الفصل 4
*؏ــڜــٱق✍🏻 اڵــڔﯣايــات📚📖🧡*
_*بإدارة محمـــــــود*_🧡
*`قصة اليوم `بين اختيارين*
*❴🔢❵الـــبـــــــــــ❴4️⃣❵ــــــــــــارت*
➖➖➖➖➖➖➖➖➖
*❴📝❵↵تـنـسـيـق:جــروب:*
*📚ᘓɹ̈Ł᎗ɹ̤lɠȷᒧl✍️ᘓᓆŁɹɹ̈̇ɹɕ🌸🧡*
*❴📚❵↵الـجـروب:خـاص لـنـشـر ٲحـدث الـروايـات بـكـل الانـواع والـلـهـجـات 🧡🖇️*
*|✒️|↜لـلإشـت͜ـࢪاڪ بـ قناة*
*📚*https://whatsapp.com/channel/0029VadbWnd89inYkEVrpG0C
*📖📚؏ــڜــٱق✍🏻 اڵــڔﯣايــات📚📖*
#بين اختيارين
#الجزء الرابع
كان انس
واقف ع بعد اقل من ١٠٠ متر عن المزرعة يلي فيها مقر
العصابة ،
عم يراقب الوضع من بعيد
وجمبو ميسم شايلة سلاحها وعم تستنا امر منو
الجنود كلهن انتشرو حوالي المزرعة
وكانو عم يستنو الامر من انس ليطلقو النار،
اما انس
ف قبل مايصدر اي امر بااطلاق النار حمل تلفونو واتصل بلميا
طوط طوط :
انس؛ كيفك حبيبتي
لميا: اهلين حبيبي طمني شو صار معك! ؟
انس: لسا ماصار شي حبيبتي انا بس كان بدي اسمع صوتك وقلك اني بحبك ،مابتعرفي بلكي صرلي شي
لميا(بخوف): انس لاتخوفني ببوس ايدك
انس: قلبي انا مابدي خوفك بس الواحد مابيعرف شوبصير معه
لميا: حبيبي مشان الله تنتبه عحالك
انس: بااذن الله مارح يصرلي شي انتي ادعيلي بس
لميا: الله يحميك ياروح قلبي
انس: بخاطرك عمري، انتبهي على حالك
لميا: وانت كمان لاتخوفني عليك
انس: طيب قلبي طيب
،سكر تلفونو ووقف بثقة واطلع ب ميسم يلي كانت واقفة جمبو
انس: جاهزة؟
ميسم(بثقة): جاهزة سيدي
التفت لقدامو وعطا اشارة للجنود
باانو يبلشو بااطلاق النار
كان جابر سهران على سطح المزرعة
وسمع صوت اول طلقة حس بالخوف
طالع مسدسو وصار يتلفت حواليه ،
ومافي لحظات ، الا الرصاص بلش ينزل حواليه متل زخ المطر
ارتعب كتير وركض بسرعة وهو عم يصرخ
جابر: ياااشباب كمين ياشباب
بسرعة جهزو اسلحتكن ،
كان عابد نايم بغرفتو و صحي على صوت الرصاص وصريخ جابر
فز من تختو وطلع بسرعة من الغرفة ليتلاقى بجابر بالممر
عابد(بصراخ):شوفييي؟
جابر(عم يلهث): لك الامن برا ومحاوطين المزرعة كلها
عابد: بسرعة يارجال جهزو اسلحتكن ، جابر ، خبر سعيد ياخد فرح والبنات ويطلعو من النفق ، وانت جيب سلاحك ولحقني ، وخلي الشباب ينتشرو بكل مكان
جابر: امرك معلم ،
نزلو جابر والشباب
مع عابد
وانتشرو بكل ارجاء المزرعة كانو متأملين انو يحاولو يصدو هجوم الامن عنهن
عابد: ياشباب ، انتشرو فوق السور
بدي كل يلي برا يموتو
جابر: بس معلم هالشي بيشكل خطر على حياتنا
عابد: شومابدو يصير مابدي حدا من يلي برا يضل عايش
جابر: نفذو شباب ،
انتشرو عدد من الشباب فوق السور تبع المزرعة
وعدد منهم على سطح المزرعة
والقسم التالت مع عابد
بقلب المزرعة ،
وكان جابر مستلم الدوشكا
اما الشباب يلي فوق السور
كان هالشي خطر كتير على حياتهن لانو صارو مبينين منيح على الامن ،،،
عند انس وميسم
انس: شوهالغباء هاد ، هدول عم يعرضو حالهن للخطر،
ميسم: فعلا اغبياء، جاي عبالي قوصهن
وبتوجه سلاحها عليهن
انس: لا اوعك لحظة شوي
مسك المذياع وصار يصرخ عليهن
انس: معكن خمس دقايق يااما بتسلمو نفسكن ، يااما رح تموتو ،
ماحدا منهن رد على كلام انس واستمر اطلاق النار من الطرفين ،
وراح اكتر من شب من جماعة عابد وفي منهن تصاوبو ووقعو اسرى
انس: ياااعااابد ماضل غير انت وهالكم شب يلي معك ، العناد مابفيدك ، سلم نفسك احسن الك ، المكان محاصر ومافي قدامك غير هالحل ،
