بارت2
_*روايــــة: حـاࢪسـئ الـشـخـصـئ🥥🤎⸙♡»))*_
_*تـم مشـارڪةة الروايـةة مـن قنـاةة|| `حـڪايـه فـي ࢪوايـه🥥🤎`*_
_*تـابـع قـاة>>""*_`حـڪايـه فـي ࢪوايـه🥥🤎`
> *`https://whatsapp.com/channel/0029Vaeq2xMFCCocTw6qmA44/17327`*
_*اعـمـل متـابعـةة وفـعـل زر الجـࢪس يـوصـلك ڪل جـديـد اهـم حـاجـةة الريـأڪت🤎🥥.*_*
*══════ •『 ♡ 』• ══════*
الجزء الثاني
--------------------------------------
كانت الشمس قربت تغرب، والهوى بيلعب في شعر ليان وهي قاعدة في الجنينة، بتشرب عصير وبتراقب آدم من بعيد وهو بيتكلم في التليفون.
خلص المكالمة، وقرب منها.
"فيه حاجة؟"
"لا... بس كنت بفكر في حاجة."
"وده جديد؟" قالها بسخرية خفيفة وهو بيقعد قدامها.
ليان ضحكت شوية، وبعدين سألته فجأة:
"آدم... هو أنت عمرك حبيت قبل كده؟"
آدم رفع حاجبه وابتسم ابتسامة جانبية:
"ليه؟ بتكتبي رواية ولا بتحققي معايا؟" قالها بسخريه
"بجد يعني، عمرك كان في حياتك واحدة؟"
سكت لحظة، وبعدين قال وهو بيحاول يضايقها شوية:
"آه، فيه."
نظرتها تغيرت، عينيها اتسعت، ونبرت صوتها نزلت درجة:
"آه؟ يعني... يعني كانت حلوة؟"
"جداً."
"آه... يعني كانت رقيقة؟"
"أوي."
"وكانت بتحبك؟"
"بتموت فيا."
قلبها اتقبض، ووشها بقى مشوش بين غضب وغيرة وصدمة، وبعد لحظة قالت وهي بتقلب وشها بعيد:
"كويس ليك."
آدم ضحك بصوت خفيف، وقرب منها أكتر، وقال:
"دي ماما."
ليان بصت له بسرعة، عنيها متوسعة:
"هاه؟!"
"ماما. أمي يعني. اللي كنت بكلمها من شوية، عشان كده جبت سيرتها."
وشها بقى أحمر، وفضلت تبص له وهي مش قادرة تتكلم، فابتسم أكتر وقال:
"واضح إن في حد غيران."
"أنا؟ لا طبعًا، أنا بس كنت بسأل يعني، عادي..."
"آه طبعًا، واضح أوي إنك بس كنت بتسألي."
ليان وقفت بسرعة وقالت:
"أنا داخلة، الجو بقى برد."
"وإنتي متلخبطة ليه كده؟ الجو حلو."
"آدم!"
"حاضر، مش هتكلم، بس على فكرة... لما بتغيري شكلك بيبقى لذيذ."
مشت وهي بتحاول تمسك ضحكتها، لكن قلبها كان بيرقص جوّاها. هو حس؟ ولا بيهزر؟ ولا... ممكن يكون بيغير برضو؟
كان الجو حر شوية، والتدريب كان ماشي زي العادة، ضربات، صد، تعليقات جدية من آدم، وليان بتحاول تركز… بس فجأة وقفت وقالت:
"كفاية تدريب بقى! أنا زهقانة!"
آدم رفع حاجبه كالعادة:
"وإيه المطلوب؟"
"عاوزة أخرج… مول، آيس كريم، شوبينج… أي حاجة مش فيها ضرب!"
"مش تبطلي دلع؟"
"آدم… بليييز!" قالتها بنظرة بريئة مصطنعة بس دمها خفيف.
آدم تنهد بملل مصطنع:
"تمام. نص ساعة وجهزي نفسك، بس أنا جاي معاكي، مش هسيبك لوحدك."
المول... ليان ماشية قدامه بخطوتها اللي متدلعة شوية، وآدم وراها لابس نظارته السودة ووشه الجاد كالعادة... لكن فجأة:
"ليـــــــــان!"
بصت ليان بسرعة، لقت صاحبتها "داليا"، بنت من أيام الجامعة، جميلة ومتزينة أوي، وجاية ناحيتها بجري.
"إيه ده! إنتي هنا؟ واااو! وبعدين إيه ده؟! مين ده؟!"
قالتها وهي بتبص على آدم من فوق لتحت، وعينيها بتلمع.
ليان ابتسمت بتوتر:
"ده… آدم. بيشتغل عندنا."
داليا مدت إيدها تسلم على آدم:
"تشرفنا أوي، واضح إنك مش بس شغل… باين عليك جامد جداً."
