الفصل 16
البارت السادس عشر °•
مدخل البارت :
( وَلَنَبْلُوَنَّكُمْ بِشَيْءٍ مِنَ الْخَوْفِ وَالْجُوعِ وَنَقْصٍ مِنَ الْأَمْوَالِ وَالْأَنْفُسِ وَالثَّمَرَاتِ وَبَشِّرِ الصَّابِرِينَ * الَّذِينَ إِذَا أَصَابَتْهُمْ مُصِيبَةٌ قَالُوا إِنَّا لِلَّهِ وَإِنَّا إِلَيْهِ رَاجِعُونَ * أُولَئِكَ عَلَيْهِمْ صَلَوَاتٌ مِنْ رَبِّهِمْ وَرَحْمَةٌ وَأُولَئِكَ هُمُ الْمُهْتَدُونَ ) سورة البقره آيه ( 155 - 157 )
-
-
-
-
-
الدكتور : والله مش عارف ائولك ايه يا استاز دئات الئلب مش منتزمه وكمان اضطراب حاد بنفسيتها .
فواز بخوف : يعني كيف دقات قلبها مو منتظمه هي بتموت ؟
الدكتور : العلم عند الله انا ما اعرف , بس هيا ساعتها محدوده والتنفس في انخفاض حاد .
شهقت العنود : نوال ساعاتها محدوده ؟
الدكتور : انا اسف على الاخبار اللي مش كويسه بس هذا امر ربنا .
العنود : ابي اشوف نوال .
الدكتور : اتفضلي .
دخلت العنود وهي تجر خطاها طالعت بنوال اللي ممدده على سرير ابيض والاجهزه محاوطتها مع كل مكان صرخت العنود وهي تشوف دقات القلب اللي بالجهاز تحدث صوت انذار بأن القلب توقف تمامآ .
راحت تركض العنود لنوال مسكت يدها البارده : نوااال , نواال .
هزت جسد نوال الغايبه عن الدنيا وببكاء شديد : نواال لا تموتين وتتركيني .
وصرخت : نوااال .
دخلو الممرضات ومعاهم الدكتور .
ومسكو ممرضتين العنود المنفعله وتصارخ عليهم .
طلعوها من العنايه وهي تبكي وتحاول تتخلص منهم : خلوني ابي اشوف نوال , خلووني .
~ ~ ~
بعد يومين من الاحداث اللي صارت .
مستشفى العامر...
طلعت مشاعل من المستشفى ومعاها عيالها ياسر و رتيل .
دخلت ببيتها وفتحت الانوار وطالعت رتيل بابتسامه : نور البيت بطلتك يابنتي .
رتيل بابتسامه بعد ماقبلت راس امه : منور بوجودك يا اغلى ام فالكون .
مشاعل بعد ماضمت رتيل : حياتي انتي جعلني ما انحرم منك .
رتيل : ولا منك يالغاليه .
ياسر : رتول عبدالله اتصل علي ويقول بيمرك على صلاة العشاء وياخذك .
رتيل بضيقه : لا ابي اجلس مع امي .
ياسر بهمس لرتيل : اذا عبدالله مضايقك قولي لي .
رتيل بتبعد الشكوك : ياسر وش فيك مو مصدقني انا وعبدالله مابينا شي واحبه وهو يحبني وعايشين حياه حلوه .
ياسر : اي حياه حلوه وهو مافكر باليومين اللي راحو يجي يتطمن عليك .
رتيل بإرتباك : طيب انا ابي عبدالله بسلبياته وايجابياته .
ياسر : رتول انا ما ابيك تعيشين حياه ناقصه .
رتيل : الحمدلله حياتي كامله .
مشاعل طالعتهم : وش فيكم ؟
ابتسم ياسر : بقنعها تجلس عندنا وهي تقول بتجلس هنا يومين وتروح لبيتها .
طالعت مشاعل برتيل اللي واقفه جنب ياسر : لا ياقلبي ابيك تجلسين عندي ع الاقل اسبوع .
رتيل حست بالإحراج : ان شاء الله اجلس عندك اسبوع بس مو بالوقت هذا انا لازم ارجع للبيت .
