الفصل 9
*روايات يمنيه عربيه 📚🖋️🇾🇪*
رواية ~الإنتـــــ🔏ـــــقام⚝~
*البارت رقــــــــ9ــــــم*ِ
.
https://whatsapp.com/channel/0029VajEuafBKfi6URrMh93y/2560
رحاب ضحككككت: يلعن ابليسك
طيب اكتب لها كيف انتي
بلال: والله ما اكتب شي براحتها خليها تثقل امد(على بال) ماكمل الفيلم تجاهل تلفونه وجلس يتفرج معها منسجمين بعد ربع ساعه وصلته رساله ( مساء النور)
رحاب منتظره ايش بيكتب بتشوف ..
بلال تجاهل تلفونه بدون مايرد
رحاب بعدت من جنبه شويه: مالك ماتكتب لها كيف الحال او اي شي
بلال : خليني اثقل ربع ساعه اخليها تتحمص شويه وبعدين ارجع اكلمها عشان ماحب هذا الاسلوب والتقليد احب البنت العفويه المتميزه اللي ماتصدق حركات كل اللي قبلها.
رحاب: ماعد في بنات هكذا كلنا نقلد بعض
بلال: تكلمي عن نفسش انا شفت في بنات غير ومميزات بصراحة
رحاب: فين في شغلك؟
بلال: لا مثل آية
رحاب: هااااه هي آية يعني
بلال باستهزاء: ايوووه هي آية يعني
رحاب: مثل ايش مميزه ! انت متعاطف لان معها مشاكل الان
بلال: لا أبدا ومش مضطر اقلش ايش التميز اللي فيها فكري لوحدش ..واسكتي بفتح الفيلم..
فتح الفيلم وجلسوا يتفرجوا
في غرفتها...
آية جالسه جنب الباب حق غرفتها بتتفرج السماء والنجوم بتفكر في نفسها وتتخيل كيف بتكون بعد ماتتجاوز كل اللي هي فيه
كل ماترجع بها ذكرياتها وحنينها لطفولتها تتضايق بسرعه وتحاول تنسي نفسها وترجع تفكر بنفسها في الوقت الحالي وكيف بتكون بعدين.
مش عارفه ايش موهبتها ! مش عارفه ايش التخصص اللي ينفعها بس بتقنع نفسها انها تحاول.
.
.
ثاني يوم الصباح..
بلال رسل لها: صباح الخير
وجدان ردت عليه بسرعه: صباح النور
بلال ضحك ايوه هكذا العين الحمراء وبدأ يتعرف عليها( ايش انطباعش عني اللي اخذتيه لما وافقتي)؟؟
قاطعت كلامه رحاب و آية طلعين السياره
بلال سارح وبيضحك رد عليها: يعني بس صدقتي اللي سمعتيه عني !
رحاب : بلال مش وقت التلفون الله يرضى عليك تأخرت
بلال شافها: كل يوم بتمشين رجل اليوم خورتي السياره !!
رحاب: لك اسبوع بتوصلنا ايش دخل اليوم قول تشتي تكلم خطيبتك
محد يعودكن الدلع ودفت: اخر يوم اوصل
رحاب : اصلا خلاص باقي اسبوع يتموا الاختبارات واعطل
بلال شافها ساكته: مالش اليوم؟
آية: مالي؟
بلال: هادئه ماعد بين اعرفش ولقانتش او مريضه ؟
آية: ما مريض الا انت
بلال حس قصف ضحك منها: والله انها بخير وماحد يقرب منها هذه البنت متوحشه
رحاب: كيف خطيبتك؟
بلال: والله لو هي هكذا في الواقع مثل المجابره واتس انها كيووووت مثل القطه في حالها
رحاب تشتي تعلق على وجدان رجعت سكتت عشان تخليه يعرفها بنفسه.
آية بتعيد وتتذكر كلام رحاب ان الشباب بيتغيروا وكل فتره يتعرفوا على واحده يعني كان طيب معها بلال وبعدين لانه تواصل مع خطيبته قلب عليها قررت ترجع تعامله كغريب.
