الفصل 5
*قـصـص وروايـات عـالـمـيـة💙📚📖*
*بإدارة* *يـامـن💙*
*❴📖❵↵ بنفسجية.العينين.tt*
*❴🔢❵☟الـــبـــــــــــ❴5️⃣❵ــــــــــــارت☟*
➖➖➖➖➖➖➖➖➖
*
*❴📖❵↵*تنسيق مشرفين مجموعة:*
*❴📚❵↵*قصص وروايات عالمية📚💙*
*❴💙❵↵*ننشر جميع انواع القصص والروايات العالمية*
حـب💙.
حـزن💙.
اكشن💙.
رعب💙.
*❴👑❵↵*أن كنت من عشاق ومدمني القصص مكانك عندنا💙*
*❴💙❵↵*رابط المجموعة للاشتراك:*
```https://whatsapp.com/channel/0029VaQogP17YSdATvOUwa1h```
➖➖➖➖➖➖➖➖➖
#بنفسجية_العينين_الكاتبة_روان_الشبلاق
الجزء الخامس
آيلا. شهم انا مازعلت منك لحتى اسامحك
وماكرهتك لحتى ارجع حبك
( شهم ما توقع انو بهالسوله رح بتسامحو وتنسى كل شي صار )
شهم. يعني رح نفتح صفحه جديده وبوعدك انـــ ..
قاطعتو آيلا. شهم لا توعدني صرت بكره الوعود ومابصدق وعودك
صدقني انا مابكرهك بالعكس بحبك
بحبك لأنك شخص حنون
بحبك لأني من اول مره حسيت معك بالأمان
ومسامحتك على كل شي صار
لكن لا تطلب مني اكتر من هيك ( وبصوت مخنوق ) استسلمت لصدرك بأول يوم
وبأول مره شفتك
حسيت انو ملكت الدنيا
وصرت ابكي من حزني وهمومي .. ابكي من امي وابي .. ابكي من حاجتي للحنان .. ابكي لانو قلت انتهى العذاب ورح بلش من اول وجديد
لكن ماشفت منك الا الوجع والعذاب
ورجعت استسلمت لصدرك مره تاتيه وانا محتاجه منك كلمه حنونه محتاجه حبك محتاجه للأمان اللي حسيتو اول مره
لكن سمعتني حكي قاسي وانا بين ايديك
جرحتني وجرحك كل مره اقوى من اللي قبلا
رغم خوفي منك ورغم قسوتك لكن تعلقت فيك كتير كان بدي اشتكي منك الك
اشتكيلك من حالك
كان بدي قلك ارجع شهم اللي حبيتو
شهم اللي من اول مره شفتو كنت بدفع عمري لـ يبقى معي دقيقه زيادة
انا ياشهم ماظل عندي شي قدملك ياه
انا محتاجه ظل قريبه منك لحتى ظل قريبه من جدي
محتاجه الك لأني مطروده من بيت اهلي
لكن مابمنعك انو تعيش حياتك مع غيري مع انسانه تقدر تحبها بدون ماتجرحها
( كان بيعرف انو كان قاسي معها كتير لكن ما توقع انو تطلب منو يكمل حياتو مع بنت تانيه غيرها )
ــــــــــــــــــــــــــــــــــــــــــــــــ
تاني يوم في المشفى
ابو عبد الرحمن. شو جابك بهالوقت لعندي اكيد كنت تحلم فيني
شهم. اشتقتلك ولا مابصير يعني
ابو عبد الرحمن. تشتقلك العافيه .. بس وين آيلا ليش مو معك ؟
شهم. آيلا تركتا نايمه بالبيت وناوي اعمل مؤامره وبدي مساعدتك
ابو عبد الرحمن. خير ان شاء الله ، شو في ؟
شهم. بدي اخدها واشتريلها تياب واغراض بس هي مارح ترضى لانو بدها تجي لعندك
ابو عبد الرحمن. هلأ صرت تعجبني ورضيان عليك .. خلص انا رح احكي معها واقوللها انو لا تجي اليوم
شهم. لا جدي انا رح احكي معها وقوللها انو الدكتور حكا ممنوع الزيارات اليوم مشان ترتاح قبل السفر
وانت اذا اتصلت آيلا اكد عليها هاد الكلام
ابو عبد الرحمن. مارح اسألك عن سبب هالتغيير رغم انك كنت رافض كل قصه الزواج
لكن بما انو تغيير للأفضل فـ كتير منيح والله يوفقكم
بس لما تخلصو شغلكم جيبها خليني شوفها لو نص ساعه
انا ماصدقت صارت قريبه مني
شهم. تكرم عينك
.. طلع شهم من عند جدو واتصل بـ اوس ..