كان عابد عم يسمع صوت انس وعم يحس كانو هالصوت بيعرفو وعم يحاول يتزكر صاحب الصوت
عابد(بقلبه):يالله هالصوت موغريب عليي ،
قاطع افكارو صوت جابر: معلم شوبدنا نعمل الشباب عم يموتو
عابد: خليكن عم تضربو عليهن
بدي الدوشكا تحرقهن حرق ،
انس من برا السور: يااعابد شوصار معك ، شكلك حابب تموت
شال المذياع عابد وصار يحكي معو: شوف ياافندي مين ماكنت تكون موعابد يلي بيرميها واطية وبيسلم حالو، موعابد يلي بيتعلم عليه ،
انس: هههههه والله الي بيسمعك بيقول ماحدا معلم عليك من قبل ، ماانا من زمان معلم عليك ،
ازدادت حيرة عابد بخصوص الصوت الي عم يسمعو والكلام
عابد؛ مين انت؟
انس(بسخرية): اتوقعت كل الناس تنساني الا انت له ياعابد، اطلع على وجهك بالمراية بتعرف مين انا ،
بلش عابد يسأل حالو انو الشي يلي بوجهو الي رح يخليه يعرف ، واخيرا خطر على بالو الجرح يلي بوجهو ، ورجعت فيه الذكرى للحظة ما انس جرحلو وجهو ،
عابد(بصدمة):انس؟؟؟؟
جابر: مين انس معلم؟
رجع حمل المذياع وصار يصرخ وعيونو مليانين حقد وشرار
عابد: اجيت برجليك لعندي ياوسخ
، هاد انت بعد زمان، من زمان وانا مستني اجتمع فيك ، لحتى طالع الخمير والفطير فيك
انس(بسخرية): ههههه غلطان حبيبي موانت يلي رح تطالع الخمير والفطير فيني، انا يلي رح طالعو وحياتك ،سلم نفسك بهاللحظة قبل مانقتل كل رجالك حاكم ماضل حدا
عابد: رجالي مابيخلصو ، وعابد مابيسلم حالو ، وازا فكرك انو ازا حاصرت المزرعة بتكون مسكتني بتكون غلطان ،
انس: انا عم نبهك معك 5 دقايق ازا ماطلعت انت انا رح اجي لعندك واشحطك شحط ،
شال عابد المذياع وهمس لجابر : خبر حدا من الشباب يلي عم يستنونا عند النفق خلي يجهزلنا سيارتين
وانت طلاع مع خمس شباب وهربو بسرعة
جابر: وانت معلم ؟
عابد: انا لاحقكن مع هالكم شب بس مابدي خليهن يحسو انو عم نهرب لهيك منروح ع مجموعتين ، بسرعة الوقت عم يمضا
اطلع جابر ع الشباب واشرلهن
جابر: يلا شباب خلونا نمشي ،
مشي جابر ولحقوه الشباب
ليطلعو من المزرعة عن طريق النفق
وبقي عابد واقف مكانو وماسك بارودتو لدقايق
ومن بعدها تسلل بهدوء وهو وباقي الشباب
ليلحقو جابر وجماعتو
---
برا
ميسم(مستغربة): سيدي كانو خف الرصاص؟!
انس: صح حتى عابد ماعاد حكا شي
رفع المذياع ورجع حكا
انس: عاابد الوقت عم يمضا ، انا كنت قتحمت وفتت شحطك شحط، بس ماعم يجي من قلبي ذلك قدام رجالك هههه
زاد استغراب انس وميسم لما ماسمعو صوت رد من عابد وبنفس الوقت كان ضرب الرصاص لسا مستمر من جوا المزرعة
خلصت المهلة يلي عطاها انس لعابد
وقرب هو وميسم والجنود لعند باب المزرعة ليقتحموها ، كانو مأمنين انو مارح يعملهن كمين لانو، االمزرعة محاوطة بالجيش ومارح يقدرو يصدوهن ، لانو هنن عددهن كتير ،
وقف انس قدام باب المزرعة وعطا امر بالاقتحام
اقتحمو الجنود المزرعة ودخلو
عليها ،
واستغربو انو مافي غير شبين واحد منهم عالدوشكا ، والباقي عالرشاشات ،
دخل انس لتلحقو ميسم
قربو لعند الشبين وهنن عم يتلفتو حواليهن
انس: سلم سلاحك انت وياه ، وديرو بالكن تأتو بحركة غلط ،
المكان كلو محاصر
رفعو ايديهن الشباب لفوق وسلمو حالهن حرصا على حيااتهن ، قرب انس لعندهن واتطلع فيهن بقسوة
انس: شوو وين راح معلمكن؟
الشباب: ....
