الفصل 4
الجزء الثاني..
الفصل الثاني
=-=-=-=-=-=
يوم الخميس..
مجد: شوفي خلودوو والله ان ما وقفتي مكانج بعفد عليج وبضربج بإيدي المجبسة
خلود: خيبه خيبه.. مجرمة بنت خالي وانا مادي..
مجد: تعالي اقول لج..
خلود وهي تحط ايدها على خصرها وتهزه: واذا ماييت شو بتسوين؟؟
مجد وهي ترص على اسنانها وهي ترمس: افففففففففف لا تقهرينييييييييييييي.. بذبحج بذبحج..
دش عبدالعزيز وشاف مجد واقفه في طرف من الصالة وخلود في الطرف الثاني ومحتشرات.. : شفيكن؟
مجد: ابا اذبحها..
خلود: شفت خالي بنتك كيف مجرمة.. تبا تذبحني..
عبدالعزيز وهو يضحك..: هههه وليش تبين تذبحينها؟؟
مجد: هي تعرف ليش.. ؟؟ تعالي هني..
عبدالعزيز: الله لا يحرمني من هالضحكة ان شاء الله... احين مرتاح قلبي يوم اشوفج مستانسه من بعد زواج حور كنت خايف ان زواجها يأثر عليج..
مجد: هو مأثر مأثر.. والدليل ايدي .. خخخخخ
خلود: لا مايخصه.. اصلا من حوباتج ايدج جي استوابها..
وراح عنهن عبدالعزيز وكانت خلود تتطالع خالها ومب منتبهه الا تفز بضربه على ظهرها..: والخييييييييييبه.. كسرتي ظهري..
مجد: هاولا شي..
خلود وهي تبوس راس مجد: خلاص سامحيني ممكن عمتي..
مجد وهي شاقه الحلج.. : هيه خلاص سامحتج.. خخخخ..
وراحوا صوب الغرفه يقعدون فيها على راحتهم ويسولفون..
خلود: اقول مجوود دافنشي.. مارسمتي صورتي ؟؟
مجد: ها.. صورتج؟؟ هيه بديت فيها يبالها يومين بس وبخلصها..
خلود: مجوووووود لا تمصخرين.. مايسوى علي كل ها صورة.. لو اسير القرية العالمية واعطيها للرسام بيرسمها في نص ساعه
مجد: ايه انتي تبين ارسمج خليني على راحتي.. اتشبهني برسام القرية العالمية.. انا مجد بنت عبدالعزيز اتشبهيني برسام القرية العالمية.. خبلة انتي..
خلود: هههههههه.. خلاص عيل بنعيش وبنشوف شو بتسوين.. الا تعالي.. أحمدوو ماله حس هاليومين مامر صوب بيتكم؟؟
مجد: انتي خبله ولا متخبله.. ؟؟ اصلا هو متى يمر صوبنا عشان ايي هاليومين؟
خلود: لا ترا من عرست حور وهو ياكم.. نسيتي منو وداج المستشفى؟؟ ويوم خالي حميد يانا... ويوم الثلاث ودانا السنتر..
مجد: وخير. يعني لازم ايينا كل يوم؟؟
خلود: انتي ليش جي كارهتنه.. احسج اكثر عني انا كارهته.. انا خلاص تعودت عليه.. هو طيب بس حركاته ماحبيتها وهو حر في النهاية
مجد وهي معصبه ومتنرفزه: لا .. مب حر.. مايدري ان وراه اهل.. ماحشمنا بين العرب تبيني ماكرهه بعد..
خلود: بل بل.. شقى مكبره السالفة هذي.. هدي يابنت الناس هدي.. مايسوى عليج..
مجد وهي تصد الصوب الثاني وعاقدة حياتها..: دخيلج خلود غيري السالفة لأن طاري هالإنسان تييب لي الجلطة..
خلود: بسم الله عليج.. المهم خلنا نسولف في شي ثاني
وقعدت خلود تسولف لمجد عن الجامعه وشوي شوي .. نست مجد الموضوع وبدت هي الثانية تسولف عن الكلية وعجايبها..
....
حور: اخبرك عبيد انت خذت الساعه وين حطيتها يوم عطيتها لك؟
عبيد وهو يتعطر: عالتسريحة..
حور: بس مب موجودة..
عبيد : دوري عدل بتشوفينها
حور: انا مادور على خيط انزين.. الا هي ساعه كبيره يعني تنشاف..
عبيد وهو يضحك بخبث: هيه صدق رديتها في العلبة مالتها..
حور: يا الله... يقولي تسريحة واحين العلبة..
وسارت حور صوب الشنطة وطلعت العلبة ويوم فتحتها تفاجئت وفجت عيونها وعبيد يراقبها ويضحك.. رفعت راسها صوب عبيد وهي تضحك: فدييييييييييتك والله انها روووووعه روووووووعه ..
عبيد وهو يقرب منها ويمسك العلبة ويطلع الساعه ويحط العلبه على السرير ويمسك إيدها ويلبسها الساعه ومن عقبها رفع ايدها وباسها.. وهي محمره من الخجل..
حور: الله لا يخليني منك..
عبيد: انتي تسوين الدنيا ومافيها بعيني يا حور..
حور: بس عبيد هاي الساعه مبين عليها وايد غالية ...
عبيد: شو يعني.. تراها ماتغلى عليج.. ومافي شي يسوى غلاتج اصلا..
حور ماقدرت تحمل ورمت نفسها في حضنه وتمت تصيح من الفرحه وهو يمسح على راسها..
عبيد: شو بتمين اتصيحين؟؟.. ما تبين نظهر..
وهي تنش وتمسح دموعها بسرعه..: لا لا بنسير..
عبيد: هههههههههه فديتج.. يالله لا تأخرين اترياج..
حور: ثواني بتجهز وبخلص..
وراح عبيد الصاله يترياها لين ماتييه... وحور قعدت تتلبس.. لبست لها تنورة بيضا طويله وبودي هاي نك أبيض ووردي.. وبالطو وردي طويل واسكارف ابيض.. وتجحلت وحطت الغلوز الوردي الفاتح.. وتوها فتحت العطر بتعطر.. تذكرت ان عبيد مايرضى.. ردته مكانه وشلت شنطتها وطلعت له الصالة..
حور: يلا حبيبي انا جاهزه..
عبيد: الله يعيني اليوم كيف بقدر اصبر عن جمالج..
حور: ههههههههههههه
....
في بيت جاسم..
