الفصل 28
البارت الثامن والعشرون °•
مدخل البارت :
عن أبي هريرة قال قال رسول الله صلى الله عليه وسلم : ( إن للصلاة أولا وآخرا وإن أول وقت صلاة الظهر حين تزول الشمس وآخر وقتها حين يدخل وقت العصر وإن أول وقت صلاة العصر حين يدخل وقتها وإن آخر وقتها حين تصفر الشمس وإن أول وقت المغرب حين تغرب الشمس وإن آخر وقتها حين يغيب الأفق وإن أول وقت العشاء الآخرة حين يغيب الأفق وإن آخر وقتها حين ينتصف الليل وإن أول وقت الفجر حين يطلع الفجر وإن آخر وقتها حين تطلع الشمس . ( صحيح ) _ الصحيحة 1696 .
الساعه 4 ونص ومع اعتلاء صوت الاذان اللي يبعث الراحه والسكينه للقلوب .
صرختها المدويه افزعته من نومه : آآآآه بولد , بولد .
فز من نومه وهو يشوفها حاطه يدها على ظهرها وتصرخ بألم .
وقف وغسل وجهه على عجل وفرش اسنانه ولبس ثوبه .
شالها وهي تبكي : آآه احس اني بأموت .
وائل وهو ينزل مع الدرج بسرعه : يمه , يمه .
طلعت امه من غرفتها اللي سمعت صراخ فجر وعرفت انها بتولد .
طلعت معاهم للسياره .
وركبت وراء جنب فجر اللي تبكي بألم .
وصلو المستشفى بسرعه قصوى .
دخلو فجر دايركت غرفة الولاده .
وهو وامه واقفين قدام الغرفه .
يحترق شوق لضمة الصغير اللي كان معه لحظه بلحظه من علم انه نطفه الى اليوم .
" يارب سهل عليها وفرحني بشوفتها هي وولدي بالسلامه " هتف بحزن : عن اذنك يمه بروح اصلي .
وقفت العنود : وانا بروح للمصلى .
دخل وائل بالمسجد وصلى مع الجماعه ودعاء لفجر واخلص الدعاء لله .
رجع للمستشفى وهو يتمنى انه يوصل وهم يبشرونه بسلامة فجر .
وصل قدام غرفة الولاده .
وشاف امه جالسه ع الكرسي وتنتظر على احر من الجمر .
طلعت الدكتوره المنقبه وهي تقول : الف الف مبروك جالكم ولد .
فز وائل ووقف قدام الدكتوره وبلهفه : وفجر كيفها ؟
الدكتوره : الحمدلله سليمه .
العنود بسعاده مالها مثيل : دكتوره اقدر اشوف الطفل وامه ؟
الدكتوره : تفضلي خالتي .
ودخلت العنود يتبعها وائل .
سلمت على فجر اللي مازالت تحت تأثيرات المنوم .
طلعت العنود لحضانة الاطفال بتشوف حفيدها الاول .
اشتاقت له كثير كم حلمت وكم تمنت انها اول من يشيله , اول من يبوسه .
وهذي امنيتها تتحقق وحلمها واقع وسعادتها لا مثيل لها .
من طلعت العنود باس وائل جبين فجر .
وطلع للحضانه .
~ ~ ~
جناح عبدالله ورتيل...
صحت على همساته الحانيه : حبيبتي قومي صلي .
جلست رتيل وهي تعدل شعرها وترجعه وراء همس لها : صباح الورد .
رتيل وهي توقف : انت متى تروح لدوامك بتنفس شوي من امس وانت جالس على قلبي .
ابتسم عبدالله بعذوبه ابتسامه اكثر من جميله لايتقنها إلا هو : الحين بروح للدوام .
دخلت رتيل دورة المياه وخذت لها شور لبست قميص حوامل مشجر .
يوصل تحت ركبتها بدون اكمام ولبست جاليه بأكمام جبنيز .
وشعرها تركته مسدول ولبست فلات ابيض .
طلعت للغرفه ولفت شرشف الصلاه عليها بالكامل وصلت وخلصت .
وعبدالله مازال جالس على الاريكه ويطالعها .
توجهت للتسريحه وجلست ع الكرسي بتشغل نفسها بأي شي .
