الفصل 5
*قـصـص وروايـات عـالـمـيـة💙📚📖*
*بإدارة* *يـامـن💙*
*❴📖❵↵* *حب.ساحر.tt* 💙🖇️
*❴🔢❵☟الـــبـــــــــــ❴6️⃣❵ــــــــــــارت☟*
➖➖➖➖➖➖➖➖➖
*
*❴📖❵↵*تنسيق مشرفين مجموعة:*
*❴📚❵↵*قصص وروايات عالمية📚💙*
*❴💙❵↵*ننشر جميع انواع القصص والروايات العالمية*
حـب💙.
حـزن💙.
اكشن💙.
رعب💙.
*❴👑❵↵*أن كنت من عشاق ومدمني القصص مكانك عندنا💙*
*❴💙❵↵*رابط المجموعة للاشتراك:*
```https://whatsapp.com/channel/0029VaQogP17YSdATvOUwa1h```
➖➖➖➖➖➖➖➖➖
"حب ساحر"
"الجزء السادس"
بقلمي مرام
(رفيف)
رجعنا عالشغل بالحقل وقريباً جدا رح بلش افتح مشروعي ...تصاميمي جاهزة وبس بدي خياطة شاطرة تبلشلي بالتصميم .... وأخيراً حلمي رح يتحقق ...يارب انجح بالمشروع .....
طل علينا اغيد بعد غياب اربع شهور ...صرلي اربع شهور ماشفتو من يوم حادثة نور كان بالعزا واقف وصامت بس ومن بعدا ماعاد شفتو بالحقل ابداً ......يالله شو متغير .....لابس كلو اسود ...ونضارات سود عريضة....وملامح وجو جامدة.....حط الغدا وراح يشوف عمو حسام
حسام: نورت الحقل اغيد اهلا وسهلا بعد زمان
اغيد: كيفك ابي
حسام: الحمدلله بنشكر الله وبصير احسن بس شوفك منيح
اغيد: منيح انا لاتقلق عليي
حسام: مارح ارتاح انا لحتى امن عليك صار عندك عيلة من جديد
اغيد: انا ماعاد اتزوج بعد نور ابداً مارح اقدر شوف بعيوني غيرها
حسام : بس هي سنة الحياة مانك حابب تصير اب
اغيد: مابقدر عيش شعور فقد جديد
حسام: ما لازم تتشائم
اغيد: ابي بترجاك ماتفتح معي هالموضوع خلص
حسام: مارح ينتهي الموضوع هون رح تتزوج يعني رح تتزوج
طلع اغيد من عند ابوه مقهور ماحدا عم يفهمو ماحدا حاسس فيه هو خسر ابنو وخسر زوجتو حبيبتو كيف رح يقدر يتخطا هالشي صعب عليه كتير ...هو سكر قلبو ودفنو مع نور بنفس القبر ....
عم اشتغل لحتى انسا ماعم اقدر طالعها من بالي وين مافتلت وجهي بشوفا .....
ــــــــــــــــــــــــــــــــــــــــــــــــــــ
وقت خلص الدوام اجيت لامشي وقفني صوت عمو حسام
حسام:رفيف بنتي فينا نحكي دقيقة
رفيف:تفضل عمو
حسام : بدي استدل منك على بيت صهرك طلال هو بكون رفيق ابني وبدي احكي معو بموضوع مهم مامعي رقمو
رفيف: هو ساكن بالبناية عنا فيك تجي معنا ازا بدك
حسام: طيب
طلعنا كلنا بالباص وعمو حسام ركب جنب الشوفير وقت وصلنا طلعنا سوا ودليتو عالباب وفتت على بيتي
ــــــــــــــــــــــــــــــــــــــــــــــــــــــــــــ
طلال: اهلا وسهلا عمي تفضل تفضل
حسام: اهلين فيك ابني لا تواخذني اجيت بدون موعد
طلال : البيت بيتك اهلا وسهلا
حسام: في موضوع لازم نحكي فيه
طلال: خير نشالله في شي
حسام: كلو خير ....انا ماعاجبني وضع اغيد هيك ...ابني عم ينطفا قدام عيوني
طلال: معك حق اغيد تغير كتير بعد موت مرتو
حسام: نحنا لازم نجوزو
طلال: بس هو مو رضيان كيف بدنا نقنعو
حسام:غصب عنو انا مو مستعد اخسر ابني اغيد عم يتوحد لحالو ماعم يترك مجال لحدا يحكي معو كل وقتو بشغلو وبيرجع فوراً لشقتو وين مااتطلع بلاقي غراض نور كيف بدو ينساها
