حب وانكسار - الفصل 7 - بقلم بقيت محمد - مكتملة | روايتك

By: Yaqin Mohammed لما حازم جاء داخل كدا حسيت نفسي ما عارفة اتنفس ياخ لابس جلابية فيها أحمر على الشمال وشال نفس اللاحمر وكأنهم قماش واحد وطاقية كمان بالاحمر وعليها هلال مدبس ولابس حريرة وشايل سعفة على يدو مع الحنة حاجة تهوس اللحظة تمنيت يكون زواجي منو مثل ما كنت اتمنى قبل أو اقدر اسامحو على خياتو الختمها بابشع الطرق بس تجري الرياح بما لا تشتهي السفن لما اتزكرت العملو بعد ما كنت شايفاهو قمة في الجمال أتحول لشئ كريه في نظري وفكرت مع نفسي إنو كان ممكن اسامحو على خيانتو لي واعزرو انو انا ما كنت بتكلم معاهو كحبيبة ولا مدياهو فرصة يتكلم معاي بعمق علشان يفكر انو نحن في علاقة ولا كان بينا وعد مباشر كدا علشان كدا كنت حسامحو بس بعد العملو مستحيل في اللحظة دي حسيت راسي حيتفجر تعب من الصباح ووقفة وكل الافكار الفي راسي ومخاوفي من الجاي اجتمعو مع بعض وفجاءة بقيت ما شايفة شئ وغبت عن الدنيا لما صحيت لقيت إخواني وبابا وعماتي واهل حازم وحازم كلهم في راسي ومؤيد ماسك عطر شكلو صحوني بيهو كان وشو شاحب حضني وقال لي اهدي انا معاك ما تخافي من شئ نحن ماشين كويس اصبر فضل القليل طبعاً كان بتكلم بالهمس فكيت لما سمعت صوت مهجة بتقول اسمي قعدت كويس وقلت ليهم انا كويس على فكرة بس مجرد ارهاق مهجة قالت لي ما بس ارهاق إنتي ما كلتي شئ من الصباح ومدت لي عصير شربت منو وقلت ليها دا عقاب ولا كيف ضحكت وقال لي اعتبريهو كدا لانها عاملة فيهو ملح المهم شربتو وبابا قال لي لحازم بعد دا يلا سوق مرتك وامشي حازم جاء علي وانا مسكت يد مؤيد الكل إنتبه بس ما علقو ومؤيد وقف وانا معاهو وقال انا بوصلهم ودعناهم وطبعا وصونا على بعض وكدا وطلعو معانا لحدي الباب كلهم واتحركنا كان الصمت سيد الموقف الا صوت العربية وهي ماشى لحدي ما وصلنا عمارة كدا علي البحر نزلنا ومؤيد معانا وحازم مشى قدامنا اتلقانا راجل كدا سلم علينا وحازم سلمو ورق كدا وبعدها دخلنا ومشينا الطابق الثاني وحازم فتح الباب أول ما دخلنا مؤيد ضرب حازم 👊 في انفو وقال ليهو بقضب والله تلمس منها بس شعرة الا اندمك فاهم ولا تفكر العملتو حيمر بسلام لأنك اتزوجتها حسابك معاي لسا ماخلص وحازم مسح الدم النزل من انفو وقال لي مؤيد حيجي زمن الحساب بس اصبر وبعدها كل زول ياخذ حقو قال ليهو تقصد شنو قال ليهو خليها لزمنها بس ومشى دخل غرفة وقفلها بقوة لما حسيت بي اهتزاز مؤيد قال لي ما تخافي ابدا واي ڜئ يحصل بلغيني بيهو وخليك قوية اوكي انا لازم امشئ طلع وانا احترت أمشي وين كان في غرفة ثانية دخلتها وشكلها مجهزة لي لانو شنطي فيها قفلتها بالمفتاح ومشيت فتحت الشنطة وشلت لي بجامة ناعمة كدا واتزكرت عمتو وهي بتقول لي البسي كدا واعملي كدا المهم لبستها ونزلت الشنطتين من السرير وختيت حاجات الثانية على التسريحة وفككت شعري وعايذة انوم سمعت الباب دق اتجاهلتو دق شديد شلت التوب جدعتو على اكتافي بحيث انزل ويقتي جسمي فتحت بعصبية لقيت حازم واقف وفي يدو أكل على صنية صغير مداهو لي من غير كلام وكان خاتي قطن على فتحات انفو قلت ليهو دا شنو نظر لي نظرة نظام إنتي شايفة شنو قلت ليهو شكراً وعايذة اقفل الباب لزاهو بقوة ودخل خت الصنية على الطربيزة وطلع بدون حتى ما يرفع عينو على قفلت الباب وقعدت على السرير الصراحة قلبي وجعني بس تجاهلتو وقلت يستاهل اكثر ماكان عندي نفس علشان كدا طوالي نمت عدينا زي أسبوع كدا انا ما اتواصلت مع زول الا مؤيد وحازم ما بتكلم معاي بس بجيب لي الأكل أو بختو في الثلاجة ولو اتكلمت معاهو علشان انرفزو أو بقيت اجدع كلام بقيف بس يسمع كلامي لاخر وهو مربع ايدينو واحياناً ببتسم وبمشي كأنو ما سمع شئ حيرني يعني لو هو عمل كل دا علشان