انس: احكي انت وياه ولاك معلمكن وين؟؟؟
مانطقو بو لا كلمة ، كان شكلهن كتير خايفين وعم يرجفو
انس(بصراخ):وووين معلمكن
واحد من الشباب : س سسسيدي المعلم هرب
انس: هرب؟؟ هرب قلتلي؟
قربت ميسم لعند الشب ومسكتو من قميصو
وقربتو لعند انس
انس: من وين هرب ولاك؟ المزرعة كلا محاصرة؟
الشب: سيدي من النفق
انس: نفق شو؟؟؟
الشب: سيدي نحن عاملين نفق تحت الارض ،
عاملينو لحتى ازا اشتبكنا مع حدا وتحاصرنا نهرب منو
انس: خدني عليه
والتفت لعند العناصر:
عسكر لحقوني ، وخلي كم واحد منكم مع هالكلب ، اوعكن يهرب
نزلهن الشب عالنفق
كان بابو موجود بالقبو ،
فتح انس الباب وصار يتفحص المكان
اطلع بالشب ووجهلو سؤالو
انس: طويل النفق؟
الشب: موكتير سيدي
انس: لوين بودي ؟
الشب: على بساتين التفاح
انس: يعني هلق ازا رحنا لهنيك منلحقهن؟
الشب: مابظن سيدي
انس( بعصبية):ياااويلك ازا بتكون عم تكذب
الشب: ليش بدي اكذب سيدي ، معقول احمي حدا ، باعنا وتركنا بنص المعركة وهرب
انس(بسخرية):لحتى تعرفو الحشرة يلي عم تشتغلو معو ،
يلا شباب امشو معي ، بلكي منلحق هالكلاب
اخد عسكرو وطلعو برا المزرعة ركبو سياراتهن وبسرعة البرق على البساتين الي قلهن عليها الشب
وصلو لهنيك وانتشرو بكل المكان ومالقو حدا
العسكري: سيدي مافي حدا بالمكان
انس(بعصبية):عملتا ياعابد الكلب
العسكري: سيدي فيني احكي ؟
انس: شوبدك تحكي؟
العسكري: سيدي وجودنا هون خطر علينا
انس: شوقصدك؟
العسكري: سيدي بجوز عابد عمل هالحركة ليجيبنا ،لهون ويحاصرنا
انس: معك حق ، بس كان بدي شوف فتحة النفق يلي بتودي للمزرعة تبعهن
العسكري: سيدي الافضل بغير وقت ،
انس: ماشي قول للشباب يطلعو بالسيارات
العسكري: حاضر سيدي
انس بقلبه: هالمرة ماحالفني الحظ ياعابد الوسخ ، يالله قديش كان جاي عبالي امسح الارض فيك، ماشي ياكلب خيرها بغيرها
وقرب من سيارتو وهو معصب وخبط ايدو عليها وكز ع سنانو
انس: اخخخ ياعابد الكلب
اجت لعندو ميسم
وحطت ايدها ع كتفو محاولة منها انها تهديه
ميسم: طول بالك سيادتك هي المحاولة الاولى
لسا ماخلصنا
اطلع فيها وهو عم يحاول يسيطر ونظراتو كلها غضب
انس: والله لحتى دعوسو واعملو عبرة هالحقير والله ومتل ماقلتي لسا ماخلصنا رح جيبو لوكان تحت سابع ارض
ميسم: وانا رح كون معك سيادتك معك عالموت
وبضل حاطة ايدها ع كتفو وعم تطلع فيه ونسيانة حالها
انس(وهو عم ينفخ ): خلينا نمشي العناصر سبقونا
بتنتبه ع حالها وبتحس بالاحراج بتشيل ايدها من ع كتفو وبتصرف نظرها عنو
ميسم: حاضر سيدي
بيروح هو بيفتح السيارة وبيركب
وبتفتح هي باب السيارة وبتقعد بالمقعد الي جمبو
بيشغل السيارة وبيمشي ،وهو حاسس بالاحباط والخسارة، ،،،،
______
عند عابد
كانو قاعدين بقبو تحت الارض
هو وجابر
وحواليهن الشباب والصبايا
جابر: شوبدنا نعمل هلق ؟
عابد: رح نستنا ليهدا الوضع ونرجع عالمزرعة
جابر(بيرفع حاجبو مستغرب): بس هيك رح يرجعو يحاصرونا ، وهالمرة مارح نطلع منها لانو عرفو مكان النفق !
