14&15
الجزء 14 و 15
انتهى الجزء 13 بعد ماطلب يوسف من غنا انها ترجع معاه البيت وتجلس فيه .......
غنا : يوسف انت تدري اني واثقه فيكم انكم ماراح تخلوني .. بس ما اقدر اشوف امي تكرهني كل يوم اكثر من قبله
يوسف : انا كلمت امي .. وطبعا قدرت اغير رايها
غنا مستغربة : غيرت رايها بسرعة هذه ومن كلمة ؟؟!! ممك تفهمني كيف ؟
يوسف : لا مو ممكن هنا هو السر ..
غنا : اخاف فرضتني عليها يوسف بتخليني احاتي اكثر .. شنو الي ممكن تقوله يقدر يغير رايها
يوسف : لاتصيرين فضولية اهم شي ان امي من اليوم ورايح ماراح تضايقج
غنا : يوسف انت ليش تسوي كل هذا عشاني ؟
يوسف : لا تسأليني مثل هذا السؤال تحسسيني كأني غريب
عضت غنا شفايفها لانها حست ان سؤالها مو بمحله : اسفه يوسف ماكنت اقصد .
يوسف : طيب شنو قلتي بترجعين معااي ؟
هزت غنا راسها بإيجاب
ابتسم يوسف : ايه كذا
" واخذها على البيت وكان كثير مبسوط "
--------------------------------
في العصر في بيت بوعبد العزيز
" كانت ريم فرحانه عشانها بتروح بيت بوفهد وكان لها هدف معين من هذه الزياره وطبعا هذه الزياره راح تفتح لها زيارات اكثر .. راحت والبست احلى ماعندها من ملابس الزيارات العاديه ووحطت لها مكياج خفيف يبرز جمالها ( ريم كانت متوسطة الجمال بس المكياج كثير يناسبها ويعطيها رونق اكثر "
ام عبد العزيز : ليش كل هذه الزينه
ريم : يوه ماما هذه اول مره تشوفيني احط مكياج .. طول عمري كذا انيقة
ام عبدالعزيز : بس هذه زياره بسيطه مافي مناسبه
ريم : ولو بعدين ماما ترى زمنا مو مثل زمنكم غير عنكم .
ام عبد العزيز : ماينقدر عليكم عيال هالايام
ريم : طيب ماما انا بروح اجيب عباتي وبتصل في السواق
ام عبدالعزيز : لا ناصر هو الي راح يودينا هو قال بنفسه
ريم : لااا ليش ناصر الحين مابيخلي شي مابي ينتقدني عليه
ام عبدالعزيز : والله ناصر هو الي بيودينا ان بغيتي او لا
ريم : اروح البس عباتي قبل لايشوفني
" الا بدخلة ناصر "
ناصر : هه يعني عارفه نفسج ..
ريم : ناصر خلاص انا كبرت لاتدخل فيني
ناصر : بتدخل وبتم اتدخل لحد ماتعقلين ..
ريم : اووووف والزبده الحين شنو تبي .. انا بروح اجلس جنب شباب ؟؟ كلنا حريم
ناصر : مافيج فايده .. ماراح تفهمين ..
ام عبدالعزيز : اتركها ياولدي كل البنات هالايام كذا
ناصر : يمه والله هذه تقولج كلام وانتي تصدقينها .
ام عبدالعزيز : طيب يايمه قوم ودنا لا نتأخر .
ناصر : ان شاء الله .. اذا جاهزين اطلعوا
ريم : بجيب عباتي ونازله .
-------------------------------
" لما دخلت غنا مع يوسف كانت خايفه كثير من ردة فعل ام فهد لكنها تفاجئت منها لانها كانت طبيعيه وحتى انها ردت السلام مثل قبل وماتغيرت ملامحها ومابينت أي شي او انها متضايقة .. هذا الشي مافرح غنا بالعكس حيت بخوف وبذات بعد ماقال لها يوسف ان هو كلمها ... "
ام فهد : يوسف ترى اهل ناصر بيجون يزورنا خبرك ؟
يوسف : لا ماقال لي ..
ام فهد : انا راح اعزمهم على العشا .. وابي احسن عشا اليوم مابي يقولون بيت بوفهد مقصرين خصوصا ان هذه اول زياره لهم بعد ماتركوا السعوديه وراحوا برا
يوسف : افا عليج يمه هذا ناصر غالي على قلبي .. خلاص ابشري انا بنفسي بوصي على العشا
ام فهد : وانتي غنا استعدي والبسي شوي وبيكونون هنا .
غنا : ان شاء الله يمه .. وعن اذنكم بروح اخذ لي شور
" بعد مامشت غنا "
يوسف : يمه بصراحه فاجئتيني
ام فهد : ليش ؟
يوسف : انتي فاهمه ليش غنا رجعت معاي ؟
ام فهد : أي وراح تجلس على قلبي
يوسف : أي انا اقول امي معقوله غيرت راييها بسرعه هذه
ام فهد : لا بس اذا انتوا موقفين ضدي انا لازم اتنازل عشان ما اصير بموقف اندم عليه بعدين .. لان غنا غاسله مخكم وانا مابي اخسركم بسببها
يوسف : اتمنى ان يوم م الايام يتغير هذا الي في قلبج وتحبينها مثل بنتج .
ام فهد ( خايفه يجي اليوم الي تقول فيه بتزوج غنا .. يومها جد ما اعرف شنو بيصير فيني )
يوسف : طيب يمه انا بروح انام لي ساعه بغرفتي صاحي بدري ..
-------------------------------
" اخذت لها غنا شور سريع ولبست وطبعا ماتكلفت في المكايج وتقريبا ماكانت حاطه غير قلوس خفيف .. ورفعت شعرها كيرلي خفيف "
" في هذا الوقت وصلوا اهل ناصر واستقبلتهم ام فهد وهبه احلى استقبال .. "
ام فهد : نورتوا البيت والله لكم زمان ماشفناكم
ام عبد العزيز : الغربه وماتسوي .. بس الحمدلله لازم الواحد يرجع مكانه
ام فهد : أي والله صدقتي ..
ام عبد العزيز تطالع هبه : ماشاء الله .. عرفتي تختارين يا ام فهد
ابتسمت هبه ابتسامة خجل : تسلمين خالتي
ريم : احم احم هبه من يشوف جمالج ومايمدح ..
هبه : لا تبالغين تخليني اغتر الحين
ريم بمزح: ههههههه بس مو احلى مني
هبه : شخبار دراستج ؟
ريم : اوف مو طايقتها اول سنه لي بالجامعه .. ياثقل دم الجامعه <<< صدقت :d
هبه : حتى انا كنت اكرهها بس الحمدلله تخرجت وافتكيت
ريم : ماتفكرين تشتغلين ؟؟
هبه : لا واصلا فهد قالي مايحتاج شغل ..
ريم : اوه زوجك من هذولا الي مايأيدون الشغل ؟؟
هبه : لالا بالعكس يقولي على راحتج يعني مو اجباري وانا بيني وبينج ماصدقت على الله .
" نزلت غنا بعد ماخلصت وراحت سلمت على ام عبد العزيز .. وريم وام عبد العزيز من اول مانزلت غنا وهي ماشالت عينها عليها وطبعا هي كانت حاطه عينها عليها من قبل واليوم زاد اعجابها فيها خصوصا لما جلست تراقب حركاتها وسوالفها وضحكها "
ريم : غنا انتي تدرسين طب مو ؟
غنا : أي وهذه اول سنه يعني معاج .
ريم : الله يعينج والله الطب ابد مو سهل .
غنا : الله كريم ..
ريم ( مالت عليها مصدقه عمرها ) : الا بسألج غنا .
غنا : تفضلي
ريم : تروحين ايطاليا .. تزورين اهل امج هناك .. الي عرفته ان امج اجنبيه مو من هنا .
غنا : لا مامره رحت تصدقين بس لما كنت ببطن امي هههه
ريم : اها ماعندج اهل هناك ؟
غنا : الا خالتي هناك مع زوجها وعيالها وهم جاو هنا مرتين وبعد السنه هذه راح يستقرون بالكويت
ريم : وليش بالكويت ؟
غنا : زوج خالتي كويتي ؟
ريم : ماشاء الله عندج اهل من كل الاقطار
غنا : أي مثل ماتشوفين
ريم : اممممم .. تحمليني غنا شوي عند فضول
غنا : اخذي راحتج اذا اسألتج لها اجابه ماراح اردج
هبه : هههههه ماتوقعتج فضولية
ريم : عند الضرورة اصير الي تبينه
هبه وغنا يطالعون بعض مستغربين
ضحكت ريم : لاتستغربون في مصطلحات خاصة فيني ماتفهمها الا ريم لاتحطون في بالكم
غنا : طيب يافضوليه شنو بغيتي تسألين
ريم : يعني انتي عايشه هنا من لما كنتي صغيره يعني جد جد تحسين انج في بيتج وبين اخوانج ؟؟ !! او لازم يجيج احيانا وقت تفكرين فيه انا لأ مو من هذا البيت وتتصرفين وكأنج مو منه ؟
غنا : لأ ما مره فكرت في الفكره الثانيه .. هذا هو بيتي وبعدين هذا عمي بمنزلة ابوي الله يرحمه .. وامي ربتني مثل بنتها
هبه ( هه ياربي على الكذب خالتي تحلم في اليوم الي تفارقينها فيه ) : ايه باين
استغربت غنا من رد هبه بس ماعلقت واكتفت بنظرة احتقار لهبه
لكن ريم وهبه ضحكوا ضحكة سخرية .. ونرفزوا فيها غنا بس طبعا هي مابينت لهم انها متنرفزه
ريم : طيب غنا خلاص لاتزعلين كلهم كذا مايبون احد غريب يدخل
غنا : طيب عن اذنكم بروح دورة المياه .
ريم : طيب اذنج معاج ..
