الفصل 1
بقلمي : إكرام بانشولي
قصتنا بعنوان💞 : جبــــــروت رجــــل عاشـــــق🔥
قصتنا هاد لمرة كتحمل أحاسيس جداد و شخصيات جداد و كيف ديما التناقض حاضر بقوة لبطل كيشرق و لبطلة كتغرب .. جوج شخصيات لي متباعدين كل لبعد لا فالتفكير لا فالأسلوب لا فالتصرفات .. فاش كنهدرو على التناقض انقصدو أبطالنا بالذات .. كيفاش و علاش و شنو ايوقع حتى ايتجمعو .
كلشي انكتاشفوه مع الأحداث .. قصة متقلبة من حدث لآخر و مافيهاش نمط واحد اندوزو من بزاف دلمراحل و خصوصاً مرحلة جديدة انهدر عليها فقصصي بعيدا على لميدان لعملي قبل نوصلو ليه انعيشو عالم آخر ايعجبكم متأكدة
قصتنا مليئة : بالتفرشيييخ🔥 و التجنديخ داكشي لي كيعجبني و كيعجبكم 😂 من هنا نقول ليكم لبطل كيهدر بإيدو قبل فمو و حتى إلا هدر بفمو كيقول غا السم لهما ارجع لإيدو حسن🤦♀️ لمهم واحد الشخصية كارثية الله احفضنا منها😂 .. بطل بحلة جديدة و بطلة بإطلالة جديدة 🙈 .. اتلقاو لهوس بجرعة زائدة💋 .. التملك لأقصى لحدود .. لحب💞 لجنوني و لحماق .. مفهوم آخر للحب عوتاني انهدرو عليه .. عالم الثمتيل .. عالم الأضواء ..عالم لكوميديا بحلة جديدة و دراما بنكهة مختالفة و منساوش الرومنسية لجريئة بنكهة بطلنا 😌 نشوفو حنة بطلنا كيفاش عندو هاد الرومانسية😂🙈.. هاااح راه كنقول ليكم أحاسيس جداد و داكشي شاخد من بديتو غا تبعو و ركزو مع الأحداث حيت من داكشي لي كيعجبكمم و كيخلي لفراشات إلعبو فكرشكم 👀 و عوتاني الأذواق تختلف كاين واحد النوع ديال لقراءات كيفضلو لهدنة و الأداب من هنا نقول ليكم بلاما تقراو هاد لقصة لبطل ايمرضكم على حس الرجال كاع🤦♀️🤗💞
على صوت رشفات لقهوة مركز نضراتو على لجريدة كيقرا بالتدقيق و عقلو خدام كيحلل فهادشي لي قدامو و لي جاي بعدما ينوض اقضي شغالو دهاد النهار .. بتاسم إبتسامة جانبية مطول الشوفة فالجريدة .. كيقرا و اعاود على لخبر لي حاطينو عليه و على الشركة ديالو لي دارت بلاصتها ففترة قصيرة .. بتاسم هاز حاجبو كيقرا فالسطورة لي مادحين وسامتو و شخصيتو لمعقدة قدام الإعلام .. تنهد بغرور داكشي لي كان باغي كيوصل ليه شوية بشوية و مبقا والو و اتكلاصا بين رجال الأعمال الصحاح لي هازين الإقتصاد
طول لجلسة عاد جمع لوقفة بتبات بعدما رشف آخر رشفة من فنجان دلقهوة .. قاد لافيست ديالو عاد خشا ايدو فالجيب بالرزانة .. رجع كيشوف فالجريدة هاز حاجبو بإنتصار عاد خرج من لمكتب لعلى برة غادي فالكولوار بنضرات جامدة مكتعبر على حتى حاجة .. فطريقو سمع صوت النداءات كتعالا كلما قربات لعندو
السكرتيرة وقفات كتنهج بلباس قصير و رسمي : مسيو لمصاوري .. تفضل لائحة الإجتماعات لي عندك ليوم
خدا من عندها الطابليط بنضرات جامدة .. طول الشوفة هاز حاجبو : لغي كااع لمواعيد لي عندي ليوم
السكرتيرة هزات راسها لعندو مخرجة عينيها : و لكن !...
قاطعها بحدة : معنديش لوقت نضيعو فجتماعات بحال هادو
ركز الشوفة فيها موجه صبعو كتحذير : خاص تعرفي لوقت هو الربح و لخطوات إلا كانت مدروسة اتمشي بعييد .. لي عليك هو تقادي ليا الإجتماع لي مع المستثمرين الجداد هادا هو لي ناوي نضيع فيه وقتيي .. تقدري تمشي دابا
كمل كلامو بتبات عاطيها الطابليط عاد قلب الدورة هابط فالمصعد نيشان لبرة الشركة .. لقا الشيفور كيتسناه و الصحافة كتصور و لكاميرات خدامين كيلتاقطو فالصور .. منطق بحتى كلمة كجواب على أسئلتهم لمتراكمة.. كتفا أنه اركب و قبل اديماري سمع الدقان على الزاج
هبطو بإستغراب : شكاين ؟!
