الفصل 7
*قـصـص وروايـات عـالـمـيـة💙📚📖*
*بإدارة* *يـامـن💙*
*❴📖❵↵* *عذاب.بلا.نهاية.tt* 🖤🖇️
*❴🔢❵☟الـــبـــــــــــ❴7️⃣❵ــــــــــــارت☟*
➖➖➖➖➖➖➖➖➖
*
*❴📖❵↵*تنسيق مشرفين مجموعة:*
*❴📚❵↵*قصص وروايات عالمية📚💙*
*❴💙❵↵*ننشر جميع انواع القصص والروايات العالمية*
حـب💙.
حـزن💙.
اكشن💙.
رعب💙.
*❴👑❵↵*أن كنت من عشاق ومدمني القصص مكانك عندنا💙*
*❴💙❵↵*رابط المجموعة للاشتراك:*
```https://whatsapp.com/channel/0029VaQogP17YSdATvOUwa1h```
➖➖➖➖➖➖➖➖➖
بحثت في احلامي عن مكان يسوده العدل..يفنى فيه الظلم..مكان اشبه بجنه على الأرض..ارى فيه ارجوحة نسياني وهي تتمايل وتراقص جسدي...
كترت العيون عليي..وكترت الشباب يلي عم تلاحقني مشان علاقة بالمخفي..
كترو الختايرة يلي بدون ياني عروس بتجدد شبابون لانو خلصت صلاحية مرتو معو...
ويلي مرتو مرضت وبظن هو سببا ويلي ماعد طايقا ويلي صار حاسس انها اختو...
ويلي ويلي ويلي وشي بقرف...
لما صار يتطلع فيني شي حدا بنظرة إعجاب ولو كنت بالطريق كنت عصب وانقهر وخمن لقدام لحالي شو رح يصير هلأ..
تعبت وصرت اعرف انو نحنا صرنا بوقت بخوف بهالأيام وهالأزمه على كتر ما الوضع المادي سيئ وكتر ما كل واحد ناقص عم يلحق الكماليات
وعلى كتر ما صار في اغلاط بهالبلد...
والغلط والعيب وكلشي مباح صار (الحق)..
والبنات على كتر ما نسبه عاليه كتير منون رخصت بحالا ف الشب ماعد فكر بجدية بالأرتباط والزواج
صارو من العائلتين الشب أو البنت لما بدون ينخطبو أو يتزوجو..هو يلحق شو معا وشو عندا وهيه واهلا نفس الشي وصارت الشغله تباهي مين معو وعندو اكتر واكيد ماعم عمم عم احكي الأغلبية حسب ما طلعت وخضت وشفت انا عشت اشياء مابتنعاش وعاشرة وشفت كتييير
نفسيتي تعبت وكل مالا اعمار يلي عم يطلبوني وعدد ولادون يزيد
وأي وحده من عيلتي أو أي واحد قلو أو قلا شو ناقصني حتى آخد ختيار يتطلعو فيي بنظرة نقص ولو يصحلون يضلو يعدولي مابقصرو...
صرت بس اوصل عالمكتب كوني ضل لحالي من ال5 لل8 ف قبل ما اطلع بشوي بس بيجي المحامي ف يا ببين عليي بكيانه يابكون عم ببكي..
ف كتير يسأل شبك قلو مشاكل بالبيت...
حتى مره هو طلب يحكي معي..ونادالي قعدت قلي بدي حاكيكي بموضوع
قلتلو تفضل..
كمال: ليكي ريماس انا رح فوت بالموضوع دغري انتي من زمان عاجبتيني وانا زلمه متزوج عندي 4ولاد شوفت عينك...
بحسب امكانياتي انا بحسن افتح اكتر من بيتين الحمدلله مرزوق والله كارمني...
بظن كان عمرو38
قلي انا صح متزوج بس كمان حابب اتزوج كوني عرفتك وعرفت وضعك وبسمع من مكالماتك تقريبا شو عم بصير معك وبينك وبين اهلك...
ف انا بس بدي أتزوج لاني حبيتك ومعجب فيكي مو لانو عندي نقص ببيتي إلا انو مرتي شوي كبرت وصار هما الأولاد...