عابد(بحقد): اطمن مارح يلحق
جابر: كيف يعني؟؟؟
عابد: بعدين بتعرف ، بس فيك تعتبر انو رقبة النقيب انس صارت باايدي
جابر: طيب والشباب يلي نمسكو؟
عابد: لاتخاف كم يوم وبطالعهن
جابر: وكيف؟
عابد(بعصبية): اسئلتك كتيرة صايرة
جابر: العفو معلم بس كان بدي اطمن
عابد: اي اطمن ، سماع لقلك
جابر: امرني
عابد: هلق بتاخد كم شب وبتروحو بتفحصو الوضع بالمنطقة ، ازا منقدر نرجع عالمزرعة او لا
جابر: معلم برأيي، نستنا للصبح عالاضمن
عابد: ماشي ، بس فتحو عيونكن منيح مابدي ولاغلطة
جابر: باامرك معلم
عابد:شغلي سيجارة
طالع جابر علبة الدخان وحطلو السيجارة بتمو وشغلو ياها
مسك عابد السيجارة
وصفن بحقد
عابد(بقلبه): بسيطة ياانس الحشرة
____
باليوم التاني
راحت ليمار عالقناة
استقبلوها زملائها بالعمل وخبروها انو مدير القناة بدو ياها
ليمار: طيب ماقلكن شو بدو؟
--: لاوالله ماقال ، بس قال بدو ياكي ضروري
هاني: والله قلبي مو مطمن
ليمار: هاني لاتخوفني
هاني: طيب روحي شوفي شبو ،
مشيت ليمار بخطوات بطيئة وكانت متلبكة ومحتارة ، انو شوبدو منها مدير القناة
وصلت لعند باب مكتبو ودقت الباب وهي عم ترجف، بس حاولت تتماسك ودخلت لماسمحلها بالدخول
ليمار: خير استاذ قال طلبتني
المدير: قعدي بدي احكي معك
كان وجهو مابيتفسر خافت من شكلو وبلعت ريقها بصعوبة
قربت منو وقعدت عالكرسي المقابل المكتب
ليمار: خير استاذ شوفي
اطلع فيها وخبط ايدو بالطاولة
المدير(بعصبية):خيرر؟؟ من وين بدو يجي الخير ياانسة يامحترمة؟
ليمار: استاذ ليش هيك عم تحكي معي؟
المدير: لانك مابتفهمي غير هيك
ليمار(بعصبية):استاذ مابسمحلك تحكي معي بهالطريقة
المدير: اي لاتواخذينا ست ليمار ، نسينا انك شغلة كبيرة
ليمار: فيني افهم ليش هالحكي ؟
المدير: رح فهمك ليش، لانك عم تتصرفي من راسك ، لك انتي مين سمحلك تعملي هيك حلقة !، من دون ماتاخدي موافقتي ،
ليمار: كل هالايام بعمل حلقات بدون ماارجعلك ، وانت يلي عطيتني كل الصلاحيات
المدير: اي بس وقت بيكون موضوع عن هيك جماعة خطرة ،يستحب تستشيريني ،
ليمار(مستغربة): انتو ليش عاطينهن اكبر من حجمهن؟ كلن ع بعضن شلة زعران
المدير: هالشلة الزعران ، يمكن تئذينا وتجيب اخرتنا ، لك ماخفتي عحالك ماخفتي مثلا يخطفوكي/؟
تلبكت وحطت راسها بالارض
ليمار: .....
المدير: تصرفاتك الامسؤولة لسا بدها تجيب اخرتك، واخرتنا ، لعما لك صرنا سيرة ع لسان الصحافة الصفرا، انا يجو الامن ويقتحمو قناتي ، انا ياليمار؟ "
وبياأشر ع حاله بعصبية
ليمار: صار الي صار وخلصت القصة
المدير(بصراخ): لاماخلصت القصة ، سمعي يابنت ، من هلق بتعبري حالك برا البرنامج
ليمار(رفعت راسها بصدمة):لييش استاذ؟
المدير: ولا كلمة ، انا كنت بدي قلعك من كل القناة ، بس كرمال ابوكي الاستاذ جلال تركتك
ليمار(بعصبية):كتر خيرك والله ، وانا كمان ماعاد بدي اشتغل معكن ، بخاطرك يااستاذ يامحترم ،
وقامت من مكانها
وطلعت من عندو معصبة
وخبطت الباب بقوة
راحت على مكتبها لتلم اغراضها
استغرب هاني لما شافها داخلة بهالعصبية
هاني: شبك ليمار؟
تجاهلت سؤاله وبلشت تضب اغراضها
ليمار: ...
