البارت 2
البارت 2
المجنونة والهيبة
ساعة كاملة بلسيارة الطريق متغير لان دا يبلطون الشوارع وسيطرات وشنو ومن وين بلموت يالة وصلنة للمنطقة الي امي تريدهة
منطقة حلوة هادئة بيتوهة حديثة ونص منهن قديمة بس كلش حلوات والنخل على طول الفرع وبلحدايق مال البيوت والاشجار والعصافير
گمر/الللللله شنو هل المنطقة
رهف/حلوة يمة شرح نسوي هسة
ام رهف/لحكي اختج الخبلة
رحت اركض بلمنطقة لانهة تخبل واكمز اجتني رهف جرتني من ياختي ورجعتني يم امي شلنة الجنط ومشينة ورة امي
امي تشمي وتاشر بايدهة
رهف بهمس/اكلج شبيهة امي
گمر بهمس/امي دا تحجي وية الاشباااح
رهف/ثول
گمر/واني شمدريني جاية تسئلني
وكفنة يم بيت شنو من جمال شنو من فخامة ضليت فاكة حلكي الباب شعلوووهة ولونهة اصفر والحدايد سود يم الباب حديقة تخبل صغيرة وبيهة ورد جوري وعين البزون وكلشي من انواع الورد مبينة انو قبل شوية اكو واحد راشهة ريحة التربة تخبللل البيت شكبره عين الباردة عليه بس كلش حلو ومبين جديد باوعت لامي مرتبكة معقولة امي متزوجة واحد غني لك هلة عدي ابو غني ههه اني خمس ملايين ولاشي بلنسبة الية هاها
رهف/تخبلتي
گمر/العفو ماحجي وية اصحاب التبكى الضعيفى
رهف/تبكى! يا تبكى انتي شدا تهذين
گمر/ولج اني بت غني لحظة انتي اختي ها ههههه يعني انتي هم خمس ملايين ولاشي بلنسبة الج
رهف/حبيبتي مصخنة شي
گمر/لا...اميي يلة شو محد فتح الباب
/منوو
گمر/انني
رهف/شششش
ام رهف/يا الله
گمر/ولج امي صارت صفرة شبيهة
حطيت الكبوس مال البلوز على راسي لان الشمس حركتني
طلع رجال يشبه امي وشعره ابيض طويل اسمر وملامحه مال واحد مصدوم
گمر بهمس/اكلج شنو هنا برنامج الصدمة
رهف بهمس/شوكت تنجبين ها
گمر/انتي نجبي بلاول
خالد/زينة؟!!!!!!
ام رهف/ااهئ خالد
لحظة امي دا تبجي ليش منو هذا خاااالد على اي اساس يخلي امي تبجي رحت وكفت يم امي وباوعت للرجال بنظرات قاتلة
خالد/زينة تعالي طبي
اجة شال جنطتي من الكاع حط ايده على ظهر امي وطببهة للبيت
ضلينة اني ورهف واكفات برة طلع النة من جديد
خالد/تعالن طبن خالو تعالن بناتي
يكلنة خالو لحظة هذا خااالي هااااا اسغفر الله واني جنت محسبة نفسي بنت تاجر
طبينة اني ورهف هاااي شنو هذا البيت يخبل قلعة مو بيت مصبوغ اصفر بس مو اصفر فاقع لا اصفر على ذهبي وجوزي رح اوصف الي اكدر اوصفه اول شي يم الباب على الجهة اليمنة حديقة تركض بيهة الخيالة ومرتبة وتخبل وبيهة نافورة اني خيلت على النافورة الة اروح اسبح بيهة واسويهة المهم من الجهة اليسرة كراج مال سيارات الي اخذت عيني سيارة حديثة تجنن لونهة اسود ومن الطراف ماطرة باحمر والطارمة شكبرهة لك اني وين داخلة بيتنة كله الي هناك كلة بي الحديقة ههه
نسيت امي والعالم والدنية وضليت صافنة على النافورة والله اسبح بيج واذا ما اسويهة مايطلع اسمي كمر هاشم هاهاهااااي
اجتي رهف جرتني ورحنة طبينة من المطبخ كافي تعبت عيوني من المناظر الحلوة مطبخ حلو والبيت حلو حبجي اريد النافورة
كعدونة بلكلدور