جاسم يتيم الأب.. توفى ابوه بمرض خبيث( بسم الله عليكم) وهو كان عمره 12 سنة.. وهالشي أثر عليه.. بس اعمامه ماقصروا وياه ابد.. خصوصا ابو خلود... وهذا الي خلاها تتعلق فيه زياده لأنه كان دوم في بيتهم .. وقعداتهم ويا بعض.. بس الفتره الأخيره يوم دخلت خلود الجامعه وهو انشغل بالدراسه .. ماصارت قعداتهم شرات قبل.. صاروا يستحون من بعض وايد.. أم جاسم حرمه طيبه وعلى نياتها.. .وتصدق كل شي تسمعه.. حصه.. عنده اختين اصغر عنه.. وحده عمرها 17 سنه )فاطمه... ومنى عمرها 15 سنه.. فاطمه ومنى دوم ويا بعض.. ويحبون بعض.. ويحبون جاسم وايد.. لأنه وايد يهتم فيهم.. رغم انه اكبر عنهم ... هو اكبر من فاطمه بـ 6 سنين ومن منى بـ 8 سنين.. بس يحاول يعطيهم كل اهتمامه وحبه ومايقصر عليهم بشي.. فاطمه معظم وقتها تقضيه على النت.. اما منى فماعندها هالإهتمام وايد.. ماتحب الكمبيوتر... عكس اختها.. منى لها اهتمامات شعريه أكثر.. وهالي مميزنها..
فاطمه: اااااااااه منوووووي تعالي شوفي هالحلاة .. ماقدر والله بتخبل..
منى وهي تصد صوبها بعدم اهتمام: مابا اشوف شي .. خليني ياسه اكتب قصيدة يديدة..
فاطمه: انتي ويا هالكلام الفاضي الي تكتبينه.. اخبرج تعالي شوفيه انتي بس .. والله انه غاوي...
نشت منى وهي تمشي بهيازه صوبها: خل اشوف هذا الي مطير عقلج.. ولو انه مب اول واحد طير لج عقلج..
فاطمه وهي تفتح الصفحة وتراويها صورة فزاع...
منى: انتي ماعندج سالفه.. الله يخلي له جماله بس مب لدرجه اني اتفداه واذبح عمري عشانه...
فاطمة: انتي ماتفهمين فالحب والرومانسيه..
منى: هههههههه.. تقول مافهم اونه.. انا كلي احساس ورومانسيه ولا من وين يظهر الكلام الحلو الي عندي اياه..
فاطمه: خلج في احاسيسج وخلني في احاسيسي..
وقعدت فطوم تيمع الصور من النت وتحطهم في فولدر خاص.. وصل لها مسج في نفس الوقت.. فتحت المسج تقراه..
(حبيبتي وينج من يومين وانا اتصل وانتي ماتردين شو صاير.. مشتاق لج)
ارتبكت فاطمه وشلت التليفون وتمت تتطالع وراها اذا كانت منى وراها او لا.. وشلت التليفون وكتبت المسج
(شوي حشره عندي هاليومين من احصل فرصه بتصل.. انا بعد ولهانه عليك موووت)
منى: منو مطرش مسج؟
فاطمه: ها.. عن اللقافه تليفوني ولا تليفونج..
منى: ههههههه... احب اغيض فيج تدرين هوايتي..
فاطمه: خلج في جوج وخليني في جوي الجميل..
دش عليهم جاسم الي من شافته فاطمه من الزيغه بندت الصفحة الي يدامها وشلت التليفون..
جاسم: شوفيج اخترعتي؟؟
فاطمه: هاا.. ماشي بس فجأة فتحت الباب .. شوي شوي..
جاسم: ههههههه.. اشحالكم؟؟
منى: بخير.. اقول جاسم اقرا هالقصيدة وشوف شو رايك فيها؟؟
جاسم: انتي يبالج انطلع لج ديوان.. لأن قصايدج دوم حلوة..
منى: فدييت اخوي الي يشجعني.. مب اختي.. كله تحبط احاسيسي..
جاسم: هههههههه.. انزين انتي عطيني وبقراهن اليوم وبعطيج رايي.. بس بالأول بغيت اسألكم عن شي..
فاطمه: خير؟؟
جاسم: بنت عمكم خلود شفتها أمسات في مركز ابن بطوطه .. كانت هيه وولد خالها وعلوو وبنيه ثانيه ماعرفتها؟؟ أحمد عنده اخت جي على عمر خلود؟؟
منى: لا ماعنده غير مروه..
فاطمه وهي تغمز لأخوها : ليش عايبتنك البنت يعني؟؟
جاسم: سيري لا.. انا تدرين اني احب بنت عمي.. بس يعني شفت وحده غريبه وياهم من جي أسأل..
منى: اتوقع تكون اخت الي سرنا عرسها من اسبوع.. عرس اخو احمد.. لأن يومها خلود كانت طول الوقت ويا هالبنت..
جاسم : أهاااا..
فاطمة: أقول جاسم دامك تحب بنت عمي.. وطبعا هي تحــ... (سكتت في هالوقت)...
جاسم: بلاج قطعتي قولي تحبني ليش مستحية..
منى: انتي غبيه البنت قالت لج ماتبا جاسم يعرف..
جاسم وهو يضحك: ههههههه ليش ماتباني اعرف؟؟
فاطمة: لآنها تخاف تنصدم وتعرف انك ماتباها ولا شي..
جاسم: وانتوا اكيد قلتوا لها لاااااااا.. جاسم يمووووووت عليج..
منى: لا ماقلنا لها.. ولاشي.. خلها تعرف هالشي منك احلى..
فاطمه: هيه وانا بعد اقول جي..
جاسم: يا سبحان الله .. اول مره تتفقون على شي.. بالعادة تتنافسون في كل شي..
منى: ههههههههه.. عشان تعرف ان الدم واحد..
فاطمة: انزين خل اكمل.. ليش ماتخطبها دامك تحبها؟؟ تراك تشتغل وما عليك قصور..
جاسم: ومنو قال اني انا مافكرت بهالموضوع... لا حبيبتي فكرت وبرمس امي اليوم او باجر بالموضوع..
منى وفاطمه: لا اليوم اليوم اليوم..
جاسم: ههههههه شو رايكم الحين الحين الحين..
ربعوا قبل جاسم صوب امهم يزقرونها.. وقتها وصل مسج على تليفون فاطمة.. وكان طايح على الأرض.. سار جاسم صوب التليفون وشله من على الأرض وكان بيفتح المسج .. بس تردد.. مب حلوه اكيد وحده من رباعتها وبتزعل لو فتحت المسج..
وطلع من الغرفه ودش الميلس ونادى على فاطمة الي من شافت التليفون في ايده تيبست مكانها ..
يبتسم لها جاسم: وصل لج مسج توه..
ربعت فاطمه وسحبت التليفون واحمدت ربها انه مافتح المسج..
