قلبــــــــــــــــــان لا يلتقيان - الفصل 1 - مكتملة | روايتك

قلبان لا يلتقيان💞... قصة درامية بي امتياز متكاملة الاحداث مع الجزء الاول الذي شاهدنا فيه الحب و العشق اللامتناهي مع عصام وهاجر ..... قد ينصدم الكثير في بداية الجزء الثاني و و يتسائل لما اخترت ان اتمام القصة بهذا الشكل الي اني اقولها من البداية ان الاحداث القادمة ستجعل الجميع مصدوماً و متحمساً لأقصى حد 🔥🔥🔥.... *هي من كانت زلــزاله .. اصبحت هادئة جدا تخالها فراشة خفيفة وشفافة ، اجنحتها بلون الزهر النديّ ،فقط تطير...لا تكترث بالنار ،تطير على غير هدى علها تصطدم فجاة بذاك الخيال الذي يتراءى لها في كل سكناتها !!!... *هو من فتح سور قلبه لها لتستوطنه ملكة على الكل ..حمل قرار على كتفيه و غابة بعد ان استوطنه الغياب والف عتاب لها وتفاصيل اخرى موجعة، لم يستطع كسر حاجز المستحيل وكبح ذاك الشوق العليل وحده الغياب انتصر عليه بعد ان ايقن.....انه وهي..لن يعودا !!!..... *هم من كانا في خط واحد اصبحوا خطان متوازيان لا يلتقيان ابدا ربما جمعهما الحظ ...ربما.....لكن لم يبقي لهما الوجد الا حرقة وعذاب وشوق الى المستحيل الذي لا يجيء!!!.... احيانا...نكون اكثر وضوحا بصمتنا وفي احيانا اخرى يكون الصمت موتا حقيقيا لارواحنا 👑#عـــصام💔#هاجـــر👑 بقلم:FATIMA Z-F انها زوجتي 2... قلبان لا يلتقيان.... تقديم الجزء الثاني ..{ ولنا في العشق قلبان .. بينهما برزخ لا يلتقيان}... بالغتُ في الحب ورسمتُ في مخيلتي صوراً زاهية وتألمتُ أكثرَ مما يجب ... حتى أصبتُ بالخيبة... وما زال بداخلي دَمعة وجرح وصرخة مكبوتة .. والألم ما زال غافياً وبكلمة يصحى من نومه .... كم هو مُوجع أن تَتصنّع التجَاهل، وَقلبَك يَتألم بصَمت.... وكم هو مؤلمٌ أن تخيب امل شخص احبك و جعلك رحلة عمره ووجهته.... و سحقا لصمتي الذي جعلني خائنة في ارض اخلاصه و عشقه لزلزاله...كان بيدي ان اغير كل شيء لكني لم افعل ..تجاهلت كل شيئ وتركتك تتألم لتكرهني و تبتعد عني للأبد..جعلت من نفسي سعيدة ترقص فرحاً في جنازت موت حبي و اخلاصي لك...لم اكن اهتم لشيئ غير ان تكرهني و تبتعد عني...و ها انا اليوم وحيدة بدونك صامتة كأن عاصفة هبت و اخدت مني كل شيء حي ....لم اعد تلك الزلزال الدي طالمة احببتها ...بل أصبحت كالهواء شفافة..تمر بجانبك بدون ان تشعر بها..... ~ فاطمة الزهراء فلقة.. هززت مشاعري ألف مرة وعجزت أن أجهض قلبي من المكان الأعمق في صدري أصرخ فأنا وأنت ك الحرب والسلام لا يلتقيان نبحث عن بقايا هدنه فلا أنا أشعلت نيران حربك ولا أنت قدمت لقلبي السلام أحببتك جدااا حتى استحلفني قلبي أن أبتعد عنك وأرحل ففي أعماقي لك نبضة صامتة ترفض أن تصرخ أكثر رميتها في قاع يأس الإشتياق وكنتُ البادي بالهجر والبادئ أظلم وأنا من تحن دوما فهل البادي بالشوق أضعف أم كان أكرم وهل جزاء الحنين إلا الحنان أم كان جزاؤه بُعد وشوق وحرمان فتات حبك لا يروي كسرة حبي والله ماطاف الحنين بخاطري إلا وطيفك بخاطري يتسرب ... فكم من مشاعر عنك أخفيها وكم من صرخات قلبي لست أبديها فما أدركت أن للصمت صوت حتى سمعت صرخات صمتي في قلبي أبكيها .. بين قلبي وقلبك حرفان ساكنان وروح هائمة لا يلتقيان انت بارع في الصمت وانا اتقنت بث اشواقي فيا ترى من منا يكسر هذا السكون انا.... ام ...انت بكل شموخ و تعالي تقف امام شرفتها الواسعة التي تطل على البحر الدي يرقص بالموسيقى التي تصنعها امواجه الصاخبة ...يرقص على انغام وحدته الصارمة رغم ما يوجد دخله الا انه وحيد مع السماء التي تقابله ..و كأن البحر يمثلها فرغم كل ما لديها الا انها وحيدة في هذا البيت الكبير الذي اعتاد على ضحكات طفل و دفئ رجل.... تنفست بعمق و نفضت عن رأسها كل ذكريات الماضي التي هاجمتها في ان واحد..حركت فنجان قهوتها المعطرة لتضعها بين شفتيها الجميلتين ...تجعد جبينها من مرارتها التي ما زالت لم تعتد عليها بعد...اعادة نضراتها مرة تانية الى البحر ..صامتة كصمته و نسماته تداعب بشرتها البيضاء النقية و تحمل توبها الشفاف عن بشرتها الحساسة لتترائى مفاتنها امام امواجه المثارة ...حركت اصابعها النحيلة على طول شعرها الأسود لتتوقف في المنتصف عندما رنة هاتفها لتضع فنجان قهوتها بعدم رضى من الشخص الدي ازعج هدوئها.... هزات تليفونها و عنيها في اسم لي واضح في الشاشة..