البارت 1
راحت قعدت حذال بدر
ابو بدر : ها حبيبتي مريوم شو قالت لج الدكتوره؟
مريم : والله يبه ماقالت شي قالت صداع خفيف ويروح وعطتني شوي ادويه
ميره : قلت لكم دلوعه مافيها شي
مريم : اقول جب انتي اخر وحده ترمسين عن الدلع يادلوعة ابوج
ميره : اويه ليش تغارين
مريم : انـ... ماكملت الا وبدر قاطعها
بدر : بس بس خلاص صدعتونا امايه جوفي بناتج
ام بدر : من صجه اخوكم خلاص اسكتن
مريم : سكتي بنتج الدلوعه
ميره : نانانانانا
ابو بدر : ترا باجر رايحين بيت يدكم مسوي عزيمه
ميره : الله وناسه
مريم : حمماسسس
قعدو يسولفون وصار وقت العشا تعشو وخلصو وكل واحد راح غرفته في غرفة مريم كانت قاعده على الكرفايه وتلعب في تلفونها دق دق دق <
مريم : منوه
ميره : انا
مريم : ادخلي
دخلت ميره ركض ونقزت فوق كرفاية مريم
مريم : ويعه شوي شوي
ميره : ههههههههه تعالي شو تسوين لين ها الوقت ناشه ماتشوفين الساعه كم الساعه 1
مريم : الكلام موجه لج ليش بعدج ناشه؟
ميره : ههههههههه ماياني رقاد
مريم : اقول اقول روحي انخمدي باجر ورانا نشه من الصبح عسب نروح بيت يدي
ميره : لو نروح العزبه احسن من بيت يدي شرايج باجر نقنع ابويه نروح العزبه
مريم : حسيت احلى بس عادي المره اليايه هههه
ميره : خلاص يلا بروح ارقد تصبحين على خير
مريم : وانتي من اهل الخير سكري الليت وياج
ميره : قولي عمتي ميره اول
مريم : ميره فكينا فيني رقاد
ميره : هههههههههههههه اوكيه اوكيه
سكرت الليت وطلعت برع
و على طول مريم نامت
الصبح الساعه10 نشت مريم من الارقاد وراحت تاخذ لها شور طلعت وراحت غرفة الملابس خذت لها مخور مغربي وعقب راحت صوب التسريحه تمشط شعرها وحطت مسكره و روج ونزلت تحت شافت امها وابوها قاعدين تحت في الصاله
مريم : صباح الخير
ام و ابو بدر : صباح النور
ام بدر : ها يمه مريوم شفتي اختج اذا نايمه ولا؟
مريم : لا يمه ماشفتها
ام بدر وهي تقوم : يالله عيل انا بروح اشوف ميره وانتي قولي حق ميري تجهز البخور
مريم : ان شاء الله
راحت ام بدر تشوف عيالها ومريم راحت عند ميري تقولها تسوي البخور من بعد ماقالت حق ميري رجعت قعدت عند ابوها
مريم : يبه
ابو بدر : هلا يبه
مريم : يبه قول حق يدي الاسبوع الياي نجتمع في العزبه
ابو بدر : خلاص حبيبتي انا راح اكلمه ومايصير خاطرج اللى الطيب
قامت مريم وهي فرحانه وحضنت ابوها وراحت خذت البخور من ميري وقامت تتمشى وتخبر كل انحاء البيت بس كان تفكيرها مب معاها مع الشيبه اللي شافته في المستشفى وشو صار مع ولده
ونروح لمكان ثاني وبتحديد في المستشفى كان ذياب راقد في السرير وابوه قاعد في الكرسي وماسك ايده وراقد فجأه ذياب شوي شوي قام يفتح عيونه
ذياب بصعوبه وهو يفتح عيونه : انا وين شوي شوي قدر يفتح عيونه وشاف عمره في المستشفى استرجع ذكرياته قبل مايدخل المستشفى
ذياب : يبه راح اطلع مع الربع
ابو ذياب : لا يايبه خلك قاعد في البيت
ذياب : يبه لا تخاف علي بطلع شوي ويا الشباب وراجع
ابو ذياب : لا تتاخر ياوليدي
راح ذياب وباس راس ابوه : ان شاء الله
بعد ساعتين من روحت ذياب رن تلفون ابو ذياب
ابو ذياب : السلام عليكم منوه معاي؟
الدكتور : معاك مستشفى ال...ـ
ابو ذياب وقلبه يرق من الخوف ويرتجف : خير اخوي؟
الدكتور : ذياب سلطان ال... سوه حادث وهو احين في غرفة العمليات
طلع ابو ذياب وراح بسرعه المستشفى وهو قلبه كله خوف على ولده
نرجع للحاضر ذياب كان يشوف ابوه اللي راقد ومبيين على ويهه التعب الشديد تحرك شوي عشان يعدل قعدته جان يحس فيه ابوه ويقعد
ابو ذياب : حمدالله على السلامه ياولدي
ذياب : الله يسلمك يبه
ابو ذياب : قلت لك مهوب زين الطلعه ولا تطلع بس انت عاندت
ذياب : اسمحلي ابويه بعد الله رايد يصير الحادث
ابو ذياب شاف ولده : انت بلاك جي بارد ولا جنك مسوي حادث احين بعطيك كف اطيحك مره ثانيه
نقع ذياب من الضحك : هههههههه والله اسف يبه صدقك انا ما استحي على ويهي يبالي كف
ابو ذياب : هيه يبالك
ذياب : عسى ماتعبتك وياي اسمحلي يبه انت روحك ماتحب دخلت المستشفيات
ابو ذياب : شوهاي الرمسه ؟ تعبك راحه ياوليدي حمدالله ماكان فيك شي بس ناقص دم تبرعو لك والحمدالله
ذياب نزل راسه
ابو ذياب بتردد :بس مهب انا اللي تبرعت لك
ذياب رفع راسه بصدمه : عيل منوه ؟
ابو ذياب قال له كل السالفه
ذياب وهو في نفس الصدمه : حصل خير
ورجع يرقد لانه حس بصداع في راسه
نرجع لعند بطلتنا اللي كانت سرحانه وماحست في اللي يزقرها
تجدم بدر من اذنها وصارخ : ويعهههههه ماتسمعييييننن
نقزت مريم وكان البخور بيطيح من ايدها بس مسكته : خير شفيك ليش تصارخ
بدر : ازقرج من ساعه اقولج مريوم هاتي البخور مريوم ابا البخور بس ماتردين ابا اعرف في شو سرحانه
مريم بعصبيه : هاك هاك البخور فكنا
عطت بدر البخور وراحت غرفتها تحط لها ميك اب خفيف
مرت ساعه والكل زهب
ابو بدر يصارخ : يالله بسرعه اترياكم في السياره
مريم لبست عبايتها ونزلت على طول ووراها ميره ابو بدر وام بدر وميره في سياره وبدر ومريم في سياره
مريم : ااااااا بدر عطني ال اي يو اكس انا ابا احط اغاني
بدر : ادري لو عطيتج راح تحطين اغاني راشد الماجد
مريم : دخيلك اغاني راشد الماجد احلا عن عيضه
بدر مد ال اي يو اكس لمريم
مريم : يسسسس وحطت اغنية من قلب وقعدت تغني وياها
وصلو بيت يدهم ونزلو كلهم ودخلو الميلس وقفت مريم صوب الجامه تعدل شكلها وتفصخ عبايتها عدلت شعرها ولبست شيله خفيفه وحلوه وراحت تسلم على الكل من بعد ماسلمت راحت وقعدت حذال البنات
ام عبدالله (اليده) : شخبارج عيل مريوم بس ساحبه علينا
مريم : والله يا الغاليه لو كان ابوي يخليني اسوق كنت اربع وعشرين ساعة عندكم
ابو عبدالله (اليد) : اشوه مايخلونج تسوقين عشان ماتزعجينا كل يوم
مريم مدت بوزها يعني اونه زعلت
اليده : وي حرام عليك اصلا مريوم منوره البيت
مريم : والله فديتج يا الغاليه البيت منور بأهله
اليد : شوفيكم تراني اتغشمر واشر صوبه تعالي تعالي مريوم قعدي حذالي
مريم قامت على طول وراحت تقعد حذال يدها وخذتهم السوالف وصار وقت الغدا والكل قعد يتغدا ومن بعد ما خلصو الغدا راحو البنات يقعدون برع في الحوي
مريم : اقولكم وين ميثا؟
روضه : مدري قالت اطلعو انا نسيت شي بيبه وبيي
مريم : اهااا
نروح لعند ميثا
ميثا : ياخي وين حطيت الفون توه كان مني
زينب : ميثا شو يالسه ادورين
ميثا : عمو قاعده ادور فوني مدري وين حطيته عادي تدقين عليه
زينب : اوكيه حبيبتي ودقت ع الفون وكان يرن تحت المخدات
ميثا : عمو عمو خلاص لقيته مشكوورههه
زينب : العفو
نعرفكم على الشخصيه اليديده
زينب اخت عبدالله (ابو بدر ) يعني بختصار هي عمت مريم والبنات العمر : 25 مب متزوجه
نرجع للرواية
زينب : اقولج ميثا
ميثا : هلا
زينب : روحي عند الخدم وقولي لهم يطلعون يعطون صينية الجاي حق بدر
ميثا اول ماسمعت اسم بدر فز قلبها : ان شاء الله
وراحت عند الخدم وقالت لهم وعقب طلعت برع في الحوي عند البنات وهي طالعه شافت بدر واقف صوب الباب يتريا الخدم ميثا نزلت راسها وراحت عند البنات
ريم : لا جان تميتي داخل ليش يايه برع
ميثا : هههههههههه كنت ادور فوني
روضه : المهم تعالي بسرعه مريوم تبا تقول لنا سالفه بس قاعد ننطرج
ميثا وهي تيلس : هاه يلا قولي
مريم قالت لهم سالفة المستشفى
روضه : امبيهه!