حست بحركة عبدالله وراها ارتبكت كثير .
وقف عبدالله وراها وانحنى وباس راسها وخدها : ام وائل اتصلت على جوالك من نص ساعه .
وقفت رتيل وبرعب : اكيد فيهم شي ولا فيه احد يتصل قبل صلاة الفجر بنص ساعه ؟
خذت جوالها اللي على التسريحه وهي قلقانه : صباح الخير يمه .
العنود بإبتسامه : صباح النور والسرور , اسفه يابنتي ازعجتك على الصباح , بس كنت بأبشرك ان وائل جاه ولد .
فرحت رتيل كثير وقالت بابتسامه : الف مبروك ويتربى بعزهم ان شاء الله , كيف الولد وامه ؟
العنود : الحمدلله بخير , انتي وش اخبارك ؟
رتيل : تمام , يمه هي بأي مستشفى ؟
العنود : بالنساء والولاده .
رتيل : مع السلامه الحين بجيكم .
وسكرت المكالمه وهي تنزل الجوال على التسريحه طالعت عبدالله : اخوي وائل جاه ولد بروح اسلم على زوجته .
عبدالله برفض تام : لا الوقت لسه بدري وانتي حامل مايصير تتعبين نفسك .
رتيل بحده : موضوع حملي انت اخر واحد يتكلم فيه والتعب راح يصير فيني مو فيك .
عبدالله باستغراب من هجومها عليه : ليش مو انا ابو اللي ببطنك ؟
رتيل : لو كان اهمك او يهمك اللي ببطني كان خليتني عند امي انت تدور اي شي يكدر خاطري مادري مخلوق من ايش ؟
عبدالله وهو يحتضنها : انتي اهم شي بحياتي ومن اولوياتي وياليت تتركين العناد وترضين علي .
رتيل وهي تبعده عنها وبين اسنانه : قلت لك لاتلمسني انت ماتفهم ؟
عبدالله بعد ماخذ نفس : يالله صباح خير انتي ماترتاحين إلا اذا قلتي هالكلمه .
رتيل بغصه : وانت ماترتاح إلا اذا عكرت مزاجي وضايقتني ؟
عبدالله بحنان : طالبك رتول ماتبكين , دموعك غاليه واذا كان تبين تروحين لأهلك رجعتك الحين لهم .
رتيل " مجنون يبيني ارجع لهم ؟
وانا ماصدقت انام بجنبه " : لا وش تبي الناس يقولون عنا امس راجعه له واليوم رايحه لأهلها .
ابتسم عبدالله بعد ماقبل يدها : مايهمني كلام الناس اهم شي راحتك .
رتيل وهي تسحب يدها من يده : انا مرتاحه هنا اذا خليت حركات المراهقين هذي .
ضحك عبدالله : حركات مراهقين ؟
رتيل : بتوديني لمرة اخوي ولا قلت لياسر ؟
عبدالله : لا انا بوديك , بس بعد مانفطر .
~ ~ ~
في الصباح بعد ماوصلو الفندق اللي بيستقرون فيه 15 يوم .
دبي...
فارس بعد مافتح باب جناح الفندق وبابتسامه : نورتي مكانك .
احلام بخجل : منور بوجودك .
بعد ماجلسو وافطرو .
قال فارس بهدوء : انتي اكيد عارفه سالفة طلاقي , اظن زوجة عبدالله قالت لك .
هزت احلام راسها بـ إيه .
فارس : بس انا ما اعرف سبب طلاقك ممكن تقولينه لي ؟
احلام بصدمه : ليش ؟
فارس بشفافيه : لأنا من البدايه نبي حياتنا صافيه مايعكرها شي .
احلام بإرتباك : يعني لازم ؟
فارس بإستغراب : ايه انا شريك حياتك ولازم اعرف عنك كل شي .