_مسيو عاصم لمصاوري .. خاص تقرر امتى نعقدو لمؤثمر الصحفي .. كلشي كيسول على لمستثمرين الجداد و اسم لماركة الجديدة
عاصم بجدية : فالليل ايوصلك إيمايل فيه جوابي
كتفا بهاد لجملة عاد حرك الطموبيل مكسيري و لكاميرات موراه كيلتاقطو الصور بلهفة
~~~~~
" الحاضر "
وسط لمدينة فين كتمركز أكبر شركة للملابس و الأحدية .. خرجات من لمكتب ديال لمشرف متحمسة و الإبتسامة الساحرة على شفايفها
_انفكر فالعرض الجديد.. و نعطيكم جوابي فالحين
لمشرف بإبتسامة عملية : كنتاضرو جوابك على أحر من لجمر .. ديجا متعاملة معانا متأكد مغاديش تلقاي معانا مشكيل بحال لمرة لفايتة ا آنسة نيهان
نيهان : كنتمنى .. نهارك مبروك
كملات كلامها بلباقة عاد قلبات الدورة غادة بكعبها لعالي كتمشى بأنوثة راقية و اللبيسة راسمة جسمها بإحتراف و لي زايد من جمالها لون دشعرها و ملامحها الشقراء .. و عيونها الزرقاء لوحة فنية كتمشى على بساط الأرض
لمشرف سهى فيها حتى سمع شي صوت واقف على راسو : فيين هي خدمتك ؟
تلافت مفزوع و عينيه خارجين : أحم مسيو عمار .. مرحبا بييك مموالفش تزور قسم الإعلانات بزاف
عمار هاز حاجبو : علاش خاص ناخد الإذن من عندك باش نزورو ولا ؟؟ .. زير معايا
تنهد كيشوف فنيهان و ايديه فالجيوبة : أحم شكون هاد الأنسة وجها مألوف عليا
لمشرف بحماس : هادي نيهان الزايدي ممثلة معروفة و مشهورة
عمار هز حاجبو : مشهورة ! . . زعما ؟
لمشرف : اه مشهورة فهوليود .. عاد بدات كتعمر فالمغرب شوية و هي نفسها لي دارت لينا الترويج لآخر ماركة و حتى لماركة الجديدة سي اسماعيل قال لينا هي لي مناسبة تقوم بالإفتتاح ديالها
عمار بإهتمام : كتجي بزااف هنا .. هاد الشهر لاحظت وجودها
لمشرف مصغر عينيه : ممم اه على قبل لخدمة و لكوليكسيو الجديدة لي اتخرج .. شخصيا من عشاق هاد لممثلة و باش كتعجبني بادية فالثلاتينات و مزال كتبان عشرينية لفلوس كتلعب بيهم كيف بغات
عمار عقد حواجبو : صافي حبس و سير شوف خدمتك
مشا لمشرف كيتمتم تحت فمو .. خلاه واقف مركز الشوفة فنقطة وحدة و ملامح وجها قدام عينيه بإهتمام : اممم نيهان الزايدي .. ممثلة من لفوق !
تنهد كيمسح على راسو عاد قلب الدورة يشوف شغالو و شنو تابعو
على برة ..
خرجات لقات الشيفور كيتسناها فتح ليها لباب لوراني ركبات عاد كسيرا للعنوان لي قالت ليه
حلات صاكها جابدة تيليفونها كتصوني و تعاود حتى تفتح لخط عاد نطقات بهدوء و لباقة : دادة وااش صافي وصلتو ؟ ... مزيان على سلامتكم .. انا شوية و نوصل كانت عندي شي خدمة .. نورتو لمغرب مكينش محسن من لبلاد ... سجى لباس عليها ؟ عاجبها لحال ؟ .. اه دابا تولف اتجيها لعيشة شوية مختالفة ماشي بحال بلجيكا .. لمهم شوية و نوصل نتلاقاو
وقطعات بهدوء فرحانة ببنتها لي كتكبر قدام عينيها و كتزيد تفتن و تزيان نهار بعد نهار .. شكون قال وحدة بحال نيهان الزايدي و بالجمال ديالها اتكون والدة بنت بعمر 16 سنة .. الإعلام كامل كيتهاتف باش اشوفها داكشي علاش متفادية توري سجى لصحافة باش ميضايقوهاش
داز لوقت و جات لعشية ..
جالسين وسط لحديقة كيتبادلو أطراف لحديث على صوت لقهوة لي كتشرب
دادة : توحشت لمغرب بزااف أعوام مجيت لييه .. فكرة زويينة تقرري تدخلي لبلادك
نيهان بتعب : قلت مع راسي نكمل حياتي فالبلاد لي تزاديت فيها واخة معطاتنيش و لكن معليش كتبقا بلادي
دادة : سجى عاجبها لحال و اتحماق بالفرحة هي و مشاشها ههه
نيهان بسعادة : سجى لمشاش و لكلاب ايخرجو ليها لعقل بالفرحة
قاطعهم صوت خطواتها الأنثوية حتى تلافتو بجوج لعندها
سجى بنعومة : ماميي .. لمغرب زوين
و مشات باستها برقة على خدها عاد جلسات مبتاسمة
نيهان فرحانة : دادة واخة تقادي لينا لعشا بكري ؟
دادة : ااهاه هي اللولا
وجمعات لوقفة غادة لكوزينة تقاد ليهم ما ياكلو .. هادي هي خدمتها من نهار تعرفات على نيهان و هي معاها و مربية ليها بنتها " سجى " و مقابلة اش خاصهم و محافظة على جوهم لعائلي هي و بنتها .. كتحمد الله أنه تعطاتها فرصة تعرف على ممثلة مشهورة و تصدق بنت متواضعة فتحات ليها باب دارها حتى ولات وحدة منهم و أي حاجة بغاوها كيتشاورو معاها فيها ..أو بالعبارة الأخرى دادة كتعتابر هي الأم لحاضنة لجوج أنثات فدار وحدة و كلا وحدة أجمل من لخرى الشيء لي كيخلي الصدمة فاش كيعرفو نيهان والدة بنت مراهقة بعمر 16 سنة .
