الفصل 25
البارت الخامس والعشرون °•
مدخل البارت :
قال تعالى " إِنَّ فِي خَلْقِ السَّمَاوَاتِ وَالأَرْضِ وَاخْتِلاَفِ اللَّيْلِ وَالنَّهَارِ لآيَاتٍ لِّأُوْلِي الألْبَابِ * الَّذِينَ يَذْكُرُونَ اللّهَ قِيَاماً وَقُعُوداً وَعَلَىَ جُنُوبِهِمْ وَيَتَفَكَّرُونَ فِي خَلْقِ السَّمَاوَاتِ وَالأَرْضِ رَبَّنَا مَا خَلَقْتَ هَذا بَاطِلاً سُبْحَانَكَ فَقِنَا عَذَابَ النَّارِ " (90-91 أل عمران)
ياسر ابتسم على حركة فارس : طيب خلك بعيد عني انا ومرتي , وقولي وش كنت تبي جايبنا هنا العصر والجو بعده حار ؟
فارس بابتسامه : عشان انشغل عنك انت ومرتك وابعد عن مشاكلكم والقى شي يبعدني عنكم مثل ماطلبت بس مستحي منك .
ياسر بضحكه : لاتقول نبي ننزل للبحر مثل السنه اللي فاتت ترى بعد ذيك المره حرمت ادخل البحار .
فارس بجديه : لا والله السالفه من جد .
ياسر : قول طيب .
فارس بتوتر : ممم انا طالب يد عمتك احلام .
طالعه ياسر وبغضب : ظني الامور هذي ماينلعب فيها يافارس .
فارس بمرح : ليش انا مو كفو يا دكتور ياسر عشان تقول اني العب .
ياسر : لا ماقصدي بس عمتي مطلقه وانت عارف انها مطلقه من سنتين .
فارس : طيب وين المشكله حتى انا مطلق مافيها شي لو تزوجت مطلقه , واللي اقنعني بعمتك زوجتك .
ياسر : خلاص اكلم عمتي .
فارس برجاء : تكفى كلمها الحين .
ياسر هتف بغضب : مجنون انت الحين العصر مو وقت مكالمات .
فارس بضحكه : معلومه جديده ان العصر مو وقت مكالمات .
ياسر وهو يوقف : يله الحين اكلمها لو انها ماتنفع مكالمة الجوال بس لجلك يافارس بكلمها .
فارس بعد ماباس راس ياسر : جعلني فدا خشمك ياولد عمتي .
اتصل ياسر على عمته اللي ردت بـ : هلا والله بعريسنا الغالي .
ياسر بابتسامه : وهلا بعروستنا الجديده .
كحت احلام بحرج : اي عروس ياغبي ؟
ياسر : انتي جاء لك خاطب اليوم .
احلام بعتب : وانت شايف الوقت مناسب , اخوي مانشف تراب قبره وانت جايب لي خاطب .
ياسر : وش معنى اليوم عصبتي ماكأنه انتي اللي بيوم وفاة اخوك مسويه حفله لرهف , الحين له اسبوعين ميت .
احلام : بصراحه ياياسر ابوك بعيد عنا لا انا ولا انت تأثرنا بوفاته الله يرحمه .
ياسر بابتسامه : طيب لا تطلعينا من موضوعنا جايك خاطب جديد وابصم لك بالعشره ماراح تلقين احسن منه .
احلام بخجل : ياسر انت عارف وجهة نظري بالزواج جربت المره الاولى وعرفت اني فاشله .
ياسر بإعتراض : لا احلام انتي مو فاشله لاتحطمين حياتك عشان طليقك اللي مافيه مكان إلا يذكرونه بالشينه .
احلام : واكيد كالعاده اللي انت جايب لي اما واحد اصغر مني ولا واحد متزوج .
ياسر : لا المره هذي لا هو اصغر منك ولا هو متزوج .
احلام بإستفسار : مين ؟
ياسر بابتسامه : فارس ولد خالي .