هبه : سوري ريم خليتها تتنرفز عليج بس ما اقدر اسكت اذا شفت احد كذب قدامي
ريم تضحك : بيني وبينج كذبتها بيضه لو انا مكانها قلت مثلها .. بس ضحكتيني
هبه : اصلا خالتي ام فهد تتمنى اليوم الي تفارق فيه البيت
ريم : ليش ؟ ماتدرين ليش ؟
هبه : هذا البيت كله اسرار
ريم : بتعرفينها شوي شوي
------------------------------------
" راحت غنا المطبخ وجلست ترتب مع الخدامة تقديمات الضيافة .. ومره وحده تبعد عن ريم واسلوبها الي ينرفز ..شوي الا بدخلة ام فهد "
ام فهد : ليش جالسه هنا وتاركه البنات .
غنا : لا بس قلت ارتب مع الخدامة شوي اخاف ماترتبها مثل مانبي .
ام فهد : بلا فلسفة انا عارفه انج ماتحبين ريم ...
غنا : صدقتي يمه انا ما احب اجلس مع ريم عشان كذا انا جيت هنا .
ام فهد : وشفيها ريم زينة البنات كلها هذه البنت الي تعجبني شخصيتها قوية واحب فيها جرائتها ودلعها .
غنا : الناس مو واحد انا ما احب كذا
ام فهد : يعني انتي تطعنين بذوقي ؟
غنا : يمه الله يخليج لاتفهمينها بالصوره هذه حاشاح ماعاش من يطعن في ذوقج .
ام فهد : طيب بلا هذره ولاتدخلين في شغل المطبخ انا برتب معاهم وانتي روحي اجلسي مع الظيوف لا تتركينهم
" طلعت غنا من المطبخ وحست انها متنرفزه من قلب وماودها ترجع مع ريم وهبه فراحت وجلست جنب ام عبد العزيز "
ام عبد العزيز : ماشاء الله عليج ياغنا سمعت انج داخله طب مو ؟
غنا ةالابستامة مرسومه على وجهها : أي خالتي .. اول سنه
ام عبد العزيز :الله يوفقج يارب
غنا : تسلمين خالتي ..
ام عبد العزيز : تفكرين تدرسين برا ؟
غنا : بالوقت الحالي لا ابد .
" وجلست ام عبد العزيز تسولف مع غنا وعجبتها اكثر واكثر وخصوصا انها كانت طول الوقت تبتسم "
" وبعد ساعتين استأذنت ام عبد العزيز من ام فهد عشان يرجعون البيت لكن ام فهد اصرت انها ماتمشي قبل العشا وماقدرت ام عبد العزيز تردها "
" بعد ماجلسوا مره ثانيه طلعوا غنا وريم وهبه الحديقة بطلب من ريم "
" وكانت ريم تراقب سيارة يوسف بعد ماعرفت شكلها وكانت تتمنى انها تشوفه يطلع "
غنا : ريم وين سرحانه ؟
ريم : امممم لا مو سرحانه في شي .. بس حاسه بملل شوي
غنا : ملل ؟!!
هبه : تحبين تشوفين فلم ؟؟
غنا : لا ما احب الافلام كثير .. بس غنوءه شرايج تفرجينا على غرفتج .. وتراني اموت بالصور اذا عندج البوم فرجيني
غنا : سوري راح عن بالي .. اوكي قوموا ندخل
" لما كانوا متوجهين عشان يدخلون بالصدفة كان يوسف طالع عشان يروح يوصي على العشا وكان متوجه لسيارته .. فأول ماشافت ريم يوسف وقفت "
غنا : شفيج واقفه في شي ؟؟
ريم : لا بس نسيت جوالي على الطاوله بروح اجيبه ..
غنا : اوكي جيبيه ..
ريم : انتوا اسبقوني
غنا : لا شدعوه ننتظرج
" راحت ريم جنب الطاوله وطلعت الجوال بهدوء بدون ماحد يحس ودحرجته بقوة بأتجاه سيارة يوسف .. "
ريم بصوت عالي ومسويه نفسها مو منتبهه ليوسف : غنااااااا ماشوفه ممكن تتصلين على جوالي عشان اعرف وينه ؟
غنا : اوكي وانا بجي ادوره معاج .
ريم : لا بالاول دقي .
" اتصلت غنا بجوال ريم .. ووقتها وصل يوسف لسياره وسمع صوت الموبايل ونزل بالارض عشان يرفعه"
غنا : هذا هو جنب سياره يوسف
" وانتبهت ليوسف وراحت تركض عشان تروح تاخذ الجوال منه لكن ريم سبقتها.
ريم بدلع : اسفه ماكنت ادري ان في احد بس كنت ادور على موبايلي ممكن تعطيني اياه ؟
صد يوسف عنها ومد ايده عشان يحط الجوال على السياره وهي تاخذه لكن سبقته واخذته من ايده : شكرا يوسف
تنرفز يوسف وركب سيارته وهو معصب من جرائتها وماكان قادر يحرك لانها كانت واقفه
وانتبهت ريم على نفسها وبعدت شوي : سوري عطلتك
" حرك يوسف سيارته بسرعه وبدون مايلتفت "
" طبعا غنا كانت مصدووووووووومة من تصرف ريم ما توقعتها بالجراءه هذه "
ريم : ماشاء الله عليه ولد عمج .. خلوق ومارفع عينه بعيني كان مستحي يالحليله .
غنا : لان هذه مو من اخلاقيات يوسف .. ومو متعود يشوف بنت بالجراءه هذه
عصبت ريم : انتي تقصدين اني قليلة ادب ؟
غنا : هذا تصرف جريء ووقح .
رفعت ريم يدها بتضرب غنا لكن غنا مسكتها قبل لا تمدها : مو انتي الي ترفعين ايدج بوجهي
سحبت ريم يدها يقوة وزادت عصبية وصارت تتنفس بحده : اذا انتي معقده فأنا مو مثلج الي سويته مو عيب بس انتي معقده وانا خايفه انج حاطه عينج عليه وهذا الي ثار غيرتج .
غنا : ماراح ابرر لج موقفي لكن كل الي اقدر اقوله انج بنت وقحه .. وتركت الحديقة ودخلت .
ريم : هبه كيف متحملتها هذه ؟؟
هبه كانت متفاجئه مثلها مثل غنا : بس بصراحه ريم احنا مو كذا يمكن انتي عشانج فري لكن احنا مو كذا كان المفروض انتظرتي غنا تجيبه او يتصرف هو من نفسه مو حلوه تروحين تاخذينه منه .. شنو بيقول عنج ؟
ريم تسوي نفسها بريئه بعد ماحست انها غلطت : صدقيني ياريم مافكرت انه عيب وبعدين بيني وبينج انا كنت متعوده على يوسف قبل لانسافر كنا نلعب مع بعض ونضحك ونسولف مع بعض .
هبه : اها كنتي تعرفين غنا يعني ؟
ريم : كنت صغيره ما اتذكرها كثير .. بس اذكر مره جات بيتنا ام فهد وكانت معاهم غنا يومها امي اعطت كل واحد فينا شيبس وكانت غنا مو عارفه تفتح الكيس وراحت ليوسف عشان يفتحها لها لكنه فشلها وضربها موتني ضحك يومها وهي مقطعه عمرها صياح .
هبه : يوسف ؟!! اها ايام طفوله الحين مايرضى عليها ابد واكثر واحد من اخوانه مهتم فيها .
ريم : شنو جد ؟؟
هبه : ايه بس لايروح فكرج بعيد تراه يعتبرها مثل اخته .
ريم : هبه بصراحه انا حسيتج تدخلين القلب بسرعة .. عشان كذا نبي نصير اصحاب شرايج ؟
هبه : والحين حنا مو اصحاب
ريم : ههههه صدقتي .. لا بس في شي مو قادره اقوله لاحد وودي اتكلم مع احد فيه بس مو لاقيه احد اتكلم معاه
هبه : طيب مو تقولين تبينا نصير اصحاب خلاص خبريني
ريم : اه شوفي ام فهد تنادينا .. قومي ندخل وفي زياره ثانيه اخبرج
هبه : لا فيني فضول ابي اعرف
ريم : بعد العشا ان شاء الله
----------------------------
" كان يوسف يسوق وهو متنفرز من ريم ومن تصرفاتها الجريئة الي زاده مو الموقف هذا لا بس جلس يفكر في المرات الي قبل اولهم البطاقة وبعدها المسج .. والحين تصرفها هذا "
----------------
بعد العشا
" جلسوا اهل ناصر شوي مع ام ام فهد وغنا وبعدها راحوا البيت .. كانت غنا بعد مادخلت من الحديقة معصبة وماكانت طايقه ريم ابد .. وريم نفس الشي بس كانت كل بين فتره تعطي غنا نظرات احتقار وتهديد وغنا كانت مطنشتها على الاخر "
" بعد مامشوا راحت غنا غرفتها وجلست تذكر الموقف الي صار وكانت هي مستغربه من نفسها وليش عصبت للدرجه هذه لدرجة انها كانت تبي ترضبها .. وحست بشعور غريب داخلها وجلست تسأل نفسها لو كان ماكان يوسف كان ممكن تنرفزت للدرجه هذه ؟؟ وبسرعه شالت الفكره من راسها وغطت نفسها بالبطانيه وكأنها راح تغطي افكارها بدل ماتغطي جسمها "
دخلوا يوسف وفهد الصاله بعد مامشوا الظيوف وكانوا ام فهد وهبه جالسين بالصالة
يوسف : انا بروح غرفتي
فهد : تعال اجلس اشرب الشاي معانا ولا تستحي من حرمتي ؟ تراها جنب امي وبعباتها
يوسف : لا مو عن كذا شدعوه هبه صارت من البيت بس ابي اريح شوي راسي مصدع
فهد : خير ان اشاء الله
يوسف : لا مافي شي بس جلست بدري وروحه وجيه وكله صداع
فهد : اها اجل روح ريح .
---------------------------------
غنا ماقدرت تشيل الافكار من راسها وعصبت من نفسها ورمت البطانيه وطلعت من الغرفه .. وهي نازله من الدرج شافت يوسف واول ماشافته سوت نفسها ماشافته وجلست تلعب بأظافرها ومنزله راسها <<<<يعني تراني ماشفتك "
يوسف : غنااا
غنا : هههلا
يوسف حس ان غنا متغيره ملامحها ومو قادره ترفع عينها : يوسف فيج شي ؟؟ زعلانه مني ؟
غنا : لالا ليش انت شنو سويت عشان ازعل
يوسف : مادري حسيت ان في شي
رفعت غنا راسها بسرعه عشان ماتحسس يوسف بشي : لا بس كنت احوس بأظفاري
يوسف : طيب انبسطتي اليوم ؟؟
غنا : لاا
يوسف : ليش
غنا : ها لالا كنت اقصد أي كثييييييييير .