فالجيهة لخرى ..
وصلات وقيتة لعشا فين كتجمع لعائلة على الطبلة
اسماعيل مترأس الطبلة و كيتنهد بعصبية : مجاش عوتانيي ؟؟
عمار الإبن الأكبر : ايكون مع صاحبو .. دابا نتاصل بييه
ياسين الإبن الأصغر : خليه على خاطرو الواليد
اسماعيل بجدية موجه خطابو لياسين : متدخلش .. ديها غا فقرايتك و فالباك لي خاص تشدو بالنقطة
ياسين زعف مراضيش على طريقة كلام باه .. داك الساعة جمع لوقفة كيسوط و مشا مخليهم غا كيشوفو
جوهرة : متبقاش تبرد أعصابك فياسين الله اهديك هادشي لي انقول
إسماعيل تنهد : طلعيي شوفيه طلعيي
جمعات لوقفة معصبة هي الأخرى على سوء معاملتو لياسين .. عاد مشات تراضيه ارجع اتعشا معاهم على الله واش اقبل
عمار سكت شحال كيتنهد : لواليد متبقاش كتعصب خليه على خاطرو راه كبير عندو 25 عاام اسمعك كلا شوية كتسول عليه اينفاعل عوتاني راك عارفو كتر منا
إسماعيل : معرفتش شنو خاص ندير مع عاصم .. مكيسمعش لكلاميي و لا كيحتارم شي واحد و كيموت فالضد إلا بقا على هاد لحال لوضع مكيبشرش بالخير غا الله الطف
عمار تنهد : عاصم مزال متقبلني أخ لييه و حتى لواليدة "جوهرة " مزال متقبلها كأم لييه هادشي لي كاين و صافي .. حاقد علينا واخة كبرنا بجوج
إسماعيل : آخر مرة تهدر فهاد لموضوع .. نتا عارف راسك ولدي لكبير مكين لاش تفكرني .. نهار تزوجت ماماك عتابرتك ولدي من لحمي و دمي
بتاسم ليه عاد جمع لوقفة سامح فالعشا هو الآخر .. خلا كلشي و طلع لمكتب ديالو .. دخل و سد عليه مطول الشوفة فالصورة ديال لمرحومة مراتو .. بقا ساهي كيتأمل فيها معارفش واش خان حبهم لكبير فاش ماتت و عطا لراسو فرصة أخرى ملي تزوج للمرة الثانية من جوهرة .. تنهد بضيق مكانش عندو حل خاص لي يربي ليه عاصم و اقوم بيه داكشي علاش قرر الزواج فبلاصة ميجيب مربية حيت مغاديش تعطيه حقو .. قال مع راسو تكون عندو أم حسن تعطف عليه و تعطيه لحنان .. نوعا ما فرحان حيت جوهرة دخلات لحياتو و عوناتو بزاف معنويا ..و حتى هو بدورو عتابر ولدها عمار من طليقها .. كإبن ليه من لحمو و دمو و ممقصرش من جيهتو بحال عاصم .. أما ياسين الإبن الأصغر فهو ولدو من جوهرة .. هادي هي عائلة لمصاوري لي كتملك شركة لملابس و الأحذيه و لماركة ديالها عندها منافسين صحاح كونهم عندهم ميقولو و فارضين وجودهم فالإقتصاد
قاطع سوهتو صوت لباب فاش تحل .. تلافت بعفوية : جوهرة
جوهرة بإبتسامة : هبط التعشا ياسين راه راضيتو متبقاش تعصبو هاكاك
إسماعيل : خايف ياسين اخرج بحال عاصم .. معرفتش واش غلطت فتربيتو حتى ولا هاكة
جوهرة : عاصم قلبو حنين متنساش نقطة ضعفو .. دابا زيد تعشا متنعسش بلاش و عاصم انا لي غادي ندوي معاه
إسماعيل : سمع ليا حتى انا بقا غا نتي اجوهرة
جوهرة تنهدات : هو مزال معتابرني مرات باه و خديت بلاصة ماماه و حاقد عليا و لكن فالداخل ديالو كيسمع لكلامي خاص غا نعرف ليه .. راه واخة انفعالي و عصبي و مكيحشمش من لي كبر منو و لكن متنساش كنعاود نقوليك راه حنين هههه .. دابا اجي قلت انا لي كنعرف ليه
إسماعيل : اوا هاحنا غادي نشوفو .. سيمانة مجا لقصر غدا بغيتو اكون حاضر بيني ليا
جوهرة : اوا صافي قابلة التحدي .. غدا تشوف ولدك جاي كيحيح عوتاني ههه
إسماعيل : يله زيدي تعشاي زيدي
و مشاو هابطين لطبلة دلعشا كياكلو كيف ديما بلا وجود عاصم .. اصلا نادرا مكيكون معاهم و فحالة كان خاص تنوض شي خصومة مع باه .. فمو مسمم و الإحترام آخر حاجة كيفكر فيها لي لمسو كيعطيه علاش ادور واخة يكون كبر منو لمهم متبقاش فيه لحرقة و فينما بغات توصل توصل
نهار جديد ..
