الفصل 1
*؏ــڜــٱق✍🏻 اڵــڔﯣايــات📚📖🧡*
_*بإدارة محمـــــــود*_🧡
*`قصة اليوم `موسم النرجس*
*❴🔢❵الـــبـــــــــــ❴1️⃣❵ــــــــــــارت*
➖➖➖➖➖➖➖➖➖
*❴📝❵↵تـنـسـيـق:جــروب:*
*📚ᘓɹ̈Ł᎗ɹ̤lɠȷᒧl✍️ᘓᓆŁɹɹ̈̇ɹɕ🌸🧡*
*❴📚❵↵الـجـروب:خـاص لـنـشـر ٲحـدث الـروايـات بـكـل الانـواع والـلـهـجـات 🧡🖇️*
*|✒️|↜لـلإشـت͜ـࢪاڪ بـ قناة*
*📚*https://whatsapp.com/channel/0029VadbWnd89inYkEVrpG0C
*📖📚؏ــڜــٱق✍🏻 اڵــڔﯣايــات📚📖*
#موسم النرجس
#الجزء الأول
- كانت واقفة جوا الغرفة وعم تتطلع من شق الباب على الرجال اللي واقفين برا وعم تفرك ايديها بتوتر ممزوج بسعادة ، شافت اخوها جاي ، ركضت وعملت حالها اعدة ع الكنبة ، انفتح الباب ودخل لعندها وهو مخبي شي وراه ، وقفت وهي منزلة راسها وعيونها بالأرض قرب لعندها ورفعلها ياه وقال: مبسوطة؟ وأخيراً رح تنخطبي للشب اللي حبيتيه عملتي كلشي لحتى تكوني معو بالنهاية..
سكتت وماجاوبت ، قرب منها اكتر وقال بلهجة غريبة: الف مبروك سما مبروك أختي ..
رفعت راسها بفرح واتطلعت فيه وبلحظتها انصدمت!!!!!
--------------------------------
- قبل سنتين..
- فاقت صبية حلوة بأول عمرها بشرتها حنطاوية وعيونها خضر ووساع ورموشها طوال وسود وشعرها ناعم ولونو أسود وطويل لعند بيوصل لعند خصرها ، كانت حلوة كتير وعندها كل معالم الأنوثة والجمال🩷
قامت على صوت المنبه ولمت شعرها بسرعة وراحت للحمام وبعدها تناولت فطورها على عجل وحملت حقيبتها لتتوجه لمدرستها..
- أمها ( أمل) : لك سما ليش هيك مستعجلة مارح تطير المدرسة كلي منيح
- سما: ماما بتأخر لازم روح
- أمل: طيب استني دقيقة ..
مسكت امها خبزة ودهنتلها ياها جبنة وعطتها ياها وقالت: خدي كليها وانتي رايحة ..
ضحكت سما واخدتها منها وبعتتلها بوسة بالهوا وطلعت.. مشت لمدرستها وكلها طاقة وحيوية كانت سما من الأوائل بالمدرسة وبتهتم بدراستها كتير وكل سنة كان مكانها محفوظ بين المتفوقات والمتفوقين ، حلمها تطلع دكتورة اطفال بالمستقبل طبعاً لسا مشوارها طويل شوي لانو لساتها بالصف الأول الثانوي ..
كانت ماشية وعم تدندن ولمحت حدا مشى جنبها وصار يصفر بنفس النغمة اللي عم تدندنها ، اتطلعت بطرف عينها وعرفت انو ابن جيرانهم ضياء اللي انتقلو جديد على الحي ، تجاهلتو وسارعت خطواتها ، ضياء ضل ماشي وراها وهو عم يصفر بصوت عالي ..
عصبت كتير وبرمت عليه وقالت : انتااا امشي بدرب طريقك وحاج تلاحقني !
-ضياء: قليلي ليش حتى ألحقك ؟ هاد طريق مدرستي..
حست سما بالحرج وقالت بقلبها: لك صح معناها هو كمان معي بالمدرسة ..
اتطلع فيها وابتسم من طرف تمو بمسخرة ورمى عليها شي ومشى قدامها وتخطاها ، اتطلعت على الأرض لتشوف شو اللي رماه لقت وردة ، عصبت وكانت بدها تلحقو وتصرخ بس تماسكت ، انحنت وحملت الوردة وتوسعت عيونها كانت زهرة النرجس ، قربتها من أنفها واستنشقت ريحتها الحلوة وابتسمت ورجعت بذاكرتها لقبل اسبوع لما كانت عم تتمشى بالحي بملل والشارع هادي عدا عن حركة نقل الأغراض قدام بيت من البيوت
- سما: يمكن هدول هنن الجيران الجداد اللي قالت ماما انو رح ينتقلو على هاد البيت..