قام من ورا مكتبو وقرب لعندها
هاني: ليمار شبك شوقلك المدير؟
التفت لعندو وتركت كل شي من ايدها
ليمار(بعصبية):تقلعت من القناة
هاني(بصدمة):شووو؟
ليمار: متل ماسمعت
هاني: وهلق شوبدك تعملي؟
ليمار: ولاشي رح ضب اغراضي وانقلع اقعد ببيتي
هاني: طولي بالك ليمار، انا بحكي مع المدير
ليمار:بالله شو لا لاتحكي فشرت عينو ارجع اشتغل عندو
هاني: طب هيك يعني بهالبساطة رح تتركي!!
ورجعت كملت ضب الاغراض
ليمار: اي بهالبساطة ،يضربو منهن لقناتهن، انا الف حدا بيتمنا اشتغل بقناتو
خلصت ضب اغراضها
وسكرت شنطايتها ومشيت
ليوقفها هاني: ستني ليمار روقي كل شي الو حل
ليمار: خلص هاني تركني بدي روح
مابشرفني ضل هون ولادقيقة، بخاطرك
وبتتركو وبتلف ضهرها وبتمشي
وبيضل هو واقف مكانو ومتخصر ومتدايق عليها
هاني: هففف لاحول ولاقوة الا بالله
____
عند عابد
كان واقف ع الشباك
وسارح باافكارو ونظراتو كلها شر
قاطع افكارو صوت جابر
جابر: معلم فحصنا المنطقة ، مافي اي اثر لاامن
التفت لعندو
عابد: معناها جهزو حالكن ، رح نرجع اليوم
جابر: وبلكي رجعنا تحاصرنا؟
عابد: قلتلك مارح نتحاصر ،نفذ
جابر: امرك
عابد: قول لسعيد يجي لعندي ،
جابر: ماشي ،،
ومشي جابر بطريقو وطلع من عند عابد
وبقي عابد واقف مكانو
والافكار الشريرة عم تدور براسه
شد ع قبضتو بقوة وكز عسنانه
عابد(بقلبه):ماشي ياانس ازا مابخليك تعوي مابكون انا عابد، عم تجيب عناصرك يحاصروني مو هيك ، اي شوعليه ، لشوف كيف رح تقدر تحاصرني مرة تانية ،،
ياترا شوفي براس عابد؟
وليش كل هالقد واثق انو مارح يتحاصرو مرة تانية؟؟؟؟
__
ببيت جلال
عم يندق الباب
طلعت ليمار من غرفتها
وتوجهت ناح الباب
فتحت الباب وكان الي عم يدق هاني
ليمار: اهلا وسهلا نورت
هاني: كيفك ليمار
ليمار: ماشي الحال الحمدلله
هاني: قلت بجي بطمن عليكي ، وبشوف ازا بدك شي
ليمار: كتر خيرك والله ،مابتقصر واهلا وسهلا فيك تفضل ادخول
دخل لجوا البيت وسكر الباب
وقعدو بغرفة القعدة
هاني: شوناوية تعملي بعد ماتركتي ، القناة
ليمار: في براسي موال ،بدي غنيه
هاني: وشوهالموال؟
ليمار: ازا بقلك ، مابتخبر حدا؟ ،
هاني: احكي ليمار شغلتي بالي ،
قربت منو وحكت بصوت اقرب للهمس
ليمار: عم فكر اعمل فيلم وثائقي. عن عصابة ال AkS
هاني(بصدمة):شوووو عم تحكي ؟
ليمار(بخوف): شبك هاني وطي صوتك
هاني: لك شو وطي صوتك انتي جنيتي يابنت ولاشو!!!!
