الفصل 4
الفصل الرابع
انتهى الفصل الثالث بعد الصراع الي صار بين ام فهد مع اولادها وغنا وانتهى بتهدئة فهد لامه ولغنا ..
صحت غنا العصر على الساعه 4 تقريبا وحاسه ان راسها ثقيل وبينفجر عليها وكانت عيونها منفخه .. فأخذت حبة بندول وشربت لها نسكافيه
وغصبا عنها تفكر في كلام ام فهد خصوصا ان جدها توفى وهو مو راضي على ابوها والسبب امها مسكت صورة امها وابوها الي ماتذكرهم ابد وجلست تشكي لهم كالعاده
" كان الباب مفتوح شوي ويوسف مر بالصدفه وانتبه لغنا وهي تكلم الصوره الي بيدها تأثر بالموقف وجلس يفكر في الي سواه معاها من قبل وكيف كان يدور الشر والاذيه لها وكيف انصاع لمؤمرات امه حتى لو كانت بسيطه .. دق الباب بخفيف : ممكن ادخل ؟
غنا : تفضل
يوسف: شلونج الحين ؟
غنا :الحمدلله تمام
يوسف : ورجلج ؟
غنا : نسيت ان صار فيها شي ماحس بأي الم
يوسف : غنا تراني متضايق من الي صار امس ولابقادر ارتاح
غنا : شنو تقصد ؟ اهاااا لا خلاص انسى اصلا نرفزتي كلها مالها داعي .. ويكفي وقفتك معاي اليوم .. مع اني ماحبيتكم تتكلمون مع امي بالطريقه هذه .. اهي صحيح غلطت علي بس بالنهايه هذه امكم وانا مابي اصير السبب في زعلها منكم .. فعشاني يايوسف واذا صج تعزني وتحبني مثل اختك روح اعتذر منها .. انتو بعد غلطتوا لو جيتوا معاها بأسلوب احسن كان ماصارالي صار
يوسف يجنن غنا : افا الحين صرنا احنا الي غلطانين .. واحنا الي رازين فيسنا ودخلنا حرب البسوس
ضحكت غنا : ههههههه حرب البسوس في عينك
يوسف : توك جديه وتتفلسفين علينا
غنا : لا جد يوسف روح اعتذر من امك وهم قل لاحمد .. احمد الله يهداه ماقصر
يوسف : مايصير خاطرج الا طيب بس .. اوعديني ماشوف هالعيون المنفخه
غنا : ههههههه للدرجه هذه منفخه
يوسف : بصراحه قلت يمكن خدامتنا مو غنا
غنا : هههههههههه والله انك نذل
يوسف : انتي قومي عن الكسل غسلي وجهك واطلعي من الغرفه
غنا ( كل يوم يايوسف تثبت لي انك اطيب قلب واحن قلب واني انا الي ضلمتك )
نفذت غنا كلام يوسف ونزلت تحت مع احمد والي طلعها من جو الكئابه وطمنها ان كل شي عدا على خير وبنفس الوقت حذرها شوي من امه وانها اكيد ماراح تخليها بحالها
" ام فهد بعد الي شافته من عيالها زعلت منهم بس سوت الي يبونه وطبعا مو عشان غنا لانها اخر همها .. بس عشان ماتنحرج قدام ام رائد ويخرب برستيجها .. فأعتذرت من ام رائد وقالت انها لما فتحت الموضوع مع بو فهد رفض لحد ماتكمل غنا دراستها "
كان فهد لابس وبيطلع
يوسف : وين ماقلت اليوم ماراح تروح الدوام ؟
فهد : لا عندي شغله ضروريه لازم اروح
يوسف : اوكي براحتك
فهد : يوسف انتبه لغنا انت تدري ان امي معصبه وانا اثق فيك
يوسف : ان شاء الله .. غنا بعيوني
احمد من بعيد : يوسف تعال العب معاي سوني
يوسف : اوكي شغل اللعبه عندي شغله بسويها وبرجع
احمد يكلم غنا بصوت خفيف : ابي اعرف شنو قلب حال يوسف فجأه انا ماحس ان في حد صار يخلي يوسف ينقلب حاله
غنا : مو شرط الانسان يتبدل بسبب حدث .. يمكن بسبب فكره بس تخطر على باله ويقرر يسويها تغيره من شخص الى ثاني
احمد : اها ثانكس برفسور غنا
ضحكت : شفيكم قالبين علي .. الا جد اليوم قالبتها فيلسوفه .. بس احمد نسيت لا اقولك الي صار اليوم مو هين .. فبليز روح اعتذر من امي ومن غير ما اقولك انت تفهمني
احمد : بس امي ياغنا غلطت ومو عيب اذا نبهناها
غنا : ماننكر انها غلطت بس هي امك ولازم تروح تعتذر منها وتراضيها
احمد : بعد القيم
غنا : لا انت ليش عنيد .. انت ناسي انها امك
احمد : لا هي الي نست ان احنا عيالها
غنا : احمد .. لاتشيل على امك مايصير
احمد : خلاص بعتذر قلت لج بعتذر بس بعد القيم
غنا :براحتك بس اوعدني انك بتعتذر
احمد : اوعدج
----------------
دخل يوسف على امه واول ماشافته صدت
قرب يوسف منها وباس راسها : اسف يمه ..
