الفصل 4
*قـصـص وروايـات عـالـمـيـة💙📚📖*
*بإدارة* *يـامـن💙*
*❴📖❵↵* *يبقى.الأثر.tt* ♥
*❴🔢❵☟الـــبـــــــــــ❴4️⃣❵ــــــــــــارت☟*
➖➖➖➖➖➖➖➖➖
*
*❴📖❵↵*تنسيق مشرفين مجموعة:*
*❴📚❵↵*قصص وروايات عالمية📚💙*
*❴💙❵↵*ننشر جميع انواع القصص والروايات العالمية*
حـب💙.
حـزن💙.
اكشن💙.
رعب💙.
*❴👑❵↵*أن كنت من عشاق ومدمني القصص مكانك عندنا💙*
*❴💙❵↵*رابط المجموعة للاشتراك:*
```https://whatsapp.com/channel/0029VaQogP17YSdATvOUwa1h```
➖➖➖➖➖➖➖➖➖
*رفعت ايدي و ضربت سناء كف...
رضوان : مشان تتعلمي انتي و رفيقتك كيف تحكو معي ، و انتي يا تمارة هلأ قولي رضوان نصاب بالفم المليء و تأكدي انو انتي و كلامك تحت رجلي.
تمارة : تفو عليك.
سناء : الله لا يسامحك.
*مشيت بدون ما التفت ورايي .. و قررت من هاللحظة بلش حياة جديدة...
____________
#بقلم_فتاة_من_ورق_بسمه_السباعي
*مضى شهر على اول جرعة ليحيى .. طالعت مخدتو عالبرندا و نفضتا من شعرو .. وقع شعرو بسرعة و وجهو شاحب من اول يوم علاج لهلأ...
يحيى : لابقتلي الصلعة
ياسمين : لابقتلك كتير يا عمري
يحيى : لما اتعافى رح ضل احلق هيك
ياسمين : ان شاء الله
يحيى : حاكيتي مرت عمي مشان تتفضل عالغدا ؟
ياسمين : حاكيتا بس ما فيها تجي
يحيى : ليش
ياسمين : رايحة تشوف عروس لرضوان ، واخيرا حط عقلو براسو و قرر يعقل و يتزوج
يحيى : الله ييسرلو و يباركلو
ياسمين : آمين ، وليد و أمل رح يجو ؟
يحيى : اي الكل رح يجي
ياسمين : بينورونا
يحيى : انتي يلي منورة حياتي و مزينة بيتا الله لا يحرمني من شوفة وجهك الحلو
ياسمين : وما يحرمني منك يا روحي ، يلا نروح عالمطبخ خلينا نبلش نحضر الغدا سوا
يحيى : من هلأ ها انا ما بقطع السلطة
ياسمين : هههه امرك سيد يحيى انا بقطعها بس انت بتجلي الجليات ههههه
يحيى : اتفقنا
____________
#بقلم_فتاة_من_ورق_بسمه_السباعي
أمل : من فترة كنت عم فكر اتدرب سواقة
وليد : هلأ مو وقت هالمصاريف أمل ، حتى سليمان رح مشيه و صير انا اخد ميرنا و جيبها
أمل : ليش ؟ شو تغير ؟
وليد : يلي تغير انو نحن هلأ بحاجة كل ليرة لعلاج اخي يحيى ومستحيل اترك اخي بدون العلاج مشان عيلتي تتمصرف على اشياء تافهة
أمل : متل ما بدك ، الله يعافيه
وليد : آمين ، جهزو حالكن انتي و ميرنا يحيى عازمنا عالغدا
أمل : حاضر ، ميرنا ، ميرناا وينك
ميرنا : انا هون بغرفتي ماما
أمل : شو هاد لهلأ ما رتبتي غرفتك ؟
ميرنا : كنت عم إلعب
أمل : عم تلعبي بالتلفون ، انا ما قلتلك التلفون مو كل الوقت؟
ميرنا : اسفة
أمل : يلا قومي رتبي غرفتك و البسي فستانك الكحلي رايحين على بيت عمك يحيى
ميرنا : طيب
أمل : لما تخلصي جيبي المشط مشان ساويلك شعرك
ميرنا : حاضر ماما
____________
#بقلم_فتاة_من_ورق_بسمه_السباعي
ام رضوان : لما تخلص فطورك لا تنزل عالمحل ، روح احلق و اشتري علبة حلو مرتبة
رضوان : ليش ؟
ام رضوان : رح نروح نشوف العروس
رضوان : مين هي؟
ام رضوان : ما بعرفها للعروس بس بعرف خالتها.