ام جاسم (حصه): هلا بولدي.. شو هالخبر الزين الي اسمعه؟؟
جاسم: لحقوا يخبرونج؟؟.. ماشاء الله عليهم.. انزين شو رايج اميه؟
حصه: والله يا جاسم يا ولدي لو تدور الدنيا احسن من بنت عمك مابتلقى لك... فأكيد موافقه وماعندي مانع اميه الله يوفقك ان شاء الله..
استانس جاسم وباس راس امه..: ومتى ان شاء الله بتروحين لهم؟؟
حصه: انا اليوم الفليل ناويه امر على شيخه اسلم عليها.. وبرمسها بالموضوع..
منى: بيي وياج امي..
حصه: عيب انتوا خلكن هني.. وجاسم بيتم وياكن.. لأني ابا ارمس عمتكن على راحتي..
فاطمه: جاسم بهالمناسبه اعزمنا على العشا برع؟؟
جاسم اطالعهم وأشر على عيونه: من عيووووني..
منى وهي تغمض عيونها وتهز راسها وهي مبتسمه: تسلم لي عيونك يارب..
......
خلود: اخبرج مجوود ترا انا لازم ارد البيت.. واباج تيين وياي وتباتين الليله عندي.. شو كل يوم انا ابات عندج.. شو انتي ماتنزلين اتيين بيتنا ولا شو
مجد: خيبه خيبه.. كلتيني.. قولي تعالي بيتنا وخلاص.. بعد ليش ماتنزلين ومادري شو..
خلود: ههههه.. انزين يلا سيري قولي لأبوج واستأذني منه... وانا بتصل في ابوي عشان يردنا..
مجد : أووووووووووكي
طلعت مجد من الغرفه وهي تلف شعرها وترفعه عفوق .. جان يطيح المقبض من ايدها .. واتدحرج على الدري.. ربعت وراه ونزلت تاخذ المقبض وانسدل شعرها على جتفها وشوي منه على الأرض وهي موخية.. رفعت راسها وهي حاسه بوجود شخص يراقبها.. رفعت راسها شافت عيون ماتوقعت انها تشوفها بهالحاله بالمره.. شلت عمرها وربعت على الدري بسرعه صوب غرفتها وقلبها يدق من الخوف.. دخلت الغرفه وبندت الباب وساندت ظهرها على الباب..
خلود: شوفيج جنه الا حرامي ملاحقنج..
مجد وهي تتنفس بسرعه .. ومحمره: ابوي.. بيذبحني..
خلود: ليش؟؟ بس عشان بتيين بيتنا
مجد: لاااااااا... ولد خالج الي مادانيه ياينا.. وانا مادري انه في الصالة.. وكنت نازله جيه.. عاد ابوي الشراره تطلع من عينه يوم شافني نازله جيه.. ميته خوف بيذبحني.. سيري بيتكم انا مابيي ماتجرأ اطلب منه..
خلود: ههههههههه... الله يعينج عيل..جاك الموت ياتارك الصلاة..
مجد: بس عاد.. متفيجة انتي..
الا سمعت صوت دق الباب... فجت عيونها مجد على الآخر وقلبها في ريولها من الخوف..: بسير انخش في الحمام..
خلود: ايه تعالي بتوهقيني مافيني..
مجد: اخاف احسه بيكفخني بيعدمني شي بيسوي بي..
خلود: هيه اذا مافتحتي الباب بيسوي كل ها.. مب عشان نزلتي يلا فتحي الباب بلا مصاخه..
فتحت مجد الباب وهي ترتعد من الخوف.. من شافت ابوها بلعت ريجها ونزلت راسها..
عبدالعزيز: انتي محد قالج ان احمد تحت ؟
مجد: مـ.. مــ.. ممما كنت اعرف.. ممحد قالي..
عبدالعزيز: بلاج خايفه جي مابسوي بج شي.. سيري المطبخ سوي عصير .. لأن امج سايره بيت الجيران ولحين ماردت..
مجد: ان شاء الله... ابوي احمد ليش ياي؟
عبدالعزيز: انا قلت له اييني بغيته في شغله..
مجد: اهااا.. خلاص احين ببدل ثيابي وبنزل اسوي العصير..
عبدالعزيز: عفيه عبنتي..
خلود: خالي..
عبدالعزيز: نعم بنتي..
خلود: خالي ممكن مجد اتيي وياي البيت اليوم وتبات عندي ترا كل يوم انا طايحة عندكم وهي ماتيي صوبنا..
عبدالعزيز: خلاص مب مشكلة..
استانست مجد من الخاطر من بندت الباب حضنت خلود وقعدوا يناقزون..
خلود: اخبرج سيري سوي العصير.. قبل لا يغير رايه ابوج..
مجد: اوه صدق نسيت..
وراحت مجد بدلت ونزلت تحت وخطفت من الصالة الي هم قاعدين فيها : السلام عليكم
أحمد وهو منزل راسه: وعليكم السلام
ومشت صوب المطبخ وقعدت تسوي العصير.. وهي تحرك العصير عشان تذوب السكر... تذكرت الدكتور وهو يحرك عجينة الجبس.. ضحكت.. يوم السبت بشوفه.. ياي وناسه..
وجهزت العصير ودته على الطاوله المتحركة الصغيره صوب ابوها واحمد..
أحمد: تسلم ايديج بنت العم...
مجد من ورا خاطر..: الله يسلمك..
وخطفت عنهم وصعدت فوق..
وتوها على الدري..
عبدالعزيز: اخبرج قولي لخلود تزهب عشان احمد بيوصلكم..
مجد لا إراديا: شووو.. احمد بيوصلنا.. (انتبهت لعمرها) ها اوكي.. بس خل ارمس امي ..
عبدالعزيز: امج بتأخر شكلها خليها انا برمسها.. ماعليج.. بس لا تحيرين على ولد عمج عشان يوصلكم
مجد هزت راسها وسارت فوق.. ودخلت الغرفه: افففففففففف.. احين شو هالنحاسه الأخ أحمد بيوصلنا..
خلود: اشعليج انتي المهم حد يودينا..
مجد: انزين ...
وفتحت الكبت مجد جان تشوف تليفونها الجديم.. طلعته وحطت بطاقتها فيه..
خلود: شو تسوين؟
مجد: ابا اشوف شي من زمان ماشفته.. تولهت على ذيج الأيام
خلود: اي ايام؟
مجد: الثانويه.. هههههه.. شوفي مسج اتصالات يوم خبروني بالنسبة الحلوة.. بعدني محتفظة فيه..
خلود شلت التليفون وقعدت تشوف المسج ..
خلود: وييييه انا مسحته ولا احتفظت فيه..