احلام برعب : فارس ؟
ياسر : ايه وش فيك ؟
احلام بإنفعال : زوجته ميته من اسبوعين وهو جاي يخطب ؟ اسمح لي ياسر اخاف اموت واحنا ماجاء لنا مع بعض اسبوع يروح يتزوج .
ضحك ياسر : تفكيرك خطير , انتي عارفه انه طلقها قبل لاتموت , ومافيها شي لو خطب وهي ميته .
احلام : انا ما ابي اتزوج والحمدلله مرتاحه عند امي .
ياسر برجاء : احلام طالبك تفكرين بس المره هذي يمكن هذا عاشر عريس رفضتيهم تكفين عشان خاطري فكري .
احلام : ياسر انا تعقدت من الزواج كله ولا ابي اتزوج انا عارفه اني فاشله .
ياسر : اسألي رتيل عنه يصير حماها واكيد تعرفه زين .
ضحكت احلام : واذا وافقت عليه اصير سلفة رتيل .
ياسر بود : وانتي ماشاء الله عليك اخذه كل المواضيع مزح وضحك ؟
احلام : وش يمنع من الضحك والمزح دام السالفه كلها بخصوص الدنيا .
ياسر : بس الزواج مسؤليه مو مزح وضحك .
احلام بسخريه : يمكن عشان روحي المرحه اللي احسد عليها فشلت في تجربتي الاولى .
ياسر عصب عليها : احلام لو سمحتي فكري بعيد عن السماجه .
احلام : صدقني إذا ماصرت سامجه احس اني مريضه .
ضحك ياسر : طيب اذا طلعتي بقرار موافقه او رفض اتصلي علي اوكي ؟
احلام : ان شاء الله , مع السلامه .
قفل منها وطالع فارس : بتقكر .
فارس وهو يوقف : تكفى ياولد عمتي طالبك تحاول تقنعها .
ياسر : اقنعها بس ماراح اضغط عليها ولا راح اجبرها عليك تراها غاليه .
حس فارس بضيق اجتاحه : شفت ياسر جربت اللي احنا جربناه انا وعبدالله , رهف مجبوره عليك واحنا مكتفين ايدينا مالنا كلمه ولا راي .
ياسر شعر بحرج شديد من فارس : بس رهف بنت خالي وتأكد اني ماراح اقهرها او اضيمها .
~ ~ ~
بيت مشاعل العامر...
كانو جالسين رهف ورتيل وعبدالله عند مشاعل اللي استعادت صحتها بالكامل .
طالع عبدالله رتيل : رتيل ممكن تجين معاي شوي .
وقفت رتيل وهي تمشي وراه .
وقف بالصاله وهي جلست على الكنبه : رتيل ياقلبي الى متى واحنا كذا لا انا مرتاح ولا انتي مرتاحه لك شهر وانتي ببيت اهلك .
رتيل ببرود مغلف بنار تنهش صدرها : ومين اللي قالك اني مو مرتاحه بالعكس انا مرتاحه ببيت اهلي وامي واخوي مو مقصرين معاي بشي .
عبدالله : يعني كذا بتحرميني من شوفتك بكل مكان , قدمتي استقالتك من المستشفى عشان ماتواجهيني ؟
رتيل بحده : لا قدمت استقالتي لأسباب خاصه فيني ولا انت اخر اهتماماتي .
عبدالله جلس قدامها وحط رجل على رجل وهو يتفحص تفاصيل وجهها : انا اخر اهتماماتك يارتول ؟
رتيل حست ان قلبها يرتعش يكاد يخرج من بين حناياها قالت برعشه خفيفه : م م ماقصد .
ابتسم عبدالله وهو يمسك يدها : تصدقين تو اعرف انك جبانه وخوافه .
رتيل وهي تسحب يدها من يده : لو سمحت تكلم بدون ماتمسك يديني - وبقرف - قرفانه منك .
