الفصل 3
*📚قصص وخواطر📚*
_*بإدارة 📚قصص||روايات||منوعة📚*_🧡
*❴📖❵↵ بنات الخبائث*
*❴🔢❵الـــبـــــــــــ❴الثالث والاخير❵ــــــــــــارت*
➖➖➖➖➖➖➖➖➖
*❴📝❵↵تـنـسـيـق:قناة:*
*📚قصص||روايات||منوعة📚*
*❴📚❵↵القناة:خـاص لـنـشـر ٲحـدث الـروايـات بـكـل الانـواع والـلـهـجـات 🧡🖇️*
*|✒️|↜لـلإشـت͜ـࢪاڪ بـ قناة*
*https://whatsapp.com/channel/0029VaNMcGuHFxP9VtPQOm2A*
*📚قصص||روايات||منوعة📚*
➖➖➖➖➖➖➖➖➖
.
➖➖➖➖➖➖➖➖➖
*❴🧡❵↵ *يمان سعيد* 🧡
➖➖➖➖➖➖➖➖➖
*❴📝❵↵تـنـسـيـق:قناة:*
*📚قصص||روايات||منوعة📚*
https://whatsapp.com/channel/0029VaNMcGuHFxP9VtPQOm2A
*{😍}قــرا۽ة ممتعــه للجميــع*
*{🪷}شڪرآ لــڪم لانضــمامڪم اتمنــى مشــارڪۿٖہِ رابــط قنــاتــي لکيۡ نستمــر بنشــر اجمــل الــروايــات الممتعــة*
📚كتب ||روايات|| منوعة📚:
#بنات_الخبائث #الحلقة_الثالثة_الاخيرة_رند_محمد
@rwayate
فئت العصر عملت قهوة .. و أخدت باكيت الدخان و أعدت ..
حيطان باردة مافي حدا يقلي كلمة صباح الخير ياسالي .. أهلي مابعرف عنن شي ولا بتواصل معهن .. و الحلم يلي عشتو مع ناصر خلص فئت منو ع كابوس الحياة الحقيقية .. و أنا هلأ تحت الأمر الواقع يا أما العيشة عند أبي و القتل و الضرب و القلة رغم اني رح أنذل و تنهان كرامتي و سمعتي .. يا أنا بعيش وحيدة بين حيطانقاسية وطبعاً الخيار التاني أحسن بكتير .
بلش يصير المسا و بلشت اكتئب من الروحة يلي بدي روحا .. صرت البس و انا عم أبكي .. طلعت من البيت لقيت التكسي ناطرني برا ..
وصلني لباب الكباريه و قبل ما أنزل وسكر الباب اتطلع فيني شوفير التكسي بقرف وقال : الله يستر علينا .. حسابك كبر مدام ههههه أصدي أنسة
تمنيت بلحظتا أخنقو هو وكل رجال الأرض ..
دخلت ع الكباريه شلحت الجاكيت الفرو و أعدت ع الطاولة لحالي و بإيدي اليمين في سيكارة و باليسار في كاس مشروب
بلشت اتطلع بالزباين يلي باين عليهن ولاد عز ..
بعد شوي أجا شب عمرو بحدود التلاتين سنة سحب كرسي من طاولتي وحكالي : بتسمحيلي أعد؟
ضحكتلو و أشرت بإيدي ليقعد...
كل الوقت كان آعد وساكت... ماتحركشني أبداً مختلف عن الزباين كلن .. كان بس عم يتطلع فيني .. حسيت حالي ارتحتلو يمكن لأن ماحدا بيتطلع فيني إلا لمصلحة ...
شرب رشفة من كاستو وحكالي : أنا فهد ؟
- و أنا سالي ..
فهد : كأنك مدايئة حكيلي شو قصتك؟
ابتسمت وهزيت براسي : بدك تسمع و تنسى ولا تسمع وتحس؟
فهد : اسمع وحس و أنصح ..
ضليت عم أشرب وصرت احكيلو عن حياتي من وقت كنت صغيرة و اتعزب مع أهلي لوقت كبرت .. حسيتو ساكت وعم يسمعني محتاجة حدا يفهم عليي صح و اشرحلو وضعي الحقيقي يلي وصلني لهون .. يمكن محتاجة أي حدا يسمعني وبس
بقيت عم أشرب و أبكي و أحكي .. لوقت حكالي : خلص سكتي .. خلينا نطلع من هون..