ضرباتها لفيقة مع لعشرة دالصباح .. جمعات لوقفة كتكسل بأنوثة و شعرها كيدي و يجيب فيه الريح لي داخل مع الشرفة .. بإبتسامة مشات كتطل على لجو عاجبها لحال و مستمتعة حتى سمعات لحس موراها عاد تلافتت : ماميي
نيهان بلباس لخروج هازة صاكها : حبيبة غسلي وجهك و هبطي تفطري راه واجد .. و داداك مقادة ليك داكشي لي كيعجبك
سجى بنعومة : اوكي مامي .. واش غدا انقرا فليسي جديد ياك ؟
نيهان هزات راسها باه : قاديت ليك لملف ديالك و كلشي. غدا تبداي لقراية انشالله واخة دازت نصف دورة و لكن معليش اتكملي معاهم عادي.. لقراية اتجيك شوية مختالفة على بلجيكا و لكن اتولفي متأكدة
سجى : لمغرب زويين عجبني
نيهان : اوا صافي نبقاو فيه .. لي بغاتها بنتي نديرها ليها
سجى قربات لعندها باستها : طانكيو مامي
نيهان كتوصي : يله هاني مشيت إلا جاك لملال هاد النهار خرجي لحديقة لعبي مع روكي (لكلب) ولا شي وحدة من لمشيشات ديالك .. اوكاي ؟ يله باي بيزو مابيل
باستها بحب عاد مشات مخلياها كتدور فعينيها على غرفتها الجديدة بحوايج دالنعاس لي كيتكونو من شورط قصير و ديباردور خفيف أما شعرها لعسلي مطلوق على راحتو و طويل واصل للخر دضهرها .. بقات كتمشى تبقشش ببانطوفتها لموردة عاجبها لحال و فرحانة .. من سمات سجى لخجل و الضحيكة الأنثوية .. كتعرف شنو معنى الإحترام و كتقدر لي كبر منها و تسمع لكلامو .. بنت بشوشة و مسالمة كتبغي لكالم و لحياة عندها كلها وردية و ممخصوصة من والو غا مبتاسمة و لي شافها كيعطيها لقلب " سندريلا " .. من غير جمالها لمتفجر كتمتاز بتصرفات أخلاقية بحال شي أميرة نازلة من كوكب زمردة .. كلشي عندها بالرزانة و التباتة و معدباتش مها فصغرها بالعكس معرفاتش امتى كبرات و ولات حتى هي كتنافسها فالجمال و الصحافة باغا تحماق باش تعرف وجها كيف داير
فالجيهة لخرى ..
فالكافيتيريا جالس كيرشف من قهوتو الصباحية حتى تسلطات عليه وحدة جلسات قدامو بكسيوة قصيرة و صدرها كاع باين .. من ملامحها باين فيها عاجبها زينها و مفتاخرة بيه
هز حاجبو : كاين فاش نعاونك ؟
_احم انا جديدة فهاد لفاك جيت هنا نكمل الدكتورة ديالي و سمعت بصاحبك بزاف .. إلا كان ممكن نقدر نكون صديقتكم .. كمال ياك ؟
كمال ضحك بسخرية : الثقة بالنفس زعما
جمع لوقفة كيلبس فالكويرة ديالو : حتى اجي و اهربك بوحدو مافيا ميشكرو ليك و اضرب ليا كلشي فالزيرو ا ... اسمك الله اطيرك
ميلات شفايفها كتسوط : ناهد
جمعات لوقفة حتى هي : منبقاش فيك زعما لفاك جديدة عليا متقدرش توريني فين مركز الأبحاث
كمال حك لحيتو بإهتمام كيشوف فلبستها كاع معرية : اممم ضروري باغا عشيري؟ .. اش بان ليك نخرجو انا وياك متعرفي تقدري تزعطي فيا
ناهد : انا باغا نكون صديقتكم فقط
قاطع جوهم صوتو لحرش : من الصباح و انا كنصوني ليك الز*** فيين خاشي داك لمشقووف
ناهد بإعجاب غادي تسخف ملي شافت وسامتو مكذبوش فاش عطاوه أفضل جداب دلفاك ديالهم : أحم هااي انا ناهد جديدة معاكم فهاد لفاك .. نتا عاصم ياك ؟
هز حاجبو بسخرية شوية عقدهم : لاش كتعاودي ليا لحالة لمدنية ديالك ؟
كمال حابس الضحكة : قاتلك باغا تكون صديقتنا
ناهد بصوت باكي : بغيت غاندير معاكم الصواب
عاصم مسح على شعرو كيدور فعينيه بحاليلا كيقلب على شي حاجة : الصواب زيديه فييك
كمال خرج عينيه ايموت بالضحك غا حابسها شوية طلقها مقدرش اتحكم فراسو حتى غضبات ناهد و مشات كتغبن
عاصم : كتضحك ؟؟ وباااز حشمت نرعف عشيريي .. كولا مرة جاايب ليا برهووشة فشكل زير معايا السمطة بلاما نجعر عليك
كمال : واااه مدرت والو هااد لمرة هي لي تسلطت عليا .. و على لمرات لفايتين غا بغيناا نعرفو وااش راجل عندك رغبة حتى نتاا .. وااه واش مكتيرك حتى وحدة متقولش ليا گاي !