مشاعل : على راحتك ياقلبي .
ورن جوال رتيل وردت بـ : هلا وائل .
وائل يحاول يخفي حزنه عن رتيل : شخبارك رتيل ؟
رتيل بابتسامه وهي تجلس ع الكنبه : الحمدلله تمام , انت كيفك ؟
وائل : الحمدلله بخير , رتول ياقلبي بجيك الحين واخذك للبيت .
رتيل : لا الحين ما اقدر .
وائل اخذ نفس عميق : رتيل انتي عارفه انه كل شي يصير قضاء وقدر ولا ؟
رتيل بخوف : وائل صاير فيكم شي ؟
وائل : خالتي نوال تطلبك الحل .
ما استوعبت رتيل الخبر الصاعقه عليها إلا بعد فتره وبعدم تصديق : امـ امي وشـ , وش فيها ؟
وائل خاف على رتيل : رتيل ياقلبي كلنا بنمشي على هالدرب وكلنا بنموت .
رتيل استلمت للبكاء : وائل امي ماتت صدق ؟
وائل : لا اله إلا الله رتيل هذا قضاء وقدر .
رتيل بصعوبه : متى ماتت ؟
وائل : قبل يومين الله يرحمها .
شهقت رتيل : يومين وماقلتو لي , ما كأني بنتها ولازم اصير موجوده ؟
وائل : رتول ياقلبي والله ما ابي اخرب فرحتك بأهلك .
بلعت رتيل ريقها : وائل بعدين اكلمك .
وسكرت جواله ونزلته ع الطاوله اللي قدامها طالعتها مشاعل : رتيل حبيبتي وش فيك .
انهارت رتيل تبكي بقوه وبصوت مبحوح من البكاء : امي ماتت .
قامت مشاعل وجلست جنب رتيل وحضنتها : الله يرحمها ويغفرلها , تبينا نروح لبيتها الحين ؟
رتيل ببكاء : لا الحين ما اقدر ؟
~ ~ ~
جناح فارس وغاده...
غاده : فارس انت عارف ان رتيل تصير بنت عمتنا مشاعل ؟
ابتسم فارس : سبحان الله الاقدار جمعتهم .
غاده بتذمر واضح : وع ياكرهي لها كان عندي امل يطلقها عبدالله وتروح لأهلها بس الحين على كبدي وين ما اروح بلقاها .
فارس وهو يطالع غاده : وش هالكلام ؟
غاده بعد ماتأففت : اكرهها , الحيوانه هذي شايفه نفسها علي .
فارس بعصبيه : غاده حرام تقولين كذا وهذي بنت عمتي ما ارضى عليها .
وقفت غاده وبصراخ : ماجاء لها يومين بنت عمتك لا قول انك تحبها .
صفعها فارس على وجهها : هذي زوجة اخوي وبنت عمتي وانا مو خاين .
غاده وهي تحط يدها على خدها وتطالع فارس بصدمه : تضربني عشان الحقيره رتيل ؟
فارس وهو يحاول يتمالك نفسه : انتي تماديتي وكلامك ينرفز .
غاده وهي تبكي : 4 سنوات من زواجنا ولا مره مديت يدك علي والحين تمد يدك علي عشان رتيل ؟
فارس بعد ما اخذ نفس عميق : كل شي ارضى فيه ياغاده إلا تشككين بشرفي .
غاده بعد مامسحت دموعها : والله لتندم قد شعر راسك على الكف هذا .
فارس : بصراحه ياغاده حركاتك الايام هذي غريبه مره وامس متهاوشه مع شهد .
غاده : ايه وانت واقف مع اهلك ضدي .
فارس : هم اهلي .
غاده بعصبيه : وانا زوجتك , يعني اولى من اهلك .
فارس : طيب استهدي بالله واتركي العصبيه هذي .
غاده وهي تطالع بفارس : انا مو لعبه عندك تضربني وترجع تراضيني .
فارس : ومين اللي قال اني ابي اراضيك عمرك ان شاء الله مارضيتي .
غاده انقهرت منه : فارس بليز اطلع من هنا .