ريم : اويه كيف تبرعتي له وانتي ماتعرفينه حتى
مريم : والله كانت حالة الابو تكسر الخاطر ما اقدر اشوفه يصيح وانا ما اسوي شي و اذكر انه قال ها ولده الوحيد يعني حرام جي يروح من ايده واصلا اللى هو دم مافيها شي
ميثا : خلاص احس عادي حصل خير
روضه : لا وين عادي احس مايستوي جي تتبرع بدها للمريض
ريم : المشكله ماتعرفه
مريم : اوهو ترا دم مب كليه
روضه : تسويها تتبرع بكليتها حق واحد ماتعرفه
ريم : هههههه هي من طيبة قلبها
مريم : ههههه خلاص عاد مب لهدرجه
قعدو يسولفون ويضحكون ساعه وبعدها دخلو الصاله
في المستشفى
نش ذياب من الارقاد وهو يشوف ابوه قاعد يقرا عليه وفجأة تذكر سالفة البنت اللي تبرعت له شل الافكار عن راسه وقال
ذياب : يبه ليش ما تروح البيت ترتاح الحمدالله صرت احسن لاتخاف علي
ابو ذياب : لا لا ياوليدي عادي مرتاح هني عندك
ذياب : عشاني يبه روح رييح شوي في البيت بعدين العصر تعال
ابو ذياب من بعد ما قنعه ذياب : تمام انا رايح واذا بغيت ايشي اتصل فيني
ذياب : أن شاء الله
قام وطلع ابو ذياب ورجع البيت وعلى طول رقد لانه صج كان تعبان ومو راقد عدل
اي وصح نسيت اقولكم انه ابو ذياب مريض في مرض شديد عسب جي كان ذياب خايف عليه وقال له يرجع البيت يرتاح
في بيت الجد
خلصو تعشو وكل واحد رد بيته راحت مريم غرفتها وخذت لها شور وطلعت ولبست بجامه ونزلت تحت شافت امها قاعده في الصاله
مريم : هلا يمه
ام بدر : هلاوغلاا ليش مانمتي
مريم : كنت يايه اقولج انه باجر عندي موعد في المستشفى عادي اروح بروحي ولا مع السايق
ام بدر : لا بروحج ولا مع السايق قولي حق اخوج بدور يوصلج
مريم : بس يمه يمكن بدور مشغول ولا شي
ام بدر : خلاص انتي روحي رمسيه اذا قال مشغول انا اوديج
مريم : اوكيه
وراحت فوق غرفة بدر دق دق دق
بدر : منوه
مريم : انا
بدر : دخلي
دخلت مريم ويلست فوق الكرفايه : بدور عادي توصلني باجر المستشفى
بدر : ليش شفيج
مريم : ماشي بس عندي موعد
بدر : خلاص تمام بس متى؟
مريم : العصر
بدر : اوكيه
وطلعت من غرفته وراحت غرفتها ترقد
اليوم الثاني نشت مريم الساعه 8 الصبح ودخلت الحمام تاخذ لها شور وطلعت لبست
بنطلون جينز وقميص وردي قصير صدت سمعت صوت تلفونها يرن خذت الفون وشافت رقم غريب
مريم : السلام عليكم؟
مستشفى ال... : وعليكم السلام معانا مريم عبدالله ال...
مريم : نعم
النيرس : موعدج اليوم الساعه 10 الصبح
مريم : هاه كيف؟! احيد كان العصر
النيرس : اسفين بس الدكتوره صار لها ظروف وماراح تكون موجوده العصر عشان جي غيرنا وقت الموعد
مريم : خلاص تمام
لبست مريم عباتها وراحت ركض غرفة بدور كانت الساعه 9 وتمت ادق الباب حتى مانطرت الرد على طول دخلت الغرفه
مريم : بدر بدر بدر بدر بددرررررر
بدر وهو يفتح عين وحده بالغصب : خير خير
مريم : بدر قوم غيرو وقت موعدي الساعه عشر خلوه
بدر : ستغفرالله يالله قايم فكينا بس
نزلت مريم تحت شافت امها
ابتسمت مريم : صباح الخيرياحلوتي
ام بدر : على وين لابسه عبايتج
مريم : موعدي اجلو وخلو الساعه ١٠
ام بدر : عيل قعدتي اخوج راح يوصلج؟
مريم : هيه
بدر وهو نازل من الدري راح باس راس امه
بدر : يالله مريوم اترياج في السياره
مريم : يلا احين بيي بس بروح ايب حليب من الثلاجه وبيك راحت مريم وخذت لها حليب وكانت بتطلع بس نزلت ميره من الدري تركض لما شافت مريوم لابسه عبايتها
ميره : مريوم مررريوىمم
مريم : ها ها ويعه
ميره : على وين ان شاء الله
مريم : فكينا بروح المستشفى
ام بدر : ميره تعالي وخلي اختج تروح قبل لا يطوفها الموعد
ميره لفت وتوها تستوعب انه امها موجوده
ميره لفت صوب مريم : روحي روحي ولي وراحت عند امها وباست راسها وقعدت صوبها
مريم وهي تركب السياره
مريم : اهههههه يابدورالجو قام يصير جنان
بدر : لا جان مايتي
مريم : هههههههه والله تعرف اختك ميروه لو استلمت واحد خسي يروح بدون تحقيق
بدور : صادقه والله عيل الساعه كم موعدج
مريم : جي الساعه 10:40
بدر : اوكيه تبغيني انزل وياج ولا؟
مريم : لا لا ماله داعي بس بروح شوي ارمس الدكتوره وراجعه
بدر : خلاص تمام
وصلو المستشفى ونزلت مريم قبل ماتسكر الباب
بدر : متاكدا ماراح اطولين؟
مريم : هيه هيه ماراح اطول دقايق
بدر : اوكيه
نزلت مريم ودخلت المستشفى <<<مسكين بدر مايدري انه راح يخيس في السياره مثل امه
نروح لذياب اللي قعد من الارقاد وماشاف ابوه
ذياب في نسفه : وين ابوي؟ بعدها تذكر انه رجع البيت
ذياب : هههههه ويقول مب تعبان وهو من التعب صارله يوم كامل مايا المستشفى اههه تعبت وانا يالس في الكرفايه خلني اروح المطعم
وقام وطلع من غرفته من دون مايجيك اذا هو بخير ولا عادي يمشي
نروح عند مريم
مريم : ااخخ خاطري في كوفي جيجي بارد في ها الجو والله ما اخلي شي في خاطري ههه
وراحت خذت لها كوفي وهي تمشي راجعه السياره رن تلفونها
رفعت التلفون تشوف منوه (جنتي💙)
مريم : هلا هلا بجنتي
ام بدر : هاه عيل نزلتي بدر وياج
مريم وهي تتذكر بدر : ااااااا يمه نسيت بدر في السياره هههههههههههه
ام بدر : خس الله بليسج راح تخلينه يخيس نفسي
مريم : هههههه يمه ترا يالس في السياره مب في الشارع يعني عادي رلاكس
ام بدر : حرام عليج يابنت شو اللي رلاكس وينج انتي احين
مريم : ويت
لفت عسب تشوف اللوحه وططططططخخخخخخخخخخخ
مريم : ايييي دعمت وانصب الكوفي كله على الولد اللي دعمته
شهقت مريم وعلى طول سكرت الخط من امها : ااااا اسفه والله ماكنت اقصد
ذياب : قطع الله ها الويه كيف راح تشوفين وانتي لافه ورا وتمشين!!!!؟؟
انصدمت مريم منه ومن طريقة كلامه بس انقهرت منه وقالت : قطع الله ويهك وليش انت ماتشوف يدامك وتواخر عن طريجي!؟؟؟
ذياب وهو معصب : يعني انتي الغلطانه وتسبين بعد اقول وخري وخري عن ويهي قطع الله ها الويه دفها وراح عنها
تنرفزت مريم من اسلوبه : ويعه غبي شفيه ها
طلعت مريم من المستشفى وهي معصبه وتحس تبا تطلع حرتها على اي حد ركبت السياره وهي معصبه ولاحظ بدر انها معصبه
بدر وهو عاقد حواجبه : شفيج
مريم ماتبا تقول له السالفه بتفاصيل جان تختصر : بالغلط دعمت واحد وطاح الكوفي مالي بدور اتخيل دعمني وبعد يصارخ علي !