قلي فكري
وطلع كان بيعرف اهلي لانو انا كل مين بعرفو بعرف اهلي عليه
حتى ارتاح شوي بشغلي وتخف عني الأسئله والأتصالات...
يعني مشان ريح راسي وما اسمع حكي واتهامات..
لما طلب مني فكر مارديت بشي ولا عطيت أي ردة فعل لانو كان شخص مانو ببالي شخص مستبعد كتير كمان وخاصه انو متزوج..
ف رجعت عالبيت كان البيت مليان خالاتي وجيرانا وامي
سلمت وقعدت ف نطت خالتي سألتني مالقيتي شي حدا بدنا نفرح فيكي
طبعا بقلبي الله بيعلم شو قلت...
قلتلا والله طالبني المحامي يلي عم اشتغل عندو
كانت امي عم تطبخ بالمطبخ بس راداراتا جابوا لما سمعت هالحكي
وصارت تسأل بالله عنجد
اي ها هي خبرية هي الله عوضك...
مال وعز وجاه لأ وكمان محامي.. شو بدك احسن من هيك...
قلتلا امي الزلمه متزوج بعدين استني اسألي عنو سألي عن عمرو..
قال لك امي انتي مطلقه مين مفكره ياخدك
عزابي...
اذا حاطه ببالك هيك مارح تتجوزي بعمرك
غصيت بكلاما يلي وقف بجوزة حلقي
سألوني خالاتي هاد شو عمرو وشو وضعو قلتلون كلشي..
قالولي طيب ليش لأ
اذا زلمه مقتدر وطبعا هو كان قايلي شو بدك مهر بيحضرلك..
رح استأجرلك بيت ببيروت..
مشان ما تصير مشاكل مع مرتي..
وسيارة هون فورا باسمك هي اعتبريا من حقك..
وغير هيك اذا ما فتحتلك صالون هون بقلب الشام وبأرقى منطقة رح افتحلك ببيروت وانتي شاطرة مابينخاف عليكي
طبعا كلو يالله اتكلي على الله وشو بدك احسن وهي الله عوضك..
مع انو كان ك شكل مو بس بشع قبيح الله يستر عليه...
بس انا ماوقفت عند هيك شي..انو هو مو غرور أو شوفة حال بس بالواقع لاحقني لعمري وجمالي مو اكتر...
وانا مرتين شفت مرتو بالمكتب وعنجد يعتبر انو نيالو عليها كمان محاميه كامله مكمله مو ناقصا شي وولادا مبينين اخواتا
بتشبه الممثلة تولاي هارون...
عنجد مرا متل ما منقول نحنا الشوام منين ما رنيتيلا بترن ومافيا اي عيب..أو حتى اي نقص
يعني مرا مجرد ماتشوفيا بتعجبي فيا وتسألي حالك هاد وين عينو شو لسه ناقصو وشو لسه بدو..
لك الله يلعن كل رجال عينو بتطلع لبرا لمجرد انو مرتو كبرت وشبع منا
بعد ما جابت ولادو وانتزع جسما معو ومنشانو
المهم...
ما نيموني اهلي إلا وهنن قانعيني انو هاد الفرصه يلي لازم اتمسك فيا بأديي ورجليي..
وفرصة العمر يلي بتجي مره بهالعمر ..
نزلت على المعهد وبعدا عالمكتب روتين متل العاده هيك حتى اجا المحامي قبل وقتو بساعه منتظر الرد..
انا طبعا ما كنت حاملتلو رد مستنيه مني..
لا رد ولا صد
انا كنت معبايه اسئله واستفسارات
سألتو ليش قلتلي انك عالأغلب تستاجرلي بيت ببيروت ف قال لانو مابدو مرتو تعرف..
ريماس: واذا عرفت...كمال: مارح تعرف..
ريماس: طب ليش لحتى ماتعرف...
كمال: انتي بدك تخبريا...
ريماس: لا بس بركي عرفت شو بتعمل..
كمال: لا لا بعيده هالفكره..
ريماس: طيب واهلك...
كمال:على اهلي لاتقربي..
ريماس: لاتقربييييي! شو يعني بالسر...