فارس وهو يوقف : خلاص بطلع ولا راح تشوفين وجهي مره ثانيه .
~ ~ ~
عصر يوم الجمعه .
بغرفة رتيل...
جالسه على سريرها ودموعها تنزل على خدودها بسرعه وهي صامته ومستمعه لأخوها ياسر اللي جالس ع الكرسي اللي جنب سريرها .
ياسر : الحمدلله هي صوامه قوامه وماتت بالعشر الاواخر من رمضان ماشاء الله عليها .
رتيل بعد مابلعت ريقها : مهما كان هذي امي واكيد بحزن عليها وحزني عليها يبي له شهوور .
ياسر : رتول ياعمري الاسلام شرع لنا الحزن 3 ايام بس حرام تزودينه .
رتيل : آآه غصب عني يا اخوي .
ياسر : الله يرحمها الحين لها 3 ايام ميته خلاص يكفي دموع .
رتيل بعد مامسحت دموعها : مو بيدي ياياسر .
ابتسم ياسر : يله رتول لا اشوف دموعك مره ثانيه , زواجي بعد كم يوم وابيك اسعد انسانه .
رتيل بحب لأخوها : يابعد عمري ياياسر الله يوفقك ويتمم لك .
ياسر : رتيل جالك يوم كامل حابسه نفسك بغرفتك خلاص حرري نفسك .
رتيل بألم : ياسر بروح اعزي اهلي وبسلم عليهم .
اشر ياسر على عيونه : من عيوني بس بعد الفطور .
رتيل : اوكي .
ياسر وهو يوقف : عبدالله اتصل علي يقول اليوم يبي يشوفك ضروري اقوله يجي او لا ؟
رتيل " آآه اشتقت لعبدالله 6 ايام ماشفته " : لا ما ابي اشوفه وهو ليش مايتصل علي .
طلع ياسر من عندها .
سكرت رتيل عيونها وسندت راسها على السرير وهي تبكي بمراره " ياربي خذ روحي وريحني من دنيا العنا اللي مو قادره اسعد نفسي فيها "
مسحت دموعها وهي تسمح طق خفيف على الباب وبصوت مبحوح : ادخل .
دخلت شهد ونزلت طرحتها على رقبتها : سلام عليكم .
رتيل بابتسامه : عليكم السلام .
تقدمت لها شهد وسلمت على رتيل بحراره : شخبارك ياقلبي ؟
رتيل بتعب : بخير الحمدلله .
شهد : عظم الله اجرك بأمك , والله كنت بجيك امس مع امي بس لتين تعبت .
رتيل : الله يجزاك خير حبيبتي .
شهد تحاول تغير جو الحزن : ياسر ورهف مابقى لهم إلا 10 ايام ونزفهم لبعض .
رتيل : الله يوفقهم , يمكن هذا اول زواج فرحتي فيه كبيره , بس ولو تبقى مكسوره .
شهد : وش هالكلام يارتيل الحمدلله ربي رحمنا بالحزن 3 ايام بس .
رتيل وهي تكتم شهقاتها وبغصه : شهد لو خالتي ميته بتفرحين وتعيشين مثل الناس ؟
شهد : ياقلبي كلنا راح نمشي مع الطريق هذا وحرام نحزن ومو زين الحزن .
رتيل : آآه ياشهد انا حياتي من بدايتها كذا من مصيبه لمصيبه اعظم .
شهد : حياتي لاتكدرين خاطرك والدنيا دار ابتلاء والمسلم اذا ابتلي صبر قوي ايمانك بربك واصبري .
تنهدت رتيل : ماعاد فيني صبر خلاص .
شهد : لا رتول ياعمري حرام الكلام هذا .
رتيل وهي تحاول تتماسك : الله يقوي قلبي .
~ ~ ~
غربت شمس اخر يوم رمضاني . واضيئت السماء بألعاب ناريه احتفالآ بعيد الفطر المبارك .
على سفرة الافطار...ببيت ابراهيم العامر.
مشاعل , هاجر , شهد , رتيل , رهف , غاده .
شهد بابتسامه وهي تطالع رتيل : تو مانور البيت .