يوسف : ليش مرتبكه غنا مو على بعضج في شي قولي
غنا : لا مافيني شي .
ابتسم يوسف : انتي شكلج مو مبسوطه ضدي انا كثير مبسوط " يوسف يقصد مبسوط عشان رجعة غنا معاهم .. لكن غنا فكرت انه مبسوط باللي صار مع ريم لان بعد ماسألتها اذا انبسطت او لا معاهم هو قال لها انه هو فرحان اليوم
غنا : اممم انت ليش مبسوط .. عشان الي صار اليوم بالسياره ؟
يوسف : انتي تقرين افكاري ؟؟
غنا ( لا ويعترف على طول طلع مثلها ) : طيب انت انبسط على كيفك انا بروح انطق وانام
يوسف ( ليش عصبت ؟؟!! ) " جلس يراقبها لحد مادخلت غرفتها وراح غرفته ومن التعب على طول نام
" اما غنا فكانت منقهره من الف شي اولها تصرف ريم والحين كلام يوسف والاكثر من هذا كله ليش هي معصبه للدرجه هذه .. "
غنا ( انا غبيه ؟؟ ياربي ليش افكر كذا .. ياليتك ماعاملتني بالطريقه هذه يايوسف انت الوحيد الي كنت احس دايما بوجودك وبمعاملتك قبل اني غريبه .. والحين مو قادره اعرف وين انا في؟؟ ولا انت مكانك بقلبي وينها .. انت غير عن احمد وفهد )
" حاولت غنا تتقلب يمين وشمال الف مره لحد ماغلبها النوم ونامت "
---------------------------
فهد : وين غنا ؟؟ ماشفتها اليوم
ام فهد : غنا ؟ أي صحيح هي وينها ؟
هبه : يمكن بعد الي صار بالحديقة زعلت وراحت غرفتها
فهد : وليش زعلت؟؟ شصار ؟
هبه : صار بينها وبين ريم سوء تفاهم .. لدرجة ان غنا كانت راح تضرب ريم <<< الي صار العكس
فهد : غنا ؟!! لا لايمكن انا اعرف غنا مستحيل ترفع ايدها
انقهرت هبه : يعني تكذبني
فهد : لا ياهبه بس كنت اقصد اكيد الي صار مو هين الي خلاها تسوي كذا انا اعرف غنا زين
هبه :ريم ماسوت شي كل الي سوته ان لما ضاع موبايلها في الحديقة راحت تدور عليه ولما مالقته طلبت من غنا تدق على موبايلها عشان تعرف وينه .. ولما اتصلت فيه طلع الموبايل جنب سياره يوسف وبالصدفة كان يوسف طالع ورايح لسيارته والتقط الموبايل وريم راحت اخذته منه .. غنا تنرفزت وعصبت كثير وقالت لها انتي قليلة ادب وتصرفك وقح
فهد : غنا قالت كذا ؟؟ بس صح تصرفها مو حلو احنا وين تروح هي تاخذه
هبه : بس غنا بصراحه بالغت البنت ماكانت تقصد شي والي فهمته منها انها كانت متعوده على يوسف قبل عشان كذا تصرفت بعفوية
فهد : انا فاهمك ياهبه .. انا بكلم غنا
ام فهد : وانا اقول شنو فيها .. غنا هذه كل يوم ماني قادره افهمها ولو دريت انها سوت كذا كان اعتذرت لام عبد العزيز فشلتنا
فهد : يمه قلت لج انا راح اكلمها واخليها تعتذر
هبه : أي بصراحه البنت قامت تبكي عورت قلبي
فهد ماكان راضي وهو يشوف الكل واقف ضدها : قلت لكم راح اكلمها خلصنا .. انا بروح انام اعتقد انها نايمه بكرا بكلمها
هبه ( ليش زعل ؟؟ اووف من هذه الغنا الي ذابحينا فيها .. ياربي مدللـه بشكل مو طبيعي من وين ماتطلع ماصخه كذا )
-----------------------------------
" اما ريم فكانت تفكر في طريقة تتوصل فيها ليوسف وهي كانت عارفه ان يوسف ماراح يفكر فيها ابد لان مايعرف عنها شي وبعد ما سمعت كلام هبه اليوم قررت انها ماراح تقرب ليوسف من اليوم ورايحمثل ماوعدت نفسها قبل بس كل الي راح تسويه انها تستغل هبه وسذاجتها لحد ماتوصلت لفكره براسها وراح تنفذها شوي شوي وبهدوء "
---------------------
صباح اليوم الثاني
صحت غنا متاخر ولما التفتت على الساعه لقت ماباقي على المحاضر هالا نص ساعه .. راحت بسرعه لبست واتصلت على السواق وقال لها ان هو الحين مايقدر يجيها عشانه مودي ام فهد المستشفى مع جارتها ام رائد "
بالصاله
غنا : ياربي انا شسويت كيف بروح الحين .. اتصلت بساره ولقته مقفل
" كان فهد طالع من شقته عشان بيروح الدوام واستغرب ان غنا بعدها ماراحت "
فهد : غنا مارحتي ؟
غنا : راحت علي نومه وماباقي شي على المحاضرة.
فهد : انا بوصلج
غنا : لالا لاتكلف على نفسك .
فهد : انا من تزوجت وانتي مستحيه مني لايكون الحين صرت مو اخوج
غنا: لااااا فهد لاتقول كذا
فهد : بلا اجل بلا كلام فاضي واطلعي معاي الحين عشان اوصل لج وبعدين في موضوع ابي اكلمج فيه
غنا : ان شاء الله
-----------------------------
بالسياره
فهد : غنا انا منزمان ماتكلمت معاج واحس اني اهملتج بس ما ابيج تحطين في بالج اني ممكن اتغير معاج ..
غنا : لا ماحطيت في بالي كذا
فهد : لا بس انا ماشوف غنا الي قبل الي اذا صار لها شي تجي تقولي وماتخبي عني
غنا : مابي ازيد عليك الشغل وانت الحين متزوج واكيد بتكون اغلب الاوقات مشغول
فهد : لا كذا بتزعليني .. صيري كتاب مفتوح مثل قبل أي شي مضايقج قولي لي ولاتكتمين
غنا : ان شاء الله
فهد : طيب مابتقولين لي الحين ليش متضايقة ؟
غنا : متضايقة !! لالا مو متضايقه بس كنت مشتاقه لكم لما تركت البيت و انتوا عارفين اني تعودت عليكم وما اقدر اكون بمكان ثاني بس .
فهد : بس ؟!! والي صار امس مع بنت بوعبد العزيز ؟
غنا استغربت انه وصل لفهد : هبه قالت لك ؟؟
فهد : ماتبيني اعرف ؟
غنا : لا مو عن كذا بس الي صار عادي
فهد : لا بس الي اعرفه ان غنا مهماااا عصبت تمسك اعصابها وماترفع ايدها
غنا : ارفع ايدي !! لا فهد انت تصدق اني ممكن ارفع ايدي على احد ؟
فهد : وهذا الي يخليني مستغرب
غنا مقهوره: صدقني يافهد مارفعت ايدي .. هي كانت راح تضربني وانا مسكت ايدها بس .
فهد : انا عارف بالموقف كله واعرف ان تصرف بنت بوعبدالعزيز مو لايق بس ماكان المفروض تقولين لها انها قليلة ادب
نزلت غنا راسها : اسفه بس ماقدرت امسك نفسي تصرفاتها جريئة ماعجبتني
ضحك فهد على غنا : اوكي انا عارف .. بس انتي لازم تعتذرين لها لان الي سويتيه غلط .
غنا : لاااا ما اقدر هذه ما تستاهل
فهد : بس انتي غلطتي وانا الي اعرفه ان اذا غنا غلطت تعتذر
غنا : بس هم هي غلطت
فهد : تصرفها صحيح مو لايق بس هي كيفها ماعلينا منها اما انتي .. مابيج تعتذرين لها اذا تحسين فيها اهانه خلاص بس اتمنى ان المره الثانيه ماتتصرفين كذا اوكي
ابتسمت غنا : ان شاء الله ..
فهد : يلا وصلنا بسرعة انزلي لاتتأخرين على المحاضر
" فتحت غنا الباب واخذت كتبها .. لكنها نست شنطتها وقفلت الباب .. ومشا فهد وما انتبه ان غنا نست الشنطة لانها كانت تحت "
" لما دخلت غنا الجامعه حست ان في شي ناقص بأيدها "
غنا : اووووه نسيت الشنطة
" لبست عباتها وراحت تركض لكن ماشافت فهد ورجعت .. "
غنا : ياربي نسيت الشنطة وفيها الموبايل وانا ماقلت لفهد اني ما اتصلت بأحد عشان ياخذني وانا ماعندي غير هذه المحاضرة .. خليني احضرها وبعدين اشوف حل .
--------------------------------
اتصل فهد بـيوسف عشان يقوله ان ماله داعي اليوم يجي على الشركة واذا خلص الجامعه يروح البيت ..
يوسف : فهد انا امس لما كنت بشركة كانت الملفات الخاصة بالماحسبة كثيره يعني لازم اجي واشتغل عليها
فهد : انا ما اتصلت فيك الا اني متأكد ان مايحتاج تجي .. خلاص تطمن
يوسف : اوكي خلاص
فهد : انت متى تخلص دوامك ؟
يوسف : خلصت والحين بطلع من الجامعه كنت ناوي اجي الشركة بس خلاص بروح البيت الحين
فهد : ايه صح تذكرت غنا اليوم ماراحت الجامعه مع السواق واخاف ينساها فروح انت واخذها واتصل فيها قبل يمكن بعدها ماخلصت
يوسف : اوكي
" اتصل يوسف بغنا مرتين و3 وماردت طبعا لان الموبايل مو عندها .. "
يوسف : اكيد بعدها ماخلصت اروح البيت بلاول واتصل فيها بعد نص ساعه اشوف اذا خلصت او لا
----------------------
وفعلا بعد نص ساعه طلعت من المحاضره .. وراحت على طول لمكتب الامن عشان تتصل .. وماكنت حافظة
الارقام بس رقم احمد والبيت ..