احلام " لازم افتح جروح الماضي " : قبل ثلاث سنوات تزوجت نادر من اقارب امي عشت معاه اول ثالث شهور بين شك ويقين
مره يرجع للبيت سكران ومره يرجع مافيه شي ويوميا على هالحاله انا سألت متخصصين في الادمان وثبت لي ان نادر مدمن
سترت عليه وماحبيت اخبر اهله انه مدمن بعد زواجنا بـ 6 شهور طلعنا لبيت مستقل لي انا ونادر وبعد ماكمل لنا اسبوعين ببيتنا الجديد
سافر نادر للهند وانا جلست عند امي وقبل لايرجع بليله رحت للبيت انظف وارتب عشان اذا رجع وبيته بأحلى صوره .
بعلت ريقها وبغصه : رجع وهو جايب معاه زوجته هنديه هندوسيه - وبحرقه - انا يبدلني بهندوسيه ! تهاوشت معاه وطردني من البيت الساعه 1 بالليل اتصلت على ياسر وجاء واخذني وطلقني من نادر بالغصب .
فارس ودمه يغلي من القهر : الحقير يهين بنت عمي على باله ماوراها رجال ؟
احلام استغربت من ردة فعله وقالت بهدوء : فارس الموضوع هذا له 3 سنوات ليش نفتح جروح قديمه خلاص هو اختار الهندوسيه علي .
فارس مسك يدها : الحمدلله ان ربي حطك بطريقي بأخذ لك حقك من النذل .
احلام انتفضت بجزع : لا تدنس يدك بدمه هو ماينفع معاه شي .
فارس : مهوب كفو عشان اقتله لو هو رجال كان قابل الرجال - وتذكر ياسر - إلا ياسر ماسوى له شي ؟
احلام تذكرت اصعب الايام اللي مرت عليها : كان يهدد ويتوعد ويتحلف فيه وانه راح يقتله الين ماحلفت امي انه لو راح له ماعاد تعرفه ولا هو ولد ولدها , وهو اهم شي عنده امي .
~ ~ ~
مستشفى النساء والولاده...
بالطابق الخامس وتحديداً غرفة فجر .
قبلت رتيل راس فجر : الف مبروك والحمدلله على سلامتك .
فجر بابتسامه رغم تعبها وارهاقها الواضح على وجهها : الله يبارك فيك , وعقبال مانهنيك بسلامتك انتي وولدك .
ابتسمت رتيل : امين يارب .
العنود بابتسامه : انتي بأي شهر ؟
رتيل : تو داخله السادس .
العنود : الله يقر عيني بشوفة ولدك بالسلامه .
رتيل : امين يارب , وين وائل بسلم عليه وابارك له .
العنود بضحكه : ههههههه يابعد عمري مسنتر عند الحضانه هو وسراب مع انهم بالبدايه مارضو يدخلونها .
رتيل وهي توقف : عن اذنكم بروح اسلم عليه , عبدالله ينتظرني بالسياره .
العنود وفجر : اذنك معاك .
طلعت رتيل وتوجهت للحضانه وارسلت لوائل وهي توقف قدام باب الحضانه انها بتسلم عليه .
طلع وائل ووراه سراب سلمو على رتيل : الف مبروك ياقلبي .
وائل بابتسامه : الله يبارك فيك يارب .
وسلمت رتيل على سراب : كيفك ياقلبي .
سراب : الحمدلله بخير , تعالي يارتيل شوفي ولد وائل يجنن يجنن .
ضحكت رتيل : بعدين ياقلبي هو بعده صغير مايصير ندخل عنده - وبإهتمام وهي تطالع وائل - إلا وش قررت تسميه ؟
وائل بابتسامه : فواز .
رتيل " ولد اخوي يصير اسمه على فواز
لا مستحيل وحرام يظلم الولد " : لا وائل فديتك دور لك اسم غير فواز .
وائل بعقلانيه : رتيل انتي زعلتي على خالي فواز لأنه حرمك من امك طيب ردي له جزاه رباك 23 سنه امن لك مستقبلك مع ولد خالك
رتيل والله حرام اللي تسوينه بخالي مهما كانت غلطته هو له فضل كبير عليك .
رتيل بعدم اهتمام : لو مهما سويت ماراح ارد له جميله علي , بس ارجوك لاتسمي ولدك فواز .
سراب بزعل : قلت له يسمي ولده هيثم بس هو ماعطاني وجه .