حسيتو الأمان بالنسبة إلي طلعت من الكباريه وحسيت أنو هي آخر مرة رح فوتو فيا... حسيت أنو هالرجال الله بعتو ليريحني من كل وحدتي و عزابي ..
راح معي ع البيت و بقي معي بهي الليلة .. قضيناها مع بعض ..
فتحت عيوني الصبح لقيتو جنبي .. ضحكلي وقلي : صباح الخير...
جلست حالي و أعدت : فهد شو يلي صار؟
فهد : كلشي صار كان برضاكي ..
سالي : بعرف بعرف ... بس أنا ..
فهد : خلص أنسي .. ماعندك قهوة تشربيني ياها
سالي : مبلا
قمت عملت القهوة و أعدنا سوا ..
طلبت منه يحكيلي مين هو؟ وكيف أجا فجأة؟؟ مين عيلتو وشو قصة حياتو ...
حكالي إنه من بلدي نفسا وعايش هون ليشتغل ...
وكان رايح ليسهر و اجتمع فيني .
بعدين حكالي إنه متزوج وعندو ولدين وهن كلن عايشين ببلدي إلا هو هون .
سالي : بتعرف انا بحياتي ماخليت رجال غير زوجي يقرب عليي... رغم شغلي هاد بس ماحدا غيرك ..
انا كل علاقاتي كانت بالمحل وبس أما برا ما اقبل رغم انو ينعرض عليي مبالغ بتعيشني برفاهية .
فهد : باينتك بنت آدمية ..
بقينا ع هالحالة أنا وفهد تقريباً تلت شهور و صار يتردد لعندي كل مدة و التانية .. خلاني أترك الكباريه و أعد بالبيت وهو صار يعطيني مصاري .
تقربت منو أكتر صرت أعرف شو بحب وشو بيكره شو أخلاقو وشو حياتو... رغم أنو خلاني اترك الكباريه وصار يصرف عليي إلا انو هو لئيم ونمرود آوقات .
بقيت هيك علاقتنا لوقت ما أكلت الكف يلي صحاني .
وهو إني طلعت حامل .
اتصلت بفهد و أنا منهارة من البكي .. بعرف أنو فهد مستحيل يفكر يتجوزني و البيبي يلي جواتي مستحيل أقدر كون قاسية عليه .
رد عليي و أول ما قال ألو .. حكيتله تعا لعندي فوراً .
حكالي بس أخلص شغل بجي لعندك.
ضليت طول النهار آعدة ع نار .. وصل فهد وشافني بهالمنظر وجهي كلو أحمر وشاحب وعيوني مليانين دموع
فهد : شبك
سالي : مشان الله أنا حامل
فهد : من مين؟
هالكلمتين يلي حكاهن كانو أبشع من سرطان عم ياكل جسمي .. غمضت عيوني وضليت عض شفايفي بسناني لوقت صار يطلع الدم منون : هي الكلمة بتخليني أحرقك و أحرق حالي
فهد : شو المطلوب مني؟
سالي : تجوزني ..
فهد : شو جنيتي انتي ؟ أنا معك بس لانبسط لأني بعيد عن عيلتي بس مستحيل اتجوزك .
سالي : شو اعمل شو ساوي
فهد : نزلي الولد و خلصنا مانك أول وحدة بتعمل كورتاج
ضربتو كف وقلعتو برات البيت .. ومن وقت هاللحظة ماعد قرّب عليي ولا حكا معي ولا اتصل ابداً ..
بقيت لحالي اربع شهور ماحدا سأل عني ..
صار لازمني أدوية كرمال البيبي ولازمني روحة دكاترة ومصاريف تانية و أجار البيت .. من وقتا بطلت استنا حدا و بطلت اشتغل بالكباريهات .. صرت اشتغل بمشغل خياطة كل يوم اطلع من الصبح للمسا .. صرت اتسلى شوي مع البنات وحس حالي متلن .. كنت مفهمتن انو جوزي تركني و اختفا فجأة
بالصدفة وحدة من البنات يلي بالمشغل كانت عم تحكي عن صبية بتساعدا دايماً بالمصروف .. وقالتلي انو قلبا ل الله و اتواصل معا بركي بتساعدني شوي بمصروفي بما أنو ما إلي حدا .. من كلمة لكلمة قدرت أعرف اسما للبنت وعنوان بيتا ..