طلع شب من البيت وصار ينقل الغراض مع الشباب ، اتطلعت سما عليه وهي عم تضيق عيونها من الشمس ، انتبه عليها ووقف وهو عم ياخد نفس ويمشط شعرو بإيدو ، برمت سما حالها وكملت مشي وشافت زهور النرجس متفتحة عند جيرانهم ، اتطلعت حوليها واجت لتقطف وحدة وكانت متشوقة وفجأة طلعت جارتهم وصارت تلحقها وتصرخ عليها وشافت ضياء واقف وعم يضحك عليها ، تزاورتو وعقدت بين حواجبها وركضت من جنبو للبيت..
ضحكت على هالذكرى وحطت الوردة بجيبتها ولقت حالها قدام باب المدرسة والطلاب عم يفوتو وشافت رفقاتها وفاتو مع بعض على المدرسة وهنن عم يحكو ويضحكو..
واخدوا اول حصتين وبعدين طلعو للإستراحة وراحت سما تشتري اكلات طيبة وكان زحمة كالعادة على البوفيه وصارت تحاول تفوت بينهم وماتقدر ، وفجأة شافت كل الطلاب عم يبعدوا ويفتحوا الطريق اتطلعت ومالقت إلا ضياء عم يتقدم بكل ثقة وبيشتري وبروح والبنات عم يتطلعو عليه بإعجاب والشباب بخوف ...
خلينا نحكي شوي عن شخصية ضياء هو شب طويل وجسمو رشيق وملفت ، شعرو كثيف وناعم وملامحو رجولية وحادة وجذاب ، هو وسيم المدرسة بالنسبة للبنات اللي كلهن بحبوه لجمالو وطلتو وهيبتو ، مستواه الدراسي جيد بس هو مستهتر وبيضلو صايع وكل يوم مشكلة بالمدرسة ...
اشترت سما ورجعت لعند رفقاتها وكانوا بيتهامسوا ...
- سما: شو عم تحكوا انتي وياها ؟
- ريم: وليي مأحلااه
-جمان: ياريت كون حبيبتو
-سما: مين هو؟
-ريم: عن مين يعني ليش في غيرو ! ، تنهدت بحالمية وكملت: ضياااء
اتطلعت سما عليه ورجعت اتطلعت عليهن: شو فيه مميز يعني؟؟ مابعرف ليش آخد عقلكن هالقد؟
-جمان: هو كلو مميز ومافي متلوو ، نحناا محظوظين انو عم نشوفو كل يوم🥺
-ريم: مااشفت متلو بحيااتي
- سما بملل: تركونا منو لهالمغرور اي شو رأيكن تجو لعندي بيوم العطلة ؟
- انتهى الدوام ورجعت سما من المدرسة وشمت ريحة طيبة جاية من المطبخ حطت الشنتة وراحت على المطبخ ..
- سما بفرح: شااكرية؟؟
- أمل: اي عم اطبخ شاكرية
-سما: تؤبري قلبي
-أمل: بعيد الشر يلا روحي بدلي تيابك ابوكي واخوكي رائد على وصول وعازمين اختك رشا وزوجها ..
-سما: حااضر
----------------------------
- على طاولة الغداء كانو اعدين وعم يحكو ..
-أمل: يلا يا جماعة بلشو بالأكل
بلشو ياكلو بهدوء وفجأة نقزو الكل على صرخة رائد
-أمل: شبك حبيبي في شي؟ خوفتنا
-رائد بغضب: شو هااد اللي بالصحن؟! أناا من إيمت بتزهرم اللحمة؟؟ لييش حاطتيلي مع المرقة لحمة؟؟؟؟
-أمل بحرج: ولله نسيت ياروحي ، هات خلص رح بدلك ياهاا
-رائد: قعدي ..
وقف والكل عم يتطلعو عليه وحمل الصحن وضربو على الأرض ومشى وهو عم يقول: نزعتولي أكلي ماعاد بدي أتسمم..
أمو قامت تركض وتمسح الأرض ولحقتها رشا تساعدها وأبوه قعد ومسك راسو بإستسلام أما سما فكانت معصبة كتير تصرفاتو كل مانها عم تزيد وماحدا عم يوقفو ، أمو وأبوه شايفينو ومو مصدقين لانو وحيدهم وكبر على هالحال..
- سما: هاد ماعاد عندو خجل كيف هيك بيصرخ عليكي ماما
- أمل: لك وطي صوتك هلق بيسمعك
-سما: ويسمع شو يعني لازم يعرف حدو
-أمل: لك ولله مابتخلصي منو الله يرضى عليكي بلا مشاكل أي!