طلال: انا جاهز عمي شو بدك لساعدك بهالموضوع
حسام : اول شغلة لازم احكي مع ام اغيد تنقيلو عروس تكون واعية وتصبر عليه لحتى ينسا مرتو
طلال: هلق هي محلولة في بنت حمايي رفيف واعية ومستورة
حسام : ليش مو مخطوبة
طلال:لا هية من زمان تاركة
حسام: والله رفيف بنت عالم وناس رح احكي مع ام اغيد وترتب زيارة لعندهن
طلال: واغيد مارح تاخد رأيو بالموضوع
حسام: لا مارح قلو شي ليردو خبر الجماعة
ــــــــــــــــــــــــــــــــــــــــــــــــــــــــــــ
كنا عم نتغدا انا وامي وريم اللي قالبة وشا
رفيف: اي شبك قلتلك اجا لعندو ضيف ماطنشك
ريم: كان لازم يبعتلي عالاقل رسالة
رفيف: شو انك نكدة بركي الموضوع مهم وماقدر يبعتلك شي
ريم: مافي شي اهم مني لازم يحاكيني كل دقيقة
(رفيف)
اييي نعم هي الغيورة ريم بتغار على طلال من نسمة الهوا ولازم يحكي معها ٢٤ ساعة لترتاح
صرلن خاطبين ٣ شهور وكانت الخطبة بالبيت عالديق هيك بدو طلال ماحب يعمل خطبة كبيرة ورفيقو زعلان على مرتو ....وهلق عرسهن تعين بعد شهر وعدها يعملا عرس ماصار متلو بالضيعة وعم يوفي بوعدو
ــــــــــــــــــــــــــــــــــــــــــــــــــــــــــــ
سما: بس عم تقول كانت مخطوبة قبل بلكي ماوافق اغيد
حسام: واغيد ارمل لا تنسي بعدين البنت على سلامتها مستورة ومابتشكي من شي
سما: طيب وعمرها ٢٥ كبيرة
حسام : هيك احسن تكون واعية وتتفهمو لاغيد وفي بينهن كم سنة هيك ممتاز رح يتفاهمو
سما : مابعرف انا خايفة اغيد مايرضى ويحطنا بالخجلة مع الجماعة
حسام : انتي حكيهن وتوكلي على الله ولاتفتحي سيرة شي ليردو الموافقة واغيد اكيد مارح يخجلنا
سما: طيب هات الرقم لقوم احكي مع الجماعة
ــــــــــــــــــــــــــــــــــــــــــــــــــــــــــــ
كنا عم نشرب شاي انا وامي بالمطبخ وكانو طلال وريم عالبرندا رن جوال ماما كنت طالعة على غرفتي بس ستوقفني حكيها
لينا: اي انا ام رفيف.......الحمدلله مين معي ........اي عرفتك تفضلي ........اهلا وسهلا.....منتشرف ......مع السلامة
رفيف: مين امي
لينا: هي ام اغيد مرتو لصاحب الحقل اللي بتشتغلي فيه
رفيف:اييي شو بدها
لينا: بدها تجي بكرا تتعرف عليي
رفيف: ما قالتلك ليش
لينا :حابة تتعرف شو ليش
رفيف:امممم
ــــــــــــــــــــــــــــــــــــــــــــــــــــــــــــ
ريم : عم تقول ارمل كيف بتدلو على اختي
طلال: وازا ارمل اغيد صغير وماعندو شي يخليكن ترفضو حتى ولاد مافي
ريم: بس اختي لسا صغيرة ليش لتتجوز واحد كان متجوز
طلال: انا عليي دليت وبس يطلبو انتو بتتشاورو وبتقررو انا مارح اتدخل
ريم : معقول يوافقو
طلال: ليش حتى مايوافقو اغيد رجال مابعيبو شي
ريم: مابعرف مادخلني
طلال: اي شو بدنا فيهن تركينا نجهز لعرسنا نحنا بتعرفي مو مسدق شلون رح يمر هالشهر عليي ...حاسو طويل كتير
ريم: لا بالعكس نحنا عم نركد وماعم نلحق
طلال: اي لكن ياروحي عروس اتدللي وتغندري وجهزي حالك
