الفصل 10
الفصل العاشر
انتهى الفصل السابق لما يوسف كان يكلم بدر
كان يوسف مصدوم بعد ماتعرف على بدر .. وارتبك في الكلام معاه
يوسف : انت بدر ولد عمي عبدالله ؟؟!!.. يعني انت ولد اخو عبد العزيز <<< اسم بوفهد ولا انت غلطان وتبي رقم ثاني ؟
بدر : انت مو فهد صح ؟
يوسف ( اممم خليني امشي معاه بالكلام وافهم ): الا انا فهد .. شنو بغيت يابدر ؟
بدر : توقعت انك كنت تمزح معاي ..
يوسف : أي كنت امزح معاك ..
بدر : قالك بابا ان راح نجي نسكن هنا بنفس منطقتكم ؟؟
يوسف مو فاهم شي : لحضه بدر.. بابا مين ؟؟ ( يكون عمي حي ؟!! وغنا ؟؟ اذا عمي حي غنا معانا ليش ؟؟.. خاف للحضه انها ممكن تكون اخته من ابوه .. وهو خبا عليهم؟؟ بس ليش يخبي عليهم ان عمه حي بس عشان يخبي زواجه مو منطق )
بدر : فهد انت فيك شي ؟ زعلان مني ؟
يوسف : لا بدر .. بس ضيعني الشغل .. بدر انت عندك اخت اسمها غنا ؟!!
بدر : فهد شفيك غنا اختك انت مو اختي انا
يوسف : بدر انت فهمت سؤالي .. انت تعرف غنا ؟؟
بدر :أي غنا بنت عمي الي اهي اختك شفتها مره بس لما كنا بالمستشفى
يوسف : بدر انت مستوعب شنو تقول
بدر : فهد انت شنو فيك .. انت ماتدري انها اختك ؟؟ امي قالت لي غنا تصير بنت عمك عبدالعزيز
" يوسف قفل السماعه من بعد الصدمة .. غنا اختي ؟؟!! ... يعني الي توقعته صحيح ؟؟"
" اما بدر استغرب من تصرفات فهد .. وراح على طول وقال لامه "
-------------------------------
ام بدر : بس فهد سافر اليوم .
بدر انصدم : اجل منو الي كلمني ..
ام بدر : اكيد احد من اخوانه يوسف او احمد .. يمه ليش ما انتبهت وانت قلت له كل شي
بدر : شكيت بس الصوت صوت فهد .. بس قلت له ان راح نسكن في منطقتهم ..
وسألني عن غنا ضحكني قال غنا اختك ؟؟ قلت له لا غنا اختك انت
ام بدر : لأ يابدر ( يا الله انت شنو شويت )
بدر: ليش انا غلطت غنا مو اختهم ؟؟
ام بدر : انا لازم اكلم بو فهد
-------------------
" حاول يوسف يتصل بفهد عشان يفهم كل شي ومايتسرع .. لكن فهد كان موبايله مغلق .. ويوسف كان على اعصابه .. كيف ممكن غنا تكون اخته؟؟ .. للحضه كان راح يستخف مو قادر يستوعب الي سمعه .. اختلطت الامور في راسه .. اذا عمه حي ؟!! ليش يخبي عليهم ابوه . ممكن عشان يكذب على امي من زواجه من ام غنا .. وضحك على نفسه ان يفكر مثل هذا التفكير يدعي وفاة عمه عشان زوجة ثانيه .. بس لحضة انا ليش فكرت ان عمي حي .. اف جد مو عارف اربط الامور انا لازم اكلم ابوي "
-----------------------
" اتصلت ام بدر على بو فهد وقالت له الي صار بالظبط .. وتأكد بو فهد ان ألي كلمه بدر هو يوسف ومو فهد "
--------------
" طلع يوسف من الشركة وترك كل شغله عشان يروح ويكلم ابوه ويفهم كل شي .. "
بالسياره
" اتصل بوفهد على يوسف اول ماقفلت عنه ام بدر "
يوسف : ابوي ؟!! ... هلا يبه
بوفهد : هلا فيك .. يوسف لاتجي البيت روح مطعم( ......) وانا بجيك
يوسف : ليش في شي ؟
بوفهد : في موضوع ابي تكلم معاك فيه
يوسف : .. انا بعد محتاج نروح مكان هادئ نتكلم فيه
على طول فهم بو فهد شنو يقصد : خلاص انا جاي الحين
---------------------
" وصل يوسف المطعم قبل بوفهد وكان على اعصابه والخوف ان غنا تكون اخته فعلا هذا الي يخليه يتوتر اكثر واكثر .. وحس ان الدقيقة تمر مثل الساعه ... وبعد ربع ساعه وصل بو فهد "
يوسف : واخيرا .. " وأشر على ابوه "
بوفهد : انت كنت قريب
يوسف : أي أي
بوفهد : مستعجل ؟
يوسف: يبه ابيك تفهمني كل شي الحين ..
بوفهد : اهدأ يايوسف
يوسف: لا ماراح اهدأ الا لما اعرف
بوفهد : اسمعني انت راح افهمك كل شي
يوسف : اسمعك يبه ... بس انت كيف عرفت في شنو ابي اكلمك ؟؟
بوفهد : كيف عرفت هذا مو مهم ..