اوس. نعـــــــــــم
شهم. لك انت حاذف كلمه الوو من عقلك ؟
اوس. ههههههه من كتر مابرن التلفون ماعد اتطلعت بالارقام برد فوراً
شهم. اي عأساس من كتر المعجبات
اوس. اسكت لا تسمعك امي .. وبعدين انا خرج معجبات من كتر الضغط بالشغل ماعم لاقي وقت حتى انام
شهم. لك عنجد ايمتى ناوي تتزوج
اوس. والله حالياً مو ناوي ولا لانو انت تنازلت عن مبادئك بدك ياني سوي متلك
شهم. ههههههههه لك وينك هي احلى غلطه بعملها بحياتي .. هلأ المهم راجعين ع البلد وبكره طيارتنا
وجدي طلب مني انو بدو يشوفك فوراً اول مايوصل
اوس. اي تمام .. وامي جننتني بدها تشوف المدام
شهم. تمام ان شاء الله بكره اول ماتوصل بتجو لعندي ع البيت ومرت خالي بتشوف آيلا
اوس. وانا ما الي نصيب بهالشوفه ؟
شهم. اذا بتحب هلأ ببعتلك صورتها وانت شوفها ع مهلك وأوصفها لمرت خالي
اوس. انا بحبك لأنك ذكي
شهم. ايـــــــــــه ماشي يا اوس بكره رح شوفك وقتا بنتفاهم
اوس. حاسك عم تهدد ؟ هههههههه
شهم. ههههه الله ياخدك
اوس. المهم مابتعرف ليش جدك بدو يشوفني ؟
شهم. والله مابعرف سألتو وماجاوب
اوس. يلا بكرا بنعرف كل شي
( اوس بنفس عمر شهم
طويل وجسمو رياضي وفيه شبه كبير من شهم واغلب اللي بشوفوهم بفكروهم اخوه
حتى شخصيتهم قريبه من بعض بالغموض والعصبيه والجديه
يمكن لانو كبرو سوا )
ــــــــــــــــــــــــــــــــــــــــــــ
في بيت شهم
حست بـ شي عم يلمس وجهها
فتحت عيونها وكان شهم
وكان في ورده حمرا جنبها على سجاده الصلاه
مدت ايدها مسكتها وشمت ريحتها
شهم. الواحد بحط ورده على المخده لحتى تشوفها حبيبتو اول ماتصحى
انا مالقيت مكان احط الورده عليه غير سجاده الصلاه
لو بعرف ليش بتكرهي نومة السرير وبتنامي ع هـ السجاده
آيلا. يمكن هاد المكان الوحيد اللي بحس فيه بالأمان .. كم الساعة ؟
شهم. 8 .. يلا جهزي حالك
آيلا. تمام ربع ساعة وبكون جاهزه
شهم. تمام عم استناكي تحت
( طلعو وركبو بالسياره وهي شارده وعم تفكر
مبارح كان سهل تمثل قدام جدها لانو كانت هي خطه ومتفقين عليها
لكن هلأ كيف رح تمثل بعد الحكي اللي سمعتو من شهم )
شهم. بما انو اليوم الدكتور رافض الزياره لعند جدي قلت باخدك تتعرفي ع البلدآيلا بخوف. ليش جدي فيه شي ؟
شهم. لا ياعمري مافيه شي واذا بتحبي بدقلك واتطمني عليه
آيلا. اي بترجاك
شهم. انتي بتأمري .. اي شي بدك ياه اطلبي بدون ماتترجي
( حكت مع جدها واتطمنت عليه وحكالها انو الدكتور منع الزيارات لانو بكرا السفر وحكالها جدها انو اطلعي مع شهم وانبسطي ولاينشغل بالك علي )
ــــــــــــــــــــــــــــــــــــــــــــ
في بيت العم ياسر
منال اتصلت على ليلى
ليلى بصوت نعسان. منال شبك ليش عم تتصلي بهالوقت
منال. لك ليش انا نمت بعد الشي اللي سمعتو
ليلى. شو سمعتي ؟
منال. جدي رح يوصل بكره مع شهم والكلبه اختك
ليلى. اي بعرف وبدو يعيش معم جدي
منال. يعني انسي انو شهم يطلقها بما انو هالختيار معهم
ليلى. اللي بيسمعك بقول انو مطول وهو عايش
ياحبيبتي الدكاتره ماسمحولو يرجع الا لما فقدو الأمل بعلاجو واكيد حابين يعيش اخر يومين بين اهلو
منال. لك ان شاء الله بيموت ع الطريق ومابوصل
شو شفنا منو غير المصايب هالجد النحس
ليلى. لك روقي بنلاقي حل
منال. المهم رح مر عليكي اليوم المسا مشان نطلع ع السوق بدي اشتري شي البسو واستقبل فيه جدك الختيار وبما انو رح يسكن عند شهم
هيك بحجتو رح بقدر شوف شهم
ليلى. تمام بأنتظارك المسا
ـــــــــــــــــــــــــــــــــ
اخدها شهم على اكتر من مكان وعرفها ع البلد خلاها تشوف كل المناظر
الطبيعة والجبال
نسيت حالها لدرجه انو كان ماسك ايدها وعم يمشو وعم يأرجيها كل شي ويحكي معها بشكل طبيعي
كانت بعالم تاني وكتير مبسوطه مابدها تفكر بـ شي تاني
نزلو عند مطعم وفاتو لحتى يتغدو وكانت شهيتهم مفتوحه وحاسين بالجوع كأنو صرلهم شهر مو اكلين
بس خلصو الغدى اخدها على محلات الملابس والماركات العالميه
آيلا. ليش اجينا لهون
شهم. بدنا نشتري تياب .. ولا عندك مانع ؟
آيلا. مابدي انا مو بحاجه
شهم. مو على كيفك
( سكتت آيلا مابدها تناقشو لانو مارح يقتنع
دخلو على محل كبير وفخم واستقبلتلهم بنت
كان يحكي معها شهم بالألماني
اما آيلا كانت ماعم تفهم شي
بس حست بالغيره من البنت لانو كانت كتير حلوه وعم تحكي مع شهم وهي مبتسمه وعم تطلع فيه بأعجاب
بعد ماخلص حكي شهم معها
اتطلعت الموظفه بـ آيلا لثواني وتركتهم وراحت )
آيلا بمسخره. باين انو ماعجبتها
شهم. مستحيل شخص يشوفك ومايعجب فيكي
آيلا. انا مو بحاجه مجاملتك
شهم. آيلا انتي ليش ماعندك ثقه بحالك
صدقيني انا ماشفت بجمالك وبطيبتك وجمال قلبك
آيلا. اذا ماعندي ثقه بحالي فـ البركه فيك انت ماقصرت بالكلام اللي سمعتني ياه
( قبل مايرد عليها اجت الموظفه وقاطعتهم
اخدت آيلا معها ودخلتها على غرفه القياس
وصارت كل شوي تعطيها شي تلبسو
وظلو ساعه على هي الحاله
وعجزت آيلا وهي تحاول تفهمها انو بدها تيابها وماكانت تفهم عليها
بعد مرور ساعه ونص
طلعت آيلا وهي معصبه
شافت شهم عم يحاسب وبجنبو اكتر من عشر اكياس )
آيلا. على شو عم تحاسب قلتلك مابدي شي
شهم. مو على كيفك اشترينا وخلص
آيلا. مو انا اللي بتشتري مشاعري بملابس او مصاري
شهم بعصبيه. مو انا اللي بشتري محبة حدا اومشاعرو بالمصاري
لو بشتري العالم بمصاريي كان اشتريت محبة اعمامي
لكن كل القصه انك زوجتي وهاد اقل حقوقك
بحب زوجتي تلبس وتكون انيقة وبملابسها مو بملابس اختها ( عرف انو جرحها بكلمتو الأخيره لكن هي كمان جرحتو لما فكرت انو بدو يشتري مشاعرها )
طلعو من المحل وفكر شهم بكلامو
شهم. اسف ماكان قصدي بس تضايقت شوي من كلامك
آيلا. انا كمان اسفه
شهم. عندي الك خبر حلو
آيلا. شـــــــــــو
