،، فتل ضهرو ومشي بدون ماحدا يشوفو ،،،
( واقف بسيارتو عند إشارة المرور. ضو أحمر،و الشارع زحمة.)
فتح الشبابيك شوي ليدخّل هوا، فجأة بيسمع من السيارة اللي جنبه صوت اغاني طالع عالي:
> "بعدك على بالي… يا قمر الحلوين…"
أغياد يلتفت بخفة صوب الصوت. يشوف شاب وبنت عم يضحكوا جوّا السيارة، عايشين اللحظة. قلبه ينخنق.
أغيد (بهمس):
"بعدك على بالي… إيه… بعدك بقلبي متل ما كنتي."
شدّ عالدركسيون، وعيونه عم تلمع، نظراته راحت لبعيد كأنه عم يشوف وجه مرتو اللي راحت. الغنية من السيارة التانية بتكمل:
> "مهما تغيبي… يا حلوة الروح…"
دمعتو نزلت غصب عنو،،، بسرعة مسحها، طب راسه على الكرسي ومسك نفسه. صوت زمور وراه بيقطع شرودو، الإشارة بتصير خضرا.،،،شغل سيارتو ومشي،،، بس الصوت يضل يطن براسه كأنه ما انطفى.."
ــــــــــــــــــــــــــــــــــــــــــــــــــــــــــــ
"..يوم العرس.."
البيت مليان حركة وضحك. لينا وسهام وأهل الحارة رايحين جايين، صواني قهوة، صينية كعك، أصوات أغاني عرس شامية طالعة من التلفزيون،،،. رفيف وريم قاعدين بالغرفة قدام المراية،،، والكوافيرات عم يزبطو شعرهن)
ــــــــــــــــــــــــــــــــــــــــــــــــــــــــــــ
أغيد قاعد على تختو بغرفته، لابس قميص أبيض،، وجهو شاحب،،،. أبوه بالمضافة تحت عم يستقبل الضيوف من الصبح.،،، بتفوت عليه سما حاملة طقم بدلة جديد معلّق بكيس.)
سما (بصوت دافي):
– يلا يا روحي، اليوم يومك… لازم تبين أمير قدام العالم.
أغيد بتسم ابتسامة باهتة.
أغيد ( بعد ما تطلع أمه):
– اليوم رح صير عريس… بس قلبي، لساتو محل ما تركتو. الله يرحمك يا نور… ما بعرف إذا بقدر بلّش صفحة جديدة.
وقف ببطء، فتح كيس البدلة، طلعها، لمسها كأنه عم يلمس شي غريب عنه. حطها عالكرسي، وقعد لحظة، يدفن راسو بين إيديه.
ــــــــــــــــــــــــــــــــــــــــــــــــــــــــــــ
فضي البيت أخيراً ،،،كرمال ناخد راحتنا باللبس،،،،كنا عم نلبس الاكسسوار وخالتو سهام عم تساعدنا،،،كان عم تسكرلي الاسوارة،،،
ريم(بنزق):"حدا يساعدني ،،،،هففف ماعم اعرف حط الحلق."
سهام(عم تضحك):"حبيبتي ما بتتأخري ،،،انتي العروس وبدونك ماببلش العرس."
ريم:"اييي صح ،،،بس بحب كون جاهزة دغري،،"
فاتت لينا وشافتهن واقفين ،،،،ببدلاتهن البيضة ،،،والطرحات الطويلة ،،حكتهن وهية مدمعة"
لينا:"الحمد لله اللي اجا هاليوم،،،وشتكن احلى عرايس"
قربت رفيف وحضنتها":لا تبكي ماما ،،،هلق بتبكينا"
لينا:"هي دموع الفرح."
سهام:"ولو كانو دموع فرح ،،،اجليهن كرمال الصبايا."
لينا مسحت دموعها :"خلص،،،نحنا اليوم فرحانين."