يوسف : طيب كذا كل شي صار بالصوره وانا بسمعك الحين .. غنا اختي او بنت عمي ؟
بوفهد: لا تستعجل يايوسف اصبر
حاول يوسف يهدأ نفسه شوي : اسف يبه اسمعك
بوفهد : الي كلمك بالتلفون هذا بدر ولد عمك عبدالله
يوسف : عارف .. بس شلون غنا عايشه معانا وبدر لا هذا الي مو قادر استوعبه .. او عمي حي وغنا اختنا من زوجه ثانيه
ضحك بوفهد على تفسير يوسف : غنا وبدر اخوان والاثنين عيال عمك عبدالله
يوسف حس براحه وكان هذا اهم شي حب يستوعبه : يعني غنا مو اختي ؟؟
بوفهد : بدر قالك انها اختك صح .. بس ليش توترت كل هذا التوتر ماتغير شي سواء اخت بدر او اختك كل واحد .
يوسف : ها لا بس .. اذا اختي لازم اعرف .
بوفهد : يوسف انا كنت راح اقولكم قريب ..وماكانت حاب انكم تعرفون باللطريقة هذه كان ودي تسمعون مني ..
يوسف : المهم ان الحين لازم نعرف
بوفهد : بتعرف بس انتظر احمد بعد شوي بيجي وبقولكم على كل شي ..
يوسف هدأ بعد ماعرف ان غنا مو اخته : خلاص ننتظر احمد
بو فهد : شوف هذا احمد وصل .
احمد مستغرب : شنو هذا الاجتماع المفاجئ ؟!
بوفهد : عندي موضوع وابي افهمكم اياه .. اجلس يا احمد
احمد : تفضل تكلم يبه نسمعك
بوفهد : اسمعوني زين ولاتقاطعوني اذا خلصت كلامي تقدرون تتكلمون
: ان شاء الله يبه
" خبرهم بو فهد عن بدر من او ما جا على الدنيا لحد ماتزوج ام بدر والسبب من زواجه ... تفاجئوا احمد ويوسف من الي سمعوه ..وتأثروا كثير .. كبدايه ماصدقوا لحد ماوراهم اوراق تخريج بدر واوراق شهادة ميلاده .. "
احمد : يبه بس مو هذه حجه عشان تتزوج ؟؟
يوسف : احمد .. انتبه لكلامك اعرف انت منو تكلم..
احمد : يعني انت راضي باللي سواه ؟
بوفهد : خله يايوسف ماقال شي .. لازم يطلع الي عنده .. لا يا احمد ياليت حجه بس انت تعرف امك زين ..
نزل احمد راسه وفكر في كلام ابوه وان مو بعيدده ان امه ترفض بدر اذا غنا الي مافيها شي ماحبتها وبالرغم بعد ا نام فهد ماجاتها بنت ومع كذا ماحبت غنا فكيف راح تتقبل بدر وهو معاق ..
يوسف : طيب وغنا اكيد ماتعرف صح ؟
بوفهد : لا غنا تعرف عن بدر ولا بدر يعرف عن غنا ..
يوسف : بدر يعرف عن غنا .. بس مفكرها اختنا هذا الي فهمته الحين
بوفهد : ايه صح كلامك
احمد : بس انا ماشوف فيه مانع الحين تعرف غنا
بوفهد : اذا انتوا تقدرون تبعدون غنا عنكم راح اقولها .. غنا في الحالتين راح تكون تحت رعايتي هنا او هناك.
يوسف : لاااا لاتقول لها
استغرب احمد من ردة فعل يوسف خصوصا ان احمد كان اكثر واحد يعرف شنو كانت غنا بالنسبه ليوسف وماتوقع انه يتعلق فيها حتى اكثر منه هو .
بوفهد : وانت احمد شرايك ؟
احمد فكر بعقله مو بقلبه : مومهم رايي المهم غنا ..
بوفهد : غنا هي اكثر وحده محيرتني .. خايف عليها .. لو قلت لها بيكون صعبه عليها ,
غنا لما كانت عند امي الله يرحمها كانت وحيده ماعندها من تلعب وياه أو تمرح وياه ولما توفت جدتكم واخذتها عندي بسرعه تعلقت فيكم عوضت كل طفولتها الي راحت معاكم وحبتكم مثل اخوانها الي من دمها .. وماحبيت اقول لها عن بدر عشان ماتتركم وترجع لوحدتها لان بدر ماراح يعوضها خصوصا ان عنده حاله صحيه خاصة غير اعاقته .. .
احمد : كيف حاله صحيه خاصة .. حالته خطره ؟؟
بوفهد : بدر مو بس معاق .. بدر عنده انيميه منجلية حاده والكلى بعد .. وهذه من اهم الاسباب الي خلتني ابعد غنا عن اخوها اخاف تتعلق فيه وتضيع بينكم وبينه ويحن عليها الدم اكثر وتروح مع بدر وتفقده .. واذا فقدته الله يعلم كيف بيصير حالها .. يكفي انها ماعاشات مع امها وابوها الله يرحمهم ..
يوسف : انيميه منجليه وحاده والكلى !! وهو كيف متعايش مع المرض ؟؟ ..
تنهد بو فهد بحزن : بدر صبور كثير .. ويتحمل اكثر من ماتتصورون
تاثروا يوسف واحمد كثير
يوسف : والحين كيف حالته ؟
بوفهد : الحين حالته مستقره ..