ام فهد : انتوا وقفتوا ضدي مع بنت عمكم وانا امكم
يوسف : يمه الي سويتيه غلط .. لو ابوي درى راح تصير مشكله اكبر واكبر .. لو ماتدخلنا اعتقد مابتتراجعين صح او انا غلطان
ام فهد : وين الغلط فيه كل البنات يمرون بكذا تبونها تقعد على قلبي طول عمري
يوسف :انتي تدرين ان اعتراضنا الاول والاساسي على الشخص نفسه مو على الفكره وثاني شي غنا تو الناس عليها .
ام فهد : خلاص صار الي صار
يوسف : يعني افهم انج قبلتي اعتذاري
"ام فهد ماردت بس باين على ملامحها الرضا"
يوسف : طيب يمه انا الحين بتركج ترتاحين
-----------------
توجه فهد مباشره لدار الايتام بعد ماطبع نسخه من الاوراق وراح لموظف الاستقبال
فهد : السلام عليكم
الموظف : وعليكم السلام .. شبغيت اخوي
فهد : وين ممكن استفسر عن طفل مخرج من هنا من فتره طويله؟
الموظف : تفضل من هنا " واشار على سكرتير المدير
دخل فهد على السكرتير وهو متوتر و قدم الاوراق
السكرتير : تفضل .. شنو بغيت
فهد : بغيت اسأل عن الولد هذا
السكرتير : شنو قرابتك للولد .. او الي وقع على الاوراق بالاحرى
فهد : انا ولده
السكرتير : بس احنا مايخولنا ان نخبرك .. عن التفاصيل ممنوع
فهد : يعني تقصد ان المعلومات هذه سريه ؟
السكرتير : احيانا يطلبون الي يطلعون الاطفال من الدار السريه .. والاوراق الي عندك مطلوب فيها السريه
فهد : بس انا ولده
السكرتير : اسف ماقدر اساعدك بشي
فهد : طيب اقدر اكلم المدير
السكرتير : راح يقولك نفس الكلام
فهد : اوكي الله يعطيك العافيه
طلع فهد من عند السكرتير وهو خايب
----------------
احمد : صج انك ماتعرف تلعب يايوسف
يوسف : اسكت لاتحرجني قدام غنا
غنا ميته من الضحك على شكل يوسف وهو خسران واحمد يطنز عليه
احمد : شوف غنا شلون تبين اسنانها فرحانه بفوزي صح غنوءه
غنا : لا مو صح
يوسف يضحك على احمد لان غنا احرجته : تواسينا
احمد مسوي نفسه زعلان : ناكرة الجميل ..
غنا : بلا تمثيل .. الا ابوي متى بيرجع
يوسف : مادري مو اول مره ابوي يسافر بدون مايتكلم
" نزلت ام فهد وشافت غنا تسولف وتضحك ولا كأن شي صاير وهذا الشي نرفزها "
ام فهد : كل الي صار فيني بسببج وانتي جالسه ولا كأن صاير شي
نزلت غنا راسها : اسفه يمه
ام فهد : وانا شنو يفيدني اسفج عيالي واقفين ضدي معاج
" غنا ماردت "
احمد (شكلها امي براسها شر )
"سحب احمد غنا و ترك الصاله "
ام فهد : شوف هذا بس غاسله مخه مره وحده
يوسف بصوت صغير : انا لله وانا اليه راجعون
ام فهد : شنو تقول ؟!
يوسف : لا يمه ولا شي بس انسي الي صار .. كل بيت تصير فيه مشاكل
ام فهد : يوسف انا الي منرفزني الحين مو بس سالفة ام رائد
يوسف : ليش في شي ثاني بعد ؟
ام فهد : اخوك فهد كلمني اختار له بنت
ضحك يوسف : اوه واخيرا
ام فهد : مو من كبره ولدي
يوسف : اعرف بس انتوا منزمان تبون تزوجونه
ام فهد : مو هذا موضوعنا المهم انا كلمت اخوك على بنت منزمان عاجبتني .. لكن الي ماتستحي على وجهها غنا فرت راس اخوك ضد هالبنت
يوسف : غنا!! وليش
ام فهد : تبي تزوجه صاحبتها لا من ثوبنا ولا من معارفنا
يوسف ( اكيد غنا تعرف البنت ) : منو بنته ؟
ام فهد : بنت ام رائد
يوسف : يمه انتي شنو تحبين في هذا الناس وبصراحه هم الي مو من ثوبنا ولايناسبونا
ام فهد : بس فهد ماكان معترض والبنت تختلف عن اخوها
يوسف : فهد مايعرف رائد مثل مانعرفه انا واحمد
ام فهد : بس انا اقولك البنت مافيها شي اخلاق وجمال
يوسف : شقولك يمه انا مالي في السوالف هذه .. وبعدين ما اعتقد غنا ان هدفها عشان صاحبتها .