اتصلت بالبيت بس ماكان في احد .. واتصلت بأحمد لكنه مارد لانه بالمحاضرة
غنا : اكيد بعده في المحاضره ..
" حاولت تتذكر رقم فهد لكن مافي فايده كانت كل مره تغلط بالرقم .
" اما يوسف فكان يحاول يتصل وطبعا ماترد ! "
مشرفة الامن : مو عارفه تتصلين بأحد
غنا بيأس : لا والله
المشرفة : والله حاله طيب انتظري شوي في بنات يبون يتصلون
غنا : ان شاء الله
" طلعت غنا من مكتب الامن وهي xxxxxه موعارفه كيف تتصرف "
غنا : انا ليش ما اروح اتصل بجوالي يمكن يرد علي فهد
" وهم مارد لان الشنطة بعدها بالسياره "
----------------------------
" ترك يوسف مسج انها تتصل فيه بعد ماتخلص المحاضرات وراح ينام شوي لحد ماتتصل فيه "
------------------
الساعه 2 وبعد مارجع احمد من الدوام .. راح يدور على غنا لانه هو يعرف ان ماعندها الا محاضرة وحده الساعه 10ونص
احمد : اكيد نايمه بروح اتغدى واطلع مع ربعي
" كان يوسف نازل من فوق وشاف احمد يتغدى"
احمد : تعال تغدا معاي ما احب اكل لحالي
يوسف يطالع الساعه ويكلم نفسه : معقوله غنا للحين ماخلصت
احمد : شفيك تكلم نفسك
يوسف : انت تدري متى غنا تخلص محا ضراتها ؟
احمد : غنا ؟! ايه الساعه 10 ونص هي بالبيت المفروض .. ليش هي ماجات
يوسف : متأكد ؟
احمد : ايه متأكد
" ما انتظر يوسف رد من احمد وراح على طول اخذ مفاتيحه "
احمد : يوسف شفيك شنو صاير .. ( معقوله غنا بعدها ماجات .. ) وطلع ورا يوسف
يوسف : احمد شوف موبايلك غنا اتصلت فيك ؟
طلع احمد موبايله وتذكر انه كان مغلق ولما فتحه لقى رسايل تنبهه ان في مكالمات وصلت له لما كان مغلق الساعه 10 الصبح
احمد : في مكالمات مارديت عليها بس مو رقم غنا اتوقع من الجامعه
يوسف : انا رايح الجامعه
احمد : اجي معاك
يوسف : لا مع السلامه
" راح يوسف يسرررع بسياره "
------------------
" كانت غنا مو عارفه كيف تتوصل وحست نفسها شوي وتبكي "
غنا : ليش انا كذا ما اعرف اتصرف .. خليني ارجع اتصل بأحمد
" اتصلت غنا بأحمد وعلى طول رد عليها "
غنا : واخيرااااااا
احمد : غنا انتي وينج ؟
غنا : انا بالجامعه
احمد : للحين .. مو انتي تخلصين الساعه 10
غنا : ايه بس نسيت شنطتي بسيارة فهد والموبايل بالشنطة
احمد : يا الله اسف غنا .. جلستي طول الوقت هذا نتظرين
غنا : لا ولايهمك بس خفت انكم ماتردو علي
احمد : لاتخافين .. طيب الحين يوسف جاي بالطريق اطلعي كل شويه شوفيه
" وبعد ربع ساعه وصل يوسف الجامعه وكان ينتظر وخايف .. لما شافته غنا ماتت من الفرح وراحت بسرعه وركبت "
يوسف : سوري غنا تأخرت عليج
غنا : لا مو منك الغلط مني انا انا الي تركت موبايلي .. بس جد كنت خايفه
يوسف : الحمدلله ان ماراحت علي نومه ولا يمكن ما انتبهنا
غنا : توبه المره الثانيه لازم احفظ ارقامكم .
يوسف : ايه هذا المفروض .. لايكون بكيتي ؟
غنا : شايفني بيبي ؟ بس بيني وبينك شوي وكنت ابكي
ضحك يوسف : تبين كلنكس تمسحين دموعج
غنا : قلت لك كنت مو بكيت
يوسف : طيب اكيد جوعانه مو ؟
غنا : كثيــــــــــــــــــر .
يوسف : وليش ماتغديتي بالجامعه ؟
غنا : الحين انا بموت من الخوف تبيني افكر ببطني
يوسف : جبانه
غنا : لو انت مكاني كان خفت
يوسف : هذا الخوف للبنات مو للشباب .. المهم تبيني اشتري لك غدا من المطعم
غنا : لا اذا رحت البيت اتغدى
يوسف : بكيفج انا عرضت عليج وانت حره
غنا : ايه مابي
يوسف: طيب ممكن افهم ليش معصبه .. وبعدين شنو الي عصبج امس .
غنا : امس ؟؟ متى !! ماعصبت
يوسف : ام لما راحوا اهل ناصر
تذكرت غنا : لا لا ماكنت معصبه
يوسف : اكيد .. بس انا متأكد ان كان فيج شي
غنا : انسى .. الا بسألك يوسف
يوسف : سألي
غنا : انت كنت تروح بيت ناصر لما كنت صغير كثير ؟
يوسف : ايه ليش هذا السؤال
غنا : وكنت تلعب معاهم كلهم ؟
يوسف : كلهم ؟ منو كلهم ؟
غنا : ها لا يعني اقصد لا خلاص انسى انسى
يوسف : غناااا شفيج اليوم مو على بعضج
غنا : اسفه يوسف يمكن عشاني تأخرت على البيت صبيت كل غضبي عليك
يوسف : ولايهمج .. بردي قلبج عادي
" جلست غنا تراقب يوسف وتكلم نفسها ( يوسف ليش صار فيني كذا الفتره الي بعدت فيها عن البيت كانت قصيره بس هي الي فتحت قلبي على شي ماكنت اتوقعه ياليت تكرهني وتعاملني مثل قبل "
انتبه يوسف لغنا : في وجهي شي ؟
غنا : ها .. لا بس كنت سرحانه شوي .
ابتسم يوسف : طيب ترى وصلنا البيت وانتي ماحسيتي
غنا : جدددد ؟ " ونزلت على طول وراحت تركض بسرعه دخلت لدرجة ان لما التفت يوسف ماشاف منها الا غبرتها "
يوسف : شفيها غنا هاليومين ؟!!
--------------------------------------
في بيت بو عبد العزيز
" اتصلت ريم بهبه وحددت معاها موعد في مقهى عشان تكلمها في موضوع .. وهبه استأذنت من فهد ووافق "
------------------------
في المقهى
هبه : ليش مو في مكان ثاني بالبيت مثلا
ريم : تذكرين لما قلت لج في موضوع ابي اكلمج فيه ؟
هبه : أيه اذكر
ريم : حبيت اخذ راحتي وبالبيت ماراح اعرف
هبه : طيب اوكي شنو الموضوع ؟
ريم : والله خجلانه اتكلم وخايفه تفهميني غلط
هبه : لا تكلمي ماراح افهمج غلط
ريم : بصراحه .. بيني وبينج انا احب يوسف
هبه انصدمت : تحبين يوسف ؟؟
ريم : اكيد استغربتي وتقولين عني جريئة بس شسوي غصبا عني
هبه : لا مو عن كذا بس ريم انتي شلون تفكرين كذا حتى انتي ماتعرفين اطباعه
ريم : من قال لج .. بس قبل لا اقول لج ابيج توعديني ماتقولين لاي احد حتى زوجج
هبه : سرج في بير صدقيني
ريم : انا واثقه فيج .. المهم لما كنت برا كنا نتواصل انا ويوسف مع بعض بالمسن
هبه مستغربه : جددددددد .
ريم تتصنع الحزن : ايه اهو يعرف كل شي عني وانا نفس الشي
هبه : طيب والحين ؟
ريم : للاسف ولد خالتي النذل خرب السالفه كلها .. جا وتقدم لي وانا لما رفضت اهلي غصبوني عليه ووصلت السالفه ليوسف ومن يومها مايكلمني وزعل مني .
هبه : والحين انتي مرتبطه بولد خالتج .
ريم : لا لاني كلمته بنفسي ولما قلت له انت ماعندك كرامه تتزوج وحده ماتبيك تركني والحين انفصلنا .
هبه : اها طيب وبعدين ؟
ريم : هبه انا مالي غيرج انتي بس الي تقدرين تساعديني
هبه : انا ؟ !!
ريم تبكي بدموع كاذبه : أي انتي ياهبه وربي يعلم اني مالجئت لج الا حاسه انج مثل اختي
هبه : طيب كيف اساعدج
ريم : انا بقولج
----------------------------------
" لما دخلت غنا الصاله وشافت ام فهد واحمد سلمت عليهم وبعد ماطمنوا ان مافيها شي استأذنت عشان تروح غرفتها لكن قبل ماتروح استوقفتها ام فهد "
ام فهد : انتي غبيه كيف كذا للحين بالجامعه وماتعرفين تتصرفين
غنا : كنت ناسيه جوالي بسيارة فهد
ام فهد : طيب مع منو جيتي الحين ؟
غنا : مع يوسف
" الا بدخلة يوسف "
يوسف : معاي يمه انا جبتها
ام يوسف : وليش ماخليت احمد
استغربت غنا ( ليش يعني مو يوسف ؟؟ )
ام فهد : تعال يوسف ابي اكلمك في موضوع
يوسف : اوكي اغسل واجي
ام فهد : انتظرك بالحديقة
-----------------------------------
في الحديقة
ام فهد : يوسف انت تعرف زين ليش انا ساكته عن غنا
يوسف : طيب وبعدين شي حلو وياليت دوم كذا
ام فهد : انا بعد لي شرط عشان اخلي غنا هنا بدون ما اأذيها او اطردها
يوسف : شنو ؟
ام فهد : تبتعد عن غنا خير شر ويكون بينكم بس سلام
هل راح يبتعد يوسف عن غنا مثل ماطلبت منه ام فهد وخصوصا ان هذا هو شرط بقاء غنا .. وكيف راح تبدأ ريم خططها وهل راح تنجح في تنفيذها ... كيف راح تواجه غنا مشاعرها ؟؟
تابعوني في الاجزاء الجايه
انتهى الفصل الرابع عشر لما اشترطت ام فهد على يوسف ان يبتعد عن غنا اذا يبيها تكون معاهم بالبيت
يوسف : يمه بالله هذا شرط تشترطينه .. تبيني ابتعد عن غنا كيف ؟
ام فهد : يمه انا خايفه عليك هذا عشانك انت
يوسف : تخافين علي ؟؟ من شنو ؟
ام فهد : اخاف تتعلق فيها اكثر ..