بدر : وانا مو قلت لج خليني انزل وياج جان ادبته
مريم وهي مبوزه: ابا كوفي
بدر : بل كل ها عشان كوفي ولا يهمج احين اوديج احلا كوفي
مريم ابتسمت : فديتك والله
وصلو الكوفي وخذه بدر كوفي له وحق مريم
مريم كانت سرحانه وهي تشوف الكوفي وفجأه ضحكت على الموقف اللي صار لها ويا ذياب هههههههه وقالت في نفسها والله انه يستاهل لما صبيت عليه الكوفي
بدر وهو يطالع مريم اللي فجأه ضحكت : غبيه انتي ولا غبيه تضحكين جي فجأه ؟
مريم بعدها سرحانه وماسمعت بدر
شافها بدر بعدها سرحانه مد ايده صوبها : يوووههه ارمس منوه انا
مريم استوعبت انه بدر يرمسها : هاه شوتبا
بدر : احلفي انتي بس؟
مريم : ههههههه شفيك
بدر : يالس ارمسج في شو سرحانه
مريم : ماشي بس بدور احس راسي يعورني ابا ارد البيت ارقد
بدر : يالله تمام
في المستشفى عند ذياب اللي كان يمشي رايح غرفته وهو سرحان وكات يقول في نفسه وهو يتذكر اللي صار غبيه هاي البنت حوله ماتشوف اول مره اشوف حد يمشي ويشوف وراه ودخل الغرفة وشاف ابوه
ذياب : هلا هلا يبه ها كله تعب ولا نسيت انه عندك ولد اسمه ذياب في المستشفى
ابو ذياب : هههه فديتك والله بس شسوي من زمان مب راقد زين
ذياب : عوافي اتغشمر وياك اهم شي صحتك عيل خذت الدوه؟
ابو ذياب : هيه خذته وتعال انت وين كنت ليش جي ثيابك وصخه؟
ذياب : بالغلط صبيت الكوفي علي
ابو ذياب : روح روح بدل لا تمرض زياده
ذياب : هههههه حاضر
وصلت مريم البيت وخذت شور وغيرت ملابسها وراحت تحت تيلس في الصاله دخلت الصاله وكان الكل موجود باست راس امها وابوها ويلست
مريم : السلام عليكم
الكل : وعليكم السلام
ابو بدر : هاه بنيتي شوقالت الدكتوره
مريم : والله ماشي بس عندي نقص دم عشان جي كنت وايد ادوخ
ابو بدر : عيل تبغون اقولكم اخبار حلو؟
ميره على طول راحت تيلس عند ابوها : هي هي بابا قول
ابو بدر : يدكم قال انه ها الاسبوع راح نروح العزبه ونبات هناك
مريم وميره نطو من الوناسه : هيييييييييييييي
ام بدر ضحكت على بناتها الخبال
بدر : الحمدالله والشكر مدري وين رايحن الا هو عزبه
مريم وهي تطلع لسانها على بدور وتلف صوب ابوها : حماسات يبه من زمان ماتيمعنا في العزبه
ميره : ولا شو بنرقد اسبوع وناسهه
راحت مريم على طول فوق عسب ترمس البنات دخلت غرفتها وسكرت الباب وفتحت برنامج زووم واتصلت فيهم والبنات كلهم ردو على مريم
ميثا : بنات والله وناسه
روضه وريم يالسين حذال بعض
روضه : اقولكم انا وريم بنروح دبي مول بنتشرا ملابس وجي شرايكم اتون ويانا
مريم : والله تبغين الصج انا مالي خلق
ميثا : ولا انا متفيجه احسني ابا ارقد
ريم : اف عيايز مب بنات
مريم و ميثا : هههههههههههه
روضه : المهم احين بنسكر لانه بنروح المول وجي يلا باي اشوفكم باجر
مريم : لا ويت تعالو بقولكم شوصارلي اليوم
ريم وميثا بحماس : شو شو
روضه : ريمو قومي يلا نروح وباجر بتقول لنا السالفه
مريم : ههههههه خلاص كنسل مابقول احين باجر احسن جي نكون حذال بعض
كلهم : هيه صح احسن
وكل واحد سكر الخط وروضه وريم راحو المول اما ميثا رقدت ومريم يلست تفكر في ذياب وكيف تقولهم السالفه
عند روضه وريم اللي وصلو دبي مول
روضه ترمس بابو : اصبر هني لين مانخلص بنيك
راحت هي وريم يتسوقون
روضه : اول شي بندخل المحل اللي احبه
ريم : وليش ان شاء الله اول شي المحل اللي انتي تحبينه
روضه : لاني اكبر عنج ولازم اول شي انا
ريم : بدقيقه اكبر مني بدقيقه!!!
روضه : ههه حتى لو
دفتها ريم على الخفيف : فكينا نزين يلا بسرعه
ابتسمت روضه ابتسامت الانتصار وراحو اشترو وخلصو وتعشو وهم طالعين من المول روضه تذكرت شي
روضه : اااا ريم نسيت اروح المكتبه
ريم : مايحتاي خلاص تأخرنا بعدين المره اليايه
روضه وهي تمشي بسرعه : لا لا ويت اتريي دقايق بيي بسرعههه
ريم : ستغفرالله
راحت روضه المكتبه ويلست ادور الجزء الثاني من روايتها
: هيه انتي ياحلوه
روضه عرفت انه يرمسها بس طنشته
الولد : وي الحلوه شكلها صمخه
روضه في نفسها يلعن اشكالك
الولد : هيه انتي وكان بيمسك ايدها بس سمع صوت من وراه
و روضه على طول رجعت لورا
سيف : يوسف منوه هاي تعرفها
يوسف وهو يطالع روضه وروضه خايفه : لا بس شفتها حلوه
سيف : ياخي اعقل انت ماتعبت من كثر ماتلحق خلق الله
يوسف : ههههه بس هاي حلوه وايد مابا اضيعها ولف صوب روضه عطيني رقمج ياخي
روضه بدون ماتحس لفت على سيف وطالعته بنظرات يعني وخره عني
سيف حس بنظرات روضه له : هي هي انت فارج يلا خل نروح ودر عنك هاي الحركات ودفاه ع الخفيف ومشى يوسف وهو يتحلطم
سيف بهمس مايسمعه غير روضه : روحي عند اهلج
وراح عنها
روضه قعدت تشوف سيف لين ما اختفى عن عيونها وكملت على طول تدور الرواية <<< هههههه اهم شي تاخذ رواياتها مب هامها شي حصلت روايتها وراحت تدفع وعلى طول راحت عند ريم وريم شافت روضه يايه من بعيد
روضه وهي تركض وقفت عند ريم تتنفس : اه اه تعبت من كثر ما اركض
ريم : شفيه ويهج احمر لاتقولين عشان الركض
روضه : هي من المكتبه يالسه اركض لين ماوصلت لج
ريم : وليش تركضين صارلج شي
روضه : اقولج بعدين امشي تاخرنا على بابوراحو وطلعو من المول
عند مريم الساعه ١٢ ونص ماياها رقاد ويالسه تتقلب يا في بالها تتصل في زينب (عمتها)
مريم : اكيد مب راقده خلني اتصل عليها واستهبل عليها ههههه
زينب كانت تشتغل على اللاب وشافت تلفونها يرن شافت الاسم وردت
مريم : هلاهلا زينبو
زينب : هههه هلاوغلاا مريوم غريبه ليش مب راقده ولا لايكون ماراح اتين العزبه؟
مريم : وانا اقدر افوت رحله حلوه بالنسبه لي لا بس ماياني فيني رقاد قلت اتصل فيج
زينب : اهاا غبيه حاولي ترقدين عشان تنشين بسرعه وتكونين نشيطه و
مريم قاطعتها : وووووو احين بتقعد تنصح خلاص عرفنا انج دكتوره
زينب : هههه شدخل ياوصخه ها وانا اباج تكونين احسن
مريم : اقولج زينب
زينب : هلا مريوم؟
مريم : انتي صح بتتزوجين؟
زينب مصدومه : اذا يا النصيب مابنقول لا
مريم : اوكيه واذا يبتي بنت شرايج تس...