كمال: اي احسن الي والك..
ريماس: الك اي بس الي لأ..
كمال: طلبي شو مابدك وحددي العرس بالمكان يلي بدك يا وايمتى مابدك بس انتي وانا واهلياتك حتى إذا فيكي تستثني من رفقاتك...
ريماس: اممم...طيب ومشان الشغل قلتلي انك حابب تفتحلي صالون...
كمال: هاد اكيد
وقبل البيت حتى تنمي موهبتك وتكوني شخصيتك...
ريماس: امم بس انا حابه نااطف قلبي على ولد
لانو بعتبر حالي لحالي بهالدنيه...
اذا جبت ولد فورا شو...
قال لا لالا لالا اوعك..
قلتلو اوعك!
ليش كمان بقى هات لشوف قال كمان مشاني ومشانك خلينا نشوف حياتنا انا وياكي بدون واع وويع وننبسط ونفرح ببعض والعلاقه بتصير احلا...
قلتلو امم واذا صار ومن أولا حبلت وجبت ولد بتشحطني لانزلو..
قال لا خلص بكون الله هيك بدو...
قلتلو طيب وهاد الولد لنحط احتمال انو اجا ع هالدنيه وين اهلك منو..عمو جدو ستو...
كمال: لاااااااااااا اذا صار وجبنا طفل بدك تفهمي انو مافي الو حدا غير أبوه يلي بيضل بسافر
وشغل وسفر لايتعود...
ريماس: امم طيب وحضرتك ايمتى بتجي عالبيت وايمتى ببيتك..
كمال: كل يوم بنهار بطل عليكي بالليل بدك تنسيني نهائي مافي شي يخليكي تدقيلي وانا ببيتي مع مرتي...
قلتلو بركي مرضت انا
كان عندي ولد ومرض
صار معي شي
اندق الباب
انخلع الباب
صار شي
فكان ردو
اذا بيشعل فيكي البيت
وبنط عليكي الجار مافيكي تدقيلي
انا ح سخرلك أشخاص لخدمتك ويكون عندك رصيد بالبنك حتى ماتعتازيني بهيك مواقف
ف قلتلو ماشي اتفقنا
قال نتكل على الله
قلتلو فيك وبلاك انا متكله على الله ومستحيل ارضى بهيك شي لو بدك تكون قاضي...
ريماس: بتستاهل احسن مني ...
كمال: انتي مابتعرفي قيمة حالك..
ريماس: اي منشان هيك رفضتك...
وصرت اقلب الحديث ضحك ومسخرة ورفضت بطريقة سلسة حتى ما اخسر شغلي انا بحاجتو للشغل وكمان مابدي الزواج او يصير شي بينا...
وضليت بشغلي وكلشي على وضعو وهالمحامي يروح ويجي ويسمعني ويلمحلي ويقنعني بس عبث...
خلص مانو ببالي
وكل ما حس اني متدايقه أو صاير معي شي مشكلة يقلي خليني آخدك ودللك...
لو تزوجتيني كنتي هلأ أحلى بيت وسيارة.. ومشاوير ودنية وعايشه حياتك مو سكرتيرة وعايفة حالك ومبينه ماله وقرفانه..
انا ابتسم وطنش مارد عليه...
هيييك على هلروتين لحتى حطيتلو حد انو خلص انا قلتلك مابدي لاعد تحكي بالموضوع
انتترت وحملت شنتايتي ومشيت وتركت الشغل
ضليت بس على المعهد
ف بلش يتصل ويعتذر ويدقدق ..
رديت عليه ولما اعتذر ورجعت لشغلي..
وعنجد سكر السيرة...
هيييك على روتين بقرف
انزل واطلع معهد ومكتب وارجع حط راسي ونام
ماعد طلعت على محل بنوب..
ومتل العاده حملت حالي ونزلت على المعهد واجتني رساله من المحامي انو معطل يومين مسافر..خلص دوام المعهد ف بتجي وحده من الصبايا بتسألني شو عندك اليوم..
قلتلا ولاشي ليش
قال خرج تروحي معي بعد الدوام محل موبايلات قريب من المعهد بدي جيب موبايلي عندو بالتصليح.. وبعدا منروح منتمشى..
