الفصل 10
البارت العاشر °•
مدخل البارت :
( يَخْرُجُ مِن بُطُونِهَا شَرَابٌ مُّخْتَلِفٌ أَلْوَانُهُ فِيهِ شِفَاء لِلنَّاسِ إِنَّ فِي ذَلِكَ لآيَةً لِّقَوْمٍ يَتَفَكَّرُونَ ) ( النحــل / 69 )
-
-
-
-
-
وقفت فجر بصدمه وطالعت بوائل : ايش ؟ انا ؟ قصدي انت تتزوجني ؟
وائل بابتسامه : ايه وش فيك ؟
فجر : وائل تتكلم من جدك يعني بتتزوجني شفقه ورحمه ولا...
قاطعها وائل : فجر انا ابي اصير واضح معاك من البدايه انا ابي اتزوجك ونصير اصدقاء مثل كذا .
فجر بغصه : انا مالي بعد الله غيرك بس اوعدني ياوائل انك ماتذلني .
وائل : والله ما اذلك .
فجر : طيب انا موافقه .
وائل : خلاص بنروح الحين للسوق وتشرين لبس زين وعبايه ونروح للسفاره ونملك .
فجر : من جد يا وائل انت نادر بالدنيا هذي كلها .
~ ~ ~
لندن...
طق عبدالله باب غرفة رتيل اكثر من عشر مرات بس بلا مجيب .
عبدالله : رتيل يله بنمشي للسعوديه افتحي الباب .
ماردت عليه رتيل : رتيل اذا ماطلعتي بروح للسعوديه واخليك , رتيل انا حذرتك .
رتيل بصراخ : روح لمكان ماتبي والله ما افتح الباب واذا انت بتخليني عندي اهل ماراح يخلوني .
عبدالله بعصبيه : طيب افتحي الباب .
رتيل : لا .
عبدالله : اذا مافتحتي الباب بكسره واقتلك .
رتيل : مابي افتحه واذا فيك خير اقتلني .
انقهر منها عبدالله ونزل بسرعه للصاله واخذ جواله وطلع من الفله .
ورتيل تاكدت انه راح وفتحت باب غرفتها وتوجهت للباب الرئيسي للجناح وقفلت الباب .
ودخلت بالغرفه واخذت نفس عميق " وش هالحياه اللي ماتنطاق "
خذت لها شور ولبست فستان ناعم مره تحت ركبتها لونه ابيض ومشجر بورد زهري ومبطن بقماش ابيض ضيق .
جلست ع كرسي التسريحه وطالعت بوجهها الشاحب وعيونها الذبلانه .
فتحت علبة الميك اب وحطت ميك اب خفيف وكحل عيونها تحاول تخفي ذبولها .
حطت روج فاتح وناعم لونه زهري .
جففت شعرها الناعم وحطته ع جنب .
وخذت جوالها واتصلت على عبدالله : الوو .
عبدالله : نعم .
رتيل : عبدالله بروح لزوجة عمك اسلم عليها .
عبدالله : اوكي انا بالطريق بروح لهم برجع لك وياويلك اذا مالقيتك جاهزه .
وقفل المكالمه ..
وخذت رتيل عبايتها ولبستها ونزلت تحت وهي تلف طرحتها " واخيرآ بشوف لندن الصباح , عروس لي خمس ايام هنا ولا مره شفتها "
طلعت للسياره وركبت لأول مره مع عبدالله بروحهم : سلام عليكم .
عبدالله : وعليكم السلام , غطي وجهك ولد عمي موجود بالبيت .
رتيل : طيب اذا وصلنا بيتهم اتغطى مو هنا .
عبدالله وهو يفتح الدريشه بياخذ اكسجين : الله يصبرني عليك .
ومشو متوجهين لبيت زياد .
استغربت رتيل من عبدالله متضايق حيل ونفسه سريع .
رتيل : عبدالله .
عبدالله بعصبيه : نعم .
رتيل بتردد : فيك شي ؟
عبدالله زاد بسرعة السياره : لا مافيني شي .
~ ~ ~
الاردن / عمّان...