قاطعتها زينب اللي فهمتها : لا
مريم : خيرررر ليش يعني اسمي مب حلو؟
زينب : ماقلت مب حلو لاتقوليني شي ماقلته
مريم : اصلا اصلا اسمي اشرف من انه يكون لبنتج
زينب : بدينا التكبر
مريم : ههههههههههه خلاص كنسل ابغي بس انا الوحيده اللي يكون اسمي مريم
زينب : هههههه اقول طسي بس وروحي رقدي باجر وراج نشه من الصبح
مريم : اوكيه اوكيه يلا تصبحين على خير
زينب : وانتي من اهله
سكرت مريم التلفون وبس حطت راسها على المخده راحت في سابع نومه
عند ميثا اللي بعد ماياها رقاد
ميثا في نفسها : اففف اشوف حلقه وحده ولا ارقد خلاص برقد اخاف ما انش الصبح بس ابا ماي
نزلت ميثا تحت للمطبخ عسب اتيب لها ماي
ميثا : يمه اخاف انزل تحت الفليل يخرع كل الليتات مسكره هه لازم اصير قويه احم احم صبت لها ماي وهي رايحه فوق سمعت صوت برع يمه شوها الصوت شافت باب المطبخ شوي شوي يتفتح راحت ركضت بسرعه ورا الباب ودخل حد وووطططخخخخخخخ
الله يغربلج شسويتي فيني ياغبيه
ميثا : اويه هزاع ها انت
هزاع : لا يني تستهبلين انتي شوسويتي غرقتيني ماي
ميثا : هههههه فديتك اسفه بس تعال شوتسوي انت برع في ها الليل؟
هزاع : يعني شو اسوي نزلت اشرب حليب جان ميود يتصل فيني واطلع برع ارمسه حرام؟
ميثا : ههههههههه لا لا مب حرام بس عاد مب جي تدخل جنك حرامي يالس تتسلل
هزاع : ترا حتنا سمعت صوت في المطبخ عسب جي دخلت شوي شوي كنت ابا اخرعج
ميثا : حيوان تستاهل عيل لما صبيت عليك الماي
هزاع : اها انا استاهل
ميثا راحت تركض على طول لانه هزاع كان يلحقها
ميثا : بسرعه بسرعه اف احس حجرتي بعيده
هزاع كان يركض وميت ضحك على ميثو الخوافه وميثا على اخر لحظه دخلت داخل غرفتها وسكرت الباب وقفلته
هزاع : ااخخخ وين رايحه يعني مرادج طالعه من الغرفه وبكفخج
ميثا : ههههههه ذاك الوقت بتكون امايه ناشه بعدين جرب حظك تمسك شعره مني
هزاع : لو انتي حرمه طلعي برع رمسيني مب من ورا الباب
ميثا : انا ريال
هزاع : اشك والله
وراح غرفته وميثا راحت رقدت وهي تعبانه من الركض
في اليوم الثاني الصبح في المستشفى قعد ذياب من النوم وشاف ابوه نايم ابتسم على الخفيف
حس ابو ذياب انه ولده قاعد وفتح عينه
ذياب : ليش يا يبه مارحت البيت ترقد ليش تتعب روحك حمدالله انا بخير
ابو ذياب : لا ياوليدي مرتاح جي الحمدالله
ذياب : يبه والله العظيم مب زين على صحتك لازم تروح البيت وترتاح وتاخذ ادويتك
ابو ذياب : تدري شو ودي
ذياب استغرب : شو
ابو ذياب : ودي اشوف البنت اللي تبرعت لك واشكرها شكر لانها سوت شي ماراح انساه طول حياتي مول والله اني ياوليدي ادعي لها ليل ونهار وادعي اني اشوفها بس ابا اشوفها عشان اشكرها
ذياب اول مره يشوف ابوه جي : ان شاء الله يايبه تشوفها وتشكرها
ابو ذياب : وانت بعد راح تشكرها وياي انقذت حياتك
ذياب : وانا شدخلني فيها
ابو ذياب : شهاي الرمسه استح على ويهك وراح تشكرها غصباً عليك
ذياب : هاه اذا شفناها
عند مريم اللي توها تنش من الارقاد فتحت عيونها بالغصب لانها تحس مب شبعانه رقاد
مريم : ااففف جان زين سمعت كلام زينبو اف خلني اقوم فتحت تلفونها وشافت الساعه كانت ٩
قامت مريم بسرعه وراحت تاخذ شور وطلعت لبست بنطلون جينز مع قميص نص الايد وعليها صورت فراشه ركضت بسرعه عند غرفة بدر ومره ثانيه فتحت الباب بدون مادقه
نقزت مريم فوق كرفاية بدر : بببدورررر بدورررر دخيلك نش نسيت انه اليوم عنديه موعد ويا الدكتوره
بدر وهو معصب : فكينا مريم ترا مالي خلق لج بعد ساعات بنروح العزبه وابا ارقد
مريم : اف اف اف اف منك
نزلت تحت ركض وهي لابسه عبايتها وشافت امها يالسه باست راسها ويلست حذالها على طول
ام بدر : بسم الله شفيج وليش لابسه عباتج
مريم : يمه بصيح نسيت انه اليوم عنديه موعد وراح اتاخر قعدت بدور بس عصب علي
ام بدر : اخخ في كلشي متأخره خلاص بسرعه دامج مخلصه روحي ويا السايق
مريم باست راس امها وطلعت على طول
مريم وهي تصارخ : وين انته بابو وين انته
محمد : مدام مريم انا مافي بابو انا محمد
مريم : اوه صح سايق عمي يعقوب اسمه بابو نسيت نسيت المهم يلا ودني المستشفى بسرعه ركبت مريم ووصلت المستشفى
مريم : بابو ا...
قاطعها محمد : مدام محمد مافي بابو
مريم ضربت راسها : اف اف نسيت زين محمد اترياني هني مو تروح دقايق وبيي
محمد : ان شاء الله
سكرت الباب وراحت عند الدكتوره
عند ذياب اللي مل من المستشفى
ذياب : يبه ترا والله مليت من قعدت المستشفى متى اطلع
ابو ذياب : خلاص احين بروح اييب لك شي تاكله وبسالهم مره وحده
ذياب : هب يوعان روح اكلك يبه ايشي ولا تنسى تاخذ الدوا
ابو ذياب : تمام
طلع ابو ذياب وراح المطعم وقعد ياكل وخلص من الاكل وخذه دواه وكان بيروح غرفة ذياب بس...
نرجع عند مريم اللي خلصت من الدكتوره
مريم : وااهه اخيرا دمي صار اوكيه ومايحتاج ارد المستشفى هههه لفت انتباها ريال كبير مريم في نفسها احسني شايفه ها الريال مكان بس وين نسيت فجأه تذكرت وصارت تركض
مريم : عععممممييييي ععممييي
لف ابو ذياب للصوت الي يناديه وعلى طول تذكرها وابتسم
مريم وقفت صوبه : هههههههههههه عمي شحالك
ابو ذياب بحماس : بخير يبنيتي وانتي شحالج؟
مريم : بخير والله دامك بخير يالغالي
ابو ذياب : يبنيتي شسمج ووين رحتي دورتج كل مكان في المستشفى ومالقيتج بعدها قالي الدكتور انج رحتي
مريم : هههههههه اوه نسيت اقولك شسمي اسمي مريم وصح ذاك الوقت كنت مستعيله لانه امايه كانت تنتظرني في السياره
ابو ذياب : مشكوره يامريم والله اني ماراح انسى اللي سويتيه وادعي لج بالخير
مريم : هههههه عمي ماسويت شي الا هو دم هيه صح عمي وشخبار وليدك
ابو ذياب كان يشوف مريم ويبتسم لانه يحس انه شايفها مكان غير عن المستشفى بس يحاول يتذكر وين شافها بس مايقدر يتذكر
مريم شافت ابو ذياب سرحان ويطالعها : عمي وين رحت؟
ابو ذياب استوعب : هاه بنيتي شو قلتي ماسمعتج
مريم : ههه اقول شخبار وليدك
ابو ذياب : والله انه بخير بفضلج
مريم ابتسمت : ماسويت شي وها كان واجبي اني اساعدك
ابو ذياب : تعالي تفضلي وليدي يبا يشكرج
مريم : اسفه عمي بس والله اني مستعيله ولازم اروح احين
ابو ذياب : بس...