امي تبجي وهذا الرجال كعد كبالهة لامي ويباوعلهة
خالد/ها زينة شبيج
ام رهف/خالد ااهئ اخيتك لتردني
خالد/زينة شو تبجين ليش تبجين وينه هاشم ها
ام رهف/ااهئ خوية سامحوني
گمر/لحظة امي شدا تحجين منو الجماعة وشنو سامحوني على شنو
ام رهف/گمر هذا خالج خالد
گمر/خالد؟
خالد/هاي بتج
ام رهف/اي وهاي بتي الجبيرة رهف
خالد/تعالن باباتي يمي
اني من كلي باباتي كلبي صار يوجعني اخر مرة ابوية كلي بوية من جنت بلسادس ابتدائي مارحت يمه بس رهف شبكهة باس راسهة اني ضليت يم امي امسح دموعهة ماكدر ماتحمل اشوفهة تبجي روحي بيهة
بهاي الاثناء طلع واحد من الغرفة هم رجال بكصت خالي خالد بس اضعف منه ومشيب يمكن امي اخر العنقود لان هم كبار حيل
فرقد/زينة!!!!!
زينة/فررقد ااهئ خوية
كامت امي اله هو اجة شبكهة لامي كعدو بلكاع يبجون وااات اها هذا ابوية التاجر اي رجعت الخمس ملايين الي هية ولا شي بلنسبة الية
ام رهف/خوووية اااهئ
لا لا يا نبع الحنان شنو خوية شكم اخو عدج ابوية فين ياكماعة ابوية التاجر الي يطيني الخمس ملايين الي هنة ولا شي بلنسبة الية اني شبية شكلت صخوطة
فرقد/حبيبتي زيزو حبيبتي شتاقيتلج
زينة/والله حتى اني والله العظيم شتاقيتلك
فرقد/واخيرا شفتج
نزل رجال من فوك اييي هوا دا المطلوب بابا هنا بتسمت لان ما يشبه امي
جبار/شكو شنو هذا صوت البجي امي دا...زييييينة
امي كامت شافت الرجال راحتله شبكته هو ضل مصدوم حقك يا بابا ماما تاركتك 18 سنة علمود ابوية الثاني انت التاجر الي..اوكي خلاص
جبار/خيتي زينة
ام رهف/جبار خوية ااهئ
فرقد/جبار زينة رجعت من جديد حبيبتي زينة
خالد/شبكهة شبيك باهت بوجوهنة
عزة من شبك امي هو معضل واطول منهة كلت امي نعفصت بين اديه
فرقد/هاي الحلوة منو
گمر/اني اسمي گمر مو حلوة
فرقد/الله الله شوف السان تعالي يا گمر
خالي يتغزل بية عجبني الانحراف رحت شبكته ههه
خالي خالد اخذ امي وصعدهة ليفوك اجة الي اني عبالي ابوية التاجر شبكني وشالني مثل الطفلة ستحيت مووووت
بهاي الاثناء طبو ولد للبيت
خالي جبار ضل شابكنة اني ورهف اني الي اعرفه لازم يرفضونة لان امي شردت وية ابوية من جانو صغار شو حابينة وفرحانين بجيت امي
هذولة الي طبو تلث ولد كلهم نفس الطول وشباب يا امي كتير حلوين
بس خالي جبار احلاهم كلللش حلو
ام خالد/طلكتي يخايبة هاا
ام رهف/ااهئ يمة والله هو الي يسوي المشاكل والله العظيم
ام خالد/هسة انتي صرتي مطلقة وعدج نسوان ثنين بركبتج
ام رهف/يمة هذني النسوان صارن الية درع من ابوهن
خالد/اكيد هاي ام لسان صغيرة الگوم
ام رهف/اي والله هية الي دافعتلي
فرقد/صار خير خيتي لتحسبين نفسج مطلقة وصرتي وحدج وانتي هنا كاعدة نزل لا وميت لا احنة وياج وكلنة وياج اول الي طلكن اخر الي طلكن وهذا البيت بيتج وانتي حرة شتسوين سوي زين خيتي
ام رهف/يا بعد عيوني يا خوتي اسفة لان سويت بيكم الاذية من قبل والله جنت طفلة وطايشة سامحوني
الكل/مسامحة ولا يهمج
جبار/شوفي خيتي بناتج بناتنة ولتخافين عليهن ولا على نفسج اهم شي ترجعلنة زيزو ام الضحكة الحلوة