احمد : يبه بعد ماسمعت هذا الكلام انا برايي ان احنا نقول لغنا .. لاسمح الله صار شي لبدر كيف بتواجهون غنا بعدين ..
بوفهد : هذا الي افكر فيه الحين خصوصا ان بدر راح يسوي العمليه قريب واحنا اجلناها بما فيه الكفايه .. وهذا انسب وقت للعمليه والعمليه مو هينة في حالة بدر .. واخاف يصير له شي لا سمح الله .. وماتشوفه غنا
يوسف : بس غنا راح تترك البيت ؟
بوفهد : الحين غنا كبرت ولازم تتخذ قراراتها بنفسها الا الي اشوفه انا في مصلحتها ..
يوسف : بس انت بنفسك قلت راح تتأذى
بوفهد : انتوا ماراح تتركنوها ..
احمد : كلام ابوي عدل .. انا صحيح مابيها تروح من عندنا ..بس من حقها تعرف عن اخوها ..
بوفهد : غنا اكيد لما تعرف راح تزعل مني .. فأفضل ان واحد منكم يقول لها
احمد : اترك هذا علي .
يوسف ( يعني ممكن غنا ماراح تكون موجوده بالبيت ؟؟.. انا كيف راح اتحمل غيابها وعدم وجودها في البيت ) " قام يوسف من مكانه بدون مايتكلم وطلع
بوفهد : يووووووسف .. يوسف ( لكن يوسف ماعبر احد وطلع )
بوفهد : ماتوقعت ان هذه راح تكون ردة فعل يوسف
احمد : هم انا مثلك يبه .. بس ما الومه بصراحه خصوصا ان ماكانت علاقته بغنا مثلنا والحين لما تعلق فيها وتعلم على وجودها يمكن ماتكون في البيت .
-----------------------------
-----------------------------
دخل يوسف البيت وشاف غنا جالسه على الكنبة الي بالصاله وماسكه الاب توب ... راح وجلس قدامها يراقبها بدون مايتكلم وسرح ... وبعد ثواني رفعت راسها وانتبهت له وشافته سرحان .. حركت يدها قدامه "
غنا : يووسف .. يووووسف
نقزت غنا يوسف : هلا
ضحكت غنا : وين سرحان ؟؟ .. وددخلت من غير ماتتكلم ها قولي قولي بسرعه
يوسف : شفتج مندمجه فقلت ماراح اقطعج
غنا : طيب ليش زعلان احسك مو على بعضك ..
يوسف : خايف افقد شخص عزيز على قلبي
غنا : ليش خير ؟؟ ومنو ؟؟ ناصر ؟؟
يوسف : اغلى من ناصر
غنا : منو وليش خايف تفقده ؟ ومنو هذا المحظوظ الي اغلى من ناصر عند يوسف .. يوسف لاتقولي ان في احد بخطر ؟؟ او فيه شي
يوسف : لا مو بخطر لاتخافين .. هو اعتقد ماعنده مشكله المشكله أنا الي راح افتقده
غنا : يوسفوا انت ماعندك الا الالغاز .. شنو هذا لغز ؟؟
تنهد يوسف : غنا بسألج سؤال
غنا : اسأل
يوسف : لو طلع لج اخو فجأه راح تتركين البيت ؟
غنا : سؤالك غريب ..
يوسف : لاتفهميني غلط
غنا : انت شنو تبيني اترك البيت ؟
يوسف : جاوبيني اول
غنا بعدها مستغربه : هذا السؤال ما اقدر اجاوبك عليه الا اذ تمثل قدامي
" الا بدخلة احمد .. وقطع عليهم الكلام "
احمد لما دخل وشاف يوسف وغنا جالسين مع بعض فكر ان يوسف قال لغنا : يوسف قلت لغنا؟؟
غنا : شنو قالي ؟؟ انتوا شنو عندكم ؟
يوسف : انا قايم.. احمد انت قول لها انا ما اقدر ولا اتمنتى تعرف بعد .
غنا : شصااااااير ؟؟
احمد : انا بفهمج الحين
" يوسف ما ابتعد كثير وقف عند الدرج "
احمد : مو عارف كيف ابدأ
غنا : احمد شفيكم ترا جد خوفتوني انت ماتشوف كيف ملامحكم انت ويوسف .
احمد : غنا خلاص انا بفهمج اهدي شوي
غنا : اوكي تكلم اسمعك
احمد : بصراحة بدخل في الموضوع على طول ..
غنا: تكلم يا احمد
احمد : انتي مو وحيدة امج وابوج الله يرحمهم
وقفت غنا من المفاجئة : انت شنو تقول ؟؟ تمزحون معاي انت ويوسف متفقين علي ؟؟
احمد :لا ياليت ياغنا بس هذه هي الحقيق هانت عندج اخو ماتعرفين عنه أي شي .
غنا : انا عندي اخو ؟؟!! طيب وووووينه ؟ عشان كذا يوسف سألني قبل شوي .. طيب من وين طلع ووينه وليش ماعرفت عنه ..
احمد: غناااا اهدي شوي خليني افهمج شوي شوي
غنا: اوكي بهدأ بس قولي
" وخبر احمد غنا بكل شي .. وغنا طول الوقت تبكي ومصدومه ومشاعرها مختلطه بين الخوف والفرح "
غنا :طيب وين بابا ..