قاطعه صوت رن تلفون مريم شافت المتصل (جنتي💙)
مريم : والله اسفه عمي المره اليايه ان شاء الله اشوفك في مكان احلا عن المستشفى
ابو ذياب : امين يابنيتي واشكرج مره ثانية نيابه عن وليدي
مريم : هههه عمي لاتشكرني وايد ترا استحي جي وبعد تراني ماسويت الى الواجب
مريم شافت تلفونها يدق مره ثانيه يلا آسفه عمي لازم اروح احين مع السلامة
ابو ذياب : مع السلامه بنيتي
ردت مريم على التلفون وهي رايحه السياره
مريم : هلا هلا بالغالية
ام بدر : مريموه وينج اتصل عليج من زمان
مريم : ههههه كنت مشغوله اتكلم مع الدكتوره
ام بدر : عيل مطوله ولا ترا بعد شوي ابوج واخوج بيون من المسيد وبنروح العزبه
مريم : لالا يمه مب مطوله احين طالعه من المستشفى
ام بدر : مزهبه اغراضج ولا
مريم : هيه يمه مزهبه كلشي بس احين برد البيت ببدل ونروح
ام بدر : تمام
ركبت مريم السياره ووصلت البيت وعلى طول ركضت فوق حتى نست ان اهلها في الصاله يعني نست تروح تسلم عليهم
ابو بدر : هاي شفيها تركض جنها باتمان مع عبايها ولا حتى يت تسلم علينا
بدر وميره ماتو ضحك لما ابوهم لما قال باتمان
ميره : يبه امايه قالت حق مريوم في التلفون اذا مايتي بسرعه بنروح عنج عسب جي مريوم تركض راحت تتجهز هههههههههههههههههههه
ابو بدر صد صوب حرمته : تستهبلين انتي كيف نروح عنها ونخليها
ام بدر ماقدرت تتحمل وماتت ضحك : ههههههههه وانا شدراني انه بنتك غبيه وراح تصدق
بدر : ههههههههه يمه مريوم من يومها غبيه
في غرفة مريم اللي صلت الظهر وراحت على طول تبدل ولبست مخور وراحت صوب التسريحه وستشورت شعرها ورتبته وحطت ميكب خفيف ورشت شوي من العطر وراحت غيرت عبايتها وطلعت من غرفتها وراحت غرفة امها وابوها ويلست تدور المبخر
مريم : ياربي امايه وين حاطه المبخر تعبت وانا ادور عليه راحت تركض ونزلت تحت مريم وهي نازله على الدري : يمههه ييمهههه شافت الصاله وانصدمت لما شافت الكل قاعد
مريم : بسم الله انتو من زمان يالسين هني
ابو بدر : هيه وشفناج كيف دخلتي وانتي تركضين شرات باتمان
مريم طالعت ابوها بصدمه وفجأة انفجرت ضحك : هههههههه يبه ماتعرف تنكت شوه باتمان مره وحده
ابو بدر : شدراني كانت عبايتج وانتي تركضين اطير يا في بالي باتمان
الكل : هههههههههههههههههههههههههههههههههه
ابو بدر : ليش انا قايل نكته؟
مريم باست راس امها وراحت باست راس ابوها ويلست حذاله : لالا يالغالي بس مره ثانيه لو بتنكت نكت عدل
ابو بدر ضرب مريم على راسها
مريم : هههههههه يبه اسفه
ام بدر : مريوم كنتي تبغين شي
مريم : هيه صح يمه وين المبخر يالسه ادور عليه في غرفتكم هب موجود
بدر : هيه مريوم البخور في غرفتي
مريم : جان قلت من زمان
بدر : شدراني توج سالتي
ابو بدر : ميره قولي حق البشاكير (الخدم) ياخذون الاغراض السياره وانتو (يقول حق بدر وام بدر ومريم وميره) انا اترياكم في السياره
الكل : تمام
راحت مريم بسرعه غرفة اخوها وشافت المبخر راحت تبخرت شوي ونزلت تحت بسرعه ركبت السياره كان ابو بدر يسوق وبدر قاعد يدام ومريم وميره وام بدر ورا و ورا اخر شي ميري
مريم لبست سماعاتها البلوتوث وكانت فاتحه شعرها يعني مب مبين السماعات ويالسه تسمع اغاني
ابو بدر : عيل مريوم
مريم ماتسمعه
ابو بدر مايشوف السماعات اللي في اذن مريم لانها مغطتها في شعرها
ابو بدر : مريوممم وصمه
ميره يالسه حذال مريم ضربتها في جتفها بالقو
شالت مريم السماعات من اذنها : ويعه ليش تضربين
ابو بدر : ويعه عليج ماتسمعين اناديج من زمان
مريم : هاه يبه لا اسفه كنت لابسه سماعات
بدر يبغي يخلي مريم تعصب : يبه كيف راح تسمعك والسماعات اربع وعشرين ساعه في اذنها وطالع مريم من طرف عينه
مريم انقهرت من بدر : انت شو بس تبا تدور هواش
ام بدر : خلاص خلاص اسكتو ومريوم اسمعي ابوج شو كان يبغي منج
مريم : هيه صح يبه شوتبا
ابو بدر : شو قالو لج في المستشفى
مريم اللي نطت من الحماس ونست انها في السياره وصقع راسها
ميره : بسم الله
مريم : اااايييييي يمهههه يمهههه يعور راسييي
بدر : ههههههه ليش جي تحمستي ابوي ماقال شي حماس
مريم : انت كلزق
بدر كان بيرمس بس قاطعه ابوه : مريوم عيب جي تقولين حق اخوج
مريم : ههههه يبه نحن نستهبل مب صج
بدر : صح يبه عادي ههه
ابو بدر : حتى لو لازم تحترمين اخوج العود
مريم : ههههه ان شاء الله وهيه صح عن سالفة المستشفى لما رحت عند الدكتوره قالت لي انه دمي زين وخلاص مايحتاي اروح لها مره ثانيه
ام وابو بدر فرحو : الحمدالله الحمدالله حبيبتي
بدر وميره قالو ويا بعض : وناسهه
مريم : هههههه خلاص بدور مره ثانية ماراح اقولك خذني المستشفى
بدر : اصلا انتي لو تطلبين عيوني عطيتج
مريم : هيه واضح وضوح الشمس لدرجه اني اليوم كنت اباك تاخذني وقلت لي مالي خلق لج
الكل : ههههههههههههه
وصلو العزبه والكل نزل
في المستشفى دخل ابو ذياب الغرفة
ذياب : هاه يبه كليت وخذيت دواك؟
ابو ذياب : هيه الحمدالله توقع منو شفت اليوم؟
ذياب : منو؟
ابو ذياب : شفت البنت اللي تبرعت لك
ذياب فجأه تربع وماحس في عمره : ويت ليكون قلت لها اتيي الغرفة؟
ابو ذياب : هيه كنت اباك تشكرها
ذياب : يبه ليش؟ قلت لك اني ماراح اشكرها
ابو ذياب : شو هاي الرمسه البنت انقذت حياتك وانت تقول جي
ذياب : ههههه يبه خلاص والله درينا انها انقذت حياتي واصلا الله كاتب انك تشوفها وتساعدني وخلاص سكرنا السالفه ليش اتيي الغرفة بعد وتباني اشكرها
ابو ذياب : خلاص خلاص اسكت ياقليل الادب انا شكرتها بدالك
ذياب رجع يحط راسه على المخده : هيه اشوا
ابو ذياب : تصدق احس اني شايفها من زمان
ذياب : هيه شفتها يوم تبرعت لي
ابو ذياب : لا ياحمار شفتها من زمان قبل التبرع
ذياب : ههههه يمكن مشبه في وحده ما اتوقع انك شفت نفس البنت من زمان
ابو ذياب : لا لا انا متاكد شايف ملامحها من زمان واسمها احسني اذكره
ذياب : تعرف اسمها
ابو ذياب : هيه
ذياب : شو اسمها ؟
ابو ذياب : مريم
ذياب : اهااا عيل انا برد ارقد
ابو ذياب : ماتبغي تعرف الدكتور شو قال
ذياب اللي رجع يتربع من الحماس : هههه هيه صح شو قالو؟
ابو ذياب : قال انك تروم تطلع باجر
ذياب : ياحماااسسسس اخيرا راح افتك من المستشفى
ابو ذياب : ههههه يلا احين ارقد ارتاح وباجر الصبح راح نطلع
ذياب : ان شاء الله
حط ذياب راسه على المخده وعلى طول رقد
نروح للعزبه وبتحديد عند البنات اللي طالعين يشوفون رعد << حصان
مريم وروضه في نفس الوقت : بنات بقولكم سالفه
مريم شافت روضه وهي مصدومه وحتى روضه وريم وميثا شافو بعض بصدمه
ميثا صدت عند مريم وروضه : بسم الله شفيكم
ريم : هههههه دام قالوها مع بعض يعني كل وحده عندها سالفه اقوه عن الثانيه
ميثا : هههههه جنه
روضه ومريم : هه مايضحك
مريم شافت روضه : قولي انتي اول
روضه : احم احم اكيد انا اللي بقول اول
مريم كانت بتتكلم بس قاطعتها ريم : مريوم مانبا ضرابه تعالو نقعد مكان ونسمع سوالفكم وبعدين نروح عند رعد
الكل : تمام
وراحو صوب الطاولات وشافو زينب قاعده كلهم ركضو وحضنو زينب من ورا
زينب نقزت : ياسخيفات خرعتوني
الكل : هههههههه اشتقنا لج والله
زينب : والله مسيو لكم اكثر تعالو تعالو نقعد نسولف مليت من سوالف الكبار
روضه : يلا انا بقولكم السالفه اول
زينب : طلع عندكم سوالف واو يلا غردو
روضه : جب خليني ارمس
زينب : اوكيه اوكيه يلا ارمسي
روضه قالت لهم سالفة المكتبه
ريم : اف اف ها كله صار لما كنت يالسه اترياج جان اتصلتي فيني عسب افزع لج
روضه : اقول سكتي طيح الله حظج لين توصلين فات الاوان
الكل ماعدا ريم : هههههههههههه
ريم : مايضحك
مريم : فديتج ريمو وصدت صوب روضه عيل روضه عرفتي شو اسم الولد اللي ساعدج
روضه : لا ماعرف اسم الولد بس اعرف اسم اربيعه الغبي كان يقول له يوسف بس اسم الولد اللي ساعدني ماعرفه
زينب : ههههه عرفتي اسم اللي كان يلاحقج وماعرفتي اسم اللي ساعدج
ميثا : لا لا ويت اهم شي لما روضه طالعته بنظرات يعني وخر اربيعك عني مسرع وثقتي فيه
روضه : جب جب يعني كان يساعدني عسب جي طالعته هاي النظرات و وثقة فيه
زينب : بس ليش ها الولد الطيب اللي ساعدج يمشي ويا هاي الاشكال
مريم : هه شدراج انه طيب يمكن بس يدام روضه سوا عمره طيب بس عسب تثق فيه
ريم : بعد صح كلام مريوم
روضه : لا ما اتوقع والله تبغون الصج حسيته غير عن اربيعه حسيته اطيب ومب من هاي السوالف المغازله وجي
ميثا : اااااا وغمزت حق روضه جنه جنه بدينا نحب
قامت مريم تغني : صدفة ومن بين كل الناس علقني من يوم شفته وعيني جات في عينه حسيت شي في عيونه حيل يجذبني
الكل ماعدا روضه : هههههههههههههه
استحت روضه : اف جب جب واصلا يعني بالحظ جفته ما اتوقع اني اجوفه مره ثانيه
مريم : شدراج يمكن تجوفينه مره ثاني
روضه : مب مهم صح مريوم قولي سالفتج شو كنتي بتقولين
مريم : هيه صح سمعو وقالت لهم سالفة ابو ذياب بس بنات تبغون الصج احس ها الريال شايفته من قبل احسه يشبه حد
زينب شافت مريم وسرحت شوي : انتي قلتي انه عنده ولد واحد؟
مريم : هيه اذكر قالي انقذتي حياة وليدي الوحيد
زينب : ليش شو سويتي يعني كيف انقذتي حياته؟
مريم : يوههه مالي خلق اشرح نغير السالفه
زينب طردت الافكار من راسها : المهم بنات قومو يلا نروح داخل ابا اكل هه
قامو البنات ودخلو داخل وصار الفليل
في غرفة البنات
زينب : بنات شرايكم نشوف فلم ؟
البنات : هيه هيه مريوم اختاري فلم رعب
مريم : ههههه ليش انا وبعد مابغي فلم رعب اخاف!!