شهم. مارح قلك لحتى تبتسمي
آيلا. لك شهـــــــــــم
شهم. نعـــــــم ياعيون شهم
آيلا. مابدك تحكي ؟
شهم. الدكتور سمح انو نزور جدي
آيلا. عنجد بتحكي
شهم. اي بس مو هلأ بالليل قبل ماينام .. هلأ تعالي نتمشى شوفي الجو بجنن
( مسك ايدها ومشيو حوالي النص ساعه ووقفو عند بحيره )
شهم. آيــــــلا
آيلا. نعـــم
شهم. اذا عنجد متنازله عني وسامحيتلي اتزوج غيرك ارميني بهي المي
آيلا. ههههههه
شهم. ليــــــــك فوراً ضحكت ماصدقت ايمتى تخلص مني
آيلا. ههههه لك لا مو هيك
شهم. لكن شو ؟
آيلا. ضحكت لانو شو خطرلك هالشي وليش ماتتزوج بدون ما ارميك ؟
شهم. اصلاً جكر فيكي بطلت لانو بدك تخلصي مني وقاعد على قلبك
آيلا. هههههه لك والله مو هيك
شهم. دوم هالضحكـــــــــــه ياعمري
ــــــــــــــــــــــــــــــــــــــــــــ
تاني يوم وصلو ع البلد
كانت تتوقع آيلا انو الكل رح يكونو بالمطار لحتى بستقبلو جدها
بس اللي صدمها انو ماشافت الا شخص واحد بيشبه شهم كتير
وسلم على جدها سلام حار
وكان واضح على جدها انو بحبو كتير
خبرها شهم انو هاد اوس ابن خالو
وصلو على بيت شهم وكانت موجوده ام عمر وألماس ومره كبيره سلمت على شهم وكان واضح انها انسانه طيبه
عرفت آيلا انو هي بتكون ام اوس
مرت خالو لـ شهم اللي حكالها اديش هي حنونه وكيف عاملتو كأنو ابنهاام عمر وهي خجلانه. ابي بدي قلك انو اخوتي كانو رح يجو بس انا رفضت وقلتلهم خليه يرتاح اليوم وبكره بنروح بنزورو
بس انا خنتهم واجيت لحالي
ماقدرت ماشوفك
ابو عبد الرحمن. لحد الأن عم تدافعي عنهم يا جميلة
وبعدين مافي داعي تكذبي كرمالهم
لانو انا طلبت من شهم
مايخبرهم ايمت وقت الرحله لانو مابدي اشوفهم اليوم
ألماس. جدي ماقلتلي مين هاد الممرض اللي جايي معك ، ورح يظل دائماً معك
ومسلم ولا لا ؟
ابو عبد الرحمن. لا مو مسلم ليش ؟
ألماس. يعني عم قول لحالي اذا تزوجتو بلكي الله يفتح بصيرتو ويصير مسلم واكسب اجره فيه
ابو عبد الرحمن. ياخوفي يجن مو يأسلم
ألماس. الله يسامحك
ابو عبد الرحمن. دخلني على غرفتي يا شهم وخلي اوس يلحقني ومابدي حدا يزعجنا
شهم. حتى انا ؟
ابو عبد الرحمن. اي حتى انت
( دخل اوس لعند ابو عبد الرحمن
وشهم عم بنتظرهم على اعصابو
بدو يعرف شو هالسر اللي جدو مخبيه ومابدو يحكي الا لـ اوس
ولما شاف اوس طلع راح فوراً لعندو )
شهم. شو احكيلي شو بدو منك ؟
اوس. لا ولاشي بس بيتطمن علي
شهم. اهـــــــا يعني مابدك تحكي
اوس. لا تضغط علي لانو لو خبرك شي وطلب منك ماتخبر حدا كنت سكتت وماحكيت
.. سكت شهم لانو بيعرف اوس كتير منيح اذا تأمن على شي
مستحيل يحكي ..
ــــــــــــــــــــــــــــــــــــــــــــ
في بيت ابو نورس
ايلول. طالعه يعني طالعه ومابسمح لأي شخص يمنعني
ام نورس. لو بدو يانا كان خلى زوج الكلبه يحكي معنا ويخبرنا
ايلول. كلبه ؟ هيك بتوصفي بنتك
لك بس لو تسمعيها وهي بتظل تدعيلك رغم كل شي بتعمليه فيها
ام نورس. ماني بحاجة دعائها
الله يكفيني شرها وبس
واذا بدك تروحي لعندهم انقلعي
درب يسد مايرد
( طلعت ايلول وهي معصبه وركبت بالسياره وطلبت من السائق يوصلها على بيت شهم
خبرها السائق انو مابيعرف البيت
ولا حتى هي بتعرفو )
طالعت تلفونها واتصلت بـ آيلا لحتى توصفلها وين البيت
لكن آيلا ماردت
تذكرت انو اخر مره حكت معها آيلا كان من رقم البيت الأرضي
طالعت الرقم واتصلت
ـــــــــــ الوو
ايلول. هلا شهم .. لو سمحت اعطيني آيلا بدي احكي معها انا ع الطريق وبدي توصفلي البيت
ـــــــــــ اسف مابقدر
ايلول بعصبيه. وليش يعني مابتقدر مابكفي حرمتنا من استقبال جدي وهلأ بدك تحرمني من اختي
ــــــــــــ انا اوس مو شهــــــم لهيك مابقدر ناديلك لأختك
ايلول بعصبيه. اي من قلة الادب انك ترد على تلفون مو الك
اوس. ومن قلة الأخلاق انك تناقشي شخص مابتعرفيه ع التلفون ( وبعصبيه ) اعطيني السائق
( ايلول كانت معصبه بسبب امها وكملت معها لما فكرت شهم بدو يمنعها من شوفت اختها
وحست حالها غلطت لما حكت مع اوس هيك لكن مو ندمانه لانو بيستاهل
اعطت التلفون للسائق لحتى اوس يوصفلو البيت
لانو ماكانت حابه ترجع بدون ماتشوف جدها لحتى امها وليلى مايشمتو فيها
صارت تفكر بتصرف امها واديش هي لئيمه ومابتحب حدا
وتفكر بـ آيلا كيف طلعت من بيت ابوها بهالطريقة
نزلو دموعها بدون ماتحس
الكل كانو يشوفو ايلول البنت القويه اللي ماحدا بيقدرلها واللي مستحيل حدا يقدر يأثر فيها
وهي اللي خلتهم يشوفوها بهالشكل لانها مابتحب حدا يشوفها ضعيفه
ومابستمح لأي شخص يستغلها
لكن هي بالحقيقه كانت اضعف من آيلا
وماكانت تبين هالشي لحدا
وصلو ع البيت واول مانزلت من السياره دخلت ع حديقه البيت لحتى تمسح دموعها وتعدل مكياجها
كان اوس قريب منها وعم يشوفها )
اوس بمسخره. مابلومك اذا عم تبكي
لو انا مكانك وبلا اخلاق كنت قتلت حالي
ايلول بدون ماتطلع وراها وتشوفو عرفتو من صوتو. حقيـــــــــــررر
اوس. الظاهر انك مو متربيه بـ بيت اهلك
اتطلعت فيه بنظره استحقار. لك مين انت لحتى تقيم اخلاقي ؟ وبعدين اتطلع على حالك على اساس انت كتير مؤدب
( كانت كتير مزعوجه اول مره حدا بشوفها وهي عم تبكي
تركتو ودخلت ع البيت وماكان موجود بالصاله الا عمتها ومره كبيره
راحت وسلمت عليهم )
ام عمر. طمنيني اجا ابوكي معك ؟
ايلول. لا والله ياعمتي ، لانو انا بس عرفت انو آيلا اجت
اجيت فوراً بدون ماخبر حدا
ام عمر. اي خير ان شاء الله ، هي خالتك ام اوس بتصير مرت خالو لـ شهم
ايلول. اهلا خالتي تشرفت بمعرفتك
( اها هي امو لكن
ياحرام هالأنسانه مبينه محترمه وطيبه
شو ذنبها يكون ابنها حقير وقليل ادب )
ايلول. عمتي وين جدي وآيلا وألماس ؟
ام عمر. جدك اعطاه الممرض ادويتو ونام
وآيلا بغرفتها مع زوجها فوق
وألماس ..