دخلت فجر بغرفة تغيير الملابس اللي بالسوق ولبست لبسها الجديد بنطلون وبلوزه ولبست عبايتها وطرحتها ولبست نقاب وطلعت لوائل اللي ينتظرها برا وطلعو مع بعض للسفاره وانهو اجراءات الملكه وطلعو ونفسياتهم غير والحياه قدامهم حلوه عكس الايام الماضيه .
وائل : مبروك يافجر .
فجر بحيا : الله يبارك فيك , والله مو عارفه اشلون اشكرك ياوائل .
وائل : خلاص الحين مابينا رسميات وكل اللي اسويه لك واجب علي .
فجر بإهتمام : طيب انت قلت لأمك ؟
وائل : ايه قلت لها وهي ماتدري انك كنتي متقمصه دور ولد ولا ابي احد يدري اوكي ؟
فجر هزت راسها بإيجاب : اوكي .
وائل : وابيك تشيلين امي بعيونك .
فجر : من عيوني .
وائل : تسلمين .
فجر : طيب متى نروح للسعوديه ؟
وائل : الحين بندور لنا على نقل جماعي وان شاء الله العصر واحنا بالسعوديه .
فجر بتوتر : بس خايفه اهلك مايتقبلوني .
وائل : الا ان شاء الله يتقبلونك وانتي مثل بنتهم .
وصلو مكان النقل الجماعي : انا بروح ادور لنا على مقاعد خليك هنا .
وتوجه وائل لمكان بيع التذاكر واخذ له تذكرتين ورجع لفجر : يله بعد ربع ساعه نمشي من هنا .
فجر بتوتر : طيب مو على طول نروح لأهلك بنرتاح شوي بالرياض او القصيم او اي مكان .
وائل : اوكي .
~ ~ ~
بيت فواز الحمد...
نوال بغضب : وشلون يخطب وحده ماعندها اهل ؟
العنود : والله ما ادري يانوال انا ما ابي امنعه من شي هو يبيه .
نوال : طيب وش عرفه فيها ؟
العنود : يقول اخت صديقه اللي استشهد وهو وصاه عليها .
دخلت سراب : ماما صدق اخوي وائل بيجي بكره ؟
العنود بابتسامه : ايه صدق .
جلست سراب جنب نوال : لو رتيل هنا احسن عشان تفرح معانا .
نوال : ان شاء الله بتجي رتيل وتسلم على اخوها .
العنود بفرحه : آآه يانوال ما تصدقين قد ايش مشتاقه لولدي الله يوصله بالسلامه .
نوال : آآمين يارب .
~ ~ ~
لندن...
رجعو عبدالله ورتيل من بيت زياد ودخلو بالبيت وطالعها عبدالله وبعصبيه : بكره الساعه 11 الصباح قسم بالله يا رتيل لو تتكرر حركتك اللي امس وتقفلين الغرفه والله لأروح للسعوديه واخليك , وخلي عنادك ينفعك .
رتيل وهي تقاوم ضعفها بقوه مصطنعه : انت كلمة انسان حرام بحقك .
عبدالله وهو يجلس ع الكنبه : انقلعي من هنا ولا عاد اشوفك .
طلعت رتيل لجناحها وخذت لها شور ولبست بيجامه قطنيه ونامت .
بالصاله...
اتصل عبدالله على امه : الوو .
هاجر بصوت كله نوم : هلا عبود .
عبدالله يحس بضيقه يجهل مصدرها ولا يدري وش سببها : يمه بكره ان شاء الله بنرجع .
شهقت هاجر : عبدالله حبيبي فيك شي ؟
عبدالله : لا يمه مافيني شي بس اخو رتيل رجع من سوريا وهي لازم تسلم عليه .
هاجر بعتب : فيك الخير حسيت بالمسكينه .
عبدالله : والله يايمه لا انا ولا هي مرتاحين حياتنا نكد وطفش وملل .
هاجر : طيب وش السبب ؟
عبدالله بصوت مخنوق : والله مو عارف وش السبب . وبلع ريقه . مع السلامه يمه انا مضطر انهي المكالمه بكره ان شاء الله اكلمك .
