الفصل 13
البارت الثالث عشر °•
مدخل البارت :
عن ابي قتاده بن ربعي الانصاري ان رسول الله صلى الله عليه وسلم مر عليه بجنازه فقال: ( مستريح ومستراح منه ) قالوا : يارسول الله ماالمستريح وماالمستراح منه؟ قال ( العبد المؤمن يستريح من نصب الدنيا واذها الى رحمة الله والعبد الفاجر يستريح منه العباد والبلاد والشجر والدواب ) رواه البخاري
-
-
-
-
-
ام وليد بتقهر رتيل : ها يام فارس متى ناويه تخطبين اشجان لعبدالله ؟
تركت رتيل الجوال اللي بيدها ورفعت راسها بصدمه .
طاح جوال رتيل على الارضيه واحدث صوت قوي وطالعت بهاجر وهي تحاول تتماسك وتفهم وش السالفه .
هاجر بتهدي الوضع : ومن قال اني بخطب لعبدالله ؟
ام وليد : ما ادري ليلة زواجه مو اتفقنا ان اشجان لعبدالله , لا تخلفين وعدك يام فارس .
هاجر : ما اخلفت وعدي ولا ابي اخلفه بس هي ماتصلح له وعبدالله الحمدلله متزوج .
ام وليد : وش المانع لو تزوج وحده ثانيه , وبرايك انتي رتيل بتجلس مع عبدالله سنه او سنتين اكيد لا , هو اخذها بس كذا يمكن بيحسن عليها .
وقفت رتيل وطلعت لدورات المياه دخلت وقفلت باب الحمام وخذت نفس عميق وهي تحاول انها ماتبكي عشان مايخرب ميك ابها .
~ ~ ~
اشجان بقهر : يا خالتي امي بتفسخ خطوبتي انا ومحمد عشان تزوجني لعبدالله , يعني عبدالله راح يرضى فيني ؟
خالتها ( اميره عمرها 25 ) : لا لا ما اتوقع اختي تسويها امك عندها كرامه اشلون ترميك على الرجال .
اشجان : ما ادري ياخالتي هي قالت لي من زمان وانا قلت لمحمد وهو يقول لو يوصل الدم للركب ماراح يتخلى عني .
اميره بعد مارشفت من فنجالها : ودام محمد قالك كذا ليش انتي مضيقه خلقك ؟
اشجان بقهر : انا ماشفت مثل اعصابك اقولك ماما بتزوجني لواحد مو راضي فيني وتقولين ليش مضيقه خلقك ؟
اميره : والله من جد اذا محمد يحبك والله مايفسخ الخطوبه لو ايش , ويمكن عبدالله احسن من محمد .
اشجان : لا مستحيل عبدالله اصلا واضح انه عصبي , ولا حمودي الله يخليه لي حنون وطيب .
اميره : والله بصراحه انا عندي عبدالله احلى اخلاق وشكل ومنصب وكل شي بعبدالله احلى من محمد , ويكفي ان عبدالله مدير المستشفى اللي يشتغل فيه محمد يعني يأمر محمد .
اشجان : وانتي هذا همك , اميره اذا عندك حل قولي لي اذا ماعندك خليك ساكته .
اميره بابتسامه : قولي لمحمد يستعجل بسالفة زواجكم عشان مايقدرون يسوون لك شي , اقول شوشو انتي ماتبين عبدالله ولا ماتبين تصيرين ضرة رتيل ولا تحبين محمد ؟
اشجان وهي توقف : اميره من جد انتي سامجه وانا الغلطانه اللي اجلس معاك .
مسكت اميره يدها : لا لا والله من جد انتي مو موافقه على عبدالله عشان الثلاث اشياء هذي وواحد منهم هو السبب الرئيسي .
اشجان : لا والله كلهم الاسباب الرئيسيه .
اميره : ياشيخه والله لو مكانك اخلي محمد الطفران واتزوج عبدالله الملياردير .
اشجان وهي تجلس : اذا كان محمد طفران انا من طبقة عبدالله يعني اقدر اساعد محمد .