ألماس. ليكني اجيت قبل ماتحكو علي
ام عمر. اي ولله كنت بدي قلا بتكون عم تجهز لشي مصيبه جديده
ايلول. هههههه
ألماس. بعرف انكم مابتحبوني
اصلاً ماحدا بحبني غير زوج العشاق اللي فوق
رايحه لعندهم احسن ما ظل مقابليتكم
ام عمر. استرجي شوفك طالعه لعندهم
ألماس. صرلهم نص ساعه فوق بكونو شبعو غزل
ــــــــــــــــــــــــــــــــــــــــــــ
في غرفه شهمآيلا. اللي عم تطلبو مني صعب اعملو
شهم. بعرف انو صعب عليكي وصرلي ساعة عم قلك اتحملي مشان جدي
آيلا. جدي مارح يعرف انو عم انام كل واحد بغرفه
شهم. بس رح يعرف ، آيلا بوعدك ما المسك
برغم انك زوجتي ومن حقي
آيلا. ما الك أي حق عندي
شهم. امبلا الي وعم قلك مابدي منك شي الا انو انام سوا بنفس الغرفه
بعرف انو عذبتك وجرحتك لكن انا حكيتلك شو كان السبب
وشو الشي اللي دفعني اعمل هيك
آيلا. بس انــ .. ( حط ايدو على تما قبل ماتخلص كلامها وقاطعها )
شهم. هسسس اسمعيني
بعرف انك ماعد صدقتي وعودي لكن بوعدك يا آيلا ويشهد علي الله
اذا بتعطيني فرصه لحتى نسيكي كل القسوه والوجع اللي شفتيهم بحياتك
ومارح تشوفي مني غير كل الحب والأحترام
ولو بدفع عمري مقابل انك تكوني مبسوطه مارح اتردد لحظه
آيلا. موافقه بس بشرط انو ماتقرب مني
شهم. مارح يصير الا اللي بدك ياه .. وهلأ تعالي ننزل نقعد معهم ورح خلي الشغاله ريم تطالع ملابسك ع الغرفه وترتبهم
( طلعو من الغرفه ومد ايدو لحتى يمسك ايدها لكن رفضت ، واول مانزلو ع الدرج احرجها ومسك ايدها قدام كل الموجودين )
ألماس. شو هـــــــــــاد اللي عم شوفو
امي يا زوجيني يا اقتليني انا مابتحمل شوف هيك مشاهد رومانسيه
ام عمر. لا يا امي بقتلك
ألماس. انتي بالخير مافي منك فائده بس بالشر مافي اسرع منك
ام عمر وهي تغمز شهم. شهم يا ابني اختك مابتتحمل تشوف هيك مشاهد خفو عليها شوي
شهم. خلص هي رح اترك ايد آيلا بس بالأول ( قربها منو وباسها على خدها )
انصدمت آيلا من حركتو وصار وجها احمر من الخجل
ألماس. ـــــــلا لااا امي دخيلك الحقيني ( وحطت ايدها على قلبها وقعت بالأرض .. قلبي .. قلبي واغمى عليها )
ام عمر. ههههههه قديمه جربي غيرها
( ايلول كانت بالحمام ولما دخلت ع الصاله الكل كانو عم يضحكو
اما شهم لما شافها تفاجأ كيف عرفت البيت ومين اللي جابها
تركهم شهم وطلع يقعد مع اوس )
اوس. نحن هنـــــــــــا ، يتهنى اللي شاغل بالك
شهم. لك لا شاغل بالي ولا شي بس عم فكر بـ بنت عمي مين اللي وصفلها البيت
وليش اجت ومين اللي جابها ؟
اوس. انا اللي وصفتلها البيت واجت مع سائقهم يمكن مشان تشوف جدها واختها
شهم. وانت شو عرفك فيها ؟ وكيف حكيت معها
اوس. اتصلت على البيت وانا رديت
وفكرتني انت
( شهم سرح بتفكيرو واتذكر التهمه اللي اتهموها لـ آيلا
ورقم آيلا اللي ماكان حدا بيعرفو غير ايلول
والرقم اللي اتصل عليه كان مسجل بشركة الأتصالات بأسم ايلول
معقول تكون هي ورى كل هالشي اللي صار
اكيد مين رح يكون غيرها
واكيد اعطت آيلا تيابها مشان تغطي ع عمايلها وماحدا يشك فيها عأساس انها الأخت الحنونه
لانو هي الوحيده اللي عم بتحكي مع آيلا بينما كل العيله ماحدا عم يفكر فيها
اكيد بدها تظل ع تواصل معها مشان تعرف منها كل شي بصير بينا
بس شو هدفها
معقول تكون بكل هالحقاره وتتهم اختها واخوها هيك تهمه )
اوس. لك شبك بشو عم تفكر ، حاسك مو على بعضك
شهم. مابعرف يا اوس بس هالأنسانه مو مرتاحلها
يعني لولا آيلا كنت قلعتها من البيت
اوس. ليش في شي ؟
شهم. اجتني مكالمه كانت رح تدمر زواجي بس عرفت انو كل الحكي كان كذب
وعندي احساس انو ايلول ورى كل هالشي
.. اوس في نفسه يعني انا ماكذبت لما قلت عنها بلا اخلاق وبلا تربايه ..