عبدالله بإستغراب : لهالدرجه كارهتني يارتول ؟
رتيل : واكثر مما تتصور .
ابتسمت رهف اللي جلست جنب رتيل : لا تقولون متطفله بس بصير حاجز بينكم , تعرف ياعبود زوجتك متقرفه منك عشان الوحم .
صرخت رتيل برهف : اي وحم انتي ووجهك ؟
رهف بابتسامه : اهدي اهدي جعلني فداك , انتي متقرفه من عبدالله يمكن حامل وتتوحمين .
عبدالله والامل عنده قد السماء : يله رتيل تعالي معاي للمستشفى .
رتيل هزت راسها بلا : انا مو حامل .
عبدالله : وش دراك يمكن حامل .
رتيل وهي تبكي وبإصرار : انا عارفه اني مو حامل .
رهف حست ان موقفها سخيف : رتيل ياغبيه وش فيك تبكين خلاص اسفه اذا الموضوع يضايقك .
وقف عبدالله : رهف روحي لغرفتك ولا عند عمتي .
قامت رهف وهي تقول بمزح : طرده محترمه يابراذر .
دخلت بغرفة عمتها .
وعبدالله جلس جنب رتيل واحتضنها بحنان : رتيل جعلني فداك وش فيك ؟
بعدته رتيل عنها وهي تقوم بسرعه وتتوجه للمغاسل وتستفرغ كل اللي بمعدتها .
تذكر عبدالله حالته يوم كان مسحور دب الرعب لقلبه .
طلعت رتيل بعد فتره وهي تعبانه توجه لها عبدالله : رتيل ياقلبي امشي معاي للمستشفى نشوف وش فيك .
هزت راسها بلا : بروح انام واصير احسن .
طلع عبدالله من البيت وهو قلقان على رتيل ورتيل راحت لغرفتها .
دخلت وقفلت الباب .
خذت لها شور ولبست بيجامه .
جلست على سريرها وكلت من الحبوب اللي اعطتها الدكتوره لتخفيف الوحم .
تمددت ونامت من التعب والارهاق .
~ ~ ~
بيت ابراهيم العامر...
هاجر : دفنتو غاده قبل اسبوعين واليوم بتخطبون لولدكم ؟
ابراهيم بابتسامه : يستاهل فارس كل خير ولا غاده خلاص طلعت من حياتنا ومانجيب طاريها إلا نترحم عليها وبس .
هاجر : وعلي عنده خبر ان ولد اخوه بيخطب ؟
ابراهيم : اكيد عنده خبر , انتي حلفتي ماتروحين تخطبين دام غاده مالها إلا اسبوعين من وفاتها انا بنتظر الين تشفى مشاعل وتروح معانا .
هاجر : الرجال يكفون مو لازم الحريم واغلب الخطوبات عندنا الرجال بس .
فارس : لا يمه لازم تروحين انتي ولا عمتي مشاعل عشان العروس تعرف قدرها .
هاجر وهي توقف : العروس عارفه قدرها وهي منا وفينا وعارفه ضروفنا .
نزل عبدالله مع الدرج وقبل راس امه وابوه وجلس جنب فارس وقاله ابوه : عبدالله الى متى ومرتك عند اهلها ؟
عبدالله بابتسامة الم : ان شاء الله اسبوع وهي راجعه .
ابراهيم بتحذير : لا تصير رخمه اذا كان تبيها جيبها غصب عنها واذا كان ماتبيها الشرع حلل لك ثلاث غيرها .
شهقت هاجر : تقول كذا يابراهيم ؟ ترضى على بنت اختك ان زوجها يتزوج عليها .
ابراهيم وهو ينزل فنجاله على الطاوله : بنت اختي ماحشمت ولدي واحترمته كل يوم وهو رايح لبيتهم إلى متى وهي ببيت اهلها .
عبدالله بهدوء : يبه رتيل تعبانه شوي .
ابراهيم وبخوف : وش فيها ؟
عبدالله : مافيها إلا كل خير بس انفلونزا .