عاصم : مغاديش نجاوبك
قلب الدورة خارج من لكافيتيريا حتى تبعو كمال كيضحك : ضاحكين الساط .. اجي شبان ليك ناهد تولي معانا
عاصم مخنزر : تولي معاك انا مالي
كمال قشع ناهد شير ليها حتى جات لعندهم : صافي قبل تولي عشيرتنا مرحبا بيك فالكليكة
ناهد بأنوثة : بصااح ! .. هي خااص نعرض عليكم
مدات ايدها لعاصم لي واقف كيخنشش فتيليفونو ممسوق لا لكمال لا ليها عالامو بوحدو : عاصم
هز حاجبو مع هزت عينو شافها مادة ليه ايدها : واش ايديك شايطين عليك حتى لهاد الدرجة باش اتهرسو ؟! كنصحك كملي قرايتك هنا بالسكات باش منخسرش معاك
رجعات ايدها لعندها مستغربة من شخصيتو مكذبوش فاش قالو ليها شخصية معقدة غا لحمق بحالو هو لي اكون معاشرو .. و لكن بالإضافة لصفاتو لخيبة لي ذكرو ليها منساوش اذكرو وسامتو و جادبيتو الساحرة و شوفاتو لحادة.. من غير الطولة و لقلدة و التشاورك بالمختصر الرجولة كتقطر منو و منساوش كمال حتى هو لي كينافسو فالوسامة و عندو حقو غا هو إنسان بشوش و كيحتارم من غير إلا تعصب و نفاعل .. أما عاصم سوا مبرد سوا معصب ديما منفاعل و معصب .. مكيحتارم حتى واحد و فينما بغات توصل توصل
سابقهم خاشي ايدو فالجيب ممهتمش لتيليفونو لي كيصوني من الصباح حتى اتصال مجاوب عليه عارف ايكون غا باه باغي اعرف فين بات لبارح
كمال نغز ناهد باش تقطع لحس عاد نطق مخاطبو : جاوب الساط تيليفونك صدعنا
حبس لوقفة كيمسح على شعرو : فيك ما تقرا هاد النهار ؟
كمال جاتو من الجنة و الناس : هااء .. لا لا مفيااش
ميل شفايفو بسخرية : اوا دوز تقرا بلاما نعيط لباك
سبقو كيقاد فالنضاضر على عينيه خلاه موراه كيتحلف : ناري هاد عشيري كيقلب عليا عمري شفت شي واحد بحالو
ناهد بأنوثة : شنو متبعين ؟
كمال طلعات ليه : و نتي مالك ؟ .. تشاو انمشي نقرا على ولادي
مشا بلاما اعير أي اهتمام خلاها هازة حاجبها بدات كتندم تولي صديقتهم : حمقين هادو
داز لوقت ..
خارجين على برة نيشان لطموبيلاتهم و عاصم فإيدو گارو كيبرد بييه ناوي اقاد لمورال لي مشقلب عندو
كمال تنهد : هاد ناهد بدات كتضرني فراسي
عاصم نتر اخر نترة من لگارو : نتا لي كتموت فالزهو .. زها مع راسك
كمال يله اينطق وقفات عليهم مبتاسمة : يله ساليت شغالي .. اتمشيو تغداو ياك ؟ نمشي معاكم ؟
عاصم بصوت جاف شعل گارو آخر : إلا كانت عينك عليا انحيدهم ليك
بلعات ريقها : لا لا .. صديقة فقط هادي أول مرة كنجي لهاد لمدينة
كمال هاز حاجبو : مممم صديقة ! .. يله زيدي نتغداو الصديقة قالتلك
بتاسمات متحمسة : اوكااي يلله
كمال كيضحك : متهدريش معاه باش ميهرسش ليك سنانك لي فرحانة بيهم
عاصم كيدور فعينيه : كتبان ليا مشغول بقا .. انا غادي بحالي
خلاهم و زاد حتى تبعوه كيتجراو
ناهد : واش صاحبك ديما هاكة ؟
كمال : اه ديما
ناهد : باز ليك معاشرو
كمال هز حاجبو : إلا بنت ليك كنضحك ميمشيش بالك بعيد .. نفس لكراكتير غا انا جونتي شوية
ناهد كتضحك : مممم جونتي جونتي .. فين ايمشي ؟
كمال : من لخر عينك فيه مغاديش اتشد ليك
ناهد خرجات عينيها : لا لا كنحلف ليك ما نيتي هاكة متبقاش تلصق فيا شي حاجة مكيناش
كمال : اوا زيدي و سكتي
تبعوه نيشان لرونج ديالو ركبو عاد كسيرا بلاما انطق شوية بدا كيجمع هو و كمال فأمور مختالفة و ناهد غا كتشوف مفاهمة والو .. لي فهمات هو أنه فعلا مخاصش تحط عينيها على شي واحد فيهم تكتافي بالصداقة فقط مع طول سنين حياتها لي فاتو كتكون غا مع الجنس لخشن كصديق عمرها جربت تكون عندها صديقة
كمال طل عليها مع جالس لقدام و هي لور : اوا الساطة .. عجباتك لمدينة
هزات راسها باه : زوينة رتاحيت ليها
عاصم بصوت جاف : ديها غا فقرايتك باش تجيك لمدينة مزيانة
هزات راسها باه واخة مفهماتش شكايقصد بالضبط لي عارفة هو بحة صوتو فشكل كتزرع نوع من الرعب و مكتخليكش تزعم عليه
فالجيهة لخرى ..