قلتلا اي ماشي ومنو انا ماعندي شي
خلص الدوام وانطلقنا ع المحل مشان جوالها...
أنا بطبيعتي بضل بضحك وبتفزلك وبأرء على العالم وبعلق كتير... مومعناتا بتمسخر لأ بس مرحه كتير وين ماكنت ومع مين ماكنت فتنا على المحل كان في شبين برا عالباب فتنا لجوا المحل وقفنا ادام كونتوار..
عم قلا اتطلعي على هالمحل شو كبير لك كأنو مافي حدا هون اذا منسحب شي تلفون ماحدا شايفنا..بيطلع صوت من ورا الكونتوار صوت
بقلي طبيعي ماركبت كاميرات..لأنو انتي ماعد اجيتي لعندي..
لك كان الصوت بعرفو
كتييييير بعرفو
ابتسمت حطيت ايدي على تمي واشرتلا اني طالعه لبرا لرفيقتي
بين ما تجيب جوالا
درت ضهري وانا وطالعه بيجي حدا من ورايي بقلي تعي لهون لوين هربانه. ......
كانت الصدمة ...
هاد الشب ما حكيتلكون عنو..
تركت كل تفاصيلو للآخر
مشان ما لخبطكون ويكون كلشي واضح
هاد الشب بعد ما فسخت خطبتي...
فتت لعندو على محل كان المحل بحارتنا فرع تاني..
كنت عم نزل برامج على تلفوني وواضح على وجهي اني بكيانه كانت امي كتير تدايئني بعد مافسخت بتلفوناتها وبشغلي على وينك ومع مين ووين لهلا ومين جنبك وإحراج
نزلت من عندو برامج واشتريت خط
ولما اجيت عم حاسبو تناقرت معو شوي مشان السعر حسيتو غلوجي وقلتلو هلأ بمحيون ماعد بدي ياهن ..
فقلي شكلك متدايقه من حدا وجايه تفشي قهرك فيني ..سكتت وحاسبت ومشيت
بعد يومين وقف الخط يلي اشتريتو من عندو
شغلو ما يشتغل
نزلت لعندو رجع شغلي ياه ..
وصار يمهيص
بعد فتره انا وطالعه من شغلي مرئت لعندو عم بسألو اذا بقسط
لاني حابه غير تلفوني فقلي انا مابقسط وماحدا هلأ بقسط بس كونك جارتنا وبشوفك نازله وطالعه مو مشكلة
تكرم عيونك...
وبالفعل اخدت من عندو تلفون وعطيتو دفعه وبلشت قسطلو...
وسألني بابا على التلفون حكيتلو انو تقسيط قلي سأليه اذا في مجال نسحب تلفون تاني ألو
وقلي مافي مشكلة ونزلنا انا وبابا لعندو عالمحل اخدنا تلفون تاني لبابا
وتعرف على بابا وعرفو بعض واخدو أرقام بعض
ومرة انا وقاعده بالبيت اجاني رقم غريب عالواتس.. على هاي وممكن نتعرف ومعجب وبتعرفيني وبعرفك وهيك..
وانا اسأل مين
يبعتلي سمايل
بعتلو اذا مابتحكي مين رح احظر
مارد
بس عم يوصلو
بعتلو
1
2
....؟
3
وحظرت..لمن مارد..
بعد شوي اتصل من تلفوني يطلعلي خارج الخدمه...
اتصلت في عالمحل قلي نزليلي ياه...
نزلت لعندو عطيتو يا شغلي يا..
وانا ما دارتلي انو هوه يلي عمل هيك....
قلي مشكلة من الشركه
انا وطالعه قلي بدي أسالك قلتلو شو...
قلي شو يعني
1
2
3
قلتلو مافهمت شو يعني
ف ضحك آم انا تذكرت الرقم يلي اجاني عالواتس
قلتلو هاد انت ضل يضحك
قلتلو ماشي...
قلي استعجلتي عليي كان بدي خبرك انو انا
عديتي وحظرتي ما استنيتي..
ليكي فكي الحظر وحاكيني اي...