سهام:"الله يديم الفرح عليكن،،،انا رح اطلع شوف لما ازا خلصت ونلحقكن عالعرس،،"
لينا:"نشالله عقبال تفرحي فيها.."
( بعد ماراحت فات بابا كان مدمع وعشوي بيبكي)
حازم:"اجا اليوم يلي شوفكن فيه احلى اميرات ."
"قربنا بسنا ايدو "
رفيف:"رضا علينا يابي."
حازم:"الله يرضا عليكن ويحن عليكن نشالله بتتهنو."
ريم:"شوف بابا،، شو رأيك ،،،شلون طالعة،، بالله عليك مو انا احلى من رفيف.."
حازم(بضحك):"طالعين متل الاميرات ،،،تنيناتكن حلوين.."
ريم:"لكن هلق بتوصي طلال فيني."
حازم:"رح وصيه يسامحني على هالبلوة"
ريم:"هيك بتوصي أغيد ،،مو طلال.."
حازم:"رح وصيكن فيهن،،،،قبل ما وصيهن فيكن ،،
،بناتي الحلوين، اليوم صار يومكن، وعم تبلشو حياة جديدة مع شركاء حياتكن. قبل ما تبلشوا هالرحلة، بدي وصيكن شغلة من قلبي:
كونوا صادقين دائمًا مع بعض، احترموا بعض، وخلوا المحبة والطيبة دائمًا أساس بيتكن. الصبر والتفاهم هو سر البيت السعيد، وما تنسوا تضحكوا وتفرحوا بكل لحظة مع بعض.
كونوا لبعض سند، وكونوا لبعض الأمان، ولا تنسوا الحب الحقيقي بيكبر بالعطاء والتقدير. أنا فخور فيكن وبفرح لكل خطوة بتاخدوها مع بعض،تذكرو دائمًا أنكن جزء مني، مهما بعدت المسافات، ورح ضل دائمًا جنبكن بدعمي وحبي الكن."
(غمروه كل وحدة من جهة)
رفيف _ريم:"يخليلنا ياك بابا.."
لينا:'صار لازم نطلع عالصالة،،،رح نتأخر."
ساعدتهن امهن لحتى لبسو العبايات والشالات ،،،الباب عم يندق،،طلال بدو يوصل عروستو عالصالة،،،نزلت ريم بمساعدة ابوها ،،،وطلعت بالسيارة مع عيلة طلال،،،وانطلقو عالصالة،،،بينما وصل اغيد وسما كرمال ياخدو رفيف،،،
(رفيف)
كنت عم اتأمل بيتنا قبل ماامشي،،، ماعاد نام هون،،،ماعاد رح شوف هالبيت كل يوم،،،هون رح اترك ذكرياتي،،،رح روح لبيت تاني،،،حياة تانية،،،مابعرف شو ناطرني ،،،مابعرف الايام شو مخبيتلي ،،،يارب آلف بين قلوبنا،،،مسكت ايد ابي عن اليمين ،،،وايد امي عاليسار ،،،ونزلت ،،،كنت عم ودع بنايتي،،،والدرج،،والزريعة المركونة بالزوايا،،،طلعت بالسيارة وانطلقنا عالصالة،،،وصلنا كانت ريم خالصة تصوير،،وهلق اجا دوري،،،الاضواء كلها عالباب،،،والموسيقى العالية بتعلن وصولي ،،،امي وحماتي دخلو قبلي كرمال تكون الساحة فاضية الي وبس ،،،شديت ضهري ،،،ورسمت الابتسامة ،،،بالرغم من اني عم ارجف،،،بس هاللحظة مارح تنعاد،،،انا عروس اليوم،،،ماسكة الباقة بإيديي وعم امشي خطوات بطيئة لحتى بلشت كلمات الغنية نفتح الباب"
"ادخلي عمري بخطواتك اليمين"
دخلت بخطوات بطيئة،،،الاضواء موجهة عليي،،،والكاميرا عم تصور،،،اصوات الزغاريد العالية وابتسامات العيلة والاقارب هدت من رجفتي،،،بخطوات هادية مشيت لوصلت للمسرح المخصص للرقص ،،،وكالعادة بس توصل العروس للمسرح بتشتغل غنية الرقص،،،
"وقفت عالمسرح وشتغلت الغنية"
يا ريت كل الليالي بحلا ها الليلة، ويا ريت قضي العمر مقابيلك
ويا ريت نصير إنت وأنا عيلة، وست البنات غني ونادي لك
طل القمر متل ملاك صغير، شمس الدني طلعت بطلتها
متل القمر، وأحلا بعد بكتير ع طول المدى بتطير طرحتها
(كنت عم اتمايل مع الغنية بهدوء والنعومة ،،،نظراتي للكاميرا،،،ومع كلمات الغنية مايلت طرحتي للمعازيم،،
(إنت القمر كل البنات نجوم، إنت أميرة بفستانك الأبيض
خلص الحكي بعدك وما له لزوم، خلص الزهر ع خدودك مورد)
"ولما خلصت الغنية قربت حماتي"
سما:"الف الف مبارك،،لاحلى عروس."