ريم: اي طبعاً بدي اخد راحتي وارتاح قبل العرس
طلال: وهلق خديلي طريق لروح رح اغفل عالقاعد
ريم: مع انو حاببتك تسهر بس بعرف دوامك بكير مشان هيك رح خليك تروح مابحب تتعب
طلال: لك دخيل الحنون
ــــــــــــــــــــــــــــــــــــــــــــــــــــــــــــ
(رفيف)
صحيت الصبح افطرنا ورحت على الحقل وانا عم فكر ياترى شو بدها ام اغيد لحتى تتعرف على امي ...خير اللهم اجعلو خير ...معقول ماعاد بدهن ياني بالحقل ....لارجع عالبيت لحتى اعرف
ــــــــــــــــــــــــــــــــــــــــــــــــــــــــــــ
وعند اغيد زارو طلال
طلال: شو ابو حسام ازا مابجي لعندك مابتجي لعندي
اغيد: شغل شو بدي اعمل ماعم لحق
طلال: اي هدي على حالك لابقا تستلم قضايا لتخلص اللي بين ايديك
اغيد : مافيني بتعرف يعني المحاميين قلال بهالضيعة والضغط علينا كبير
طلال: انت حر ...بس عم تدفن حالك بالشغل والعزلة
اغيد: انا هيك مرتاح
طلال: طيب المسا عازم الشباب لعندي بتجي بتسهر
اغيد: مافيني اجي مابلحق
طلال: بتترك الشغل وبتجي ومابدي اعذار
اغيد: ما...
طلال: بدون ما ...خلص قلتلك رح تجي ...بعدين انا عم ودع عزوبيتي وبدي كون مع رفقاتي
اغيد: مابدي اقلب الجو ونكد عليكن خلص خليني على راحتي
وقف طلال : هسسس خلص مابدي كلام السهرة عندي وهلق بدي امشي عندي شغل عم استناك المسا
تنهد بقلة حيلة:ماشي
ــــــــــــــــــــــــــــــــــــــــــــــــــــــــــــ
وبعد الضهر اجت ام اغيد
لينا: مية اهلا وسهلا شرفتينا
سما: اهلين فيكي
وبعد السلام والكلام
سما: ابني اغيد ماتت مرتو من اربع شهور ومن وقتها وهو منعزل عن الكل من شغلو لبيتو ومن بيتو لشغلو ..يعني حتى نحنا دوبنا نشوفو
لينا: سمعنا بالقصة الله يرحمها ويصبر قلبو
سما: نحنا بصراحة بدنا نزوجو ونخليه ينساها ...ازا بدو يضل هيك بدنا نخسرو
لينا:هاد الصح ما بنسي المراة إلا المراة
سما: وهاد سبب زيارتي لعنكن بدي اطلب ايد بنتك رفيف لابني اغيد على سنة الله ورسوله
لينا: فاجئتيني والله ...بدي استشير ابو رفيف ...
سما: اي طبعاً خدي راحتك ...بس خليها بعلمك بنتكن رفيف رح تكون معززة مكرمة وكلشي بدها ياه رح نعملا ياه لاتفكرو انها التانية تطلع بدون شي ...لاا هية لسا ماتزوجت ومن حقها تعيش جو العروس غير بأفخم صالة بالضيعة مابعملا
لينا: مابتقصري ام اغيد ...بس في شغلة لازم تعرفوها بنتي رفيف كانت مخطوبة لابن عمها وفسخت
سما: منعرف هالموضوع ومافي مشكلة ابداً ......لكن انتي شاوري زوجك ورديلنا خبر نحنا مستعجلين لحتى نزوجهن يعني بالكتير شهر لبين ماتجهزو نفسكن
لينا: ماشي تكرمي بشوف زوجي وبردلك خبر
ــــــــــــــــــــــــــــــــــــــــــــــــــــــــــــ
(رفيف)
رجعت من شغلي غسلت وقعدنا نتعشى
رفيف: اي امي ايمتا نازل بابا
لينا: بعد يومين بكون هون
رفيف: اي الحمدلله شتقتالو كتير
ضحكت لينا: اي يعني عرس بناتو معقول مايحضر
ريم: بنتو ولا بناتو
رفيف: شو قصدك امي