-سامي( زوج اختها): أنا بعرفو لرائد عصبي بس مو هالقد
-رشا: حبيبي اخي هيك من صغرو بيضل معصب
-أبو رائد: هو شب وبأول عمرو طبيعي يكون هيك بدنا نتحملو ليهدا ويركن.
-أمل: صح كلامك حبيبي يلا كملو أكلكن ماصار شي..
- رائد شب عمرو عشرين سنة طولو متوسط وملامحو حلوة عصبي كتير وبضل يخانق اللي حوليه خاصة عيلتو ، مغرور لدرجة كبيرة وبحب السيطرة ، بيشتغل مع أبوه بشركة سيارات ...
- بعد الأكل أخدت سما كتابها ودفترها وطلعت تدرس بحديقة البيت كانت قاعدة ومركزة وفجأة صارت تسمع اصوات شباب من البيت اللي قبالهم ، حطت ايديها على اذانها وهي معصبة وكملت دراسة وبعد دقايق وهي منسجمة بالدراسة حست على شي صلب اصطدم براسها بقوة ، صارت تفرك راسها بألم واتطلعت على الأرض لقت طابة باينة جديدة ⚽
نظرت للشقة اللي قبالهم بعصبية بالغة وصرخت وسمعت صوت شب من جوا بقول: ارمولنا الطابة بعد اذنكن اجت لعندكم بالغلط..
راحت حاملة السلم وحطتو على الحيط وطلعت ونظرت لحت وبإيدها الطابة ، كان في ثلاث شباب تمايزتهم وركزت عينها على واحد منهم وصرخت: ضيااااء
-ضياء ببرود: شو عم تعملي فوق ارميها بسرعة
اتطلعت فيه بغضب وضربتها لتجي بنص راسو هو مسك راسو وهي نزلت لتحت......
- تاني يوم وهي راجعة من المدرسة حست على حدا مسكها من حقيبتها من ورا ولزقها فيه اتطلعت بطرف عينها وكان ضياء ، رجف قلبها بس تظاهرت بالقوة
- سما: تركني
- ضياء: نووو
-سما: شو بدك مني تركني
-ضياء: بدك تعالجيني
-سما: شو دخلني
-ضياء: انتي ضربتيني مبارح اتطلعي كيف راسي مجروح ..
لفت لعندو وصارت تتطلع على راسو بتدقيق وهو صار يقرب ببطئ منها حتى يبوسها حست عليه وبعدت راسها بسرعة وضربتو برجلها بقوة وقالت: كيف بتتجرأ ؟؟!
اجا ليحكي ومالقاها الا ركضت وماعاد بينت ، هز براسو ومشى ببطئ...
- وصلت سما للبيت ووقفت ورا الباب وصارت تلقط انفاسها وتذكرت شو صار وهمست: منحط فلتاان
-رائد: مين منحط وفلتان؟
- نقزت سما وحطت ايدها على قلبها ..
-رائد: ميين
-سما: اه ولاشي
-رائد: قلتيلي
مشى من جنبها وهو عم يتزاورها
-سما بقلبها: مو ناقصني الا انتاا
دخلت بدلت تيابها وأكلت ودرست ورمت بحالها على السرير ودخلت بنوم عميق ، وبعد ساعات فاقت مفزوعة على اصوات قوية جاية من برا البيت ، ركضت لتشوف وانصدمت لما شافت اخوها وضياء عم يتضاربو وكل واحد منهم عم يضرب التاني ويسبو.. واهلها واهلو عم يحاولو يفكو بينهم واهالي الحي متجمعين حوليهم..
- رائد ضرب ضياء بوكس بقوة وصار بالأرض ونزل فوقو وصار يلكمو لكمات متتالية حتى نزف طرف تمو بعدين دفشو ضياء عنو بضربة على وجهو ووقفو هنن التنين ورجعو يتضاربو ، سما ركضت ووقفت بيناتن وصرخت: بكفييي !!
دفشها رائد على جنب ووقعت بالأرض ركضت أمها ومسكتها وهمست: سماا قومي يا قلبي هاتي ايدك
وقفت سما وهي عم تتطلع عليهن بعصبية ...
-------------------------------
- بعد ربع ساعة كان رائد قاعد وأمو عم تعقملو جروحو وهو لساتو معصب ..
- ابو رائد: شو هالتصرفات رائد بيك انتا ماعدت مراهق لشو حركات هالزعرنة؟!
اتطلعت أمل بزوجها وكزت على شفافها بتنبيه..
- رائد وهو عم يتأفف من المعقم: لك بكفي قيمي هالبطيخ ، لا أبي أنا مو مراهق هاد الزفت هو المراهق لك متل الحمار نظامي..