ام رهف/يا بعد اختك تسلم يا حبيب
كاعدة بغرفة حلوة وكلش حلوة بس وحدي بصفي غرفة رهف
الغرفة حارة حلوة ماثثة صغيرة بس تخبل كعدت على الفراش طلعت تلفوني من جيبي نمت على الفراش اخذت صور وكتبت اهلا ببيتي الجديد
نزعت جواريبي شلتهن وطلعت حافية البيت مرمر يلمع جبير بيت مال طاكين
طلعت شعري من جوة البلوز نزلت كذلتي على كصتي مسويتهة مثل الكورين احم اني اموت على كورية
/بسسس
لتفتت مالكيت احد معقولة اني اتوهم
/بسس ولج ام شعر
درت وجهي اشوف هذا نفس الولد الي طي قبل شوية
گمر/اني
كيان/اي اتي
لكيته كاعد على الدرج رحت يمه وكفت
كيان/كيان
كمر/كمر
كيان/عاشت الاسامي كمر اسم على مسمى
كمر/يعيش اصلك شكرا كيان
كيان/اني ابن خالج فرقد
كمر/اها هلو
كيان/ههه هلو انتي شكد عمرج
كمر/16 بعدلي سبوع واصير 17 بصف خامس عدادي
كيان/صغيرونة بس حليوة
كمر/مو حاس على نفسك دا تتغز بية
كيان/ههههه لا ولج شنو اتغزل بيج
كمر/اها يمكن اني غلطانة انت شكد عمرك
كيان/ 24 سنة كلية مهندسة معمارية
كمر/طول العمر ان شالله حلو اختصاصك
كيان/شكرا انتي اول وحدة تمدح اختصاصي
كمر/هههه لا عادي ااا كيان وين الحمام
كيان/بغرفتج اكو حمام
كمر/صدك؟! مانتبهت
كيان/وين اختج الحلوة
كمر/هاا رجعت تتغزل من جديد
كيان/هههههه ولج دا اشاقة
كمر/تلكاهة بلغرفة هذيج على ما اظن لان نسيت
كيان/مبين ناسية هذيج غرفة فيصل
كمر/فيصل؟ المهم وين الكة حمام عمي مغسلة اريد اغسل جواربي
كيان/هذاك حمام طبي غسليهن
كمر/هسة احنة يا طابق
كيان/الثاني شبيج فاقدة الذاكرة
اشرت لكيان ورحت للحمام غسلت رجلية وجواريبي حطيت مي على راسي شوية تنكع شعري حااااارة طكت روحي
نكعت بلوزي وطلعت
همام/گمر
كمر/العفو
همام/انتي مو كمر بت عمتي
كمر/اي العفو انت منو
همام/اني همام ابن خالج خالد
كمر/همام لو مطبخ هههههخخخ اسفة اسفة
همام/ما فهمت المهم ولج شو منكعة شعرج
كمر/حااارة
همام/خبلة لابسة بلوز بلصيف
كمر/هذا بلوز صيفي مو شتائي
سنان/هاج هاك وينهم الباقين
همام/شنو هاي ومنو الباقين
سنان/هاي موطة الجو حار وكيان واختج ولمى وينهم
كمر/انت منو
سنان/اني سنان اخو همام
باوعت لهمام مبتسملي بمعنى هذا اخوية
كمر/شنو ماكو بنات بلبيت بس ولد
سنان/عدنة لمى اخت فصيل و لجين اخت كنان بلمدرسة حاليا
كمر/واخت ماعدكم
همام/لا ماعدنة
كمر/اني اختكم
سنان/كولي والله
كمر/والله
همام/اختتتتي
كمر/ها ها يمعود شبيك
همام/فرحان باختي الجديدة
كعدت بلكاع فتحت علبة الموطة هم نصدومو اول شي بعدين اجو كعدو يمي
اجتي بنية عرفتهة هاي لمى حبابة وكلش حلوة تشبه عمو جبار اكيد لان هو ابوهة اجة كنان مغندب ياكل ويانة بلكاع ورهف وجهة احمر يمكن جي الدنية حارة لان هية مانازعة الشال لمى محجبة بس اني اليهودية الي بينهم
اجتي امي تمشي هية وخالي جبار يحجون يحاول يضحكهة شكد تمنيت عدي اخ يفرحني هيج بس عدي رهف عيع هه
باوعولنة خالي جبار كلهة لامي هاي صغيرة الگوم احلاهم
كمر/منو اني؟!