ريم : لا لا احلا فلم رعب
ميثا : اوهو بنات مب غصب فلم رعب
زينب : اللي يبغي فلم رعب يرفع ايده
رفعو زينب و ريم و روضه
روضه : ههاي خلاص فلم رعب
مريم : اوهو خلاص اوكيه اوكيه
ميثا : بنات بروح اييب الحلويات والعصاير اللي في الثلاجه
البنات : تبين نساعدج
ميثا وهي تسكر الباب : لاااااا
ونزلت تحت صوب المطبخ ميثا في نفسها اف اليوم ماشفت رعد خلني اروح اشوفه طلعت برع راحت صوب بيت الحصان وشافت النور مفتوح دخلت وشافت بدر كانت تبغي تروح بس سمعت صوته
بدر : ميثا؟
ميثا سوت عمرها غبيه صدت صوب بدر : هاه تكلمني ؟
بدر : ليش في ميثا ثانيه هني غيرج
ميثا : ها لا مافي هه بس شو تسوي انت هني؟
بدر : ها السوال موجه لج
ميثا فجاه تغير مزاجها ماتدري ليش : مايخصك
بدر : نعم
طنشته ميثا وراحت للمطبخ قالت في نفسها خير ليش طنشته اف انا غبيه اف خلني اودي الحلويات والعصاير ابرك لي
عند بدر كان مستغرب ليش راحت وطنشته بس ماهتم وراح داخل
نرجع عند البنات اللي نقزو من الخوف لانه ميثا دخلت عليهم فجأه
مريم : قطع الله ويهج دخلي شوي شوي
روضه : من صجها مريم خرعتينا
ميثا كانت تتحلطم في نفسها وتوها تستوعب انها دخلت عليهم فجأه : اوه انا وصلت
ريم : احلفي انتي بس؟
زينب : ههههههههه هيه وصلتي بسلامه
ميثا : هههههههه توي انتبه اني وصلت
مريم : ميثا فكينا عطينا الحلويات والجبسات ترا حصلنا فلم
ميثا : ميثا اي جبسات؟
زينب : عيل ليش نازله تحت انتي؟
ميثا : انتو قلتو يبي حلويات و عصاير
روضه : يعني في حد يشوف فلم بدون جبسات
ميثا : اويه مالقيت جبسات بس شفت حلويات وعصاير
ريم : انتي اكيد مادورتي
مريم قامت : خلاص انا بنزل ايب
الكل : لا تتأخرين
مريم وهي تحط شيلتها وتسكر الباب : اوكييهه نزلت مريم تحت وراحت المطبخ وقعدت تدور اف اف وين يحطون الجبسات بببببببوووووووو نقزت مريم ولفت وراها
مايد : هههههه طع ويهج وانتي تخافين
مريم : قطع الله ويهك تستهبل مايضحك
مايد : ههههههههه اخخخ بدمع
مريم : الوضع مايضحك اذا عقب مت يعني
مايد : بيكون احسن راح اكتب على قبرج ماتت وهي تتحلطم
مريم : هه وايد يضحك اقول جب
مايد : صج شفيج تتحلطمين جنج عيوز
مريم : اف ماعرف وين يحطون الجبسات
مايد : كله موجود في الميلس
مريم : عنبو ليش ماخذين كل الجبسات هيه ترا حتى نحن نبغي
مايد اشر على عيونه : من عيوني احين بيب لج
مريم : تشوف صبعي ؟ راح احطه في عيونك روح يلا ييب فارج عن ويهي
مايد : ههههه اشتغل عندج تعالي بروحج خذي لج
مريم : هه عارفه انك جي بتقول اف اف مشت وهي تتحلطم للميلس كان كل الاولاد متيمعين في الميلس يشوفون فلم دخل مايد وخذ جيس الجبسات وطلع فر حق مريم الجيس وراحت ركض الغرفه ودخلت داخل الغرفة فجأة والكل نقز
زينب : ويعه شو بلاكم جي تدخلون
روضه : هاه وهي تعيب على ميثا وهي اخس منها
ريم : يمههه ترا خلاص قلبي وايد يطيح في بطني دخلو مثل الاوادم
ميثا : ههههههه مريم كفج مدت مريم ايدها وكانت بتسوي كفو مع ميثا بس ميثا سحبتها وقعدت تضربها
مريم : ميثا يا نصابه
الكل : هههههههههههه
قعدو البنات يشوفون الفلم وخلصو وكل وحده راحت ترقد
اليوم الثاني الصبح الساعه 8 نشت مريم من الارقاد
مريم فتحت تلفونها وشافت الساعه 8 : هه متعوده انش بسرعه حتى لو رقدت متأخر راحت خذت لها شور وبدلت لبست مخور وحطت لها شوي من العطر وحطت شيلتها ع راسها وطلعت برع في الحوي وكان كل الكبار قاعدين
مريم : السلامو عليكمو
اليد : سلمي عدل يلا شو هاي الرمسه
مريم : ههههه ان شاء الله راحت باست راس يدتها ويدها ويلست صوب عمتها حصه(حرمة عمها شهاب ام ميثا)
ام راشد : مريوم وين البنات
مريم : كلهم راقدين
ام راشد : جان وعيتيهم وياج
مريم : هه عمو تبيني انا اوعيهم عسب احصل طراقات
ام راشد وقفت : هههه خلاص انا بروح اوعيهم
مريم : اذا طلعتي سالمه بسويلج كككلللووششش
الكل شاف مريم لانه قالت صوت عالي كللللووششش
ام راشد ضربة مريم على الخفيف : ويعه سكتي
ام بدر : هههه ياخبله شفيج
ام راشد : معرف جوفي بنتج الغبيه
اليده : عيل مريوم قومي قعدي البنات
مريم : هيه هيه احين عمو حصه بتروح توعيهم
اليده صدت صوب ام بدر : صج بنتج ماتستحي تخلي عموتها تقوم
ام بدر : قومي كفخيها امي < تقول حق اليده امي كاحترام
اليده لفت عند ابو بدر : شوف حرمتك ماتستحي تقولي قومي كفخيها بدال ماتقوم اهي
ابو بدر يسوي عمره معصب على ام بدر : يا ام بدر ما تستحين
اليده : هيه لا تهاوشها ما ارضى عليها
ابو بدر استغرب : امي توج تقولين ا...