.
.
بعد ايام واسابيع وفترة اختباراتها
رحاب: كيف اختبارش اليوم؟
آية: الحمدلله ماله شي
رحاب: آية ليش ماقبلتي الراتب ؟؟
آية: لأني ماسويت شي جالسه في الصف ادرس مفروض ادفع كنت رسوم تسجيل
رحاب ضحكت: هي حكومي مش خاص مثل حقش الاولى تطمني بس هذا راتبش انتي ساعدتي المشرفه حق الارشيف في الورق والملفات حق الطلاب وترتيب الشهايد
آية بتتكلم وهي متغيره وماسكه نفسها: هذك العمل مايستاهل الراتب هذا كله
رحاب: يعني انتي توظفتي عشان تتدلعي خلاص شاخصمه ايجار
آية بضبح : رحاب انا الصدق مضايقة منش وماحبيت فكرة تضغطي ع الإدارة يدوا راتب بخصم من مرتبات الأستاذات ايش دخلهن
رحاب: برضاهن
بلال خرج وبيسمع بيتصايحن وواقف ساكت في الحوش بيسمع
آية: برضاهن ليش يعني يدفعين هن الإدارة قادره تدفع لي لو تحتاجني
رحاب: يوو يا آية منش ياسعم بالغصب عيشلوا عليهن برضاهن اكيد
آية: انا مشتيش من راتب حد اشتغلت اشتي راتب على قد الشغل اللي اشتغلته للمدرسه يعني من الاداره
رحاب: طيب شلي حقش وارد الباقي حقهن بس من عنادش كيف عتفعلي في العطله مابش رواتب
آية: مدري
رحاب: طيب خلاص ركزي في مذاكرتش ولاتهمي شي
آية: مابين اهم شي
رحاب خرجت من عندها ومنحرجه ومستغربه على عناد وكرامه فيها ووضعها هكذا طيب عنادها لوين بيوصلها وكيف عتسوي!
شافت بلال
بلال واقف: مارضت تشلها صح؟
رحاب: ايوه
بلال ابتسم: قلت لش ، تذكري لما قلت لش هذه البنت مميزه باشياء
رحاب: يعني تشتي تقنعني انها مميزه عشان ماشلت فلوس
بلال: عشان في سنها في بنات ماهمهن مصدر الفلوس ومتعوب عليها او صدقه او كرامه لا
في بنات بيجلسين يلاحقين بعدنا ملاحقه ندي لهن هذه ميزه ، والباقي ارجع اقلش في كل موقف يحصل عشان تعرفي انها مميزه.
في الغرفه بتفكر..
آية ماسكه كتابها وبتفكر كيف عتدفع الايجار وكيف المصاريف عتلاقي شغل او لا؟
جلست تكلم نفسها انه حياتها عتمشي مثل ماتشتي وخططت لها عادي لو تأخرت هم مش محتاجين وهي اي وقت تشتغل وتجمع مبلغ الايجارات بتدفعه لهم.
.
.
في بيته
فاروق معصب : شهر والبنت مش عارف عنها اي شي
مرته: ان شاءالله تكون ماتت ولا ترجع وتفضحك وتفضحنا يعني انت مراعي لها ! ماعيقولوا الناس علينا بنتهم اختفت شهر ورجعت
فاروق : هو انتي اللي سرتي تكلمي هناء ومرة جارنا واختي وكل من وزع من عنده الخبر انتي السبب
مرته: من ما كان انا او انت السبب الاهم هربت وان شاءالله ماترجعش تعبنا فضايح بنتك يمكن رجعت البلاد تعيش مع جدتها محد عيستحملها اصلا شهر بكله.
.
.
في غرفتها بعد صلاة المغرب..
جلست تحاول تحل تمارين فيزياء ولقت صعوبه لبست وخرجت بتدق الباب حقهم. .