اخذ عبدالله شنطته الطبيه ووقف .
هاجر بحنان : عبدالله افطر انت ماكليت شي .
عبدالله : افطر بالعياده .
وطلع لسيارته .
~ ~ ~
بيت مشاعل العامر...
طلعت رتيل من الحمام بعد ماخذت لها شور لابسه بيجامه .
طالعت بالساعه 6 ونص .
نزلت مع الدرج بهدوء .
شافت ياسر وامها ورهف جالسين يتقهوون .
قالت بمرح وهي تجلس جنب رهف : فيه احد يتقهوى الساعه 6 ونص الصباح ؟
رهف بمرح : حلات القهوه الصباح .
رتيل : ايه الصباح بس مو بهالوقت ع الاقل الساعه 10 او 9 مو الحين .
رهف بموده : تعالي تقهوي .
رتيل : لا شكرآ الايام هذي صايره ما اطيق ريحة القهوه .
تذكرت رهف حالة رتيل امس يوم كان عبدالله عندها وهمست لها : انتي حامل ؟
رتيل " الى متى وانا خايفه احد يعرف وكأني حامل من الشارع " : ممم ايه بس الخبر لايوصل لعبدالله .
وقفت رهف وبفرح وهي تطالع رتيل : من جدك رتول انتي حامل ؟
ضحكت رتيل وهي تسحب يد رهف عشان تجلس : ايه حامل .
رهف : الف الف مبروك .
رتيل بابتسامه عذبه : الله يبارك فيك .
مشاعل بفرح : عقبالك انتي وياسر .
كحت رهف بحرج ونزلت راسها للارض .
ياسر ابتسم لأمه : امين ان شاء الله تفرحين بشوفة عيالي - شدد على كلمة عيالي .
مشاعل : جعلني اشوفهم عرسان ان شاء الله .
رهف مافاتتها حركة ياسر بكلمة عيالي مو عيالنا " هذا مايعرف يجامل حتى قدام اهله "
وقف ياسر وهو يطالع رهف اللي منزله راسها للارض وتدعك اظافرها بابهامها صرف النظر عنها وباس راس امه ويدها : عن اذنكم مابي اتأخر على عبدالله .
مشاعل : اذنك معاك , الله يحفظك ويوفقك بكل خطوه تخطيها .
~ ~ ~
بيت ابراهيم العامر...
علي وهو ينزل فنجاله على الطاوله اللي قدامه : وشلون بتناسب الناس اللي بينا وبينهم ثار ويصيرون انسبانا قتال اخونا ؟
ابراهيم بحزم : زواج فارس وبنت عبدالرحمن ان شاء الله بيصير لو مهما كانو , وش ذنب البنت بفعل اخوها ؟
علي بغضب : ودامك مو اخذ رايي ليش تشاورني ولا انا رايي ماله اهميه عندك يابو فارس .
ابراهيم بهدوء : محشوم يابو غاده محشوم بس انا اقصد ان البنت مالها دخل وفارس يبيها .
علي : لا لها دخل اخوها قاتل اخونا اشلون نزوجها ولدنا ؟
ابراهيم : لا يابو غاده لا تخلي الماضي يقسي قلبك , انت اشلون زوجت بنتك لولد ناصر قاتل اخوك ؟
علي : ياسر بس نسبه يرجع لهم ولا هو ولد اختي ومنا وفينا وتربى بيننا .
ابراهيم : بس مهما صار هو ولدهم ويرجع نسبه لهم يعني انت مزوج بنتك ولد قتال اخوك , ليش يعني جات على فارس مايتزوج منهم ؟
علي بإنفعال : انت لاتظن اني بسوي سوات النسوان وازعل على فارس لأنه تزوج وطليقته توها ميته بس فارس غالي ولازم ياخذ وحده غاليه تسوى بنت عبدالرحمن واللي خلفوها .