لينا: اجت ام اغيد لعندي اليوم
رفيف: اييي وش كان بدها
لينا : طلبت ايدك ل ابنها اغيد وازا وافقنا بالكتير شهر ورح تتزوجو
رفيف: شووو
حسيت بالبرودة عم تمشي من ايديي لراسي ...مع انو الدنيا شوب ....كيف هيك
رفيف: بس اغيد بحب مرتو وما بتوقع يتزوج بعدا
لينا: اهلو حابين يزوجو وشافوكي مناسبة لالو
رفيف: وبابا شو رأيو
لينا: ابوكي مااعترض وقال ازا وافقت رفيف موافق ...انتي شو رأيك رفيف
رفيف: مابعرف تركوني فكر
قمت على غرفتي لهدي ضربات قلبي لحقتني ريم وسكرت الباب
قعدت حدي ريم: رفيف لا تتسرعي وازا مو موافقة ماحدا بيجبرك
رفيف: بعرف ماحدا رح يجبرني ...وانا موافقة ... بس مابعرف رأي اغيد ....كيف قبل يتزوج بعد نور
ريم: انتي مو قلتيلي معجبة بشخص وماقدرتي تطالعيه من قلبك.... كيف رح تقدري تتزوجي اغيد
رفيف: ايي وهاد الشخص اغيد
ريم: ماعم افهم
رفيف: شو يلي ماعم تفهميه عم قلك انا معجبة بأغيد
ريم: طيب كيف وانتو وقت تشوفو بعض بتتخانقو
رفيف: اي وانا هاد اللي مستغربتو اغيد مابطيقني كيف بيطلب ايدي
ريم: لازم يجي وتحكي معو وتفهمي منو
رفيف: اكيد لازم
ــــــــــــــــــــــــــــــــــــــــــــــــــــــــــــ
وعند طلال هلصت السهرة واغيد مااجا
رفيقهن: مابصير يا زلمة كل هاد حزن على مراة
طلال: شو بدك يكون يعني مرتو وبدو يزعل عليها
رفيقو: بس مابتخلص الحياة هون لازم يشوف حياتو
طلال: بس يتزوج بيرجع على طبيعتو
رفيقو: اي لازم يتزوج دغري هاد ازا رضي
ــــــــــــــــــــــــــــــــــــــــــــــــــــــــــــ
(رفيف)
مانمت كل الليل وانا اتقلب وفكر فيه.... معقول يرضى يتزوج بعد نور .....لسا مبين حزين على فراقها ....معقول اتعذب معو انا .....ياربي دخيلك ولا مرة توقعت اني انجمع معو وصير مرتو ....فكرت خلص رح يضل ببالي وبس...
تاني يوم عالفطور
لينا: يعني شو قلا ازا دقت
رفيف: خلص يلي بتشوفوه مناسب
لينا :يعني موافقة
رفيف:اي
مالحقت كفي كلامي كانت عم تتصل
لينا: اهلين ام اغيد ...... الحمدلله وانتي كيفك.....اي موافقين اهلا وسهلا....متل مابتحبي ....بكون احسن ...ماشي منلتقى ...مع السلامة
لينا : بدها نلتقا اليوم بعد الضهر بكافيه ($#&) مشان تشوفو بعض انتي واغيد
رفيف: وليش ما بيجو عالبيت
لينا : مارح يجي لهون رجال لحتى يجي ابوكي ...مين بدو ياعد معو ونحما كلنا حريم
رفيف: صح
لينا: قالتلي رح تاخدلك اذن من شغلك مشان الشوفة
رفيف: طيب ...ريم بدي البس من عندك فستان
ريم: قومي معي لنقيلك
لينا: الله يفرح قلبكن ويفرحني فيكن
ــــــــــــــــــــــــــــــــــــــــــــــــــــــــــــ
اغيد: انا مابدي اتزوج شلون بتعملو فيني هيك
حسام: نحنا عم نعمل هيك لمصلحتك
اغيد: ايا مصلحة هي لك انتو عم تدمروني ...انا مو موافق ولا رح روح معكن
سما: بدك تكسر كلام اهلك ايمتا ناوي تتزوج
اغيد: انا مو ناوي ارجع اتزوج بحياتي ولا رح اتزوج