بلال فتح وكأنه نكز من النوم : ها آية ماتشتي مابش حد خرجين السوق
آية: هاه طيب انت راقد خلاص ارقد
بلال ضحك من الجمله الملخبطه اللي قالتها: انت راقد خلاص ارقد ومن فتح لش يعني الشيطان !
نزلت من الدرج و مطنشه ماترد عليه عشان لاتتليقن عليه بكلمتين وتلقى صعوبه في شرح الفيزياء
بلال شافها نزلت وبتمشي رفع صوته تسمعه وهو بيتمطط بعد نوم: يعني كنت راقدد صح بس مش وقت نوم الان مغرب اصلي ولما يرجعين وتجي رحاب اخرج اذاكر لش.
آية سمعت اللي تشتيه التفتت: تمام بجهز كل الاسئله في ورقه
بلال: تمام
آية رجعت غرفتها خلصت تصلي جهزت الدفتر القلم والكتاب وبتتمرى نفسها في المرايه بتشوف عدة أشياء ملامحها اوقات مثل كلام اخوتها وخالتها وجيرانهم شريرة جنيه ورجعت تشوف نفسها والمكان اللي هي فيه بثياب صلاه وبتذاكر وحياتها تغيرت ! حست نفسها بتحلم صح كل شي يجنن مثل مافكرت وتخيلت تعيشه بس فيها خوف و قلق كل ماطولت فترة غيابها عن بيتهم !!
كل ماحست ان عقابها عيكون شي اكبر من ما تتخيله..
بس رجعت تفكر محد عيقدر يمسكني لو اضطر اغير بيت رحاب كمان لو عرفوا مكاني
جلست تدعي الله يدلها على الشي الصح ويختاره لها تكمل فيه كملت تصلي عشاء ورفعت سجادتها
ورجعت في الكتاب تراجع مسائل وتكتب بقلم رصاص الحل على جنب بخط خفيف
بلال مراعي لهن في الشارع وبيكلم صاحبه
وصلين امه واخته
بلال شاف رحاب لحقها للباب: راعي لي خارج اشرح لآية بسرعة مسائل
رحاب: طيب
بلال استأذن من صاحبه ودخل..
رحاب دقت باب غرفتها : آية
آية: ادخلي
رحاب فتحت الباب ودخلت : فتحت الكيس ايش رأيش في هذا الفستان؟
آية: حالي بس لمن ؟
رحاب فكرتها بتسأل انه عشانها : لي ؟! مش حالي ؟
آية: حتى لش ماينفعش كنت مفكره للعروسة قلت شكله عادي ولو لش انتي اخت العريس يعني شكله عادي قوي
رحاب : كيف عادي عجبني قوي
آية: يعني تفصيل بسيط ومافيه اي موديل كأنه مستطيل فوقش والاكمام مثلثات وقماشه بطانه وتل فوقه ماينفعش
رحاب كانت فعلا اشترته لآية بس شافت ماعجبها : اقلش سر الصدق كان لش بس حين ماعجبش نطرحه لمرة بلال لكسوتها
آية ضحكت
بلال هيا ياهندسه مستطيل و شوعه لمرة بلال بعيني انتي وياها
آية بصوت مرتفع : هذا عمل اللي يجلس يتسمع مجابره نسوان
بلال بصوت اعلى منها : الحجه (الحق) عندي اللي جالس الاحق اذاكر لش
رحاب : يلا قومي يشرحل ش قبل مايخرج مع أصحابه.
آية قامت: بس اشتي اقلش شي وماتزعليش لو اشتريتي لي الفستان وفكرتيني بروح معاكم آسفه ماقدرش أجي العرس
رحاب: ليش؟
آية: عشان مالقاش خالتي
رحاب: وايش عيشلها عرس خطيبه أخي
آية: يمكن تعرفهم هي ماتفلت خرجات وناس وماتروح مكان
بلال: وانا شرسلها دعوه وكرت اذا ماخرجتي ذلحين هياااااا << بيصيح
خرجت آية هي ورحاب ..
رحاب جلست تفتح الواتس والنت تشوف تسريحات شعر ومكياج وتسال صاحباتها ..
