الفصل 23
البارت الثالث والعشرون °•
مدخل البارت :
عَنْ أَبي هُرَيْرَةَ رَضِيَ اللهُ عَنْهُ أَنَّ رَسُولَ اللهِ صَلَّى اللهُ عَلَيْهِ وَسَلَّمَ قَالَ : « مَنْ جَلَسَ مَجْلِساً كَثُرَ فِيهِ لَغَطُهُ ، فَقَالَ قَبْلَ أَنْ يَقُومَ مِنْ مَجْلِسِهِ ذَلِكَ : سُبْحَانَكَ اللَّهُمَّ وَبِحَمْدِكَ ، أَشْهَدُ أَنْ لا إِلهَ إِلَّا أَنْتَ أَسْتَغْفِرُكَ وَأَتْوبُ إِلَيْكَ ، إِلَّا غُفِرَ لَهُ مَا كَانَ في مَجْلِسِهِ ذَلِكَ »
-
-
-
-
-
انتفضت رتيل : وين راح بالك يمه ؟ انا بروح لدكتوره تشوف حالتي .
مشاعل : روحي سوي فحص حمل - ووقفت مشاعل - امشي معاي الحين .
رتيل : لا يمه مابي اروح .
مشاعل : رتيل لاتكسرين فرحتي فيك يله قومي معاي نروح للمختبر , واذا مارحتي معاي الحين بتصل على عبدالله واقوله .
وقفت رتيل : لا خلاص بروح معاك الحين .
مشاعل بتحذير : بس مو تطلعين من البيت وانتي ما استأذنتي من عبدالله , اتصلي عليه الحين وقولي له .
رتيل ماتبي تتصل عليه من مكالمتهم قبل اسبوع ولا مره كلمته او هو اتصل عليها : يمه الله يخليك لاتجبريني على شي انا ما ابيه .
مشاعل بحنان : ياقلبي انا مو جابرتك على شي بس لازم تقولين لزوجك حرام تطلعين من البيت ماقلتي له .
رتيل : واذا كان بيننا مشكله مالها حل .
مشاعل : لو كان بينكم مشاكل الدنيا كلها مستحيل اخليك تطلعين من البيت وانتي ماقلتي له .
رتيل بضيقه : خلاص يمه مو لازم اروح للمستشفى .
مشاعل بعصبيه : يله اتصلي على زوجك وقولي له .
رتيل بإعتراض : يمه اذا قلت له بروح للمستشفى بيسألني ليش بروح .
مشاعل : خلاص انا اتصل عليه .
شهقت رتيل : لا يمه لا تقولين له .
مشاعل : ماراح اقوله .
واخذت مشاعل جوالها واتصلت على عبدالله : الو .
مشاعل : هلا وغلا , شخبارك ياولدي ؟
عبدالله : الحمدلله بخير , كيفك انتي ؟
مشاعل : الحمدلله عال العال , عبدالله انا عندي مراجعه بالمستشفى وابي اخذ معي رتيل .
عبدالله بغضب : وليش مو هي اللي تستأذن مني ؟
مشاعل انحرجت من عبدالله : ماخطرت على بالي انها هي اللي تكلمك .
عبدالله بخبث : طيب ماسمح لها تروح إلا اذا هي بنفسها كلمتني .
مشاعل : خلاص الحين تكلمك .
واعطت الجوال لرتيل اللي عقدت حواجبها : خلاص يمه مو لازم اروح .
مشاعل بعصبيه : كلمي زوجك بسرعه .
اخذت رتيل الجوال ووصلها صوت عبدالله وبسخريه : هلا بزوجتي المصون هلا ببنت الاصول اللي زعلانه بدون سبب .
رتيل تجاهلت كلامه : عبدالله ممكن اروح مع امي للمستشفى ؟
عبدالله : اوكي روحي مع عمتي بس ثاني مره يامدام اذا كان بتستأذنين تتصلين انتي .
رتيل : حاضر , مع السلامه .
عبدالله : مع السلامه .
قفلت منه واعطت الجوال امها .
ونادت الخدامه تجيب عبايتها .
مشاعل : رتيل حبيبتي وش فيك ؟ رجفتك هذي مو طبيعيه .