جبار/اي ولج حلوة وتشبهيني
كمر/شكرا خاللو
همام/عمي هاي اختي الجديدة
سنان/اختنة
ام رهف/الله يساعدكم
كنان/ام لسان
لمى/لا كمر حبابة
كمر/تسلمين حبي
رهف/لا عيني هاي جي هستوهة جاية باجر تشمروهة من الشباج
جبار/لا كمر هية حبابة
يتغزلون بية يا ربي هيهيهي ضميت وجهي بسد علبة الموطة خجلت
سنان/شعرج مبلل
كمر/اي هو اني ابلله
خالد/منو مبلل شعره
كمر/اني
خالد/مثلي يا ربي اني هسة رايح ابلل راسي
فرقد/هاي شدا تاكلون
رهف/خالو دا ناكل موطة
فرقد/لعد خلصت الميوزة نزلو بلمبطخ واكلو شعدكم هنا وبلكاع
كيان/بوية الكعدة تخبل
لمى/عمو تعال اكل مالتي شبعت
فرقد/لا حبيبتي ماريد
كمر/طينياهة
لمى/هاج حبي
حطيتهة فوك موطتي ضلو يضحكون علية
اخر شي كمت رحت سلمت على بيبيتي متت قهر مقعدة ما تكدر تمشي وجبيرة بلعمر بس حنونة واني اكول عليمن طالعين خوالي وامي عليهة لانهة حنونة وسوالفهة يخبلن مو مال عجايز مخرفات
كامت تحجي على امي لان متخليني اكص شعري
ام خالد/ولج زينة البنية رح تحصف كصيلهة شعرهة خطية
ام رهف/لا يمة خليهة شعرهة هم ستر وهم حلو عليهة
ام خالد/وانتي شبيج يخايبة تلبسين هيج
كمر/بيبي احب الملابس العراض
ام خالد/ليش صدرج جبير ومتردين يبين
عزززة شكالت بيبي خجلت هو صح ماكو احد بس خجلت حسيت عليهة من تتلمس صدري ياااا بيبييييييي شبسييج يمعووودة
ام رهف/شوف امي شدا تسوي
ام خالد/عفية بيج زينة من ربيتي بتج تفهم وواعية
ام رهف/والله يا يمة اني احجي الي شفته هية من شافت نفسهة كبرت وصارت بالغة كامت تستر نفسهة وتداري روحهة
ام خالد/عفية بيج يمة عفية بيج يا بيبي احنة نسمي البنية الهيج بنية مرباية ضلي رافعة راس امج
كمر/ان شالله بيبي
ام خالد/انتي ليش ما تزوجيهن ها
ام رهف/يمة خليهن بعاد عن الزواج احسن ماريد ااذيهن بلزواج من هسة قحط زواج
ام خالد/مو بكيفج انتي حياتج الزوجية ختارهة الله وصار وياج هيج بامر الله بناتج معليهن بيج وتدرين بتج المن تلوك
ام رهف/المن
ام خالد/كلشي بوكته حلو كومي بنيتي كومي روحي وية الباقين
حطت ايدهة على جتفي بيبي بعد ما اكعد يمج تحرشتي بية وتريدين تزوجيني اني الي شفته من ابوية خلاني اكره جميع انواع العلاقات
كمت يم الباقين ضلينة نضحك ونسولف واجتي لجين وصار اليل واحنة نضحك ونسولف صراحة نسيت الهم الي على كلبي دراستي ومروة وطلاك امي وابوية وضليت وياهم اضحك ونسة تخبل صارت الساعة بلوحدة اجة خالي جبار طففنة لان ثابرين البيت بصياحنة وهوستنة
اني جنت نايمة وهم يضحكون كوموني كلولي روحي لغرفنج نامي اليوم شكد طويل ومتعب رحت واني مغمضة واتجبح طبيت للغرفة طبكت الباب برجلي ماهنة جنطي وينهن مو مهم مو الة ابدل عود باجر اغير ملابسي