قلتلو طيب ماشي
وصلت عالبيت
فكيت الحظر صرنا نحكي عادي..
مرحبا شو عم تعملي وسلام وأحيانا ندردش
وهيك شوي شوي تقربنا من بعض وصرنا نفضفض ونحكي لبعض شوية مشاكل بتصير مع كل واحد فينا...
وهوه بسفل نزلت بيتنا...
يعني بالنزله بشوفو وبالطلعه بشوفو
ومره كنت لابسه كعب زحطت ادام محلو وطلع يسألني صرلك شي وفرط ضحك احيانا كان مزحو وضحكو يدايقوني بس لما صير لحالي واتذكر اضحك...
مرة هالشب دقلي وانا بشغلي..
قال شو رأيك اعزمك على اركيله بعد الشغل بشي محل ووين مابدك
قلتلو انا بدي اطلع معك انت.. والله اذا مابضل شب غيرك بالدنيه..هلأ انا حكيتا بعفوية مو استهزاء فيه انا هي طبعي...
بس كان هو شخص مابيعجبني ابدا أو بالأحرى مو ببالي...
ضل يلح ويصر كتير ويقلي براهنك ومدري شو وانا اضحك وطنش...
هيييك ليوم كانت نازله المطر في زخ وانا تشتشت وانقطعت المواصلات وماعد في مجال كمل عالبيت ولا استنى شوي
دقلي والتقينا وطلعنا على كافيه اركلنا وقعدنا شوي وقعد يذكرني بجملتي انو اذا مابيبقى غيرك شب بالبلد مابطلع معك...
هاد الشب وقتا قلي هيك دج..قلي تتزوجيني انا بدي اطلع على تركيا بتطلعي معي قلتلو لا مابدي.. ومن كل عقلك واتسمخر عليه..بنفس اليوم عزمو بابا لعنا كمان على اركيله وشكرو منشان تقسيط التلفون بما انو صارو بيعرفو بعض..
بهالفترة يلي مرئت كلا كنت حس بشي تجاهو
حسو حنون حسو مهتم وهاد غير كرمو..وكان كتير اريب لقلبي بس اكيد ك صديق مو اكترطلع لعنا عالبيت قعد مع بابا وصاه بابا على راوتر وكم شغله بيناتون...
وراح تاني يوم كمان اجا لعنا عالبيت وجاب الراوتر لبابا وبيت وبطاريه وشاحن جوال وهيك
شوي شوي صار كل ما يشوفني فاتحه يقلي مع مين عم تحكي... قلو يي وانت شو دخلك..
وكان يحكيا بطريقة مو حلوة بنوب...
آخر شي طلع معو يهددني قلي انا رح قول لأبوكي مو شايفك ابصر مع مين بتضلي سهرانه علواتس...
لما قلي هيك رحت فورا مسكت بابا قلتلو
يلي عملو ...
دقلو بابا بهدلو وتخانئو...
قلو اذا انا تارك بنتي على راحتا انت بدك تجي تدخل فيا...شي حلو والله بنتي وبعرفها...
بعدها بعتلي رساله انا عم بسألك مع مين عم تحكي ياحماره...
ولأجل هي الكلمه انا اتدايقة وصارت كرامتي بدنيه...
بعدها علق وتخانئ مع بابا
وحظرناه وحظرنا...
بعد بيومين اتصل ببابا قلو بدك ترجعلي الأغراض يلي بعتك ياهن...
بابا: انت عم تحكي بعتك ياهن...كيف رجعلك شي اشتريتو..شو اخدتون منك ببلاش..
وكمان علقو علقة كبيره وصار يهدد ويتوعد...
أم بابا بعتلو غراضو وهو بعت المصاري وضل بابا يدعي عليه وقلي على هيك شكيلات لاعد تقربي...
وبعد فتره درينا انو سافر هاد الشب بسبب الأوضاع..
ولما فتنا على المحل انا ورفيقتي مشان جوالا طلع المحل ألو وهو المصلح يلي وقف ورا الكونتوار وطلع صوتو عم بقلي ماركبت كاميرات منشانك لأنك ماعم تجي لعندي...