رتيل بمرح : يعني ترفض طلب اختنا الصغيره عشان اسم ؟
وائل بابتسامه : مايصير بخاطركم الا اللي تبون خلاص اسمه هيثم .
رتيل : جعلك تشوف هيثم عريس قول امين .
وائل : امين , عاد دورك جيبي له احلى عروس .
رتيل : ان شاء الله اجيب بنت عشان نزوجها لولدك , عن اذنك عبدالله ينتظرني بالسياره له نص ساعه تأخرت عليه .
وائل : اذنك معاك .
توجهت رتيل للمصعد ونزلت للدور الثاني مكان مراجعاتها الطبيه " اذا ماخليتك تعفن بالسياره ياعبدالله مانيب رتيل "
دخلت عند الدكتوره : سلام عليكم .
الدكتوره : عليكم السلام .
نزلت رتيل ورقة الموعد على طاولة الدكتوره .
بعد ماشافت الدكتوره الوقت المحدد بالورقه : ماعليش اسمحي لي انتي متقدمه كتير عن وئت الموعد هوا بائي ساعتين .
رتيل برجاء : عندي ظروف يادكتوره وانا مقدمه الوقت مو مأخرته .
الدكتوره : اوكي تعالي معاي ع الاشعه نعمل لكي اشاعة تحديد جنس الجنين .
قامت معاها رتيل وصعدو للدور الثالث دخلو قسم الاشعه .
وخلصت الاشاعه وتقاريرها بعد ساعه .
طلعت رتيل ونزلت بالمصعد للدور الارضي طلعت للشارع وشافت سيارة عبدالله .
ركبت وقال لها عبدالله : ساعتين وانتي بالمستشفى ما كأنه فيه احد ينتظرك ؟
رتيل بهدوء : كان اتصلت علي او طلعت للبيت .
عبدالله بحزم : ممكن اعرف وش تسوين بالساعتين اللي قضيتيهم بالمستشفى ؟ اخرتيني عن دوامي .
رتيل وهي تطالع عبدالله : لاتظن اني في يوم من الايام راح اخونك مثل ماعملت فيني لأني اخاف ربي بالمقام الاول والاخير .
عبدالله بعد ماخذ نفس عميق : وين راح بالك ؟ انا اقصد مراجعتك اللي اليوم لايكون رحتي لها .
رتيل بذهول : وش عرفك انه اليوم عندي موعد ؟
عبدالله بغموض : عشان تعرفين انه كل شي يخصك اعرف عنه اول بأول , والمراجعه اللي اليوم تحديد جنس الجنين .
رتيل بصدمه : انتي مين اللي قالك ؟
عبدالله : مو مهم مين اللي قالي , انتي رحتي للموعد او لا ؟
رتيل بإرتباك : ايه .
عبدالله بغضب وهو يطالع زحمة السيارة اللي قدامه : ليش ماقلتي لي اروح معاك ؟
رتيل بحده : اللي تخلى عني بالاول ليش يهتم لي بأخر شي ؟
عبدالله : اني اللي تخليتي عني ورحتي عند اهلك حتى خبر حملك انا اخر من عرف وبالصدفه بعد , الحين تعاتبيني ؟ انا كنت مخليك عند اهلك بمزاجي لأنه امي قالت لي اللي تتوحم على زوجها مستحيل تقدر تجلس عنده وانا خليتك شهر زياده بعد الوحم لأنه هذا اللي انتي تبينه - وبغضب- بس انتي ماينفع معاك الطيب لازم كل شي يصير غصب عنك .
رتيل بقهر : تخونني مع سكرتيرتك وتقولي اسامحك واعيش معاك ؟
عبدالله : انتي متأكده اني لايمكن اسويها .
رتيل هتفت بغضب : وش يثبت لي ؟
عبدالله : اتصلي على سوسن واسأليها بنفسك .
رتيل بعصبيه : بعد ما اتفقت معاها وش تقولي اذا اتصلت عليها .
عبدالله بتحذير : رتيل احترمي نفسك واحترميني .
رتيل : انت ما احترمت نفسك بالاول عشان احترمك .
عبدالله : الله يهديك ويلين راسك القاسي .
~ ~ ~
بعد صلاة العصر...
بيت مشاعل.