- أمل: ليش ماما؟ شو عملك؟
- رائد: هالواطي طلع بالموتور تبعو وخبط بسيارتي وخربلي الضو الأمامي !!
- أبو رائد: مشان هيك تخانقتو ؟!
- رائد: حقو فرنك ومابيعرف يسوق موتور ليش طالع فيه ، أنا لما سمعت صوت فوراً طلعت لبرا وشفتو طابشلي الضو ضربتو بوكس خليتو بالأرض لو تشوفوه كيف صاار ههههه
- سما بغضب: مفكر حالك قوي يعني ؟! ماكان في داعي للضرب اطلب تعويض وخلصناا
- رائد: نعم؟ انتي صاير يطلع صوتك يا فارة اي خرسي وسدي تمك أحسن ما أجي أخرسك بطريقتي ليكون عاجبك وعم تدافعي عنو ؟
- سما: لك إنتاااا ..... سكتت حتى ما تغلط بالحكي وضغطت على ايدها بعصبية كبيرة وطلعت لغرفتها وضربت الباب ..
- رائد: هي لازمها تأديب سمعانين؟ كتير طولان لسانها..
- أمل: اهدى حبيبي هي لساتها صغيرة ومو عرفانة شو عم تحكي هلق بطلع لعندها وبفهمها..
------------------------------
- ضياء كان عم يتطلع بالمراية تنهد ورفع شعرو بإيدو وطلع لعند أمو وأبوه..
- أبو ضياء: يا ابني مابدنا مشاكل مرة تانية مابصير هيك ..
- أم ضياء: حبيبي عم يوجعوك الجروح؟
- ضياء: ماكان بدي يصير هيك ما شفتو الا اجى وضربني ، اطمني امي ماعم يوجعوني شغلتهم بسيطة
-أبو ضياء: حصل خير بس مابدي هالشي يتكرر
- ضياء: حاضر بابا
- أم ضياء: يلا ماما اقعد تعشا
--------------------------------
- تاني يوم بالمدرسة كانوا البنات اعدين بالاستراحة اجت ريم عم تركض وتضحك ....
- جمان: شبك ريم شوفي؟
- ريم: لك حاكاني لو تشوفو أديش حلوو عن قريب آخ رجلييي ماعااد حملوني
- سما: قعدي بسم الله عليكي مين اللي حاكاكي
- ريم قعدت وهي عم تلقط نفسها وشربت مي وبعدها حكت بحماس: ضياااء
- جمان: ضياء؟؟ حاكاكي؟؟ كيف ووين ولييش؟؟
- سما: ضياء؟
- ريم: كنت رايحة اشتري ومن الزحمة اصطدم فيني رفعت راسي ولقيتو قدامي وقريب كتيير وقلي آسف تخيلوووو !!!
- سما تنهدت وحست بسخافة رفيقتها وارتكت على الحيط وصفنت بملل وهي عم تسمع حديثهم بعدم انتباه🥱
- جمان: ياااخ نياالك يي معقول يكون اصطدم فيكي عن قصد😲🫣😍
- ريم: ياااا كيف يعني؟ 🙈
- جمان ضربتها على كتفها وغمزتها : بكون بدو يطبقك يا جدبة😉
- ملت سما وقامت وتركتهم وطلعت على الدرج حتى وصلت لباب السطح لقتو مفتوح لأول مرة ، مشت وطلعت تلقاها الهوا وطير شعراتها ، صارت تتطلع حوليها وهي بتبعد شعرها عن وجها وفجأة سمعت صوت: ليش جاية لهون نزلي لتحت..
نظرت لمصدر الصوت لقت ضياء واقف لحالو على جنب ، قربت لعندو وقالت: انتا شو عم تعمل هون؟
- ضياء: ما دخلك
- رفعت حواجبها واتطلعت على تمو المجروح وايدو وتذكرت كيف اخوها ضربو ، كان عم يتطلع قدامو بدون مايتطلع عليها وشعرو الكثيف عم يتحرك بفعل الهوا ، مدت ايدها لجيبتها ولقطت شي وعرضتو عليه..
- ضياء بدون مايتطلع: شو هاد؟
- سما: لاصق طبي
لمحت ابتسامة ساخرة على تمو اتطلع فيها بجمود وتحرك ونزل لتحت..
- خلصت الاستراحة ودخلت سما ورفقاتها على الصف..
- المعلمة: انتبهوا يا طلاب هاد آخر درس رح ناخدوا لانو إمتحانات الفصل الأول بعد اسبوع...
اخدوا الدرس وسألوها عن المطلوب بالمادة..
- المعلمة: تعالي سما اكتبيلهم المطلوب على السبورة..
طلعت سما وكتبتو والكل نقلوه..
