طوفان الأقصى ٧ أكتوبر - خليلي عيدي🤍 - بقلم أسيل رائد جميل عبد النبي | روايتك

أحمد يا عيدي يا حبيبي..أنت عيدنا وضحكتنا أنت عيدنا وروحنا أنت روح الدار يا أغلى من في الدار ، كيف بدنا نفرح بفرحة العيد وأنت مش موجود أنا ما بقدر ، ما بقدر أفرح بالعيد من غيرك العيد ما بصير إلا بوجودك يا حبيبي وقلبي وضحكتي أنت العيد.. أحمد الله ينور قبرك بأنوار النبي وترتاح واضلك مطمئن فيه ، عمرك ١٨ سنة بس أنا كنت أشوف عمرك ٤٠سنة من رجولتك ورزانتك وضحكتك وحبك للحياة أحمد أنا كثير كثير مشتاقة إلك ،كثير نفسي أحضنك ، كثير نفسي أقول أجى أحمد ، ما أغلاك في قلبي يا قطعة منه ما أغلاك يا حبيبي ،، نفسي كل العالم يعرف قديشك إنسان محترم وقديشك إنسان بحب الحياة ومتواضع وضحكتك على وجهك دائما ،، مع أنه كل إلي بيعرفك انكسر على فراقك وانقهر قلبهم من بعدك ،، وانا أفضل من يعرفك وأكثر من أحبك كيف بتتوقع حال قلبي المفطور على فراقك أنا اتعودت عليك وعلى مناداتك أسمي لما تدخل الدار ولو ما ناديت علي عيني تلاقيها بتلحق فيك اتشوف مالك ... أحمد رحمة الله عليك يا كتفي وسندي وضحكتي ربنا يجعل مأواك الفردوس ويجعلني جارتك كمان في الآخرة ،،كل سلام العالم ونوره يملأ قلبك يا أسمراني .... اليوم ال٢٠ على استشهاد أحمد أخوي ..هادي أول مرة في حياتي يمر ٢٠ يوم وأنا مش شايفة أحمد ومش حاكية معاه ومش ضاحكين مع بعض ومش مناقرين بعض ..أحمد يا حبيبي رحت عند ربنا قبلي وسبتني في هل الدنيا الفانية ،أحمد من بعد ما أنت استشهدت أنا استوعبت أنه هادي الدنيا قد ما جرينا وحرثنا واتعبنا فيها هي بالنهاية فانية وأنه هي بالمرة بالمرة مش حلوة من غيرك أنت كنت محليها ومعطيها لون وضحكة وحياة ،، يا ريتك موجود جنبي وضحكتك حولي بس مش ملاقياك،، كثير كثير مشتاقة إلك كثير نفسي نقعد نحكي زي زمان ، ونحكي عن المدرسة وعن ملعب الكرة ، وتجيبلي واجبك أحله إلك وأعملك شاي وتستأمني على أغراضك ،، أنا من زمان بحب طيفك وبحبك يا أغلى أخ في قلبي يا روح قلبي ونوره..أحمد واسي شوقي إلك بإنك تيجي على أحلامي على الأقل كثير مشتاقة إلك ،،انت عادتك ما بتاخد كل الأمور بجدية وانا بقلك بنفعش هيك بس ألحين بتمنى أشوف ضحكك ومسخرتك على الأشياء أو على موقف أو على حد وكله كان بروحك الطيبة .. مشتاقة أخرفك عن أيامي وأحلامي وأخليك تفتخر في ، زي ما أفرحتك في توجيهي وكنت أنت كثير متحمس للنتيجة ، بس ألحين ما في أحلام عندي ولا آمال غير إنه ربنا يستقبلني عنده شهيدة أنا عنجد ألحين طمعانة بخير ربنا على الدنيا ،، زمان كنت متمسكة فيها لانه كان عندي أحلام بدي أتمها وبعدها أروح عند ربنا بس ألحين ما بدي اشي غير اني استشهد وأروح عند الرحمن الرحيم إلي هو أرحم من كل البشرية ونعمَ بالله ولا إله إلا الله. ربي ارحم أحمد أخوي يا أرحم الراحمين وأدخله في رحمتك انك انت الغفور الرحيم واجعل مأواه الفردوس العالي واجعلني جارته في الآخرة وأنر قبره بأنوار نبينا محمد صلى الله عليه وسلم وثبته عند السؤال وأنعمه بنعيمك يا أرحم الراحمين وهون عليه ما يلقاه في القبر وثبته على الصراط المستقيم .. ... اليوم ال ٢١ على فراقك يا أحمد ، واحلمت فيك حلم زي ما كنا زمان كيف بنلحق ببعض وبنتناقر وبتعطيني حجات إلي ،،احلمت فيك انك أعطيتني شوكولاته حبات وجميل صار يلحق فيي بده ياخدهن مني وضلو يلحقني في كل الدار لأنت بعدها عند باب غرفة بتقلي افتحي الجوال وانا بقلك ولك تعال سكر معي الباب جميل بده ياخد الشوكولاته ،، وشديتك وواقفنا ورى الباب وصار جميل يضرب ويضرب بالباب وانا بقلك وين صحتك ودخل جميل وأخد حبة من الشوكولاته بعد ما شدشدناها ..