قاطعته اليده : وانت تباها اشاره
الكل : ههههههههه
نروح لعند ام راشد الي راحت توعي البنات فتحت باب الغرفه وشافت العفيسه اللي مخدتها على صوب ولي لحافها على صوب
ام راشد : وااييي الله يعيني راحت عند بنتها اول شي ميثااا ميثااا قومي بسج رقاد
ميثا مسكره عيونها وتهمس : يمه بس شوي خليني ارقد
ام راشد صدت صوب روضه : روضه روضه قومي
روضه لفت الجهه الثاني ورفست ام راشد بالغلط
ام راشد : ويعه رويض خس الله بليسج كسرتي ريلي مب رقاد راحت صوب زينب زينبو بسج نشي ها وانتي اكبرهم
زينب بصوت خفيف : بعدني صغيره
وتقلبت على الجهه الثانيه
ام راشد : هيه وايد صغيره لفت صوب ريم ريم ريم حبيبتي قومي بسكم رقاد
ريم الي فتحت عيونها وقعدت تربعت : يلا عمو احين ناشه
ام راشد : وي فديتج جان زين اختج شراتج حشى كسرت ريلي
ريم مافهمت بس ابتسمت وراحت الحمام نزلت ام راشد وطلعت برع وشافت الكل موجود حتى الشباب نشو من الارقاد كلهم
ام راشد : لا جان ماقمتو
راشد : يمه حسستيني يعني احين الظهر توها الساعه 9 ونص
اليده : راشدو انتو الصغار لازم تنشون قبلنا
راشد : كل هاه الطول والعرض وبعد صغير
بدر ضرب راشد على جتفه على الخفيف : ياصغير انت
راشد : انت شوف يدوتي كيف تتطالعك
بدر لف على صوب يدته وكانت يالسه تشوفه
اليده : ترا حتى انت صغير وياه
بدر : ول يدو كيف سمعتي
اليده لفت صوب ابو بدر : سمعت ولدك قال ول حقي
راشد : يدو ول يعني ماشاء الله
اليده لفت صوب ابو راشد : شوف ولدك انت بعد قاعد يجذب
مايد : ههههههه الله يعينكم من يدو دام حطت عليكم من الصبح
اليده لفت صوب ابو مايد : شفت ولدك انت بعد شو يقول قومو كفخو عيالكم
ابو مايد : ولا يهمج امي راح اكفخه
ابو راشد : رشودو استح
راشد و مايد : حاضر
عند ريم في الغرفه خذت لها شور وبدلت وراحت عند البنات توعيهم قعدت الكل وحطت شيلتها وطلعت كانت نازله من الدري وهي سرحانه
هزاع نسى تلفونه فوق في الغرفه راح عسب اييبا ووووطططططخخخخخخخخ طاحت ريم على الارض
ريم : اااييييي عمى ماتشوف انت
هزاع : ويعه انتي اللي سرحانه
ريم : وانت اللي واقف في نص الدري شتسوي
هزاع شاف ريم من فوق لين تحت : اقول وخري عن ويهي
وكمل يصعد
ريم : يع هو الغلطان ويرمسني بسلوب خايس نزلت الصاله وسلمت على الكل
ميثا اللي طلعت من الغرفه وشافت اخوها طالع من غرفة الشباب
ميثا : صبح صبح الله بالخير ياخوي
هزاع : هلا ميثا ونجبي لانه مالي خلق لحد
ميثا : انت لازم كل صبح تكون منفس ابا بس مره قمت الصبح وسمعت منك رمسه حلو
هزاع : ها في الاحلام منوه متفيج من الصبح يرمس كلام حلو
ميثا : هه تتحداني انك لما تتزوج راح ترمس حرمتك وتقولها كلام حلو من الصبح وقول ميثا ماقالت
هزاع : خسي متفيج لها انا اقولها كلام حلو من الصبح تاكل زقها
ميثا : احين جي تقول بس بعدين لما تتزوج راح تقول رمسه ثانيه
هزاع : جب جب
طلعو برع في الحوي رفعت ريم عيونها وتلاقت عيونها في عيون هزاع وعلى طول ريم لفت ويها وقالت في نفسها يع وهزاع نزل راسه وقال في نفسه قطيعه
في المستشفى عند ذياب اللي توه ناش من الارقاد فتح عيونه وشاف ابوه نايم راح للحمام وتوضا وصل الصبح وجهز ملابسه وراح صوب ابوه
ذياب : يبه يبه يلا قوم تريق وخذ دواك
ماشي رد
ذياب : يبه يلا قوم يبه
ماشي رد
ذياب انقلب لون ويهه : يبه شفيك يبه يبه قوم
ماشي رد
ذياب طلع برع الغرفه ويصارخ : دكتوررر دكتورررر دكتورررر
يا الدكتور ركض
دكتور محمد : ذياب شفيك
ذياب : ابوي مدري شفيه قاعد اقعده مايقعد بسرعه تعال شوفو
الدكتور دخل بسرعه وناد النيرسات وخذوه على طول غرفة ثانيه وذياب كان بيدخل بس ما مادخلو وقف برع وخايف بعد نص ساعه طلع الدكتور وهو يشوف ذياب
ذياب عرف انه نظرات الدكتور ماتبشر بالخير وقال بسرعه : هاه دكتور شفيه الوالد
د.محمد : اسمع يا ذياب
ذياب قاعد على اعصابه : قول بسرعه!!!!
د.محمد : ابوك في حاله خطره نحن راح نحاول نسوي اللي نقدر عليه وان شاء الله يقوم بسلامه
ذياب مب مستوعب اللي قاله الدكتور وهو مصدوم : اقدر اشوفه؟
د.محمد : تقدر بس لاتضغط عليه
دخل ذياب عند ابوه وشافه منسدح
ابو ذياب : اسفه ياوليدي ا...
ذياب قاطع ابوه وراح عنده وباس ايده : لاتخاف يا ابويه انا وياك وماراح يصير لك شي
ابو ذياب : لا ذياب اسمع
ذياب : لا تقول شي يبه انت تعبان خلاص ارتاح احين
ابو ذياب : اسمعني بعطيك رقم واحد وابيك تتصل فيه وتقوله ايي المستشفى
ذياب استغرب لانه ابوه ماعنده احد : رقم منوه ها
ابو ذياب : انت بس قوله انا ذياب سلطان ال... وخلاص خل ايي المستشفى
ذياب بعده مستغرب : ان شاء الله بس انت ارتاح وطلع برع الغرفه وشاف الرقم ها رقم منوه دق على الرقم
ذياب : السلام عليكم
الشخص : وعليكم السلام منوه معاي؟
ذياب في نفسه اقوله اسمي احين ولا
الشخص : الو
ذياب استوعب : وياك ذياب سلطان ال...
الشخص انصدم : ذياب سلطان!!!!
ذياب استغرب مره ثانيه وقال في نفسه هاه شفيه منصدم : المهم ابوي ا...
الشخص قاطعه : شفيه ابوك!!!
ذياب بعد في نفسه هاه شفيه شوي وينطا عرج : ابوي مافيه شي حمدالله بس اباك اتي مستشفى ال... ابوي يبا يشوفك
الشخص بخوف : احين ياي وطلع بسرعه بعد نص ساعه وصل الشخص
الشخص : السلام عليكم
ذياب يطالعه من فوق لين تحت : وعليكم السلام تفضل
دخل ذياب مع الشخص داخل الغرفه
ابو ذياب : ذياب اطلع شوي برع الغرفه
ذياب : بس ا...
ابو ذياب قاطعه : اطلع
ذياب : اوكيه طلع برع وقال في نفسه يووههه منوه ها كنت ابا اعرف
ابو ذياب حضن الشخص : شحالك ياخوي شحالك يا عبدالله
ابو بدر حاضن اخوه قوي وهو يصيح على حال اخو : بخير بخير يا اخوي وخر شوي عنه وانت شحالك يا سلطان
ابو ذياب : والله شايف حالتي ايامي معدوده
ابو بدر : لا ياسلطان لا تقول جي راح ترجع شرات ماكنت واحسن وراح تعيش ويانا في بيت ابوي
ابو ذياب : يا اخوي الله يخليك ولدي اذا رحت عن الدنيا ابا ولدي الوحيد اللي احبه واللي اشوفه اكثر عن ولدي اشوفه اخوي وربيعي و ولدي تنتبه عليه وتحطه في عيونك هو اللي راح يعيش بدالي عندكم ابيكم تشوفونه مثل ماتشوفوني وتهتمون فيه مثل وليدكم
ابو بدر : لا لا شوهاي الرمسه راح ترجع ويانا و...
ابو ذياب قاطعه : لا ياخويه انا عارف حالتي طلبتك روح ناد ذياب
ابو بدر : بس يا سلطان انـ...