رحت للفراش جريت الحاف وتغطيت شو الفراش جبير شنو القصة ها هذة مو فراشي الي هناك بس اني حاسة بشي غريب ومادري شنو هو
الصبح 6:28
طبيت للبيت مكسر واخيرا رجعت طبكت باب المطبخ ورحت شربت مي من البراد فتحت الثلاجة اخذت بطل مي بارد من الصبح والدنية نار وبعدنة ماطابين تموز وهيج نار فتحت دكم الزي مالتي ختنكت
ماكو احد كاعد لعد امي وين كل مرة هية الي تفتحلي الباب خالاتي وينهن البيت جبير مابية حيل اروح افر المكان عليهم صعدت وصلت للطابق الثاني
/الوو
موئيد/الو فيصل صباح الخير
فيصل/صباح النور شبيك مود
موئيد/بس هيج ردت اطمن وصلت لو بعدك
فيصل/لا الحمد لله وصلت لتخاف انت وصلت
موئيد/اي وصلت توني
فيصل/لعد سد التلفون بيباي
موئيد/خوفتني يلة مع السلامة
سديت التلفون ورحت لغرفتي فتحت الباب وطبيت رحت للمراية حطيت مفاتيح البيت وسويج السيارة والمحفظة وتلفوني وساعتي على الميز نزعت
الزي مالتي بقيت بلبنطرون هواك ربي حارة شنو هل الحر همزين الغرفة باردة
باردة؟! منو مشغل السبلت لتفتت للورة السبلت مفتوح فراشي وحدة نايمة عليه منو هاي اسم الله
رحت يمهة بس شعرهة طالع ومغطية وجهة بللحاف على اي اساس خدامة تدخل لغرفتي شلت اللحاف عن وجهة وياريتني ما شلته جمدت بمكاني
هية فتحت عيونهة بت الاوادم ماخذة لون عيوني
كمر/اعوذ بلله منو انت وعلى اي اساس تطب لغرفتي
فيصل/غرفتج منين اجتي غرفتج ولج
كمر/لتكولج ولج زين وامشي اطلع برة لا اصيح خوالي عليك
لزمتهة من ملابسهة جريتهة يم وجهي خليتهة تصحصح
فيصل/اولا اني مو بكدج حتى تصيحين بوجهي ونصي صوتج لا اخفيه وثاني شي هذا بيت ابوية وهاي غرفتي اني انتي يا خدامة مكانج بلمطبخ فهمتي
كمر/انت منو اذا هذا بيت ابوك ف هذا بيت خالي واني مو خدامة فهمت وهد ملابسي
فيصل/خاالج!! يعني انتي بت زينة الشاردة من اهلهة
كمر/اسمع لك احترم نفسك زين واياك ثم اياك تحجي على امي
فيصل/للك مو لك اني اراويج وتحذريني
لزمني من شعري وكومني من الفراش وكعني بلكاع هذا الحقيييير
اني جسمي خدران من النوم ونشمرت بلكاع اعصابي تقلصن
كمر/يا بومة يا كلب
فيصل/كومي طلعي من الغرفة
كمر/طالعة وبعد ماطب لهاي الغرفة الخايسة
كمت من الكاع هو يحجي علية فتحت الباب طلعت وطبكتهة حيل
وخرت شعري عن وجهي اغبر هية غرفة مو كيلو ذهب صارن بوجهي تلث نسوان كبالي ها بعد انتن طرني من البيت عفتهن ورحت لغرفة رهف وعبالي غرفتي
طلعت من جديد مشيت لغرفتي واخيرا شنو من صباح اكشر
لكيت مروة داكة علية ابوية هماتين
ما حجيت وية اي احد طلعت الشاحنة مالتي يا ربي التقسيم ما يرهم على اي اي بلك هسة شلون اشحن تلفوني مابي خمسة وعشرين