جالسة وسط لگازو كتلعب مع لكلب ديالها و لمشيشة عاجبها لحال حتى سمعات صوت داداها : سجى اجيي ابنتي
تلافتت بنعومة كتشير ليها : وي دادا جاغيف
جمعات لوقفة مبتاسمة للحيوانات : شوية و راجعة تسناوني
طبطبات عليهم عاد مشات كتجري و شعرها كيتلاوح موراها .. أنثى كاملة مكمولة و فغاية لجمال لا من ناحية لقلب ولا لقالب .. دخلات للفيلة عند داداها لقات مها لي متاصلة خدات من عندها التليفون و جلسات كتهدر معاها بهدوء و صبيعاتها كيلعبو فخصلات شعرها حتى كملات عاد مدات التيليفون لداداها بلباقة
دادة : فاش بغاتك
سجى : مامي قاتلي انخرجو على برة فالعشية .. أم سوو إكسايتد ههه .. أنمشي دابا عند روكي و لمشيشة
دادة : شوية و دخلي الشمس عليك
هزات سجى راسها باه عاد خرجات كتجر فرجليها وسط صبيبيط جاي مع الشورط لقصير لي لابسة فالأبيض و دوني ميني بوط فالأصفر مورد من لفوق و لي مخليها فرحانة بزاف هو لميكاب لي حاطة على وجها و مزينة بيه .. كيعجبها تبان كبر من سنها و كتقلق فاش كينعتها شي واحد بالقاصر .. فينما كتلقا لفرصة كتقول انا راشدة و باش اتيقو كتكتر لميكاب لي كتعشقو بحال أي أنثى باغا تبان فأبهى حلة .
وسعات عينيها و حاجبها مهزوز بإستغراب كتقلب على روكي شوية بدات كتدور فالحديقة و عينيها كيدورو كذلك ملقاتش حسو.. كاينين غا لمشيشات و روكي غابر حتى بدات كتبكي مخلوعة و قلبها كيضرب فالمية .. حساسة بزاف من جيهة لحيوانات و متقدرش تخايل راسها بلا روكي و لمشيشات ديالها .. بقات كتقلب و ايديها كيمسحو فدموعها حتى لقات راسها برة لفيلة كااع غادة كتغوت بسميتو و تعاود
_روووكييي روووكييي فييينك
سكتات كتبكي و رجليها سايگينها حتى قربات لشاريع .. ممسوقاش لشوفات لي كتصادفهم فطريقها و عينين بنادم لي اياكلوها .. معاقت بوالو حتى حسات بشي واحد شدها من دراعها تلافتت مفزوعة و اللون مخطوف منها : سي كي ؟؟
_مالك كتبكي الزوينة ؟ .. علاش كتقلبي
سجى بعفوية كتبكي : روكيي ملقيتوش فالحديقة و مكاينش فالفيلة هنننن
_ صافي غا متبكيش الزوينة نقلب معاك على روكي ديالك
سجى كتنخصص : سي فغي ؟ .. ميغسي بوكو ميغسي هننن
_اجي معايا الزوينة ايكون غا فهاد الجيهة تبعيني
شدها من دراعها كيستدرج فيها و على محياه إبتسامة ماكرة عارف شنو موراها
داز لوقت ..