ابو ذياب قاطعه : بسرعه روح
ابو بدر طلع برع وزقر ذياب ودخلو داخل ابو بدر وقف صوب الكرفايه ع اليسار وذياب واقف ع اليمين
ذياب مسك ايد ابوه : هاه يبه كيف حالتك احين
ابو ذياب : ذياب احين الوقت اللي لازم تعرف فيه كل شي
ذياب جاف ابوه مستغرب وماقال شي
ابو ذياب : اول شي ها الي واقف هو عمك عبدالله
ذياب انصدم وهو يطالع ابو بدر وابو بدر كان يطالع ذياب ويقول في نفسه ماشاء الله الشبه قوي
ذياب صد عند ابوه : يبه انت شقاعد تقول
ابو بدر : ذياب انا عمك وابوك هو اخوي
ذياب بعده مصدوم : يعني قايل شي يديد ؟ ليش انا توي ادري انه عندي عم من بعد كل ها العمر توه ادري انه عندي عم
ابو ذياب : لانه ايامي معدوده ولازم تعرف كلشي قبل لا كح كح كح قبل كح كح كح
ذياب : يبه خلاص لا ترمس انت تعبان ريح شوي خلاص مابا اسمع شي
ابو بدر : صح يا سلطان خلاص ارتاح احين وبعدين نقول حق ذياب السالفه
ابو ذياب حس خلاص الدنيا تسكر حوله وقال : لا ياوليدي ابيك تعرف كيف كنت احبك وكيف كنت اشوفك كلشي في حياتي من يوم ماييت على الدنيا وانت كلشي بعيني ولدي واخوي وابوي وكلشي لما كنت اتعب كنت القاك عندي ولما كنت تتعب كنت تلقاني عندك
ذياب دمعت عينه وماقدر يكتمها اما ابو بدر صار يبجي فجأة
ابو ذياب كمل كلامه : ياوليدي ربيتك من يوم كنت صغير وللحين اشوفك ذياب الصغر للحين اشوفك ذياب اللي كنت العب وياه كروك والعب وياه كره وكنا نلعب كل الالعاب مع بعض ذياب حتى لو رحت عن الدنيا راح اكون موجود وياك هني رفع ايده ابو ذياب شوي شوي ومسك راسه هني ياوليدي ماتدري اشكثر حبيتك ياوليدي
ذياب مسك ايد ابوه وباسها : يايبه والله اني احبك اكثر والله العظيم اني كنت اشوفك اكثر عن الابوه كنت اشوفك سندي وظهري وكان فيك حنان الاب والام والاخ وكلشي يايبه ابيك وياي
ابو ذياب : ياوليدي من بعدي راح يكون سندك يدك وابو بدر وكل اخواني ماراح يقصرون وياك في شي انا عارفهم وصد ابو ذياب صوب اخوه عبدالله وقال : ياعبدالله وليدي حطه في عيوني اهتم في مثل ماتهتم في عيالك
ابو بدر وهو يصيح : ياسلطان وليدك في عيوني راح احطه وماراح اقصر وياه في شي
ابو ذياب حس انه الدنيا خلاص تسكرت في عيونه ابتسم ومسك ايد ذياب ونطج اخر كلمة : انتبه لنفسك ياوليدي ذيا... تتييييييتتتتتت وقف مال القلب ذياب رفع راسه صوب مال القلب وقعد يصارخ : لااااااااااا يييييييييببببببببببببببببههههههههههههههه لا لا لا لااااااااا
ركض ابو بدر عند الدكتور دخل الدكتور وطلع ابو بدر و ذياب برع الغرفه وخذو ابو ذياب غرفة العمليات بعد نص ساعه طلع الدكتور وهو منزل راسه
ذياب مسك الدكتور على طول من ملابسه وابو بدر راح وسحب ذياب
ذياب : دكتور شفيه ابوي ارمسسسسسس
الدكتور وهو منزل راسه : الوالد عطاكم عمره
ذياب طاح على الارض وهو مصدوم لا لا لا يايبه وصار يصارخ : لاااااااا لااااااا ابوي مامات ابوي ماماتتتتتتتتتت
ابو بدر على طول راح ركض عند ذياب ونزل لمستواه وحضنه وهو يبجي : ياذياب الكل راح ايي يومه وابوك احين عند اللي احسن مني ومنك
ذياب بعده يبجي وهو ساكت
في العزبه الكل كان يالس في الصاله
الجده : ام بدر
ام بدر صدت صوب اليده : هلا امي
اليده : عيل شفيه ريلج طلع ركض
ام بدر : والله مو عارفه يا يمه اتصل فيه مايرد
اليده : ان شاء الله خير لا تحاتين
ام بدر : ان شاء الله
مريم قعدت تهمس حق ميثا : ميثا قلبي يقول انه في سالفه
ميثا : لاتحاتين ان شاء الله مافي شي
اليده شافت زوجها متوتر وساكت استغربت اكثر
نرجع لوره قبل مايروح ابو بدر المستشفى
ابو بدر : يلا احين ياي وسكر الخط وراح بسرعه سيارته
اليد : عبدالله يبه شفيك جي تركض خير
ابو بدر : يبه اخويه اخويه سلطان في المستشفى
اليد فز قلبه وحس انه ريوله ماتشيله : سلطان ؟ كيف كيف
ابو بدر : ما ادري ما ادري يايبه اتصل فيني ولده وقالي انه في المستشفى
اليد : اصبر اصبر احين بيي وياك
ابو بدر : لا ابويه لاتحاتي مافيه الى الخير يلا احين انا بروح اشوف وارد لك الخبر وطلع وهو يركض
اليد في نفسه وهو قلبه ناغزه ويحس انه في شي نزلت دمعه من عينه اخخخخخ ياوليدي ياريتني ماخليتك تسافر يالتني خليتك هني في ديرتك
نرجع للواقع
زينب شافت مريم خايفه ومتضايقه : بنات امشو نروح برع نسولف
ريم : هي هي بنات تعالو عندي سالفه لكم
الكل : يلا
طلعو برع ويلسو
ميثا : يلا تفضلي اخت ريم قولي
ريم : تخيلو بنات انا كنت نازله تحت وكنت سرحانه وماشفت اللي يدامي جان ادعمه انا طحت وهو مسك عمره جان اقول له عمى ماتشوف جان يقولي ويعه انتي اللي سرحانه بنات ترا هو اللي كان واقف في نص الدري لا وبعد يقولي وهي تعيب على صوته وخري عن ويهي رجعت لي صوتها الطبيعي يا بنات يقهر من صباح الله خير نفسيه انزين صح انا الغلطانه بس مب جي عاد
مريم : ككككللوووششششش اول مره تعترف ريم انها الغلطانه
ريم : جب جب يعني اذا انا غلطانه اقول
ميثا من اول ماقالت ريم انه نفسيه على طول شكت في حد : نزين منوه ها الي دعمتيه
ريم : اخوج الحمار
ميثا اللي عرفت انه شكها في محله وانفجرت ضحك : ههههههههههههههههههههه بموت وانا اقول ليش اخوي جي موده خايس واصلا اخوي من زمان موده كله خايس تخيلو بنات كل صبح لما ينش من الارقاد لحد يرمسه والله ينقع في ويهكم
روضه : ههههه عاد ريمو كملت يومه عطته دعمه
الكل ماعدا ريم : هههههههههههههههههههه
ريم : هه ترا مايضحك والله بنات حسيت اني مسويه مصيبه ماشفتو كيف يهاوشني ولا لما قالي وخري عن ويهي حسيت جيجي فشله بصيححح
ميثا هلكت ضحك على اخوها الغبي وبنت عمها الاغبا : هههههههههه اخخخخخ بطنيييييي الله يهديج اخوي غبي ومزاجه خايس الصبح اتين انتي وتخربينه اكثر
الكل : ههههههههههه
مريم يـ... وسكتت لما شافت الباب يتفتح وتدخل سيارت ابوها مريم فرحت بابا ووصلللل
زينب : ياهل ياهل شو بابا ياهل انتي؟
روضه : ههههههه اونه بابا وصل
الكل حط الشيله لما شافو ابو بدر ينزل ونزل وياه ولد البنات على طول عطوها شرده ودخلو داخل ويلسو في الصاله
ريم قاعد تهمس للبنات : هيه منوه ها اللي كان مع عمي
روضه صدت صوب مريم : هيه مريمو منوه ها اللي عند ابوج
مريم : وانا شدراني
زينب ضربت البنات : بس خلاص اسكتن احين بيدخل اخوي ونجوف
ميثا : ااييييي زينب انا شدخلني تضربيني وياهم تراني مارمست
زينب : اعرف راح ترمسين وياهم لو ماضربتج
البنات : هههههههه
اليده : ويعه انتن ليش تتهامسون
البنات بصوت واحد : ماشي
برع عند ابو بدر وذياب قبل مايدخلون
ذياب جاف ابو بدر : وين تبغاني ادخل وانا ما اعرف ها المكان حتى ؟
ابو بدر يوم جاف ذياب كانت عيونه حمرا من البجي : ها المكان راح تسكن فيه وخلاص راح تستقر فيه
ذياب : عكيفك ردني ردني بيتنا
ابو بدر انصدم من اسلوبه بس عذره لانه اللي توفى مب اي واحد ، واحد غالي على قلوب الكل : ذياب انت اول ادخل اعرفك على اهلك عقب يصير خير
ذياب جاف ابو بدر بس ماقال شي ودخل ابو بدر ومعاه ذياب الكل شافهم ومريم شافت ذياب وهي مصدومه ذياب كان رافع راسه وشافهم كلهم ويت عينه في عين مريم شافها وهو مصدوم بس نزلو عيونهم على طول عن بعض عشان محد يشوفهم
مريم في نفسها يمه ها شويسوي مني لا وبعد مع ابوي
ذياب بنفسه هاي مو اللي دعمتني في الكوفي طع الصدفه
اليد شاف ذياب وبسرعه عرف انه ولد سلطان لانه ذياب حلو مثل ابوه هه
اليده : عبدالله منوه ها بس انصدمت لما شافت زوجها على طول قام وحضنه الكل مصدوم ليش اليد فجأة قام وحضنه واولهم ذياب ما اتوقع جي ردت فعله
اليد يبجي : ااااااااهههههههههههههه ياوليدي فيك من ريحة ابوك الغالي ذياب اول ما سمع طاري ابوه كانت بتنزل دموعه بس مسكها
ابو مايد : عبدالله ها ولد سلطان
اليده استغربت بس انصدمت لما سمعت ولد سلطان وشافت ذياب عدل وشافته صج يشبه سلطان قامت على طول ودزت اليد وحضنه
اليده : اخخخخخ ياحبيبي وينك وينك اخر مره شفتك كنت فيها صغير
ذياب مستغرب قال في نفسه انا متى شفتج و وخرت عنه اليده
اليده : ذياب وين ابوك وين الغالي
ذياب نزل راسه وهو ماسك دموعه : ابوي عطاكم عمره
اليده من الصدمه ريولها ماشالتها وطاحت على الارض وهي تبجي : لاااااااااالاااااااااااااالااااااااااا سلطان وولييددديييي لاااااااا سلطان ماماتتتتتتتت ذياب ماقدر يتحمل يشوف اليده تصيح طلع ركض برع
زينب على طول قامت وراحت عند امها وام راشد وام مايد وام بدر قامو حق عمتهم
ام بدر : زينب نحن ويا امي روحي عند ولد اخوج
زينب على طول طلعت برا تدور على ذياب واكيد ماراح ننسى مريم اللي طلعت من زمان ورا ذياب كان الكل يصيح بس الشباب يهدونهم ومو عارفين السالفه ومنوه الولد اللي كان مع ابو بدر وليش الكل يصيح وحتى البنات نفس الحاله ...
.
.
***
**
*