غمزت له وهي بتضحك.
ليان ابتسمت ابتسامة مزيفة، وعينيها بتولع:
"آدم، يلا نمشي؟!".... آدم لاحظ نبرتها، وقال بهدوء:
"تمام، يلا."
في الكافيه.... آدم جاب لها عصير مانجا وحطه قدامها، وقال بهدوء:
"كنت هاتطلبي إيه؟ عصير نكد؟ ولا غضب؟"
"أنا مش طفلة على فكرة."
"محدش قال كده، بس الطفلة اللي قدامي كانت هتمسك صحبتها من شعرها من شوية."
ليان رفعت حاجبها:
"إنت شفت؟!"
"من أول ما ظهرت، عينيكي بقت نار."
ضحك وهو بيشرب من قهوته.
ليان خدت نفس وقرّبت تشرب، بس فجأة...
واحدة طويلة، شعرها نازل، لبسها شيك، ومزة بمعنى الكلمة، قربت من الترابيزة.
"آدم؟!"
"يارا؟!"
قامت تحضنه بحرارة.
ليان اللي كانت بتشرب، شربت نصف العصير… وبقيته طلع فجأة من بقها لما شافت الحضن.
خدت منديل تمسح بسرعة، ومحدش لاحظ غيرها إنها شرقِت، ووشها قلب لون الطماطم.
آدم بعد ما خلص السلام، قعد، وقال بهدوء:
"يارا دي بنت خالتي، كنا بنتربى مع بعض. ليان، عرفيها بنفسك."
"تشرفت..." ليان قالتها وهي بتكتم كل حاجة جواها.
يارا قعدت شوية، وبعد ما مشيت، ليان بصت قدامها وقالت بصوت واطي بس مسموع:
"هو اليوم ده مش هيخلص ولا إيه؟!"
آدم سمعها، ضحك، وبص لها:
"عجبني إنك بدأتي تتكلمي زي الكبار."
"بس أنا مش غيورة، عشان تبقى عارف."
"آه طبعًا، باين أوي…" قالها وهو بيشرب قهوته، ومبطلش يبتسم.
الطريق كان هادي، لكن جو العربية كان متوتر شوية، مش من اللي يخوف… لأ من اللي بيخلي قلبك يدق من كتر السكوت.
ليان قاعدة بتبص من الشباك، وإيدها على خدها، ووشها باين عليه الضيق.
آدم لاحظ وسأل بهدوء:
"مالك؟ صوتك اختفى فجأة."
"ولا حاجة."
"واضح."
قالها وهو بيزود السرعة شوية، سايب الكلام يهدى.
بعد دقيقة، سألها:
"أنتي غيرانة من بنت خالتي؟"
"ها؟! أنا؟! لا طبعًا!"
قالتها بسرعة، وعينيها فتحت على الآخر.
آدم ضحك بهدوء وقال:
"طيب... كنت هتصرفي إزاي لو أنا قلتلك إننا مخطوبين؟"
"كنت هفتح باب العربية وأنط!"
ضحك بصوت أعلى شوية، وقال:
"انزلي دلوقتي وأنا مالي."
قالها وهو بيبص لها، لكن عينه خدت لمحة من عربية ماشية جنبهم فيها شابين بيبصوا على ليان.
آدم على طول بطّل ضحك، ووشه اتقلب جد، وغمغم:
"اتحركي شوية على جوّا."
"ليه؟"
"قلتلك اتحركي!"
نبرته كانت حادة، فليان اتحركت بسرعة.
آدم مد إيده وسحب الجاكت بتاعه من ورا، وغطى بيه ليان.
"في إيه؟"
قالتها وهي مش فاهمة.
آدم وهو بيبص في المراية:
"في حيوانات ماشين ورانا من أول المول… والعربية اللي جنبنا فيها واحد بيصورك."
ليان اتخضت:
"إيه؟! ليه؟!"
"عشان جميلة."
قالها وهو بيغير اتجاه العربية فجأة، ووشه مرعب.
"آدم… انت بتغير؟"
قالتها وهي بتقوله بنظرة فيها شقاوة وسؤال بريء.
آدم بص لها بثبات وقال:
"أنا حارس شخصي، شغلي إني أحميك. ولو في حد قرب منك، سواء بكلمة أو بنظرة… أنا هعرف أوقفه عند حده."
ليان ابتسمت، وبصّت على الجاكت اللي مغطيها وقالت:
"بس مش كل يوم حد يغير بالشكل ده."
آدم بص قدامه وقال بحزم:
"غيرتي؟... لسه ما شفتيش حاجة."
في الفيلا – مكان التدريب الخاص في الجنينة الخلفية.... ليان كانت لابسة ترينينج مريح وشعرها مربوط، واقفة قدام آدم اللي كان كالعادة واقف بشموخ، دراعاته متشابكة، ووشه ماسك نفسه بالعافية من الشقاوة اللي في عينيها.