رضوان : مين خالتها ؟
ام رضوان : جارتنا ام ياسر ساكنة بالبناية يلي جنبنا.
رضوان : ما بسمع عنها كتير ام ياسر
ام رضوان : هي ما بتختلط بحدا بس المخلوقة اكابرية كتير
رضوان : الله يختار الخير
ام رضوان : آمين
____________
#بقلم_فتاة_من_ورق_بسمه_السباعي
كمال : ليش عم تشلحي دهباتك؟
سمر : كنت بدي احكي معك بهالموضوع
كمال : خير ؟ شوفي ؟
سمر : انت بتعرف انو ابي و امي وزعو الورتة على حياة عينهن ، بيت لوليد و بيت ليحيى و نص بيت اهلي الي يعني ماعاد في بين ايديهن غير المصروف اليومي
كمال : طيب ؟
سمر : لهيك اتفقنا انا و وليد نساعد بمصاريف علاج يحيى بدون ما نحسسو بشي ، و يمكن احتاج بيع دهبي اذا بتسمحلي
كمال : معقول عم تسألي اذا بسمحلك؟
سمر : نص الدهب انت جايبو
كمال : الدهب و المصاري ما بيسوو شي جنب الصحة والعافية ، الاب و الام و الاخ بينفدو بالروح مو بس بالدهب و المصاري ، انتي فيكي تبيعي كل الدهب بأيا وقت بتحتاجوه لتكملو علاج يحيى بدون ما تسأليني ، الله يعافيه و يخليلكن ياه
سمر : آمين ، الله لا يحرمني منك
كمال : انا طالع هلأ بدك شي؟
سمر : لساتك مصرّ ما تروح معي عالعزيمة؟
كمال : كنت بتمنى روح بس عندي ضغط شغل ، انتبهي على حالك و سلميلي على اهلك.
سمر : الله يسلمك.
* زادو ندمي و حرقة قلبي على ام كمال بعد موقف كمال معي .. يا ريت يرجع الزمن و صلح غلطي اتجاههن و ارجع شوف الحب و السعادة بعيون كمال .. يا ريت.
____________
#بقلم_فتاة_من_ورق_بسمه_السباعي
*اجتمعنا حوالي سفرة الغدا بإبتسامات مزيفة .. كلنا عم تلمع الدمعة بعيوننا من الحزن .. عم نجتمع و ما بنعرف اذا الجمعة الجاية رح نكون ناقصين شخص او لا..
يحيى : شو رأيك بطبخ مرتي يا امي
ام وليد : ما شاء الله يسلم ايديها الأكل بيشهي
ياسمين : صحة و هنا للجميع
ابو وليد : الله لا يحرمنا هالجمعة الحلوةوليد : آمين
ياسمين : سمر ليش ما عم تاكلي ؟
سمر : من لما حملت و انا ما الي نفس للأكل.
أمل : ذكرتيني بحالي لما حملت بميرنا كمان ما كنت آكل ، بس اكلات ياسمين ما بيتفوتو.
سمر : مبين المنظر بيشهي يسلم ايديكي ياسمين
ياسمين : صحة و عافية
يحيى : الله رزقني بأحلى و أحسن مرة بالعالم.
*مسكت ايد ياسمين و بستها...
يحيى : الله يسلم ايديكي و ما يحرمني منك يا روحي.
ياسمين : وما يحرمني منك يا نور عيوني.
أمل : وليد
وليد : نعم
أمل : ولا شي ، صحة وهنا
وليد : على قلبك
*حسيت بالغيرة من ياسمين و هي مو اول مرة بحس بالغيرة منها .. رغم انها رفيقة عمري و قبلت بسلفها لحتى عيش متل حياتها و حس بالحب يلي هي حاسة فيه مع يحيى بس طلعت غلطانة ، البطن بستان كل ولد بيخلق بشكل مختلف و طبع مختلف ، و شو ما عملت بعمري ما رح شوف من وليد الحب يلي بشوفو بين يحيى و ياسمين...
____________
#بقلم_فتاة_من_ورق_بسمه_السباعي
ام ياسر : اهلا و سهلا فيكن.