سما : وانا بدك ياني ابقا هون وحيدة انت وابوك كل واحد بشغلو واختك بكرا بتتزوج وانا بضل لحالي هون بدي زوجك وحس بوجود حركة بالبناية مابدي استوحش
اغيد: اي معناتا تبنيها وجيبيها تسكن معك انا مابدي
حسام: بدك تخجلنا قدام الجماعة عم قلك رح تتزوج يعني رح تتزوج
اغيد: رح اعمل كلشي بيطلع بإيدي لخليهن يرفضو
سما: ليش عم تعمل هيك قلتلك اخدت موعد نروح تتعرف عليها
حسام: هو أساساً بيعرفها بس الموعد مشان ازا حابة هية تستفسر عن شي وتسألو
اغيد: بعرفها كمان؟؟. ومين هية
حسام : رفيف اللي بتشتغل عندي بالحقل
اغيد: وانتو مفكرين انو هي اللي اسما رفيف رح تنسيني نور
سما: ليش شبها بتاخد العقل
ابتسم بمسخرة: اي كتير وحكا بقلبو(المسترجلة..... يالله احسن ماتكون انثى وتخليني اضعف وانسا نور)
اغيد: انا طالع تأخرت عالشغل
سما : عم انطرك عالساعة ١٢ ها لا تتأخر
اغيد: اي اصحا العروس لقطة مشان ماتطير
حكا كلامو ومشي
سما: معقول البنت ماعجبتو
حسام : مو ضروري تعجبو هلق بس يتزوج رح يعرف انو اختيارنا صح
سما: ورح ينسا
حسام: مارح ينسا بس رح يتأقلم معها ويرجع لطبيعتو مافي حزن بيستمر ....انا طالع عالحقل حكيني شو بصير معكن
سما: مع السلامة
ـــــــــــــــــــــــــــــــــــــــــــــــــــــــــــــ
(رفيف)
لبست فستان ناعم لون ازرق وشال ابيض هادي مع بوط رياضة وماحطيت مكياج ابداً ...مابدي يفكر هالتغيير كرمال كلامو معي وعال١٢ طلعنا من البيت مشان نوصل عالوقت
لينا: رفيف شو بدك تعرفي عنو بتسئلي هي الشوفة الشرعية وحق للتنين يستفسرو عن بعض وانتي بتقرري ازا رتحتيلو بتكملي
رفيف: ماشي ماما
تفتلنا شوي لبين ماصارت الساعة وحدة رحنا عالكافيه وقعدنا نستنا
ــــــــــــــــــــــــــــــــــــــــــــــــــــــــــــ
بعد محاولات كتير واتصالات مارد عليها راحت لعندو
سما: اغيد شو هالتصرف الجماعة عم ينطرونا
اغيد: ماقدرت اطلع عندي شغل
سما: من الصبح قلتلك بتترك كلشي وبتجي كيف بتعمل فيني هيك
اغيد: وينتظرونا شوي ليش قاتلين حالهن
سما: فوق مارضيو يعطو بنتهن العزبا ل أرمل
اغيد: ماني قاتل حالي يوافقو أساساً انا ورفيف مامنطيق بعض
سما: ماكنتو رح تتجوزو لحتى تطيقو بعض انت هلق مجبور تتقبلها وهية كمان
اغيد: ليش عم تعذبو حالكن عالفاضي انا مارح انسا نور لو شو ماعملتو
سما: اغيد ابني حبيبي الجماعة عم يستنونا بعدين منحكي الساعة قطعت الوحدة
اغيد: تفضلي
كل الطريق يتجادلو لحتى وصلو عالوحدة ونص
فاتو وسلمو على بعض
سما _اغيد: السلام عليكم
ردو بهدوء : وعليكم السلام
سما: لا تواخذونا ياجماعة علقنا بالزحمة
لينا: مافي مشكلة تفضلو رتاحو
سما: كيفك رفيف شو اخبارك
رفيف: الحمد لله خالتو تمام
سما :شو هي خالتو ازا تم النصيب فيكي تناديلي ماما وازا ماحبيتي بتقولي مرت عمي
رفيف: ان شاء الله
لينا: كيفك يا اغيد
اغيد ماكان عاجبو الجو ابداً حاسس ازا رح يضل شوي كمان بيختنق
اغيد: الحمد لله منشكر الله
لينا: زعلت كتير وقت سمع بالخبر الله يرحمهن ويعوضهن الجنة وانت ان شاء الله الله يعوضك ب رفيف تداويلك جروحك