هاجر : مع السلامه حبيبي .
ونزل جواله ع الطاوله وسند ظهره ع الكنبه وهو يفكر بحياته وكيف بيصير مستقبل رتيل معاه وحياتهم كل مالها تتعثر وتتبعثر اكثر من قبل هو يعيش بشتات وهي تعيش بعذاب .
بعد ساعتين من الافكار اللي جننت عبدالله قام وتوضأ وصلى وطلع للمسجد الوحيد بالمنطقه اللي يعيش فيها عبدالله ودخل وصلى تحية المسجد وجلس ينتظر وقت الاقامه واخذ القرآن وفتح سورة البقره وحس بضيقه ونعاس شديد رجع القرآن مكانه وهو ماقراء منه شي .
وقف وصلى مع جموع المصلين خلصو الصلاه ورجع عبدالله للبيت دخل وشاف رتيل تفطر : قلت لك البارح واعيد لك كلامي اليوم رحلتنا الساعه 11 الصباح اذا مامشيتي معاي اقسم بجلالة الله وعزته لأخليك هنا سمعتي ؟
رتيل بهدوء بعد مانزلت كوبها ع الطاوله : الناس بالعاده اول ماتدخل تسلم تذكر الله على هالصباح .
عبدالله بعصبيه : رتيل لاتخليني اعصب عليك .
رتيل ضحكت بسخريه : ليش يعني الحين انت مروق يا استاذ عبدالله ؟
ضرب عبدالله الطاوله اللي تفطر عليها رتيل بقبضة يده وبقوه : رتيل حذرتك قبل بس انتي ماينفع معاك إلا الضرب .
تذكرت رتيل ضربه لها قبل امس وسكرت عيونها بألم وصرخ فيها عبدالله : قومي جهزي اغراضك .
فزت رتيل " وجع في بطنه " وقفت وهي تقول : لسه بدري الساعه الحين 5 الفجر .
عبدالله : انا اخاف اروح للسعوديه وانتي هنا ما ادري كيف اقابل اهلي .
رتيل : ما اعتقد انك تسويها وانت عندك ذرة رجوله .
طلع عبدالله لجناحه ورتيل جلست وكملت فطورها ولا كأنه صار بينهم شي " غريبه البرود هذا اللي صار فيني "
رن جوالها وردت بباتسامه : هلا وغلا اشجان .
اشجان : ياهلا بك صباحك فل .
رتيل : صباح الورد .
اشجان : كيفك ان شاء الله مرتاحه مع عبدالله .
رتيل بكذب : ايه الحمدلله , انتي كيفك ؟
اشجان : تمام , والله لك وحشه المستشفى مايصلح بدونك انتي وزوجك .
رتيل : ياقلبي , ان شاء الله يومين ونرجع لدوامنا .
شهقت اشجان : بهالسرعه بس انتي عروس وبعدين ليش تقطعين شهر العسل عشان شغلك ولا كأنه زوجك هو مدير المستشفى .
رتيل بضحكه خافته : شوي شوي , اخوي وائل رجع من سوريا وبروح اسلم عليه .
اشجان فرحة لصديقتها : الحمدلله على سلامته .
رتيل : الله يسلمك يارب .
~ ~ ~
بيت ابراهيم العامر...
الساعه 10 الصباح بتوقيت الشرقيه...
ام وليد : خلاص موعدنا بعد شهر اذا عبدالله مو مرتاح مع رتيل يرتاح مع اشجان .
هاجر بابتسامه : لي الشرف اخطب بنتك لولدي يأم وليد بس احس بدري بعد شهر .
غاده : لا خالتي والله حرام تكسرين قلب رتيل وانتي تزوجين عبدالله بدون سبب .
ام وليد : غاده خليك واقعيه يعني عاجبتك حياة عبدالله بالشكل هذا ؟
غاده : لا اكيد ماراح تعجبني , بس مو وقت كلامكم هذا مابقى شي على وصولهم خلو الجو حلو قبل لا يجون .