تنفسات بعمق و بصوت هادئ جوبات.... هاجر:الو... حليمة: الو بنتي واش مزال مغادي تجي خلاص راه كلشي موحشك و كيتسنى فيك... هاجر: غاي نكمل غير شي مسائل ديال الخدمة و نشد طريق مع جوايه العشا نكون تما... حليمة تنهدات بجهد: كون غير ابنتي جيتي تجلسي حداية تونسيني باركة عليك من ديك طنجة لي عام و نتي فيهت واش معيتيش... هاجر: و شكون منعك تجي عندي و نتي عارفة خدمتي كلها هنا منقدرش نخليها... حليمة: ابنتي كلشي موفر ليك هنا و مخاصك تا خير و نتي كتعدبي فراسك..تنهدات بصوت مسموع و بحصرة نطقات...ابنتي راكي مطلقة و الهضرة كثرات... هاجر : من تتحت سنانها: تا واحد ما صوقو فيا ندير لي بغيت ماشي صوقهم ..نطلق و لا نبقى مزوجة ..ما صوق تا حمار و اخر مرة اماما تهضري ليا على هاد زبل و لا ما بقيتش جاية أصلا.... حليمة: صافي مالك نضتي تاني انا غير قلت و صافي لسان ما فيه عضم ابنتي و زيد نتي بعيدة و ساكنة بوحدك شبغيتي ناس يقولو ..و شحال من واحد جا يخطبخك و نتي لي مبغيتيش تا وليت نحشم نقول ليهم لا... هاجر: كون بغيت نتزوج كون كاع ما طلقت من عصام أصلا..الالة عاجبني راسي هكذا و انا حرة فراسي و ما صوق تا حد فيا.... حليمة: وخا الالة متزوجيش اوا و حاتم لي كبدتي مشوية عليه و... قاطعاتها هاجر بصرامة... هاجر: حاتم بلاصتو حدا باه و وقت ما بغاني كيسيفطو باه لعندي و داكشي لي فراسكم هو لي عمرو يكون و حاتم من عصام ما غادي نحيدو.... حليمة : واش حنا كرهنا فيه راه تا هو من دمنا و باغيناه يعيش وسط منا و يكبر قدامنا و نفرحو بيه ..كون تشوفي جيران و العائلة لي يضلو يقولو رمات الولد لباه و هي عاطياها غير لدوران تا ولدها ما كتسول فيه... هاجر بهدوء نطقات: هداك ولدي و انا حرة فيه و لي بغى يهضر يدير بوق مني انا ..ماااصوقيش و اخر مرة تجبدي لي ديك تريكة و لا عمر هاد الوجه تشوفيه تاني ا حليمة.... قطعات الاتصال و كلها كترعد بي الاعصاب و وجها ولا حمر و تنفسها اصبح غير منتضم..حطات يديها على قلبها لي كيضرب بجهد عن غير العادة.. دخلات عندها الخدامة كتجري: ختي هاجر مالكي .. حركات يديها لجهة ديال طبلة و ملامحها متألمين ..بزز باش قدات تنطق... هاجر:مدي ليا دوا ديالي لي فووق طبلة... بسرعة مدات ليها دوا ..خدات حبة سرطاتها و مزال وجها حمر و يديها على قلبها كأن الأكسجين تقطع عليها...تكات على جنب الفوطوي كتحاول تهدأ راسها من لكلام لي سمعاتو من مها و تخلي دوا يعطي مفعولو لجسدها...واقفة عليها الخدامة كتشوف فيها بحيرة و قالت.... _ختي هاجر شحال من مرة كنبغي نسولك على هاد دوا لي كتشربي ديما واش مريضة اختي بشي حاجة... هاجر مزال سادة عنيها و نطقات بصوت ضعيف: ما فيا والو غير فقر دم كيدير ليا هاد الحالة من كنتعصب....حلات عنيها بصعوبة...طلعي جمعي ليا حوايج لي اندي معايا لرباط و عيطي لعساس يهبطهم يحطهم في طونوبيل.... فاطمة"لخدامة" : علاش غادي تمشي ؟؟...ياك هما لي كانو كيجيو يدوزو معاك العيد.... هاجر تنهدات بتعب : خويا عاد ولدات مراتو و غادي يدير سبوع هاد ليلة خاصني نحضر فيه وغادي ندوز تا لعيد لكبير تم و تا نتي جمعي حوايجك و سيري لداركم تا نعيط عليك عاد اجي و هزي داك جوا ديه معاك شري شي حاجة فرحي بيها داركم.... فاطمة بفرحة و عنيها كيبريو هزات يديها لسما كتدعي من نيتها : الله يرحم ليك الوالدين اختي هاجر و يخلي ليك سيدي حاتم يا رب و ديما تبقاي لفوق لفوق عمرك تخيبي..... جمعات الوقفة بي ابتسامة مزينة وجها المرهق..طلعات لبيتها لي كبير و مصاوب خصيصاً ليها...طلعات معاها فاطمة كتجمع ليها الحوايج لي اديهم معاها و هاجر كتلبس حوايجها لي متكونين من طاقم عملي لاصق على داتها...دورات زيف على شعرها كيف العادة ..هزات صاكها كتقلب فيه و كتهضر مع فاطمة لي كتشوف فيها..... هاجر: كملي هادشي انا انمشي لوطيل نهضر مع الخدامة و نرجع بزربة .. هبطات لتحت بي ابهى حلة و صباط طالو كيتقرقب في ارجاء الفيلا لي خالية من اي حس...خرجات لجردة لي كبيرة و مزينة بشجر و الورد في الالوان....دارت نضرات ديالها و ركبات في سيارتها البيضاء رانج روفر....شدات طريق مباشرة لوطيل ديالها لي موجود وسط مدينة طنجة.....شادة طريق في صمت و ملامحها صارمين و في نفس الوقت تابتين ....