اميره : انا اول مره اسمع بحرمه تصرف على زوجها .
اشجان : لا فيه كثير .
اميره : الحمدلله ربي رزقني بزوج حلو ومقتدر .
~ ~ ~
طلعت رتيل للمغاسل ووقفت قدام المرايه الكبيره تشيك على مكياجها ولبسها .
مكياجها ما اخترب بس الدموع مجتمعه بعيونها .
خذت منديل ومسحت دموعها وطلعت للقاعه .
جاتها رهف قبل لا توصل رتيل للطاوله : تعالي حجزت طاوله ثانيه مانبي نجلس جنب النفسيه هذي .
وجلسو بطاوله بعيده عنهم .
ومدت رهف جوال رتيل : جوالك .
اخذته رتيل وهي ماتكلمت وتفكير بعبدالله " يعني سبب انقلاب عبدالله وحالته النفسيه المتدهوره خالتي هاجر وام وليد , وخالتي مسويه نفسها الطيبه اللي تحبني ؟ بس على مين يا خالتي انا رتيل ماراح استسلم لكم "
رهف : رتول حبيبتي لا تهتمين لكلامها تراها كذابه ومستحيل عبدالله يتزوج عليك , لسه عرسان تو يكمل لكم ثلاث اشهر من زواجكم .
رتيل بعد ما اخذت نفس : انا صدمتي مو من عبدالله , صدمتي من خالتي اللي مسويه نفسها تحبني ومعتبرتني بنتها وانا ياغافل لك الله ماكنت ادري ان وراء الحب هذا والاهتمام مصيبه وبيزوجون عبدالله .
رهف بحب لرتيل : ياقلبي يارتيل والله امي تحبك وهي اصلا تتمنى لك الخير بس هذي كذابه .
رتيل بتغير الموضوع لأنه قلب مودها : والله السالفه هذي مضيقه خلقي تكفين دوري لي سالفه غيرها .
رهف : انتي جد صديقة اشجان ؟
رتيل : ايه ليش ؟
رهف : بس امها تكرهك مره وواضح انها تكرهك , ترا من زمان وهي تبي اشجان لعبدالله بس امي تقول اشجان ماتصلح لعبدالله .
رتيل بابتسامه : فيه سؤال محيرني من يوم تعرفت عليكم الى اليوم مالقيت له جواب .
رهف بدلتها الابتسامه : وش السؤال ؟
رتيل : اشلون انتي تصيرين اخت فارس وهو متزوج اختك غاده يعني ماتصير اخته ؟
رهف : لا انا وغاده خوات من الابو .
رتيل بابتسفسار : انتي بعمر شهد صح ؟
رهف : ايه لبئ قلبها اختي ما كأنها صغيره مثلي .
رتيل : ههههههه لا والله شكل شهد اصغر منك , بس هي متزوجه وهي صغيره ولا انتي توك تشوفين الحياه .
تضايقت رهف من طاري زواجها وحاولت ماتبين ضيقتها قدام رتيل : وش كان شعورك قبل زواجك ؟
رتيل : اكيد توتر وخوف بس فيني سعاده يمكن لأني بتزوج عبدالله اللي ماشفت احلى منه بالاخلاق ولا بالتعامل مع الناس .
رهف : طيب تتوقعين ياسر مثل فارس وعبدالله او لا ؟
رتيل بابتسامه : لا احس ياسر احن منهم لأنه هو وحيد امه .
رهف : والله خايفه ماتعودت على رجال قاسين لأن اوبوي وعمي واخواني حنانهم مغطيني .
رتيل : وياسر ان شاء الله مثلهم .
رهف : ماشاء الله عليك يارتيل والله ماشفت بحنان عبود نهائيآ .
رتيل " على غيري حنون بس قدامي شخص ثاني وحش مو انسان " : بصراحه انا ضد ان الرجال يصير قاسي , خصوصا على الحرمه .
رهف : اي والله من جد فيه رجال مستقوين على زوجاتهم وبناتهم وخواتهم ما ادري اشلون يتحملون .