وهيك عطلو لاسبوع عشان الامتحانات ، كانت سما ماتطلع من غرفتها من كتر ماتدرس وتعيد حتى انو أمها تترجاها تاخد استراحة بس عبث كانت صارمة بموضوع الدراسة ..
- رائد: وينها الفارة؟
- أمل: فوق بغرفتها عم تدرس
- رائد: لنشوف شو رح تستفاد بعد كل هالدراسة أصلاً مابعرف ليش أبي مخليها لهلق بالمدرسة كان لازم يبطلها من التاسع ، ناقص تروح للجامعة وتفلت
- أمل: لا يا رائد سما مو هيك سما حلمها تدرس طب لا تحكي هيك عن أختك
- رائد: طب؟ ههههههه ومصدقتيها؟ انتي على نياتك يا أمي
- أمل: اي مصدقتها وعندي ثقة فيها كماان
- رائد ضحك وتركها وطلع..
-------------------------------
- سما كانت متسطحة بالعرض على السرير وقدامها الدفتر والقلم وكتاب الفيزيا ، كان شعرها مبعثر وحوليها وراق كتيرة مرمية وعم تتذمر ..
دخلت أختها رشا وشهقت: يي شو هالحالة اللي انتي فيها ؟؟!
- اتطلعت فيها سما بلا مبالاة : انتي ايمت اجيتي؟
-رشا: صرلي ساعة وما شفتك أمي قالتلي انك عم تدرسي للامتحان
- سما تنهدت بتعب: اي
- رشا: اي تضرب الدراسة اذا بدها تعمل بسوسو حبيبتي هيك تعي لهوون
- قعدت جنبها على السرير وصارت تمسكلها خدودها وتدغدغها..
-سما: هههههه بكفي ههههه تركيني
- رشا قامت الكتاب من ايدها وقعدت جنبها: اي هاتي لشوف يا طبوش شو آخر الأخبار
- سما اتطلعت فيها وضيقت عيونها: أخبار شو
- رشا: يعني مافي بحياتك حدا؟
- سما بعدت عنها وزورتها: شو هالحكي أنا لساتني صغيرة على هالأمور أنا مارح فكر الا بدراستي
- رشا سحبتها وضمتها وصارت تضحك
- سما: ليش عم تضحكي؟
- رشا: كنت عم جربك بس ههههه ليش عصبتي دخيلو الواعي انا
- سما: يلا يلا طلعي لبرا بدي أدرس لا تلهيني
- رشا: تمام نيردة طالعة ليكي درسي ولحقيني لتحت خلينا نقعد مع ماما
- سما: تمام اذا زاد معي وقت
- رشا باستسلام: مااشي
رجعت سما للكتاب وحملت القلم والدفتر شي نص ساعة بعدها ضربت حالها كف: لك شبكي سماا ليش ماعم تعرفي تحليهاا اوف ماني متذكرة طريقة الحل لشوف بالكتاب ..
حملت الكتاب وصارت تقلب بالصفحات وبعدها صفنت وصارت تحك راسها بتوتر : اففف مو موجودة طريقة الحل هي خارجية 😩
- استسلمت وتركت الدراسة ونزلت لتحت كانو أمها وأختها قاعدين بالجنينة
- رشا: وهي النيردة نزلت وأخيراً
- أمل: قعدي ماما
- سما سحبت كرسي وقعدت: اي شو كنتو عم تحكو ؟
- رشا: عم نقول انو بكرا رح ننزل ع السوق شو رأيك تنزلي معنا؟
- أمل: اي وبتشتريلك كم قطعة تياب حلوين
- سما: لا بلاها انزلو انتو
- رشا: لك ليش
- سما: لانو لسا ماخلصت دراسة في درس مسائل فيزيا مو فهمانتو حيروني ماعم اعرف احلهم
- أمل: عنجد ؟ رشا درسيها ياهن
- رشا: ماما انا دراستي أدبية شو نسيانة؟
- أمل: اي صح ، تذكرت مبارح كنت عند جارتنا ام ضياء كنت عم أعتذر منها مشان خناقة الولاد اي وبالصدفة ذكرت قدامي انو ابنها ضياء شاطر بالفيزيا كتير
- سما: اي شو يعني
- أمل: بنخليه يفهمك ياهن اكيد مارح يصعبو عليه وهو بكلوريا
- سما: لاا ماما شيلي الفكرة من راسك
- رشا: ماما معها حق كلو درس شبك
- سما : لا مابدي
- أمل: ليش مابدك ؟ شفتي شي من الشب؟
- سما: اه ؟ لاا شبك ماما عم تحققي معي
- رشا: أمي كيف شكلو الشب حلو؟
- سما فتحت عيونها مستغربة
- أمل: اي حلو كتير ماشاء الله عنو الله يحميه على هالشبوبية والجمال
- رشا: ههههه معناها أم السوس عم تتجنبو حتى ماتوقع بغرامو
- سما تزاورتها : بلا سخافاتك رشرش أنا بشو وانتي بشو
- قضو السهرة على ضحك وفرفشة وبعدها طلعو لينامو..
