الفصل 14
البارت الرابع عشر °•
مدخل البارت :
(أَمَّن يُجِيبُ الْمُضْطَرَّ إِذَا دَعَاهُ وَيَكْشِفُ السُّوءَ وَيَجْعَلُكُمْ خُلَفَاء الْأَرْضِ أَإِلَهٌ مَّعَ اللَّهِ قَلِيلاً مَّا تَذَكَّرُون ) سورة النمل آيه 62
المحقق نواف : دكتور ياسر احنا قبضنا على فواز الحمد ولازم تكون موجود بالادعاء العام خلال 30 دقيقه .
ياسر وهو يوقف : الحين جاي , مع السلامه .
واتصل ياسر على عبدالله : الو .
عبدالله : هلا ياسر .
ياسر : عبدالله الحين انا رايح للادعاء العام بطلع من المستشفى وابي احد ينوب عني .
عبدالله : خلاص انا اتصل على الدكتور معتز , بس وش عندك بالادعاء ؟
ياسر : قبضو على فواز الحمد وان شاء الله عنده خبر عن ابوي .
عبدالله : زياد ولد عمي بيوصل بعد يومين ان شاء الله وتكفى لا يصير بينكم مشاكل عشان ابوك وابوه .
ياسر : لا يا عبدالله انا بصف خوالي ضد ابوي , هو ابوي وعزيز وغالي بس هو اللي تخلى عني .
عبدالله : انا اخاف تصير مشاكل بينك انت وزياد عشان سالفه قديمه .
ياسر : لا ان شاء الله مو صاير بيننا شي .
~ ~ ~
بيت ام فيصل...
ام فيصل : لاتصير رخمه وتمشي على كلامها اذا هيّه طلبت الطلاق طلقها .
فيصل بهدوء : وش اللي اطلقها الله يخليك لي واحنا عندنا بنت .
ام فيصل بكره لشهد : مهوب مشكله بنتكم تجيبها عندي انا ام إبيها واربيها عندي .
فيصل : لا يمه لتين ماتستغنى عن امها متعلقه بأمها كثير .
ام فيصل : فيصل يأبني مرَتَك مالها إلا انك تجيبها من الشرقيه هنا غصب عنها وتخليها تخدمك ولا تطلقها .
فيصل : ما اقدر يايمه انا احبها .
ام فيصل : خلف ماكُنت تطلب رضاي دحين تطلب رضاها على حساب زعلي ؟
فيصل باستغراب : ومن متى وانا اطلب رضاها ؟
ام فيصل : انت دحين تقلي ماتقدر تتركُها لأنك تحبها يعني تطلب رضاها .
فيصل وهو يوقف : يمه انا بكره رايح للشرقيه وباخذك معاي تعتذرين لها .
ام فيصل بعصبيه : مابقى إلا هي انا اعتذر من شهد لأنها غلطت علي ؟
فيصل : يمه والله قمر قالت لي ان شهد مظلومه .
ام فيصل : قمر كذابه شهد مدت يدها علي بس انا قُلت لها تكذب عليك لأجل ترجع حرمتك بس هي ماتبي ترجع لك ليه ترخص نفسك ؟
فيصل فكر بكلام امه : بس يايمه شهد عاشت معي 4 سنوات ماشفت منها الزله .
ام فيصل : ياولدي ياحبيبي زوجتك ماتبيك , شوف اخوك علي متزوج بعدك وعنده دحين بنتين وولد ولا شهد ماتبي عيال يرجع نسبهم واصلهم لنا .
فيصل : غريبه يايمه زوجة علي لها 3 سنوات وهي ساكنه هنا ولا مره تمشكلتي معاها .
ام فيصل : لأنها هي تحبني وماتبغي المشاكل ولا شهد شايفه حالها علينا لأنها بنت العامر .
فيصل بقهر : انا انخدعت فيها كثير .
ام فيصل : قبل زواجكم كانت تحبني كثير وتحب خواتك وبعد ما تأكدت انك معاها ضدنا انقلب حالها وصارت تكرهنا .
فيصل وهو يوقف : دواها عندي , ع بالها بوقف بصفها ضد امي واخواتي .
ام فيصل بابتسامة خبث : ايه هذي ولدي فيصل اللي اعرف لا تصير غبي خلك شديد معاها .