رتيل وهي تمسح جبينها بيدها اليمنى اللي ترجف : متوتره يمه مابي ولد منه .
مشاعل وهي تمسح على راس رتيل : بسم الله عليك , بسم الله عليك .
اخذت رتيل عبايتها من الخدامه ولبستها ولفت طرحتها ولبست نقابها وهي تحس انها هدأت تماما .
" وش هالتناقض اللي اعيشه ما ابي ولد من عبدالله وانا ابي عبدالله بنفسه "
طلعت مع امها .
وركبو بالسياره وشافت رتيل عبدالله قدام بيت اهله اللي جنب بيتهم .
ركب سيارته ورتيل تطالعه .
" الى متى وحياتي كذا
متى يجي اليوم اللي ارتاح فيه من الافكار هذي ؟
وهو ماخطر على باله يجي يراضيني ؟ بس كلمني مكالمه
بس ولو يجي يعتذر , هو يقول انه ما ارسل شي لسوسن .
معقوله سوسن تلعب علي بتشككني بعبدالله ؟ "
همست مشاعل لرتيل : من شفتيه وانتي سرحانه .
رتيل بضعف : يمه احس اني ظالمته .
مشاعل : ياقلبي عبدالله تربى مع ياسر وانا اعرفه مثل ما اعرف ياسر لا يمكن يكلم بنات , ومن صغره يعرف ان الدين تحته خط احمر مايتجاوزه وانتي عارفه انه مكالمة البنات محرمه .
رتيل ماتبي تلقى لعبدالله عذر او تعذره : بس يمه حتى لو سألتك عن غاده بتقولين نفس الكلام وهي تعدت عاداتها ومبادئها واشركت بالله عشان دنيا تافهه ماتستاهل .
مشاعل : صح ان غاده كانت تهتم للدين كثير وكانت ملتزمه بس امها غيرتها .
رتيل : يمه وانتي تصدقين كلام وحده مريضه مثل غاده ؟ هي كذابه ويمكن كل اللي هي تسويه قدامكم رياء .
مشاعل : ام غاده سحرت خالك علي وفتنت عليها صديقتها وانفك السحر وطلقها خالك واخذ غاده عنده ومن صغرها وهي متربيه عند ابوها تروح لأمها بس الخميس والجمعه .
رتيل : وامها اكيد علمتها السحر , انسحر خالي علي وانسحر عبدالله الله يستر الدور الجاي على مين .
مشاعل فز قلبها بخوف : فال الله ولا فالك الله يبعد عنا السحر .
رتيل بهدوء : امين .
~ ~ ~
باريس / شامب دي مارس...
اسبوع كامل ورهف ماطلعت من غرفتها ويوصلها الاكل وهي بغرفتها .
كرهت ياسر كرهته بقوه .
وقفت قدام المرايه وهي تشوف وجهها الشاحب .
" ليش يصير معاي كذا ؟
الله لايوفقك ياسر "
حطت على وجهها كريم وحطت كحل وجلست على السرير .
وانفتح باب غرفتها ودخل ياسر اللي لابس بنطلون اسود وقميص رسمي ابيض وجاكيت رسمي اسود اناقته لاحدود لها .
طالعته رهف : وش جابك هنا مثل ما انت مانعني ماطلع من غرفتي , حتى انا امنعك ماتدخل غرفتي .
ياسر بسخريه : ماحد يقدر يمنعني من حلالي - وبجديه - انا مو جاي عشانك , جاي اقولك رحلتنا بعد ساعتين تجهزي بسرعه .
فزت رهف وتوجهت له : انت مخلوق من ايش ؟ مو مثل البشر ولا صفه فيك صفات بشر , اشلون ماتقولي انه رحلتنا اليوم انا ماجهزت اغراضي يبي لي ع الاقل ساعتين اتجهز .
ياسر بسخريه : ليش بتاخذين باريس كله , كل اغراضك ملابس يجون الخدم ويرتبونهم لك بأقل من نص ساعه .
رهف : طيب اطلع برا بأتحمم واغير ملابسي .
طلع ياسر وسكر الباب .
وراحت رهف للحمام واخذت لها شور ولبست بنطلون وتيشيرت اسود وابيض .
وجففت شعرها ولفته كعكه .