ليمار: لاجنيت ولاشي ، بدي اثبت للكل اني اعلامية شجاعة ، وبدي خلي هاد المدير تبعكن يتمنا يحكي معي ،
هاني: ليمار لاتجني، لك انتي عرفانة شوعم تعملي ولوين طاحشة
ليمار(بثقة):اي عرفانة
هاني: لك مانك خايفة عحالك؟ شلون بدك تفوتي بيناتهن؟ وكيف بدك توصلي الهن؟ ، لك ازا رحتي لعندهن بيقتلوكي. وهي اذا ماباعوكي متل باقي البنات
ليمار: اطمن مارح يصرلي شي ، ولاحدا رح يعرفني اصلا
هاني(مستغرب): ها وكيف يعني؟
ليمار: هي تركها عليي،
هاني: فهميني شو رح تعملي
ليمار: رح تعرف هاني ، بس بالوقت المناسب ، المهم هلق خلي هالشي بيني وبينك ،
هاني: واهلك شوبدك تقوليلهن؟
ليمار: بقلهن مسافرة المهم انت لاتخبر حدا
هاني(بقلق): والله ماني مرتاح لشغلتك
ليمار(بنرفزة) : هههييي علينا خلص قلتلك تركها عليي
هاني; ولك ياهبلة انا خايف عليكي
ليمار: لاتخاف انا قدها وقدود
هاني: هففف منك بس تعندي ع شغلة مستحيل تقتنعي
ليمار: اي لاتعذب حالك مارح اقتنع
وبتقوم من مكانها
ليمار: رايحة اعمل قهوة
بتطلع من الغرفة
وبيضل هو عم يراقبها وقلقان
من فكرتها المتهورة وعم يحكي مع حاله
هاني: الله يهديكي بس ،بدك تروحي حالك ماعم تعرفي كيف
____
بمكان تاني
طلعت لميا من بيتها
لتروح على مكان شغلها
وفجأة طلعو تلات شباب مسلحين
هجمو عليها وعارضو طريقها
واحد منهن حط ايدو على تمها ليخدرها
حاولت تقاوم بس ماقدرت وتدريجيا فقدت الوعي
حملوها عالسيارة واخدوها ومشيو بسرعة ، ،،،
---------------------
بالفرع
كانت ميسم قاعدة مع انس
عندو بالمكتب وكان انس كل الوقت ساكت ومتدايق من خسارتو مقابل عابد
وكانت ميسم قاعدة مقابيلو
وعم تراقب نظراتو وشرودو المستمر
ميسم: سيدي لاايمتا بدك تضل متدايق هيك
انس:...
ميسم: والله مامستاهلة ياسيدي
بيرفع راسو وبيطلع فيها بنظرات غاضبة وبيخبط ايدو عالطربيزة
انس: مبلا مستاهلة مستاهلة وكتير
ميسم: هدي سيادتك هدي خلص ماتعصب المرة الجاية ان شالله منعوضها
بيهز براسو (بمسايرة) وبيضل ساكت
وعم يفور ويغلي من جوا
ميسم: خبرت سيادة العميد؟
انس: خبرتو
ميسم:شوحكا؟
انس: ماحكا شي قلي متل ماانتي قلتيلي
ميسم(باابتسامة): طيب ازا هو مانو متدايق انت ليش متدايق كل هالقد خلص مابدها كل هالعصبية
وبصير انس يرص عاايديه ويحكي بقهر
انس: لك حاج تقوليلي مابدها، انا نضحك عليي نخدعت خسرت المعركة، وانس بعمرو ما خسر بمعركة دخل فيها ليخسر بالاخر على ايدين واحد كلب متل عابد
ميسم: سيدي ممكن سؤال
انس: تفضلي
ميسم: ليش بحسك بتكرهو لعابد، عندك معو شي شخصي؟!!
بيصفن وبيشغل،سيجارة
بيحطا بتمو وهو عم يهزلا براسو باايجاب
انس: مبلا عندي
ميسم: فيني اعرف شوقصتك معو؟
انس: هي قصة طويلة ، بحكيلك ياها شي يوم هلق مو رايق والله
ميسم: طيب على راحتك سيدي المهم تروق هلق وتهدي اعصابك
انس(عم يهز براسو): ان شالله
بتصفن فيه وبنظراتو يلي كانت مليانة قهر
على خسارتو وبتبتسم
ميسم(بقلبها): يالله انا قديش شفت ضباط ابطال ومابيرضو بالخسارة، بس متلو ماشفت، ياريت كل الضباط متلو ،ااخ نيالك يالميا عليه
بيفيق من افكارو وبينتبه انو ميسم عم تطلع عليه بيستغرب
انس: في شي ؟!