مجد: بالعكس انا وايد اشيا عندي محتفظة فيها مال ايام الطفوله والدراسه.. انزين يلا خل نجهز عن ابوي يحرج علي عشانه.. لني ناقمتنه مادانيه..
خلود: هههههه انا جاهزه..
وشوي تجهزوا سوا.. وطلعوا من الغرفه عشان يروحون ويا احمد.. الي من شافهم نش وسلم على عمه وطلع من الميلس وركب الموتر يترياهم.. كانو طبعا متغشيات وسلموا على ابوهم وعلى طلعتهم شافت مجد امها داخله .. استئذنت منها وراحت.. ويدتهم في هاليوم كانت في بيت حميد عند ولدها الثاني..
ركبوا الموتر ورا طبعا .. بدون لا ينطقون بأي كلمة..
احمد:اشحالكم؟
خلود: الحمد لله انت اشحالك؟
احمد: بخير يسرج حالي..
وتم ساكت طول الدرب.. ومجد ولا ردت عليه.. تحس كارهته وايد.. اما هو فكل شوي اتيي في باله صورة مجد وهي نازله من الدري بلبسها وشعرها الطويل.. ويتنهد كل ما يذكر الموقف.. أول ماشافها انبهر بها.. ونزل راسه لأن عمه كان وياه.. من وصلوا البيت ..
خلود: مشكووور يزاك الله ألف خير..
أحمد يبتسم غصبن عنه: العفوو.. ساعات احسج شرات يدو من رمستج..
خلود: هههههه.. انزين مابتنزل اتسلم على اميه.؟
أحمد: لا مستعيل لأن ربعي يتريوني فالكوفي.. مره ثانيه ان شاء الله .. سلمي عليها وايد..
مجد وهي تحرطم: ربعك ولا ربيعتك..
حس احمد ان مجد قالت شي.. صد عورى وهي نزلت وبندت الباب.. حزت فخاطره على معاملتها له.. انزين انا ريال كيفي اتصرف بالطريقه الي اباها.. مب نشادة عني عشان تحاسبني على الي قاعد اسويه.. ولا اني كنت وياها وخنتها.. افففففف انتي من دخلتي حياتي وجلبتيها .. وتأفف وحرك الموتر من عند البيت سار صوب ربعه..
دخلت خلود من شافت مرت عمها استغربت..
مجد: منو هاي؟
خلود: مرت عمي.. ام جاسم..
تقربوا منها وسلموا عليها.. وساروا الغرفه...
حصه: ها ياشيخة ماقلتي لي رايج؟؟
شيخه: والله يا حصه مايبالها رمسه.. ولدج ريال ماينعاب بشي ماشاء الله عليه.. برمس ابوها وبنشاور البنت ان شاء الله وبنرد عليج..
حصه: لا تحيرين علي عاد لأن ولدي حده مستعيل..
شيخة: ماعليج كله خير..
حصه: الا منو هالبنت الي كانت ويا خلود؟
شيخة: هذي بنت اخوي عبدالعزيز..
حصه: ماشاء الله .. احيدها مره شفتها يوم صغيره.. بعد ماشفتها..
شيخه: هيه ماشاء الله عليها كبرت وحلوت.. اه بس لو عندي ولد على كبرها جان خطبتها..
حصه: هيه مبين عليها بنت والنعم فيها..
شيخه: الا ماشربتي العصير يا ام جاسم؟؟
حصه: تسلمين..
وقعدوا يسولفون..
خلود ومجد في الغرفه..
خلود: اموووووت واعرف مرت عمي ليش يايه بدون بناتها بالعادة لازم يكونن نشمية وهلاله وياها...
مجد وهي تضحك: ههههههه منو نشمية وهلاله..
خلود: ههه صدق ماتعرفين... هاييل سلمج الله بناتها.. فطوم ومنايه...
مجد: هييييييييه... ماحصل لي الشرف اتعرف عليهم..
خلود: ماعليج لاحقة وبتعرفين عليهم وبتطفرين منهم بعد..
مجد: هههه..
#13
خلود: شوفي انا بسير اسبح.. وانتي سيري اتصوخي شوفي شو السالفة؟؟
مجد: شو قالولج خلود انا.. روحي ماعندي هالسوالف انا..
خلود: هيييييييه غلطت علي البنت.. ماعليه بطوفها هالمره لأني مستعيله ابا اسبح..
ودخلت خلود عشان تسبح .. وسارت مجد طلعت رسمة خلود عشان تكملها لأن كان باقي لها تشطيبات بسيطه.. وخلود من طبعها حزة السبوح تتأخر وايد.. وبعد 34 دقيقه ظهرت خلود وشافت الغرفه فاضيه.. وهي تنشف شعرها شافت ورقه على السرير.. تقربت من الورقه.. وصرخت.. : مجووووووووووووووووووووووو وووووووووووووووووود
دخلت مجد ومعاها امها..
شيخة: خير امي شفيج؟؟
خلود وهي مستانسه من الخاطر.. امييييييه شوفي مجد راسمتني.. فديتني ماتوقعت اني بهالحلاة؟...
ومجد تضحك من الخاطر..
خلود سارت صوب مجد حضنتها: فديتج والله فاجئتيني وايد ماتوقعت تطلع رسمتي احلى عني..
مجد: انتي الحلا كله اصلا..
شلت شيخة الرسمة وقعدت تتطالعها.. ضابطة الملامح وايد الصراحة ورهيبه الرسمه ومرتبه من الخاطر
شيخة: ماشاء الله عليج يا مجد رسمج وايد حلو
مجد: مشكورة عمووو..
وقعدوا من عقب يسولوفون.. وبدت شيخة ترمس بالموضوع لخلود بوجود مجد..
شيخة: خلود يابنتي تدرين ليش مرت عمج يايتنا اليوم؟
بدت الشكوك تسري في بالها.. وتحاول تضحك بس ميوده عمرها: ليش؟؟
شيخه: اليوم يتني مرت عمج وخطبتج لجاسم ولدها.. وقلت لها لازم اشاور البنت وابوها..
خلود شوي وبطير من الفرحه مب قادره تصدق الي تسمعه ومجد حاسه بفرحتها.. ودها تقول لعمتها ان خلود مواااااافقه.. بس سكتت عشان ماتحس شيخة بشي..
خلود: اميه انتي شاوري ابوي والي يامر عليه ابوي انا ماعندي مانع
شيخه: وانا متأكدة ان ابوج ماعنده مانع لأن جاسم رابي تحت ايديه.. الله يوفقج بالي فيه الخير يا بنتي..