لما اطلع بوشي واتطلعت فيه تلبكت ماعد عرفت اطلع ولا ضل ولاشو اعمل يلي طلع معي هو اني ضحكت مو لاني قررت اضحك بس هيك لحالا طلعت...
مد ايدو سلم عليي سلمت عليه...
سألتنا رفيقتي شو بتعرفو بعض...
قلا بزمانو سرقتني وصرنا نضحك...
جبلنا قهوة وكان خالص جوالا...
اخدتو وصارت تفاصلو مشان السعر تبع التصليح وانا قلو معلش راعيا
قلي انتي مابتحكي معي غير بمفاصلة المصاري
حاسبتو واجينا لنمشي قلي خليكي شوي منطلع سوا...
قلت لارفيقتي انا رح ضل وطلعت رفيقتي..وضليت شوي وبعدها طلعنا نتمشى سوا على طريقي للبيت...
سألتو عن سفرتو قلي كانت كم شهر خسر فيا ورجع وماتيسرت
وصرنا نحكي عالواتس يوميا يومياوكل شوي وبعد ماعتزر والماضي فات...
وانا كل يوم اقلق وفكر انو لازم خبر اهلي بلا ما حدا يعرف أو يكشفنا فجأه..
ف اضطريت ألف قصه عليهن.. واجيت من شغلي قلتلون رحت مع رفيقتي لمحل موبايلات اشترت جوال مستعمل ومسكنا الحاجز لانو طلع مسروق وكنا رح نتبهدل لو ما الحاجز جاب صاحب المحل وطلع هوه نفسو (رامز)يلي كان فاتح محل تحتنا وقلون هي البنت عندي ومستحيل وطلع هوه الجوال مسروق من حدا...
مرئت القصه على امي
بس بابا شال الدنيه وماحطا...وبهدلني وقلي لابتقربي عليه لا بحلال ولابحرام...
وهيك انا صرت انو مابدي بدي ضل حاكيه مافيني ما حاكيه تعودت عليه وخاصه انو حاسه مالي حدا ووحيده وصرنا يوميا ننزل سوا طريقنا للشغل نفسو ونطلع سوا نفطر نتغدا سوا وكلشي سوا...
انا من محلو القديم يلي كان قريب على بيتنا كنت بعرف انو متزوج وعندو بنت وحتى كان خاطب بنت عمو وصار مشاكل وتركا...
يلي بعرفو عنو بعرفو منو بس على حسب ماحكالي..
سألتو طيب ليش بدك تتزوج على مرتك...
فقلي مابحبا مابرتحلها...
واجتمعت بأكتر من حدا من عيلتو حكالي نفس القصه...انو كتيير كان بحب بنت خالتو ومتعلق فيا وبتحبو وكان صحبه كتير مع اخواتا الشباب و آكل شارب نايم عندون بس لما طلبا للبنت رفضوه وطلعو مرافقينو بس مشان مصاريه وصرفو عليهن...
من صدمتو لما تركا تاني يوم كان خاطب وحده من حارتو مابيعرفا من قبل
ضلت هالخطبه 5سنين وكان يماطل مع أهلا حتى يشوفو انو مانو اد المسؤولية وماطلع بأيدو يفتح بيت ويظبط امورو
كان يزورون كل خميس
أول سنتين
بعدين قطع وصارت مشاكل وصار ابوا يخانئو انو وينك وماتجي ولا بتدق ولابتسال عليها ولابتلفون...
بعدين اتصل بأبوا قلو بدي حاكيك بموضوع وانت متل والدي جايه لعندك المسا وخلينا نحكي انا وانت بالغرفه لحالنا...
ولما راح لعندون المسا كان آخد معو مهرا مقدما ومأخرا..
قلو عمي انتو احسن مني وانا ظلمتكون معي
يمكن انت بتلاقيني قاسي على بنتك بس انا مابحس بشي تجاها ومابدي اظلما اكتر من هيك واظلم حالي معا انا كان بدي بنت خالتي وانصدمت وهيك هيك صار...