اوس. احكيلي كل القصه
شهم. مو وقتا ، المهم هالأنسانه مو مرتاحلها وحاسس انو رح تعملي مصيبه جديده
لكن ماعم اعرف كيف بدي بعدها عن بيتي
اوس. وليش كل هالخوف ع هالزواج
مو على اساس انجبرت تتزوج وماكان بدك
شهم. اي صح انفرض علي وكنت بكرها بس بعد ماشفتها وعرفتها منيح انو غير عن ابوها بكذب عليك اذا بقلك ماحبيتها
حبيتها بس بعد المكالمه اللي اجتني صرت شك فيها وعاملتها بقسوه ولما عرفت كل شي كذب حاولت صلح غلطتي
وان شاء الله غير تسامحني
اوس. ماتوقعت انك بيوم من الأيام ممكن تحب
شهم. ولا انا .. ومتأكد مستحيل احب غيرها وبتمنى فرصه وحده منها
اعوضها عن كل اللي شافتو مني
(كان شهم عم يحكي وعيونو عم يلمعو انتبه اوس عليه وعرف اديش بحبها وراح اوس بتفكيرو لـ بعيد وكيف بدو يبعد ايلول عن اخوه وتؤام روحو شهم
كيف بدو يبعدها عنو قبل ماتدمر زواجو وتخرب علاقتو بزوجتو )
ـــــــــــــــــــــــــــــــــــــــــــــــــــ
في بيت ياسر
منال عم تحكي مع ليلى
منال. بدي روح اليوم يعني بدي روح اليوم
ليلى. كيف بدك تروحي لحالك ولسا ماحدا راح
وبعدين كيف بدك تعرفي بيت شهم
منال. مو بتقولي الحيوانه ايلول راحت ، احكي معها وخدي العنوان
ليلى. مارح ترد ، من شوي امي اتصلت عليها وماردت
بس بعتت رساله انها عند جدي والمسا راجعهمنال. اي والحل ؟!
ليلى. استني لبكره وبنروح كلياتنا
واليوم حتى وصلو من السفر يعني مو زابطه انو نروح
منال. وليش ماقلتي هالحكي لأختك لما راحت
ليلى قلتلها بس ماردت
ولاتسني كل اللي هنيك بحبوها لـ ايلول وبيستقبلوها بأي وقت
مو متلنا
منال. لك جعل عمرهم مايحبونا مابهموني
اللي بهمني انو شهم هو اللي بحبني
ليلى. يعني انتي بتكذبي الكذبه وبتصدقيها ، من ايمتى شهم بحبك ولا بيعرف بوجودك
اصلاً مستعده احلف انو شهم مابيعرف انو عندو بنت عم اسمها منال
( انقهرت منال من حكي ليلى وسكرت الخط بوجها )
ــــــــــــــــــــــــــــــــــــــــــــ
في بيت شهم
ألماس. اسمعوني كلياتكم رح اخيركم بين امرين
يا اما بتزوجوني يا اما رح نزل اعلان بالجريده وبكل وسائل التواصل واكتب فيه ألماس بنت هاشم الـــ .. تبحث عن زوج
ام عمر. وكاتبه اسمك الثلاثي كمان
آيلا. شو انتي عم تقدمي على وظيفه ولا زواج ههههه
ايلول. الحمدلله اللي اسم عيلتها مو نفس اسم عيلتنا والا كنا انفضحنا هههههه
ألماس. لا حبيبتي لسا ماخلصت الأعلان رح كمللكم .. وعلى الراغب بالزواج التقدم لوالدتها المدعوه جميلة بنت الحاج عدنان ابو عبد الرحمن الــ ..
ام عمر. وبنفس الجريده بيكتبو لقد قامت المدعوه جميله بقتل ابنتها ام وجه بارد قليلة التربايه وقليله الحيا اللي مابتستحي
ام اوس. ههههههه يا بنتي ما الك الا الصبر
ايلول. عمتي اللي لازمها الصبر قبل ماتذبحها وتبتلي فيها هههههه
ألماس. ايــــه اتمسخرو انتو ماجربتو معاناة العنوسه
آيلا. لك كل عمرك 20 سنه
ألماس. انتي بالذات مابدي اسمع صوتك
ام عمر. انا رايحه شوف ابوي قبل ما تجلطني هالبنت
ام اوس. وانا رايحه شوف اوس
ام عمر وهي طالعه. لكن ماظل غيركن آيلا وايلول اذبحوها بما انو مافي شهود
ألماس. لك اللي بيسمعها بقول انا ضرتها مو بنتها
ام عمر. سمعتـــــــك
ألماس بصوت عالي. رادار ماشاء الله عليكي
ايلول. يلا انا بدي روح وبكره ان شاء الله بجي مع اهلي
آيلا. خليكي لكن اليوم هون
ألماس. لا تردي عليها هلأ بتروح بتنام بحضن شهم وبتتركك لوحدك
آيلا. لك وجع عنجد انك وقحه
ايلول. ليش صارت الحقيقه وقاحه ههههه
آيلا. لك حتى انتي
ايلول. عم بمزح معك .. يلا قومي شوفيلي الطريق لانو بدي اطلع
( طلعت ايلول ولبست عبايتها ووقفت مع آيلا شوي )
ايلول. آيلا ليش كل هالحزن ، لساتو شهم بعاملك بقسوه ؟
آيلا. لا بالعكس تغير
ايلول. لكن لشو هالحزن بتفكري مالاحظت عليكي
آيلا. بخاف منو بخاف اذا تعلقت فيه اكتر يرجع يقسى علي من اول وجديد
ايلول. انا عنجد مابعرف شو اللي بينكم بس مابعرفك قاسيه
بعرف آيلا اللي بتحب وبتسامح الكل
( قطع علبهم كلامهم لما وصلت رساله على تلفون آيلا
قرأتها وتغيرت ملامح وجها )
ايلول. من مين الرساله ؟
آيلا. من شهم
ايلول. معليش شوفها ؟
.. مدت ايدها آيلا واعطت التلفون لـ آيلول
كانت محتاجه حدا ينصحها ..