و آية وبلال بيذاكروا.. بعد ماخلصوا اية دخلت غرفتها وهم طلعوا الدرج حق البيت دخلوا وقفلوا وواقفين جنب الباب..
آية رجعت خرجت بسرعه تطلبه لو معه اله حاسبه واقفه في الدرج
سمعت الجملة هذه
بلال: انا مش داري ذلحين ايش اقل لوجدان لو شافت تعاملي مع آية وعرفت انها واحده لقيناها مانعرفهاش ولاتقرب لنا ايش الحل خايف
رحاب: معك حق تخاف محد عيقبل هذا الشي يا تقلها وتصارحها يا اما تحمل المشاكل وخفف كلام مع آية
بلال: افضل أخفف كلام مع آية من الآن عشان لاتحس اني تغيرت عليها بعد ماتزوجت
رحاب: افعل اللي تشتيه وخليني ادخل اصلي واكل تعبت انا جلسه كل هذا الوقت عشان تذاكروا
آية انكسفت وحست بثقل وماتوقعت تسمع هكذا من بلال رجعت لغرفتها وماطلبته شي.
وبتفكر افكار كثيره ملخبطه حمدت الله انه آخر ماده وماعد تحتاج تتكلم معه ابدا بخصوص مذاكره.
بس ايش عتسوي هذه الفتره وايام ماتجي وجدان عتقدر تتحمل؟
اخر يوم للاختبار..
رحاب : تعرفي لو عتنجحي ماشفعلش يا آية
آية ضحكت وساكته
رحاب: والله لادي لش احلى هديه
آية: ولو رسبت؟
رحاب: عادي تعيدي السنه
آية: ابردي ماعد شدرسش
رحاب: بس عتنجحي قلبي حاسس معتكفه في غرفتش فوق الكتب يعني عتنجحي
آية: ان شاءالله بس محتاره ايش اتخصص
رحاب: ايش يعجبش انتي؟
آية: ولاشي
رحاب ضحكت : خلاص ان شاءالله تتزوجي
آية غيرت الموضوع: لما ارجع اشتي نسير السوق
رحاب: ايوه انا شاسير ادي الفساتين من عند الخياط وعيجوا اهلنا عندنا يمسوا عشان بعد يومين السمره حق بلال..
آية: وماعتقولوا لهم ؟
رحاب: في ايش!
آية: لو حد لمحني؟
رحاب: نقول طالبه مستأجره بس لوما تشتي عادي
آية: انا ماشتيش حد يبسرني بس صعب صح؟
رحاب : براحتش ولو حد ابسرش ماعنقله من انتي
آية: طيب انا خايفه من سام وامه لو يدروا
رحاب: ماعتجيش عندنا اصلا مابلا غير الاهل
آية شافت الضوء من الطاقه دخلت الشمس شافت ساعتها: يلا تأخرت باي
رحاب: الله يوفقش يارب انتبهي وراجعي الاسئله
آية: تمام
بلال وقف في الباب : جي معي اوصلش انا شاخرج
آية: شكرا مابش داعي
بلال: اوكي براحتش..
طلع سيارته وخرجها من الباب وهي بتمشي ومشي في الحاره وهي بتمشي بتشوفه مش معطيها اي اهتمام او يحاول يقنعها مثل اول ومتغير عليها.
.
.
بيت فاروق..
هاجر : انت داري جت لي فكرة
فاروق بيشرب الشاي قبل مايروح العمل: خير
هاجر: تذكر لما واحده جت المدرسه قالت تشتي شهايدها انها خالتها ؟
فاروق قفل تلفونه ولفت لها: ايوه مالها.
هاجر: يعني ليش تشتي شهايدها ! يمكن يسجلوها في مدرسه
فاروق : تسجل في مدرسه وقد تمت السنه انتي بعقلش ؟؟
هاجر: امتحانات الثانويه هذه الايام
فاروق: وايش دخل الموضوع؟
هاجر: يعني عتختبر نقدر نعررف وين هي
فاروق: ليش هي صف كم آية !