وصلات امام لوطيل لي غير شافو طونوبيلتها كل واحد شد بلاصتو.... نزلات من سيارتها عطات ساروت لبواب لي مكلف بسيارات و بسرعة دخلات ما كتشوف فتا حد نيشن شدات طريق لبيرو ديالها لي موجود في اعلى طابق في الوطيل..... رمات صاك ديالها و عنيها في الأوراق لي بين يديها كتقراهم في صمت بعد مدة طويلة هزات راسها للحضور لي قادمها... هاجر بصوت بارد نطقات: شهادشي.... تكلم رجل في ربعين من عمره و عنيه في الارض: هادي شكاية قدماتها وحدة من لكليان على لموضف ديالنا و كتقول انه تحرش بيها و بغات تعويض من لوطيل.... هزات حاجب و هبطات لأخر..جلسات فوق لكرسي ديالها و حطات رجل فوق رجل كيف شي ملكة رمات دوك الوراق فوق البيرو وعنيها على الخدام لي توجهات شكاية ضدو كان شاب في العشرين من عمرو مهبط راسو لأرض.... هاجر: نتا لي قصتي البنت.... هز دري راسو حابس البكية بزز: و الله الالة ما قصتها هي لي جات لاحت راسها عليا سكرانة وما درت ليها والو من غير دفعتها و مشيت بحالاتي و اليوم من رجعت لقيتها دايرة بيا شكاية و دايرة حالة في الوطيل..صرط ريقو بصعوبة حاس بالحگرة...اقسم بالله هاد الخدمة لي عندي و كنوكل بيها والديا و ما نقدر ندير تا حاجة لي نخرج بيها على خدمتي..... هاجر هزات لوراق رماتهم في زبل و هزات ميلف اخر كتقرا فيه بصمت امام اعينهم..رجعات هزات عنيها فيهم :شنو كتسناو مزال كل واحد يمشي يشوف خدمتو... تكلم الرجل لكبير:ولكن مدام شنو انديرو مع ل..... حدر راسو كثر من خبطات يديها مع البيرو: عيطو على البوليس يديوها عليا من هنا ما عنديش وقت لي نضيعو معاها وشوفو الكاميرات هما ايبينو شكون الكداب فيهم ومااشي اي حاجة و قعات تسنانوي انا لي نجي نحلها ...شافت في دري بصرامة....اقسم بالله و نلقاك قصتيها بصح تا نغبرك و عمر رجلك يتحطو فهاد الوطيل فهمتي....خرجات عنيها ..كل وااحد يشوووف خدمتوووو..... كلشي خرج كيتسرسب و عنيهم في الارض..هبطو لتحت عاد تنفسو بجهد...مشا راجل لي هو مدير ديال الوطيل تاصل بي البوليس و دري حداه وجهو عاد بدا كيبان فيه نور من مجراتش عليه مولات الوطيل و حيت عارف راسو ما داير والو رتاح نسبياً.... وصل وقت ضهر وكلشي خدام خصوصاً وقت صيف كيكون عندهم مزير بسياح لي كيجيو لطنجة.....وسط اشغال الجميع خرجات هي من سانسور بكل هبة و شموخ شادة طريقها لسيارة ... شادة تيقارها و ما كتضحك مع حد..عندها حدود مع الخدامة ديالها و ما كتخلي تا حد يتجاوز حدودو معاها هادشي لي خلا كلشي يخاف منها و يضرب ليها الف حساب...كانو جوج بنات كيضحكو مع بعضهم غير شافوها و هما يقطعو لحس تا دازت من حداهم عاد تنفسو براحة و حطو يديهم على قلبهم لي كيضرب بجهد... شافهتم بنت ثالتة وهي تبدا ضحك عليهم: وخا تكون كتقطع ريوس ما ديرو هاد الحالة فين ما شفتوها وجهكم كيمشي منو لون... بنت1: اختي نتي عاد جديدة في الخدمة حنا لي كنعرفوها عامين هادي بعدا لعام لي فات كانت مزيانة و غير كضحك و نشاط طالقة لعب اما هاد لعام تقولي هزيتي بنت و حطي بنت خرا ولات واعرة بزااف و غلط بسيط ما تعقلش عليك فيه و ضحكة ما عاودنا شفناها على وجها تقول الله يستر ماشي هيا.... بنت ثالثة: وعلاش اش وقع ليها مسكينة كتبان لي مزال صغيرة باش تشد وطيل غير وحدها واش بنت شي واحد لباس عليها... بنت 2 هزات راسها كضحك: اودي نتي لي مسكينة اما هاديك واحد لفعة مكاينش بحالها ..... بنت ثالثة: حشومة عليكم و الله سيدة باينة بنت ناس و ما كتجبد حد و عاطية تيقراها انا بعدا عزيزة عليا.... بنت 1: راكي غير مكتعرفيهاش مزيان ..هاديك الالة من كان عمرها 18 تزوجات براجل لباااس عليه خانز فلوس و زيد كبر منها و مكانت كتكساب والو ونهار بغى بتزوج بيها عطاها في صداق 100 مليون و زيد دهب مكاين غير من 15 لمليون لفوق و مشات دارت بيهم قهوى في لعرجات ديال سلا بي سميتها و سمية باها دارت بيهم لباااس وهو عمرو تحاسب معاها و نهار ولدات ليه ولد بغى يموت بالفرحة وكتب ليها الفيلة لي ساكنة فيها دابة مرتاحة مع راسها كتجي دوز فيهم الفاكنس ديالها كيف بغات كان معيشها كيف الملكة و من بغات دير مشروع بالفلوس لي جمعات من القهوى زاد هو عليهم و خدا ليها هاد لوطيل عامين هادي تقريبا مكانت كتعرف دير والو كانت كيف البقرة تا الفرونسي ما كتعرف تهضر بيها مقادة و جي يا فم و قول ...