دخل ياسر بالبيت بعد ماصلى العصر بالمسجد اللي جنب بيتهم.
شاف امه ورهف يتقهوون وجلس جنب رهف بعد ماقبل راس امه .
مشاعل بابتسامه : تقبل الله .
ياسر بعد ماخذ الفنجال من رهف : منا ومنكم , وين رتيل لها يومين ماجات .
رهف بمرح : لها شهرين وهي عندنا مستكثر عليها يومين وهي عند عبدالله .
ضحك ياسر .
مشاعل تحس اليومين اللي راحو غير رهف وياسر متغيرين صايرين افضل من قبل يجلسون معاها يسولفون معاها .
قبل يومين كان كل شيء عكس اليوم يجلس ياسر وتلتزم رهف الصمت اللي مو من قواميس حياتها .
رهف مرحه كثيرة الكلام..واليوم مشاعل مبسوطه من رهف وياسر .
قالت مشاعل بابتسامه : متى تجيبون لنا بنوته ولا ولد يلمون الجو علي .
ياسر بمزح : يمه احنا ماننفع ولا نملى عليك الجو ؟
مشاعل : انتم فيكم الخير والبركه بس انت من الصبح الى الظهر وانت بالمستشفى ورهف بعد كم شهر بتتوظف وابقى لوحدي مثل قبل .
رهف بابتسامه : ان شاء الله قريب وتشوفين ولدنا او بنتنا .
مشاعل بلباقه : لا انتي بعدك عروس مالك إلا اربع اشهر .
رهف : اربع اشهر مو شوي ياعمتي إن شاء الله مايجي الشهر الجاي إلا انا حامل .
مشاعل وياسر : ان شاء الله .
وقفت مشاعل : عن اذنكم بروح اسوي اكل لزوجة اخو رتيل ولدت اليوم ومايصير ما اروح لهم , هم لهم فضل كبير على رتيل .
وقف ياسر وبغضب : يمه قولي لرتيل لا عاد تسلم على وائل ولا تروح له هو مايصير لها .
مشاعل بعصبيه : وش هالكلام ياياسر وائل اخو رتيل بالرضاعه وهذا شرع ربي ماتتعدا عليه .
جلس ياسر وطلع جواله واتصل على رتيل : الوو .
رتيل بابتسامه : هلا بالغالي .
ياسر : لو انا غالي من جد كان ماخالفتي كلامي قبل شهر قلت لك لاتروحين لوائل ولا تسلمين عليه .
رتيل بإستغراب : ليش ؟
ياسر : هو مو اخوك اللي ربتك نوال واللي ارضعتك العنود هو اشلون يصير اخوك ؟
رتيل بهدوء : ياسر لو سمحت لاتتدخل بالموضوع هذا عبدالله سمح لي اروح لهم وكم مره يجي وائل يسلم علي ماقالي شي عبدالله .
ياسر : عبدالله زوجك وطاعته واجبه , بس انا اخوك الكبير واحترامي واجب .
رتيل : اشلون تبيني اقطع بالناس اللي احسنو علي وربوني عندهم , ولعلمك انا عشت مع وائل 23 سنه ولا انت من ست اشهر وانا عارفتك .
ياسر بغضب : وتفضلين اخوك من الرضاعه علي ؟
رتيل بجزع : لا ماقلت كذا , انت ووائل عينين في راس , وانت حط نفسك مكاني وش راح تسوي .
ياسر انحرج من رتيل : اعترف اني اناني ولا ابيك تصيرين اخت احد غيري انا عزوتك وسندك بالدنيا , ولو انا مكانك سويت نفس اللي سويتيه .
رتيل بابتسامه : الله لايحرمني منك ياخوي .
~ ~ ~
ابها...
حضنت يسرا قمر وهي تقول لها بفرحه : الف الف مبروك ياقلبي .
قمر بابتسامه : الله يبارك فيش .
يسرا بمرح : عاد اذا جبتي بنت سميها يسرا واذا هو ولد سعيد على اسم ابوي .
قمر : اذا كان بنت من عيوني اسمها يسرا بس اسمحي لي اسم سعيد مهب حلو .
يسرا بمزح : ترا اقول لسلطان اخليه يضربش .