رد بتصنع اغيد: ان شاء الله
لينا: ازا بتحبي ام اغيد منروح على طاولة تانية خليهن ياخدو راحتهن
مع انها ماكانت حابة تتركهن خايفة اغيد يحكي شي يخرب الخطبة
سما: ليش لا منقوم
ضلو فترة ساكتين لحتى كسر الصمت اغيد
اغيد: ليش وافقتي
دقيقة صمت مرت وهية عم تطلع بعيونو تلاقي تفسير لجوابو
اغيد: مابتعرفي اني بحب نور ...... ليش جاية تدمري ذكراها
كسر خاطري كتير يعني هو مجبور عالزواج مني
رفيف: انت مجبور عالزواج
اغيد: طبعاً مجبور ....بتتوقعي كل الحب اللي حبيتو لنور يكون عبث واتقبل غيرها بحياتي
رفيف تصنعت البرود بعد كلامو: وانت مفكر اني كتير مبسوطة من هالزواج
اغيد: لكن ليش وافقتي
رفيف: لانو العالم مابيرحم مافي حدا بشوفني الا بسمع حكي مشان عمري...انا ما بزعل على حالي بس بزعل على ماما هية مو مجبورة تتحمل اراء العالم ونظراتهن
اغيد: فينا نقول زواج مصلحة
رفيف: اكيد مافي اسم مناسب اكتر
اغيد: لكن خلينا نتفق هلق
رفيف:منتفق
اغيد: طيب نحنا رح نتزوج زواج شكلي وانتي بتضلي حرة بس لاتنسي انك رح تتسجلي على اسم اكبر محامي بالضيعة يعني سمعتك من سمعتي
رفيف: شو شايفني انت ....؟؟.لتكون مفكرني من الشارع او بنت مابتسوا
اغيد: انا ماحكيت هيك بس حبيت وضح هالموضوع وتانياً ما حدا رح يعرف انو زواجنا عالورق ابداً
رفيف: شي اكيد
اغيد: وتالتاً غرفة نور مارح تقربي عليها ابداً ولا بتفوتيها هي رح تكون غرفتي
رفيف :نعمممم ليش غراض نور رح يضلو بالبيت
اغيد: طبعاً مكانهن بالبيت وين بدك وديهن
رفيف: والضيوف اللي جايين يزورونا رح يشوفو غراض نور شو رح يكون موقفي
اغيد: ببساطة الباب مقفول وماحدا رح يشوف
رفيف: بس انت هيك عم تظلمني
اغيد: انا ماعم اجبرك توافقي بس فرضاً وافقتي هي شروطي قرري ورديلي خبر
وقف دفع حساب القهوة للطاولتين واخد امو وراحو
اجت امي لعندي
لينا: شو صار عن شو حكيتو
رفيف: حكينا مواضيع عادية مافي شي مهم
لينا: شو يعني مافي شي مهم نحنا جايبينكن تحكو بالزواج
رفيف: اي اتفقنا نخطب وندرس بعض
لينا :طيب ليش مو مبسوطة
ابتسمت رفيف: لا مبلا مبسوطة
وبالسيارة
سما: شو صار اغيد ليش ما قعدت معها منيح وتفاهمتو
اغيد: ليش لطول القعدة ازا اتفقنا ومشي الحال
سما : على شو اتفقتو
اغيد: امي خلص انا موافق عالزواج انتو زبطو كتب الكتاب وجيبوها عالبيت
سما: شو يعني زبطو كتب الكتاب وجيبوها ...عالساكت مارح جيبها رح تجي بعرس مطنطن عالبيت
اغيد: مافي داعي لهالشكليات كتب كتاب عالسكت ومنجيبها وانتي احكي للعيلة تزوجت وخالصين
سما: مارح رد عليك مارح اتركها حسرة بقلبا
ـــــــــــــــــــــــــــــــــــــــــــــــــــــــــــــ
رجعنا وبلشنا تجهيز البيت مشان بابا وبس خلصنا فتت على غرفتي ولحقتني ريم
ريم:ايي حكيلي شو حكيتو
رفيف:مافي شي مهم
ريم: لا بدك تحكي
رفيف: يعني مصرة تعرفي
ريم: طبعاً بدي اعرف
رفيف: اللي صار انو (....................)