رتيل بود : منور بوجودك ياقلبي .
مشاعل وهي تطالع رتيل اللي جالسه جنبها : ياعمري والله راح افقدك .
باست رتيل خد امها وبمزح : يمه خلاص مليت منكم انا مشتاقه لعبدالله يمكن من 12 يوم ماشفته .
مشاعل : ياقلبي الله لايحرمكم من بعض .
غاده اللي مازالت تحمل الحقد والكره لرتيل : لو هو مشتاق لك مثل ما انتي مشتاقه لك كان راح لك بالبيت .
رتيل ببرود : وانتي وش دخلك باللي بيننا ؟
غاده : عبدالله يكرهك وانا عارفه انه ايام معدوده وبيطلقك .
رتيل بعد مانزلت كوب عصيرها على الطاوله : هذا بعلم الغيب وما احد يعرف عنه إلا الله .
غاده بقهر : والله ماتجلسين مع عبدالله اكثر من سنه هو مو متحملك ماتحسين على دمك انتي ؟
هاجر وهي تطالع غاده اللي جالسه جنبها : غاده خلاص مو وقتك .
غاده وهي تحاول تخفي دموعها وبغصه : عمتي لاتصيرين معاها ضدي .
وطلعت من عندهم واراحت لجناحها دخلت وقفلت الباب وجلست على الكنبه وهي تبكي " ليش انا العقيم مو رتيل ؟ آآه ياقهري اذا رتيل جابت بنت او ولد والله راح ينسوني وفارس اكيد بيتزوج علي يارب لاتحقق امنية رتيل يارب انها ماتحمل ولا تجيب لهم اول حفيد "
رن جوال غاده ورفعته وردت بـ : هلا فارس .
فارس : حبيبتي تجهزي بنطلع نتمشى ونغير جو .
ابتسمت غاده : الله لايحرمني منك يافارس .
فارس : ولامنك , حبيبتي بعد مانصلي العشاء بنطلع نتمشى اوكي .
غاده : اوكي .
~ ~ ~
مجلس الرجال...
زياد بابتسامه : الله على هالخبر ياعبدالله واخيرآ برتاح , ناصر يحكم عليه بالقصاص .
عبدالله بتحذير : زياد ترا يبلاك الله قول الله لايبلانا وخلاص .
ياسر وهو يوقف : عن اذنكم .
ابراهيم : ياسر والله ماتروح عشانهم هم اللي يطلعون من هنا .
ياسر : لا ياخالي انا ابي اروح لجدتي وباخذ رتيل معاي تسلم عليها .
ابراهيم بابتسامه : موفق خير ياولدي .
طلع ياسر من عندهم واتصل على رتيل : رتول بروح لجدتي وعماتي تروحين معاي ؟
رتيل بابتسامه : ايه الحين جايه .
وركب ياسر بسيارته " بعد يومين بيزفون لي رهف , كنت اتمنى هالحظه من سنين بس الحين عفت رهف "
ركبت رتيل جنب ياسر وبمزح : اللي ماخذ عقلك يتهنى به .
ابتسم ياسر لها : الحين بنروح لجدتي عاليه , وعندها بس عمتي احلام .
رتيل بابتسامه : متحمسه ابي اشوف جدتي من طلعت على الدنيا ولا مره شفت عجوز اقولها جدتي الحمدلله ربي رزقني بجده .
ياسر : حتى جدتي والله تتمنى تشوفك بأسرع وقت من يوم عرفت انك اختي وتقولي جيب لي رتيل .
رتيل : لبئ قلبها والله سعادتي ماتنوصف .
ياسر بحب لأخته : جعلها دوم سعادتك .
ووصلو بيت الجده عاليه .
بيت كبير لونه ابيض قدامه حديقه غناء فيها مسبح وبالنص ممر من السراميك الشفاف وتحت ماء .
ودخلت رتيل بيت جدتها " بسم الله " لفظتها رتيل وهي تعتب باب المدخل .
خايفه ومتوتره . واقفه جنب ياسر وتنتظر جدتها بشوق ولهفه .