ام رضوان : اهلين فيكي ام ياسر
ابو ياسر : احكيلي عن حالك يا ابني ، شو دارس شو بتشتغل؟
رضوان : دارس معهد تجارة و فاتح محل مواد بناء ، دهان و جبص و بطلع ورشات دهان
ابو ياسر : حلو ، الله يرزقك
رضوان : آمين
ابو ياسر : بنت اختها لأم ياسر هي متل بنتي لانها اختو لابني ياسر بالرضاعة ، توفو اهلها وهي صغيرة و ربيت بيننا و بين بيت عمها.
ام رضوان : الله يحميها يا رب
ام ياسر : آمين
ابو ياسر : تفضلي يا بنتي لا تخجلي ضيفيهن القهوة
(العروس) : تفضلي خالة
ام رضوان : يسلم ايديكي حبيبتي
(العروس) : تفضل
رضوان : يسلم ايديكي
*رفعت راسي لحتى شوف هالصبية المحبوبة من الطرفين عيلة اهل امها و عيلة اهل ابوها...فتحت عيوني بدهشة و همستلها بصوت واطي...
رضوان : هي انتي !!!!!
مايا : رضوان !!!!!
*التفتت على خالتي الدمعة بعيني و ايديي عم ترجف...
ام ياسر : هاتي الصينية عنك حبيبتي و اهدي.
#ويبقى_الأثر
#الجزء_الثامن
#بقلم_فتاة_من_ورق_بسمه_السباعي
رضوان : هي انتي !!!!!
مايا : رضوان !!!!!
*التفتت على خالتي الدمعة بعيني و ايديي عم ترجف...
ام ياسر : هاتي الصينية عنك حبيبتي و اهدي.
ابو ياسر : عن اذنكن بدي روح صلي العصر.
رضوان : الله يتقبل.
ابو ياسر : منا ومنكم
ام ياسر : ام رضوان شو رأيك نقعد بالصالة انا و انتي ونتركن يتعرفو على بعض شوي
ام رضوان : اي اكيد
ام ياسر : تفضلي
*تطلعت بمايا شفت دمعة على خدها...لأول مرة بشوف مايا حلوة رغم زعلها...
رضوان : كيفك؟
مايا : منيحة
رضوان : ما بدك تطلعي فيني؟
مايا : لا
رضوان : كرهانتيني؟
مايا : اي ، ولو بعرف انو انت العريس ما كنت فتت ولا ضيفت القهوة.
رضوان : لهالدرجة؟
مايا : ليش نسيان حالك شو حكيت بآخر مرة إلتقينا؟
~~~~~~
مايا : رضوان
رضوان : نعم
مايا : ايمتى رح نتزوج؟
رضوان : ما عم اسمعك صوت الاغاني عالي
مايا : ايمتى رح نتزووووج
رضوان : هههههههه شي يوم
مايا : رضوان عم تتمسخر ؟
رضوان : عم اتمسخر متل ما انتي عم تتمسخري
مايا : بس انا ما عم اتمسخر ، انا عنجد عم احكي.
رضوان : كلكن هيك بتبلشو ، بالاول بحبك بعدين ايمتى بدنا نتزوج.
مايا : رضوان اذا مشان المصاريف انا بدفع كلشي انت بس يلي عليك تطلب ايدي من عمي
رضوان : واو ما اسهل الموضوع بالنسبة الك
مايا : ليش صعب بالنسبة الك؟
رضوان : طبعا صعب يا ميوش
مايا : عم قلك انا بتكفل بكل المصاريف انت بس اخطبني من عمي
رضوان : الصعوبة مو بس ماديا
مايا : شو قصدك؟
رضوان : قصدي صعب اخد وحدة متلك
مايا : وحدة متلي ؟!
~~~~~~
رضوان : لا مو نسيان.
مايا : بيوما قلتلي صعب اخد وحدة متلك ، و شوف كيف القدر جمعنا و خلاك انت وامك تجو تخطبوني.