كنا نضلو نضحكو عليها وغير هو لي كان هاز ليها هبالها و كيعاونها في الوطيل تا ولا كيف كتشوفيه دابا و خسر عليه زبابل ديال الفلوس و نهار خدات حاجتها منو و كلشي كاتبو بسميتها ساستو و طلبات منو طلاق و تا من لولد سمحات فيه وخلاتو لباه و راجل بالفقصة خوا لبلاد وما بقاش عاود رجع من غير لولد لي كان عمرو ربع سنين و بقى عاقل عليها ومن كيتفكرها كيرسلو باه ليها يجلس معها واحد سيمنة وتعاود ترجعو ليه ...دابا راه عام باش طلقات منو و كيف طلقات تقول هزيتيها وحطيت وحدة خرا في بلاصتها.... البنت ثالثة مخرجة فيهم عنيها: اناري ..لا لا ميمكنش و نتوما منين جبتو هاد الخبار كاملة... البنت 2: كانو واحد بنات عمها جابتهم يخدمو شي يمات معانا وهما يقولو لينا كلشي عليها كيف كانت و كيف تزوجات و كيف ولات و غير نتاشر الخبار وهي تجري عليهم...و اصلا كلشي فراسو هادشي لي قلنا ليك غير ما كيبغيوش يهضرو حيت كيخافو تجري عليهم و تا نتي شدي فمك ولا تلقاي راسك برا..... البنت ثالثة: يا ختي ماباينش فيها هادشي... انا كاع كتبقى فيا من كنشوفها غير وحدها و هازة هاد وطيل كامل قول سيدة هارفة على راجل ودارت كلشي على ضهرو.... البنت1: اودي كون تشوفي هاد راجل لي عندها يا ختي بكوص و واعر بزين ما فيه ما يتعاب.. كلشي زين فيه وممعاهش ضحك من كان كيجي عندها هنا لعام لي فات من كانو مزوجين كان غير قدامها لي كنشوفوه كيضحك وكان باين كيبغيها بزااف و صابر ليها و دابا نيت في خدمتها ولات كتشبه ليه بزااف تا ضحك ما بقات كضحكو ..ومن نهار طلقاتو ما عودات مشات لمدينتها حيت كلشي كيقولها عليها خيابة من غير عائلتها لي كتزورها مرة مرا و خا غضبانين عليها من خلات الولد لراجلها و مها قالت ليها وخا مابغيتيهش عطيني انا نربيه و متخليهش لراجلك حيت ميعرفش يربيه ..وهي مبغاتش و بيديها سقطات لحضانة ديالها في المحكمة ..... البنت ثالثة: يا ختي حشومة عليها وخا تكون حجر ما تسمح في ولدها هاد سمحة يا ختي هبطات من عيني بزااف باين دخلات عليه غير على طمع .... البنت2: اودي راجل صدق ولد ناس و كيرسل ليها ولدها تشوفو اما كون كان ولد لحرام كون عمرها شافتو ولا شمات تا ريحتو..ساعة مكتستاهلش و دابة تندم عليه مزيان..... وقف عليهم لمدير مخرج عينو فيهم: شكاديرو نتوما هنا واش مغاديش تشوفو خدمتكم ... هبطو راسهم و تفرقو كل وحدة داتها في خدمتها... سايقة سيارتها في صمت..الصمت لي ولات عايشة فيه و مرحبا بيه لداتها.....هاجر لي اصبحت في سن 23 ....اليوم هي انسانة مختلفة عن ديك طفلة لي كانت في سن 18 سنة.... كبرات بزاف على عمرها في ضرف عام فقط بعد ما طلقات من عصام بي كامل ارادتها تبدلات ..ولات امراة اخرى باردة و صارمة حتى على نفسها..... في طريقها الطويل الصامت مع السيارة التي كانت اول هدية من عصام بعد ولادتها مباشرة قبل خمس سنوات ...عصام لي بعد طلاق غادر هاد الارض و معاودش رجع ليها و صلة الوصل بيناتهم فقط هو ابنهم حاتم لي رغم انها سمحات فيه لعصام الا انه وقت ما حتاجها كيرسلو عصام ليها ليفرغ اشتياقو من امه.... وقفات امام مستشفى لي متعودة كل اسبوع كتجي ليها...خرجات من سيارتها و دخلات نيشن بدون ما يوقفها تا حد..وصلات امام ممرضة لي تبسمات في وجها.... الممرضة:انسة هاجر العسكري دكتور زياد كيتسنى فيك يمكن ليك دخلي عندو.... في مدينة جوهانسبرغ التي تعتبر واحدة من اجمل مدن العالم و كذالك اغنى المدن في افريقيا الجنوبية لتمركزها المالي و الثقافي و تعتبر المدخل الرئيسي لجنوب افريقيا...... على طول الشارع الرئيسي كتواجد احد افخم الشركات الكبرى في المنطقة و التي تخص ماركة " ميوز روان" للمجوهرات التي تعتبر الاولى عالميا من ناحية الجودة و تصميم... الشركة لي مستحيل تجبد و ما يعرفوش مولاها شكون...مولاها لي فضرف عام خلى الشركة تحلق لعالمية بعد ما كانت مشهورة افريقيا و عربيا فقط.....اصبحت اليوم كل تصميمات الشركة كيرتدوها اشهر الفنانين على مستوى العالم و يعرضوها امام بعضهم البعض متباهين بها...... الاسم الدي اصبح اليوم مساهما رئيسياً في اقتصاد جنوب افريقيا بعد ماعتزل المغرب العربي بصفة نهائية و رجع كل اعمالو لشركة الاساسية.....الاسم الدي اصبح يعرفه الجميع و كل واحد ولا يضرب ليه الف حساب و حساب و قبل ما يتكلمو عليه كيراجعو كلامهم في دماغهم جوج مرات عاد يهضرو عليه....... اسم عصام بن جلول اغنى رجل اعمال على مستوى القارة و اشرسهم....