ونشت خلود ونشت وراها مجد.. ودخلوا الغرفه وكانت تدمع خلود وقتها.. صدت صوبها مجد مستغربه؟؟: شوفيج؟؟ ليش الصياح.. المفروض تستانسين.. ؟
خلود: من فرحتي يا مجد والله من فرحتي... حلم كنت احلم به من فتره واليوم بدت بشاير الخير بتحقيق هالحلم..
مجد: الله يرزقج على قد نيتج يا بنت عمتي.. ويوفقج
قربت خلود من مجد وحضنتها من الفرحة.. : فديتج والله.. ويرزقج بالي تبينه ان شا ءالله...
وقعدوا يكملون سوالف ..
... ... ...
فجيليز ..
جاسم وفطوم ومنى كانوا قاعدات سوى في طاولة ويسولفون ويا اخوهم..
جاسم: ههههههههه بس والله بموت من الضحك ..
منى: جاسم انت ماقريت القصيدة صح؟
جاسم: اوه تعالي اصلا نسيتها في الغرفه عندج..
منى وهي تفتح شنطتها وطلعت الورقه.. وهي تضحك : هذي القصيدة يبتها..
جاسم سحب عنها الورقه وبدا يقرا الكلمات.
وانا في برد أحزاني أدور حضنك الدافي
أبهرب من عنا دنيا تضحكني وتبكيني
أحس بإحساس يآلمني وفـ نفس الوقت هو شافي
أحس إني أبي حضنك وأحطك في وسط عيني
أنا والله لو بيدي أروح لعالم خافي
أنا وانت نكمل بعض وتكمل شيني بزيني
حبيبي يا بعد دنيا تهلي بقلبك الوافي
عساني مانحرم منك يا أغلى من سكن فيني
تصدق منسى ذاك اليوم " يوم اتعدل لحفاي"
تقول ألحين وايد برد واقولك يابعد عيني
تعال ودفني بحضنك وعطني بردك الدافي
وتجي وتغط بأحضاني مثل طفل عشق فيني
حناني والتعب كله وشوقي كله والوله عافي
تراهم فدوة لعيونك يا أغلى حب فـ سنيني
بصدق والله هالليله أحس بإحساس هو شافي
أحس اني ابي حضنك وأحطك وسط عيني*
رفع عينه واطالعها بطرف عينه.. احين هالكلام لمنو كاتبته...
منى: لو ذكي بتعرف..
فطوم: هههههههه اقول لا تقولين له لغايه مايشوف بنفسه ويعرف..
جاسم: اشوف شو .. ؟؟ شو قاعدين تخربطون انتوا..
ودقايق مامرت الا الجرسون ياي ومعاه الكيك وحاطين عليه شموع وياي صوبهم.. وكل الي يشتغلون متيمعين ويغنون له..
Happy Birthday To You..
.....
استانس جاسم من الخاطر.. هو نفسه ناسي ان اليوم يوم ميلاده... واما خواته كيف بينسون وهو الي قايم بهم في البيت.. طفى الشموع وبدوا ياكلون منها.. ورن تليفون فطوم.. رفعت راسها وخايفه ترد بس ردت عن يشك بها جاسم اذا ماردت.. ومن شافته يدامها بهتت..
فطوم: الووو..هلا والله مريوم؟؟
فيصل: وانتي اشله ماتقولين لي انج بتظهرين؟
فطوم: هيه لا مابغيب يوم السبت..
فيصل: حسابي وياج بعدين.. قمتي وايد تاخذين راحتج هالأيام ولا تستأذنين..
وبندت الخط عنه وهي ميته من الخوف.. وهو يالس مجابلنها ويطالعها..
منى: فطوم هذا مايستحي شوفي شقايل يطالع صوبنا.. لو جاسم شافه بيجلب الدنيا علينا..
فطوم: ها.. خله يولي..
جاسم: شوفيكم تساسرون؟
فطوم: ماشي.. هاي منوو تقول تعبت خل نرجع البيت..
جاسم: هيه خلنا نرد ونشوف امي شو سوت..
نشوا وفطوم مشت أول وحده وهي ميته من الخوف..وردوا البيت ودخلت غرفتها على طول.. واتصلت في فيصل..
فطوم: فيصل حبيبي والله سوري.. بس كل شي صار فجأة وماكان عندي رصيد توني بس خذته
فيصل: زعلان منج لا ترمسيني..
فطوم: بس فيصل..
قاطعها: شوفي لا تتصلين ومابرمسج عقابا لج عشان تأدبين ومره ثانيه تقولين لي وين بتروحين وين بتردين..
فطوم: فيصل انا اســ..
وقطع الخط في ويهها وتغصصت من الخاطر.. وسارت غرفتها وعلى طول رقدت لأن مافيها ترمس حد... ومنى قعدت تعدل فالقصيدة لأنها كتبتها على السريع.. واما جاسم فعرف بالعلوم من امه واستانس وقرر انه يروح الظهر بعد صلاة الجمعه عند عمه ويرمسه هو بعد.. عشان مايزعل ويقول له ليش ماكلمتني بالموضوع...
... ... ...
أحمد كان يالس في الكوفي ويا واحد من ربعه... اسمه هزاع..
هزاع ربيع احمد من الطفوله..... دومه كان في بيت احمد يوم صغار وطبجته يعني... مايطلع طلعه ويا ربعه الا اذا كان هزاع موجود... هزاع تزوج وهو عمره 20 سنه يعني اصغر من احمد كان يوم عرس.. خذا وحده من الأهل... هله يوزوه عشان يحصنونه انه يطيح فالغلط.. وهو مقتنع بحرمته ويحبها وتحبه ومتفاهمين.. عايش حياته مرتاح.. احمد مايخبي عن هزاع ادق اسراره وساعات يحس به اكبر عنه ولو انهم بنفس العمر.. بحكم هزاع انسان متزوج تجاربه اكثر عن احمد الي عايش بطيشه بعده..
هزاع: أحمد تبا تقنعني ان مافيك شي مضيق فيك؟؟
أحمد: شو اقول لك ياخوي.. ولا شو اقول..
هزاع: قول طلع الي في خاطرك..
أحمد: بس احس المكان مايناسب يدام الربع.. لو نظهر ..
هزاع: خلاص انا اليوم عازمنك على كرك..
أحمد: ههههههه قلت احين بيعزمني على عشا.. طلع بس كرك..
هزاع: هيه يسدك بس سو ريجيم..
أحمد: ههههه.. نش خل نطلع عيل..
وطلعوا سوا وساروا صوب الكافتريا الي عند الممزر.. وطلبوا لهم وقعدوا يتريون الطلبية... وكان احمد منزل الجامه الي صوبه.. سمع صوت صد صوبه ورد راسه وماهتم..