وقفت ام وليد : عن اذنكم انا بروح لبيتي , ومتى مابتملكون لأشجان وعبدالله خبرونا قبل اسبوعين عشان يمدينا نسوي ملكه سنعه تعوض ملكة عبدالله على بنت الفقر .
هاجر وهي توقف : اول شي بقول لابراهيم ويمكن بعد عبدالله مايوافق .
ام وليد : وليش تاخذين راي عبدالله اكيد توه متزوج ماراح يوافق بسهوله .
هاجر بإعتراض : لا لا انا ما احب اجبر عيالي على شي هم مايبونه .
ام وليد : يله مع السلامه تأخرت على بيتي .
هاجر بابتسامه : الله معاك حبيبتي سلمي لي على اشجان .
طلعت ام وليد بعد ماسلمت على هاجر وغاده : وش هالقسوه يا خالتي كيف تزوجين عبدالله ؟
هاجر بتعب : والله تعبت يا غاده انا اكلم عبدالله كل يوم وحالته سيئه وصوته متغير مره انا ما ادري وش اللي صار له .
غاده بعد تفكير : معقوله المشكله من رتيل ؟
هاجر : لا لا رتيل مالها دخل باللي يصير لعبدالله لأن حالتها مثل حالته .
غاده : انا متأكده يا خالتي انه اللي فيهم عين .
هاجر بخوف : لا تقولين ياغاده .
غاده : ياخالتي هي دكتوره وهو دكتور والناس ماتعطي خير .
هاجر : طيب كيف نتأكد من كلامك ؟
غاده : اخذي رتيل ووديها لشيخ يقرأ عـ....
قاطعتها هاجر : بس رتيل ماطلعت بالزفه قدام الحريم .
غاده : حتى لو ماطلعت فيه حريم دخلو وسلمو عليها .
هاجر : كلهم خالات عبدالله وعمته مشاعل واهلها وبس .
غاده : وخواتك كانو يبون عبدالله لبناتهم يمكن مسوين لهم شي .
هاجر وهي تبعد الافكار هذي عن ذهنها : لا تشكين بالناس والله حرام .
غاده : قلت لك ياخالتي خذي رتيل ووديها لشيخ وبكذا تتأكدين .
هاجر : والله شكلي بسوي اللي قلتي لي عليه او بشغل القران بجناحهم عشان بيتهم تسكنه الراحه والايمان نفورهم من بعض مو طبيعي , رتيل ما ادري عنها اي شي بس اللي متأكده ان عبدالله مايبيها ولا يواطنها .
~ ~ ~
شمال السعوديه...
في احد الفنادق المتواضعه .
فجر بفرحه : مو مصدقه اني دخلت السعوديه كان هذا من احلامي المستحيله .
وائل بفرحه لا تقل عن فرحتها : وانا والله فرحان فيك وبدخلتي السعوديه .
احمرت خدودها خجل : ياعيني ع اللي تستحي .
فجر بهمس : وائل خلاص .
وائل : فجر والله ماتوقعتك تستحين عايشه معاي 7 اشهر وتستحين مني ؟
فجر : بالسبعه اشهر اللي راحت كان وضعنا يختلف عن الحين .
وائل المته ذكراها يوم اكتشف انها بنت وقال يلطف الجو : والله مشتاق لراكان .
فجر : تكفى وائل لاتذكرني فيهم اكره المكان هذاك الشي اللي يحببني فيه اني عرفتك .
وائل بيحرجها : مو كأنه هذي اللي قبل شوي بتموت من الحيا .
ضحكت فجر بصوت قصير : مشكلتي ما اقدر امشي عليك تمثيلي لمده طويله .
وائل : آآآه مشيتي مسرحيه كامله 6 اشهر مو عجزانه لا تمثلين علي مره ثانيه .
فجر حست انه جرحها : وش تقصد ؟
وائل بابتسامه : لا تفهميني غلط ترا ما اقصد انك تكذبين علي .