بتصرف نظرها عنو وبتحس بااحراج وبتتنحنح
ميسم: لاابدا
---------------------
بعد ،ساعة
دخل سعيد لعند عابد وهو عم يضحك ضحكة خبيثة
وقف قدامو بثقة وقرب لعندو
سعيد: العملية نجحت شريك
عابد(بفرح):حلووو كتيير ، وينها هلق؟
سعيد: هههه لسا مافاقت من المخدر
وبيطرق ايدو باايد عابد
عابد: عظيم ، اتصلي بهاد يلي اسمو انس
سعيد: من عيوني شريك ،
حمل الموبايل واتصل وبعد كم رنة
انس: الو نعم
اخد عابد التلفون من سعيد وحطو ع دانو
عابد: شلونك ياحبيبنا
انس: اهلا مين عم يحكي
عابد(بسخرية):له له له معقول هيك ياصاحبي نسيت صوتي
انس(بعصبية): لك مين عم يحكي
عابد: سماع حبيبنا ، مرتك صارت عنا ، ونحنا رجعنا للمزرعة ، اصحك تحاول ترجع تهجم وتعملي فيها زلمة ، لانو وحياة الي خلقني ، اول مااسمع صوت طلقة نار ، مرتك ويلي ببطنها رح يصيرو بعداد الموتى ،
انس نفعل ووصل الدم لراسو وصرخ عليه: للللككك عاااابد؟؟؟
عابد: اي عابد عابد الي بدك تمسح فيه الارض ، هه اسف ياصاحبي ، سبقتك
انس(بصراخ):عااابد عابد ، لميا مادخلها بيناتنا ، رجعها رجعها وبوعدك ماعاد قرب عليكن،
عابد: ههههههههه ، تاخرت حبيب تاخرت
انس: عابد شوبدك بعملك ، بس لاتأذيها
عابد: اي ترجاني ترجاني كمان ، شوف ولاك مابدي ارجع عيد يلي قلتو، اي طلقة نار ضدنا، بتعتبر حالك خسرت مرتك وابنك
وياويلك ياويلك وياسواد ليلك اذا بحس بمجرد خطر صغير ع حياتي وحياة جماعتي
، سلام ياكبير
انس: عابد استنى لاتسكر عااابد ،
انقطع الخط
وانس جن جنونو وماعاد يعرف شو يتصرف رجليه ماعاد حملوه قعد بالارض وحط ايديه على راسو
وصار يصرخ: ياربيي دخيلك، كل شي الالمياااا يااارب ،بصعوبة قام من محلو وهو عم يسند حالو
كان الخبر بيهد الحيل ، اغلا شي عندو صار بين ايدين واحد مابيخاف الله
طلع من مكتبو وهو عم يحاول يبين طبيعي
شافوه العساكر برا ضربولو تحية
كمل طريقو ومشي وهو عم يتصنع الثبات والصمود
طلع لبرا الفرع وركب بسيارتو
وشغلها ومشي وهو عم يفكر شو بدو يعمل بهالمصيبة يلي حلت عليه...
_____
بغرفة معتمة
وحيطانها مليانة خيوط عنكبوت
وعيت لقت حالها مربطة ،والمكان حواليها معتم،
خافت وصارت تصرخ
لميا: وين انا،مين في هون ، انا وين ؟؟
فجأة اشتغل الضو
وظهر قدامها وجه مابتحب تشوفو ابدا
عابد(بسخرية): انتي باامان يااعمري
لميا(بصدمة): عاابد؟
عابد: ايي عابد ،شبك كانك شفتي جني!
لميا: انا شوجابني لهون، شوبدك مني؟
قعد قدامها وصار يستفزها ويحط ايدو على شعرها
عابد: مابدي منك الا الخير
لميا: شيل ايدك عني، قلي ليش جايبني لهون
عابد: شتقتلك لانو ماشتقتلي انت
لميا: فشرت ، تركني روح على بيتي ،
عابد(بلهجة استفزاز): تسئ تسئ تسئ ،موقبل ماجوزك يبوس الصرامي، وينفذ اوامري
لميا: لك انت شو بدك مننا؟ من زمان قلتلك اني مابحبك مابحبك شوالشغلة بالغصب
عابد: هلق هاد حديث تاني، منحكي فيه بعدين، المهم هلق ،جوزك ينفذ اوامري ،
لميا: شوبدك منو انت؟
عابد: رح تعرفي بس موهلق
لميا: انا لاايمتا بدي ضل هون
عابد:ليجي عبالي طلعك ،
يلا هلق ياقمر ، ارتاحي انا رح روح
لميا(بصراخ):عااابد طالعني من هون ،
قام من محلو وطلع من الغرفة بدون مايرد عليها
وسكر الباب ،
وهي ضلت عم تستنجد وتبكي
لميا: لكككك طلعني ياحقير
ياعااالم مافي حدا هون. طالعوني مشان الله
ماكان في رد من اي حدا
وماكانت بتقدر تأتي بااي حركة لانها كانت مربطة
سندت راسها عالحيط وصرخت بااعلا صوت: يااااااالله
وصارت تضرب راسها بالحيط وتبكي اكتر واكتر
____
بمكان تاني
قاعد وعاقد حواجبو وعم ينضف سلاحو
فجأة بيجي حدا وبيحاوط رقبتو باايديه من ورا وبيميل راسو ع كتفو
بيحس بالاشمئزاز وبيكز ع سنانو وبيبعدها عنو
جابر: مارح تبطلي هالمياعة انتي
فرح (بدلع): بيبيييي ليش هيك انت
جابر(بعصبية) : بلا بيبي بلا بطيخ روحي من هون وليه
بتهزلو بكتفها(برفض) وبتزم شفايفها وبتجي بتقعد جمبو
وهو بيتجاهلها وبيرجع لتنضيف السلاح
فرح: جوجي انت ليش هيك بتعاملني بنشافة
جابر: والله انا هيك الله خالقني ازا مو عاجبك ليكهن الحيطان كتار
بتقرب منو وبتصير تتمايع عليه
فرح: طيب ليش والله انا بحبك وبموت فيك ليش هالقساوة كلا، والله انا مابستاهل وبتقرب من خدو وبتبوسو
بيفور دمو منها وبيترك السلاح من ايدو وبيطلع فيها بعصبية
جابر: لك انتي ماعااد تفهمي! ! ماعاد تفهمي! الف مرة قلتلك حلي عني لاتقربي عليي، لعما بعيونك لابالضرب عم تجي ولابالرواق كيف بدي اجيكي انا! !