ولبست عبايتها وطرحتها وخذت شنطتها الصغيره بيدها ونزلت تحت .
ابتسم ياسر وبإستهزاء : ماشاء الله 45 دقيقه وانتي جاهزه .
رهف وهي تجلس قدامه : وانت وش دخلك ؟
ياسر بسخريه : مو قبل شوي كنتي تقولين يبي لك ع الاقل ساعتين اشوف كلامك تغير .
رهف : قلت للخدم يجهزون اغراضي ؟
ياسر : ايه كل شي جاهز .
ووقف وطلع من عندها " حتى بدون مساحيق وجهها مشرق
وهي جميله وجمالها كل يوم يزداد اكثر من اليوم اللي بعده
ياربي الهمني الصبر "
ركب باللموزين الاسود الطويل الملئ من الداخل بالورود " الله يسامحك يا امي الحين هذي على بالها انه انا اللي مختار السياره هذي"
ركبت رهف وطالعت المكان " حتى الورد اللي انت حاطه انا اشوفه شوك "
جلست بالمقعد اللي قبال ياسر والتزمت الصمت .
وطلعو لمطار شارل ديغول .
ونزل ياسر وهي تمشي وراه جلسو بإنتظار طيارتهم .
~ ~ ~
الدمام...
حست رتيل ان الخبر نزل عليها مثل الصاعقه والخبر كانها سكاكين تنغرز في نحرها .
مو مستوعبه " ياربي انه مو صدق " وبصوت متهالك ورجفه : وش قلتي ؟
الدكتوره : النتيجه ايجايبه , انتي حامل لك 6 اسابيع .
حست رتيل بقرف .
وحست انها بحاجه ماسه للأستفراغ " انا احمل بأحشائي ولد لعبدالله ؟
لا ياربي انه يموت ولا اشوفه "
حضنتها مشاعل ورتيل بعالم ثاني .
مشاعل فرحانه بحفيدها الاول : الف مبروك ياقلبي الله يتمم لك على خير .
رتيل " وش تباركين عليه يا امي على ولد عبدالله الحقير ؟ "
مشاعل بإستغراب من رتيل اللي كأنه جثه بين يدين امها .
بس عيونها تتحرك منها وانفاسها متسارعه : رتيل يمه فيك شي ؟
رتيل انتبهت على نفسها وابعدت افكارها من راسها وهي توقف : لا يمه مافيني شي بس مو مستوعبه .
مشاعل : خلاص امشي للبيت انتي شكلك تعبانه , بكره نفتح لها ملف .
ختمت الدكتوره على الملف : لا خلاص انا خلصته .
واعطتهم ورقه : هذي مواعيد المتابعه .
اخذت مشاعل الورقه وحطتها بشنطتها وطلعت هي ورتيل اللي تبكي بصمت .
ركبو بالسياره ورتيل مازالت على حالتها مغطيه عيونها وتبكي .
مشاعل : رتيل حبيبتي فيك شي ؟
رتيل هزت راسها بإيه : احس بقرف .
شهقت مشاعل : حرام عليك هذا نعمه من ربي احمدي ربك على النعمه .
رتيل : الحمدلله على النعمه اللي انا فيها , بس انا قرفانه من نفسي مو من اللي ببطني .
تنهدت مشاعل : الله اعلم يابنتي وش اللي انتي مخبيه علي .
وصلو البيت وطلعت رتيل لغرفتها وقفلت الباب ورمت عبايتها ع السرير .
فكرت كيف تتخلص من اللي ببطنها .
" اعوذبالله من الشيطان الرجيم
اقتل نفس بريئه عشان عبدالله
استغفرالله العظيم واتوب اليه , استغفرالله العظيم واتوب اليه "
~ ~ ~
بيت ابراهيم العامر...
بعد ماوصلت شهد بيت اهلها .
وبعد ماغيرت ملابسها وارتاحت .
نزلت للصاله وشافت امها جالسه وتتقهوى مع عبدالله : من جد اشتقت لكم شهر واسبوعين ماشفتكم .
عبدالله : واحنا اكثر .
شهد بإستغراب : وين رتيل ؟ لي ساعتين من جيت ماشفتها .