الصبح بكير قامت سما تدرس بالجنينة ورجعت تحاول بالدرس ذاتو وماتطلع بنتيجة وبعدها فتحت الانترنت وصارت تبحث وكمان مالقت شي ، تنهدت بتذمر وتذكرت حكي أمها عن ضياء ، نفضت الفكرة من راسها : لاا ضياء مستحييل ضياء لا ..
رح اتصل برفقاتي اكيد بكونو بيعرفو اي ..
اتصلت فيهن وطلعو مو مهتمين بموضوع الدراسة كلها وبايعينها ، انجلطت منهم ورمت الموبايل على جنب..
وبوسط صفنتها سمعت صوت حدا عم يحفظ خلف الحائط فوراً ، حطت اذنها وتمايزت صوتو وتأكدت انو ضياء ، حطت ايدها بشعرها وهمست: ضيااء انتا هوون؟
- ضياء: اي ؟
- سما : أنا سماا
- ضياء: بعرف ، شو بدك؟
- سما: بدي اطلب منك شي بس انتبه لو الطرق مو مسكرة بوجهي ومضطرة مابطلب
- ضياء: اختصري
- سما: في درس فيزيا عندي مو فهمانتو وماعم اعرف احل مسائلو
- ضياء: وشو المطلوب مني
- سما باحراج: تدرسني ياه
- ضياء: .....
- سما: شو ؟؟
صمت وبعدين سمعت سما صوت ضحكة من ورا الجدار ابتسمت لا شعورياً وبعدين قلبت ملامحها وقالت: ليش عم تضحك؟؟
- ضياء: كل هالموشح مشان درس؟
- سما: هلق موافق ولا لأ ؟
- ضياء : موافق
- سما بفرح: شكراً كتيير
- ضياء: بس بشرط
- سما بملل: شو هو؟
- ضياء: طلعي على السلم لقلك ياه
- اتطلعت حوليها وحطت السلم وطلعت ومالقت الا وجها مقابل وجهو ، وقف قلبها اتطلعت بملامحو القريبة منها وبلعت ريقها وقالت بقلبها: عنجد حلو كتيير !
- ضياء: هلوو وين صافنة؟
- سما: أي شو شرطك قول
- ضياء: بوسة
- سما انصدمت: بوسة؟ شو قصدك؟
- ضياء: متل مافهمتيها
- سما: بتدرسني الدرس وبتاخد بوسة؟؟
- ضياء هز براسو بثقة
- سما طلعت العصبية من راسها عطتو نظرة نارية من عيونها الحمر ودفشتو لتحت ووقع من على السلم ، اتطلعت لتحت عليه وقالت بعصبية: تبوسك حية يا قليل الشرف والوجدان
- ضياء قام من الأرض ونفض تيابو وضحك من طرف تمو
- سما: لك لسا عم تضحك انتاا مابتستحي
- ضياء: كنت عم امزح ، الظاهر الأخت وأخوها والعائلة الكريمة عنيفين زيادة
- سما: هلق هاد مزح هي قلة ادب
- ضياء: خلص تعي خدي الدرس ببلاش
- سما: منيتك على حالك ماابدي لعمى شو هالناس هي
- نزلت لتحت وهي معصبة وعم تحاكي حالها..
- ضياء مشى وهو عم يطقطق بأصابعو ونطق : ايدها قوية..
- يومها ضلت سما طول نهارها غرقانة بين الكتب وعم تحاول واجت أمها قالتلها: لك حاج تتعبي حالك خليني قول لأم ضياء
- سما: أووعك
- أمل: لك لييش
- سما: هييك مرااق مابطيقو للزلمة بكرهووو
- أمل: لك ليش هيك عم تحكي عنو باين متل السكرة وكتير محترم
- سما: خلص ماما سكري على السيرة وسكري الباب كماان
- أمل: اي بكيفك بس مو بكرى تجي لعندي تبكي لانو رايحلك علامات بالامتحان تماام؟
- سما: لا مارح أبكي
- مرو أربعة أيام وصار موعد الامتحان ، راحت سما للمدرسة وهي متوترة كتير لاول مرة بتدخل مادة وفي شي مو حافظتو !
دخلت على القاعة السادسة وصارت تدور على اسمها بالمقاعد وسمعت بنت من صفها بتقول: سماا انتي هون قدامي
ابتسمت وراحت قعدت بالمقعد التاني وماهي الا دقايق وشافت شب قعد جنبها اتطلعت فيه وصارت ترفرف بعيونها : لاا مو معقوول كمان هون!!