ضحكت قمر : الله لايعيد تيك السالفه , وسلطان ماراح يضربني وهو يعرف اني حامل .
يسرا وهي تقرص خد قمر : قد لش شهر حامل وتو تتذكري تقولي لي .
قمر : هههههه والله حتى سلطان تو عرف وامي بعدها ماعرفت شي .
يسرا : مجنونه ماقلتي لآمك وتفرحيها ؟
قمر : انا يوم قالت لي شهد انها حامل تشجعت وقُلت لسلطان اني حامل .
يسرا بابتسامه : جيبي لولد شهد عروس , مانبغى عيال عايلتنا كلهم عيال .
قمر : والله اتمنى اني اجيب بنت , البنت احلى من الولد بكثير .
يسرا بمزح : قمر الله يخليش اخطبيني لأخوش فيصل عشان اجيب ولد مثل وسامته وتراني لايقه عليه بقوه .
قرصت قمر فخذ يسرا وبمزح : نفروبش تبغي شهد تزعلي علي ؟
يسرا وهي تفرك مكان قرصة قمر : قطعتي ارجيلي مره تضربيني ومره تقبصيني خلاص تقطعت .
قمر : ههههههههههههه ياحبي لش يايسرا - ووقفت قمر - بروح ابشر عمتي اني حامل .
يسرا بحزن : ماراح تعبرلش عن سعادتها ولا راح تفهمش خليها .
قمر بإستغراب : انتي تقولي عن امش كذا ؟ لا انا لازم اروح لخالتي واقول لها يكفي انها راح تسمعني مابيها تنجرح مني اذا جبت ولدي او بنتي وهي توها تعرف .
يسرا وهي تبكي : الله يشفيها امي صار عليهم حادث هي وابوي ابوي مات وامي بقت بالدنيا مشلوله ولا تتكلم من هول صدمتها صارت ماتتكلم .
قمر وهي تحضن يسرا : بس الحمدلله ربي اخذ منها وعطاها اخذ منها حركتها ونطقها بس خلا لها سمعها .
يسرا : الحمدلله على كل حال .
قمر بابتسامه : يله انزلي معاي على الاقل عمتي تفهم عليش اكثر من انها تفهم علي .
نزلو يسرا وقمر وشافو العمه على كرسيها المتحرك تتابع الاخبار .
باست قمر راس عمتها وبابتسامه : شخبارش عمتي ؟
ام هادي هزت راسها بمعني بخير .
قمر بابتسامه : عندي لش خبر راح يفرحش .
ام هادي حركة يدها بمعنى ( ايش هو ) .
قمر : انا حامل .
ام هادي ابتسمت ونزلت دمعه من عينها وصارت تتكلم بالاشاره .
قمر مسحت دمعة ام هادي وباست راسها ويدها : عمتي لا تبكين الله يخليش .
يسرا سحبت قمر : تعالي شوي بقولش امي وش قالت لش .
قمر : وش قالت ؟
يسرا ودموعها تنزل على خدودها : تقولش هي كانت تتمنى تربي عيال سلطان وتشلهم بس ربي ماكتب لها .
حينها انفجرت قمر ببكاء مرير .
~ ~ ~
بيت ابراهيم العامر...
هاجر بابتسامه : ما اوصيك يارهف جيبي لولد عبدالله احلى عروس .
رهف بابتسامه : وش فيكم علي امس عمتي مشاعل واليوم امي .
رتيل بمزح : ما الومهم يبون عروس حلوه لولدهم اللي زينه يغطي على العالم كله .
رهف بضحكه : اجل مابي اجيب له عروس انا ابي زوج بنتي رجال قول وفعل .
رتيل وهي تضرب كتف رهف بخفه : احترمي نفسك اصلا تحلمون ولدي يطالع بنتكم .
انفتح باب المدخل الرئيسي ودخل عبدالله بلبس الدوام ومعاه شنطته الطبيه .
قامو رهف وشهد وسلمو عليه .
وقبل راس امه : تو مانور البيت واخيرآ جيتي يارهف .
رهف بابتسامه : ايه ياسر عنده فتره مسائيه اليوم وجيت عندكم .
عبدالله بضحكه : هههههههه شكلي بحط كل يوم عنده فترتين .