رفيف:"الله يبارك فيكي مرت عمو.."
"ساعدتني لحتى قعدت عالأسكي ونزلت تسلم عالمعازيم.."
ريم(بدهشة):"اي شو هاد ،،،ولك بتجنني كنتي،،،اللي بشوفك بقول مقضية حياتك عالمسرح.."
رفيف(ضحكت):"بعض ما لديكم...تعلمت منك الجرأة،،"
ريم:"اي لا تسدقي حالك كتير،،،على شوي كنتي دبتي من الخجل."
"اجت سارة سلمت عليي وبوستني"
سارة:"لك شو هاد،،لك شو هالحلاوة،،،رح يطير عقلو اغيد.."
رفيف(بخجل):"لا تبالغي،،،حلاوة عيونك،،،وانتي طالعة بتجنني ،،،"
سارة:"اييي شكراً شكراً،،،هاد من ذوقك،"
ــــــــــــــــــــــــــــــــــــــــــــــــــــــــــــ
"عند الرجال كانت الاجواء غير شكل"
كانو الشباب حاملين طلال،،،، والعراضة عم تدور حواليهن، ،،،الاغاني عالية ،،،ودق على الطبول،،،والعيلة مجتمعة،،،كان اغيد قاعد عالكرسي المخصص ،،ومو رضيان يرقص.."
(اغيد)
كلشي عم يصير بسرعة ،،،،ماتوقعت عيش هيك يوم ،،،،عم حاول اتبسم،،،بس جواتي غصة رح تقتلني ،،،اسف نور ،،،ماقدرت حافظ على وعدي الك،،،وعدتك تكوني الوحيدة بحياتي،،،وهي انا عم جيب غيرك على بيتي،،،ماني قدران اتصنع اكتر من هيك،،،عم عد الثواني لحتى ارجع لبيتي ،،،ولعزلتي ،،، اااخ يا نور،،
ــــــــــــــــــــــــــــــــــــــــــــــــــــــــــــ
عند النسوان كانت الأجواء حافلة ،،،رقص،،،وضيافة،،،وتصوير العروسات،،،وهلق اجا وقت رقصة العروسات مع امهن،،،
وقفو عالمسرح ،،،وهنن عم يتمايلو على النغمة :
"..كفيتي ووفيتي ،،كبرتيني وحضنك بيتي
كلن فلو وانتي بقيتي تخبيلي بقلبك اسرار.."
حضنو امهن اللي ماقدرت تمسك دموعها ،،وبكيو معها،،،مشهد عاطفي خلا العالم يقشعر بدنها،،،
ـــــــــــــــــــــــــــــــــــــــــــــــــــــــــــ
حازم واقف لابس بدلة رسمية، ملامحه بين الفرح والفخر وبين دمعة محبوسة. جنبه واقفين: أغيد وطلال
حازم (بصوت مبحوح وهو بيطلع فيهن):
– يا شباب… اليوم أنا بسلّمكن أغلى ما عندي… رفيف وريم. هدول مو بس بناتي، هدول روحي وعمري.