رضوان : مايا
مايا : لا تحكي رضوان ، بس عندي سؤال واحد الك
رضوان : تفضلي
مايا : لاني حبيتك لمدة سنة و طلعت معك على كفتريات ومطاعم صرت رخيصة وصرت ما بنخطب؟
رضوان : لا
مايا : من هداك اليوم لليوم كل ما حطيت راسي على المخدة بتذكر كلامك حرف حرف و ببكي بحرقة ، بتعرف ليش؟
رضوان : ليش
مايا : لاني اعتبرتك عيلتي اعتبرتك اهلي يلي نحرمت منهن من لما كنت صغيرة و لاني ما قدرت اكرهك ، انا كرهت حالي و بس ، عن اذنك هلأ
رضوان : مايا ممكن تقعدي شوي ؟ ممكن تسمعيني ؟
مايا : لا
رضوان : كرمال السنة يلي مضيناها سوا تسمعيني وبعدا اذا بدك ماعاد تشوفي وجهي بعمري.
مايا : احكي عم اسمعك.
رضوان : بهداك اليوم لما مشيتي انا ما كنت مستوعب حالي شو حكيت ولا كنت مستوعب الموقف ، مضى يوم يومين اسبوع بدونك حسيت حالي رح جن بس كبريائي ما سمحلي اعتذر منك ، وبلشت اتغير ، صرت دايما شارد عم فكر فيكي و صرت اكره كل البنات ، و لما امي قررت تخطبلي وافقت لحتى بلش حياة جديدة على أمل انو انساكي و اليوم القدر جمعني فيكي يمكن لحتى اعتذر منك و يمكن لحتى تعرفي اني ندمان على كل كلمة حكيتا وجرحتك فيا ، مايا انا اسف من كل قلبي انا اسف ولو قبلتي فيني بوعدك تعيشي حياة حلوة تنسيكي كلشي بشع عشتيه.
مايا : عن اذنك
ام ياسر : مايا طلعت شكلهن خلصو حكي
ام رضوان : ان شاء الله خير
رضوان : منمشي امي؟
ام رضوان : اي ، اسألو عننا على مهلكن ام ياسر و ان شاء الله بأقرب وقت بتصل باخد الجواب
ام ياسر : الله يقدم يلي فيه الخير
ام رضوان : آمين ، بالاذن
ام ياسر : اذنك معك شرفتونا
رضوان : سلام عمي ابو ياسر
ابو ياسر : الله معك شرفتونا
*طلعنا و انا شارد عم فكر بمايا وعم اتذكر صورة وجهها الحلوة...
ام رضوان : بشو شارد رضوان؟
رضوان : ولا شي
ام رضوان : شكلا عجبتك العروس
رضوان : اي
ام رضوان : معناها شارد بالعروس ههههه
رضوان : الله يختار الخير
ام رضوان : آمين يا رب
____________
#بقلم_فتاة_من_ورق_بسمه_السباعي
(((بعد مرور ٨ شهور)))
*فتحت باب البيت و دخلت ، البيت معتم و مافي صوت .. دخلت على غرفتي النوم شفت سمر و بنتي نايمين .. غطيت سمر و بست بنتي بحنية ...
سمر : كمال ايمتى رجعت
كمال : هلأ فتت عالبيت
سمر : رح سخنلك الاكل
كمال : لا مو جوعان ساويلنا فنجانين قهوة و تعالي نحكي
سمر : من عيوني
*غسلت وجهي و ساويت القهوة...
سمر : تفضل حبيبي
كمال : يسلمو ايديكي
سمر : كنت عم نيم نور ما بعرف كيف غفيت
كمال : مو مشكلة نوم الهنا
سمر : تعشيت برا يعني؟
كمال : لا
سمر : قلتلي تعالي نحكي
كمال : راحت امي باليوم يلي طلعتي فيه حامل
سمر : الله يرحمها
كمال : ضليت واقف جنبك لحتى ولدتي بنتنا و قمتي بالسلامة انتي وياها و مضى اكتر من شهر على ولادتك الحمدلله
سمر : الحمدلله
كمال : جرحتك بكلمة طول هالفترة؟
سمر : لا ابدا الله لا يحرمني منك
كمال : انا يا سمر من لما تزوجتك و عم عاملك بما يرضي الله و ما حرمتك من شي برغم انو مادياتي على قدي ، قدمتلك حب بتتمناه كل بنت بهالدنيا و ما زعجتك بحرف و اجيت على حالي كتير كرمال انتي تكوني سعيدة ، بس في مواقف بتضل غصة بالقلب مهما مر عليها ايام و شهور و يمكن سنين.