احمد : ماقدر يقول لج ... ابوي خايف تزعلين منه
غنا : كان المفروض مايخبي علي هذا اخوي ..
احمد : لاتلومينه ياغنا .. ابوي سوا كذا عشانج انتي وعشان بدر ..
" كانت ام فهد طالعه من غرفتها وهي نازله شافت يوسف جالس على الدرج وهو متضايق .. سألته شنو فيه وما جاوبها وصعد الدرج .. ولما سمعت صوت احمد وغنا تبكي راحت لهم "
ام فهد : شعندكم .. ؟؟
احمد : غنا عرفت عن بدر..
غنا : حتى امي تعرف؟؟ .. ليش خبيتوا علي ليش
ام فهد : لاتجلسين تلومين فيني انا مالي دخل هذا عمج قالي .. وبعدين احمدي ربج عمج سوا كذا عشانج انتي .. والحين جايه تزعلين منه ..
غنا : بس هذا اخوي كان المفروض اعرف عنه ..
ام فهد : صدق ماتستحين على وجهج تلومين عمج وهو الي رباج وحفظج
احمد : يمممممه ليش هذا الكلام الي مو بمحله كلنا توقعنا تكون هذه ردة فعل غنا .. ابوي بنفسه قال ان ماراح يلومها لو زعلت عليه
غنا : طيب ابي اشوف اخوي ..
احمد : ابوي بنفسه بوديج عنده
غنا : طيب وين بابا ؟
احمد : عنده شغله ضروريه راح يسويها وبيرجع
---------------------------------
عند ام بدر
" ماكان حال بدر احسن من غنا .. ويمكن اكثر من غنا بسبب حالته الصحيه كانت الانفعالات تزيد حالته سوء اكثر بس كان لازم يعرف .. "
ام بدر : بدر يمه اهدأ
بدر : كيف اهدأ وانا عمليتي قريبه ويمكن اموت وما اشوفها ..
ام بدر : بسم الله عليك شنو هذا الكلام .. ان شاء الله بتقوم بسلامه .. وبكرا ان شاء الله راح تشوف غنا .. بكرا الصبح ابوك بياخذنا على بيتنا الجديد وبيجيبها هناك
بدر : طيب اقدر اكلمها الحين ؟؟
ام بدر: تحمل شوي واكيد هي مواحسن منك الحين
-----------------------------
" حاول احمد يهدي غنا شوي وقال لها ترى حتى احنا مثلج عندنا اخت ماندري عنها واول مره بنشوفها بكرا مثلنا مثلج .. ولازم ماتزعلين من ابوي خصوصا ان حالته الصحيه ما تسمح للانفعالات ... "
" فكرت غنا بكلام احمد وشافته منطقي ولازم ماتزعل على عمها كل الي سواه مو هين ضحى براحته عشانهم .. بس كانت الدقيقه تمر عليها مثل الساعه حتى لما حاولت تنام ماقدرت ... "
-------------------
" رجع بو فهد من برا بعد ما اتصل عليه احمد وقال له ان قال لغنا .. "
بوفهد : وينها غنا ؟
ام فهد من غير نفس : بغرفتها
احمد : اناديها ؟
بوفهد : لا انا بروح عندها
" راح بوفهد لعند غنا ودق الباب عليها "
بوفهد : اقدر ادخل ؟
راحت غنا وفتحت الباب
بوفهد : زعلانه مني؟
دمعت عيون غنا وطالعت عمها وهي ساكته
بوفهد : اقدر اتكلم معاج ولا؟
هزت غنا راسها بأيجاب ووسعت له عشان يدخل
بوفهد : غنا انا ... وقبل لايكمل كلامه .. راحت غنا لحضن عمها وجلست تبكي
غنا : لا بابا مو زعلانه منك .. انت سويت كل هذا عشانا احنا انا عارفه
" حس بوفهد ان الهم الي كان على قلبه قبل ثواني تلاشى "
بوفهد : ريحتني يابنتي كنت متوقع انج راح تزعلين مني
غنا : كيف ازعل منك وانت ربيتني وماتركتني وضحيت عشان بدر .. مايحق لي ابد ازعل
مسح بوفهد على راسها ووعدها ان راح تشوفه بكرا
------------------------
الساعه 12 بالليل
" كانت غنا تتقلب يمين وشمال مو قادره تنام .. وتذكرت شي غاب عن بالها
( احمد قالي ان اخته اسمها الجوري وهي عمرها 6 سنوات .. تذكرت اني شفت الجوري لما دخلت عند ابوي وقالت له بابا بس امها طلعتها وانا فكرتها انها غلطان هاو مشبهه على ابوها .. هذه اكيد هي الجوري والي كان معاها هو اخوي بدر ..كيف طافتني هذه ؟؟!! .. بدر كان قدامي وماعرفت ان اخوي .. حتى الشبه لاحضناه انا وساره .. يا الله شقد متشوقه اشوفه ...)"
غنا : شكلي ماراح اقدر انام اروح اطلع شوي
" ولما نزلت الصاله شافت احمد جالس مع يوسف وشكلهم متضايقين "
جلست معاهم
غنا : شفيكم متضايقين ؟
احمد : الف شي ياغنا ..