وتاني يوم كانت بنتك خطيبتي وقرينا الفاتحه
عمي هي نقدا كامل وفوقو حبة مسك واسترو ماشفتو مني
البنت يلي هيه هلأ مرتو كانت برا واقفه عم تتسمع قلو ابوا روح الله يسامحك رح ناديلا ترمي عليها اليمين..فتحت الباب وفاتت صارت تبكي قالتلو لأ مابدي تتركني
انا مارح خليك تتركني
ضل معي وخليني معك لو بدك تتزوج عليي
وتزوجها على هالأساس انو بتحسن تنسي هديك مع الوقت..
وعندو منا بس بنت صف تاني ليومنا هاد...
المهم اهتمامو فيني صار ملحوظ ادام الكل باستثناء ابي قدام الشغيله اهلو ارايبينو رفقاتو امي خالاتي..وتعلقت فيه بدكون تعرفو ليش لأنو يلي شفتو منو والله ماشفتو من أي حدا...
لما بدي اطلع على السوق مايهون عليه يقلي انتي بنت مابصير...
يا يطلع معي يا يبعتلي الأغراض عالبيت واذا بدي روح جيب غرض نفس الشي...
كل يوم كل يوم اطلع من شغلي لعندو ونطلع ناكل سوا بعدين عالبيت...
ونحنا وطالعين مره عرف اني بحب العصافير بعتلي عالبيت...
بعدا عالفيس شاف منزله فيديو قطاط بعتلي قطة أم وولادا 4 بصندوق صغير...
شو بدي كان يحضرلي كان كريم وطيب وحنون بشكل. حبني وحبيتو للموت هي اول مره بعرف شو يعني الحب.. اعتبرتو اول شخص بحياتي
هيييييك للما طلبني صرت ابكي...
قلت دخيل الله مابدا تكمل معي بشي...
ريماس: انت متزوج مستحيل...
صار هو يبكي...
اصر هوه وانا اصريت انو لأ لأنو متزوج ومابدي اخرب حياتو واظلم هديك بس مو بئيدي حبيتو وادمنتو...وماكنت فكر لابعدين او احسب حساب...
رامز: بس كنت خاطب بنت عمي واذا مو انتي غيرك...فتي بعيلتي وبتعرفي وضعي مع مرتي
مجرد صوره انا وياها...
ضليت مصره انو مابدي مع اني كتير بحبو بس جربت المتزوج ووجعني البي كتير من هالموضوع..
قطعتو فتره بركي كل واحد فينا بروح بحال سبيلو...
بلش يهدد ويتمسخر ورح قول لابوكي وكذا وانا مارد عليه....
ف كان في بجوالو صوره النا ونحنا بجامع الأموي كان وقتا عم يقلي شوفي شو طلعتي حلوة بالعبايه امانه خليني اشتريلك جاكيت وانا اضحك واتمسخر....
هي الصوره بعتلي ياها عالواتس وقلي ماشي مو ابوكي مابدو تحاكيني.. رح ابعتلو هي الصورة.. صرت سايرو لانو اذا بيدرى بابا رح اخسر شغلي وانحبس بالبيت...
رجعنا نحكي ونطلع سوا وانا مابعرف شو اخرتا وهو يصر اكتر واكتر ويهدد اكتر واكتر...
ف اتصل بأمي قلا اذا ما بتقنعي بنتك وبتوافق عليي وتكون مرتي بالحلال لأنا حياتي وبحبا وشاريا رح احكي لأبوا...
واتهمني بقصص وعلاقه بيناتنا وقلا أساسا هيه صارت مرتي وفي كلشي بيني وبينا...
قلنالو انا وامي روح احكي شو مابدك لمين مابدك...انا ما كان هاممني شي بوقتها خلص شبعت صدمات ماعد يأثر فيي شي..او بجوز من محبتي وكتر محبتو ألي عم اغفرلو...
بس كنت بحاله غريبه
بحبو بس مافيني أخدو
وكمان مابدي اخسرو
ومتل الضايعه...
زواجي بمحمد ووجود مرتو هلكني مو بس تعبني وخفت تتكرر القصه واذا تأخرت لأحبل...
يمكن مشان هيك..كل الوقت ضل اتذكر هديك القصص والفصول..
ولانو شغلتو بالجوالات..بعت فايروس لتلفوني وسحب كلشي في..من صور فيديوهات وحتى هكرلي صفحتي..