سمر : انا ما نسيت كل هاد ، بس ليش عم تخبرني هالكلام هلأ؟
كمال : عم خبرك لأني قررت اتزوج
سمر : شو
كمال : متل ما سمعتي ، اذا حبيتي تضلي زوجتي بتضلي انتي و نور بهالبيت معززين مكرمين و كلشي بيوصل لعندكن مافي شي بينقص عليكن ، و اذا حبيتي نتطلق و ترجعي على بيت اهلك مصروفكن انتي و نور رح يضل يوصلكن كل شهر و ما رح تحتاجو شي طول ما انا عايش.
سمر : انا ما عم صدق يلي عم اسمعو
كمال : و انا كمان ما صدقت يلي سمعتو منك لما كنت بحاجتك لحتى انقذ حياة امي.
سمر : عم تقاصصني؟
كمال : لا ابدا بس من يومها انتي طلعتي من قلبي.
سمر : مين هي يلي سرقتك مني؟
كمال : ما حدا سرقني انا اخترتها و ما دخلك مين هي
سمر : بترجاك لا تتزوج اعطيني فرصة صلح اغلاطي
كمال : بتقدري ترجعي امي؟
سمر : لا
كمال : معناها مافيكي تصلحي اغلاطك ، امي كانت اغلى انسانة على قلبي وانتي بتعرفي هالشي من يوم يلي خطبتك ومع هيك ما وقفتي جنبي قلتيلي بكل برود ( ما رح تموت فيك تدبر حالك ) و ماتت ، و هلأ بكل برود بقلك ما تستني انو يجي يوم و اتراجع عن قراري انا رح اتزوج و بكرا نازلين عالمحكمة انا و العروس نكتب كتابنا.
سمر : مستحيل تكون انت كمال ، كمال ما بيكسرني هيك ، كمال ما بيحرق قلبي هيك
كمال : قرري على مهلك ، انا فايت نام تصبحي على خير
*مشي كمال من جنبي بدون ما يحاول يخفف عني الحزن يلي زرعو بقلبي...لأول مرة بحس النار عم تحرق روحي و تنهش قلبي...تمنيت بهاللحظة انو كلشي سمعتو هو مجرد كابوس بشع و رح اصحى منو....
____________
#بقلم_فتاة_من_ورق_بسمه_السباعي
الجميع يجهل مـا يحدث بداخله .. وجهٌ حزينٌ هو كل ما يرتسم على محياه .. كلما ارتفعت شفتاه للأعلى في محاولةٍ للإبتسام راودته ذكرى أليمة تدفع بكفيّها قسماتِ وجهه للأسفل .. الذاكرة روحُ الوجع تفردُ قوّتها على كلّ سببٍ للفرح محوّلة إياه لترحٍ ونحيب..
*عم اتأمل يحيى وهو عم يدوب قدام عيوني .. يا ريت فيني احمل الوجع عنو و اعطيه صحتي و عمري ليرتاح...
يحيى : ياسمين غطيني بردان كتير
ياسمين : حرارتك مرتفعة ، رح نادي الممرضات
يحيى : لا تنادي حدا ، خليكي جنبي
ياسمين : انا جنبك يا عيوني
يحيى : اليوم عرس اخوكي و انتي ما حضرتي كرمال تضلي معي بالمشفى
ياسمين : يحيى انت اهم انسان بدنيتي ، وجودي جنبك هو سعادتي ، و بدفع عمري لحتى شوفك بخير و عم تضحك
يحيى : الله لا يحرمني منك
ياسمين : شو عم تحس هلأ؟
يحيى : بردان
*أشعر أن أجهزتي العصبية تُستهلك بطريقة غير عادية وأن روحي حرفيًا تُباد...خبيت احساسي عن كل الدنيا حتى عن اقرب انسانة إلي و سكرت عيوني لحتى اغفى...
ياسمين : رح نادي الممرضات انا مافيني اتركك هيك.
____________
#بقلم_فتاة_من_ورق_بسمه_السباعي
*صبيت فنجان شاي لوليد و عم نحضر المسلسل...وليد : حبيتا كتير
أمل : نعم؟
وليد : حبيتا كتير
أمل : مين هي؟
وليد : زينب
أمل : مين زينب
وليد : هي أول حب بحياتي ، عشت احلى ايام عمري معها ، رسمنا مستقبلنا سوا ، وانا معها كنت انسان تاني ، ما بشبه حالي هلأ ابدا ، كنت اضحك كتير و حب الحياة و كنت فتح عيوني كل يوم مبتسم لانو هي معي
أمل : وهي وينها هلأ ؟ كيف تركتو بعض و ليش؟
وليد : ماتت بحادث سيارة من ١٠ سنين ومن وقتها انا صرت وليد يلي بتعرفيه هلأ
أمل : ليش خطبتني؟
وليد : مشان ارضي أمي ، خيرتني بين زواجي منك او غضبها عليي.