رتيل : مايسوي كذا إلا اشباه الرجال .
وبدا الحفل وكرمو ام فارس الداعم الرسمي للجمعيه وكرمو بناتها رهف وشهد وزوجات عيالها رتيل وغاده .
وتعرفو سيدات الاعمال على رتيل اللي اول مره يشوفونها .
ام عادل : ماشاء الله لا إله الا الله زوجة ولدك قمر الله يخليها له .
ام فارس بابتسامه : امين .
وشيدو فيها اغلب الحاضرات بأستثاء ام وليد اللي تغلي قهر .
~ ~ ~
بيت مشاعل العامر...
ياسر باستغراب : غريبه يمه مارحتي لحفل الجمعيه .
مشاعل بعد مانزلت كوب عصيرها : ماقصرت هاجر راحت لهم وانا مالي خلق اروح لحفلات الحين , إلا وش صار على موضوع ابوك ؟
ياسر بضيق : على حطت يدك مازال البحث مستمر وابوي مختفي .
مشاعل : حسبي الله ونعم الوكيل , مهما طال الظلم بيطلع الحق لو بعد 100 سنه .
ياسر : حتى عمي فواز ما ادري وين اختفى وسألت وائل عنه يقول مايعرف عنه ولا شي .
مشاعل : يمكن مسافر .
ياسر : ايه وائل قالي بس مايدري وين رايح .
مشاعل : غريبه اشلون يطلعونه من السعوديه وهو عليه شبهه .
ياسر : ومين اللي قال انه طالع من السعوديه يمكن مسافر داخل السعوديه .
مشاعل : لا انا متأكده ان ابوك خارج السعوديه , كل مكان دورو فيه مو موجود .
ياسر : ان شاء الله بيجي , يمه بنقفل الموضوع هذا ولا عاد نفتحه .
مشاعل : مو مهم الموضوع هذا ولا جاء بنص اهتمامي لبنتي اللي ما ادري وينها الحين .
ياسر : اكيد مع ابوي لأنه طلعت من المستشفى على مسئوليته ولا عاد شفناهم إلى اليوم .
تنهدت مشاعل : الله يعينا على الايام الجايه .
وقف ياسر : امين , يمه انا بروح اسلم على جدتي عاليه ( ام ابوه ) تروحين معاي ؟
مشاعل : ايه بس بروح اغير ملابسي واجي .
وطلعت مشاعل تغير ملابسها .
وياسر جلس بالصاله يفكر بحياته وايامه الجايه " آآه يارهف يأول حب بحياتي ليش رافضتني وانا اللي شاريك بكنوز الدنيا , كل هذا عشان ابوي مدمن وقاتل ؟ لا لا معاها حق ابوي مايشرف يصير جد اولادها , بس انا وش دخلني بابوي اذا كانت تربيتي صالحه ولا اشبه ابوي وفترة المراهقه عشتها مع امي يعني ابوي فاقده من زمان ويحملوني خطاه لا هذا ظلم "
قطع تفكيره صوت امه اللي تقول : يله حبيبي انا جاهزه .
وطلع هو وامه وركب بسيارته الفخمه بنتلي .
وطلعو لبيت الجده عاليه دخل ياسر وامه تمشي جنبه بعد مافُتح لهم الباب .
عاليه بحنان وهي تحضن ياسر : هلا والله بريحة الغالي هلا بولدي .
ياسر بعد ماقبل راسها ويدينها : هلا بك اكثر .
وسلمت على مشاعل : ياهلا بكم تو مانور البيت .
ياسر : منور بوجودك ياجدتي .
عاليه : احلام , موضي , تعالو سلمو على ياسر .
دخلو عمات ياسر احلام ( 25 سنه مطلقه وعايشه عند امها ) وموضي ( 30 سنه متزوجه وعندها بنتين ) .
وسلمو عليه بحراره . وبعدها سلمو على مشاعل .
احلام بابتسامه : آآه والله نحسب الايام والليالي على زواجك يا ياسر متى تتزوج ونفرح فيك .