ابتسمت فجر : تدري وش مشكلتي ؟
وائل وهو يطالعها : وش ؟
فجر : لأني ماتحمل زعلك علي - وبوجع كملت - يمكن لأني وحيده مالي بالدنيا غيرك بعد الله وصعب على البنت تعيش بدون اهل وهذا بحد ذاته يدمي قلبها يعني افرض تهاوشنا بعد شهرين او سنتين من اللي الجاء له انا ضعيفه مالي احد .
وائل مايحب يشوفها بالانكسار هذا : لا واللي خلقني ما اخليك بدون اهلك وعمامك راح توصلينهم ان شاء الله وبيحتوونك .
فجر : لا خلاص ياوائل انت غرقتني بجمايلك والله كثير علي وانا عشت طول عمري بدون اعمامي .
وائل : اذا انتي عادي عندك تعيشين بدون اهل انا ما ارضى عيالي تصير امهم ماعندها اهل راح يحسون بالنقص .
جرحها وائل بدون قصد : لا وائل الله يخليك ما ابي عمامي ولا ابي مشاكل وبعد وش بيقولون اذا عرفو اشلون عرفتني وكيف كنت عايشه .
وائل بهدوء : الكذبه اللي مشت على اهلي تمشي على عمامك انتي اخت صديقي وقبل لا يستشهد وصاني عليك .
فجر بضيقه : وتتوقع انهم بيصدقون وتمشي عليهم ؟
وائل : اكيد , واذا كان هم مايبونك انا شاريك وابيك بكل مافيك من عيوب , وحشاك العيب .
فجر : بس انت تقول ماترضى ام عيالك ماعندها اهل .
وائل : لا تفسرين كلامي اني ما ابيك انا ابيك تعرفين اهلك اكيد بتعيشين بنقص .
مسحت فجر دموعها : الله يخليك لي ياوائل ولا يحرمني منك .
وائل : وش رايك متى نروح للشرقيه ؟
فجر : اختك رتيل متى بترجع من لندن ؟
وائل وهو يطالع بساعته : الساعه 5 العصر وهم واصلين ان شاء الله .
فجر : خلاص نمشي الحين للشرقيه بس والله خايفه .
~ ~ ~
بيت مشاعل...
مشاعل وهي تبكي : تكفى يابو فارس طلع ناصر من القضيه هذي .
ابراهيم وهو يهديها : يأم ياسر ناصر مدمن ومروج مخدرات وقاتل هذا اللي مثله ضرر على البلد ولازم يقتل .
مشاعل : طيب انا مابيه بس ابي اعرف وين حط بنتي وهي معاه او لا .
انتفض ابراهيم : لا ان شاء الله بنتك ميته ولا هي عايشه عند ابوها .
مشاعل وهي تمسح دموعها : تكفى ياخوي طلبتك تحل مشكلة ناصر بس ياسر لا يعرف بشي انا ماتفرق معي لو قتلوه بس اهم شي ولدي .
ابراهيم : اللي تبينه يصير ومن عيوني بس انتي ارفقي بحالك ولا تبكين خلاص 23 سنه نستك حتى ملامح ناصر .
مشاعل : آآه السالفه هذي فتحت جروح قديمه انا ماتوقعت في يوم من الايام ان زوجي وولد عمي اللي ضحيت بكل شي عشانه يقتل اخوي ويسافر واحنا ماندري وش علته واكيد خاطف بنتي معاه طعنته لي ولنا كلنا مستحيل تروح اثارها .
ابراهيم : معقوله يامشاعل ما لاحظتي ولا مره ان ناصر يتعاطى .
هزت مشاعل راسها بلا : ولا مره هو يجي البيت صاحي مافيه شي بس سفراته كثيره خارج السعوديه وكلنا نعرف الشي هذا .
ابراهيم : ايه بس ماحد شك فيه .
مشاعل : كذا هم المجرمين يفكرون بالفشل قبل لايفكرون بالنجاح يحطون احتمالات الفشل اكثر من النجاح .
ابراهيم : طيب سافري انتي وياسر لما تنحل المشكله هذي ارجعو .
مشاعل : وتتوقع يبي لها شهر عشان تنحل ؟
ابراهيم بعد ما اخذ نفس : لا والله اتوقع سنوات وهي ما انحلت .