قام يوسف وراح جلس جنب غنا : غنا تقدرين تجاوبيني على سؤالي
غنا : أي سؤال
يوسف : قبل لاتعرفين عن بدر سألتج سؤال ماتذكرينه .. حتى قلتي لي ما اقدر اجاوبك الا اذا تمثل قدامي والحين صار واقع
غنا : هذا الي مضايقكم
احمد : من اهم الاسباب الي خلتنا نتضايق
غنا : ليش صاير شي
احمد : امي زعلت على ابوي لما درت ان ابوي راح يجيب زوجته الثانيه
غنا : امي ماكانت تعرف ؟
" طبعا بو فهد ماقال لغنا ان ام فهد رفضت وجود بدر عشان ماتحمل ام فهد ذنب بدر الي قاله لها ان لما ماتوا اهلها ماكان هو على علم ببدر بس صديق له خبره بعد 7 سنوات انه اخو كان عنده ولد ولما ماحد سأل عنه اخذوه لدار الايتام "
احمد ( لا تغلط يا احمد اكيد ابوي ماقال لها ان أمي رفضت وجود بدر ) .. امي ماكانت تعرف عن بدر عشان كذا اليوم زعلت
غنا : ماتصدقون الحين شنو الي بداخلي احس نفسي كأني بدوامة كأني بحلم .. مادري احس اني ابي اشوف بدر وبنفس الوقت مادري اذا شفته كيف راح اتصرف
احمد : اذا شفتيه ماراح تكونين بالحيره هذه .. لاتفكرين كثير .
يوسف : انتي عرفتي طبعا أن ابوي راح يكون عنده بيت ثاني الحين .. لزوجته الثانيه
غنا : أي قال لي
احمد : وانتي وين راح تجلسين بأي بيت ؟ لان مستحيل ابوي بيجمع البيتين مع بعض
" كانوا احمد ويوسف خايفين من اجابة غنا "
غنا : صدقوني هذا الشي ما اقدر افكر فيه الحين ..
يوسف : وتقدرين تتركينا ؟
صارت غنا تطالعهم ودمعت عيونها : لأ ما اقدر
احمد : ولو طلب منج بدر ؟
نزلت غنا راسها وقامت تبكي
احمد : خلاص غنا .. لا تبكين تراج بتخلينا نبكي والبكا مو للرجال .. وروحي غرفتج ونامي راح تصحين بدري
غنا : ان شاء الله
----------------------------
الصبح على الساعه 9 ونص كانت غنا بغرفتها ومانامت تنتظر بوفهد
" بعدها بنص ساعه اتصل بوفهد وقال لها تنزل ينتظرها برا .. طلعت تركض "
بوفهد : نمشي ؟؟
غنا : أي بابا
--------------------
" كان بدر ينتظر في الحديقة .. "
" لما وصلوا غنا وبو فهد وانتبه بوفهد لبدر "
بوفهد : شوفي بدر ينتظر في الحديقة
التفتت غنا عليه ودمعت عيونها وبعد ثواني وبعد ما استوعبت راحت تركض ووقفت قدامه وقاموا الاثنين يبكون
بدر : غنا ؟؟
"قربت لعنده ولمته "
وتأثرت ام بدر وقامت تبكي معاهم .. اما بوفهد فهو اكثر واحد حس براحه وقال في نفسه (( اذا مت الحين راح ارتاح )) "
بوفهد : دخلوا داخل لاتجلسون هنا برا
------------------------------
في الشركة
كان يوسف يفكر ومو قادر يشتغل كان خايف يروح البيت ومايشوف غنا ..
" بعد فتره جا ناصر وجلس معاه "
ناصر : انا نادر ماشوفك تضحك هالايام
يوسف : غصبا عني .. هذه الايام صاحبك يمر بأيام ماتخليه يقدر يضحك
ناصر : طيب لاتكتم فضفض
يوسف : انت تعرفني ما احب اتكلم عن مشاكلي مع احد
ناصر : افا وانا صرت أي احد ؟
يوسف : اكيد مو أي احد
ناصر : تكلم
يوسف : انت ماتذكر لما كنا صغار .. كيف كنت دايما اقولك ان بنت عمي معانا بالبيت ومو قادر اتحملها ؟
ضحك ناصر : أي اذكر .. حتى اني ماكنت اأيدك
يوسف : ايه اذكر وكنت ازعل منك اذا قلت اني انا الغلطان
ناصر : ايوا كمل شفيها بنت عمك ؟ بس مو هي الي كانت معانا بالمزرعه وصارت لها الحادثه
هز يوسف راسه بالايجاب
ناصر : بس الي يشوفك هذاك اليوم مايقول تكرهها بالعكس كنت شوي وتجن خايف عليها
تنهد يوسف : الزمن يغيرنا ياناصر
ناصر : طيب وين المشكله بالعكس هذا المفروض يصير منزمان
يوسف : ياليت ماصار
ناصر: مافهمت عليك .
يوسف : ناصر انا ....
ناصر : انت شنو تكلم ..
يوسف : انت سمعت عن الكره الي يتحول الى حب ؟
ناصر : انت تحبها ؟!! وين المشكله ؟ تبي تصير معاها مثل قبل
يوسف : اوه نااااصر افهمني .. انا مو مشكلتي ان تغيرت معاها لا مشكلتي اني ما احبها مثل مايحبونها فهد واحمد ..