أغيد نزل راسو باحترام، طلال بيهز راسو موافق. حازم حط إيدو على كتف أغيد:
حازم:أغيد… بعرفك رجال وَفي وبتخاف الله، وصيتي إلك بنتي، رفيف، متل ما ربيتها عالكرامة والعز. خليها بعيونك، لا تحسسها يوم إنها غريبة، إنت صرت إلها السند والأمان.
أغيد (بابتسامة خفيفة وعيون مدمعة):
– الله يخليلك ياها يا عمّي، بوعدك تكون معززة مكرمة.
حازم لتفت على طلال، ومسك إيدو بقوة:
حازم:
– طلال… ريم قطعة من قلبي، وصيتي إلك فيها إنك تكون رفيقها قبل ما تكون جوزها، لا تخلي دمعة تنزل من عيونها، وخلي بيتك مليان محبة.
طلال (بحماس): لا تخاف عمّي، ريم رح تكون بعيوني،.
حازم:
– الله يوفقكن، ويجعلكن ستر وسعادة لبعض، ويرزقكن الذرية الصالحة.
اللحظة بتنتهي بزغروطة من جوّا الصالة، أبو رفيف بيمسح دموعه بسرعة وبيبتسم: صار وقت تاخدو نسوانكم..
أغيد:..عمي من بعد أذنك ،،،حابب أنت تدخل تجيب رفيف،،،..
حازم:متل ما بدك..
عند النسوان: إدارة الصالة ترحب بقدوم ابو العروسات.
الكل بيصفق ويزغرد، والباب بينفتح، دخل حازم ببدلته الكحلية، رافع راسو بفخر. النسوان يزغردوا بصوت عالي،، مع غنية فرح. حازم مبتسم،
بعد كم خطوة، بيتجه صوب رفيف، اللي بتوقف عمهلها، مبتسمة وخجلانة،، عيونها عم تدمع. أبوها بيمد إيدو إلها.
حازم (بصوت حنون):
– يلا يا بنتي… تعي لعريسِك، خلينا نفرح فيكي.
رفيف مسكت إيد أبوها وباستها،،، ،
واجا دور ريم،،،سلمت على ابوها وباست ايدو،،
الكل بيصفق ويزغرد.،،،تصورو صور جماعية،،،،
حازم:رفيف،،، أغيد عم ينطرك برا..
قربت امها بالعباية ،،وساعدوها تلبس ،،،وحطولا الشال..سحبها حازم ومشي معها بخطوات بطيئة، وعيون العالم عليهم.،،وهنن ماشيين عند باب الصالة.
قدام الباب، سيارة مزينة بالورد واقفة. أغيد عند السيارة، لابس بدلته، واقف بوقار وحزن مخفي. يلمح رفيف جاية مع أبوها، غص شوي، بس شد حاله.
حازم (بصوت حنون وهو واقف قدام السيارة):
– يلا يا بنتي…من هون رح تبدأ حياتك الجديدة.
حازم فتح باب السيارة الخلفي، بس قبل ما يدخلها، بيوقف قدام أغيد، بيطلع بعيونه بقوة:
حازم:
– هي بنتي يا أغيد… أمانة برقبتك. بعرفك رجال، وبعرف إنك رح تحافظ عليها، بس بذكرك… رفيف مو بس بنتي، هي روحي.
أغيد هز راسه، وصوته مبحوح:
– لا تشيل هم يا عمّي… رفيف رح تكون بعيوني.
حازم لتفت لرفيف، ، ودموعه محبوسة:
– الله يسعدك يا بنتي… لا تنسي بيتك وأهلك.
رفيف( هزت راسها، ودموعها على خدها)، همست:
– الله يخليلي ياك يا بابا.