رهف وهي تطالع رتيل : ترا اذا زوجك سواها اخليه من العصر الين بعد العشاء يجلس عندي انا وعمتي .
رتيل بضحكه : عادي اروح معاه - وبهمس لرهف - لو انا مو حامل كان رحت معاه للمستشفى من الصباح الين العصر .
رهف : ههههههه والله تسوينها , إلا انتي ليش سحبتي ملفك ؟
رتيل : عشان اتفرغ لزوجي وحملي انا مو ملزومه بالناس على قولة اخوك .
رهف : اطلعي ورا زوجك عيب يروح لجناحه وانتي هنا .
رتيل : ههههههههههههههه شوف مين اللي يعلمني الاصول , اذكر كان ياسر يطلع من البيت ويرجع وانتي ماتدرين عنه .
رهف بمرح : انا وياسر غير .
وقفت رتيل : عن اذنكم .
وطلعت تمشي مع الدرج ببطء تحس انها ثقيله وحركتها ثقيله .
وصلت جناحهم ودخلت وشافت عبدالله طالع من غرفة تبديل الملابس لابس ثوب ابيض ويجفف شعره .
جلس على الاريكه وسكرت رتيل التكييف طالعها عبدالله بإستغراب : انتي ماتحسين حر موت .
رتيل ببرود : اخاف تجيك جلطه يادكتور .
عبدالله بخبث : مهمته ؟
رتيل هزت كتفيها : لا , بس مابي اترمل ويطلع ولدي على الدنيا يتيم .
ضحك عبدالله : تفكيرك راقي يادكتوره .
رتيل وهي تجلس ع السرير : كيف مايصير راقي وانا عايشه عندك ؟
عبدالله مارد عليها لأنه كل ماتكلمو احتد النقاش بينهم وتهاوشو .
وهو تعب كل يوم وهو يتخانق معاها .
عبدالله وهو يوقف : انا بروح اجلس مع خواتي ياليت قدامهم تحترميني شوي .
رتيل بعصبيه : وانا متى قليت ادبي او ما احترمتك قدامهم ؟
عبدالله : من بعد مارجعتي لي ماجلسنا عند اهلي اخاف بعد ماتحترميني قلت انبهها لأني وقتها ماراح اسكت .
رتيل بسخريه : يعني تطلع قوتك ومراجلك علي قدام اهلك ؟
عبدالله مشى ومارد عليها .
مشت وراه رتيل .
ونزلت معاه .
وبعد ماجلسو وتقهو وبين سواليف اغلبها تدور بين عبدالله ورهف .
كانت رتيل ساكته مانطقت بكلمه من يوم جلست .
رهف بضحكه : مو عادتك رتيل ساكته .
ابتسمت رتيل وبمزح : مخليه المجال لك انتي لو ماتكلمتي احتمال يصير عندك مرض قهري , الله يعين اخوي عليك .
رهف وهي تطالع عبدالله : الله يعين عبود عليك انا مادري اشلون بتربين عياله انتي وتفكيرك المنحط .
عبدالله : رهيف ماسمح لك تغلطين على زوجتي .
رتيل بضحكه : هاهاها تعيشين وتاكلين غيرها يارهوف .
رهف بقهر مصطنع : اذا جيتي ببيتنا نستغل وجودك عندنا واقول لياسر على فعايلك فيني وهو بياخذ حقي .
رتيل طالعة بشهد اللي جالسه جنبها وهمست لها : وش فيك حزينه ؟ من اليوم .
صرخت رهف : لا تسحبين علي .
طالعتها رتيل ودارت نظرها لشهد وهي تعيد عليها السؤال .
شهد همست بحزن شفاف : انا حامل .
ابتسمت رتيل : والشي هذا يعني يحزن ؟ احمدي ربك وافرحي بالنعمه هذي .
شهد : بس لتين بعدها صغيره .
رتيل باستغراب : اي صغيره يرحم امك ؟ عمرها 5 سنوات لو غيرك كان عندها غير شهد على الاقل ولدين .
شهد : بس انا مابي اطفال الفتره هذي .
رتيل بإستغراب : بينكم خلافات انتي وفيصل ؟