عبدالله اخفى ضيقته خلف ابتسامته العذبه : الليله اخوها جاي من باريس اكيد بتروح لبيت اهلها .
هاجر وهي تطالع عبدالله : وقبل اسبوع اسألك وينها رتيل تقول تغير جو ؟ صاير شي بينك انت ورتيل ؟
عبدالله بألم : ايه صايره بينا مشكله .
شهقت شهد : من متى ؟
عبدالله : من اسبوع .
شهد بعصبيه : صراحه ياعبدالله مع احترامي لك انت ماتستاهل رتيل قايمه فيك وانت مسحور وتمد يدك عليها اكيد مو مقصره معك وانت تعاملها زين ليش تزعلها ؟
عبدالله بحزم : هي اللي تزعلني انا عمري مازعلتها بشي , اعتذرت لها بس مانفع الاعتذار .
هاجر : طيب وش صاير بينكم .
عبدالله : والله مشكله بسيطه بس هي اللي كبرتها وزودتها , خليها تجلس ببيت اهلها لما تطفش ماراح ادور رضاها .
شهد بابتسامه : ايه ماراح تدور رضاها بس اذا اشتقت لها يمكن تسكن ببيت عمتي .
عبدالله بمرح : بس ماراح اسوي سواة فيصل وكل يوم وانا ناط عندهم اقول بأقابلها .
شهد بغرور مصطنع : ما الومه فيصل ولا اشلون يعيش وهو ماشافني واشبع نظره بجمالي .
~ ~ ~
مطار الملك فهد الدولي...
بعد ماخلصو الاجراءات .
شافت رهف فارس واقف ينتظرهم .
راحت له تركض مشتاقه له حيل مشتاقه له هو بالذات .
ما اشتاقت لأبوها اكثر من اشتياقها لفارس ابوها لها شهر كامل ماشافته بس فارس له اسبوع من راح من عندهم .
بس يبقى اكثر واحد اشتاقت له فارس .
طالعها ياسر وهو ترمي نفسها بحضن فارس .
وصلهم ياسر وهو يسمع شهقات رهف تتعالى وهي تنتحب بحضن فارس .
همس لها فارس : الحمدلله على السلامه تو مانورت الدمام .
رفعت رهف نفسها من حضنه وباست كتفه : منوره بوجودك .
سلم ياسر على فارس : الحمدلله على السلامه .
ياسر : الله يسلمك .
فارس بابتسامه : ماتتخيل قد ايش عمتي مشتاقه لك كانت بتجي معاي بس ماقدرت .
ابتسم ياسر : والله اشتقت لها كثير اول مره ابعد عنها لمدة شهر .
مسكت رهف يد فارس وهمست له : تكفى فارس بروح معاك لبيت اهلي ما ابي ياسر طلبتك .
فارس شد على يدها : ياسر عن اذنك باخذ معي رهف تسلم على اهلي .
ياسر : لا زوجتي لازم تسلم على امي حتى رتيل فديتها جايه عند امي عشان استقبالنا .
رهف برجاء : تكفى ياسر بس اليوم تكفى .
ياسر بحزم : لا .
ركبو بسيارة فارس .
وتوجه فارس بسرعه لبيت عمته : ياسر طلبتك بعد ماتسلم رهف على عمتي بأخذها .
ياسر : خلاص بس تسلم على امي واختي وتطلع لك .
نزلو ياسر ورهف وهي سعيده انها بترجع مع فارس .
همس لها ياسر : بس تسلمين على اهلك وماتنامين الليله إلا عندي .
رهف بقهر : لا بجلس عند اهلي على الاقل يومين .
ياسر : وانا قلت الليله ترجعين .
رهف : اوكي .
دخلو بيت مشاعل .
وقفت رتيل وهي ترحب فيهم بحراره .
احتضنها ياسر وباس راسها : اشوف بيتنا منور .
رتيل بإبتسامه : منور بوجودك ياقلبي .
وسلمت على رهف : هلا وغلا بمرة اخوي .
رهف بود : هلا بك اكثر .
ياسر : وين امي والله مشتاق لها حيل .
رهف : الحين جايه .
خرجت مشاعل من المطبخ .
من شافت ياسر نزلت دموعها اللي هي جاهدتها .