سألت عن كنيتا . جاوبتني البنت أنو كنيتا الابراهيم ..
صفنت شوي و الأبرة بإيدي عم خيط القماش يلي معي... صرت استرجع ذاكرتي أنا مارر عليي اسما وكنيتا ..
ديمة ابراهيم ... مين بتكون ؟؟
اتذكرت أنو فهد من بيت ابراهيم .. وبتذكر حكالي انو اخواتو ديمة و لمى .. و أنو ديمة وضعا المادي منيح وعايشة هون بلبنان... ماقدرت صدق لأن مو معقول الصدف تكون لهالدرجة... قررت بأقرب وقت روح لعندا و أتواصل معا و أشرحلا وضعي ..
أخدت رقما من البنت يلي معي بالشغل و حاكيتا ع الواتساب ... حكيتلا إني محتاجة مساعدة لو بتقدري... و اعطتني موعد روح زورا بعد يومين . شكرتا وسكرت...
صفنت ساعة و أنا عم فكر هي ولا مو هي .. أخدت تلفوني و اتصلت براما هي البنت يلي دلتني ع ديمة ..
حكيت معا و طلبت أنو اشرب معها فنجان قهوة بشي مكان... مارفضت و اتواعدنا عالساعة 5 نطلع ..
لبست وجهزت حالي وطلعت ع الكافيه لقيت راما آعدة عم تستناني... أعدت معا ..
سالي : دايق خلقي .. قلت منشرب قهوة سوا
راما : اي منغير عن جو الشغل شوي .. طمنيني حكيتي مع المدام ديمة؟
سالي : أي بس بتعرفي عايشة لحالي ومافيني أمنلا بسرعة ..
راما : لك حطي إيديكي ورجليكي بمي باردة .
ديمة خانم مافي أحسن منا و عكلن إذا في شي بدك ساعدك فيه تكرمي
سالي : حكيلي عن حدا من عيلتا يعني أعرف عالقليلة أسماء حدا من أخواتا ..
راما : هلأ مابعرف حدا ولابعرف شي بس بتوقع عندا أخ عايش باللبنان و اسمو فهد .. مرة هيك. حكت قدامي
اتأكدت أنو هي أختو لفهد ولازم روح لعندا أتفاهم معا و أخميلا يلي صار ..
نطرت مدة الموعد بيني وبينا بعدين رحت ع العنوان يلي أعطتني ياه ..
نزلت من التكسي كنت قدام باب كبييير ومواجهو في فيلا .. دقيت الباب وفتحلي الناطور... حكيتلو بدي أدخل لعند المدام ديمة في موعد بيني وبينا ...
فيلا كبيرة كتير وكل فرشا تقيل وبلون موحد ... الصالة دافية كتير و مرتبة...
توقعت ديمة تكون بعمر الخمسين .. بس تفاحئت لما شفتا صبية عمرا بحدود ال 30 ...
رحبت فيني و استقبلتني أحلى استقبال ولا كأن في فرق طبقات بيني وبينا .. حكتلي : انتي سالي مو؟
سالي : أي صح
ديمة : اهلا وسهلا ... حكيلي وضعك
حكيتلا قصتي الحقيقية كلا ... وحكيتلا أنو الرجال بعد ماعرف اني حامل بطل يكتب كتابو عليي ويتجوزني نظامي .
لامتني شوي ع عملتي بس بعدين صار تسب عليه للرجال وتحكي أنو هو بلا أخلاق ولح يدور الزمن ع أخواتو و ولاده ويصيبن هيك
ضليت عم اتطلع فيا و أنا صافنة : لااااا .. أخواتو مابيستاهلو ولا ولادو
ديمة : رح ساعدك بالمصروف لتعيشي و يتم الحمل بخير .
بس على شرط بدي روح ع بيتك اتأكد من وضعك وبحوز أسأل عنك حدا .
سالي : متل مابدك ..
طلعت من بيتا و أنا أفكاري مشوشة .. مو معقول أحكيلا شي ولا فهما أنو فهد أخوا ..
بعد يومين وصلني مسج منا كانت كاتبتلي فيه أنو اتأكدت من وضعك ورح أبدا ابعتلك من هاد الشهر راتب الك .