ساعدها حازم تدخل السيارة. قعدت وعيونها عليه. سكر الباب برفق،:
حازم:– دير بالك عليها..
أغيد هز راسو بهدوء، ركب بالسيارة ومشي ...والسيارة التانية مشيت فيها عيلتو،،،،
حازم واقف بمكانه، راقب السيارة وهي عم تبعد، اخد نفس عميق، مسح دمعة من عيونه. بعد لحظة لتفت، عدّل بدلته وقال بنفسه:يلا… عندي عروس تانية لسا بدي أامن عليها...
عند النسوان: إدارة الصالة ،،،ترحب بقدوم العريس..
باب الصالة نفتح، دخل طلال ببدلته الأنيقة، وابتسامة عريضة على وشو.
..لستقبلتو ريم عالباب،،
طلال مد إيده لريم ومشيو سوا ناح المسرح...
طلال (بابتسامة عريضة): وأخيراً ريم،،،،اليوم يلي بحلم فيه.
ريم توقف بخجل، تمسك إيده، وتبلش ترقص معه بخطوات خفيفة على إيقاع الموسيقى. النسوان عم يصفقوا بقوة، والزغاريد عم تعلى.
طلال يلف ريم بدائرة صغيرة، ويضحك معها، وهي تضحك بخجل. الجو كله فرح وبهجة،،،،
ووقت خلصو رقص وتصوير دخل حازم على الصالة. وقفته فيها هيبة ودمعة فخر بعيونه. الموسيقى تهدى شوي. بيقرب صوب ريم وطلال، بيمد إيده لريم.
حازم (بصوت حنون):
– يلا يا بنتي… تعي لعريسك، خلينا نطالعكن سوا.
ريم تترك إيد طلال، تمسك إيد أبوها، وهو بيقربها لطلال. بعدها يحط إيد ريم بإيد طلال رسمي قدام النسوان، والكل يزغرد.
حازم (بفخر وهو يسلّمها):
– هاي أمانتي يا طلال… الله يسعدكن ويهنيكن.
طلال يهز راسه باحترام، يمسك إيد ريم بقوة، ويبتسم: – الله يخليلنا ياك عمّي.
الموسيقى تعلى مرة تانية، والزغاريد تملأ الصالة، قربت لينا لبستها العباية،،،بينما حازم حطلا الشال ،،والدموع بعيونهن ،،،طالعهن سوا
ومشيو سوا ناح باب الصالة. ريم مبتسمة بخجل، وطلال مبسوط، عم يسلّم عالعالم حواليه.
حازم (بصوت عالي بين الزغاريد):
– مبروك يا بنتي… مبروك يا طلال. الله يتمملكن بالخير.
وقف قدام السيارة الأولى، المزينة بالورد والأضوية، يلي مخصصة لريم وطلال. بيمد إيده ويفتح الباب الخلفي لريم.
أبو رفيف (بحنية)يلا يا بنتي….
ريم تطلع على أبوها، تبتسم بدموع الفرح:
– الله يخليلي ياك يا بابا.
ركبت بالسيارة،،،. طلال سلم على حازم بسرعة:
– لا تشيل هم عمّي… ريم بعيوني.
حازم هز راسه مبتسم، ضرب على سقف السيارة بإيده علامة الانطلاق.
حازم ضل واقف شوي،،، راقب السيارات وهنن رايحين بنفس اتجاه البناية، وبصوت مبحوح يحكي لحالو:
– يا رب… اجعل أيامهن كلها سعادة.
ــــــــــــــــــــــــــــــــــــــــــــــــــــــــــــ
(رفيف)
كنت عم ارجف ،،،حسيت بلش الجد،،،وصلنا عالبناية،،،وساعدني أغيد لحتى انزل من السيارة،،،طلعنا على شقتنا،،،كانت معنا المصورة ،،،دخلنا عالبيت وساعدتني حماتي اشلح العباية ،،،،،كان اغيد واقف عم يحاكي عمي ،،،،اخدتلي المصورة كم صورة عالمراية ،،،وهلق صوت اغيد اجا،،،كنت خجلانة منو،،،هي اول مرة رح يشوفني هيك،،،دخل عالغرفة واجت عيني بعينو........