...: الحلو ليش زعلان يتغلا؟
صد هزاع يطالع صاحبة الصوت ماعرفها لأنه تقريبا يعرف الي يرمسهن احمد كلهن.. : شو هاي وحده يديدة تعرفها؟
أحمد : ماعرفها..
هزاع: قوات عين يرمسنك ولا يعرفونك..
أحمد وه منزل راسه: خلها تزول..
رفع الجامه.. انقهرت البنت منه وايد.. : خقاق .. اونه عاد.. اصلا لازم يحمد ربه اني عطيته ويه..
وحركت موترها وراحت..
هزاع: لهالدرجه البنات مسترخصات بأعمارهن..
احمد: واكثر...
وياب لهم راعي الكافتريا الطلبية وحركوا الموتر وقفوا في الباركات عشان يسولفون على راحتهم.. وبدا يرمس احمد..
احمد: انا مب مقتنع بالي اسويه يا هزاع رغم اني امضي وقت واستانس.. بس بعدني مب مقتنع..
هزاع: احمد انا من متى اقول لك ودر عنك هالسوالف .. ودامك مب مقتنع بالي تسويه ودرها شو تتريا ياخي..
أحمد: ياخي مب مترقع لا فالدراسه ولا في شي.. احس ربي مب راضي علي.. حتى لدرجه اني من كثر مارمسهن انسى وقت الصلاة واطوف بعض صلواتي..
صد هزاع صوبه وحط ايده على جتف احمد..: الله يهديك بس.. الا صلاتك ... شو خليت.. يوم صلاتك قمت تلتهي عنها بسبة شوية بنات .. شو تم؟؟ كيف تبا تترقع في حياتك..
احمد وهو يتنهد : مادري يا هزاع صخ عني راسي مفتر من كل صوب..
هزاع: اتزوج انزين شو تتريا..
أحمد: لا مابا ارتبط احين.. اذا فكرت بالزواج فهذا بعد ماخلص دراستي.. مب ألحين..
هزاع: احصن نفسك يا احمد احسن لك..
أحمد: مب شرط اني اعرس عشان احصن نفسي.. ياما شباب معرسين ولا قادرين يحصنون اعمارهم يعني احس الزواج ماله اثر بهذا كله... وانا اذا بعرس تراني باخذ بنت عمي وانت تدري عاداتنا..
هزاع" ليش وشفيها بنت عمك ماتباها؟
أحمد: بالعكس هذا الشي الي خلاني احس بالضيج اكثر واحس بالي اسويه كيف غلط..
هزاع: زين يوم انك عرفت ان الي تسويه غلط.. وفي شي خلاك تحس بهالشي..
أحمد: هزاع المشكلة مب هني.. المشكلة ان بنت عمي بديت احبها.. وهي ماخذه عني فكرة سلبية تماما.. عرفت بسوالفي فالبنت عايفتني .. السلام ماترده علي..
هزاع: ليش هي كيف كانت وياك قبل؟
أحمد: يادوب شايفنها يا هزاع.. تحيد عمي عبدالعزيز..هاي بنته.. يعني ماشايفنها من سنين الا على عرس عبيد انا شفتها.. وعيبتني .. ومن وقتها ماتفارق بالي...
هزاع: وليش ماتصحح غلطك وتثبت لها انك تغيرت .. عشان تغير رايها فيك..
أحمد: كيف؟
هزاع: هي اول شي قولي كيف عرفت بسوالفك؟
أحمد: طلعت وحده من الي ارمسهن تعرف بنت عمتي.. وهي دوم ويا بنت عمي.. واكيد قالت لها.. ومن نظراتها ونغزاتها حسيت بهالشي انها تعرف ..
هزاع: اهااا.. انزين عيل انت اول شي لازم تسويه اتودر هالبنت الي هي ربيعتهم.. وتودر كل الي ترمسهن.. وتواجه بنت عمك بحبك... وتقول لها.. وهي بدورها اكيد بتتخبر البنات الي تعرفهن يرمسنك.. وبتتأكد.. واكيد وقتها بتغير رايها..
أحمد: بس كيف اودرهن ؟؟ هالمشكلة..
هزاع: شو هو الي كيف.. لا ترد عليهن ولا تسوي لهن سالفة وفك نفسك..
أحمد: بس الشيطان يغلب يا هزاع.. اشوف ارقامهن اخاف بلحظة ضعف ارد..
هزاع: انت من اي رقم اترمسهن؟
احمد: من 61..
هزاع: خلاص وفي وحده منهن تعرف رقمك الثاني 54..
أحمد: لا .. لأنه بإسمي وانا ماباهن يعرفن اسمي فأرمسهن من الرقم الثاني..
هزاع: خلاص انحلت.. انت عطني رقمك الي هن يرمسك فيه.. وخله عندي وانا برد عليهن ولا بخلي الحرمه ترد عليهن.. وخلاص وانت ولا بتشوف رقمهم ولا شي يذكرك فيهم.. بس بشرط انك ماتجذب علي ومن وراي تتصل فيهم من رقم ثاني..
احمد ابتسم وحس بتفاؤل شوي.: تحيد احمد وعدك بشي وخلف بوعده؟
هزاع: لا حشاي ماشفت هالشي منك..
احمد: لك مني كلمة ريال ماحط لساني بلسان بنت دامني حي.. غير الي بتكون على ذمتي طبعا..
هزاع: خلاص ويلا هات التليفون؟...
وطلع تليفونه احمد وعطاه لهزاع وكان فوق ال 15 مسد كول ياينه و7 مسجات.. ليش انه حاطه على السايلنت فماشافهم ولا سمعهم.. وهزاع ماخلا احمد يقرا المسجات او يشوف المسد كولات.. وغلق التليفون وخلاه عنده..
هزاع: يلا بوصلك صوب موترك لأن بسير البيت عند الحرمة روحها..
أحمد: تسلم يا هزاع.. لولاك جان ماعرفت شو اسوي..
هزاع: بس هاا.. التزم بصلاتك وعوض الي فاتك بالخير عشان الله يوفقك ويعطيك الي تباه..
ابتسم له احمد ووصل عند موتره وشل الموتر وسار البيت..
ومرت هالليله وكانت بشرى خير في حياة احمد... دخل البيت والضحكة ماتفارقه من بعد الحزن الي كان مالي ويهه.. وكان البيت ظلام لأن الكل رقود والوقت متأخر .. وراح غرفته يرقد عشان ينش لصلاة الجمعه ..
..
يوم الجمعه..