تقدمت له وهو راح لها بسرعه وباس راسها ويدينها : الله يخليك لي ويطول بعمرك ماله داعي تبكين تراها دموعك غاليه .
حضنته امه وهي تمتم : دموع فرح جعلني ما ابكيك .
تأثرت رهف كثير ياسر الحنون مع اخته ثم مع امه مستحيل يصير القاسي العنيد اللي هي عايشه معاه .
تقدمت لعمتها وباست راسها : الحمدلله على سلامتكم يانور عيوني .
ابتسمت رهف بود وحب لعمتها : الله يسلمك يالغاليه ويرفع قدرك .
رتيل : سامحيني رهف ماقدرت اسوي لك حفله زوجك رفض يقول اليوم تعبانين وبترتاحون .
رهف بمرح : لا ياقلبي انا سوت لك حفله انتي لازم تردينها لي ولا مالي قدر عندك ؟
رتيل وبتسامتها تسع : قدرك محد يوصله .
رهف بضحكه : نصابه اصلآ من يوم انفك سحر عبدالله وانتي ناسيه الناس كلهم مادري اشلون بهالساعتين قدرتي تجلسين عند عمتي .
اختفت ابتسامة رتيل وانبترت سعادتها بمجرد ذكره
" اكرهك ياعبدالله الله ياخذك ويريحني منك "
ياسر لاحظ على رتيل تغير تعابير وجهها : خلاص رهف روحي مع اخوك ينتظرك اكثر من ربع ساعه .
رهف : عن اذنكم .
وطلعت رهف وجلس ياسر جنب رتيل : رتول وش فيك ؟
رتيل انتفضت : ولا شي , ليش انت وش شايف ؟
ياسر : تخبين على اخوك يارتيل ؟ صاير شي بينك انتي وعبدالله ؟
رتيل ماتبي تضايق ياسر بمشكلتها مع عبدالله : ياسر فديتك مو وقته الحين روح ارتاح .
ياسر بحنان : ماراح ارتاح وانتي متضايقه قولي لي وش اللي مضايقك ؟
رتيل : صدقني بتعرف بالوقت المناسب .
وطلعت لغرفتها .
~ ~ ~
بيت ابراهيم العامر...
دخلت رهف مع فارس بالبيت اطلقت آآه من اعماقها ونزلت دموعها وهي تتذكر حالها اخر ماطلعت منه .
فارس بخوف على اخته : رهف ياقلبي وش فيك ؟
رهف وهي تبكي : تكفى فارس ما ابي ياسر الله يخليك .
تنهد فارس : مايصير إلا تبين بس لاتبكين .
مسحت رهف دموعها ونزلت عبايتها واعطتها الخدامه .
ودخلت بالمجلس وهي ترسم على وجهها ابتسامه .
وقفت هاجر وتقدمت لرهف .
اشتاقت لها وانهكها الشوق .
ارتمت رهف بحضنها وهي تبكي .
كأنها مغترب عاد لوطنه عاد لأهله .
حياتها مع ياسر سيئه جدا جدا .
حياه اشبه ببحر عميق بدون منفذ للحياه وهي فيه غريقه .
هاجر وهي تمسح على شعر رهف : وش فيك ياقلبي ؟
رهف بعد مارفعت جسمها عن هاجر : بس اشتقت لكم .
شهد بمرح وهي تسلم على رهف : وانتي دايم دموعك جاهزه .
رهف بمرح مماثل : لاتنسين نفسك يام دميعه على اي شي تنزل دمعتك , وين عبود مشتاقه له .
دخل عبدالله وهو يقول : عبود بعينك .
طالعته رهف وسلمت عليه : دب اشتقت لك وانت ما كأن عندك اخت تتطمن عليها .
عبدالله بابتسامه : انا اخذ اخبارك من ياسر .
ابتسمت له رهف ورن جوالها .
شافت المتصل ياسر وحست ان ماعاد عندها اوكسجين .
اخذت نفس عميق وطالعت اخوانها وهاجر وشهد : عن اذنكم .
طلعت برا وردت بتوتر : نعم .
ماخفت ارتعاشة صوتها على ياسر : هلا رهف , نامي عند اهلك وبكره اذا طلعت من الدوام بأخذك .