سديته عام ورحت لجنتطي طلعت ملابسي حطيتهن بلكنتور اخذت منشفة وطبيت للحمام غسلت الحمام يجنن غربي وشرقي جميع الدول هه حسيت نفسي بشي مسلسل خوالي هم التجار الي عدهم خمس ملايين ولاشي بلنسبة الهم
غسلت وطلعت بلمنشفة وكفت كبال المراية
كمر/الله عود صايرة حلوة بيضة وجسمي يجنن فديت نفسي اني شدا احجي وثول
رحت لبست تراك مال Nike لونه سمائي وبي وردي القميص الفوك عريض والبجامة عادية اخذت مشطي وقراصتي ورحت لغرفة بيبي اريد امي تظفرلي شعري وعرفت امي نامت يم بيبي ولنص اليل ضلت تبجي هية وبيبي
لكيت امي نايمة وبيبي كاعدة تسبح رحت بستهة من راسهة كلتلي كعدي اني اظفرلج ظفيرة هندية
كعدت يم رجليهة وطيتهة ظهري بدت تمشطري شعري دمغتني بلمشط لان مبلل وما منشفته
شوية ونفتحت الباب طب واحد لابس زي عسكري بس بنطرون عسكري والقسم الفوك فالنية عززة هذا شلون يطلع هيج لحظة هذا نفس الي تعاركت وياه الصبح مال الضربة اجة يكمل العركة يم بيبي
فيصل/السلام عليكم
ام خالد/وعليييييكم السلام هلة هلة بلحبيب هلة يمة واخيرا اجيت يابعد طولي
فيصل/شلونج يمة ان شالله مابيج شي
ام خالد/الحمد لله يمة حبيب شوكت اجيت غير تاخبر ابوك وتكله حتى نجهز اغراضك وغرفتك
فيصل/لا يمة ما يحتاج شنو اني قابل خطار حتى تتجهزون
ام خالد/فدوة لهل الحك الي طلع درر
يطلع سم شو انتي يا بيبي ذبيتي لحم علموده تراه مخبله والله وقليل احترام واغبر
ظهري نكع من شعري وبيبي تسولف وية المجنون
بيبي كلتله هاي عمتك ام رهف اجتني هو باوع لامي بطرف عين ودار وجه كلتله هاي الحلوة بت عمتك ولا باوعلي حقير شبينة حتى ما تباوعلنة
بدت بيبي تظفرلي شعري مدري شبية اذاني كبن نار ظهري نكع من اخلص اكوم اغير التراك
هو ضل يسولف وية بيبي
اخر شي خلصت كمت وخرت الشعر الواكع من على ظهري
فيصل/يلة يمة اني اكوم ارتاح فدشوية نرجع نحجي
ام خالد/ماشي يمة روح نام نوم العوافي ومن تصحة تعال نسولف مشتاقتلك هواي
فيصل/ان شالله
نص عليهة باس راسهة
اني دا اكلع حجت بيبي
ام خالد/يمة گمر روحي بدلي تراكج وهماتين ملابسج الداخلية لان تبللن
فتحت عيوني واني اباوع على الباب حطيت ايدي على ظهري لتفتت للورة اشوف هذا يباوعلي بقرف عزززززززة هو وراية وبيبي وكلامهة فتحت الباب وطفرت للغرفة
رحت للكنتور نزعت ملابسي واني ابجي يافشلة الفشللللله يبووووو ركعت التراك بلكاع لبست واحد ثاني
طلعت ليبرة شفت بيبي كاعدة بلعربانة رحت يمهة خلتني اتعرف على نسوان خوالي البارحة جانن يم اهلهن تلاثتهن خوات وحلوات وحبابات يصير بنات خالت امي نزلنة بيبي للمطبخ
..... يتبع