(اغيد)
حسيت بلشت المهمة تخلص،،،ضاق نفسي من كتر التصنع،،،بدي ارجع للحظة هدوء،،،دخلت عالبيت،،،كانت امي عم تناديلي اتصور مع رفيف،،،
أغيد:امي مابدي اتصور...
سما: لا يوه،،،،لازم تفوت تتصور بكرا بس يجو العالم يباركو ،،،بدهن يشوفو الصور..
دخلتني غصب عني للغرفة،،،،
وقت شفتا كانت غير رفيف يلي بعرفها،،،،حسيت شي ضرب جواتي،،،، اكيد من الصدمة ،،مو شي تاني،،،،اكيييد ،،، نفضت الافكار من راسي،،،قربت منها متل ماطلبت المصورة،،،كرمال الصور،،، حطيت ايدي على خصرها ،،،بينما هي ايديها على كتافي،،،كانت نظراتنا للكاميرا،،، حاسس برجفتها،،، وكان قلبي عم يرجف اكتر،،،، هي اول مرة بقرب هيك من بنت غير نور،،،
المصورة: وهلق اتطلعو ببعض..
(رفيف)
التقو عيوننا ببعض،،،،كان قلبي عم يضرب جواتي ،،، حسيت نظراتو غير ،،، كان عم يطلع فيني بطريقة مختلفة،،،
لما خلصنا التصوير طلعت المصورة مع مرت عمي ،،،،سكر الباب اغيد وبقينا لحالنا،،،، نفس البيت ،،،بس كل واحد التزم غرفتو ،،،
ــــــــــــــــــــــــــــــــــــــــــــــــــــــــــــ
كنت قاعدة عالتخت ،،،الساعة صارت ١٠ وانا لسا بالبدلة،،، تعبت وانا حاول فكها وما قدرت،،، فكيت شعري وسرحتو،،،، دق باب البيت وكانت امو لاغيد،،،
سما: جبتلكن العشا ،،،اكيد جوعانين ..
أغيد:يسلم ايديكي..
سما: وين رفيف،،،
أغيد:بغرفتها...
سما:رح شوف ازا بدها شي قبل ماانزل..
دقت الباب وفتحتلا ،،، دخلت لعندي وسكرت الباب...
سما: ليش لسا مابدلتي،،،ماتعبتي بالبدلة..
رفيف(بخجل):" حاولت فك الازرار ماقدرت،،، من بعد ازنك بس ساعديني لااقدر فكن...
سما (ساعدتها): يابنتي بدك تكوني صابرة،،،سدقيني رح يحبك،،،،رح تعيشي معو بهنى،،،بس ساعديه ليقدر يتخطى نور...
رفيف: ان شاء الله ...
طلعت لبرا وانا بدلت تيابي عالسريع ولبست بجامة حرير ،،،
وبالصالون كانت امو عم تحكيه...
سما: ليش تاركها لحالها،،
أغيد: امي خلص ،،،لهون خلصت مهمتكن ،،،تركوني اعرف كفي حياتي...
سما: رح نتركك تكفي حياتك ،،،بس هي البنت مو ذنبها تهملها،،،هية هلق زوجتك ،،، شرعاً وقانوناً..والها حقوق عليك،،، اصحا تزعلها يا أغيد ،،،
أغيد:حاضر ..
سما: تصبحو على خير..
أغيد:وانتي من اهل الخير...
ودعها وسكر الباب ...دق الباب على رفيف..
رفيف:تفضل..
أغيد: تعي عالمطبخ ،،،كرمال العشا...