ناصر : طيب فاهمك وين المشكله اذا تحبها ؟!! هي مو اختك من دمك
يوسف : المشكله فيها .. هي تشوفني مثل احمد وفهد
ناصر : وهذا الي مضايقك؟
يوسف : اكثر ماتتصور .. حاولت اني انساها وابتعد عنها .. بس ماقدرت
ناصر : ماتنلام يايوسف .. مو عارف شنو اقولك
يوسف : انا لازم اشيلها من راسي
ناصر : طيب انت متأكد انها تعتبرك مثل احمد وفهد
يوسف : كم مره حاولت اسألها والاقي نفس الاجابه اني مثلهم .
ناصر : شرايك نسافر كم يوم ؟
يوسف : وبرايك السفر هو الحل ؟ !!
ناصر : انت فكر وعطني خبر .. انا بتركك الحين وبرجع لشغلي
---------------------------
" تركوا بو فهد وام بدر غنا وبدر لحالهم يجلسون يتكلمون مع بعض "
بدر : غنا تذكرين قبل فتره لما ابوي كان بالمستشفى ؟
ابتسمت غنا : أي اذكر وانا صرخت عليك يومها وضميري انبني
بدر : وانا كنت مقهور منج
ضحكت غنا : بس تصدق كنت احس ان في شي وتضايقت كثيير اني تكلمت معاك بالطريقه هذه
بدر : بس بعد كم يوم سألت امي عنج وقالت لي انج بنت عمي ولما اتذكر الموقف اضحك
غنا : طيب بدر كيف عشت بدار الايتام ؟
بدر : اكيد زعلانه عشاني مو ؟
غنا : اكيد
بدر : لا لاتضايقين كان كثير حولي وعمي ماتركني يزورني كثير لحد ماطلعني وهو ماتركني وبعدها ربتني امي بكل حنان .. وانا الحين مو ناقصني شي .. وانتي؟
غنا : تسألني انا ؟!! ما انسى فضل عمي ابد انا عشت اميره عندهم ماحسسوني اني مو بنتهم بالعكس .. لو تجلس معاهم بتحبهم فهد ويوسف واحمد وحتى امي ..
بدر : يعني انتي راح ترجعين معاهم .. ماراح تكونين معاي
غمضت غنا عيونها وكأنها تدور اجابه لهذا السؤال .. وماجاوبت
بدر : عارف ماراح تجلسين معاي صح
مسكت غنا يد بدر : ماراح اتركك .. بكون معاك
بدر : وتتركين البيت الي تربيتي فيه ؟؟ تقدرين ؟؟
غنا شافت الخوف في عيون بدر .. وحسته محتاجها ..
غنا : ان شاء الله اقدر
ابتسم بدر : ماراح تتركيني ؟؟
غنا : لا
----------------------
ام بدر : بدر مانام امس وهو ينتظر اليوم
بوفهد : نفس الحال مع غنا
ام بدر : حتى ولو انهم اول مره يشوفون بعض بس رابطة الدم مافيا قوى منها
بوفهد : اكثر شي راح ينظر هو غنا ..
ام بدر : الله يعينها ..
بوفهد : راح تتعود مع الايام
ام بدر : تتوقع راح ترجع او بتجلس هنا
بوفهد : اذا اختارت هنا انا متأكده انج راح تحطينها بعيونج .. واذا رجعت معاي هذا مكانها الي تربت فيه وتعودت عليه ..
ام بدر : صح كلامك
-----------------------
في العصر
" رجع بو فهد البيت من غير غنا .. وكانو احمد ويوسف وام فهد جالسين بالصاله "
لما شافت ام فهد بو فهد قامت من مكانها وراحت غرفتها
هز بوفهد راسه مستنكر حركة ام فهد
احمد: لاتلومها يبه ترا مو هينه عليها
بو فهد : عارف ..
يوسف : وين غنا ؟؟!!
بوفهد : جلست هناك
يوسف : على طول ؟
بوفهد : اكيد بعدها ماشبعت من اخوها .. بس اتوقع انها راح ترجع
احمد : ان شاء الله ما نتصور البيت من دونها اهي مامره راحت مكان بعيد حتى ليوم واحد
يوسف : يعني كم يوم ؟
بوفهد : مادري والله ( عارف ان هذا راح يصير مو بس صعبه عليها حتى انتوا صعبه عليكم )
--------------------------
بعد اسبوع وغنا بعدها في بيت ام بدر
" غنا في هذه الفتره كانت فرحانه بأخوها وبنفس الوقت متضايقه عشانها مو في البيت الي تربت في وكانت كل يوم تتصل بأحمد ويوسف وتمطن عليهم .. وحست انها في هذا الاسبوع انها ماتقدر تستغني عنهم مشتاقه لهم ولسوالفهم .. كانت مشتاقه لضحك احمد ومزحه واهتمامه فيها .. وكانت مشتاقه لزعل يوسف ونجرتها معاه ولخوفه عليها .. وهذا الشي ماخفا على بدر .. بس هم بدر تعلق فيها شاف فيها امه وابوه واخته وكل شي ..وغنا نفس شعور بدر تماما لقت فيه الي لقاه فيها "
غنا : بدر انا راح اروح اليوم البيت
بدر : ما ارتحتي هنا مو ؟
غنا : لا برجع بس منزمان ماشفتهم وانت تعرف هم اخواني الي تربيت معاهم لازم اروح واشوفهم ولاتبيني اصير ناكره لهم .