مشاعل : انا ابي اخطب رهف لياسر ونملك لهم بسرعه عشان نغير جو ياسر اللي مو عاجبني هالايام .
ابراهيم : ان شاء الله بكره العصر نروح انا وياسر ونخطب رهف من علي .
مشاعل بابتسامه : يارب بلغني واشوف ياسر عريس .
ابراهيم : امين يارب - ووقف - اليوم عبدالله بيجي هو وزوجته وانتي لازم تجين تستقبلينه وابي اشوفك الليله غير الحزن هذا لاحد يحس فيه .
مشاعل : والله انا مو محزني إلا ياسر .
ابراهيم : لا تشيلين هم ابوه خلاص ما عاد له مكان بيننا وبقلوبنا هو باعك وباع ولدك عشان سعادته وش ترجين منه الحين ؟
مشاعل بألم : بس مهما كان هذا ناصر .
ابراهيم بعصبيه : والتراب , ناصر باعك يا مشاعل ولا يبيك ليش انتي تبينه بنت العامر ماتنسكر لأحد وماعاش من يذلها .
مشاعل وهي تبتسم لأخوها بالم : بنت العامر مثل غيرها لا حياه عشتها مثل الناس ولا اخر عمري تهنيت فيه كله مشاكل .
ابراهيم : ام ياسر خبري فيك قويه وش اللي ضعفك الحين ؟
مشاعل : خلاص يا اخوي ماعدت اتحمل مثل اول قلبي كل ماله يضعف .
ابراهيم : انتي قويه وتبقين قويه , يله سلام .
وطلع من عندها وهي جلست على الكنبه تسترجع اجمل لحضاتها مع ناصر .
~ ~ ~
لندن...
طلعت رتيل وراء عبدالله وشالو الخدم شنطتها بالسياره وهي ركبت وراء جنب عبدالله وطلع السايق لمطار هيثرو .
وكان بوداعهم زياد وامه .
باست رتيل راس ام زياد : مع السلامه يابنتي وتوصلون بالسلامه ان شاء الله .
رتيل : الله يسلمك ياخالتي .
لمياء : عبدالله ياولدي انتبه لرتيل الايام اللي راحت وانت كل يوم عندنا اخاف اذا رحت للشرقيه ماتجلس معاها نهائيآ .
ابتسم عبدالله : وش هالكلام ياعمتي انا بس ابي اجي اجلس معاكم ورتيل كل وقتي لها .
زياد بعد ماحظن عبدالله : اشوفك على خير ان شاء الله .
عبدالله : ان شاء الله , مع السلامه .
ومشو عبدالله ورتيل وركبو بطيارتهم الخاصه وتوجه عبدالله للسرير اللي بأخر الطياره ورمى نفسه عليه ونام .
ورتيل جلست ع المقعد المكون من جلسه رسميه ثلاث مقاعد جنب بعض ومقابل لهم ثلاث مقاعد وبينهم طاوله متوسطة الحجم .
" ياربي تعدي هاليوم على خير ام عبدالله مو عاجبتني ابدآ ولا زوجة اخوه شهد هي الوحيده منهم اللي ارتحت لها , وعمته مشاعل ماشاء الله عليها دخلت قلبي اول ماشفتها شهد ماخذه من صفات عمتها كثير شكلها وطيبتها , غاده ما ارتحت لها واحس اني اكرهها , اعوذبالله من الشيطان الرجيم حكمت عليها وانا ولا مره جلست معاه او كلمته ما ادري لو صارت لي احسن من امي وعمتي اللي جالي اسبوع من زواجي بس اتصلو علي اول يومين وخلاص وانتهت مكالماتهم لي , وابوي يقولي مو لازم تجين البيت - نزلت دمعه حاره من عينها - مافيه اهل كذا كانو امي وابوي شايليني من فوق الارض بطيبهم وحبهم وحنانهم وعطفهم لي والحين مايبوني , آآه ياوائل مو مصبر قلبي على الحياه غيرك الله لايحرمني منك يا اخوي "
شافت الساعه مرت ساعتين وهي تفكر بحياتها ماحست بالوقت قامت ودخلت دورات المياه وعدلت كحلها اللي خرب يوم بكت .