طلعت من الغرفه حرمه كبيره بالسن لابسه جلابيه ولافه طرحتها وتهلي وترحب بياسر ورتيل .
سلم عليها ياسر بحراره : ياهلا بولدي ياهلا بالغالي .
ياسر بعد ماقبل راسها : هلا بك يالغاليه .
وطالعت عاليه برتيل ونزلت دمعه من عينها تتليها دمعه وتقدمت لها رتيل ومسحت دمعتها والثانيه ضمتها وبصوت يتخلله البكاء : ياهلا ببنتي هلا والله بالغاليه , الحمدلله على سلامتك ياروح جدتك .
رتيل بعد ماقبلت راس جدتها : الله يسلمك ياجدتي .
عاليه وهي تضم على يد رتيل : وشلونك ياعمري ؟
رتيل بابتسامه : الحمدلله بخير .
نزلت بنت مع الدرج لابسه فستان ابيض ناعم تحت ركبتها وجاليه اسود جبنيز وشعرها الغجري منسدل بطوله الى اخر ظهرها : هلا والله برتول .
وسلمت على رتيل : انا عمتك احلام .
رتيل بابتسامه : هلا وغلا بعمتي .
احلام بإنبهار واضح : ماشاء الله رتول ملكة جمال .
رتيل بخجل : تسلمين من ذوقك .
احلام بعد ماباست خد رتيل : ياعمري والله فرحانه فيك .
رتيل حست بفرح وهي تشوف استقبال اهل ابوها لها : والله انا اللي فرحانه .
احلام : تفضلي .
جلست رتيل جنب عاليه وياسر جلس جنب عاليه ع الطرف الثاني طالعتهم احلام اللي واقفه : يمه مو تدلعينهم وتنسيني ؟
ضحك ياسر : انتي الدلع كله لك .
ارسلت له احلام بوسه بالهوا : تسلم , ترا امي مهتمه فيك هاليومين وبتكشخ فيك عشانك عريس .
ياسر بعد ماباس راس جدته : طول عمرها جدتي مهتمه فيني .
عاليه : انا ماحضرت زواج رتيل بس ان شاء الله افرح بعيالها .
احلام : امين يارب .
~ ~ ~
مجلس الرجال...
زياد وفارس وعبدالله جالسين بالمجلس بروحهم .
زياد : عبدالله والله عيب عليك من فتره ملاحظ عليك ماتصلي بالمسجد والمسجد جنب بيتكم حتى صلاة التراويح ولا مره صليتها.
عبدالله بحزن : انا اتمنى اروح اصلي بالمسجد بس فيه شي يمنعني ماقدر وربي ما اقدر .
فارس بخوف : وش فيك ياعبدالله ؟
عبدالله : والله مادري ما احب اروح للمسجد الصلاه بالبيت احسن .
زياد : انت تعرف فضل الصلاه بالمسجد ماله داعي تجلس بالبيت .
عبدالله بضيقه : ما اقدر اصلي بالمسجد .
وقف فارس : يله عبدالله قوم خلنا نصلي بالمسجد يمكن من زواجك ماصليت معانا .
وقفو عبدالله وزياد وطلعو مع فارس يمشون للمسجد اللي قريب من بيتهم .
دخلو المسجد مكان الراحه والرحمه والطمأنينه بيت الله بين اركانه يتلى القرآن وتحت اسقفه يذكر الرسول وبأسوراه تعلو كلمات الاذان .
اول مادخلو اقام الصلاه وبدء يصلون صلاة العشاء .
صوت الامام يعلو والجميع خاشعين بين دمعات خوف وخشيه من الله وتضرع وتوبه .
بين قلوب مطمئنه واخرى تشكي من الهموم .
اختل توازن عبدالله وطاح على الارض مغمى عليه .
~ ~ ~
بيت فواز الحمد...
غرفة العنود.
فجر وهي تسلم على راس عمتها العنود : شخبارك اليوم ان شاء الله احسن ؟
العنود الحزينه بعد فراق نوال : لا والله مو احسن وكل يوم حالتي تترداء , نوال ماتت وتركتني للدنيا والهم , وفواز محكوم عليه بالقصاص .