فرح: بالحنية يابيبي، انت بس خليك معي وحبني ،واللهي واللهي مارح تندم
بيعقد حواجبو وبيمسكها من شعرها وبيصير ياخدها ويجيبها
جابر: ليكي وليه هلق بتنقلعي من خلقتي احسن ماموتك لعما بقلبك شو زنخة
ارتسمت ع وجها علامات الانزعاج وقامت من جمبو
وقفت بعيد عنو واطلعت عليه بحقد
فرح(بقلبها): ماشي ياجابر خليك متكبر عليي لقلك
وبتلف ضهرها وبتمشي
بينما جابر كان عم يراقبها بااشمئزاز
جابر: تضربي شو لزقة
--------------------
بالليل
قاعد. وحاطت ايدو ع راسو
وباايدو التانية سيجارة
وقدامو طبق سجاير مليان
مقهور ومهموم وصافن بالشي
الي صار، شو لازم يعمل حتى يخلص مرتو من ايدين عابد، شو المطلوب منو؟
اسئلة كتير عم تدور براسه وافكار بشعة عم تطاردو
شال موبايلو يلي كان محطوط عالطاولة مقابيلو
اتصل بعابد اكتر من مرة ومارد عليه
رجع حاول يتصل للمرة الاخيرة
واخيرا فتحلو الخط
عابد(ببرود):شوبدك؟
انس: عابد رجع لميا ، والي بدك ياه بصير
عابد: ماحزرت حبيبي ، موقبل ماتتنفذ اوامري ،
انس(بصراخ):لكك شوبدك بس قليي شوبدك
عابد: اول شي بدي ياه ، رجالي
انس: شبهن رجالك ؟
عابد: بدي،ياهن يطلعو من السجن ، وبدون ماحدا يعرف، تهربهن تهريب يعني
انس(بصدمة):لك انت شوعم تحكي؟؟ بدك ياني طلع ناس مطلوبين وهربهن
عابد: مواحسن ماتموت مرتك؟
انس(بخوف):طيب عابد خلينا نتفاهم
عابد: مافي تفاهم بيناتنا ، نفذ يلي عم اطلبو ، لحتى تأمن عحياة مرتك ،وعلى فكرة لسا في طلب تاني ،
انس: وشو هو الطلب التاني؟
عابد: لتنفذ الطلب الاول بقلك عالتاني،
انس: هاد اخر كلام عندك؟
عابد: اي نعم اخرر كلام ، باي يااا،،هههه سيادة النقيب ،
وسكر الخط بوجهو
احتار انس باامرو
وتجمعت الف فكرة براسو
➖➖➖➖➖➖➖➖➖
.يـــــــــ͢ـོ͓ـــتبــــــــــــــོـ͓ـــ͢ــ؏
➖➖➖➖➖➖➖➖➖
❴📖❵↵*تنسيق مشرفين مجموعة:
❴📚❵↵*قصص وروايات عالمية📚🧡
❴🧡❵↵*ننشر جميع انواع القصص والروايات العالمية
حـب🧡.
حـزن🧡.
اكشن🧡.
رعب🧡.
❴👑❵↵*أن كنت من عشاق ومدمني القصص مكانك عندنا🧡
❴🧡❵↵*رابط المجموعة للاشتراك:
https://whatsapp.com/channel/0029VadbWnd89inYkEVrpG0C
`
➖➖➖➖➖➖➖➖➖
*❴🧡❵↵ *مـــحمـــود* 🧡
➖➖➖➖➖➖➖➖➖
*❴📝❵↵تـنـسـيـق:جــــروب:*
*📚ᘓɹ̈Ł᎗ɹ̤lɠȷᒧl✍️ᘓᓆŁɹɹ̈̇ɹɕ🌸🧡*
https://whatsapp.com/channel/0029VadbWnd89inYkEVrpG0C
`
*{😍}قــرا۽ة ممتعــه للجميــع*
*{🪷}شڪرآ لــڪم لانضــمامڪم اتمنــى مشــارڪۿٖہِ رابــط قنــاتــي لکيۡ نستمــر بنشــر اجمــل الــروايــات الممتعــة*