جالسين فمطعم كيطل على الشاريع هما كياكلو قدامو و هو حاضيهم كينقب مرة مرة
كمال : كول اصاحبي
ناهد : أحم سمح ليا كنظن وجودي لي مخلاكش مرتاح
عاصم بصوت جاف : بحال كاينة بحال مكيناش
كمال شد فمو حابس الضحكة : خلينا الساط ناكلو ضغمة فخاطرنا
عاصم تنهد مرشقاش ليه حدو تلافت لجيهة الزاج لي مقابل مع الشاريع مباشرة ... هز حاجبو بإشمئزاز من لمنظر
كمال هز عينو لعندو : كول اصاحبيي مكليتي والو
شافو مجاوبوش ستغرب عاد تلافت لجيهة لي واخدة تركيزو. بانت ليه بنت كيوت و زوينة باينة فيها قاصر مع واحد خونا كيجر فيها باغي اطلعها فالطموبيل و هي كتنتر وتبكي
عاصم ببرود هز كاس جغم منو : التبرهيش لي كيوصلهم لهادشي .. كون كانت داخلة سوق راسها مغاديش تحط فهاد لوسخ .. لميكروبات كترو
كمال هز حاجبو : لا الساط منظنش مصاحبة معاه .. السيد كيضرب فيها
عاصم ببرودة : نساا علياا
جمع لوقفة : حتى نتلاقاو .. تلاح
و مشا مخليهم كيشوفو
ناهد : مال صاحبك هاكة .. كيبان معصب فاش شاف لبلان
كمال : عاصم مكيحملش الدراري لي كيطمعو فالبنات لي صغر منهم .. كيكره هاد النوع بحال متلا هو فهاد لاج 25 عام ايفضل وحدة قدو فالعمر تفهمو و افهمها و معندوش داك لعقلية ديال لبنت ماشي مشكيل تكون صغر منو .. حساس من هاد لبلان كيتعصب فاش كيشوف بنات الليسي مصاحبين مع دراري كبر منهم كيجيه هادشي تبرهيش و جهل
ناهد بإهتمام : لي فهمت أنه حتى هو راجل عندو بعدا داك لفكرة ديال ادخل فشي علاقة
كمال ضحك مع غمزة : راه كنقول ليك بلاما تحطي عينيك عليه
ناهد وسعات عينيها : لا راه كنقول ليك حتى انا هادشي مكاينش
كمال : عاصم مكيفكرش فالإرتباط كااع .. هادشي لي عارف حاليا
ناهد جغمات من لعصير : اممم و علاش زعما ؟
كمال : حيت حاليا دافع الضوسي ديالو لقوات لبحرية .. هادشي منبغيكش تخرجيه من هنا و باه و معارفش حاليا
ناهد : ياك كيقرا ؟
كمال تنهد : لواليدة ديالو الله ارحمها فاش كان صغير بغاتو اكون بحال باها حتى هو كان ضابط و عندو رتبة كبيرة فهاد لميدان .. اوا بغات ولدها اكون بحال جدو داكشي علاش عاصم كيفكر احقق ليها أمنيتها .. كان متعلق بالأم ديالو بزاف و كاع لحب كان عاطيه ليها داكشي علاش جاف دابا مكيعرف لا حب لا مودة
ناهد : يعني مكيفكرش اكمل قرايتو
كمال : ناوي على جوج احتمالات تقبل ليه الضوسي و دخل لهاد لميدان بلا مساعدة باه مزيان .. متقبلش ناوي امشي لبرة لمغرب اكمل الدكتورة فالدومين لي باغي
ناهد : علاش مباغيش باه اعاونو على ما سمعت عائلتهم لباس عليها و بزاف كاع
كمال : عاصم باغي احقق أمنية الأم ديالو بلاما مساعدة من باه و باش نجيك من لخر هو و باه علاقتهم مفشكلة مكيتفاهمش معاه و حاقد
ناهد ستغربات بقات غا كتشوف مجاتهاش تبقا تسول بزاف
كمال شافها قاطعة لحس : اوا و انا مباغا تعرفي عليا والو
ناهد : ليام بيناتنا ارا منعرف أولا ؟
كمال غمزها : و تقدري تعرفي شي حاجة خرا كاع
ضرباتو مخنزرة حيت فهمات شكايقصد من كلامو : ماسخ
على برة ..
طول لجلسة وسط طموبيلتو كيتفرج فيهم من انعكاس لمرايا لي فالجنب .. هز حاجبو كيسوط مباغيش اتدخل و فنفس لوقت كيكره لحگرة .. داك الساعة نزل قاصدهم غبرة بلا كلمة بلا جوج شنق على الدري لي ايكون تقريبا بحال عمرو ( 25 عام )
عاصم مخنزر : صحيبتك ديها لشي قنت و حلو بلاناتكم بلا شوهة قدام لبشار
الدري شاد فسجى مزير على معصمها : طلق انا و عشيرتي و نتا ماالك
تنتر منو كيخنزر : اجي احبيبة طلعي لطموبيل
سجى كتبكي : لا لا خليني نمشي .. بعد منيي
عاصم بعصبية مباغيش اتدخل و فنفس لوقت محاملش لبلان : بعد منهاا مكتسمعش ؟؟؟
_انا و لبنت و نتا مالك ؟؟
زرب على سجى بقوة حل لباب لوراني ركبها و هي كتنتر و تبكي بالخلعة مبغاتش تخرج ليها لهدرة
عاصم بقا كيشوف و ايدو على لحيتو كيحك فيها عاقد حواجبو و محاملش لبلان : هي و صحيبها انا مالي
زفر كاره لوضع كيقول مع راسو مسوقوش فيهم ..عاد مشا لطموبيلتو ركب و قبل ميكسيري قشعو سايگ طاير قدامو .. هز حاجبو فاش بانت ليه نفس لبنت لي معاه كتضرب فالزاج و لبيبان بكاع جهدها هنا دخلو الشك .. مخلاش لراسو فين افكر مزال داك الساعة كسيرا حتى هو تابعو طاير موراه
بقا عافط على لكسيراتون تابعو مخنزر و عاد مكيزيد اشك كتر أنه فعلا لبنت مكتعرفوش .. لي مخليه اقوم بالمساعدة هو كلام مو الله ارحمها كانت ديما كتوصيه اقدم لمساعدة لشخص لي محتاج ليها .. رباتو فصغرو على قيم زوينة لي غا مشات من هاد الدنيا نساهم بسباب لحب لي تبخر منو .. بالنسبة ليه الإنسانة لي عطاها قلبو مشات و خلاتو صغير و هو باقي محتاج ليها .. داكشي علاش مبقاش كيثيق
فالجيهة لخرى ..