عاليه وهي تمسح دموع الفرح : ياعساني ما اموت إلا انا شايفتك عريس .
مشاعل : بعد عمر طويل ان شاء الله .
باس ياسر يد جدته اللي جالسه جنبه : لا تبكين جعلني ما انحرم منك .
عاليه بحنان : دموع فرح ياولدي .
موضي : والله فرحتي بخطوبة ياسر اكبر من فرحتي بالعيد .
ياسر بابتسامه : الله لايحرمني منكم .
~ ~ ~
رجعو للبيت...
دخلت رتيل جناحها وتفاجأت بوجود عبدالله .
جالس ع الكنبه ويطالعها من فوق لتحت وهي خافت من نظراته وقف وبكل قوته اعطاها كف .
صرخت رتيل وحطت يدها على خدها وبضعف : حرام عليك وش سويت لك انا ؟
دفها عبدالله وطاحت ع الارض وضربها بالعقال بقوه وهي تتألم وتصارخ وهو يفرغ عصبيته فيها وبلا رحمه وبدون وعي قعد يضرب فيها .
بعد خمس دقايق جلس على ركبه وصرخ فيها وهي طايحه ع الارض : ليش تطلعين من البيت ماتستأذنين مني ؟
رتيل وهي تجلس ع الارض وتبكي بقوه : لأنك مو رجال عشان استأذن منك .
شد عبدالله على قبضة يده بقوه بعد ماتراجع عن الكف اللي كان بيعطيها : وانتي قد الكلمه هذي تقولينها ؟
رتيل وهي توقف بألم : عبدالله ابعد عني خلاص انت اخترت البعد والصد من اول يوم من زواجنا وش تبي فيني ؟
عبدالله بعصبيه : انتي زوجتي وكلمتي تمشي عليك , حتى لو ماجلس معاك او اشوفك كلمتي ماشيه عليك وماتطلعين من البيت إلا اذا استأذنتي مني .
دخلت رتيل بالغرفه وهي تتألم وتتأوه قفلت الباب مسكت الجدار وهي تقاوم الدوخه اللي اجتاحتها .
سحبت نفسها ودخلت الحمام ( وانتو بكرامه ) .
فتحت تسريحة شعرها وشغلت المويه واسترخت وهي تحس بألم براسها وبكل انحاء جسمها .
بنفس جناحهم .
بالصاله كان عبدالله جالس ويفكر باللي سواه لرتيل " اعوذبالله من الشيطان الرجيم اذا شفتها ما امسك نفسي ما ادري وش اللي صار معاي "
انتظر رتيل تطلع بس تأخرت جالها ساعه وهي داخل ولا لها حس وقف عبدالله وطق الباب وبلا مجيب .
" وانا وش علي منها اهتم فيها "
نزل تحت وهو مايدري وش اللي صار برتيل .
: سلام عليكم .
الكل : عليكم السلام .
جلس عبدالله جنب رهف اللي قالت : عبود وين رتيل ؟
عبدالله : نايمه .
طالعت هاجر بساعتها : غريبه رتيل تنام الساعه 11 .
شهد : شكلها تعبانه من الحفله والجلسه هناك ويمكن اللي صار تعبها اكثر .
عبدالله باستفسار : وش اللي صار ؟
شهد اللي تأكل بنتها وبمزح : سوالف حريم .
عبدالله : لا والله جد وش صار ؟
رهف : ام وليد تقول بنخطب اشجان لعبدالله , وتنرفزت رتيل وعصبت واظن راحت تبكي بس الحمدلله الموضوع عدا على خير .
عبدالله وهو يرفع حاجبه : وام وليد وش دخلها تخطب لي ؟
هاجر : انا اللي قايله لها اذا عبدالله مارتاح مع رتيل بزوجه اشجان .
عبدالله بقهر : ليش ناويه تجنين على رتيل تزوجيني صديقتها .
هاجر : والله اللي اشوفه ياعبدالله انت مو مرتاح مع رتيل ولا هي مرتاحه معاك .
عبدالله : والله ما ادري وش اللي يصير لي اذا شفتها اضيق ما اطيق شوفتها .