~ ~ ~
غاده وهي تجلس جنب شهد وتحط رجل على رجل : يقولون ابوك صديق القتله والمروجين ؟
رتيل بعد ما اخذت نفس : وانا وش علي من اصدقاء ابوي ؟
غاده بتستفزها : لا بس يعني ابوك مو زين اكيد انتي تربيته طالعه عليه .
شهد : غاده اسكتي او روحي لغرفتك لا تجين هنا تخربين جلستنا .
غاده وهي توقف : شهد انا بنت عمك وزوجة اخوك , هنت عليك ؟
شهد : انتي على عيني وراسي بس كلامك ماله داعي ورتيل ماتستاهل احد يقولها الكلام اللي قلتيه .
وقفت رتيل وهي تحس بقهرها من كلام غاده يزداد : خليها ياشهد هي جاهله ولا كان ماقالت الكلام هذا ؟
غاده : انا الجاهله ولا انتي يابنت الفقر ؟
رتيل : انا دكتوره ولا انتي اخر مستواك التعليمي شهادة ثالث ثانوي .
غاده بعصبيه : ماكملت دراستي لأني مو محتاجه الشغل والفلوس مثلك يابنت الفقر .
رتيل ببرود عكس غاده اللي تغلي من الغضب : شفتي قد ايش تفكيرك على مستوى تعليمك ؟ الشغل مو عشان الحاجه الماديه بالعكس انا اشوف انه عشان الحاجه النفسيه اكثر من الماديه .
غاده : لا تتفلسفين علي انتي لو مو محتاجه كان ارتحتي من الدراسه .
شهد : انا مو بحاجة الشغل وكملت جامعتي مو كل الناس مثل تفكيرك يا غاده , رهف اختك كملت جامعتها وكلنا مو بحاجه الشغل .
غاده : انتي ورهف غير شي طبيعي بنات العامر مو بحاجه للشغل ولا هذي قسم بالله انها اشتغلت عشان فقرها .
رتيل : طيب واذا كان انا فقيره فيها شي ؟
غاده : ايه فيها شي انتي مو من مستوانا , مصروفك كلها ما جاء بنص قمية جزمه من جزماتي .
رتيل بقهر : والله اللي اشوفه يا غاده فقر الاخلاق عندك واصل حده .
غاده : انتي مو من مستواي اشلون اتكلم معاك مثل غيرك ؟
ومشت من عندهم غاده وفتحت باب جناحها وجلست جنب فارس : حبيبتي وش فيك معصبه ؟
غاده بقهر : زوجة عبدالله شايفه نفسها علي عشانها دكتوره ولا انا معاي شهادة الثانويه العامه .
فارس باستغراب : زوجة عبدالله تسوي كذا ؟
غاده وهي ترفع حاجبها : وانت وش عرفك فيها ؟
فارس : اخوها وابوها رجال ونعم فيهم يعني مستحيل اخلاق بنتهم توصل للحد هذا .
غاده بعد ماباست راسه : طلبتك فارس ابي اكمل الجامعه واكمل الماستر والدكتوراه واصير دكتوره بالجامعه عشان اقهر رتيل .
فارس بابتسامه : غاليه والطلب رخيص باقي اقل من شهر على بداية الدراسه .
غاده : تسلم ياقلبي بس انا ما ابي ادرس الجامعه هنا .
فارس : وين بتدرسنها اذا مو هنا ؟
غاده : بلندن , او امريكا اهم شي ان شهادتي تصير اعلى من شهادة رتيل .
فارس : السنه هذي ما اقدر لأن فرع شركتنا اللي بلندن ماسكه زياد وان شاء الله السنه الجايه واحنا فاتحين فرع بأمريكا .
غاده : لا لا انا ابي قبل السنه الجايه .
فارس : خلاص مافيه إلا تدرسين بلندن .
غاده : جعل يومي قبل يومك يافارس .
فارس بعد ماقبل يدها : اسم الله عليك لا عاد تجيبين طاري الموت .
~ ~ ~
بيت فواز الحمد...
كان وائل يمشي جنب فجر اللي تو طلعت من المستشفى وماسك يدها وهي مسنده جسمها عليه وتعبانه حيل .
دخلها وائل بالغرفه وساعدها بخلع عبايتها وعلق العبايه ع الشماعه وهو يقول : تو مانورت الغرفه .
ابتسمت فجر اللي جالسه ع السرير : منوره بوجودك حبيبي .
وائل : والله كبرتي بعيني يافجر الله يخليك لي ولا يحرمني منك .