هاجر عوجت فمها: يعني بنتك ومش داري صف كم !! هيا شفت كيف كنت مهتمه بها اكثر منك ونكرت المعروف انت وهي
فاروق : يا الله رضاك من صباح الصبح دوار مشاكل..
مع السلامه خاطرش..خرج وهو بيفكر في الموضوع..
وصل العمل وجالس على المكتب حقه وجنبه مكاتب 2 زملائه
ياعلي اشتي اسألك معك معاريف في الوزاره والكنترول؟
علي : ماشي معي اخي وكيل مدرسه بس ماله صله بالتربيه والكنترول تشتي تنجح بنتك هي كم ورقه ابو الف وسير للكنترول مابش داعي الوساطات !
فاروق هز راسه : مع بس كنت اشتي استفسر على شهاده ابن جيراننا لها خيرات مدري يقبلوه جامعه او ماشي
علي مابش معي فكره بس شاسال اخي اتصل له لو تشتي
فاروق قام وقف : لا خلاص مابش داعي انا شاسير بنفسي... معي مشوار برجع قبل نهايه الدوام
علي : الله معك
.
.
وقت الظهر بيت بلال.
آية وصلت تبشر رحاب بالاختبار : سهل
رحاب واقفه في الباب : ادخلي مابش حد بلال وامي خرجوا جي عاونيني بين افرش الشقه حق بلال وارتبها
آية دخلت معها وطلعين
رحاب : ايش رأيش كيف الغرفه ؟
آية: حاليه بس السرير بقعته مش سوا وقع الجدر هنا فاضي ..
رحاب : والله صدق فكرتش افضل من بلال عتقدري نسحبه ونغير مكانه!
آية: ايوه عادي نبعده ونعيد ترتيبه هنا على قطعه قطعه.
رحاب ضحكت: تنفعي ديكور ذوقش قوي حالي مش مصدقين كيف رجعتي غرفتش ماكأنها كانت مخزن.
صوت المسجله واغاني الزفه مرتفعه ماسمعين وقت ماوصل بلال..
طلع بسرعه شاف جنب الغرفه خارج شنطتها دق باب غرفته..
آية لبست بسرعه البالطو والحجاب
رحاب فتحت الباب : مفاااجأه هيا ابسر كيف الغرفه الان احلى !! فكره آية ؟
بلال ضبح وبعصبيه : ليش الفضول !!! كان مكانه احسن انا اخترته هكذا صورته لوجدان واتفقنا هكذا..
رحاب: ذلحين اعصابك عادي ارجع غير انت وهي على ماتشتوا !
بلال: لا غيرين من ذلحين مش على ماتشتين انتين
آية عصبت من ردة فعله رجمت (رمت) المخده من يدها للسرير وخرجت من جنبه شلت(اخذت) شنطتها ونزلت بسرعه..
بلال تذكر سام في الحوش لحقها بسرعه بيدعيها في الدرج.. آية لحظه آية.
.
.
في الكنترول...
فاروق وسط الزحمه شاف ماقدر يدخل لعند حد استخدم اسلوبه عشان يقدر يوصل للمختص
في الاخير
المختص: ياخي صعب من بين مدري كم تشتي ندور لك اسم طالبه
فاروق خرج من جيبه : وادي لهم هذه للموظفين لو عيوافقوا عمل اضافي يدوروا اسمها واي مدرسه لان الموضوع مهم مسألة حياة او موت
المختص رجعها له: خير ان شاءالله هات رقمك بس اما هذه الحركات مش كل الناس تقبلها انا ضد هذه الرشاوي والأساليب.
فاروق: الله يكثر من أمثالك اصلا الواحد ماعد دري مايستخدم عشان يلقى اللي يشتيه.
المخت: خلاص حفظت رقمك ولو وصلت لأي معلومه شانبيك..
فاروق وقف وسلم عليه: تسلم..
*يتبع ..*
*هت تفاعل بقلب اخضر [✅️]*