يوسف : وتعلقي بغنا يخوف للدرجه هذه ؟؟ .. واذا تعلقت فيها وحبيتها وين المشكله انتي شايفه غنا ماتستاهل او بس ماتبين غنا تكون بينا بأي شكل من الاشكال ؟
ام فهد : انت تعرف زين اني ارفض وجود غنا في حياتنا .
يوسف : انتي ترفضينها في حياتج انتي بس .. لو اقدر اعبر بكلمه عبرتها بس انتي امي وانا ماراح اسمح لنفسي اني اغلط على أمي .
ام فهد : غنا شسوت فيك حتى تتكلم بالطريقة هذه ..
يوسف : يا الله من هذه الغنا الي مسوية لج كل هذا القلق .
أم فهد : انت نسيت الاتفاق الي كان بينا .. نسيت انك قلت لي يا اترك غنا بالبيت يا اتزوجها .. واكيد ماراح اوافق على الخيار الثاني .. بس الاتفاق بين 2 لازم يكون عادل وانا هذا شرطي انك تبتعد عنها .
يوسف : يمه انتي مالاحضتي انا شنو كنت اقصد بهذا الاتفاق.
ام فهد : شنو تقصد ؟؟ ..
يوسف : اذا ركزتي على الاتفاق راح تلقين ان بالحالتين كنت اقصد اني اكون معا غنا وتطلبين مني اني ابتعد عنها ؟
تنرزفت ام فهد من يوسف اكثر : يوسف انت حاس بالي تسويه انت قاعد تتحدى امك .. وبعدين انا فكرت زين ولقيت ان غنا لايمكن ترضى فيك كزوج هي تشوفك مثل اخوها راح تتعذب.. بتتعلق فيها اكثر كل ماصارت قدامك وهذا الي مخوفني اكثر ويخليني افكر بجديه اني ابعدها عن البيت .. والحين مافي شي يخليني اتراجع واخليها ماتجلس هنا بالعكس انا ماراح اخسر شي صحيح اني راح أاذيك في البدايه بس هذا لمصلحتك لانك بنهايه بتوعى وبتعرف ان انت وغنا مو مقدرين لبعض وراح تنساها هذا مو حب انت تعلقت فيها وحاس بتأنيب الظمير لان في بالك انك اذيتها .
يوسف : لا يمه انا متأكد من مشاعري .
ام فهد : ومشاعرها هي .. ماراح تقبل فيك ياولدي صدقني
يوسف : و اذا قبلت فيني ؟
ام فهد : اذا قبلت غنا فيك انا ماراح اكون راضيه عليك .
يوسف : واذا قلت لج ان سعادتي مع غنا .
ام فهد : انت حاط في بالك انك راح تكون سعيد معاها بس انا اعرف غنا اكثر منكم كلكم ماحد فاهمها كثري غنا ماراح تحبك في يوم من الايام وبعدين على ما اعتقد انها تحب ولد خالتها طلال .
يوسف : راح اجرب عشان ما اندم
ام فهد : واذا رفضتك ؟ وانا متأكده من هذا الشي
يوسف : وقتها راح اتركها تروح .
ام فهد : كذا انت سهلتها علي .
يوسف : لدرجه هذه واثقه انها بترفضني ؟
ام فهد : ايه والله يعينك
يوسف : بس يمه اصبري شوي لا تطلعينها من البيت انا بنفسي راح ابتعد عنها اذا رفضتني .
---------------------------
هبه : تكلمي ريم اسمعج كيف تبيني اساعدج
ريم : قبل لا اقولج عندي كم سؤال
هبه : شنو ؟؟
ريم : يوسف في حياته احد ؟؟
هبه : والله مادري يوسف غامض ومو واضح .. بس انتي تقولين ان هو يحبج فكيف تبين تشوفين اذا في احد في حياته اول لا
ريم : بشوف اذا نساني او لا ..
هبه : هذه اشيا بسيطه أقدر عليها بس انتي شنو راح تستفيدين ؟؟
ريم : دائما الخطه تبدأ بخطوة صغيييييييييره وتتوسع لحد مانوصل للهدف .
هبه : انتي داهيه ياريم
ريم : هبه يمكن لو مريتي باللي انا فيه يمكن سويتي كذا واكثر .
هبه : ما الومج ..
ريم : طيب هذا الي ابي اعرفه في الوقت الحالي بس هبه اوعديني ماتتركيني ابد .
هبه : اوعدج
ريم : مشكوووووووره هبه .. وسوري اخذتناا السوالف وماطلبت لج شي تشربينه
هبه : خليها علي
ريم : ابدااااا ماحزرتي شنو تشربين .....
-----------------------------
في كندا
" كان جالس بوفهد في المستشفى مع بدر وكان بوفهد تعبان كثير من الروحه والجيه وحتى انه نسى يخذ ادويته .. جلس على الكرسي الي جنب غرفة بدر لان حس بنفسه مو قادر يتحرك وكأنه صاب جسمه الشلل من التعب الي حاس فيه "
" بعد دقايق نادى بدر بوفهد بعد ماصحى من النوم .. "
قام بوفهد وهو حاس بثقل في جسمه وراح عند بدر : نمت زين ؟؟
بدر : أي الحمدلله .. بابا شكلك تعبان
بوفهد : لا شوية تعب بسيط لاتخاف
بدر : طيب انت روح الفندق ارتاح ..
بوفهد : انا مرتاح هنا .. انت عرفت شنو قال الطبيب ؟
بدر : لا شنو قال
بوفهد : بقولك بس مابيك تخاف ولاتحاتي .. انت راح تطول هنا شوي
بدر : جددددد لااااا
بو فهد : لازم تتحمل .. انت ماصار لك 3 ايام من سويت العملية عشان كذا ماراح يقدرون يسون لك عملية ثانيه بسرعه .. انت محتاج تعديل فقارات ( العامود الفقري ) ولازم عمليه بس مثل ماقلت لك مو الحين وانت توك مسوي عملية .
بدر : طيب ليش جيت هنا قبل والاطباء عارفين اني ماراح اقدر اسوي عملية
بوفهد : انت راح تخضع لعلاج فيزيائي قبل
بدر بزعل : اها .. طيب يبه مو لازم انت تجلس معاي انا كبرت وعادي اجلس لحالي انت ارجع السعودية
بوفهد : لا صعبه اتركك لحالك ماراح اتركك
بدر : الله يخليك يبه عشاني انت ارجع .. امي مالها احد غيرك وانت تعبان .. انا صرت رجال اقدر اتصرف لحالي وبعدين هنا معاي الممرضين والاطباء .
بوفهد : راح افكر واذا قررت ارجع ان شاء الله راح اخلي معاك ممرض خاص .
بدر : مايحتاح بس اذا هذا يريحك اوكي مثل ماتبي .
------------------------------------
" لما قام يوسف من عند امه ودخل البيت جلس يفكر في كلامها .. وكانت عينه على غنا الي كات تسولف مع احمد وتضحك وتمزح معاه .. وقال بينه وبين نفسه ( انا لازم اتأكد من مشاعر غنا واذا صحيح الي قالته امي انا لازم ابتعد عن غنا ) "
احمد : شفيك سرحان .. شنو قالت لك امي ؟؟ ها اعترف .
يوسف : شي خاص بيني وبينها .
احمد : اها طيب عندك خبر متى راح يجي ابوي ؟
يوسف : مادري على حسب موعد عملية بدر .
غنا : اوووووف ذكرتني بروح اتصل عليه ماتطمنت عليه .
يوسف : يلا عن اذنكم بروح اتمرن على الحديد صار لي زمان
احمد : والله انك شجعتني اتمرن احس جسمي ضعيف لازم اتمرن .
يوسف : ايه صح انت تحتاج تمارين .
احمد : بجي معاك وعلمني كيف ..
غنا : وانا بعد استأذن بروح انام احس نفسي هلكااااااانه .
احمد ويوسف : نوم العوافي
" الا بدخلة فهد جاي من الشغل "
فهد : غنااا تعالي تعالي
غنا : اوه فهد هلا فهد
فهد : كذا تنسين موبايلج بالسياره وتخلينا نتأخر عليج .. لو صار شي لو سمح الله
يوسف : الحمدلله ان احمد يعرف ممتى تطلع اليوم ولا يمكن مارحت الا لما انتهى دوام الجامعه الرسمي يعني على الساعه 5 تقريبا
فهد : اووووف انتبهي ياغنا مره ثانيه
غنا : اسفه اخر مره ..
فهد : اوكي روحي شكلج تعبتي روحي ريحي
غنا : عن اذنكم
-------------------------------------
" لما كان يوسف يتمرن وكان احمد يراقبه .. حس احمد ان يوسف يرفع الحديد بسرعه مو طبيعيه وحس ان فيه شي "
احمد : يوسف انت فيك شي لا تخبي علي انا فاهمك
يوسف بنفس متقطع : لا مافيني شي بس منزمان ماسويت تمارين والعضلات ضعفت شوي علي عشان كذا ابي ارجعها مثل ماكانت .