بدر : لا اكيد روحي وشوفيهم
-----------------------
" لما راحت غنا البيت .. طبعا حبت تسويها مفاجأه وماقالت لهم بس لما دخلت ماشافت احد راحت غرفهم تدورهم وماشافتهم "
غنا : لو اتصلت فيهم احسن .. " مسكت الجوال عشان تدق على احمد .. بعدين قالت خليني انتظر شوي بالصاله يمكن يجون "
" كانت ام فهد بالمطبخ وحست بحركه في الصاله ( هذا اكيد احمد ) "
ام فهد : احم... هذه انتي ؟
راحت غنا لام فهد بتسلم عليها لكن ام فهد صدت عنها : انا ماصدقت تطلعين
غنا : جيت اسلم عليكم وبرجع
ام فهد : على بالي بعد .. يكفي ان اخوج هو الي سبب وجود الضرة في حياتي
غنا : بدر هو السبب ليش ؟
ام فهد : ليش عمج ماقال لج ؟؟
غنا : لا
ام فهد : هه اكيد ماقال لج الحقيقه كامله خاف تكرهيني .. وهو مادرى ان هذا اخر اهتمامي .. ابوج تزوج ام بدر عشان ترعى اخوج لان مالقى الي ترعاه .. لاني رفضت وجود اخوج عندي وهو بحالته هذه .. وهذا من حقي طبعا
انصدمت غنا ( يعني امي هي السبب في دخول اخوي لدار الايتام ؟؟ !! )
غنا : يعني انتي كنتي تعرفين عن اخوي بدر ؟
ام فهد : أي كنت اعرف ومابحبيت اربيه عندج مانع " ام فهد هدفها هو ان غنا تترك البيت وماترجع له ابد بعد ماتعرف غنا عن الي سوته هي في اخوها "
غنا : الله يسامحج .. بس بتضلين امي الي ربتني ..
ام فهد : اذا ضميرج يأنبج على اخوج روحي عيشي معاه .. واتركي عيالي بحالهم صاروا يتهمون فيج اكثر من مايهتون فيني ..
غنا : ان شاء الله بروح .. بس ابي اسلم عليهم قبل لا امشي
ام فهد : احمد رايح رحله مع اصدقائه ويوسف تغدا عند صاحبه
غنا : ومتى بيجون ؟
ام فهد : احمد ماراح يجي اليوم .. ويوسف اعتقد مايبي يشوفج انتي تدرين انه ماكان مرتاح لوجودج
غنا : يوسف ؟؟!! ليش هو قال كذا ؟؟..
ام فهد : أي قال
غنا : بس يوسف ماقالي كذا وكان متضايق عشاني ماكنت معاهم
ام فهد : لما تركتي البيت اكتشف العكس .. والدليل شوفيه يطلع ويروح ويجي مافي شي مضايقه
"ماقدرت غنا تستوعب الي قالته ام فهد ودمعت عيونها ..( بعد ماخلاني اتعلق فيه يجي يقول كذا ).. ترتكت البيت ورجعت "
--------------------------
" كانت غنا تبكي في السياره وهي مقهوره من يوسف وماتوقعت بسهوله هذه يفرح لتركها للبيت "
---------------------------
بعد نص ساعه رجع يوسف
لما دخل شاف امه بالصاله قاعده على التلفزيون
يوسف : جات غنا ؟؟ ( يوسف كل يوم يسأل هذا السؤال )
ام فهد : أي جات
يوسف : جد .. وينها ؟؟
ام فهد : راحت قالت انها جات تسلم عليكم .. ولما ماشافتكم قالت انها مستعجله وقالت لي اوصل لكم السلام
يوسف : ماقالت تبي تشوفنا ؟
ام فهد : الا سألت عن احمد .. بس ما اذكر قالت انها سألت عنك " ام فهد لما شافت يوسف بدا يتغير مع غنا هذا الشي حرق قلبها ماودها تشوف عيالها كلهم واقفين في صف غنا .. "
" راح يوسف غرفته واتصل فيها على طول بس ماردت عليه حاول اكثر من مره بس هم ماردت عليه .. ( اسبوع واحد بس نساج يوسف .. لدرجه هذه تكرهيني ياغنا ) ورمى جواله بالارض بعصبية لدرجة انه تكسر .. وطلع من البيت متنرفز وماكان عارف وين يروح "
------------------
اما غنا فكانت بغرفتها تبكي ومو قادره تصدق .. يمكن امي تقولي كذا عشان تبعدني ؟؟ .. لالا ما اعتقد هي مستحيل تخليني اشيل بقلبي على يوسف .. خليني اتصل بيوسف واشوف شعنده
" اتصلت فيه ولقته مغلق .. "
غنا : انا بعد بغلقه مو بس انت
---------------------
" فكر يوسف في كلام ناصر .. واتصل فيه "
ناصر : هلا يوسف
يوسف : تذكر لما قلت لي على السفر
ناصر : ايه فكرت زين ؟
يوسف : ايه واليوم نسافر
ناصر : صار شي ؟
يوسف : لا بس ابي ابتعد شوي عن هنا .. ابي اغير جو ..