ابراهيم بتحذير : لا تغلط على بنت عمك يابو غاده , مهما سوا فينا اخوها يبقون عيال عمنا وعمر الظفر ماطلع من اللحم .
علي : يعني انت بتخطبها لفارس عشانها بنت عمك ؟
ابراهيم : رهف اختارتها لأخوها ورهف وشهد يقولون ان اخلاقها عاليه وام فارس بنفسها تشهد لأحلام بالطيب والاخلاق .
علي : ودام اخلاقها عاليه ليش مطلقه ؟
ابراهيم بعقلانيه : قسمه ونصيب .
علي : كلامك صح بس انا خايف ان فارس يفشل معاها خصوصا انها مطلقه ويتعقد من الحريم .
ابراهيم : لا ان شاء الله مهب صاير إلا اللي يرضينا .
علي بتسأل : انت مو خايف من كلام الناس بعد ماتخطب اخت قاتل اخوك .
ابراهيم بابتسامه : وش فيك يابو غاده تراها بنت عمنا .
علي برجاء : طلبتك يابو فارس لاعاد تقولي ابو غاده قول ابو رهف ولا علي .
ابراهيم بحزم : تبقى بنتك اللي اشوفه ياخوي مو محزن عليها ولا كأنها بنتك , والله لو انها خدامتنا وتكرم غاده ميته وهي عايشه عندنا 25 سنه اكيد بحزن عليها ما اخفيك ان غاده سودت وجهي بس الحزن مفر لابد منه .
علي " ماتدري ياخوي كيف
هي حالتي بالبيت كل زاويه تذكرني فيها
الله يرحمها ماتت وانا غاضب عليها
يارب ارحمها برحمتك انك ارحم الراحمين "
ابراهيم طالع بعلي : وين سرحت ؟
علي : هاا لا معاك .
ابراهيم : ياخوي والله اللي صار لغاده مهب قليل واحنا مانبي نخطب لفارس اليوم ولا بكره خله على الاقل الين ينشف تراب قبرها مو زينه بحقنا نخطب لفارس وغاده لها اسبوعين ميته .
علي : عين العقل ولو ودي ان فارس يتزوج اليوم قبل باكر ويرتاح - وبهدوء - ويتزوج غير بنت عبدالرحمن .
ابراهيم بابتسامه : عبدالله يقول مرته تعبانه وانا الحين بروح اشوفها تروح معاي ؟
طالع علي بساعته : الساعه 9 إلا ربع مو بدري ؟
ابراهيم : لا اكيد مشاعل صاحيه بهالوقت .
~ ~ ~
مستشفى العامر...
بمكتب عبدالله جالس على الكرسي الفخم وقدامه اوراق استقالة رتيل وملفها .
" ليش يارتيل تسوين فيني كذا ؟
صبرتي علي وانا مريض مو قادره تعيشين معاي الحين .
لايكون بعد هي مسحوره ؟
اللي شفته امس منها يدل على انها مو طبيعيه
الله يستر "
دخل ياسر : صباح الخير .
عبدالله رفع راسه وبابتسامه : صباح النور .
ياسر بعد ماجلس : خلاص رتيل قدمت استقالتها ؟
عبدالله بهدوء خلف العواصف اللي بداخله : ايه .
ياسر بابتسامه : وانت عارف السبب ؟
عبدالله : لا , هي قالت لي انها ماتبي المستشفى وبس هذا السبب .
ياسر : لا هي حامل وماتبي تتعب وشكلها ماقالت لك .
وقف عبدالله بسرعه وهو مو مستوعب كلمة ياسر : رتيل حامل ؟ من جدك ياسر ؟
ياسر : ايه حامل .
عبدالله وهو ياخذ جواله ويدخله بجيبه : طيب خليك بمكاني الين ارجع .
ياسر بإستغراب : وين رايح ؟
عبدالله وهو بطريقه بيطلع : ماراح اتأخر .
وطلع بسرعه وركب سيارته وطلع لبيت عمته .