و ياريت تتفضلي لعندي يوم الأربعا لنتغدا سوا
كانت انسانة بقمة اللباقة تشجعت أنو احكيلا الحقيقة حسيتا رح تتفهمني و تحس فيني
بس ممكن تعتبرني بنت مو منيحة و دخلت حياة اخوا لخربا
. نطرت ليوم العزيمة جهزت حالي و لبست فستان ناعم و فردت شعري و حطيت شوية مكياج .. وطلعت لعندا
أول مافتحتلي الباب حكتلي : شو حلوة طالعة .. تفضلي
أعدنا ع الكنباية لبين ما الخدامة تحط الغدا .. حكتلي انو هي ماعندا رفقات هون وحبتني كتير وحابة نصير رفقات أنا وياها ..
ونحنا آعدين رن تلفونا
ديمة : أهلين ... طيب لاتطول بتلحق الغدا
سكرت التلفون وحكتلي : أنا عندي أخ عايش بلبنان وهلأ رح يجي يتغدا هون قال مشتقلي
بلعت ريقي و أصفر وجهي
سالي : طيب أنا رح روح
ديمة : لااا شو تروحي .. الغدا رح يجهز مستحيل
سالي : لا لا مابحب احرج حدا و بستحي
وقفت ولميت غراضي و تكركبت وديمة ضلت تحكيلي تدي وتشدني من ايدي
رن الجرس وركدت الخادمة فتحت الباب .
هون الصدمة كانت لما دخل فهد ع الصالة وشافني أنا وديمة
فهد : شوعم تعملي انتي هون ؟؟
وطيت راسي وصرت أبكي
ديمة : بتعرفو بعض؟
سالي : الولد ابني وما الك علاقة فيه
ديمة : سالي فهميني لأن لهلأ عم حاول أفهم وماعم بستوعب
سالي : فهد أبوه للولد يلي ببطني و فهد هو يلي عملي معي هيك
فهد : أختي هي وحدة كزابة لاتصدقيا
ديمة : كنتي بتعرفي أنو فهد أخي و أصداً أجيتي لعندي؟؟؟ جاوبيني اصداً أجيتي؟
سالي : لا لا والله ماكنت بعرف .. بالصدفة عرفت وماكان بدي احكيلك ولا بدي أخرب حياة فهد .. أنا بس بدي حدا يساعدني بالمصروف لأن أنا تبت من وقت عرفت فهد وصرت اشتغل بمشغل خياطة و الراتب ماعم يكفيني ..
أنا مابدي خرب حياة حدا
مضوا أشهر الحمل و ديمة ماتركتني وضلت عم تعطيني مصاري و أجار لبيتي بس كانت عم تساعدني كوحدة غريبة وحامل ابداً ماساعدتني لأن الولد ابن أخوا .. فهد كل هالمدة ماكان عم يقرب عليي ولا عم يحكي معي ولاحتى يتصل يتطمن
حكتلي ديمة انو المساعدة هي لأنك حامل.. وبعد الولادة بدنا نتأكد فعلاً آنو البيبي لأخي..
قضيت هالأشهر و أنا متعزبة و موجوعة ووحيدة ماحدا عم يتزكر اسمي ...
لوقت من الأوقات رن تلفوني من رقم غريب .. رديت وبتفاجئ أنو صوت أختي مياس ...
صرت ابكي و أحكي معا و أتطمن منا عن أهلي ..
بعدين حكيتلا أنو هالرقم لبناني .. أنتي هون؟
جاوبتني أنو هي متزوجة من شهرين وعايشة بلبنان ووصلت لرقمي عن طريق حدا بيعرفني ..
عطيتا عنوان بيتي ووعدتني انو تجي لعندي .
أعدت استناها كل الوقت كنت متوترة وعم افتل من مكان لمكان ومن غرفة لغرفة لحتى اندئ الباب .. ركدت بسرعة فتحتلا... كانت ملامحا متغيرة عليي كتير ضمينا بعض وأعدنا بالأرض نبكي ودموعنا تنزل ع خدودنا .
بعدين دخلتا ع بيتي وكنت مبسوطة فيا كتير
مياس : انتي تزوجتي كمان؟
حكيتلا قصتي يلي بتنكتب مسلسل هندي ..