رهف طغى عليها الفرح وكأنها بعز الهجير وانسكب عليها ماء بارد : مشكور ياسر .
ياسر بهدوء : العفو .
وسكر الخط .
دخلت رهف بالصاله وجلست جنب هاجر : وين غاده ؟ غريبه ماسلمت علي .
هاجر تلعثمت مو عارفه وش ترد عليها .
انقذها فارس : غاده بالمستشفى .
شهقت رهف ووقفت بخوف : وش فيها ؟
فارس : مصابه بمرض الوسواس القهري , هي اللي سحرت عبدالله وانا اخذت حق اخوي منها .
جلست رهف مكانها وهي مصدومه بقوه
" معقوله كل هذا يصير منك ياغاده حسبي الله وهو نعم الوكيل "
شهد بابتسامه : رهف وش فيك تصنمتي ؟
طالعتها رهف : ماتوقعت غاده تضرنا بشي .
شهد بابتسامه : فارس طلق غاده ومافيه إلا انا وانتي ندور له على عروس .
فارس بهدوء : لا فديتكم المسلم لا يلدغ من الجحر مرتين اخاف اتزوج وحده اسواء من غاده .
رهف وهي تطالع فارس : لا مو كل البنات مثلها .
فارس بألم : اذا بنت عمي اللي مني وفيني غدرت فيني وسحرت اخوي من اثق فيه .
هاجر : تكفى يافارس فرحني بعيالك .
فارس باس راس امه اللي جالسه جنبه : غاليه والطلب رخيص , شهيد جربنا ذوقها المخيس المره هذي على رهف .
رهف فكرت من ترشح لأخوها واخيرآ رست على وحده : وش رايك بأحلام عمة ياسر .
شهد بمزح : ياسلام عشانها من طرف ياسر رشحتيها اول وحده .
اعتلت وجه رهف حمره ندمت انها اختارت احلام وقالت بمزح : انتي مالك دخل .
طالعت هاجر بعبدالله اللي جالس جنب شهد وساكت وسرحان لبعيد .
هاجر بحنان : عبدالله يمه وش فيك ؟
طالعها عبدالله وابتسم : مافيني شي بس موضوع مثل هذا ما اتدخل فيه .
هاجر وهي توقف : تعال معي ابيك بموضوع خاص .
طلع عبدالله ورا امه وجلسو بمجلس الحريم : عبدالله وش بينك انت ورتيل ؟
عبدالله بهدوء : وصلتها رساله من احد الموظفات بالمستشفى اني على علاقه معاها وهي زعلت ولا رضت اننا نتفاهم .
هاجر بإستغراب : وهي كيف تصدق بالسوالف هذي ؟ رتيل مو غبيه عشان تمشي عليها اللعبه هذي .
عبدالله : صح رتيل مو غبيه بس السكرتيره اذكى مني ومن رتيل خذت جوالي وانا جالس مع رتيل وارسلت لنفسها من جوالي رسائل غزليه اقسم بالله سألت السكرتيره اشلون وصلت الرسايل وقالت هي اللي خذت جوالي وارسلت .
هاجر بحزن : حالك ياولدي مو عاجبني انت لازم ترجع زوجتك .
عبدالله بعد ما اخذ نفس عميق : والله اتمنى انها ترجع اليوم قبل باكر بس هي ماخلت فيها مجال للتفاهم ولا تبي تكلمني خليها على راحتها .
هاجر بغضب : لا هذا مو اسلوب تحلون فيه مشاكلكم .
~ ~ ~
بالسجن...
وصلو 3 اشخاص من الجنسيه التايلنديه اخوان زوجة ناصر بتايلند .
طلعوه من السجن بهدوء بعد ماعرفو ان فواز طلع لبيته .
ركبو بالسياره وانطلقو بسرعه .
وناصر راح يمشي بالشارع يدور له على تاكسي .
وبلمحة البصر انهارت كل تخطيطاتهم .
قدرو رجال الامن يلحقون ناصر .
ناصر صار يركض بسرعه لمكان مجهول .
اطلقو عليه ثلاث رصاصات .
وحده براسه ووحده بقلبه والثالثه ببطنه .
طاح ناصر على الارض غرقان بدمه .