فجر وهي تبكي : وائل انا مو عارفه اشلون ارد لك جزاك والله اللي سويته قليل بحقك .
وائل بعد ما باس جبينها : خلاص فجر مافيه داعي للبكاء , واللي سويته معاك حق وواجب علي .
فجر بعد ماتمددت ع السرير : حبيبي بتروح تصلي التراويح ؟
وائل بابتسامه : ايه الحين بطلع .
فجر : طيب عمي فواز وينه حتى بعملية بنت اخته ماكان موجود .
اخذ وائل نفس عميق : خالي فواز الحين بالادعاء العام وبعد التحقيق بيروح للمستشفى .
~ ~ ~
المطار...
كان عبدالله بأستقبال ولد عمه زياد وامه لمياء .
شاف زياد متوجه له وراح له وحضنه : ياهلا والله بولد عمي واخيرآ نورت السعوديه .
اطلق زياد الآه الحبيسه بداخله اللي قدر يكتمها عشان مايضايق امه ولا يحسسها بشي : مارجعت إلا عشان ابوي .
عبدالله وهو يحضنه اكثر : خلاص يا زياد موضوع عمي منتهي اذا انت تبي اعدام لعمي ناصر راح يعدمونه .
زياد وهو يحاول ان دموعه ماتنزل : والله مايروح دم ابوي هدر .
عبدالله بهمس : تكفى يا زياد عمتي لمياء لاتحس بشي اللي فيها مكفيها .
زياد وهو يبعد عن عبدالله : لا توصي حريص .
وتوجه عبدالله لمياء اللي تبتسم له باس راسها : الحمدلله على سلامتك يا عمتي .
لمياء بحب لعبدالله : الله يسلمك يابوي .
وبعد السؤال عن اخبارهم اللي ماطول .
دف زياد الكرسي المتحرك اللي جالسه عليه امه وعبدالله يمشي جنبه .
ركبو بالسياره وطلعو لبيت ابراهيم .
ولمياء تبكي بصمت وهي تتذكر كل مكان جمعها هي وفهد .
نزلو وانصـــدم زياد بعد مافتح الباب لأمه عشان ينزلها وهو يشوف دموعها باس راسها وهو يحس ان قلبه انخلع من مكانه وهو يشوفها حزينه وتبكي باس يدها : الله يخليك لي لا تبكين .
لمياء وهي تمسك يد زياد : غصب عني ياقلبي تذكرت ابوك .
تنهد زياد : خلاص يمه خلينا ندخل تأخرنا على الناس اللي بيستقبلونا .
ونزلت بمساعدة زياد وجلست ع كرسيها المتحرك ودخلها زياد بالصاله وهو طلع لمجلس الرجال .
دخل وشاف عمه ابراهيم وعمه علي وفارس وياسر واقفين بيسلمون عليه .
سلم عليهم كلهم بحراره .
وقف قدام ياسر وهو متردد يسلم عليه او يتجاهله " انا مو رجال لو ماسلمت عليه "
وتشجع وسلم على ولد عمته وجلس جنب عمه ابراهيم : الحمدلله على سلامتك ياولدي , تو مانورت السعوديه .
زياد بود : منوره بأهلها .
وجلسو .
وصب فارس لهم القهوه .
ابراهيم : زياد يابوي انت توك جاي من سفر ولازم ترتاح وياسر وعبدالله تو جو من الأدعاء العام وطالبينك بكره تكون موجود عشان ابوك .
زياد بعد ماطالع ياسر ورجع يطالع عمه : بس انا ياعمي مو متنازل عن دم ابوي , وقت تنازلكم كان بأختفاء ناصر والحين ناصر رجع والحق رجع ودم ابوي غالي ومايروح هدر ولازم اشوف دم ناصر واشفي غليل السنين اللي راحت .
عبدالله : وانا اشوف هذا الصح ولازم يتعاقب ولا هذا كفو يعفونه .
ابراهيم بعصبيه : عبدالله احشم ياسر .
ياسر : لا ياخالي كلامهم صح وابوي مايستاهل يعيش ثانيه وحده وهو قاتل خالي فهد .
دخلت مشاعل بعد ماتأكدت انه مافيه رجال غريب : سلام عليكم .
الكل : عليـكم السلام .
سلمت عليهم كلهم .
وجلست جنب زياد : الحمدلله على سلامتك حبيبي .