جاسم سار المسيد الي يصلي فيه عمه عشان يرمسه من بعد صلاة اليمعه الي من رمسه بالموضوع فرح واستانس وقاله ان ماعنده مانع بالمره بس بيسأل خلود وبيشاورها ... ومن رد البيت ابوها زقر على خلود ورمسها وسمع منها نفس الرمسه الي قالتها لأمها.. الي تشوفونه خير لي سووه وانا ماعندي مانع... الفرحة عمت البيت ومن درت نوره راحت لخلود وباركت لها لأنها عارفه بإحساسها صوب جاسم.. واليده استانست وسارت بيت شيخه في هاليوم..
جلثم: ايه هاي الزواجه السنعه.. هب نوره الي عطوتها لواحد غريب عنكم..
شيخه وهي تصد صوب امها: اميييه خلاص عاد موضوع انتهينا منه..
جلثم وهي تتطالعها بنقمه: الله يوفقج يا بنتي يا خلود.. تستاهلين كل خير..
خلود وهيه تبتسم بخفه: تسلمين يدووو والله يطول بعمرج ان شاء الله..
مجد: يدووو لو تشوفين خلود البارحه تترقص في الغرفه مستانسه انها بتعرس..
صدت خلود صوب مجد وهي فاجة عيونها وتأشر لها .. براويج ماعلي ..
جلثم: عنلاتكن من بنات ماتعرفن شي في الحيا.. وين على ايامنا البنت لا درت انا بتعرس ماتضوي من غرفتها ليوم العرس.. وانتن تترقصن لا سمعتن طاري العرس.. انف عليكن..
الكل تم يضحك الا خلود الي ميته من الغيض..
واليوم مر والخبر انتشر في العايله ان ملجة خلود وجاسم راح تكون بعد ردة المعاريس من شهر العسل.. الي كان من المقرر يرجعون بالإثنين..
... ... ...
حور: قولي والله.. الله يسعدج يا خلوود ويفرحج ويوفقج ان شاء الله..
مجد: بل بل بل.. كل هذا لخلود وانا وين ؟؟
حور: وانتي.. انتي دوم ادعي لج يا مجد والله من كل قلبي ابا لج الخير كله..
مجد وهي تيود عمرها من الصياح: حوور والله ولهت عليج ردي وباتي عندي خل ريلج يرد بيت ابوه يبات..
حور: ههههه لو سمعج بيذبحج..
عبيد: شو السالفه اشك اتحشون فيني..
حور : هيه .. مجد تقول اني ابات عندها يوم ارجع وانت ترد تبات بيتكم..
سحب عبيد التليفون من حور: ايه انتي شوفي خلاص اختج صارت ملكي.. ماشي مابترقد عندج..
مجد: خلاص انا برقد عندكم.. هههههههه
ضحك عبيد: اشحالج بنت العم..
مجد: بخير انت اشحالك؟؟ وشو الأجواء هناك؟
عبيد: والله بخير.. والأجواء رهيبه..
مجد: شوفو انا هالمره طوفتها ماوديتوني وياكم.. المره اليايه لازم اسير اوكييييي..
عبيد: انتي شو لا يكون حرمتي الثانيه وانا مادري..
مجد: هههههه لا حرمة حور..
عبيد: خسج الله..
مجد: اقول.. شو اشتريتوا لي..
عبيد: انتي شكلج طلابه وايد.. يلا ماخذنا لج شي..
مجد: اوكي يالزط.. عطني اختي..
عبيد: يلا سلمي على الأهل..
مجد: يبلغ.. وشلت التليفون حور..: هلا والله بهالصوت.. حوروو يوم تردين اباج تخبريني بكل شي..
حور وهي مستغربه..: كل شي مثل شو..
مجد: شو سويتو وين سرتوا.. شو شفتوا وشو اشتريتو..
حور: ههههه شوي شوي علي.. انزين عطيني اميه خل ارمسها..
ورمست حور امها ويدتها وابوها ومن بعد بندوا الخط وسارت مجد ترقد بس مارامت.. لأن باجر موعدها مع الدكتور ونشت اتطلع لها لبس حلو.. وتتطالع ايدها : افففففف احين انا شو بقدر البس بإيدي هاي مافي شي كم طويل اقدر البسه عشان يدخل فإيدي.. وطلعت لها جلابيه عربيه.. لأن الكم مغربي وسيع يدخل بإيدها وساتره.. وعطرتها.. وطلعت لها عباة وشيله علقتهم لأن عالساعه 9 بتظهر لأن موعدها الساعه 9:45 ..
..
الساعه رنت على الساعه 8:30 .. فتحت عينها بصعوبه ومن شافت الساعه فزت من مكانها عشان تزهب بسرعه "... ودخلت امها عشان تقومها جان تشوف السرير فاضي وصوت الدش في الحمام .. فعرفت انها تسبح.. وطلعت من الحمام ولبست وكشخت... ونزلت تحت عشان تتريق.. وكان ابوها قاعد وامها..
عبدالعزيز: يبتي بطاقتج وورقه الموعد؟
مجد: هيه ابوي حاطتهم في الشنطه..
لطيفه: الله يعافيج يا بنتي وماتشوفين شر..
مجد تبتسم لأمها: فديتج الشر ماييج يامي..
ومن بعد ماخلصت .. باست راس امها..: وين يدوو؟؟
لطيفه: سارت ويا الدريول بيت شيخه ..
مجد: هيه حليلها مستانسه لخلود وايد
لطيفه: كلنا فرحنا لها... خلود طيبه وتستاهل ربي يوفقها..
وطلعت مجد ويا ابوها من البيت.. وطول الدرب وهي تفكر.. وصل لها مسج..
( طمنيني عليج من تردين من عند الدكتور دبووو اوكي)..
عبدالعزيز: منو مطرش لج مسج عالصبح؟
مجد: هاي خلود بنت عموو.. تباني اطمنها علي بعد ماظهر من المستشفى..
عبدالعزيز: حليلها.. فيها الخير...
وصلوا المستشفى.. وسلموا ورقة الموعد لقسم الملفات وودوا ملفها عند الدكتور..
الدكتور من قرا اسمها عرفها..: وينها المريضه مجد عبدالعزيز...
السستر: برا بتنتظر ليجي دورها..
الدكتور: خليها تدخل..
السستر: بس دكتور في ناس جايين ابلها ناطرين..
الدكتور: قلت لج خلها تدخل وخلاص..
السستر: اوكي..
وطلعت السستر وزقرت على مجد الي نشت ويا ابوها ودخلوا الغرفه.. نش الدكتور وقرب من ابوها ووايهه وسلم عليه..
الدكتور: اشحالج اليوم؟
مجد : الحمد لله..
الدكتور: شو ايدج ماتحسين بعوار فيها؟؟
مجد: هو مب عوار على كثر ماهو تعب من الجبس..
الدكتور: هيه ماعليه احين برسلج للأشعه عشان يصورون ايدج عشان نعرف الفتره الي تحتاجينها للجبس..