اخدت التلفون ايلول وقرأت الرساله
( أسف يا نبض قلبي ..
بعرف انو خطأي مابينغفر بس متأكد انو قلبك كبير سامحيني )
رجعت ايلول التلفون لـ آيلا وقالتلا. انا رح قلك شي وسامحيني اذا حكيي رح يضايقك بس مارح جاملك ابداً
شهم محتاج حبك بس
لكن انتي محتاجه وجودو بحياتك ومحتاجه حبو
لانو ما ظل الك غيرو
ابي مابدو ياكي ومو العيب فيكي بس لانو ابي طول عمرو مابهمو الا المصاري واكيد زوجك بهالسرعه لانو قبض مصاري ع زواجك
وامي ماشفتي منها الحنان وانتي صغيره فـ لا تحلمي تحن عليكي هلأ
وانا ونورس بالنهاية رح نتزوج وكل واحد رح يعيش حياتو يعني ماظل الك الا شهم
ضحي بالدنيا كلها الا فيه
تمسكي فيه وسامحيه واعذريه يمكن ماكان بيقصد يجرحك
صدقيني شهم بحبك
ـــــــــــــــــــــــــــــــــ
في صالة الشباب
شهم. انتي ليش هيك عنيده
ام اوس. لك قلتلك صعب والله انام هون
خلص المهم شفتكم وسلمت عليكم
وبعدين بكرا رح يجو اعمامك
شهم. اي ويجو وين المشكله ، انتي مرت خالي والبيت بيتك
ام اوس. خلص والله بس يروحو غير ارجع واقعد على قلبك وما اتركك
شهم. يعني هاد اخر قرار مارح تغيري رأيك
اوس. شهم امي معها حق خلص بس يروحو اعمامك
شهم. تمام على راحتكم لكن اذا ما اجيتو بعد بكره رح ازعل والله ومابقى ورجيكم وجهي
اوس. سامعه امي عم يهددنا
ام اوس. ههههههه الله يرضى عليكم
ـــــــــــــــــــــــــــــــــ
في الصالة
ألماس. شبو جدي كل اليوم نايم وعم يشخر
ام عمر. حسبي الله عليكي حتى جدك المريض ماسلم من لسانك
ألماس. عم اسأل شبو لانو مو معقول كل الوقت نايم
ام عمر. هاد الممرض اللي عجبك وبدك تتزوجيه اعطاه منوم وقال لازم ينام لانو السفر تعبو
( دخل شهم لعندهم وآيلا كانت بعالم تاني حتى ما انتبهت انو دخل
عم تفكر بحكي ايلول
صح انها كانت بتعرف انها مابتعني شي لأمها وابوها بس كانت دائماً تكذب هالأحساس وتنكر الحقيقه )ام عمر. آيـــــــــــلا
آيلا. نعم عمتي
ام عمر. شبك بشو عم تفكري وليش زعلانه
شهم. اكيد اخد عقلا وعم تفكر فيني
اما ليش زعلانه فـ اكيد بنتك مزعليتها
ألماس. اي لانو ماتزوجت صرتو ترمو كل بلاويكم علي والشاطر اللي بيتهمني
شهم. مارح زوجك الا حتى تقولي شو اللي مزعل آيلا
آيلا. مافيني شي
شهم. امبلا شبك شوي تانيه رح تبكي
( نزلو دموعها وطلعت فوراً على غرفتها )
شهم. ألماس والله اذا مابتحكيلي شو عملتي لـ آيلا غير ادبحك
ألماس. لك والله ماحكيت معا شي
كنا عم نضحك وطلعت توصل ايلول ع الباب وطولت ومن لما رجعت وهي ع هالحاله
( تركهم شهم وطلع لعند آيلا
وكان بيتمنى لو ايلول قدامو لحتى يدبحها لانو اكيد هي السبب بزعل آيلا واكيد حكت معها شي زعلها وقهرها
دق باب الغرفه ودخل
كانت نايمه ع السرير متغطيه وعم تبكي
قرب منها وقعد على طرف السرير
مسكها من ايدها وجلسها )
شهم. ليش كل هالدموع شو صاير ؟
آيلا. ـــــــــــ
شهم. ياعمري لا تحرقيلي قلبي واحكيلي شبك
آيلا. مافي شي
شهم. اذا ماحكيتي والله لحتى روح وارتكب فيها جريمه
لانو ماعندي استعداد اخسرك
ومابتحمل شوفك بهالحالة
.. آيلا توقعت انو عم يقصد ألماس وخافت يروح ويحكي معها شي يزعلها ..
آيلا. لك والله ماعملتلي شي ومو زعلانه منها
شهم. لكن ليش عم تبكي ؟
آيلا. شهـــــــــــم
شهم. ياعيـــــــــــونو لـ شهم
آيلا. لا تتركني ابداً حتى لو ماكنت البنت اللي بتتمناها
عيش حياتك مع غيري متل مابتتمنى
بس لا تتخلى عني
.. سحبها وضمها بقوه ..
شهم. ياعمري والله مارح اتخلى عنك
ومستحيل احب غيرك
كل شي بدي باه منك انو تعطيني فرصه لصحح غلطتي
انا عشت يتيم رغم كل اللي بحبوني لكن كان شعور اليتم مابفارقني
وانتي كنتي بتيمه رغم وجود امك وابوكي
مشان هيك بكفي نقسى على حالنا وخلينا ننسى كل شي صار ونعيش حياتنا ونبدء من اول وجديد
آيلا. ـــــــــــ
ـــــــــــــــــــــــــــــــــ
في الصالة
ألماس. امي انا بدي اطلع لعندهم اتطمن على آيلا
ام عمر. لك عنجد انتي مابتخجلي
ألماس. لكن رح روح اتطمن على جدي
ام عمر. لاااا مابضمنك بما انو الممرض عندو انا رح روح
ألماس. اول مره بحس انك ذكيه
ام عمر. لك هاد حكي بتقوليه لأمك يا وقحه
ألماس. لك يـــــــــــي لا تدققي انتي بتعرفي اديش بحبك
.. راحت ام عمر لعند ابو عبد الرحمن
وتركت ألماس وهي عم تضحك لانو هاد اللي كان بدها ياه انو تبعد امها عن المكان لحتى تقدر تطلع وتشوف شهم وآيلا
طلعت لعندهم وكان الباب مفتوح شوي
شافت شهم كيف عم يضم آيلا ويهديها ..