أمل : و انت اخترت رضى أمك مقابل انو تدمر حياتي
وليد : انا دمرت حياتك؟
أمل : ٨ سنين و انا عايشة معك ناطرة حس بالحب ، ناطرة يجي يوم و تسألني انتي شو بتحبي يا أمل ؟ او يجي يوم و تجبلي وردة و تقلي بحبك او يجي يوم و تقلي خلينا نطلع نتعشى سوا البسي الفستان يلي بحبو عليكي ، حرمتني كلشي حلو ممكن تعيشو ايا زوجة مع زوجها مشان وحدة ميته من ١٠ سنين ؟ بعد كل هاد لسا مستغرب اذا قلتلك دمرت حياتي؟
وليد : حزني عليها عمى عيوني
أمل : و انتظاري انو يجي يوم وتحبني نشفلي دموعي ، لما امك خطبتني قالتلي وليد طبعو صعب اذا قدرتي تكسبي قلبو رح تعيشي احلى حياة ومن اول يوم خطبنا لليوم وانا عم حاول اكسب قلبك بس عالفاضي لانك ما بدك تنسى الماضي بدك تضل عايش على ذكرى انسانة ماتت من ١٠ سنين ، تصبح على خير.
وليد : أمل انا اسف
أمل : اسفك مالو داعي و ما عاد يفيد
____________
#بقلم_فتاة_من_ورق_بسمه_السباعي
رضوان : نورتي بيتك يا عروس
مايا : منور بوجودكن
ام رضوان : اهلا و سهلا فيكي ببيتك يا بنتي ، من هاللحظة البيت بيتك و انا امك و ان شاء الله طول ما انتي بيناتنا رح تضلي مبسوطة.
مايا : الله يخليلنا ياكي و يطول بعمرك يا رب
ام رضوان : العشا بالمطبخ اذا بتحبو تتعشو ، تصبحو على خير
رضوان : وانتي بخير امي
مايا : وانتي بخير
رضوان : بوعدك ما تندمي بعمرك لانك اخترتي تكملي عمرك معي ، بوعدك يا شريكة عمري تعيشي احلى حياة و تضلي عم تضحكي طول ما نحن سوا
مايا : الله يخليلي ياك يا روحي انت
____________
#بقلم_فتاة_من_ورق_بسمه_السباعي
د.خليل : مساء الخير
ياسمين : مساء النور دكتور
د.خليل : طمنيني عن يحيى
ياسمين : كانت حرارتو مرتفعة بس الحمدلله نزلت و هلأ نام
د.خليل : الحمدلله ، مدام ياسمين منحكي كلمتين برا؟
ياسمين : اي اكيد دكتور
د.خليل : قبل ما اجي اتطمن على يحيى شفت كل فحوصاتو
ياسمين : اي؟
د.خليل : ما بخبي عليكي وضعو عم يتراجع
ياسمين : شو قصدك دكتور ؟
د.خليل : بقصد ما عاد رح نعذبو بالكيماوي اكتر من هيك ، بكرا رح نخرجو من المشفى ، خليه يعيش الباقي من عمرو ببيتو و كل يلي بيحبهن و بيحبوه حواليه
يـــــــــ͢ـོ͓ـــتبــــــــــــــོـ͓ـــ͢ــ؏*
➖➖➖➖➖➖➖➖➖
*❴📖❵↵*تنسيق مشرفين مجموعة:*
*❴📚❵↵*قصص وروايات عالمية📚💙*
*❴💙❵↵*ننشر جميع انواع القصص والروايات العالمية*
حـب💙.
حـزن💙.
اكشن💙.
رعب💙.
*❴👑❵↵*أن كنت من عشاق ومدمني القصص مكانك عندنا💙*
*❴💙❵↵*رابط المجموعة للاشتراك:*
```https://whatsapp.com/channel/0029VaQogP17YSdATvOUwa1h