احمد : مو علي هذا الكلام .. انت في شي شاغل بالك وانا حاس بهذا الشي من فتره
يوسف : كلامك صحيح بس ما اقدر اقوله مو وقته بس قريب بتعرف .. لما اتأكد من شي
احمد : انت بئر اللغاز
يوسف : بتعرف قريب لا تستعجل ..
احمد : ماراح اضغط عليك .. بس اذا حسيت انك محتاج تتكلم مع احد مستعد اني اسمعك واشي لمعاك همك .
يوسف : فديت احمداني انا تسلم .
احمد : احم احم انت تعرفني اني سبع وقت الشدايد
يوسف يضحك بسخرية : اما انت اذا جيت تمدح نفسك ماحد يغلبك .. دااااااااااااااهيه
احمد : الثقه ياخوي ..
يوسف : اخاف ينقلب غرور يقولك المثل بين الغرور والثقة شعره .
احمد : احمد ماراح يقطع هذه الشعره .
يوسف : ههههه لاتخاف انت بعيد عن الغرور
احمد : أي كذا تسنع .
" مسك يوسف حديد وضافه على الحديد الي كان رافعه احمد "
يوسف : كذا اذا بتتمرن مو حاط لي 3 كيلو ماينفع صرت كأنك بنت تسوي تمارين
احمد : اخخخخخ ذبحتني ياخوي شوي شوي علي .
لكن يوسف مارد عليه وماخلاه يقلل عدد الكيلوات
--------------------------------
" رجعت هبه من عند ريم وكانت تفكر في الي كان بين ريم ويوسف ومثل ماوصفته ريم الي كان بينهم حب كبير بس في شي اقوى منهم فرقهم .. فقررت عشان ريم ويوسف انها تساعدهم "
فهد : هبه ... هبه
هبه : هلا
فهد : وين كنتي ؟
هبه : كنت بالمقهى وانا قلت لك
ضحك فهد : اقصد وين سرحانه ؟؟
هبه : لا مو سرحانه بس ريم قالت لي سالفه وعورت قلبي بس .
" طبعا فهد ما سألها لانه ماتهمه هذه الامور ومايحب يتدخل او يتكلم في امور ماتخصه "
فهد : اها .. طيب انا افكر نروح بكرا نزور اهلج منزمان مارحت شفتهم
هبه : وانا بعد كنت راح اقولك
فهد : خلاص بكرا نروح
هبه : بقول لامي تحسبنا في الغدا ..
فهد : لا مايحتاج تكلفين عليهم
هبه : تبي امي تزعل منا ..
فهد : لا كل شي ولا تزعل عمتي خلاص مثل ماتشوفين ..
هبه ( ماراح اسأل فهد انا لازم اسأل خالتي فهد ماراح يعطيني أي اجابه )
-------------------------------------
" كانت ام فهد سرحانه في الكلام الي قاله يوسف وحست نفسها انها في دوامه مو عارفه كيف تطلع منها .. هذا كان اخر شي تتوقعه ان يوسف يحب غنا والاكثر من كذا انه ناوي يتقدم لها .. فقررت انها تحاول قد ماتقدر انها تخلي غنا ترفض يوسف حتى لو اضطرت انها تترجى لغنا وبكذا ماراح تخسر ولدها وماراح يكون مع غنا "
--------------------
" لما كانت غنا تحاول تنام كانت الافكار تغلب عيونها .. قامت من السرير وراحت فتحت العلبه الي عطاها يوسف وافتحتها بهدوء وطلعت العقد وسرحت في يوسف
غنا ( انا ليش على طول افكر فيك ؟؟ .. ليش ياغنا تفكرين في يوسف بالطريقة هذه لييييييش ؟؟وانت يايوسف ليش تخليني افكر فيك ليش عاملتني بطريقة تختلف عن احمد وفهد ليش كل المواقف الي كانت معاك مطبوعه بذاكرتي وما أقدر انسى أي لحضة قضيتها معاك .. اخاف هذا الشعور يكبر بداخلي واتحطم اكثر من أي وقت تحطمت فيه .. اخاف اتعلق فيك وبعدها ما اقدر ابعد عنك .. واكثر شي خايفه ان تكون في بنت في حياتك غيري.. )
" وتذكرت غنا ان في اكثر من مره لمح لها يوسف ان في بنت في حياته .. "
غنا ( لازم ابعدك عن قلبي قد ما اقدر يايوسف .. بس انتظر رجوع بدر وراح اترك البيت ما اقدر اشوف وحده تاخذك مني قدام عيوني بس بعد ما اعرف منو هذه ؟؟ !! )
غنا : انا لازم اسأله بنفسي وبطريقة اخليه مايفهمني فيها .
-------------------------
بعد صلاة المغرب
" نزلت هبه بعد ما غفا فهد عند ام فهد وجلست تسولف معاها وتحاول تسحب الكلام من ام فهد "
هبه : خالتي وافقتي على بعثة احمد ؟
ام فهد : أي وافقت بس الله يساعد قلبي على فراقه بس هذا مستقبله ماراح اوقف في وجه مستقبله .
هبه : طيب ويوسف هذه اخر سنه له صح
ام فهد : ايه وبعدها بيمسك الشغل مع فهد ..
هبه : اها وماتفكرين تخطبين له الحين ؟
ام فهد تذكرت كلام يوسف عن غنا : مو الحين لما يخلص دراسته .
هبه : مامره فتح معاج الموضوع ؟
ام فهد : لا مامره
هبه : اكيد مافي بنت في حياته ولا كان قال لج
ام فهد : للاسف في بنت في حياته بس اتمنى ينساها خايفه انه ماراح يقدر ينساها
هبه ( مساكين يايوسف وريم ) : ومنو هذه البنت ؟؟
ام فهد : مابي اجيب طاريها .. خلاص غيري الموضوع امج شخبارها صار لي فتره مالكمتها
هبه : الحمدلله تسلم عليج .. بكرا انا وفهد راح نتغدى عندهم كلمتهم قبل شوي
ام فهد : سلمي عليها كثييييير نايبه عني
هبه : يوصل
" لكن هبه قالت بينها وبين نفسها لازم تعرف منو هذه البنت الي كانت تقصدها وتمنت انها مازالت ريم "
----------------------------
" طلعت غنا من غرفتها بعد ماخلصت كتابة المحاضرات وبعد ماراجعتهم وشافت يوسف طالع من غرفته وكان لابس عشان يطلع وكانت غنا ناويه تكلمه بس لما شافته بيطلع تراجعت وتوجهت للدرج عشان تنزل تحت وتجلس مع هبه وام فهد "
يوسف : غنا
التفتت عليه وماقدرت تحط عيونها بعيونه وكانت تطالع فوق وكأنها خايفه يقرا الي في عيونها
يوسف يطالع السقف : في الشي في السقف ؟؟
غنا : لا لا مافي شي
يوسف : انا ادري عنج ليش عيونج فوق
غنا : لا مو فوق شوفها بوجهي ..
ضحك يوسف : انتي هاليومين متغيره صايره بسرعه تتنرفزين ..
غنا : حتى انا مادري ليش ؟
يوسف : ماتدرين ؟؟ ... يمكن بسبب بدر؟
غنا بعفويه وبدون ماتفكر : لا انت السبب
يوسف مستغرب : انا السبب ؟؟ ليش سويت شي وانا مادري ؟
غنا : ها لا انا قلت انت السبب .. ( وضحكت ضحكه مصطنعه من الاحراج ) لا اقصد انت الي ماخليتني اروح عنده
يوسف : انا ؟؟!! انا قلت لج لاتروحين مع بدر ؟
غنا توترت وحمر وجهها من الربكه : لا اقصد انت ماخليتني اروح لام بدر والحين احاتيها ..
يوسف : غنا انتي مو هذا الي معصبج في شي ثاني بس مادري شنو انتي بس الي تعرفينه .
غنا : طيب اخرتك على طلعتك روح لا تتأخر .
يوسف : مستعد اترك طلعتي واجلس معاج اذا تبين تتكلمين وتقولين الي في خاطرج .
غنا : لا لا مافي شي خلاص انت روح بعدين انا مقابلتك 24 ساعه أي وقت ابي اتكلم فيه معاك بتكلم لحد ماتمل مني
يوسف : منو يقدر يمل منج
غنا تغيرت ملامحها وكان يغلب على ملامحها الاستنكار لكلام يوسف
" ماكانت تتمنى يعاملها بالطريقه هذه او يتكلم معاها بالاسلوب هذا لانها خايفه تزيد مشاعرها اتجاهه "
" لكنها ماكانت عارفه ان بتغير ملامحها كانت تزعج يوسف ؟؟!!!!! "
يوسف : كلامي زعلج ؟؟
غنا : ها لالا انت شنو قلت عشان ازعل ..
يوسف منزعج : اوكي انا بطلع
غنا : يوسف انا زعلتك ؟
يوسف : انتي تشوفين نفسك قلتي او سويتي شي يزعل
غنا : مادري .. اممم لا
يوسف : خلاص يعني مافي شي
غنا : طيب يلا مع السلامه وربي يحفظك من كل شر
ابتسم يوسف : أي كذا ادعي لي
" ولما عطاها ظهره تلاشت ابتسامته بسبب ملامح غنا الي انرسمت على وجهها قبل شوي .. وماكانت غنا احسن منه كانت تراقبه لحد ما اختفى من ناظرها .. بعدها كملت طريقها ونزلت تحت .. "
غنا : مساء الخير
هبه : مساء النور
لما شافت غنا ام فهد ماردت : مساء الخير يمه
ام فهد من غير نفس : مساء الخير ..
لما حست غنا انها مو مرحب فيها : ممكن اجلس معاكم ؟؟
ام فهد : هه ومن متى هذا ؟؟
غنا : مادري قلت يمكن راح تقومون
ام فهد : جلسي مع هبه انا راح اروح انام احس ضغطي ارتفع ..