عصام الذي عرف بصرامته و صمته و هالته الباردة التي تجعل من الجميع يخاف ان يتقرب اليه ولو خطوة واحدة.......شخص بنا حاجز بارد على نفسو و اصبحت الوحدة هي رفيق دربه..... في شروق الشمس الدافئة على البحر...انعكست اشعتها على داك الجسد الفولادي الاسمر الدي تتحرك عضلاته دهابا و ايابا و جزأه العلوي عاري امام تلك الشمس التي تداعب بشرته السمراء و تغرق اكثر في عيونه الزرقاء الصافية ...كأن البحر غار من الشمس فوضع لونه في عينيه متباهيا بجمالهم الاخاد..... وقف بعد مدة طويلة من ركض و صدرو كيطع و يهبط ....حيد ليزيات من ودنو و دور راسو لجهة ديال لبحر لي اصبح هو رفيقه في الصباح.....صاط بجهد و حجبانو قارنهم لوسط و ملامحو ولاو اكثر صرامة ..دور يدو على شعرو الازعر لي بداو بعض شعيرات البيضاء كتزين لونه الدهبي لتعطيه منضر مهيب اكثر..... رجع ليزيات لودنو و يدو دخلهم في جيبو غادي لجهة فين خلا طونوبيل و كيهضر بلطف غير معتاد في صوته... عصام: بغيتي نجيب ليك شي حاجة معايا..... بصوت ناعس و متكاسل لطفل صغير: ما بغيت والو ا بابا انا بغيت هديك لي كتعملها ماما زوينة بزاف..... ورك على يديه بجهد فور ما نطق "ماما" تا قربو العروق يطرطقو ليه و ملامحو تغيرو كثر لكن صوتو بقى كيف هو مع ولدو.... عصام: حاتم داكشي لي بغيتي مكاينش هنا وتا حد ما كيعرف ليه .... حاتم : وعيط على ماما تجي تعملو لينا ... عصام بقسوة: ماماك ممسالياش.... حاتم ببكاء: كداااب ماما كتقولي ديما اتجي عندي نتا لي مكتخليهاش هئ اهئ ..... عصام هز راسو كيحاول يكالمي اعصابو و نطق بشوي : من تشد العطلة انسيفطك لعندها اوكي..... حاتم بسرعة تبدلات نبرة ديالو من بكاء لفرح : بصح..... عصام: اممم يالله سير لعند مايا تبدل ليك حوايجك بلا صداع .... حاتم: اووووكي..جوطيم بابا..... عصام: موا اسي جوطيم..... قطع على ولدو و بشراسة نطق... عصام: ماماك هي اخر وحدة تقدر تفكر فيا و لا فيك احد افخم الفيلات لي كتواجد خارج المدينة لي كلومترات قليلة...دخل بسيارتو الرياضية و شعرو هابط على جبهتو... نزل كيقاد كول ديال تريكو و عينو في شخص لي وقف قدامو بي احترام كبير.... عصام شاد طريق و كيهضر: وقتاش وصلتي.... سمير تابعو من لور و عنيه في الارض: عاد وصلت دابا ...مد ليه الملف لي فيدو... خداه منو عصام كيقلب في لوراق : كيف داز الاجتماع.... سمير: كلشي داز مزيان وخا ماتقوش فيا في الاول و لكن عجباتهم الصفقة.... عصام قرن حجبانو الوسط و دار عندو كامل: علاش متاقوش فيك... سمير حط يدو على شعروو ضحك بشوي: نتا عارف عقلي على قد الحال شكون ايتيق في حمق بحالي و يجازف بصفقة لي ايوقعها واحد متأخر عقلي.... عصام عض فمو من لداخل : ما حدهم ما تاقوش بيك مكانش عليك توقع العقد معاهم..... سمير بصدمة : ولكن.... عصام عطاه بضهرو طالع فدروج و نطق بشراسة: رجع ليهم العقد و لغي الصفقة لي بيناتنا هما لي محتاجين ليا ماشي انا.... سكت سمير و بقى كيشوف غير فجنابو تا خرج ليه حاتم من جنب كينقز غير شافو وهو يمشي عندو فرحان.... حاتم رفع يدو ليه باش يهزو : كونااان امتا جيتي... سمير هزو بينات يدو كيضحك : عاد دابا توحشتيني.... حاتم: امممم بزاااف..حرك راسو..سمعت صوت بابا فين هوا.... سمير: طلع لفوق بغيتيه.... حاتم بفرح و عيونو كيبريو همس بشوي فودن سمير: عرفتي بابا قالي انرسلك لماماك تبقى معاها هيهيهيهي.... سمير دور عينو بشوي و قرب حدا ودن حاتم: ديني معاك تا انا.... حاتم صغر عينو فيه بشك: بغيتي دير ليا بحال ديك لمرا خلاتك ماما تحضيني و نتا تبعتي ديك اريج الخايبة و خليتيني بوحدي..... سمير بسرعة حط يدو على فمو: ششششش واش باغي تفضحني يسمعني باك خليتك بوحدك يسلخ مي بالعصى... حاتم: انا ماما لي زوينة فيكم كاملين و كتهلى فيا بكلشي و كتبغيني كثر منكم.... سمير بملامح حزينة لعب ليه فشعرو: متقولش هادشي قدام باباك صافي... حاتم بدون فهم هز كتافو بجوج..غير شاف عصام هابط وهو يبدا يتركل ما بينات يدين سمير لي نزلو وخلاه يمشي عند عصام كيضحك و يديه مفتوحين بجوج.... عصام بتاسم بحنية: فطرتي.... حاتم عنقو و حط خدو على خد باه بفرح: لا كنت كنتسنا نفطر معاك..... حرك عصام راسو و توجهو لطبلة ديال لفطور لي كيوجدو فيها الخدامة وجالسة انثى متوسطة القاعة بي ابهى حلة و جمالها ساحر للعين...