سبقني عالمطبخ لبين مااجي ..،،طلعت من الغرفة وانا عم هدي ضربات قلبي،،،انا حدو،،،انا معو ،،،انا حلالوو،،،،
دخلت عالمطبخ ،،،كان واقف عم يعمل قهوة ،،،
رفيف: كملها عنك،
أغيد:لا يسلمو،،، عدي تعشي،،
رفيف: وانت مابدك تتعشا..
أغيد:لا مو جوعان..
قعدت عالطاولة واكلت بزهق،،،ماكان بنفسي اكل..خلص القهوة واجا قعد عالطاولة ،،،وعطاني فنجان،،
رفيف:" شكراً.."
أغيد:"عفواً ،،،رفيف،،،نحنا رح نعيش حياة طويلة هون،،،مابعرف اديش ،،،بس لازم نكون متفقين سوا،،،رح نكون رفقات بقلب البيت ،،،،وبرا منمثل الزواج ،،،مابدي حدا يعرف شوفي بيننا،،،هاد سر وبدنا نحافظ عليه ،،،لمصلحتنا نحن التنين...
رفيف:اكيد،،،،ماحدا رح يعرف...
أغيد:وخدي راحتك بالبيت،،،هاد صار بيتك من هلق،،،بس غرفتي مابتدخليها ابداً ،،،ولا لأي سبب،،،هي غرفتي الخاصة ،،،وفيها ذكريات مرتي ...
رفيف:متل مابدك ...
أغيد: وقت بدك تنضفي نضفي ،،،وقت بدك تطبخي طبخي،،،لا تاكلي هم البيت،،،انتي مو مجبورة تعملي شي.....
انا رايح لغرفتي خدي راحتك ..
كنت عم اطلع بالباب مكان ماطلع ،،،، مع انو كان محترم بكلامو ،،،بس انا خاطري نكسر ،،،،بعرف انو رح يصير هيك،،،، بس حاسة بشعور صعب ،،،، كانت الغصة رح تدبحني،،،اغيد مستحيل يتغير معي،،، مستحيل ينظرلي كأنثى،،،، يمكن لسا شايفني مسترجلة،،،، ضبيت الطاولة ودخلت لغرفتي،،، ماعاد اقدر امسك دموعي اكتر من هيك ...صليت العشاء وحطيت راسي بعد التفكير ونمت
ــــــــــــــــــــــــــــــــــــــــــــــــــــــــــــ
(اغيد)
من وقت دخلت الغرفة وانا مخنوق،،،،عم اتطلع بالصورة،،،،ودموعي لحالا عم تنزل ،،،
كانت عيون نور عم تبتسم بغصة ،،،،او انا هيك شايف،،، كأنها حزينة،،،، عم تعاتبني ،،،،اخ يا نور ،،،،موجوع عفراقك،،،ما عم اقدر انساكي،،، عم اتزكر ليلة عرسنا ،،،اديش كنا فرحانين،،،، وهلق حاسس شي طابق على صدري،،،عم يمنع عني الهوا،،،،تسطحت وغمرت مخدة نور ،،،،غمضت عيوني لحتى نام،،،،مابعرف كيف تذكرت رفيف،،، وتذكرت الخربطة اللي صارت فيني وقت شفتا ببدلتها البيضة،،، اول مرة بشوفا انثى،،،، اكيد مشاعري كانت لانو شفتا عروس ،،،،والا انا تفكيري مابروح غير لنور،،،، ضليت صارع افكاري ،،،ماعرفت ايمتا و كيف غفيت......
