الفصل السادس
جِه يوم السفر كان يوم السبت بالليل علشان أبقى في القاهرة من بدري يوم الحد الصبح
قلت لأمي وأبويا إني رايح أدور على شغل مقلتلهمش إني رايح أسجّل أغاني
مش عايز خناق قبل ما أمشي
المرة دي مريم اتحركت معايا لحد الموقف
ودّعتها وركبت لتاني مرة رايح ومش عارف إيه ممكن يحصل
وصلت القاهرة
رُحت الوكيشن اللي بعتهولي على الواتساب
كان استوديو مش أحسن حاجة بس أحسن من ولا حاجة
دخلت لقيت الشخص اللي هناك مش هو نفس اللي كلّمني
سألت عليه عرفت إنه مش هنا أصلاً
وإن ده مش الاستوديو بتاعه وإنه بعتني أشتغل مع الشخص ده وإني مش هقابله أصلاً
المهم الموزّع اللي كان في الاستوديو ده كان اسمه يوسف، وشهرته "باستا"
قالّي: بص يا نجم مبدئيًا كده… اسم "أحمد" ماينفعش يبقى اسم رابر
لازم يبقى ليك اسم كاتشي يمسك في الودن… زي باقي الرابرز
ها في دماغك حاجة ولا أنا أنقّي لك
فكّرت شوية وقلت له:اسمي أحمد ومش هغيّره
قاللي: بكيفك يا نجم بس افتكر إني قولتلك
كمل وقال: تاني حاجة التسجيل اللي أقولهولك تعمله، واللي أكتبهولك تغنيه
قلتله: لا أنا بكتب بنفسي
قاللي وهو بيضحك: خلصانة يا فنان ورّيني إبداعاتك
وبدأت أسجل مع باستا
عملت أغنية واحدة
قالّي:دي كده موز اللوز يا صاحبي لو ضربت هنسجل غيرها
ولو عايز تسجّل غيرها دلوقتي عادي يا صاحبي كلو بحسابه
قلتله:لا كفاية دي هتنزلها إمتى
قاللي:وقتي يا صاحبي لو عايز
قلتله: نزلها وأنا هرجع البلد
قالّي:بلد إيه بس يا نجم مش هنكمل
قلتله:نزل دي بس وهبقى أشوف
الأغنية نزلت، وكانت بعنوان:"من العزبة لميامي"
قلت فيها كل حاجة جوا قلبي
رجعت تاني البلد وكانت مريم أول حد بيستقبلني
قالتلي: ها عملت إيه
قلت: سجلت والأغنية هتنزل خلال الأسبوع ده
قالتلي باستغراب:أغنية واحدة بس
رديت وأنا بقلّد باستا:طبعًا يا أُبلة ولو عايز أسجّل تاني كله بحسابه
ضحكت وقالت:بتتكلم كده ليه
قلت:لا مفيش أنا هروح أنام وبكره نتكلم