زياد : الله يسلمك ياعمتي .
~ ~ ~
جناح رتيل...
وقفت قدام المرايه كل آثار الضرب مختفيه تمامآ .
انفتح باب المدخل وطلعت رتيل من الغرفه وطالعت بعبدالله : هلا عبدالله .
عبدالله وهو يرمي نفسه على الكنبه : ليش ماسلمتي على عمتي لمياء ؟
رتيل رد عليه وهي تجلس قدامه : سلمت عليها وحسيت اني غريبه بينهم وجيت .
عبدالله بعد ما اخذ نفس عميق : زوجة اخوك وبنت عمتك نجحت عمليتهم ماتبين تروحين لأهلك ؟ لهم يومين طالعين من المستشفى اجلسي عندهم ع الاقل يومين .
رتيل بإستغراب " هذي طرده بشكل غير مباشر " وببرود : لا ما ابي اروح .
عبدالله بلهجه امره : لازم تسلمين عليهم يله خذي عبايتك وامشي قدامي .
وقفت رتيل : طيب الحين بروح بس مو معاك .
عبدالله : تروحين معاي وغصب عنك .
غيرت رتيل ملابسها ولبست عبايتها وخذت شنطتها وطلعت مع عبدالله للسياره .
مشو مسافه وعبدالله يحس انه مو قادر يتنفس زاد سرعة السياره .
رتيل بخوف : عبدالله هدي السرعه ماتشوف السيارات والزحمه .
عبدالله بعصبيه : اسكتي لا اسمع حسك .
وصلو بيت فواز ونزلت رتيل ودخلت بيتهم اللي جالها شهرين واكثر ماشافته .
وعبدالله نزل لقسم الرجال بعد ما استقبله وائل .
دخلت رتيل بالصاله ونزلت دموعها وهي تشوف بيتهم اللي اشتاقت له ضمها وهي صغيره واحتواها وهي كبيره .
طلعت امها من المطبخ : ياهلا وغلا ببنتي .
وسلمت عليها رتيل : هلا بك يمه - وبكت بقوه - آآآه يمه مشتاقه لك .
نوال وهي تطالع برتيل اللي تبكي : رتيل حبيبتي فيك شي ؟ ليش تبكين كذا ؟ مو مرتاحه مع عبدالله .
رتيل " والله ما عدت اعرف طعم الراحه من بعد زواجنا " وبابتسامه مصطنعه : لا يمه الحمدلله مرتاحه معاه بس والله مشتاقه لكم , وين سراب وعمتي وفجر ؟
نوال : عمتك بغرفتها مع سراب , وفجر بغرفة وائل اللي صارت الحين غرفتها .
طلعت رتيل لغرفة فجر وطقت الباب ودخلت وشافت فجر جالسه ع السرير ومسنده ظهرها على المخده ووجها ذبلان من التعب وتحت عيونها هالات سوداء سلمت عليها رتيل : الحمدلله على سلامتك ياقلبي .
فجر بابتسامه : الله يسلمك حبيبتي , سلامات يقول عبدالله انك تعبانه .
رتيل بكذب : ايه اليومين اللي راحت جاتني انفلونزا .
فجر : سلامتك ياقلبي ماتشوفين شر .
رتيل بود : الشر مايجيك , ماشاء الله والله وائل محظوظ فيك .
فجر بابتسامه : تسلمين حبيبتي .
ووقفت رتيل : عن اذنك بروح اسلم على سراب .
فجر : اذنك معاك .
طلعت رتيل لغرفة عمتها ودخلت بعد ماطقت الباب وسلمت على عمتها وعلى سراب اللي نايمه : الحمدلله على سلامة سراب .
العنود : الله يسلمك ياقلبي , كيفك انتي وان شاء الله خفت الانفلونزا ؟
رتيل : الحمدلله بخير .
العنود : والله مشتاقين لك كثير - وبمزح - وانتي ماتمرين ولا تسلمين ؟
رتيل حست بإحراج فعلآ مقصره بزيارة اهلها كثير : اعذروني والله برمضان ماعندي وقت نهائيآ دوامي من 9 الصباح الى 9 بالليل .
العنود : الله يعينك , رتول عبدالله هنا ؟
رتيل : ايه بالديوانيه مع وائل .
وقفت العنود : انا بروح اسلم عليه .
رتيل وهي توقف : وانا بعد بروح اشوف غرفتي من زمان عنها .