"يلا يا آنسة ليان، النهارده هنتعلم إزاي تفكي نفسك من إمساك من الضهر."
"يعني لو حد مسكني من ورا… أعمل إيه؟"
قالتها وهي بتحاول ما تضحكش.
"ما تضحكيش، ده تدريب جدي."
قالها وهو بيقرب ويمسك دراعها بهدوء.
لكن وهي بتحاول تطبق اللي قاله، اتلخبطت… وبدل ما تضرب بإيدها، لمسته بالغلط على صدره!
سحبت إيدها بسرعة:
"آسفة! والله مش قصدي!"
آدم بكل برود قال وهو بيعدل وقفته:
"عادي. ركزي المرة الجاية."
بس ليان كانت خلاص ضايعة… عينيها وقعت على عضلات دراعه، ولسبب ما قررت إنها تسأل:
"طيب… يعني العضلات دي… بتتمرن لها كام يوم في الأسبوع؟"
آدم رفع حاجبه وبص لها، وقال وهو بيبتسم بهدوء:
"كل يوم، ليه؟"
"لا… أصل شكلها... يعني… قوية وكده."
لاحظ ارتباكها، فابتسم ابتسامة جانبية وقال:
"عايزة تلمسيهم تاني ولا كفاية؟"
"ها؟ لا! لا طبعًا!"
قالتها وهي بتغطي وشها من الإحراج، لكن آدم ضحك ضحكة هادية، وهي فجأة اتلجمت… كانت مركزة في ضحكته أكتر من الكلام.
"مالك؟ بتبصي كده ليه؟"
"إنت بتضحك إزاي؟! ده انت دايمًا مكشر!"
قالتها وهي بتحاول تهرب من توترها بأي كلام.
آدم ضحك تاني، وقال:
"يعني دلوقتي أنا حلو ولا مكشر؟"
"هو… يعني… حلو… في… المكشّرين؟!"
وقفت كده جملة من اختراعها، وقعدت تضحك على نفسها وهي بتحاول تتهرب.
آدم بص لها وقال بسخرية:
"كلام موزون جدًا… عبّرتي عن نفسك تمام."
"بلاش سخرية! أنا زهقانة منك."
قالتها وهي بتقلب وشها، لكن هي كانت داخليًا مكسوفة ومبسوطة في نفس الوقت.
آدم قرّب منها وقال بهدوء:
"لو كل مرة هتلمسيني بالغلط وتتهربي، مش هنعرف نكمل تدريب."
"هو أنا اللي بلمسك؟ ولا أنت اللي بتيجي جمبي؟"
ضحك بصوت خافت وقال:
"يبقى نعيدها تاني ونشوف."
ليل هادي.... في أوضة ليان
الغرفة كلها كانت هادية، نور الأباجورة خفيف، وفي خلفية موسيقى رومانسية شغالة من موبايلها، مش مركزة فيها خالص. قاعدة على سريرها، لابسة بيچاما ناعمة، وشعرها سايب، وعنيها سابحة في السقف.
كانت ماسكة كشكول المفروض تكتب فيه ملاحظات للمذاكرة… بس الصفحة فاضية، وقلمها بيرسم دوائر وتوقيعات مش مفهومة.
"هو… ليه أنا بفكر فيه كده؟!"
همستها كانت مشوشة ما بين ضحكة محرجة وتنهد عميق.
افتكرت لمسته، صوته، طريقته وهو بيعلمها تضرب، والمرة اللي لمسته فيها بالغلط… حسّت بالكهربا وقتها ولسه حساها لحد دلوقتي.
"طب ما هو قاسي… ومتكبر… وساكت أغلب الوقت!"
قالتها وهي بتقنع نفسها، بس عينيها كانت بتروح للستاير اللي سايبة شباكها مفتوح.
قامت، وبخطوات بطيئة راحت تقف ورا الشباك… وساعتها شافته.
آدم… تحت، في الجنينة، بيتمرن.
كان واقف لوحده، بيشد حبل مقاومة، ووشه مركز، والتيشيرت مرمي على الكرسي جمبه… عضلات بطنه باينة بوضوح تحت نور الجنينة الخافت… الجسد اللي فيه كل ملامح القوة والصلابة.
ليان خدت نفس طويل، وقف قلبها ثانية.
"يا نهار أبيض… هو ده جسم إنسان؟!"
قالتها بصوت واطي وهي متسمرة مكانها، وإيدها على شفايفها.
تابعت تحركاته بنظرة متلخبطة… مش مصدقة إن ده نفس الشخص اللي من شوية كان بيضحك على ارتباكها… دلوقتي شكله كأنه طالع من فيلم أكشن… لا، مش أكشن، فيلم حب… أو يمكن اتنين سوا.