~ ~ ~
طلعت رتيل من الحمام ولبست بيجامه خفيفه ابيض وجففت شعرها وتركته مسدول وشافت اثار الضرب اللي بكتفها وخدها " آآه ياظهري حسبي الله عليك ياعبدالله , اشلون بداوم بكره انا ما اتحمل اوقف "
جلست ع السرير " ليش يضربني كل هالضرب والله مجرم مافيه انسان مثله , قال ايش قال حنون هذا مايعرف الرحمه "
طق باب الغرفه وقامت رتيل " ابيهم يشوفون عمايل ولدهم فيني عشان يأدبونه "
فتحت الباب وشافت شهد واقفه ومن يوم شافت رتيل شهقت : من اللي عمل فيك كذا ؟
رتيل بابتسامة الم : من غيره عبدالله .
حطت شهد يدها على فمها : حسبي الله على ابليسه وش ذنبك يوم يضربك بكل هالعنف ؟
رتيل وهي تقاوم دمعتها اللي مجتمعه بعيونها : لأني طلعت للجمعيه بدون اذنه .
شهد بعد ماحضنت رتيل : طيب لا تسكتين كذا اتصلي على اخوك يجي ياخذك لا تضعفين له.
رتيل وهي تبكي : انا ما ابي اهلي يحسون بأي شي بيني وبين عبدالله .
بكت شهد : لو فيصل فكر يمد يده علي اكيد بجي عند اهلي .
رتيل بعد مارفعت جسمها من حضن شهد : مو على اي مشلكه اروح لأهلي , ان شاء الله كل مشاكلي بتنحل .
شهد : ان شاء الله , ماكنت اعرف ان حياتك انتي وعبدالله فيها مشاكل وامي ماقالت لي عن شي ولا كان ماخليته يدخل هنا واشوف امي تقول ماله داعي يدخل وانا اقول رايح لزوجته .
رتيل : مالك ذنب باللي صار , عبدالله يغلط علي كثير وهذي مو لا اول ولا اخر مره .
شهد : والله ماتوقعت عبدالله بالقسوه هذي .
رتيل : اغلب الرجال معاملتهم لزوجاتهم تختلف عن معاملتهم لأهلهم .
شهد : والله عبود ندمان تو كان معانا بالصاله .
رتيل : لا عادي هو ضربني قبل كذا ولا مره جاء واعتذر , بس انا مو عارفه اشلون اغيب بكره ما اقدر اروح للمستشفى .
شهد بابتسامه : انا بقوله واذا ما اقتنع تغيبين غصب عنه .
رتيل : لا حرام اعصي امره , بس بقول لخالتي هاجر اكيد ما يرفض طلبها .
شهد : انا ادري ان علاقتكم مع بعض متوتره وفيه نفور بينكم بس اللي ما اعرفه انتي تبين عبدالله او لا ؟
رتيل بالم : وش بعده تسألين ؟
شهد : مشكلتكم هذي لها حل بس انتي تبين عبدالله او لا ؟
رتيل : ايه ابيه وانا احبه من قبل زواجنا وهو بعد كان يحبني والحين وضعه مختلف تماما عن قبل .
شهد : يمكن عين .
رتيل : ليش لا .
شهد : بكره انتي لا تروحين للمستشفى وروحي مع امي تدور لك شيخ يقرا عليك .
رتيل : يصير خير ان شاء الله .
~ ~ ~
ظهر يوم الاحد...
بغرفة العمليات .
الساعه 5 ونص المغرب .
باس وائل راس فجر : تقومين بالسلامه ان شاء الله .
فجر بابتسامه : ماتصدق قد ايش انا فرحانه .
وائل بحزن : خايف افقدك يافجر .
فجر : لا تقول كذا ( قل لن يصيبنا إلا ماكتب الله لنا ) , وين رتيل ماشفتها اليوم ؟
وائل : ماقدرت تداوم اليوم عبدالله يقول تعبانه شوي .
فجر : ماتشوف شر ان شاء الله .