ألماس. احـــــــــــم ، اسفه بس كنت جايه اتطمن على آيلا
شهم بعد آيلا عنو وقال. اي هي اتطمنتي واتفرجتي منيح هيك ؟
ألماس. اذا بقول اهـ ياقلبي بتزعل
شهم. لا مابزعل بس بدبحك
ألماس. يعني اطلع
شهم. اي انقلعي
( طلعت وتركت الباب مفتوح لحتى تقهرو
ونزلت ع الدرج وهي تركض وتنادي بأعلى صوت )
ألماس. أمـــــــــــي الحقيني ، لك امي الحقينـــــــــــي
.. طلعت ام عمر ع الصالة عم تركض ..
ام عمر بخوف. شو في ، لك شبك آيلا صرلا شي ؟
ألماس. انا قلت الحقيني ما قلت الحقي آيلا بس فعلاً متل ماقالو قلبي على امي وقلب امي ع الحجر
ام عمر. لك حتى الأمثال ماسلمت منك وعكستي المثل على حالك ، خير ليش كنتي عم تنادي ؟
ألماس. زوجيـــــــــــني كرمال اللـــــــــــه زوجيني
ام عمر. اكيد طلعتي لعند شهم وآيلا
ألماس. اي
ام عمر. مو قلتلك لا تطلعي
لك مو عيب عليكي شو طالعك لعندهم
ألماس. اخ ياريت سمعت منك وماطلعت
ام عمر. والله حالتك مستعصيه خلينا نروح ع البيت بلا ماتفضحينا
( تركت ألماس وطلعت تخبر شهم انو بدهم يرجعو ع البيت )
ألماس. امي بنصحك لا تطلعي
اسمعي مني والله بيتعب قلبك اذا طلعتي من الشي اللي رح تشوفيه وبصير بدك تتزوجي
من هلأ عم قلك زواج مافي الا حتى اموت
ام عمر. علواه تموتي وارتاح منك
.. طلعت ام عمر ع الدرج وكان شهم طالع من غرفتو ..
شهم. خير امي شبك .. ليش ماناديتلي انا بنزل لعندك بلا ماتتعبي من طلعة الدرج
ام عمر. شو شايفني ختيرت
شهم. ههههههه لا لساتك شباب مو ناقصك غير العريس
ام عمر. صرت تحكي متل اختك ليك لا تقنعوني والله بعملها هـــــــــا
شهم. ههههههههه عم قول ألماس لمين طالعه
ام عمر. طمني عن آيلا
شهم. بخير الحمدلله .. رح تصلي وتنزل
ام عمر. اي انا طلعت لحتى اخبرك انو نحنى رح نروح وبنجي بكرا العصر ان شاء الله
شهم. مافي روحه نامو هون اليوم
ام عمر. لا لك ابني بدنا نروح نبدل تيابنا ونرتاح وبكرا بنرجع
شهم. على راحتك بس مافي روحه هلأ الا بعد ماتتعشو
ــــــــــــــــــــــــــــــــــــــــــــ
الساعة 11 في غرفه الجد ابو عبد الرحمن
آيلا عم تتطلع بحب بجدها النايم بعد ماكانت عم تدعيلو
دخل شهم لعندها وشافهاشهم. يكون بعلمك انا بغار
آيلا. من شو
شهم. من حبك لجدي
آبلا. مستحيل احب حدا متلو
شهم. حتى انا ؟
آيلا. بحبو اكتر من امي وابي
شهم. واكتر مني ؟
آيلا. ـــــــــــ ماعرفت شو تجاوب ، تنهدت وسكتت
شهم. بس انا بحبك كتير .. ويلا تعالي نطلع على غرفتنا
( تذكرت الحكي اللي حكاه معها شهم قبل السفر
كيف رح تنام معو بنفس الغرفه اللي جرحها فيها
طلعو لفوق وكانت متردده وخايفه
كان الطابق التاني كبير كتير وفخم
وفيه غرف كتير
وقفت قدام باب الغرفه ومتردده
ماحست الا بـ شهم حملها ودخلها ع الغرفه )
آيلا بصوت عالي. نزلنـــــــــــي
شهم. بما انو حبيبتي مارضيت تفوت ع الغرفه برجليها ماكان قدامي حل الا احملها ودخلها غصباً عنها
آيلا. انا بدي روح بدل تيابي
شهم. خدي راحتك ياقلبي ، هي غرفة الملابس وهاد الحمام
( تركتو ودخلت تحممت واحتارت شو تلبس ومالقت شي استر من قميص نوم كان لـ ايلول اشترتو ومالبستو
لبست وطلعت وهي عم تدعي انو هالليله تمضى على خير )
كان شهم قاعد ع الكنبايه عم يتفرج ع التلفزيون لما طلعت اتطلع فيها وابتسم
آيلا. في شي ؟
شهم. لا بس من ساعه حاسس عليكي واقفه ومحتاره شو تلبسي
واخر شي استقريتي على قميص النوم هاد بما انو استر شي
بس مابتعرفي انو زاد من جمالك وكتير حلو عليكي
آيلا. مطول وانت تتفرج ع التلفزيون
شهم بخبث. ليش حابه انو نسهر سوا ؟
آيلا. بقصد اني تعبانه وبدي انام ع الكنبايه
شهم. لا مستحيل والله مابتنامي الا على السرير
واذا لهالدرجه بتكرهي وجودي جنبك فـ خلص انا بنام ع الكنبايه
ويكون بعلمك اذا انتي كرهانه وجودي مو انا اللي بفرض حالي عليكي
.. ماردت عليه وراحت تنام ع السرير لانو كل مره بتتناقش معو هو اللي بمشي كلمتو عليها ..
بعد مرور خمس دقائق ..