بمجرد ما شافت عصام تبسمان بلطف و عنيها كيبريو... مايا: صباح لخير.... حنى عصام راسو كرد لتحيتها و جلس مترأس طبلة و ولدو فجنبو حدا مايا و فجنب الاخر جالس سمير .... مايا بلطف في صوتها الانثوي الساحر نطقات و عنيها في عصام: ليوم حاتم ما بغاش يمشي لحضانة ما عرفتش علاش..... عصام نزل عينو لحاتم: علاش مبغيتيش تمشي.... حاتم هبط راسو من نضرات باه : تما كلشي كتجيبو ماماه الا انا كلشي كيضحك عليا و يقول ليا نتا معندكش ماماك... نزلات ليه دمعة على خدو امام نضرات عصام لي العافية شعلات فيهم و تنفسو ولا حاد..حل فمو يرد على ولدو لكن ما عرف باش يرد.... نطقات مايا بحب و يديها كيلعبو في شعر حاتم : ياك انا لي كنديك الحضانة حسبني بحال ماماك.... حاتم بغضب نثر ليها يديها من فوق شعرو و عنيه مدمعين نطق بصراخ: نتيييي ماااشي مامااااا انااا عندي غيير مامااا وحدة..... عصام خبط يدو مع الطبلة تا قفزهم كاملين نطق من تحت سنانو و عينو خارجين في ولدو : طلب سماااحة..... حاتم بتنخصيصة كتهزو من بلاصتو عاود نطق بي الم: هي ماشي ماما... بقى في بلاصتو مزير و عينو في مكان ولدو لي خلاه و وهرب لبيتو...هز راسو كيتنفس بجهد باغي يطرطق من لداخل اما قلبو ما عالم بيه غير الله.... مايا مهبطة راسها نطقات بحزن و عنيها مدمعين : مكنتش كنضن ايتعصب بغيت غير نخفف عليه و يديرني في بلاصت ماماه.... عصام عاود خبط يدو مع طبلة بجهد ..هز صبعو في وجها و نطق بتحدير: انا مخليك هنا باش تحضيه و تربيه ماشي تاخدي بلاصت مو..بشراسة في صوتو...فهمتيي..... حركات مايا راسها بصمت و دمعة على طرف عنيها مزيرة...ساط بجهد هز بلاطو ديال لفطور و طلع عند ولدو...دخل عندو لبيت كيطل عليه لقاه ناعس فوق ناموسية وخاشي وجهو في لمخدة كيتنخصص.......حط لبلاطو فوق طبلة و لطف ملامحو كثر..جلس على جنب ناموسية و جر حاتم عندو نعسو فوق صدرو كيلعب ليه فشعرو..... حاتم زاد عنقو كثر كيتنخصص: هي خايبة ماشي بحال ماما..ماما زوينة عليها و كتبغيني يزااف.... عصام تبسم كيداعب عنق ولدو بي مساج خفيف : و انا كتبغيني..... حاتم هز راسو فيه كيسمح عينو لمبتلين بدموع : غير نتا لي بابا واحد و كنبغيك اما هدوك كلهم بغاو يكونو ماما و انا كنبغي غير ماما وحدة.... عصام كمش حجبانو: كفاش غير باباك واحد ؟؟؟... حاتم ببراءة: من كنكون معاك برا لي شافني كيقول ليا ديرني انا ماماك و خا انا مكنبغيهمش.....اما من كنكون مع ماما تا واحد ما كيقول ليا ديرني انا هو باباك....... عصام بقى جامد في بلاصتو بي كلمات ولدو لي دخلات ليه بحال شي سهم زادت شعلات العافية لي فقلبو كثر.... عصام مسح ليه دموعو : شنو كدير من كتمشي عند ماماك.... حاتم بفرح و دغيا ترسمات ليه البسمة على ملامحو طفولية: هي كتلعب معايا بزاف و مكتخلينيش بوحدي و كتعاود لي قصص و كتنعس حدايا و كتصاوب لي حلوى و كتدير معايا كلشي.....حط راسو على صدر عصام...ماما ضريفة بزااااف.... تنهد بألم في ولدو لي عينو كيبداو يبريو من كيذكر الام ديالو....نطق وقلبو مزير.... عصام: تبغي تعيش معاها..... حاتم بفرح حرك راسو بزربة: اه نعيشو بجوجنا ديما.. عصام : لا غير نتا و ياها.... حاتم بسرعة ختفات الابتسامة من ملامحو: و بابا!!؟؟.... عصام باسو في راسو: بابا ايبقى هنا وقت ما بغيتييه اتجي عندو.... حاتم بملامح غير مستقرة معارفش شنو يختار بقى مدة وهو كيشوف في عصام وهو يترمى عليه معنقو بجهد... حاتم بصوت ضعيف: بغيت نبقى معاك ا بابا.... امام قاعة الافراح في رباط لي صداع جاي منها و باين ناس لي فيها فرحانين و ناشطين.....وقفات سيارتها اماما المدخل و خرجات بجمالها الاثري دو الحروف العربية الأصيلة..بي قفطانها الابيض الدي فصل جسدها و قوامها الرشيق....بخطوات متوازنة توجهات لداخل و سيقانها البيضين باينين من الفتحة الامامية ديال لقفطان لي كيتجرجر من لور وهي اخر همها انها ترفعو بيديها فخلاتو متحرر وراها ليعطيها منضر الملكة بي لونه الابيض الدي يتساوى مع بشرتها البيضاء..... دخلات لقاعة لي مليئة بناس و لحن شعبي نايض..كل الاعين توجهات ليها و شي كينغز شي و يعضو فمهم من جنب و يحولو عنيها ليهم.... رفعات راسها و تقدمات غير مبالية بنضرات الجميع ..