وجو النيرس اللي دخلو فجر غرفة العمليات وضل وائل واقف مع امه ونوال زوجة خاله .
العنود : الله يقومهم بالسلامه , والله ما انسى جميل فجر على بنتي .
نوال : الله يفرج همها مثل مافرجت همك يا العنود .
العنود : امين يارب , وين رتيل ؟ المفروض تصير موجوده ؟
وائل : يقول زوجها انها تعبانه شوي .
شهقت نوال : وش فيها ؟
وائل : مادري .
طلعت نوال جوالها واتصلت على رتيل وجاها صوت رتيل اللي كله نوم : هلا يمه .
نوال بخوف : رتيل يمه وش فيك ؟ عبدالله يقول انك تعبانه .
رتيل : ما ادري يمه احس بدوخه اذا وقفت .
نوال بطيف ابتسامه : يمكن حامل .
رتيل بحزن : لا مستحيل حامل .
نوال : وليش مستحيل ؟
رتيل انتبهت لنفسها : انا عارفه اني مو حامل , مع السلامه يمه خالتي جات .
نوال : مع السلامه .
العنود : وش فيها ؟
نوال وهي ترجع جوالها بالشنطه : تقول تحس بدوخه اذا وقفت .
~ ~ ~
بيت ابراهيم العامر...
الساعه 9 بالليل .
شهد اللي جالسه جنب رتيل : ليش ماقلتي لأمك الصدق اكيد بتوقف معاك .
رتيل : ما ابي اهلي يعرفون بشي .
شهد بحزن : انا ضربني فيصل قدام اهله وجيت هنا .
شهقت رتيل : متى ؟
شهد بغصه : اول يوم من رمضان سالفتي هذي صار لها اربع ايام , اخاف تصيرين مثلي محتاره قولي لأمك .
رتيل برفض : لا ما ابي اقولهم , وانا توقعت مافيه احلى من حياتك مع فيصل يعني حتى انتي عندك مشاكل ؟
شهد : لا انا ماعندي مشكله بس امه اتهمتني اني ضربتها وتلفظت عليها وهو اعطاني كف قدام امه وخواته .
رتيل : اذا مادافع عن امه مافيه خير .
تنهدت شهد : معاك حق , امه اهم مني ومن غيري .
وقفت رتيل : عن اذنك لازم اروح للمستشفى اتطمن على بنت عمتي وزوجة اخوي .
شهد : لا يا رتيل لا تروحين والله واضح عليك التعب اذا كان ماتبين احد يعرف لا تروحين .
رتيل : بس انا ماراح انزل نقابي .
شهد : يمكن تدوخين مثل الصباح او يصير لك شي ويعرفون اهلك خليك هنا وهم يتصلو عليك .
رتيل : شورك وهداية الله .
وجلست رتيل .
ورن جوال شهد وطالعت برتيل : هذا فيصل ارد عليه ؟
رتيل : اكيد لازم تردين عليه .
شهد : بس اتصاله جاء متأخر .
رتيل : مالكم 4 ايام متهاوشين ردي عليه .
ردت شهد بـ : نعم .
فيصل بسخريه : هلا والله بزوجتي الغاليه .
شهد : اهلين .
فيصل بعصبيه : اشلون تمشين من ابها للشرقيه بدون محرم ؟ مو حرام عليك .
شهد تتظاهر الهدوء : للضروره احكام وانا مضطره اروح لأهلي وليش انتظرك ولا اخذ الاذن منك وانت ماد يدك علي .
فيصل : يعني تضربين امي واخليك ؟ لو انا متلفظ على امك او ضاربها وش راح تسوين ؟
شهد وهي توقف وتدخل بغرفتها : فيصل انت عارف اني ماضربت امك ولا تلفظت عليها .
فيصل : وانا وش عرفني ؟
شهد : يعني معقوله انا بسوي كذا بأم زوجي ومرة خالي والله لو كان انت مجنون ماتصدق بالسالفه هذي .
فيصل : طيب انتي الحين زعلانه علي ؟
شهد : ايه زعلانه .