- ضياء ابتسم ابتسامتو الساخرة وأشرلها على البطاقة اللي على المقعد وقال: شكلك ما انتبهتي للإسم..
نظرت للبطاقة وشافت اسمو جنب اسمها ، غمضت عيونها وصرخت بغضب والكل اتطلعو عليها وهو صار يضحك..
- سما وهي بتلقط انفاسها: اسفة للجميع
اتطلعت عليه وقالت: اقعد بأدب ولا تشتتني بالامتحاان
- ضياء: لا تملي عليي تعليمات مانو مقعد ابوكي يا حلوة
- سما: مستفز
- ضياء: شكراً
- سما بقلبها: يااربي تعطيني الصبر لأتحمل هالكائن ياربي شو هالمصيبة كيف رح يضل جنبي كل فترة الامتحانات
- كانو البنات عم يتهامسو وحاسدين سما انو اجى ضياء جنبها وعم يقولو نيالها ويتأملو ضحكتو ويذوبو ، دخلت المراقبة وسكتو ووزعو الوراق وبلش الامتحان ..
كانت سما مغمضة عيونها وعم ترتب معلوماتها قبل ماتشوف الأسئلة وضياء عم يتطلع عليها ببسمة وعم يرفع شعرو بإيدو وباقي البنات بالقاعة تاركين الورق وعم يتأملوه..
المراقبة ضربت على الطاولة نقزتهم وقالت: ليش الكل صافن الوقت مو لصالحكن يلا الكل عيونو بورقتو ..
- مسك ضياء القلم فتحو وبلش بالحل بهدوء ونفس الشي سما بس بتوتر ..
وبعد ربع ساعة كان ضياء قاعد وحاطط القلم جنب الورقة وقعد يتصفن بالحيطان والشبابيك والبنات..
- سما كانت عم تكتب وفجأة وقفت وقالت: ممكن ورقة تانية !
المراقبة باستغراب: طيب قعدي رح اجبلك وحدة
- اخدت سما ورقة تانية وصارت تعبيها وبعد نص ساعة وقف قلمها عن الكتابة وصفنت وتجهم وجها وضياء صار يتطلع عليها باستغراب
- سما بهمس: عينك بورقتك
- ضياء: أنا مخلص من زمان
- سما: لكان سلم وروح خليني أخلص منك
- ضياء: ماهو أنا قاعد حتى أكسب شوفتك
- المراقبة: عم اسمع همس الكل عينو بورقتو يلاااا
- سما تجاهلت جملتو الأخيرة وركزت بالسؤال وقالت بقلبها: يااربي لو اني مبارح سمعت كلمة ماما وخليت ضياء يدرسني يااه كنت هلق حليت المسألة ، افف بس اكيد كان رح يستغلني لا خليني اكسب نفسي وبلا هالسؤال ..
- ضياء اتطلع بتدقيق بورقتها وقرأ نص المسألة بقلبو وكتم ضحكتو وتذكر لما طلبت يدرسها ياه ..
- ضياء بقلبو: خليها بتستاهل
بعد شوي شافها مقهورة كتير وعم تحاول وتمحي وترجع تكتب وتمحي ، حمل قلمو وحل المسألة على المقعد بسرعة ونقرها برجلو اتطلعت عليه بانزعاج وأشرلها على المسألة على المقعد وحمل وراقو وسلمهم وطلع ، كانت عم تتطلع فيه مستغربة وهو طالع غمزها وراح..
- سما دق قلبها وتحول نظرها للمسألة وصفنت : لااا مارح أغش انا بحياتي ماعملتاا
وضلت قاعدة والوقت عم يمر وهي عم تتطلع بالمسألة بتوتر وتجاهد نفسها وبآخر الوقت مسكت القلم وصارت تنقلها بسرعة كبيرة وهي خلصتها وخلص الوقت وسلمت وراقها..
تنهدت وهي طالعة واجو رفقاتها من وراها وحطو ايديهن عليها وصارو يسألوها عن الامتحان ، لمحت ضياء بين الشباب اتطلعت فيه وصفنت وصار قلبها ينبض بطريقة غريبة وهو انتبه عليها وهي فوراً قامت عيونها وتوترت ...
---------------------------------
- رجع ضياء للبيت وقعد يدرس للمادة اللي جاية..
- أم ضياء: حبيبي في كم غرض لازميني معلش تطلع على السوق تجبلي ياهن
- ضياء: تمام بس لخلص هالدرس
- أم ضياء: اي الله يرضى عليك
خلص ضياء وطلع بالموتور وصادف رائد بالشارع..