ريم:عم تمزحي مو ....لك انتي شلون بتوافقي تتزوجي عالورق ... شو مفكر قاتلة حالك عليه انتي اكيد مارح تكملي حياتك هيك
رفيف: ريم هي حياتي وانا رضيانة
ريم: بس نحنا مارح نرضى انتي مفكرة رح تكوني مبسوطة وانتي عم تشوفيه بنام بغرفة نور وغراضها تضل حوليكي بالبيت
رفيف: بس المهم رح كون مع اللي بحبو تحت سقف واحد ومع الوقت بيتغير
ريم: كيف بدو يتغير وهو حاطت هالشروط ...لك هاد قفل قلبو بعد مرتو ومارح يشوفك ...مارح يحبك ومارح تكوني ام بحياتك ومارح تصحي على حالك غير بعد فوات الاوان
رفيف: ريم احترمي قراري انا وافقت وخلص
ريم: مارح اسمحلك واهلي مارح يوافقو
مسكتها رفيف من ايدها وعيونا دموع : لا تعملي هيك ريم لا تكسريني
ريم: بدك ياني شوفك عم تنطفي شوي شوي وما اعمل شي
رفيف: هاد قراري وانا حرة وبعرف شو عم يستناني بعدين
ريم: ماعم اتقبل الموضوع
رفيف: بدك توعديني هلق انك ماتخبري حدا
ريم: عم تحمليني فوق طاقتي
رفيف: انا حكيتلك لانو بدي فضفض لا تخليني اندم اني حكيت ...هلق وعديني ماحدا يعرف
ريم: مع انو قلبي مو متطمن ل هالشي وبتمنا تفكري منيح قبل هالخطوة
بعد ماطلعت ريم توضيت وصليت استخارة ونمت
كنت ماشية بطريق عتم وكلي جروح عم ينزفو وموجوعة وبرغم وجعي كنت مكملة طريقي وكل ماوقف ارجع قوي حالي وامشي لحتى وصلت للضو اتطلعت بإيديي ماكان فيهن جروح ورجعت متل ماانا وكان في بنت صغيرة حدي
رفيف: شو اسمك ياحلوة
البنت: اسمي نور
رفيف: وشو عم تعملي هون
البنت: عم استنا بابا
رفيف: ومين ابوكي
اشرتلي البنت على رجال واقف بعيد سحبتا ورحنا لعندو
رفيف: يا اخ هي بنتك عم تستناك
لما فتل لاقيتو اغيد
اغيد: اي هي بنتي نور
كانت البنت متل الملاك بعمر ال٥ سنين بتجنن
رفيف: وين امها
وقبل مايجاوبني صحيت من نومي على صوت الضجة كان بابا راجع من السفر طلعت لعندن
ركدت لعندو : بابا حبيبي
كانت ريم حاضنتو من جهة وانا من جهة وعم نبكي
حازم: خلص يا بنات رح تبكوني شو اول مرة برجع من سفر
رفيف: شتقنالك كتير طولت علينا الغيبة
حازم: راجع وجايبلكن معي اخبار حلوة
لينا: شو الاخبار
حازم: هلق خلوني افطر ميت من جوعي
لينا: جهزتلك احلى فطور غسل ايديك وتعال عالسفرة
لتمينا كلنا حوالين السفرة وبلشنا بالفطور
حازم: شو بابا رفيف قال وافقتي عالعريس
رفيف: اي بابا من بعد موافقتك انا موافقة
حازم: مابدي يصير متل المرة الماضية
رفيف: لا ابي هالمرة غير وانا مرتاحة
حازم: شو بدي احسن من هيك عم جوز بناتي لاحسن رجال بالضيعة
لينا: وانت احسن رجال بالضيعة ابو رفيف
حازم: تسلميلي يا احلى مراة بشوفها بحياتي
ضحكو ريم ورفيف
رفيف: الله عالرومنسيات من الصبح
لينا: عيب يا بنت استحي
رفيف بضحكة : حاضر
حازم: اي ريم المسا اعزمي طلال خليني اتعرف عليه وجهاً لوجه
ريم: حاضر بابا
رفيف: انتي بس بدك كلمة كرمال تعزميه
ريم: اكيد لا بس مشان بابا
رفيف: كملي كملي مسدقين
حازم: لا تناقري اختك رفيف وهي انتي نخطبتي كمان بكرا بتصير تناقرك
لينا: اي معلش حلوة هالنقرات ..ايمتا بدك تشوف ابو اغيد مشان تتفقو عالخطبة
حازم: يجو ايمتا مابدهن
لينا: طيب هلق بحاكي ام اغيد وبحكيلا يجو ايمتا مابدهن
رفيف: وانا بدي قوم البس واطلع عالشغل
حازم: شو صار بمشروعك ايمتا رح تبدأي فيه
رفيف: مابقي كتير التصاميم تقريباً جهزت بس بدي مصممين شاطرين
حازم: والعرض وين رح يكون
رفيف: حابة افتتاح تصاميمي يكون بمسابقة بمعرض ازياء(خيط انثوي)
حازم: عطيني فكرة عن المسابقة
رفيف :مسابقة خيط أنثوي بتتنظم كل سنتين تقريبًا، وهي وحدة من أهم الفعاليات بعالم الأزياء المحتشمة. الفكرة منها إنو تعطي فرصة للمصممين والمصممات الجداد يورجوا شغلهم قدام لجنة متخصصة وجمهور كبير.