فجر وهي تمد كوب الحليب للعنود : عمتي استهدي بالله وهذا قضاء وقدر وامتحان من الله اصبري واحتسبي .
العنود بوجع : ماعاد فيني صبر كل الصبر اختفى بلحظه , نوال الله يرحمها هي نصفي الثاني راحت وخلتني وش بقا لي بالدنيا .
فجر : عمتي الحمدلله انتي عندك عيالك , غيرك محروم من كل شي - وبحزن - انا ماتو كل اهلي وخلوني وحيده الله يرحمهم .
العنود : الله يرحم امواتنا واموات المسلمين اجمعين .
فجر : عمتي الله يخليك تعالي معاي واطلعي للصاله سراب فاقدتك كثير لك 12 يوم حابسه نفسك هنا , بكره يوم العيد لازم نفرح فيه .
العنود وهي تبكي : هذا مو عيد ونوال ماتشاركني فرحتي فيه .
فجر وهي تمسح دموعها : الله يرحمها , تكفين عمتي لاتقولين كذا وكلنا راح نموت ماله داعي الحزن .
العنود : انا ابي اقول اللي بصدري يمكن ارتاح شوي .
دخلت سراب ومسحت العنود دموعها وبابتسامه باهته : هلا سراب .
سراب بعد ماقبلت راس امها : ماما ليش ماتجين تجلسين معانا ؟
العنود : تعبانه شوي وابي اجلس بروحي .
سراب : ماما وائل يقول تعالي للصاله يبيك ضروري .
وقفت العنود ومشت جنب فجر اللي ماسكه يد عمتها وسراب تمشي وراهم .
دخلو بالصاله ووقف وائل ومسك يد امه وجلسه ع الكنبه وبعد ماقبل راسها : كيفك اليوم ؟
العنود : بخير جعلك بخير .
وائل بابتسامه : ابشرك يمه خالي 6 شهور ويطلع من السجن .
العنود بعدم تصديق : اشلون يطلع بعد ست اشهر وهو قاتل ؟
وائل : لا خالي فواز ماقتل هو بس عشانه متستر على مجرم حكم عليه بالسجن 6 اشهر .
العنود بفرحه : اللهم لك الحمد .
~ ~ ~
المسجد...
بعد انتهى الصلاه زياد بفزع وهو يرفع راس عبدالله ويحطه على ذراعه : عبدالله , عبدالله .
فارس وهو يجلس جنب زياد : وش فيه ؟
زياد وخوفه يزداد على عبدالله : ما ادري شوفة عينك .
جاء امام المسجد : سلامات وش فيه عبدالله ؟
فارس : مادري ياعمي واحنا نصلي طاح والى الحين ماندري وش فيه .
امام المسجد : لازم تودي اخوك للشيخ (....) يقرأ عليه .
فارس : لا ما يحتاج بس هو مافطر زين .
امام المسجد : فارس ياولدي اخوك مريض ماتشوف وجهه اسود , الحين اتصل على الشيخ وتروح له .
فارس وهو يطالع زياد : يله زياد بنوديه للشيخ يشوف وش فيه .
رشو على وجه عبدالله ماء وصحى عبدالله وهو يحس بدوخه ووقف بمساعدة زياد وطلعوه للسياره ركبه زياد وراء وركب جنبه .
وفارس يسوق السياره .
وعبدالله تعبان ونفسه يعلو ويهبط وراسه مصدع .
وبعد ربع ساعه من المسافه المليئه بالخوف والتوتر . وصلو قدام بيت الراقي اللي ذكر لهم امام المسجد .
نزل فارس ونزل عبدالله مع زياد وهو متسند عليه .
دخلو بغرفة الشيخ بعد السماح لهم بالدخول .
جلس عبدالله قدام الشيخ وحط الشيخ يده على راس عبدالله وبدأ يقرأ الرقيه الشرعيه .
حس عبدالله انه مو قادر يتنفس مخنوق , مخنوق حيل .
اخذ اكسجين وبعد يد الشيخ اللي على راسه وصرخ : خلاص اسكت .