وكحلت عيونها وحطت روج ناعم لونه وردي فاتح ورجعت جلست مكانها وشافت عبدالله يشرب موكا : سلام عليكم .
طالعها عبدالله وبعدين نزل راسه يكمل لعبته ع الاوراق اللي قدامه ولا رد عليها السلام .
جلست هي بمكانها " اللي اعرفه ان رد السلام واجب , بقلعته "
ورفعت راسها وهو يقول : الحين احنا بنروح لأهلي وبكره ان شاء الله مسوين لنا حفله وبعد بكره عندي رحله مع الشباب لجده واذا رجعت ان شاء الله تروحين لأهلك , او مو لازم تروحين مو ضروري .
رتيل وهي تحاول تمسك نفسها : كيف مو ضروري وهم اهلي ؟
عبدالله ببرود : والله لو ابوك يبيك كان ماجبرك علي عشان فلوس .
رتيل بعصبيه : مو ابوي اللي يبيعني عشان فلوس واتوقع انه زوجني مارماني بالشارع .
عبدالله : يمكن لو رماك بالشارع يحسنون عليك الناس بس هو زوجك لعبدالله العامر اللي ماراح يرحمك .
انقهرت منه رتيل : وانا مو راجيه رحمتك , ربي بعباده ارحم واحن من الام على طفلها وش لي برحمتك وربي مغنيني عنك .
عبدالله وهو يرفع حاجبه : رتيل كفي الشر وانقلعي عن وجهي انا مو طايق وجهك .
رتيل بهدوء : والله هذا مكاني وانا اول ماجيت فيه .
عبدالله : رتيل قومي من هنا قبل يصير شي ماترضينه .
رتيل بعناد : ماراح اقوم انا اول ماجيت هنا .
عبدالله بعصبيه : بزران احنا عشان تقولين انتي اول ماجيتي ؟
رتيل وهي تحط رجل على رجل وتسند ظهرها على المقعد : هذا مكاني ماراح اقوم منه انت دور لك مكان غيره الطياره فاضيه مافيه إلا انا وانت .
عبدالله وهو يوقف : انا مو متحمل اشوف وجهك عشان كذا قمت مو عشانك .
رتيل : ولا انا متحملتك .
~ ~ ~
بيت فواز الحمد...
نوال بعصبيه : وش هالكلام يافواز اشلون ما اشوف بنتي .
العنود : نوال ياقلبي اهدي فواز يقصد انك ماتروحين لها .
نوال : مو على كيفه وانا راح اوصل بيت بنتي واروح لها .
فواز : والله يانوال اذا عتبتي بيت العامر لأطلقك .
نوال وهي توقف : يعني اشلون بتحرمني من بنتي ؟
فواز : مو حارمك منها , هي اللي تجي هنا مو احنا اللي نروح لها .
نوال باستغراب : طيب ليش ؟
فواز : يعني لو رحتي لبيت العامر ماراح تغلطين عليهم وتسببين مشاكل مالها اول ولا تالي .
نوال : لا مستحيل انا عقلي كامل ولله الحمد .
فواز وهو يطالع العنود : تكفين يالعنود اقنعيها .
العنود وهي تجلس جنب نوال : لا خلاص انا مقتنعه ووائل جاي الحين لا تخلون الجو مكهرب بينا .
دخلت سراب وبفرحه : مامااا وائل وصل .
فزت العنود ووقفت وبفرحه : وائل ؟
دخل وائل وهو يشوف الفرحه بعيون امه وخاله وحتى زوجة خاله رمى نفسه بحضن امه : تو مانور البيت يانور عيني .
وائل بعد ماباس يدينها : منور بوجودك يالغاليه .
وسلم على خاله وصافح نوال وباس راسها : الحمدلله على سلامتك .
وائل : الله يسلمك يا خالتي .
العنود : وش اخبارك ياولدي ؟
وائل : الحمدلله بخير دامني بينكم .
العنود : وين زوجتك .
وائل : يوو نسيتها عند سراب بالحوش .