شهم. شو آيلا وين انام انا ؟
آيلا. بالمكان اللي بريحك
شهم بأبتسامه. ياعمري والله بعرف انو قلبك طيب وماكنتي رح تقبلي انو انام ع الكنبايه
( طفت الضو ونامت على طرف السرير )
شهم وهو يتمدد ع السرير براحتو. والله انتي ماخده راحتك واخده كل المكان الك
آيلا. ممكن تسكت بدي انام
شهم. لك اي بس نامي منيح ليكي رح توقعي ، والله مارح ألمسك بس هي ايدي ممدوده الك يعني اذا حبيتي تقربي مني وتنامي وتحطي راسك على صدري
آيلا بعصبيه. شكراً مابدي
شهم. انتي الخسرانه
آيلا. اي بعرف
شهم. بما انك بتعرفي انك خسرانه ليش مابتعوضي خسارتك والدعوه لساها قائمه
آيلا. شهـــــــــــم
شهم. خلص سكـــــــــــتت
ــــــــــــــــــــــــــــــــــــــــــــ
في بيت ام عمر الساعة 3 العصر
ألماس. امي ايمتى رح نروح
ام عمر. على الساعه 5
ألماس. اي بما انو لسا في وقت واذا ممكن طبعاً
ام عمر قاطعتها. اذا زواج لا مافي
ألماس. يعني لازم تذكريني لا هي بعرف الجواب
انا قصدي رايحه افتح النت واحكي مع امل رفيقتي
.. ام عمر كانت رح ترفض لانو خايفه هالمجنونه تسويلها مصيبه ع مواقع التواصل او تنزل بوست انها بحاجه عريس
لكن تذكرت انها حكت مع نورس لحتى يجي وبدها تاخد راحتها بالحكي معو ..
ام عمر. اي روحي
ألماس. شو هالكرم اللي نزل عليكي فجأه ياريتني استغليت هالشي وطلبت منك تزوجيني
ام عمر. بدك تنقلعي ولا اغير رأيي
( دخلت ع غرفتها وشغلت النت وحكت مع امل )
ألماس. امل في حواليكي عريس ولا روح احكي مع حدا غيرك
امل. لو في كان تزوجت انا هههههه
ألماس. لك انتي اختك مخطوبه لازم من زمان انتي كمان انخطبتي
امل. لك بتعرفي اختي اليوم راحت على مركز التجميل وعملت جلسات بالطين للبشرة ولجسمها وتمنيت اعمل متلها على قد ماصارت بشرتها ناعمه وحلوه
ألماس. جلسات شو ، وشو فائدتهم
امل. بخلو البشره ناعمه وتلمع ومن اول جلسه بتبين النتيجه
وكمان بنحف الجسم
ألماس. بعني بنقدر نسويها بالبيت ؟
امل. اي اكيد
ألماس. اي اشرحيلي كيف
امل. لك هلأ بطلتي تعرفي الطين ، حطيه على بشرتك وجسمك وشوفي النتيجه وادعيلي
ألماس. اي رايحه اجرب ادعيلي
( طلعت ألماس على حديقه البيت وقفت بمكان مافيه زرع وصارت تحفر بالتراب وترش مي لحتى صار طين )
كانت لابسه بجامه نصف كم ورفعت عن رجليها وغطت كل شي مبين من جسمها بالطين وحتى وجهها وتمددت ع الأرض بجنب الزرع
ألماس. اذا حكي امل صحيح وبتبين النتيجه من اول جلسه
هلأ بس نروح الكل رح يلاحظو التغيير ببشرتي بس نسيت اسألها اديش لازم ابقى ع هالحاله
يلا شو ورايي عم نتسلا
ـــــــــــــــــــــــــــــــــ
وصل نورس وفتحتلو الباب ام عمر
ام عمر. اهلا وسهلا ، شو مابتجي الا بعزيمه
نورس. لا والله ياعمتي اصلاً انا كنت بدي اجي لعندك مشان تشوفيلي طريقه لحتى اقدر شوف جدي
ام عمر. بعرف انك حابب تشوفو مشان هيك حكيت معك
روح هلأ ع الحديقه لحتى ناخد راحتنا بالحكي
وانا رح جيب شي نشربو وبلحقك
( راح نورس ع الحديقه
وألماس سمعت صوت مشي وتوقعت انو امها فـ قررت تخبرها انها موجوده هون لحتى ماتخاف بس تشوفها )ألماس. امي انا هون
بعرف بس تشوفيني رح تضحكي
ولا تخافي لسا ماجنيت بس عم اعمل جلسه للبشره
( انصدم نورس لما سمع الصوت وشافها
مو مبين شي منها وجها ايديها شعرها كلياتها طين )
نورس. هي المجنونه ماتابت من قصه الصابون المره الماضيه ( بعد عن المكان وهو عم يحاول يكتم ضحكتو بس ضحك غصباً عنو وبصوت عالي )
سمعت ضحكتو ألماس وهي عم تدعي يارب تكون عم تهلوس من كتر مابتفكر بالزواج صار يتهيألها
لكن سمعت صوت امها وهي عم تحكي مع نورس
ام عمر. دوم هالضحكه ياعمتي بس شو مناسبتها
نورس وهو يحاول يمسك ضحكتو. هههههه لا ولا شي
انا رح روح ع الصاله
ام عمر. خلينا نقعد هون
نورس بضحكه. لا معليش انا رح روح شوي ع الصاله وبرجع
.. ترك عمتو ودخل ع الصاله ..
ألماس. امي الحقينـــــــــــي
ام عمر بخوف. بسم الله لك ألماس وينك
( شهقت لما شافتها وحطت ايدها على تمها ) لك مين عامل فيكي هيك
ألماس. عم سوي جلسه للبشره
ام عمر. يارب تتلطف بحالتي وتعوضني فيها بالجنه
ألماس تبكي. نورس شافني هيك يعني مارح يتزوحني
ام عمر. هي عقوبه من الله لانو المره الماضيه قلتي رح خليه يشوفني بكامل اناقتي اما فعلاً اناقه هههههه بتستاهلي
( ام عمر تركت ألماس وهي ترش حالها بالمي وتنظف حالها
وراحت لعند نورس )
ام عمر. سامحني يا عمتي
نورس. ولا يهمك عمتي ماصار غير كل خير
ام عمر. هي كانت عم تزرع ورد بالحديقه وســ.. ( لما شافت نورس مابقى قدر يمسك ضحكتو وصار يضحك بأعلى صوت ) حسبي الله عليها ماتركتلي ولا كذبه تتصدق
نورس. هههههههههههه
يتبع في الجزء السادس ..
*يـــــــــ͢ـོ͓ـــتبــــــــــــــོـ͓ـــ͢ــ؏*
➖➖➖➖➖➖➖➖➖
*❴📖❵↵*تنسيق مشرفين مجموعة:*
*❴📚❵↵*قصص وروايات عالمية📚💙*
*❴💙❵↵*ننشر جميع انواع القصص والروايات العالمية*
حـب💙.
حـزن💙.
اكشن💙.
رعب💙.
*❴👑❵↵*أن كنت من عشاق ومدمني القصص مكانك عندنا💙*
*❴💙❵↵*رابط المجموعة للاشتراك:*
```https://whatsapp.com/channel/0029VaQogP17YSdATvOUwa1h```