واقفة وسط لحديقة كترعد و التليفون على ودنها : بغييت داباا نعرف بنتيي فيين مشااات .. دااااباااا بغيييت بنتي كتفهم
و قطعات كترجف : سجى فين مشيتي
تلافتت لقاتها واقفة : واش غا خرجات من حداك مبقاتش بانت ليك ادادة
دادة بملامح شاحبة بسباب لخلعة لي مخلوعة على سجى : هادشي لي كاين ابنتي معرفتش فين اتكون مشات
نيهان كتبكي مخلوعة : سجى مربيتهاش تهاجم الزنقة ملي تمشي وسطها .. ياربي تلطف بنتي غا نية و اي واحد اقدر اضحك عليها و خوافة بزاف بزاف
دادة : انشالله ميوقع والو تفائلي بالخير .. سجى حيت نية ربي غادي احفضها
نيهان بتعب كتبكي : سجى ادادة غا بريئة مكتعرفش تدافع على راسها فششتها على لهداوة أما باش تدافع على راسها معلمتهاش
مسحات دموعها كتحاول متفكرش فشي حوايج خايبين : انشالله لبوليس ايلقاوها
دادة : و زعما بغاو ؟ ياك حتى ادوز نهار على اختفاءها
نيهان كتمسح فدموعها : معرفة صحيحة
غا كملات كلامها مشات لعند لعساس كتوبخ فيه و هو حادر راسو : لبنت خرجات من لباب و نتا مجايب خبار . .. كون ما كاميرات لمراقبة كااع منعرف واش خرجات .. إلا كانت خدمتك هاكة بلاش منها اسيدي
وسط لغابة ..
غادي مكسيري و عينيه معميين كلما كيسمع بكاها و غواتها كيزيد اهيج كتر عليها و عاد كيتشبت بفكرة خاص ميفلتش هاد لفاكهة لي معاه خصوصا أنه بانت ليه نية بزاف
سجى كتبكي و تضرب فالزاج مخلوعة : بليييز ديني عند ماما ... بغييت ماامييي
و سكتات كتبكي جابت ليه الضحكة بهدرتها كتبان من الناس لكلاص لي مكيعرفوش اخرجو من فمهم شي كلمة دلعيب .. غا سطاسيونا نزل حل عليها و جرها بعجرفة
_ليوم انذوق من لحلوة ديالك الزوينة غا بيا ولا بيك .. اجيي لهنا ايعجبك لحال
سجى صوتها بح بالغوات لدرجة عصباتو حتى عطاها بتصرفيقة تلاتية الأبعاد خلات وجها كامل ازراق فدقيقتو .. مهتمش لغواتها دار بالناقص من لكوخ كاع ولا كيفكر غا أنه خاص افتارسها داكشي علاش طيحها زادحها مع الأرض و نزل عليها هي كتفركل و هو فوقها كيقطع فحوايجها بعنف و اضرب فينما جات الضربة مهاموش غواتها لي كيزيد اعلى درجة فوق درجة .. عينيه معميين خاصو غا ابداها .. زاد بتاسم فاش خلاها غا بااسوتيان واخة باينة فيها قاصر إلا أنه كتملك معالم انثوية جدابة و على قد سنها
_ باينة اتكوني بنينة مع راسك .. شششش حتى واحد مغادي اسمعك غا كتغوتي على والو .. ششش كالما كالما ايعجبك لحال غا سكتي إلا مبكيتيش مغاديش نقصحك
سجى كترعد مصدومة حتى من لغوات مبقاش بغا اخرج ليها هادشي أول مرة كتشوفو فحياتها : بلييز خليني نمشي بلييز
تبسم بمكر عاد عطاها بتصرفيقة أخرى و قرب لشورط باغي اهبطو حتى كيحس بكروشي ثلاتي الأبعاد نزل على فكو دوخو على لقبلة فين جات .. مجا فين استوعب شنو واقع حتى حس بركلة أخرى لجنبو لحتو لبعيد
سجى بالخلعة تكمشات فبعضياتها مشافت حتى شكون ولا شنو واقع كتفات أنه تهبط راسها مخلوعة كترجف و كاملة كترعد فحالة ذهول من الرعب و شعرها كاع مشعكك .. كتسمع غا الضرب و لهدرة لخيبة كتشاير و لغوات من الألم حتى بدات كتفقد لوعي شوية بشوية على درجة تقدر تموت كاع
عاصم الجنون كينقزو فوق راسو بقا كيركل و اسب بحال الثور ولاو فيه عشرة مهنا حتى رجعو شرويطة كلو دمايات وسط رجليه .. يله جبد موس من جيبو ناوي افاريها معاه حتى كيحس بشي جوج شادينو تلافت مقندش لقاهم لبوليس .. دور عينيه مزيان لقا لبوليس بزاف كاينين شي كيفيق فالبنت لي شاف شي شادو حاكمو