وطلعت من غرفة عمتها ودخلت بغرفتها اللي اشتاقت لها كثير .
رن جوال وردت بـ : هلا .
رهف : هلا رتول وينك ؟
رتيل : عند اهلي .
رهف : تعالو بسرعه .
رتيل بخوف : وش صاير ؟
رهف : كل خير ان شاء الله بس انتي تعالي .
رتيل : اوكي , مع السلامه .
ونزلت تحت بسرعه : يمه رتيل تعالي تقهوي معاي والله اشتقت لك كثير .
رتيل وهي تلبس عبايتها بإستعجال : اتصلت علي رهف اخت عبدالله وتقول تعالي بسرعه .
نوال : وش صاير ؟
رتيل وهي تلبس نقابها : ما ادري بس شكلها مصيبه .
نوال وهي توقف : طيب اذا عرفتي قولي لي .
رتيل بعد ماقبلت راس امها : ان شاء الله , مع السلامه يمه .
وطلعت للسياره وشافت عبدالله ينتظرها ركبت رتيل : سلام عليكم .
عبدالله بهدوء : وعليكم السلام .
رتيل بخوف : عبدالله وش صاير ؟
عبدالله : ما ادري امي تقول لازم نروح لهم الحين .
وطلع عبدالله للبيت والصمت هو سيد الموقف بالسياره .
ورتيل خايفه كثير .
وعبدالله متوتر .
ووصلو ونزلو وعبدالله يمشي جنب رتيل .
فتح عبدالله باب المدخل ودخلو .
هاجر واقفه وتكلم بجوالها .
رهف جالسه ع الكنبه وتبكي .
شهد جالسه جنب رهف وبحضنها بنتها وتحاول تتماسك .
رتيل ماعادت تتحمل المنظر هذا " اكيد صايره لهم مصيبه"
تكلم عبدالله بصعوبه : ابوي فيه شي ؟
هزت رهف راسها بلا .
وشهد قامت وراحت لغرفتها .
رتيل زاد خوفها وتوترها وصارت ترجف : رهف وش فيكم ؟
قفلت هاجر من مكالمتها وطالعت بعبدالله اللي يطالعها : يمه وش صاير ؟
هاجر بإرتباك : عمتك مشاعل بالمستشفى وتبي تشوفك انت ورتيل .
عبدالله بخوف : وش فيها ؟
رهف بصوت يرجف وهي تحاول ترتب كلماتها : ج,جاتها صدمه عصبيه .
رتيل : وش سببها ؟
هاجر : ما ادري يله روحو لمشاعل والله تعبانه .
رتيل باستغراب : وانا لازم اروح ؟
هاجر : ايه هي قالت لي لازم تجينها .
رتيل قلبها مو متطمن " الله يستر "
وطلعو هي وعبدالله وركبو بالسياره وطالع عبدالله برتيل : عمتي تعبانه وتبي تشوفنا انا احس انه فيهم شي .
رتيل بعد مابلعت ريقها : عبدالله الله يخليك بسرعه روح للمستشفى .
وحرك عبدالله السياره وتوجه لمستشفى العامر .
دخلو ورتيل تحس انها مو قادره تمشي خلاص ماعاد فيها تحمل .
دخلو بغرفة مشاعل بعد ماسألو عنها الرسبشن .
وطالعت رتيل بالموجودين .
مشاعل جالسه ع السرير الابيض ومتغطيه عن فواز اللي واقف جنب رجال غريب اول مره تشوفه رتيل ( ناصر ).
ياسر واقف وراء سرير امه وجنبه خواله ابراهيم و علي .
عبدالله بخوف : وش فيكم ؟
مشاعل وهي تبكي اخذت الملف الاصفر اللي جنبها واعطته عبدالله : هذا فيه كل شي .
مسكه عبدالله بيدين ترجف وفتح اول صفحه .
شهادة ميلاد .
الصفحه الثانيه .. ملف تطعيمات لطفل .
الصفحه الثالثه .. شهادات مدرسه .
الصفحه الرابعه .. وثيقة الجامعه .
وعبدالله الى الان مو فاهم شي : عمتي كلها اوراق تخص رتيل .
مشاعل وهي تبكي بقوه : رتيل يمه تعالي .
راحت لها رتيل وهي تحس ان ريقها جف باست راس مشاعل وتفاجئت من مشاعل حضنتها بقوه .
#16