ناصر : بس منو بيمسك الشغل .. انت لاتنسى ان فهد مو هنا
يوسف : فيصل رجع وهو قدها وواثقين فيه
ناصر : بس هاليومين الشركه محتاجه شغل كثير
يوسف : راح اكلم ابوي .. الحين صحته الحمدلله زينه يمسكها بس كم يوم
ناصر : شكلك كثير محتاج تسافر
يوسف : احجز واتصل خبرني
ناصر : احجز وين
يوسف : أي مكان .. على اول طياره بتطلع اليوم
ناصر استغرب : اوكي مثل ماتبي
" وفعلا حجز ناصر على اقرب طياره بتسافر لليوم وكانت على دبي .. وحجز لمدة 10 ايام "
----------------------
----------------------
اتصل ناصر بيوسف وقاله يتسعد للسفر .. الساعه 2ونص الفجر ..ويوسف كان على اتم استعداد وقال لابوه وبو فهد سمح له لان حس ان يوسف محتاج للسفره هذه وكلها يومين وبيجي فهد يمسك الاداره مثل قبل
-------------
عند فهد
" تعودت هبه على فهد تقريبا خصوصا ان فهد انسان واضح كثير .. وارتاحت له كثير حست انه هو فارس احلامها الي تتمناه .. كانت تتمنى انه تكون شخصيته قويه .. وحازم واذا قال كلمته مايقولها قبل لايفكر فيها .. مو كثير الكلام ويفهم الامور بسرعه حتى من غير ماتتكلم .. وكانت هذه هي الشخصية الي تمثلت قدامها "
فهد : هبه كان ودي تكون السفره اكثر من اسبوعين ونص بس انتي عارفه اني ما اقدر اترك الشركة
هبه : لا عادي اصلا انا ما احب اطول بالسفر .. وهذه السفره كانت اطول سفره بحياتي واحلى سفره بعد
فهد : اهم شي انبسطتي ..
هبه : كثير ماتتصور شكثر ..
فهد : ان شاء الله تشوفين كل الايام حلوه معاي
هبه : امين يارب .. بس انت ماقلت لي حستيني الزوجه المناسبه لك ؟
فهد : اممم عشان اكون صريح معاج .. الى الحين اعطيج 8 على عشره
هبه : والاثنين ليش ماعطيتني اياهم ؟
فهد : لما نعرف بعض اكثر اقرر
هبه : ان شاء الله باخذهم
فهد : ان شاء الله ليش لا
هبه : مو المفروض اعرف ؟؟
فهد : لأ .. لاني حتى انا ما اعرف انا اقصد بكلامي هذا ان ما اقدر احكم عليج خلال فتره بسيطه صح ولا لأ ؟
هبه : صح يافهد
فهد : طيب انا بموت من الجوع البسي عشان نطلع نتعشى
هبه : دقايق بس واكون جاهزه .. ماراح اترك زوجي جوعان
------------------------------
" كانت غنا تتقلب في السرير وهي معصبه ومتنرفزه ( نذل ليشي سويت كذا وانا الي كنت واثقه من سؤاله جد جد غبيه كنت مفكره مايبيني اروح لما سألني اذا راح اترك البيت او لا.. بس هو من كان يقصد قبل لا يسألني ؟؟ .. لما قال في شخص راح افتقده غالي على قلبي .. بعدها على طول سألني اذا راح اتركهم او لا لو عرفت ان عندي اخو ؟ " ابتسمت " اكيد يقصدني " ورجعت مدت بوزها " ياربي غبيه يوسف من متى كنت غاليه عليه وهو على طول يصرخ علي " ورجعت تبتسم <<< خبله :d
بس لما طحت في المزرعه كان خايف علي .. ومره لما احترقت حرق بسيط هم كان خايف علي .. واكثر من مره اذا زعلت يواسيني هذا كله اكيد مو تمثيل .. انا ليش استبعدت ان امي ماتبيني بينهم عشان كذا قالت هذا الكلام..
" سحبت البطانيه وغطت راسها : اف مابي افكر خلاص بعد يومين راح تبدأ الدراسه لازم اتعود انام بدري "
---------------------------
في الصباح .. وبالتحديد في دبي
ناصر : يوسف انا عارف ليش تبي تسافر
يوسف : ليش ؟؟ برايك
ناصر : عارف تبي تتخلص من مشاعرك .. وترجع وقلبك فاضي
يوسف : انت في بالك هذا الشي سهل ؟ سهل الواحد يتخلص من مشاعره ؟؟
ناصر : اجل شنو هدفك ؟
يوسف : ابي افهم شخص اني مبسوط بغيابه عن حياتي ولو انه كذب والشي الثاني ابي انسى همومي ونفس عن روحي شوي تعبت من التفكير وتعبت هم من الشغل
ناصر : تفهم شخص انه مو مهم ؟؟ افهم انها بنت عمك
يوسف : انت سمعتني طريتها ؟
ناصر : يبه انا افهمك على الطاير
يوسف : ناصر اذا عندك حل قولي ..
ناصر : تزوج
يوسف : اتزوج ؟؟!!
-----------------------------
تتوقعون هل راح يسويها يوسف ويتزوج ...!!؟؟ .... وكيف راح يكون موقف غنا من يوسف وموقف يوسف من غنا في الايام الجايه .. وكيف راح يتصرف فهد اذا عرف بالموضوع ..
تابعوا معاي الجزء القادم