فيصل : طيب شفيك كل ماصارت بيننا مشكله رحتي لأهلك اول مشكله معذوره بس خلاص حتى اهلك راح يتضايقون منك .
شهد : اهلي عمرهم ماتضايقو مني ولو اسكن عندهم ماتضايقو مني .
فيصل : طيب اذا مارجعتي ترا بدالك زوجه ثانيه بس امي مالي غيرها .
انقهرت شهد : اذا كان بتتزوج علي طلقني .
فيصل : اشلون اطلقك واحنا عندنا بنت ولا انتي ماهمتك بنتك ؟
شهد : لا تهمني بنتي بس مالها دخل باللي بيننا .
فيصل : طيب ياشهد معاك 10 ايام بس اذا مارجعتي حتزوج .
شهد : تزوج وانا ماراح ارجع لك انا مو لعبه عندك تمد يدك علي , ولعلمك اهلي ماعرفو بشي ولا كان انت الحين وراء الشمس .
فيصل بغضب : لا تهددني بأهلك , احنا اهل وماراح يسوون لي شي عشانك , وياليت تقصرين الشر وترجعين لأبها .
شهد : انا قلت لك رجعه لأبها مستحيل .
فيصل : يعني لازم اطلقك ؟
شهد تتصنع القوه : ايه لازم تطلقني انا مو متحمله اهلك .
فيصل : وش دخل اهلي ؟ انتي زوجتي يعني تعيشين معاي مو مع اهلي .
شهد : والله اشوف ان المشكله اللي بيننا سببها اهلك .
فيصل : زواج اختي قمر بثالث ايام العيد اذا مارجعتي بالوقت هذا راح اطلقك .
شهد : يصير خير .
وقفلت بوجهه .
نزلت تحت وشافت عبدالله واقف قدام رتيل اللي جالسه : رتيل زعلانه مني .
رتيل :.........
عبدالله وهو يقاوم الضيقه اللي اجتاحته : طيب ردي علي زعلانه ؟
رتيل وهي توقف : لا مو زعلانه بس انت ابعد عني ولا عاد تجي مكان انا فيه .
مشى من عندها عبدالله وراحت لها شهد : رتيل لا تصيرين ضعيفه كذا مو يضربك وباليوم الثاني وانتي مسامحته .
رتيل : عبدالله غريب بالمره مره قاسي ومره حنون انا ما ادري وش اللي فيه .
شهد : صدقيني هو يستغفلك .
رتيل : لا مستحيل يعني يفرغ عصبيته فيني وباليوم الثاني يجي يطلب مني اسامحه هذا يستغفلني ؟
شهد : والله شي غريب قبل زواجكم كان يحبك بقوه وبعد زواجكم تغير مره .
رتيل : كل مصيبه عند ربي لها حل .
~ ~ ~
بعد انتظار دام 4 ساعات طلع الدكتور السعودي ماهر من غرفة العمليات ووقفو كلهم : الحمدلله على سلامتهم , وابشركم العمليه نجحت لكل المريضتين .
وائل بفرحه : نقدر نشوفهم الحين ؟
ماهر : لا بعد اربع ساعات من الان تقدر تشوفهم .
العنود : الحمدلله يارب الحمدلله .
نوال تبكي بفرح : الحمدلله على سلامتهم .
وائل : الله يسلمك ياخالتي .
وطلع جواله واتصل على رتيل وقالها ان عملية فجر وسراب نجحت .
مر ياسر من عندهم وسلم على وائل : الحمدلله على سلامتهم .
وائل : الله يسلمك يادكتور ياسر .
ياسر : عمي فواز الى الحين ما جاء ؟
وائل : لا ومايرد على جواله لي يومين اتصل فيه مو راضي يرد .
ياسر : الله يستر , عن اذنك .
ومشى ياسر من عندهم ودخل بمكتبه واخذ جواله اللي يرن : نعم .
المحقق نواف : دكتور ياسر احنا قبضنا على فواز الحمد ولازم تكون موجود بالادعاء العام خلال 30 دقيقه .
#15