غنا ( ليش صرتي تكرهيني اكثر من قبل ماكنتي كذا ) : لا يمه انتي اجلسي انا راح اروح
ام فهد : انا قلت لج شي ؟؟ ليش تتبلين علي
هبه : صحيح خالتي ماقالت منج
غنا : لا ما اقصد اسفه يمه
ام فهد : انا بروح غرفتي اجلسي مع هبه
هبه : لا انا راح اروح فوق يمكن فهد يصحى ويحتاجني في شي
" حست غنا بقهر وحست نفسها منبوذه وان وجودها في هذا البيت انتهـــــــــــى ومالها داعي تجلس فيه خصوصا ان فهد تزوج .. واحمد راح يدرس برا .. ويوسف ...؟؟ هذا املها الوحيد بس اذا خاب ضنها فيه ابد ماراح يكون لها وجود "
غنا ماقدرت تمسك دموعها :احس نفسي مخنوقه .. ( يمـــــه يبه وينكم ؟؟ )
" ولما حست نفسها انها مو قادره تتنفس من القهر طلعت برا الحديقة .. وجلست تحت المضله على الطاوله تبكي بحرقة .. ومن كثر مابكت غلبها النوم ونامت على الطاولة "
--------------------------
" يوسف كان رايح يشتري ادوات وملابس عشان الرياضه .. ولما حس نفسه ان مايبي يرجع البيت ويجلس يفكر ويتعب عقله من التفكير اتصل بناصر وعزمه على عشا في مطعم "
في المطعم
ناصر : يوسف اشوف عضلاتك ارتخو
يوسف : حتى انت انتبهت
ناصر : مو كثير بس مو مثل قبل
يوسف : عشان كذا رحت اليوم وجددت بعض ادات الرياضه ..
ناصر : انت اهملت التمارين عشان كذا
يوسف : تدري دراسه وشغل و...
ناصر : وشنو
يوسف : لا يعني اقصد اشيا كثيره ماتخلي لي فرصه اقوم بتماريني
ناصر : بعدك تفكر في الموضوع الي قلتي لي عليه لما كنا في دبي ؟
يوسف : هذا اكثر شي شاغلني
ناصر : انت بصراحه مو عارف كيف تتصرف
يوسف : تكفى اذا عندك حل قولي ..
ناصر : انت ما بينت لها مو ؟
يوسف : احاول بس ما اقدر
ناصر : يوسف انت كيف تبيها تحس فيك وانت مو قادر تعبر لها عن مشاعرك .. ماراح تفهم انت لا تنسى انك عايش معاها بالبيت وهذا الشي لازم يترك بداخلها مخاوف حتى لو لمحت لها ماراح تفهم يمكن تفهمها بطريقه ثانيه انت لازم تبين لها ..
يوسف : اذا شفتها يتلاشى كل تفكيري ماعرف كيف اتصرف
ناصر : اضغط على نفسك قد ما تقدر
يوسف : بحاول ياناصر
ناصر : المهم تراني ميت جوع ولا غيرت رايك
يوسف : لا افا عليك اطلب كل الي نفسك فيه
-------------------------------
بعد العشا وصل يوسف ناصر البيت ورجع لبيتهم
" لما دخل يوسف ما انتبه لغنا الي كانت نايمه بس نبهه صوت الكرسي الي طاح لما حركت غنا يدها ورمته .. وبعد مارمته هي انتبهت بعد "
يوسف : غنا ؟؟!! ليش نايمه هنا ؟
فزعت غنا لما سمعت صوت يوسف
" قرب يوسف لغنا وحس ان فيها شي وكانت باكيه "
يوسف بخوف : غنا فيج شي ؟
غنا : اا لالا مامافيني شي
" سحب يوسف غنا وجلسها على الكرسي وسحب له كرسي وجلس جنبها "
يوسف : غنا تقدرين تكذبين على الكل الا انا .. ليش كنتي تبكين؟؟ .. وليش نمتي هنا.. الحين تقولين لي
غنا : مشتاقه لبدر ابي اشوفه
يوسف : يمكن يكون من الاسباب بس مو السبب الوحيد ..
غنا : مادري بس هاليومين صايره حساسه لاتهتم
يوسف : لا ياغنا مو يوسف الي يترك غنا تزعل وتتضايق ..
نزلت غنا راسها( لا يايوسف انت ماتدري انك بمعاملتك هذه تعلقني فيك اكثر ) : خايفه
يوسف ماقدر يتحمل يشوف الخوف هذا بعيون غنا : غنا لاتنزلين راسج وانتي تكلميني .. وبعدين قولي لي من شنو خايفه ؟
نزلت دمعه من عينها ورفعت راسها : خايفه يجي اليوم الي افتح عيوني ما الاقي فيه احد واقف جنبي .
يوسف : وليش تقولين هذا الكلام شنو الي يخليج تفكرين بهذا الكلام ..
غنا : قلت لك صايره حساسه بهاليومين .. وخايفه على بدر مابي افقده ..
مسح يوسف دمعة غنا : لو العالم كله يتخلى عنج انا ماراح اتخلى عنج
" حست غنا انها ملكت العالم كله بالكلمه هذه بس لازال الخوف يختلط مع مشاعرها "
نزلت غنا راسها وهي خايفه عيونها تفضحها
يوسف : شيلي هذه الوساويس من راسج وقومي نامي بغرفتج ..
غنا : ان شاء الله
" ولما دخلو وكل واحد كان متوجه لغرفته "
غنا : يوسف
التفت يوسف عليها بدون مايتكلم
غنا : شكرا
ابتسم يوسف : لاتشكريني مابينا رسميات
" دخلت غنا الغرفه وحطت راسها على المخده وسرحت بأفكارها حست براحه داخلها .. وكانت كلمة يوسف تتردد على مسمعها وتهديها كل ماحست بخوف .. كلمة يوسف صارت المسكن لالم غنا وزعلها .. "
--------------------------------
في ايطاليا
كان طلال يفكر في غنا وينتظر اليوم الي يستلم فيه الشهاده عشان يروح يتقدم لغنا .. وقطع حبل افكاره صوت مروى وهي تناديه
طلال : خير خير يامزعجه
مروى : امي اليوم قالت لي خبر فرحني قلت بتأكد منه بنفسي
طلال : وشنو الخبر ؟
مروى : صحيح انت اذا خلصت دراستك راح تتقدم لغنا
طلال : ايه صحيح وانتظر هذا اليوم على احر من الجمر
مروى : بس انت مو خايف انها ترفضك
طلال : وليش ترفضني ؟؟
مروى : بس هي ماتحبك
طلال : هي قالت لي انها ماتفكر في شي الحين واهم شي دراستها يعني مافي احد شاغل باله .. وانا ماراح اخليها تترك دراستها وراح انفذ لها كل الي تبيه ..
مروى : انت متفائل كثير
طلال : ليش ماتبيني اتفائل
مروى : بالعكس وانا راح اوقف معاك واخليها تحبك غصبا عنها
طلال : هههههه ياحليلج يامروى ..
----------------------
في الصبح
" فكر بوفهد في كلام بدر زين ولقى انه معاه حق .. فوصى ممرض خاص ان يدير باله على بدر ورجع السعودية "
-----------------
في الجامعه
" اتصلت مروى بغنا "
غنا : مرووى هلا والله
مروى : افا عليج ياغنا كذا تنسيني وماتتصلين فيني ؟ وماتسألين عنا حتى امي زعلانه منج
غنا : اسفه يامروى بسبب ظروف صارت لي .. انا كنت من فتره حابه اكلم خالتي بموضوع بس مو عارفه كيف اقول لها
مروى : غنا خوفتيني أي موضوع في شي جديد صاير ؟
غنا : لا بالعكس يفرح بس كنت محتاجه وقت ..
مروى : حمستني قولي لي .
غنا : لا لازم اكلم خالتي بنفسي
مروى : اوكي ببنتظر شورانا .. المهم حبيت اتصل عليج واسأل عن اخبارج
غنا : مشتاقه لكم مووووووووووووووت .. بذات انتي وخالتي
مروى : وطلال ؟؟
غنا : كلكم .. كيفه طلال وكيف خلود ؟
مروى : خلود فرحان عشان احمد راح يجي يدرس معاه
غنا : وانتي مو فرحانه بعد
مروى : غنووو بذبحج
غنا : ادري ان اخوي ينحب
مروى : لاتغترين بأخوج .. اصلا يابخته اذا فكرت فيه
غنا : ياربي انتوا اكثر 2 لايقين على بعض
مروى : كيف يعني ؟
غنا : ياكثر ماتمدحون نفسكم
ضحكت مروى : لا ياعمري هذه ثقة .
غنا : ابد احمد الي يتكلم معاي مو مروى
مروى : طيب ياغنا طلال موصيني اسلم عليج كثييييييييييييييييير كثير .
غنا : الله يسلمج ويسلمه ..
مروى : يلا عن اذنج وترا انتظر الخبر السعيد
غنا : ههههه فضوليه بشكل
مروى : يلا مع السلامه
غنا :مع الف سلامه ولاتسين تسلمين على خالتي
مروى : وطلال ماله سلام منج
غنا : سلمي عليهم كلهم واحد واحد وبوسي خالتي عني
" بس قفلت من عندها مروى الا دق موبايلها مره ثانيه وكان من ... يوسف !! "
" لما شافت غنا اسم المتصل " يوسف " حست بأحساس غريب ودقات قلبها تتسارع لدرجة ان وجهها حمر والتفتت على الي حوالينها وكأنها خايفه يحسون فيها .. "
غنا بصوت مبحوح : هلا يوسف
يوسف : هلا غنا .. حبيت اتطمن عليج امس نمتي وانتي زعلانه
غنا فرحت : تطمن مافيني شي
يوسف : طيب مع منو راح ترجعين ؟
غنا : مع السواق
يوسف : لا انا راح امر اخذج متى تخلصين
غنا : لا مايحتاج لاتكلف على نفسك
يوسف : بلا كلام فاضي متى تخلصين
غنا : باقي عندي محاضره بعد شوي تبدأ وتخلص بعد ساعتين
يوسف : اوكي بعد ساعتين بمرج
-----------------------
في بيت بو عبد العزيز
" كان ناصر تعبان شوي فأستأذن من فهد بعد الحاح من امه عشان ياخذ اجازه ويريح في البيت ليوم واحد بس .. وبعد ما اخذ له مسكن نزل تحت وجلس جنب امه "
ام عبد العزيز : ارتحت يمه ؟
ناصر : الحمدلله احسن اصلا كانت كلها حراره بسيطه بس انتي وخوفج الزايد
ام عبدالعزيز : قلب الام
ناصر : الله يخليج لي
ام عبد العزيز : ناصر في موضوع حبيت اكلم فيه من فتره .