ــــــــــــــــــــــــــــــــــــــــــــــــــــــــــــ
صحيت عالفجر على صوت حركة ،،،قمت لحتى اتوضا ،،،كان اغيد عم يصلي بالصالون ،،،توضيت ورجعت على غرفتي لحتى صلي ،،،بس خلصت طلعت عالمطبخ،،،كان اغيد عم يعمل قهوة ،،،وقفت عند الباب احكيه،،
رفيف:"صبلح الخير،،، مو بكير عالقهوة ،،،مشان معدتك مااكلت شي بليل ،،
أغيد (التفتلا): صباح النور،،، لا تخافي متعود،،،متبشرب القهوة غير بهالوقت ،،تعي لاعملك معي فنجان،،،
قربت عالمجلى تحط فناجين (رفيف): انا بشرب قهوة كمان بدون فطور ،،،بس مو دائماً ،،،بخاف على معدتي،،،
حطيت الفناجين،،، مع كاستين مي عالطاولة،، وقعدت ،،،اجا اغيد مع الركوة ،،،صب القهوة وعطاني فنجان ،،،،
أغيد:" مابتعرفي يا رفيف اديش مرتاح ،،،،انتي قدمتيلي معروف كبير،،،،لو انو الاختيار كان غيرك ،،،كنت هلق بخبر كان ،،،،كان صار مشكلة ،،،،
رفيف: اي منيح،،،ان شاء الله كون عند حسن ظنك،،
شربنا القهوة،،،وحضرت فطور وفطرنا سوا،،،،كان اخد راحتو عالاخر ،،،شكلو كان خايف ،،،وقت شاف تعاملي معو تغيرت نظرتو الي ،،،،ضبيت الفطور وجليت الجليات،،،،عملت دوش سريع ،،،، كانت امي منبهتني كرمال البس الصبحلك ،،،لبستها ،،،وفردت شعري ،،،وحطيت مكياج بسيط،،،، كانت الساعة قريب ١١ واكيد هلق بيجو امي وحماتي،،، جهزت الفواكي والنقرشة عالمجلى ورجعت لغرفتي ،،،،بعد شوي ندق باب البيت ،،،
اجا اغيد لعندي
أغيد: انا رح ضل هون شوي ،،،وبعدين بطلع ،،،مابدي يشوفوني بهديك الغرفة ،،،روحي انتي فتحيلن الباب...
رفيف:"متل ما بدك.."
فتحتلهن الباب واستقبلتهن بإبتسامة ،،،(اهلا وسهلا تفضلو)
سما: صباحية مباركة يا عروس.."
رفيف: صباح النور مرت عمي.."
لينا: " الف الف مبارك يا روحي ،،،ونشالله زواجة الدهر ،،"
رفيف(حضنتها وكنت رح ابكي بس مابدي ياهن يحسو على شي) : الله يبارك فيكي ياروحي ،،،يخليلي ياكن ،،،تفضلو لجوا ،،،
دخلنا للصالون وبلشو يتحدثو عن العرس والاجواء وبعدين التفتت ماما لعندي..
لينا: نشالله كلشي تمام رفيف
رفيف(محمرة من الخجل): كلو تمام ماما ،،،لا تاكلو همنا...
لينا: اي الحمدلله ،،،نحنا شو بدنا من هالدنيا غير نشوفكن مرتاحين ،،،صح ام اغيد.."
سما:" صح والله كلامك درر ،،،الله يهدي بالكن ويرزقكن الذرية الصالحة.."
"طلع اغيد من الغرفة وامو نبسطت وقت شافتو طالع من غرفة رفيف."
أغيد:"صباح الخير "
سما_ لينا:"صباح النور
قعد معهن اغيد ورفيف نسحبت تحط الضيافة
*يـــــــــ͢ـོ͓ـــتبــــــــــــــོـ͓ـــ͢ــ؏*
➖➖➖➖➖➖➖➖➖
*❴📖❵↵*تنسيق مشرفين مجموعة:*
*❴📚❵↵*قصص وروايات عالمية📚💙*
*❴💙❵↵*ننشر جميع انواع القصص والروايات العالمية*
حـب💙.
حـزن💙.
اكشن💙.
رعب💙.
*❴👑❵↵*أن كنت من عشاق ومدمني القصص مكانك عندنا💙*
*❴💙❵↵*رابط المجموعة للاشتراك:*
```https://whatsapp.com/channel/0029VaQogP17YSdATvOUwa1h```