قربات فين مجموعة عائلتها لي غير شافوها جمعو الوقفة فرحانين بحضورها و اول ما تقدم ليها هو اخوها الاكبر لي اليوم هو سبوع ولدو..... جواد دخلها في حضنو كيضحك: فنكوشة ديالي كون ما جيتيش كنتي اتخسريها معايا.... هاجر بي ايتسامة: منقدرش ما نجيش وهدا سبوع ولدك..... كلشي هجم عليها كيعنقو و يعاودو كأنهم قرن ما شافوهاش ..... هاجر في حضن باها : لي شافكم ما يقولش غير شهر هدا باش كنتو عندي.... سومية: يا ختي شكون يصخى بيك كتغيبي غير نهار كنتوحشوك بقى غير شهر .... حليمة دفعات راجلها لي معنق بنتو: حيد نتا لصقتي ما بقيتي باغي طلق..جرات هاجر لعندها....اجي شوفي ولد خوك جا كيشبه ليك يا المصيبة..... قربات بي ابتسامة لعند مرت خوها لي جالسة و حاطة ولدها في حجرها... هاجر باستو في راسو: مشاء الله يكبر في عزكم يا رب.... زاينة: امين اختي هاجر لعقبة ليك نشالله.... خرج جواد عينو في مراتو لي تا خرجات الكلام عاد عرفات اش قالت...لكن هاجر جاوباتها بهدوء... هاجر: امين.... خرجات من صاكها جوا فيه مبلغ مالي حطاتو ما بين يديها بغى جواد يرجعو ليها وهي تعتارض.... هاجر: هادي زرورة مكترجعش .... جلسات وسطهم و كل الاعين عليها و واضح كلشي لي حاضر كيهضرو عليها بينما هي بقاو ملامحها تابتين شي لي خلاهم يتصدمو فيها كثر فهاد الهدوء لي ولا فيها وهما لي موالفينها بركان متحرك.... جلس حداها ايوب كيضحك: لخوادرية شفت طنجة نساتك فينا.... هاجر: ما نسيتكم والو غير كنلقى راحتي تم وصافي.... سلوى حطات يديها فوق من يديها بحنان: كيف غادة مع الخدمة يكما عيتي.... هاجر : شوي اخالتي عارفة الخدمة كتصعاب في صيف..... حليمة: اوا نتي لي ما بغيتيش تجي لهنا ترتاحي اما كون راكي بعتيه و رتاحيتي من همو....... هاجر : ماشي ديالي اماما باش نبيعو.... حليمة خرجات عنيها فيها: ياك عصام كتبو في سميتك علاش كتقولي ماشي ديالك.... هاجر ضحكات بجنب: هانتي قلتيها كتبو ليا عصام و بفلوسو درتو و مغاديش نبيعو و نهار يرجع ليه مولاه غادي نعطيه ليه..... سومية: ومالك اختي على حالتك سيد عام من نهار طلقتيه غبر وعمرو رجع ولا سول فيك و نتي لي وقفتي على شغلك كامل ماشي من حقو ياخدو ليك .... سلوى كتغمز في حليمة و بنتها: حشومة زعما راكم عارفين عصام مزيان ماشي ديالو هادي وهو كون بغاها مغاديش يخليه ليها من لول..... حليمة: كلشي تعرفي ليه اختي تال راس بنادم ما تيقي فيه.... سي حميد قاطعها: سي عصام ما شفنا منو غير الخير و الاحسان هما تجمعو خوت و تفارقو خوت ما عدنا ما نديرو كل واحد و كياخد غير لي مكتابة ليه..... حليمة: اوا تا دابا خاصها غير تقول اه سيد رجال نزوجو ليها هي لي مقصحة راسها و مطيحة دل على نفسها اما عصام لا مخفت نكدب ايكون تزوج وعايش حياتو كيف بغى ... سلوى : اعود بالله اختي مالكي فمك سخون و شكون قالك عصام تزوج اصلاً.... حليمة: على رجال بحالو يخليوهم باين اتكون طيراتو شي وحدة لي تعرف ليه ماشي بحال هاد البقورة ليعندي مخلياه ليهم.... هاجر: ماما خلي هاد العشية دوز بخير ولا انهز سوارتي ونرجع بحالاتي وعمر هاد لكمارة تعاودي تشوفيها مزال.... حليمة لي فيها ما هناها: انا وقت ما نبغي نهضر معاك جبدي لي كسيطة ديال نغبر كمارتي انا راه مك و باغية مصلاحتك و نتي مطلقة والولد عند باه ااش محبسك على زواج.....شوفي ناس لي هنا لا من جيران و لا من العائلة مكاينش لي يقولها عليك زوينة راه عييت من كلام ناس..... هاجر ولات كتنفس بجهد : لي كيعرف با يمشي يدعيه ما مديت يدي لحد ما طلبت حد كلشي ديالي و واقفة على راسي ...هما لي كيجيو يطلبوني و من جمعت على طواسلهم يدي بداو كيقلوها فيا خايب الالة اناااااا مكنسوااااااش واااااش صوقهم..... سومية حطات يديها على حناكها: اناري بردي باركة من شوهة ناس كيشوفو فينا...... هاجر: يشوفو ولا يضبرو لمخهم لي عندو شي حاجة يجي يقولها ليا فوجهي ميبقاش يتختل ما بين لقنات ولي سميتو راجل مزغرتة عليه مو يقرب لجيهتي لا منغبر والديه في لحباسات..... حليمة: حنا غير كنهضرو دابا و ناس مجموعين ما بغينا شوهة.... هاجر: شوهة نتي لي كتقلبي عليها احليمة قلت ليك الف مرة زوااااج لا لااا..... ماشي تزوجيني لهادو لي مزال مهم كتصرف عليهم وانا مطلقة سيد سيدوو ما يوصلو ليه تا فتراب رجليه...