ناصر : خير يمه
ام عبد العزيز : خير خير .. انت ماتفكر تتزوج
تنهد ناصر وعلى طول طالع رجله : لا يمه ما افكر
انتبهت له : عشان اعاقتك يعني ؟
ناصر : مابي اضلم بنت الناس معاي
ام عبد العزيز : ليش تفكر بالطريقة هذه انت تقدر تمشي
كل امور حياتك فليش تكون اعاقتك سبب
ناصر : يمه منو البنت الي راح ترضى فيني
أم عبد العزيز : فيه .. انا مافاتحتك بالموضوع الا لما تأكدت من اخلاق البنت الي حطيتها براسي وانا متأكده لو بترفضك مو عشان اعاقتك .. بنت واعيه وذكية
ناصر : اشوفج حبيتها
ام عبد العزيز : هي مو بعيده عنا انت تعرفها
ناصر : اعرفها .. منو ؟؟ بنات خالتي؟ لايمكن يرضون ..
ام عبد العزيز : لالا مو بنات اختي .. اخت صاحبك
ناصر : أي صاحب ؟
ام عبد العزيز : غنا بنت عم يوسف صاحبك
ناصر ( غنا ؟؟ بنت عم يوسف البنت الي يحبها يوسف) : لأ هذه البنت لأ شيليها من بالج نهائيا
استغربت ام عبد العزيز : ليش انت سامع عنها شي ؟؟ فيها شي ؟
ناصر : البنت مافيها شي بس ولا سامع عنها شي بس انتي انسيها .
ام عبد العزيز : مايصير تقولي ما ابيها بدون سبب لازم اعرف سبب رفضك
ناصر : يمه عندي اسبابي وهذا رايي ماراح اتراجع عنه .
" راح ناصر غرفته عشان ماتلح عليه امه .. "
" شوي الا بدخلة ريم "
ريم : هلا ماما
ام عبد العزيز ببرود : هلا يمه
ريم : شفيها ام عبد العزيز متضايقة ؟
ام عبد العزيز : ناصر
ريم : ناصر وشنو مسوي هذا المعقد
ام عبد العزيز : اياني وياج اسمع هذه الكمله منج يكفيه الي فيه ..
ريم : اسفه ماما ماكان قصدي " وراحت باست راسها " لاتزعلين مني قولي لي شنو فيه نصور
ام عبد العزيز : كلمته في موضوع الزواج وكالعاده يحط اعاقته عذر
ريم : معاه حق مافي بنت راح تقبل فيه
عصبت مره ثانيه : هذا كلام تقولينه على اخوج .. ليش هو شنو ناقصه ترا يقدر يدير امور حياته كلها بسهوله وهذا هو عايش حياته افضل مايكون ..
ريم : طيب انتي اذا لقيتي البنت الي ترضى فيه كلميه موتجين فجأه وتقولين له تزوج
ام عبد العزيز : بس انا اخترت له البنت ومتأكده اذا رفضته فمو لاعاقته
ريم : ومنو هذه البنت ألي واثقه فيها ..
ام عبد العزيز : غنا
ريم تغيرت ملامحها : غناااااااااااا ؟ لالا يؤ من حقه يرفضها ونص
ام عبد العزيز : انتوا شنو فيكم عليها .. ابي اعرف سامعين عنها شي ؟؟
ريم : لا بس ثقالة دم ومسويه نفسها البنت المثاليه
ام عبدالعزيز : وهذا سبب .. هه هذا سببج انتي بس ناصر لأ
ريم : تبيني اكلمه ؟
ام عبد العزيز : جربي يمكن تفهمين منه السبب
" راحت ريم ودقت الباب ودخلت "
ريم : ناصر ممكن اتكلم معاك شوي ؟
ناصر : اذا بتكلميني في الموضوع الي كلمتني فيه امي .. لأ وانسوه خير شر
ريم : مايصير ترفض بدون سبب .. انا شوف بصراحه من جهتي ما الومك ثقيلة دم ومسويه مثاليه لا ومغروره ومتكبره خلك خلك على قرارك
ناصر : الله يعطيج نعمة العقل .. مو الاسباب الي قلتيها تخليني ارفضها
ريم : ليش اجل سامع عنها شي ؟
ناصر : لا هذه بنت بوفهد مايعيبها شي ..
ريم : طيب شنو السبب
ناصر : اذا مصره تعرفين انا اقولج .. لايمكن افكر اني اتقدم للبنت الي يحبها اعز صديق لي
تغيرت ملامح ريم وسألت بسرعه وبدون تفكير : منو ؟؟ يوسف ؟
ناصر : مايخصج منو واتركيني الحين
" طلعت ريم من الغرفه وكانت مصدومة .. بس ما استسلمت وراحت تتصل على هبه عشان تتأكد منها "
----------------------------
بعد ماخلصت غنا من المحاضرة اتصلت بيوسف عشان ياخذها مثل ماتفق معاها
بالسياره :
يوسف : غنا كنت احاتيج امس تراني للحين ماعرفت منو شنو زعلانه
غنا : لا تحاتي ولا شي انا عن نفسي ما ادري احيانا لشي سخيف اصير حساسه وابكي
يوسف : امي مو ؟
غنا : لا امي مالها دخل ..
يوسف : اكيد ؟؟
غنا : اكيد
يوسف : بس انا عارف امي وخصوصا بعد ماكلمتها امس متأكد انها ضايقتج لو بكلمة صح ولا غلطان
غنا : ليش يوسف انت شنو قلت لها انت محيريني اخاف قايل لها شي يزعلها منك بسببي مابي اكون السبب في زعل امك وانا قلت لك هذا الكلام من قبل
يوسف : الي قلت لها مو صعب ولا يأذيها بس هي الي حاطه براسها انه هو شي كبير
غنا : يوسف امي متضايقه بسبب وجودي وانا عارفه هذا الشي .. وانا ماتركت البيت عشانكم انتوا بس اذا وجودي راح يخلي امي تزعل منكم وماتكون راضيه عليكم .. انا راح اترك البيت حتى لو زعلتوا مني .
يوسف :اذا انتي تقدرين تبعدين عنا انا ما اقدر اخليج تبعدين عني .
" تفاجئت غنا من كلام يوسف وحست بدقات قلبها تتسارع وماعرفت ترد .. اربكتها كلمته ..
غمضت غنا عيونها ( معقوله يوسف يبادلني نفس الشعور ولا انا اتصور .. او انا انتظر منه شي يبين لي واحلل كلامه بكيفي .. يا الله جد مو عارفه )
يوسف : غنا وين رحتي .. كلامي يضايقج ؟؟ اذا انا ما اهمج اتركي البيت يمكن وقتها انا ارتاح
غنا : يوسف انت شنو قاعد تقول .. انت ماتهمني ؟؟ هذه مو اول مره تقولي مثل هذا الكلام انت مو قادر تفهمني
يوسف : لا ياغنا انا اكثر واحد يفهمج .. بس في شي هو الوحيد الي معتم ومو قادر افهمه
غنا : قول يايوسف مو يمكن تلقى اجابه
يوسف : انا شنو اعني لج ؟؟
غنا تفكر بخوف ( يوسف فهمني ؟؟ حس بشي ؟؟ عيوني وتصرفاتي وضحت له شي ؟ .. ما اقدر اقوله الحقيقه صعب صعب قبل لا اعرف انا شنو اعني له )
يوسف : ماتقدرين تجاوبنيني
غنا عشان تتهرب : انت تعني لي فهد وتعني لي احمد انت اخوي انا عندي 3 اخوان انت وفهد واحمد
يوسف : بس لا تكملين .. انا غبي الي حلمت بشي ماراح يصير وتحديت امي فيه بس كان معاها حق
غنا متفاجئة : يوسف !! ليش زعلت قلت شي غلط
يوسف : وصلنا البيت انزلي
غنا : يوسف مو قبل لا اعرف انت ليش زعلان
يوسف : يهمج
غنا : اووووووف منك خلاص تعبت وانا اوضح لك ..
" ونزلت من السياره وقفلت الباب بقوه وراحت تركض لغرفتها .. لكن قبل لا تدخل نادتها هبه وقالت تبي تكلمها في موضوع "
غنا : هبه ممكن نتكلم بعدين راسي يعورني شوي
هبه : ماراح اخذ من وقتج كثير
غنا : اوكي تعالي نجلس بغرفتي
هبه : الموضوع الي بكلمج فيه يخص يوسف
غنا : خير شفيه يوسف
هبه : مادري اذا تعرفين عنه وعن البنت الي يحبها
غنا : يوسف ؟؟!!
هبه : شكلج ماتدرين وبصراحه انا حابه اساعد يوسف واكيد انتي بتساعدينه معاي
غنا : كملي ياهبه
هبه : يوسف وريم كانوا يحبون بعض
" انصدمت غنا بشكل كبيــــــــــــــــــر وماكانت قادره تستوعب الي سمعته اكيد هذا حلم او لا مو حلم كابوس .. "
غنا بعصبيه : انتي من وين جبتي هذا الكلام
هبه : انتي نسيتي الموقف الي صار قبل كم يوم لما ريم جات وماعجبتك انها كلمت يوسف
غنا : ايه اذكر وبعدين
هبه : انا كلمت ريم وقلت لها ان لي سوته عيب فقالت لي انها من غير شعور راحت وكلمته لان الي كان بينهم مو بسيط .. كانت متواصله معاه حتى لما سافرت وتعلقوا في بعض بس بسبب ولد خالتها الي تقدم لها وغصبوها اهلها عليه زعل يوسف ولما تركها خطيبها حاولت تتصالح معاه وماقدرت والحين الاثنين متعذبين
كيف راح تستقبل غنا هذا الخبر القاسي .. وشنو ردة فعلها اتجاه الموقف .. واما يوسف فكيف راح يتصرف بعد مايأس من غنا وكل مره يسمع منها تفس الرد ..
تابعوا معاي الجزء القادم
#42