التركيز الأساسي عالأناقة الممزوجة
بالاحتشام، وبنفس الوقت بيشجعوا الإبداع والتجديد، يعني مو بس فساتين أو عبايات تقليدية، لأ… المسابقة بتدور عالأفكار اللي بتحوّل اللبس المحتشم لستايل عالمي.
حازم: وانتي قد هالمسابقة
رفيف: رح كون قدها بدعمكن الي ووقفتكن جنبي
حازم: وايمتا المسابقة
رفيف: بعد سنة وشهرين تقريبا
حازم: انا مو حابب تنكسفي قدام عدد كبير من المصممين انتي ماعندك خبرة بهالمجال
رفيف: اتطمن رح كون من الرابحين ان شاء الله رح اشتغل لوقت المسابقة بكل طاقتي
حازم: انا معك ورح ادعمك تحققي حلمك
رفيف: يخليلي ياك يااحن اب
طلعت عالشغل كالعادة وبلشنا تقطيف
ــــــــــــــــــــــــــــــــــــــــــــــــــــــــــــ
لينا: صباح الخير ام اغيد
سما: ياهلا صباح النور كيفك
لينا: الحمدلله كيفك انتي
سما: الحمدلله
لينا : زوجي وصل الصبح وبقلكن تفضلو ايمت مابتحبو اهلا وسهلا
سما: الحمد لله على سلامتو معناها نحنا منجي المسا بكون ارتاح من السفر
لينا: مية اهلا وسهلا
سما: اهلين فيكي ... مع السلامة
اتصلت بزوجها سما: السلام عليكم
حسام:وعليكم السلام
سما: اخدت موعد مع الجماعة المسا مشان نزورهن ونتفق على كلشي
حسام: تمام معناها بس يمر اغيد بخبرو
سما: ماشي
ــــــــــــــــــــــــــــــــــــــــــــــــــــــــــــ
قبل مايجي الغدا نادالي عمو حسام
رفيف: نعم عمو
حسام: تعي يا بنتي عدي
حسام: نحنا المسا جايين لعنكن كرمال نتفق على كلشي
رفيف: اهلا وسهلا
حسام: بنتي رفيف حابب احكي معك مشان اغيد
رفيف: اي عمو تفضل
حسام: اغيد لساتو حزين على مرتو وانا خترت تكوني مرتو لانو بعرفك عاقلة وواعية ورح تطالعيه من الحزن تبعو
رفيف: ان شاء الله
حسام: بجوز بفترة الخطبة ماتتأقلمو مع بعض او بجوز اغيد يزعجك بشي بدي منك انو تصبري عليه لحتى يتعود عليكي
رفيف: متل مابدك عمو
حسام: انا بتمنى تكون سعيدين جداً بحياتكن سوا
رفيف: شكراً كتير
بفوتت اغيد
حسام: وهي اجا العريس
اطلع فيها من فوق لتحت احرجها وفات سلم على ابوه
رفيف: عن اذنك عمو
حسام : اذنك معك
اغيد: شو بدها
حسام: ناديتلا احكي معها
اغيد: يعني ماحكتلك شي
حسام :شو بدها تحكيلي
اغيد :ولا شي ..دقيتيلي شوفي
حسام: المسا رايحين لبيت الجماعة كرمال نتفق على كلشي
اغيد:اي روحو انتو انا مشغول
حسام : مابصير هالحكي عمك راجع من السفر لازم تهنيه بسلامتو
اغيد:بشوفو بعدين
حسام لا المسا رايحين جهز حالك
اغيد:ابي بس
حسام :مابدي اسمع اعتراض
اغيد بضجر: امري لله
*يـــــــــ͢ـོ͓ـــتبــــــــــــــོـ͓ـــ͢ــ؏*
➖➖➖➖➖➖➖➖➖
*❴📖❵↵*تنسيق مشرفين مجموعة:*
*❴📚❵↵*قصص وروايات عالمية📚💙*
*❴💙❵↵*ننشر جميع انواع القصص والروايات العالمية*
حـب💙.
حـزن💙.
اكشن💙.
رعب💙.
*❴👑❵↵*أن كنت من عشاق ومدمني القصص مكانك عندنا💙*
*❴💙❵↵*رابط المجموعة للاشتراك:*
```https://whatsapp.com/channel/0029VaQogP17YSdATvOUwa1h```