نزل من السياره وانتبه انه المعطف الابيض لازال لابسه خلعه بسرعه ودخل لبيت عمته رن الجرس وفتحت له الخدامه .
دخل وشاف رتيل ورهف ومشاعل جالسين بالصاله ويسولفون .
اول ماشافته رتيل المبتسمه اختفت ابتسامتها .
ظل عبدالله يطالعها مو منتبه لوجود رهف وعمته مشاعل .
وقفت رهف وتوجهت لعبدالله : صباح الخير عبود .
ابتسم عبدالله وهو يسلم عليها : صباح الورد .
واتجه لمشاعل وقبل راسها وهي تقول : حيالله من جانا ياهلا بولدي الغالي .
جلس عبدالله جنب رتيل وهو يقول : هلا بك زود ياعمتي , شخبارك ؟
مشاعل : الحمدلله بخير وصحتي رجعت مثل اول واحسن .
عبدالله بعتب : كذا يارتيل انا اخر من يعلم بحملك ؟
انتفضت رتيل وطالعت رهف : قلتي له وانا محرصه عليك ماتقولي له ؟
رهف : مو انا اللي قايله له , وهو لازم يعرف لأنه صاحب الشان واللي انتي حامل فيه تراه ولده .
رتيل بعصبيه : لا ولدي انا وبس .
مشاعل : رتيل احترمي وجودي على الاقل .
رتيل : على عيني وراسي يمه .
عبدالله بهمس لرتيل : حبيبتي عيب عليك اللي تسوينه فيني انا زوجك احترميني شوي .
رتيل بهمس بين اسنانه : لاتقول حبيبتي .
مشاعل : عبدالله يمه خذ زوجتك وتفاهمو بغرفتي على راحتكم .
مسك عبدالله يد رتيل ووقف وقفها معاه وهي تحاول تسحب يدها همس لها عبدالله بغضب : والله اذا مامشيتي معاي لأشيلك .
عصبت رتيل ومشت معاه دخلو بالغرفه وسكر الباب وترك يد رتيل .
جلست رتيل على السرير وعبدالله جلس على ركبه قدامها : رتول ياقلبي الى متى وهذا حالنا ؟
رتيل : اذا طلقتني بتنتهي المأساه اللي انت تتكلم عنها .
عبدالله بعصبيه وهو يوقف : والله ما اطلقك لو تنطبق السماء على الارض .
رتيل وهي تبكي : يعني بتقنعني انك تحبني ؟
عبدالله : ايه احبك وانتي عارفه قد ايش احبك , ولو ماحبك كان ماجيت اترجاك ترجعين لي .
رتيل بغصه : ودامك تحبني ليش تخونني حرام عليك ياعبدالله .
عبدالله وهو يجلس جنبها ويحتضن اكتافها بيده اليسرى : حرام عليك انتي والله تعبت وانا اترجاك ترجعين لي .
بعدت عنه رتيل وبقرف وهي توقف : لا تقرب مني .
ابتسم عبدالله : يقولون اللي تتوحم على زوجها تحبه .
رتيل " وعندك شك اني ماحبك " : تكفى عبدالله اعتقني لوجه الله خلاص لاعاد تجي انا مابيك انت ماتفهم .
وقف عبدالله : بس اخاف تندمين يارتيل .
رتيل : لا ماراح اندم .
عبدالله قبل جبينها وبثقه : صدقيني بتندمين كثير .
وطلع من عندها وهي جلست على سرير امها انهارت تماما .
" ليش ياعبدالله تسوي فيني كذا ؟
كل يوم يعني لازم تجي تقلب حالتي
خلاص والله مابيه مابيه
ولا راح ارجع له "
~ ~ ~
بيت ام ناصر...
جلست احلام جنب امها : احلام حبيبتي انتي ماعدتي صغيره عمرك 25 الى متى وانتي جالسه عندي ؟
احلام بمزح : ليش يمه انا مضايقتك ؟
عاليه بعصبيه : انتي متى تعقلين اكلمك بموضوع جد وتقلبينه ضحك , تو اتصلت علي ام فارس بتخطبك لولدها فارس .