مياس : اخخخ شو صار فينا اخخخ شو مرمرنا هالزمان
سالي : احكيلي عن أمي و اخواتي كيفن مشان الله ناطف قلبي عليهن
مياس : إيمان و نيرمين عم يشتغلو بالكباريه وماعد رجعو كتير عالبيت وطبعاً صارو معروفين بالبلد .. أما لورا اتزوجت واحد اتعرف عليها بالسوق.. صح أنو آدمي و ابن عالم وناس بس مقطوع من شجرة و ماعندو أهل ولا بيت ولا مصاري ولاشي مقضيين حياتن بغرفة ع العضم و مافيا فرش و فوق كل هاد آجار .. وعندن ولد اسمو عمر
سالي : عنجد؟؟ ياالله شو فرحت أنو صار عنا بيبي بالعيلة..
مياس و أنتي شو وضعك؟ شو صار معك بعد ما اشتغلتي عند الجماعة
مياس : الختيار و الختيارة يلي كنت عندن توفو كانو معامليني متل بنتن والله ولا يوم ذلوني .. بعد ماماتو صرت أبكي لأن مابدي أرجع لعند أهلك .. قام ابنن أيمن يمكن شفق عليي أو حبني و طلبني و تزوجنا ...
سالي : و... بابا؟
مياس : مات... كان في مطر قوية قامت فلتت الكابلات بحارتنا و أبوكي مارر من هنيك قامت ضربتو الكابلات وتكهرب ومات
بكيت .. صح أبي يلي وصلنا لهون و قساوتو السبب بس يمكن بكيت لأن بعمري ماحسيت بحنية الأب يلي كنت مشتهيتا لدرجة أنو مات أبي وماعشتا للحظة وحدة ..
سالي : طمنيني عن أمي والله داب قلبي عليها ..
مياس : ماما بخير ومنيحة كتير الحمدلله .. بعد ماتوفى أبوكي أمك باعت البيت و اشترت بغير مكان ... و عايشة ومرتاحة وعم تشتغل بالصوف هي وكم مرة من الجيران
طبيت راسي ع رجلين أختي وصرت أبكي : يا الله بردانة .. جوعانة .. مشتهية الدفا بحضن أمي .. مشتهية عيش بأمان متل غيري.. موجوعة ااااه
فجأة صرت أصرخ و أحكيلا مياس رح موت .. خديني ع المشفى وهون عرفت أنو صار وقت ولادتي
مسكتني مياس و اتصلت بتكسي .. اسعفتني للمشفى دغري
ضليت أتوجع و أصرخ ومياس برا لبعد ساعتين لولدت .. سمعت صوت البيبي بعدين نمت من وجعي
فقت بعد شوي كانت مياس فوق راسي هي و ديمة وفهد ..
دموعي كانو عم ينزلو ع خدودي وخاصة لما شفتن فوق راسي : أديش نمت
مياس : صرلك نايمة ساعتين ..
حملت ديمة البيبي من سريرو وحطتو ع صدري : مبروك جبتي صبي متل القمر ..
ضميتو وصرت بوسو و أبكي .. بعدين اتطلعت بفهد : لاتكون قاسي عليه متل أبي .. حسسو بحنيتك حرام عليك
قرّب فهد وحملو بإيدو و ابتسم : رح نسميه ورد
خرجوني من المشفى ورحنا ع بيت ديمة ..
ووقتا حكتلي ديمة أنو فهد راح لعندا ع البيت و اعترفلا بكلشي صار بيناتنا و أنو هو قسي عليي .. بس كان عندو مشكلة أنو اذا أعترف بوجودي وسجل ورد ع اسمو رح تتركو مرتو و ولادو يمكن كل حياتن ماعد يتعرفو عليه ..
ديمة : سالي في إلك عندي خبر حلو كمان
سالي : شو هو
ديمة : أنا تواصلت مع مرتو لفهد وحكيتلا كلشي .. بالبداية جنت وصار مشاكل كتير بين فهد ومرتو ووصلو لمرحلو أنو يتطلقو بس بعدين وبعد عزاب طويل اقتنعت انو تضل بس مقابل أنو تعيشي لحالك ماتقربي منا نهائياً ولا تحكي معا ولا مع ولادا ولا كأنك موجودة .
سالي : عنجد عم تحكي ؟
ديمة : أي عنجد .. ولهاد السبب فهد ماكان عم يبين عليكي طول هالمدة الطويلة ..
كنت عم نسق كلشي أنا وياه و بعدين خبرو أميي و أبي وماهان عليهن يلي صار معك ابداً .