انا ما كنت عرفانه هو خبرني..
فجأه بيجيني عالواتس هاي يا حلوة من رقم غريب..
ويلي جاب أجلي بالموضوع.. انو محطوطه على واتس هاد الرقم صورتي بدون حجاب بحفلة عرس...يعني بالقصير كمان...
انا هون مو بس خفت والله العظيم صرت ارجف بدني صار يرجف..لان هي مصيبه..واذا بيدرى ابي مابعرف شو بصير فيي..
واذا ببلع القرآن ورقه ورقه ماحدا رح يرحمني أو يصدقني مو بس ابي...من خوفي رحت لعند عمي الكبير كان متل رفيقي..
فتحتلو اول شي على صورتي المحطوطه عالواتس بعدين حكيتلو كلشي كلشي بالتفصيل من أول ماعرفتو للما تخانئ مع ابي لليوم هاد...
اخد الرقم عمي واتصل فيه فورا...
وقلو انا بكون عما
حميل حالك وتعا لعندي مشان ما جيب شرطه واشتكي عليك..
كمان سبو لعمي لما قلو هيك وسكر...وبعد بشوي دق رامز وقال لعمي جايه لعندك..
واجا هوه وواحد لعند عمي..فتنا انا وياه وعمي عالغرفه لحالنا وصرنا نحكي..
أول شغله عملا عمي جاب المصحف..
وطلب من رامز يحلف وحط ايدو رامز على كتاب الله كلشي بينو وبين عمي ومايطلع شي لابرى..
قلو عمي طيب ماشي ومع هيك غلطنا معك وعم اطلب منك تستر ماشفت منا واتفقو على هاد الأساس لاحتى مايدرى ابي ويصير مشاكل اكتر...
طلع عمي من الغرفه ليقول لمرتو تعمل قهوة..
آم قلي انا لما بحلف للناس في بيني وبينك كلشي لازم تعرفي شو يعني كلشي.. انتي بالنسبة الي كلشي وحياة بنتي وما كنت حابب اخسرك...
انا بس عم اتطلع في ماحكيت ولاكلمه..
شرب القهوة وقبل ما يطلع حلف كمان على كتاب الله انو يمحي رقمي وماعد يدقلي ولا يقرب عليي وينسى انو بيعرفني..
واتطلع فيني تطليعه مافهمتا ومابنساها لما راح انا ماكنت شايفه ادامي شي..
لاشو عمل ولاشوساوى
كنت شايفه ادامي بس انو يلي تعلقت في وتعودت عليه وبحبو راح وماعد يحكي معي وماعد شوفو..
وصرت ابكي ابكي ابكي البي رح يوقف
عمي قلي لك شبك مو هاد يلي كان بدك يا مو متل مابدك صار...
لك لاتنسي شو عمل معك
قلتلو هو بحبني لانو بحبني صار يضغط عليي بالهطريقه هي..
كان بدو ياني وورجيتو رسايلو كلا والمحادثات بيناتنا وتهديداتو الي
بس البي رح يوقف اد ما بكيت...
يمكن على الساعه 9
انا رجعت عالبيت وضليت سهرانه للصبح عم عد الساعات وعم شوف كيف بدي كفي هاليوم بلاه
وكيف بدا تمرؤ هالأيام وانا كنت عم شوفو اكتر من اهلي..
فطوري وغدايي وعشايي وحكيي وضحكي وكلو معو..
*يـــــــــ͢ـོ͓ـــتبــــــــــــــོـ͓ـــ͢ــ؏*
➖➖➖➖➖➖➖➖➖
*❴📖❵↵*تنسيق مشرفين مجموعة:*
*❴📚❵↵*قصص وروايات عالمية📚💙*
*❴💙❵↵*ننشر جميع انواع القصص والروايات العالمية*
حـب💙.
حـزن💙.
اكشن💙.
رعب💙.
*❴👑❵↵*أن كنت من عشاق ومدمني القصص مكانك عندنا💙*
*❴💙❵↵*رابط المجموعة للاشتراك:*
```https://whatsapp.com/channel/0029VaQogP17YSdATvOUwa1h```