يجبرني اتزوجو ليه بتصرف كدا بعد تفكير اتوصلت لانو خايف من تهديد مؤيد أو يمكن ندم الصراحة كان اثقل اسبوع على قلبي عايشة مع روبوت كان امنيتي في احد الأيام بس حالياً بتصرف كأنو ما بعرفني أو ما بعرف ليه يمكن علشان بقيت اكرهو في الاسبوع دا ما متواصلة مع اي زول الا مؤيد اما الباقين علشان عروس كدا عاملين انهم زوق ومهجة بتكلم معاها في الواتس بس اما مثاني من جاءت ردحت لي ثاني ما شفتها حتى حظرتني من كل السوشيال المهم قاعدة بحضر في فلم تركي على فلاشة اسمو تصادم في الحب الجزء الاول الثاني بحضر كدا جاء حضرت الصامت عاين لي مسافة يعني انا كنت مجهزة نفسي للحرب طاحنة وطول الفترة القبل العرس بجهز في نفسي علشان المواجهة ما كنت متوقعة الصمت داعلمت فيها ما شايفاهو كان شايل اكياس كثير ختاهم في المطبخ وجاء علي واخيراً قرر يتكلم قال لي جايننا اخواني بعد شوية عاينت ليهو قال لي بتمنا البينا يبقى بينا وطوالي دخل غرفتو حتى من دون ما ارد عليهو مشيت الغرفة أصلاً كنت مستحمية لبست جلابية استقبال منقوية كدا وعملت كحل و مسكرا وروج كبدي إحساس عروس وكدا ومشيت المطبخ جهزت عصير والحاجات الجابها في صحون واثناء ما بجهز فيهم الجرس ضرب ما اتحرك من مكاني سمعت حازم مشى على الباب وبعد شوية سامعاهو بتكلم مع حاتم وحنان بتصرخ وبتتكلم ما سمعت بقولو في شنو بعد شوية جاتني في المطبخ اتلفت عليها قالت لي ما في داعي للتعب دا انتي عروس المفروض تتهتمي بنفسك بس بجد نحن ثقلين الدخلنا عروس المطبخ وكمان مزاحمنها في شهر عسلها قلت ليها خلي الرغي دا وتعالي سلمي حضنا بعض وقلت لها تعبك راحة بس ما تتعودي وكل شوية تنطي لي وتنشبي في حلقي ضحكت وقالت لي امممم وعايذة منو ينشب ليك علقولك بكلماتك العجيبة دي قلت ليها عايذة سؤال كمان غمزت لي بطريقة درامية وقالت لي حلو الاعتراف طيب كيف عامل معاك حزومة قلت ليها عزراً حزومة في عينك يا حيوانة انا بس الادلعو فاهمة قالت لي والله الغيرة عاملة عمائل فيك قلت ليها مش المفروض ومشيت الهول لقيت حازم وحاتم قاعدين مع بعض سلمت على حاتم حنان وراي قالت ليهم فاتكم اعترافات خطيرة وخاصة لقلب حازم انا وحازم عايننا لبعض انا علطول ضحكت ومشيت المطبخ كنت عاملة عصير كوكتيل عملتو في 4 كبابي يعني ماهم يشربو ونحنا نتفرج عليهم قدمت ليهم وشلت كبابتي وماشة أقعد جنب حنان قالت لي اوعك تجي تضايقني أرض الله واسعة اقعدي جنب راجلك قلت ليها غلطانة انا الجاية اقعد جنبك (يالكشيبة ) 😂 قالت لي انا 😱 قلت ليها اي احسن زاتو أقعد جنب راجلي على الاقل اتنفس شوية من انفاسو من أقعد جنبك تجيبي لي كتمت نفس حاتم قالها تستاهلي عايذ تتفاصحي شاتو أم جبهتك بالله قومي لملميها وضحكو وهو وحازم مشيت قعدت جنب حازم وفعلاً حسيت اني بجد بتنفس لما شمست ريحت عطرو وهو مخلوط بريحة سجاير حسيت بقلبي صوتو مسموع للكل وخاصة لما حازم حت يدو ورا ضهري زي المتنظرني اخت راسي على كتفو وكم اتمنيت دا بس في حواجز كثيرة بينا بعد مسافة قمت ومعاي حنان جهزنا الغداء انا ما قدرت اكل بس كنت مشاركة في الونسة والاغلبها تحرش من حنان وعملت شاي وقهوة وحنان غسلت العدة وكانوا جابين معاهم شكلاتة ختيتها علي صحن ومعاها كيك كملنا ونسة وبعد خلصنا وانا وحنان روقنا المكان وبخرنا على المغرب كدا قالو ماشين وهم طالعين حنان قالت لي اوعي تضيعيهو من يدك ما في زول في الدنيا ح بحبك وبخاف عليك زيو وما تتسرعي وخليك واثقة منو لاخر شئ قالت لي دا براحة بحيث اخوانها ما يسمعو وطوالي طلعو طلعت العباية والطرحة واتوضيت وصليت قعدت في المصلاية كثير وانا بفكر قصدها شنو ولما ما لقيت اجابة مشيت اكمل الفلم بس حسيت حازم حركتو كثيرة يعني يدخل المطبخ ويرجع غرفتو وحسيتو ما على بعضنو يتبع.......👈👈👈