طوفان الأقصى ٧ أكتوبر - أعد الأيام فقط من بعدك وأشتاق لك - بقلم أسيل رائد جميل عبد النبي | روايتك

أحمد حبيب أخته أسيل روحها وضحكتها تسلم روحك الطاهرة لأنها ما فارقتني لأنها معي كل حين وبتيجيني في المنام ،، ضلك تعال واسي قلبي المفطور ولي مشتاق الك ،،أحمد أنا لأول مرة في حياتي بحس حالي اخسرت اشي كبير كثير وكثير أنا اخسرتك أنا لما انت كنت عايش بينا كنت والله حاسة حالي قوية ومالكة القوة لانك جنبي وبتحبني وكنت بعرف أنه أنت بتحبني زي ما أنا بحبك وأكثر فأنا كنت مطمئنة حاسة بالقوة وشوفتك بتعطيني الفرحة ،،بس كنت دائما خايفة عليك خايفة ليصيبك مكروه أو لتبعد عنا ..بس طلع حكم ربنا أقوى من كل اشي في هل الدنيا غادرت هل الدنيا بلمح البصر يا حبيبي يا روحي رحمة الله تحفك وتملاك ويجعل مأواك الفردوس وتتنعم بنعيم ربنا وخيره واضلك مرتاح ، ما بأيدي غير اني بدعيلك وسامحني إذا بُكاي عليك بقلقك والله مش بأيدي لأني قلبي كل يوم بنزف دم عليك من جواته بس ما بخليه يفصح ، بس عيني ما بقدر اتحكم فيهن سامحني يا نور عيني وحبيبي .. ... ٢٣ يوم على فراقك ، ٢٣ يوم عيني ما شافوا نورك وضحكتك وحواحبك إلي كالليل يا أسمراني ،، ٢٣ يوم أصعب أيام حياتي ما عمري حسيت بهاد الاشي من قبل حاسة بوجع كبير في قلبي زي صخرة جواته مش مرتاح تعبان أنا تعبانة من بعدك يا أحمد ،، مشتاقة أشوفك وتقف قدامي وتضحك أنا مشتاقة الك أحمد ،، إخسرتك يا أحمد إخسرت أكثر واحد كنت أشوف حبه إلي بعنيه ،إخسرت أكثر واحد حبني وكان يهتم في ويفقدني ،،كنت لما تدخل علينا دائما تسأل عني واتقول وين أسيل أما ألحين ما حد أول ما يدخل علينا بينادي علي أو بيقول وين أسيل .. ... اليوم ال ٢٦ على بعدك والدنيا ضنكا في وجهي .. أحمد أنا في نار جواتي غضب كبير كثير محبوس جوات قلبي، مش عارفة كيف أطلعه نار نار وغضب كبير ، صحيح بحكي مع الناس وبتبسم الهم والحياة كأنها بتمشي، بس أنا والله يا أحمد والله إنه قلبي تعبان وعيني مش شايفة النور لأنها بطلت اتشوف نور وجهك وضحكتك ، مشتاقة الك مشتاقة الك.. مشتاقة الك مشتاقة الك مشتاقة الك ..وقلبي ملهوف يحضنك روحي مشتاقة تناقرك وتضحك معك مشتاقة الك وتعبانة كثير من بعدك أنا كل ما حد يحكي عنك وكل ما أفتكرك عيني بصيحن من شوقهن الك ونفسي أشوف شوية من طيفك بدخل علينا.. ... اليوم ال ٢٨ وأنت غايب ومحلق عند الرحمن الرحيم .. اليوم احلمت فيك وبتكون هادي المرة الثالثة تيجيني بالحلم ..لما انت تيجيني بالحلم بحسك معي وجنبي وبتواسيني على فراقك .. احلمت انك داخل علينا وأنت بتغني وأنا قاعدة على الأرض وخالتي أميرة بتحشي النا جبنة بالرقاق لأنا مسكت إيدك وركزت عليك علشان أقوم وقلتلك مشتاقة لصوتك مشتاقة أسمع صوتك وحضنتك وأنت طبطبت على ضهري ... يا حبيبي وروحي وضحكتي يا أحمد أنا متأكدة إنه انت حاسس بشوقي إلك وحاسس قديش نفسي أشوفك علشان هيك لما تيجيني بالحلم بتيجيني وانت فرحان وإما بتحضني لتواسيني أو بطبطب على ضهري لتخفف عني تعب روحي المشتاقة إلك .. أنا من زمان بحب أكتب وانا بكتب كثير بس،، ما كنت متوقعة إني بيوم من الأيام رح أكتب رسالات رثاء وشوق لأخوي الشهيد ... وبالأخص أخوي الأغلى على قلبي من بينهم كلهم ، إلي بيحبني وبحبه إلي كان بفقدني دائما ، إلي إيش ما يكون معه بعملي نصيب من الاشي إلي بهتم في وبضحكني وبغير حال مزاجي ولو ضليت أكتب للصبح مش رح أوفي حق أحمد حبيبي ونور قلبي .. يا رب أنا ما بعترض على قضاءك بس أخدك لأحمد كثير صعب وأتعبني ، نفسي أعيش معاه نفسي يكون الحزن إلي أنا في حلم ،، كابوس .. نفسي أحمد يكون معانا وضحكته بينا ..أتعبت من فراقك. أنا مشتاقة لأيامنا برفح وخانيونس لأيامنا والظروف صعبة بس ضحكتك بينا إلى بتهون علينا كل اشي صعب ،،ولو كنا متنكدين بتحول حالنا لضحك وتحسسنا قديش كل اشي هين وما بسوى ،، وأنه إلي بسوى وجودك بينا وجودك معنا .. من يعيد لي حبيب قلبي وضحكة بيتي من يعيد لي روح البيت وسيده من يعيدك لي يا أحمد روحي تعبت ، ،استنشاقي للهواء يخنق روحي أزفت ، ،والحياة غاب معناها تعبت من غيابك ،، تعبت من فراقك تعبت من عدم وجودك يوم استشهادك أصبحت أركض وأركض أبحث عنك بين العالم الميت.. أين أحمد أين خليلي أين أخي شاهدت طيفك على الأرض مستلقٍ ،، قالوا لي هذا أحمد قلت لا ،، قالوا أحمد ،، قلت لا ،، قالوا أحمد ،، قلت إنه هو أحمد..