وطلع لها : فجر حبيبتي تعالي سلمي على امي ومرة خالي يسألون عنك .
فجر بخوف وتوتر : خايفه خايفه يا وائل .
وائل وهي يمسك يدها : يلا حبيبتي شيلي هالخوف وسمي بالله وادخلي .
ودخلت مع وائل وشافت امه ونوال وسملت على ام وائل وهي خايفه وسلمت على نوال .
وهي تسمع ترحيبهم فيها واستقبالهم الحلو لها .
العنود : ياهلا والله بزوجة الغالي والله تو مانور البيت فيكم .
فجر بحيا : منور بوجودكم .
وائل : انا بروح لخالي فواز جالس بالديوانيه بروحه .
~ ~ ~
مطار الدمام...
كان عبدالله يمشي متوجه لأخوه فارس ومتجاهل رتيل اللي تمشي وراه سلم على فارس اللي استقبله بحفاوه .
فارس : ياهلا بكم .
عبدالله بابتسامه : هلا بك اكثر .
فارس : الحمدلله على سلامتكم .
عبدالله : الله يسلمك يارب .
كانت رتيل تمشي وراهم وتسمع كلامهم .
فارس : عبود ماكأنك استعجلت مالك إلا اسبوع وثلاث ايام بلندن .
عبدالله : لا تذكرني الله يخليك الايام اللي راحت نكد وهم وملل لو زياد مو هناك كان ماجلست يوم واحد .
فارس بصدمه : افا وش ذا الكلام ؟
عبدالله : والله من جد .
فارس : والله انك مو صاحي رتيل لا تسمعك تقول كذا حرام عليك .
عبدالله : انا صارحتها من البدايه وهي اللي راميه نفسها علي .
فارس بعصبيه : عيب هالكلام هذي وهي زوجتك , دامك ماتبيها ليش تتزوجها وتعذبها معاك ؟
عبدالله : والله كنت احبها بس من ليلة زواجنا وانا اكرهها .
فارس بتحذير : الرسول صلى الله عليه وسلم اوصانا رفقاً بالقوارير , ارفق بزوجتك والله حرام عليك .
شدت رتيل على قبضة يدها وبقهر " مو لازم يقول لكل الناس انه حياتنا متأزمه انا مابي احد ينظر لي نظرة شفقه " .
ركبو بالسياره وطلعو لبيت ابو عبدالله .
دخلو بالصاله والكل يرحب فيهم .
سلمو على عبدالله وبعدها على رتيل .
سلمت على هاجر اللي حضنتها : ياهلا وغلا بزوجة ولدي .
رتيل ارتاحت لأم عبدالله وباست راسها : هلا بك اكثر .
وبعدها سلمت على مشاعل وشهد ورهف وغاده .
عبدالله : وين ابوي بسلم عليه .
انقهرت رتيل من اسلوبه " يتكلم عن نفسه ولا كأني موجوده "
هاجر : ابوك بمجلس الرجال عنده خوالك وعمك علي بتصل عليه يجي ويسلم عليك وعلى زوجتك .
عبدالله : لا ليش يجي انا بروح اسلم عليه .
هاجر : ورتيل ؟
عبدالله : مو لازم تسلم على ابوي وهذا اول مره بتسلم عليه .
وقفت هاجر وراحت لعبدالله وبهمس : وش هالاسلوب والكلام هذا عن زوجتك ؟
عبدالله بنفس درجة صوت امه : يعني وش تبيني اسوي لها ؟ من جد ماله داعي تسلم على ابوي .
طالعت هاجر برتيل اللي واقفه ومنزله راسها : رتيل تعالي سلمي على عمك .
مشت رتيل مع هاجر وطلعو من مجلس الحريم ووراهم عبدالله واتصلت هاجر على ابراهيم وبلغته يجي يسلم على رتيل .
دخل عبدالله مجلس الرجال وهاجر بقت واقفه جنب رتيل : خالتي .
هاجر بحنان : عيون خالتك .
رتيل بغصه : طلبتك خالتي ابي غرفه خاصه فيني ما ابي عند عبدالله .
#12