راني ماشي كنرضع صبعي احلييمة ولكاان كلام ناس كيضرك ديريني ماشي بنتك كاااع ولا عرفتي شنو دييري هاد هاجر ماااتت و الله يرحمها.... جمعات الوقفة كلها كتفيبري بغاو يحبسوها هي كيف البركان شاعلة... هاجر: مااا يشدني حد مااشي فيين ما جيت عندكم نسى المرض الكحل تجبدو لي قضية ناس و زواج وكوون كنت باغية زواااج كون منطلقش اصلا و زييد انا بنتكم خصكم تهزو بيا ماشي طيحو بيا بكلام نااس..... دخلات فيهم كيف تور وخارجة كتنهج وقفات في الوسط كتشوف في العائلة لي مخلات ما قالت عليها هزات صبعها لي كيترعد فيهم.... هاجر: لمخير فيكم ولي كيهضر ورا ضهري عيط عليا كيف الكلب كيطلبني نعاونو و نرسل ليه الفلوس...لمخير فيكم لي كيهضر على شرف ما كيكسابوووش و بزااف عليكم باش توصلوني.... انا بعدا درت شان لراسي تا لا طلقت خرجت رابحة اما نتوما اااش ربحتو بهضرتكم عليا شنو ستافدتوو كاع ولا هاجر لي رفضات ولادكم و قبلات بالبراني ليوم كترجعو ليها دقة....شافت فيهم بحقد... لعنة الله و عليكم...تفووووو... خرجات بعد ما قربلات سبوع كامل و دمها كيفور باغية طرطق من لداخل....تبعها جواد و ايوب من لور وقفو قدام طونوبيل لي ركبات فيها.... جواد: لعني شيطان ا هاجر راكي عارفة الوليدة حال و عقل.... هاجر: عيييت اخويا عييييت شحال و انا كنسايس معاها وهي ضروري خاصها تنقص مني قدام كلشي راك شفتي كلشي بعنيك حنا وسط العائلة و البراني وهي جابدة لي نفس الكاسيطة ... جواد حط يدو على صدرو: مسحييها فيا انا اختي و غير على وجهي خليك معانا ...باسها في يديها ..الله يرحم ليك ما عز عليك خليك دوزي معانا هاد ليام راه عينا بالفراق.... هاجر مسحات دموعها بي الم نطقات: غير خليني اخويا غير نتنفس و نرتاح و انرجع عندكم لدار اما لدخلت دابا غادي غير ندير شي مصيبة... جواد باسها في راسها : دي معاك ايوب يبقى معاك وهاكي ساروت ديال داري باتي فيها تم تال غدا و طلعي لدار.... هاجر حركات راسها بشوي: بلاش عندي فين نبات و بغيت نبقى بوحدي غير نولي مزيان و نطلع عندكم.... خلاتهم واقفين وشدات طريق في ارض خالية و غير سيارتها لي غادة فديك طريق وضلام ليل زاد قهرها و حسسها بالبرود كثر و الم قلبها زاد عن حده اكثر و دموع خط على حناكها...... وقفات سيارة في جنب طريق..خدات دوا هزات حبة سرطاتها ..وحطات راسها على الكرسي حاسة بالخنقة باغية فقط شي حد تعنقو و تبكي عليه طول ليل تا تفش و ترتاح و تنعس كيف كل ناس..... هزات تليفون دخلات البوم صور ....حطات يديها على ملامحو لي واضحين على الهاتف و كتلمسهم بكل اشتياق و الم و دموع كيطيحو على شاشة . بقات مدة وهي كتسقي روحها المشتاقة فقط من صور ديالو لي مملوئين في الهاتف عندها.... هزات عنيها في ساعة شافت ثلاتة ديال ليل ..بعد تردد واضح في ملامحها دخلات جهة ديال نوامر...دخلات نمرتو ..غمضات عنيها اكثر و ضغطات على زر الاتصال....حطات تليفون على ودنها وعنيها مغمضين و قلبها كيدق بجهد....عام عمرها ما تصلات بيه ولكن في لداخل ديالها باغية غير تسمع صوتو ولو يقول فقط الو كافي بالنسبة ليها........ في رنة تانية تقطع الاتصال......بمجرد ما قطع و كأنه قطع الهواء عليها ...قطع الحبل لي بغات ترجع تهز راسها بيه... .طاح تليفون من بين يديها و الخنقة قتلاتها بغات تصرخ بي اعلى ما فصوتها ولكن مقداتش.. صوتها تصرط و الالم لي بقى كينهش في جسدها ..حطات يديها على وجها كتبكي بألم ........ في صمت لي هي فيه فقط صوت بكائها لي ملئ كل سيارة تسمع صوت رنين الهاتف لي قطع صوت بكائها...رفعات عيونها المدمعة في شاشة فور ما شافت اسم لي ضهر على شاشة ...شهقات بصوت مرتفع و زادو دقات قلبها بشكل متسارع و نطقات اسمو بتردد... "ع..ص..ا..م......عصام" في ضلام دامس هناك جسد واقف في الباركو وضو القمر كيضرب في وجهو المنحوت و صمت هو سيد المكان.... دور راسو من حس بأقدام صغيرة متاجهة ليه.... كمش حجبانو من وقف عليه حاتم هاز نونسو و كيحك في عنيه.... قرب ليه عصام هزو بين يديه.... عصام:علاش مزال ما نعستي.... حاتم: ما قدرتش نعس بوحدي.... عصام حط يدو على جبهت ولدو: شرباتك مايا دوا.... حاتم حط راسو على عنق باه: لا ما بغيتوش خايب و كيجيب ليا نعاس.... عصام لعب ليه فشعرو: انسمح ليك غير ليوم غدا غادي تعاود تشربو اوكي... حاتم: اممم... خليني نعس معاك ابابا.... حرك ليه عصام راسو وحطو فوق ناموسية.. طفا ضو وخلى غير ضو خفيف تكى حداه ..هز ولدو حطو فوق صدر كيدير ليه مساج خفيف و يلعب ليه فضهرو.... حاتم: بابا.... عصام: امممم.... حاتم:علاش ماما ماكتسكنش معانا بحال مامات صحابي.....