بحاول أصالح 🫂🥹
فتحت الظرف، لقت صورة لعمرو مع بنت شيك جدًا... وفيه ضحكة بينهم مش عادية.
حياه (بينها وبين نفسها):
“مين دي؟ وليه الصورة في جيبه؟ طب ليه ما قالش؟
رمت الصورة، لكنها معرفتش تنام طول الليل. تاني يوم، قررت تراقب تصرفاته...
في نفس الوقت، كانت في الكلية بتواجه ضغط شديد في مشروع بحث مهم، والدكتورة طلبت منهم يشتغلوا في فرق.
الصدمة إن حياه اتقسمت في الفريق مع واحدة اسمها (داليا)...
وداليا دي... أول ما شافت حياه قالت لها بهدوء
أنتي مرات الدكتور عمرو، مش كده؟
حياه باستغراب:
– آه، حضرتك تعرفيه؟
داليا بابتسامة باهتة:
– نعرف بعض من زمان... قوي.
الكلمة دي وقفت قلب حياه. ومخها لف...
“هل هي البنت اللي في الصورة؟ طب ليه بتتكلم بالأسلوب ده؟”
في البيت بالليل...
حياه (بحذر):
– عمرو، هو أنت تعرف واحدة اسمها داليا؟
عمرو (متوتر وبيحاول يخبي):
– داليا؟ آه كنا زمايل في الجامعة... ليه؟
حياه (بهدوء):
– مفيش... هي في فريقي في المشروع.
عمرو سكت... لكن ملامحه قالت كتير.
ولأول مرة، حياه تشوفه مش قادر يبص في عينيها.
وفي الأيام اللي بعدها، داليا بدأت تحاول تقرب من حياه، وتتكلم بذكريات سطحية...
لكن في مرة قالت كلمة قلبت كل الموازين:
– على فكرة، عمرو كان أول حب ليا، يمكن لسه جوايا ليه مشاعر... بس واضح إنك كسبتيه.
وابتسمت ومشيت.
حياه كانت هتنهار، بس مسكت نفسها، راحت البيت، مسكت الصورة اللي كانت في الظرف، وقامت دخلت الأوضة.
– عمرو، لازم نتكلم.
– عن إيه؟
– عن ماضيك... وعن داليا.
سكت... وقال لها:
– أنا آسف... كان لازم أقولك. هي كانت خطيبتي قبل ما أعرفك، بس الموضوع انتهى من زمان.
– وانتهى فعلًا؟ ولا الصورة دي من قريب؟
– دي قديمة، والله قديمة... بس مش قادر أرميها، مش عشان بحبها، بس كانت فترة صعبة في حياتي.
حياه دموعها نزلت، بس بصت له وقالت:
– بص، أنا مش ضد إن ليك ماضي... بس ضد إنك تسيبه يهدّ اللي بينا.
عمرو قرب منها، وقال:والله ما في قلبي غيرك، بس يمكن كنت خايف أتكلم علشان ما تزعليش.
– وأنا محتاجة تكون صريح... الصراحة مش بتخوفني، الكتمان هو اللي بيكسر.
هنا نوقف على نقطة حرجة:
هل حياه هتقدر تثق فيه تاني؟
وهل داليا هتستسلم بسهولة؟
ولا هنشوف تصرفات منها ممكن تهد البيت؟ 😔
"الفصل صغير لكن مشغوله الفتره دي إن شاء الله هنزل الباقي قريبا 💗
انتظروا وشجعوني بكومنتات حلوه وكتير بقا 🙈
بقلم الكاتبه....أسماء محمد
مستنيه رأيكوا ⭐ ✨ "