"هو إزاي كده؟! إزاي شكله جامد وفي نفس الوقت بيخليني أرتبك؟!"
حطت إيدها على قلبها اللي بيدق بسرعة، وغمغمت:
"ولا أنا اللي اتجننت…؟"
آدم وقتها وقف ياخد نفس، ومسح عرقه بالفوطة اللي على الكرسي، وبص حواليه، حسّ إن في حد بيراقبه.
رفع عينه فجأة… وليان ضربها الرعب.
اتخبّت بسرعة ورا الستارة، وقلبها هيقف من الخضة!
"لا لا لا، هو شافني؟! أكيد شافني! طب أعمل إيه؟!"
قعدت على الأرض تحت الشباك، ومسكه راسها بين إيديها وهي بتضحك بخوف:
"أنا بقيت مجنونة رسمي… واقفة أتفرج على الراجل من الشباك زي أفلام البنات السخيفة اللي كنت بسخر منها!"
فضلت ساكتة ثواني، وبعدين بصت لفوق، وقالت:
"بس هو فعلاً… مش شبه حد. لا في شكله… ولا في طريقته… ولا حتى في ضحكته!"
اليوم التالي....في جامعة ليان
الشمس كانت لسه دافية، وليان خارجة من المحاضرة، ماشية جنب آدم اللي كالعادة ماشي جنبيها بصمته وهيبته، لابس نظارته السودة، وحاطط إيده في جيبه كأنه بيحرس العالم كله مش بس هي.
العربية وقفت عند البوابة، وأول ما نزلوا، ليان لاحظت ست كبيرة واقفة جنب الطريق بتحاول تشيل شنطة تقيلة.
"آدم، هستأذنك دقيقتين…"
قالتها وهي نازلة بسرعة تساعد الست.
هو اكتفى بهزة خفيفة من راسه، وفضل واقف جنب العربية، عينيه متعلقة بيها وهي بتتكلم مع الست وتساعدها بكل طيبة… وشه مافيهوش تعبير، بس قلبه كان بيحس، بيشوف فيها حاجة بتكبر كل يوم.
وفجأة… شافه.
من بعيد، حد واقف على الطرف التاني من الشارع، بيحرك إيده بسرعة، وسلاح صغير بيطلع من تحت الجاكيت.
نظرة آدم اتغيرت في لحظة، وصوته طلع عالي:
"ليان!!!"
ليان لفت بسرعة، بس قبل ما تفهم، كان هو بيجري ناحيتها بجنون.
طلقة!!
وهي مافهمتش حاجة… غير حضنه.
آدم حضنها بكل قوته، شدّها لجسمه، وفي نفس اللحظة، الطلقة دخلت في دراعه. صرخة مكتومة خرجت منه، بس صوته كان ثابت:
"مافيش حاجة… أنا كويس…"
ليان كانت مرعوبة، عينيها بتلمع، وإيدها على صدره وهي بتحاول تمسكه:
"إنت اتصبت!! آدم!! في دم!! يا نهار أسود!!"
الشخص المجهول جري واختفى وسط الزحمة، وآدم بدأ يهتز جسمه من الألم، حاول يقولها:
"اركبيني العربية… بسرعة…"
وصلوا للعربية بالعافية، ليان كانت بتترعش وهي بتحاول تفتّح الباب، آدم وقع على الكرسي جنبها، وأنفاسه تقيلة.
"هروح المستشفى حالاً! ماتتحركش، أرجوك!"
قالتها وهي بتحط المفتاح وتبدأ تسوق، وصوتها باين فيه الرعب والدموع.
بس قبل ما توصل، صوته جه ضعيف:
"ليان…"
بصّت عليه… لقته مغمى عليه.
"آدم!! لا لا لا… ما تسبنيش… إصحى!!!"
مستشفى خاص... بعد ساعة
آدم نايم على السرير، مربوط دراعه ووشه شاحب، بس عايش.
ليان قاعدة جنبه، لابسة جاكيت واسع بتاعه، ووشها مليان دموع نشفت على خدها.
كانت ماسكة إيده، ومش قادرة تفلتها:
"ما ينفعش تمشي… ما ينفعش تسيبني… أنت مش أي حد، فاهم؟ أنت أمان، أنت…"
وبتقطع كلامها تنهيدة منه… فتح عينه، وبص ليها بصوت تعبان:
"كنت هتبكي عشاني؟"
"أنا فعلاً بكيت…"
قالتها وهي بتبتسم رغم دموعها، وبتخبّي وشها في كفه.
آدم مد إيده التانية، ولمس شعرها بلطف:
"أنا مش هسمح لحد يقربلك تاني… لو حياتي تمن ده… هدفعه."
يتبع
بقلمي.. شيماء محمود