مجد: مايستوي اتطلعونه لأني تعبت الصراحة..
عبدالعزيز: يابنتي مايستوي لازم يتم فتره عشان يلتحم العظم...
الدكتور: شرات ماقال الوالد..
وكتب على ورقه الأشعه وطلب من السستر توديها لقسم الأشعه ودخل مريض ثاني .. وعبدالعزيز ظهر يلس برع يتريا مجد ترد ويا السستر.. خلصوا المرضى الي كانو ناطرين دورهم وطلع الدكتور كان ساير الكافتريا بس من شاف عبدالعزيز سار صوبه ويلس يسولف وياه..
عبدالعزيز: ماشاء الله عليك.. يعني انت كملت دراستك مره وحده
الدكتور: هيه عشان ما اوقف وانسى المعلومات وفي نفس الوقت استغل الوقت ..
عبدالعزيز: زين ماشاء الله عليك .. الله يوفقك.. الا ماقلت لي انت من ولده؟؟
الدكتور: سلمك الله يالوالد انا اسمي .. محمد ناصر (الفلاني)..
عبدالعزيز: يا حي الله محمد..
وفي هالوقت وصلت مجد والسستر وياها ومعاها الأشعه.. خذ الدكتور الأشعه ودخلوا الغرفه الخاصه فيه.. وحط الأشعه وقعد يطالع الإيد.. وتم يشرح لهم كيف ان الإيد تحتاج لها فتره اكبر اتكون تحت الجبس .. ومجد مبوزه وفي خاطرها تحرطم.. حس بها الدكتور..
الدكتور(محمد): شكله ماعيبج الوضع ان يتم الجبس بعد اسبوعين او شهر..
مجد: وايد دكتور..
عبدالعزيز: ماعليك يا دكتور محمد منها..
مجد: يعني ماشي دوا ثاني لازم جبس..
الدكتور وهو يطالعها ويحس بشي غريب في عيون هالبنت: للأسف ماشي..
استحت مجد من نظرته وارتبكت وصدت صوب ابوها.. ومن بعدها حدد لها موعد بعد 3 اسابيع وطلعوا من عنده.. طلع عبدالعزيز قبلها عشان ياخذ الدوام.. ومجد بعدها كانت عند الدكتور يوم عبدالعزيز طلع..
الدكتور: مجد...
تجمدت مكانها ماقدرت تحرك من مكانها.. : نعم دكتور..
ماتجرأ انه ينطق او يقول لها شي..: ماشي بس واضبي على مواعيد الدوا اهم شي.. اكتئبت مجد لأنها حست به يبا يقول لها شي بس غير رايه.. وطلعت من عنده محبطة.. وردت البيت وعالساعه 4:30 كانت خلود عندها وقالت لها بالموضوع الي صار.. خلود تمت تتطالع مجد وهي ترمس عن الدكتور وهي توصفه وكيف هي معجبة فيه.. تقربت من مجد ويودت ايدها..
خلود: مجد لا تعلقين بأوهام دخيلج يا بنت خالي.. انتي بتتعذبين وبتتعبين فالنهاية.. أرجوج..
مجد: كيف مافهمت اي اوهام؟؟ اقولج كان يبا يقولي شي بس غير رايه..
خلود: مجد انتي عارف وانا عارفه.. نحن في عوايلنا زواج من برع الأهل نادر مايستوي.. اذا صار في بيتنا فهذا لتفكير ابوي المختلف.. لكن ابوج وخالي ماعندهم هالتفكير.. يوم ان في النهايه مالج غير ولد عمج ولا ولد خالتج ولا واحد من الأهل... ليش تحطين في بالج اشيا مامنها فايدة وانتي الي بتتعبين عقبها.. فكري بعقل يا مجد ولا تعلقين بأوهام وتبنين آمال على ولاشي..
نزلت راسها مجد وهي مقتنعه برمسة خلود.. لن هذا واقعهم.. وان كان الي من برع العايله احسن من ولد عمها ولا الي من الأهل.. بيكون الي من الأهل افضل.. تنهدت وحست بضيج وفي نفس الوقت خطر على بالها أحمد وصدت صوب خلود: خلود انا ممكن ارضى بأي شخص.. لكن اذا كان هالشخص احمد مابرضى.. اتصوري حياتي اعيش مع انسان مستهتر.. كيييييييف؟؟
خلود: مجد خلج واقعيه لو انا كنت مكانج وماداني احمد بس قوانين الأهل تقول اخذ احمد والواقع يقول احمد وان عقلي مايقول احمد.. باخذه .. لأني ابا رضا هلي..
مجد: بس كيف بعيش مع شخص ماحبه.. بس عشان هلي.. وين تبين خلود شو هالرمسه الي ماتدخل العقل..
خلود تعرف ان الي تقوله مجد صح.. بس الواقع هو هذا ولازم يتقبلونه..
دمعت مجد غصبن عنها.. : ارجوج غيري الموضوع مجرد التفكير بهالموضوع اييب لي المرض.. حتى الأعجاب انمنع علينا.. ماقلت اني حبيت الدكتور.. لكن انعجبت فيه وفي شخصيته.. ماتخيل نفسي اخذ انسان شرات احمد.. بغض النظر ان ماكان الدكتور.. كان اي شخص ثاني له نفس هالمواصفات..
خلود: مجد يمكن في اشيا حلوة في احمد نحن ماندري عنها لا تحكمين عليه لأنه يرمس بنات.. ترا 80% من شبابنا هالأيام على هالحال.. تدرين ان خالد اخوي الي هو ريل مروة.. كان شرات احمد.. بس محد كان يدري عنه غيري.. لني كنت اشوف تليفونه بالدس واقرا المسجات.. ولا في انسان فالعايله حس بهالشي.. لكن احمد الله يهداه شاخل عمره كل العايله يدرون به..
سكتت مجد شوي ..: اقول خل ننزل عند يدوه نسولف وياها ابرك من هالسوالف الي تغث.. لاحقه افكر بهالأمور..
نهاية الجزء..
* القصيدة الي في القصه من تأليف طبجتي الغاليه جرناسه.. اي قصيدة ثانيه بتشوفونها في القصه من اليوم وساير فهذا من تأليفها..
مجد بتغير نظرتها في احمد؟؟
وبينجح أحمد في القرار الي قرره ولا بيرد لسوالفه؟؟
ملجة خلود وجاسم... في هاليوم بيصير شي ؟؟
عبيد وحور كيف بتكون حياتهم؟؟
الدكتور شو رايه.. بيعرف بشي؟؟ وياترى شو كان وده يقول لمجد وماقدر يقوله.. ؟؟
#14