احلام بهدوء : يمه انا صليت استخاره اكثر من عشر مرات ومرتاحه مره لفارس .
عاليه بإستغراب : وانتي وش عرفك انه بيخطبك ؟
احلام : ياسر قالي قبل امس .
عاليه : هاا شقول لأم فارس موافقه ولا لا ؟
احلام بتردد : مم يمه وش رايك ؟
عاليه : والله ولد العامر ونعم فيه وهو ولد عمك .
احلام بحيا : خلاص قولي لها اني موافقه .
عاليه وهي تحتضن احلام : ياجعلني ما اموت إلا انا شايفه عيالك .
احلام : يمه الله يخليك لاتجيبين طاري الموت .
عاليه بحزن : مافيه مفر من الموت اخذ ناصر بعد ماطلع لحياتنا مره ثانيه - وتحشرج صوتها - ليته مات بغربته ولا دريت انه مات مقتول من رجال الشرطه , إنا إليه راجعون اللهم اجرني في مصيبتي واخلف لي خيراً منها .
احلام : بس يمه ناصر اختفاء من 23 سنه ولا مره شفته ما اتذكر شكله ولا اعرفه واكيد انتي بـ 23 سنه هذي نسيتيه .
عاليه وهي تمسح دموعها : انتي سمعتي بأحد ينسى نفسه ؟ ناصر ولدي الوحيد ولدي اللي اخذته مني الدنيا وفرقتني انا وياه والى الحين وانا اتجرع مرارة فراقه وموته , الله يرحمك ياناصر .
احلام : امين .
~ ~ ~
بيت ابراهيم العامر...
بالصاله هاجر , فارس , شهد
هاجر : الف مبروك يافارس احلام موافقه عليك وبعد يومين بيخطبونها لك رسمي .
فارس بتوتر : يمه انتي متأكده انها مو مثل غاده .
تنهدت هاجر : غاده الله يرحمها ماشفت منها شي وطيبه معاي واخلاقها عاليه بس بعد زواج عبدالله تغيرت على رهف وشهد .
فارس : غاده امها ساحره واحلام اخوها مجرم يعني حظي كذا مو راضي يتعدل ؟
هاجر بفزع : حرام عليك تقول كذا هذي قسمه ونصيب واذا انت ماتبي احلام نعتذر لهم ونقول ماكتب الله اننا نخطب احلام لولدنا وسمع الله لمن حمده .
فارس بعد تفكير : لا انا ابيها وابوي يقول ماراح القى احسن منها ورهف وشهد قطعوها بالمدح ان شاء الله انها احسن من غاده .
شهد : ايه انا متأكده انها احسن من غاده .
فارس : ان شاء الله انها احسن , انا الى الحين مو مستوعب اللي سوته فينا غاده الله يرحمها .
ترحمو عليها هاجر وشهد .
دخل عبدالله وبعد ما القى عليهم السلام جلس جنب امه وقال بابتسامه : يمه ابشرك رتيل حامل .
هاجر انتظرت هذا الخبر كثير حتى توقعت وجزمت انها من اصعب احلامها وامانيها .
ابتسمت وهي فرحانه وقلبها يرفرف بالفرح : الله يبشرك بالخير , الف مبروك ياقلبي الله يتمم لها وييسر ولادتها .
شهد بعتب : الخاينه رتيل ماقالت لي ؟ لا هي ولا مرة اخوها رهيف .
هاجر وهي توقف : انا بروح اسلم على رتيل من اسبوع ماشفتها , تروحين معاي شهد ؟
وقفت شهد وهي تقول : ايه بس بغير ملابس بنتي .
عبدالله برجاء بعد ماباس راس امه : يمه رتيل تعزك كثير طالبك ماترجعين للبيت إلا وهي معاك .