سالي : يعني فهد رح يتجوزني هلأ؟
ديمة : أي نعم ..
كانت أسعد لحظات حياتي هي اللحظة يلي و أخيراً صار عندي فيا عيلة ..
فهد ثبت زواجنا نظامي وثبت الولد ع اسمو .. و ديمة ساعدتنا بمصاري و اشترالي بيت قريب من بيت ديمة و أختي بلبنان ..
وفرشناه و عشت فيه أنا وابني وفهد وقت يكون باللبنان يجي عالبيت ووقت يروح ع بلدنا يروح ع بيت مرتو وولادو .. عشت وما أذيت حدا من ولادو ولا اسأت بكلمة لمرتو .. أهلو حبوني كتير وكل يوم يحكو معي ويتطمنو عليي وعلى ورد وديمة دائماً تزورني أول تدقلي روح لعندا ..
أجا اليوم يلي قررت أنزل فيه أنا ومياس نشوف أهلنا ..
حكينا مع أمي وخبرناها تجمع أخواتي لأن نحنا رح نجي و نقضي كم يوم .
كان موعد سفرنا يوم الخميس ع الساعة ٨ المسا وبدنا نبقى أسبوعين عند أهلي وبعدين نرجع ..
آعدة بالسيارة وعم اتطلع من الشباك وفكر
صرلي 8 سنين ماشفت أهلي يمكن لما شوف أمي يغط ع قلبي .. أو يمكن ضما لتاني يوم .. يمكن ما عد ابعد عنا ولا لحظة ..
غفلت بالسيارة ع كتف مياس وفئت لما وصلنا ع باب بيتنا ..
أول ماحكتلي مياس : يلله انزلي هي وصلنا
صار جسمي يرجف وماعد قدرت أحمل ورد ع إيديي ..
أعطيتا ياه ومشيت و أنا عم اتسند ع الحيطان وحاسة بوجع براسي... تذكرت لما أبي زتني برات البيت مشان روح لأول مرة ع الكباريه... تذكرت لما ضرب أمي و أنا عم ابكي بالزاوية تذكرت لما حطني بسيارة حدا غريب وبعتني لبلد مابعرفا ..
وصلت لطابق بيتنا .. مياس دقت الباب.. فتحت أمي
أول ماشافتني دعست حوات البيت وضميتا وصرت أبكي بصوت عالي وهي تشدني أكتر وتبكي وهي عم تحكيلي : صراي صبية .. رحتي من حضني و أنتي طفلة .. ماتوقعت شوفك مرة تانية ياضي عيوني ..
بعدين بعدت عنا لقيت كل أخواتي عم يبكو صرت ضمن و أبكي ... و أمي حملت ورد وصارت تلاعبو وتبوسو .
قضيت يوم كان من أجمل أيام حياتي تأكدت وقتا أنو أنا كنت عم أسعى لشي اسمو العيلة .. دورت ع العيلة يلي فقدتا بطفولتي كان بدي طفل ورجال... وبدي أم و أهل يحسسوني بالانتماء
قضينا سهرة حلوة كل الليل نضحك و نحكي عن ذكرياتنا و قصصنا يلي صارت معنا بهالفترة ..
و إيمان و نيرمين حكولنا أنو ماعد رح يشتغلو بالكباريهات من يوم ورايح رح يدورو ع شغل منيح ويشتغلو فيه ..
وهيك بتكون التمت عيلتنا و التمو أحفاد العيلة يلي موجودين ويلي ع الطريق .. لان لورا و مياس حوامل ..
كل كم شهر كنا نجي نقضي كم يوم عند أمي ونصرعلا راسا نحنا وولادنا و ضوجتنا ونروح وبس نروح تسكر الباب ورانا وتبكي مع انو كان لازم تفرح لأن رح يرتاح راسا من الضوجة .
هيك بتكون خلصت قصتنا يلي بتلامس الواقع .
صدقوني مو كل الآباء حناين وفي كتير نماذج هيك عايشين بدون شرف ع حساب تعاسة ولادن .
القصة مأخوذة من وحي الواقع لكن بشخصيات و حبكة من الخيال ونشالله تكون عحبتكن بهمني تتركولي رأيكن الحلو
ملاحظة : يلي بقلي النهاية مختصرة بدي حط اسمو مع الشريرين والمنافقين بالقصة الجاية 😠😈
#بقلم_رند_محمد