- رائد: الأحسن تطلع من هديك الجهة مشان ماتضربلي السيارة ..
- ضياء: بطلع من وين مابدي
- رائد: انقلع من هديك الجهة عم أحكي أحسن ماكسرلك الموتور
- ضياء نزل من على الموتور : أي قرب وشوف شو بصرلك
- رائد تقدم منو: اي بقرب
قرب لعند ضياء ونكزو بكتفو وقلو: مين مفكر حالك ؟ روح اشرب حليب ونام ..
- ضياء عصب ومسكلو ايدو ولواها وهمسلو جنب اذنو : هي ايدك اذا لسا بترفعها عليي بكسرلك ياها يلا تحرك من هون..
تركو ومشى ليركب موتورو واستغل رائد الفرصة وضربو من ورا بوكس ، ضياء وقف ساكن وبعدين فجأة وبحركة سريعة مسك ايدو لرائد ولواها بقوة ورائد صرخ من الوجع بصعوبة: يااا حيواااان !!
وطلعو على صوتو الجيران وتجمعوا ووقع رائد بالأرض وماعاد قادر يحرك ايدو وانتهى فيه المطاف بالمشفى!!!!
- أمل بخوف: طمني دكتور ؟
- الدكتور: ايدو مكسورة
- أمل حطت ايدها على تمها بخوف وسما صفنت
- أبو رائد: كيفو هلق؟
- الدكتورة: منيح وفيكن تطالعوه ، فيكن تفكولو الجبيرة بعد شهر ومع شوية علاج فيزيائي بيرجع يحرك ايدو طبيعي
- دخلت أمل لعند ابنها وهي عم تسب على ضياء ولحقتها سما وبعدين ابوه..
- أمل: هالحقير الواطي كسرلو ايدو لعمى شو انو بلا ترباية
- أبو رائد: لك سمعينا يا مخلوقة ، فهمني ليش صار هيك هالمرة كماان !
- رائد: تحركشني ولما دافعت عن حالي اجى وضربني شوفة عينك
- أبو رائد: أصغر منك بسنتين وكسرلك ايدك ؟! وين عزمك وقوتك قلي؟؟؟
سما كتمت ضحكتها بالغصب
- رائد عصب: هالجبان أخدني غدر لو انو واجهني زلمة لزلمة كنت مسحت فيه الأرض
- سما صارت تضحك ع الساكت
- أمل: هلق شو رح تعمل ؟
- رائد: رح أشتكي عليه وخليه يتخ بالحبوس هالكلب
- سما حطت ايدها على تمها : سجن ؟ حرااام
- رائد: خرسي ولييك ، هي الحيوانة التانية طالعوها لبراا لانو عم تستفزني بزيادة
- سما: اي طالعة لحاالي
قعدت بحديقة المشفى وهي عم تفكر : معقول عنجد يشتكي عليه؟ ولله بيعملها هاد مجنون ، أنا مو مصدقة رائد أخي وبعرفو أكيد هو اللي بدا المشكلة ، وليش لدافع عن ضياء هو كمان أضرب منو ضروري يكسرلو ايدو؟! اي فخار يكسر بعضوو..
-
➖➖➖➖➖➖➖➖➖
.يـــــــــ͢ـོ͓ـــتبــــــــــــــོـ͓ـــ͢ــ؏
➖➖➖➖➖➖➖➖➖
❴📖❵↵*تنسيق مشرفين مجموعة:
❴📚❵↵*قصص وروايات عالمية📚🧡
❴🧡❵↵*ننشر جميع انواع القصص والروايات العالمية
حـب🧡.
حـزن🧡.
اكشن🧡.
رعب🧡.
❴👑❵↵*أن كنت من عشاق ومدمني القصص مكانك عندنا🧡
❴🧡❵↵*رابط المجموعة للاشتراك:
https://whatsapp.com/channel/0029VadbWnd89inYkEVrpG0C
`
➖➖➖➖➖➖➖➖➖
*❴🧡❵↵ *مـــحمـــود* 🧡
➖➖➖➖➖➖➖➖➖
*❴📝❵↵تـنـسـيـق:جــــروب:*
*📚ᘓɹ̈Ł᎗ɹ̤lɠȷᒧl✍️ᘓᓆŁɹɹ̈̇ɹɕ🌸🧡*
https://whatsapp.com/channel/0029VadbWnd89inYkEVrpG0C
`
*{😍}قــرا۽ة ممتعــه للجميــع*
*{🪷}شڪرآ لــڪم لانضــمامڪم اتمنــى مشــارڪۿٖہِ رابــط قنــاتــي لکيۡ نستمــر بنشــر اجمــل الــروايــات الممتعــة*