ام فهد : هذا هدفها ونص وااذا تعزني قولها لا تدخل انا ماتسمع مني
يوسف: خلاص مايصير خاطرج الا طيب
ام فهد : انا برجع اكلم فهد وانت لاتنسى تكلمها
يوسف : ماراح انسى
-----------------
احمد : غنا اليوم امي في راسها شر دخلي غرفتج ولا تطلعين منها احسن لج
غنا : ان شاء الله
احمد : بس مابيج تتضايقين اوكي
غنا : اوكي
احمد : لو انج مو بنت كان اخذتج معاي تخيمين معانا في البر
ضحكت غنا : الله وناسه ياحظكم انتوا يالشباب
احمد : احم احم
احمد : طيب عن اذنج الحين بروح اجهز نفسي
غنا : طيب
دخلت غنا غرفتها ورجعت تفكر في كلام ام فهد مسكت صورة اهلها وهي تكلمهم كعادتها ودموعها تغسل وجناتها: يبه اكيد مت وانت زعلان عشان جدي زعل منك ومارضى بأمي .. وانتي يمه ليش كل هالحقد حاملته عليج زوجة عمي شسويتي لها ؟ .. ليش تركتوني وانا ماعرف عنكم أي شي ولا اتذكر أي شي ..
" حست غنا نفسها ضايعه في داومه .. ماتعرف أي شي عن امها وابوها ولا لقت الي يخبرها عنهم .."
-----------------------------------
رجع فهد من برا ولقى امه جالسه بالصاله تطالع التلفزيون
فهد : هلا يمه
ام فهد : هلا فيك .. تعال اجلس جنبي ابي اكلمك في موضوع
فهد : ان شاء الله ..خير يمه ؟
ام فهد : انت اكيد عارف في شنو ابي اكلمك
فهد : أي عارف .. يمه قبل لاتفتحين معاي الموضوع اسمعيني زين اذا انتي معترضه على صديقة غنا خلاص على امرج ماراح نتقدم لها .. اما اني اخذ البنت الي قلتي لي عليها اسمحي لي يمه اقولج لا
ام فهد : بس عشان الي ماتتسمى قالت لك عنها
ماتناسبك .. تراها غيرانه منها
فهد : يمه انا قلت الي عندي وتعرفيني ما اتراجع عن قراري
ام فهد : خلاص انا بدور لك البنت الي تناسبك بس ماتاخذ ساره
فهد : الي تشوفينه ..والحين انا بطلع اريح شوي
"صعد فهد مكتبه وحاس راسه بينفجر من الف شي يدور براسه .. اولها سالفة ابوه .. والولد الي مو عارف من هو واي صلة تربطه فيهم .. وسالفة خطبته صحيح ان فكر بساره تكون زوجه له بس بما انه ماشافها الا مره وبالصدفه فهو اكيد ماتعلق فيها واتخذ قراره ان يبعد الفكره عنه ويبتعد بدوره عن المشاكل مع امه .. ولو انه عارف ان تقريبا ماغير شي لان نفس الشخص راح يختار له شريكة حياته .. "
"اتصل فهد بمعارفه الي ممكن يتوسطون له في دار الايتام وبطبيعة فهد له علاقات مع كثير من الشخصيات الهامه .. واكد له واحد منهم ان راح يخليه يستقبل المدير وياخذ من المعلومات الي يبيها بأقرب فرصه ..
ارتاح فهد بعد المكالمه وتذكر موضوع شاغله قبل لايعرف سالفة ابوه وهو يتعلق بيوسف فراح غرفة يوسف "
فهد : يوسف في موضوع منزمان كنت راح اكلمك فيه فأبي اعرف رايك
يوسف : خير
فهد : انت اخر سنة لك بالكليه السنه هذه صح؟
يوسف: صح
فهد : بما انك راح تتخرج من كلية التجاره فانا برايي انك تدخل مع ابوي بالشركة وتخفف التعب عليه
يوسف: بس انا قلت من قبل ابي اعتمد على نفسي مابي اصير مع ابوي في الشركة
فهد : منو قال لك ان بتدخل كواسطه انت بتدخل حالك حال أي موظف وبالمكان الي يناسبك مثل ما انت تبي
يوسف : بس ابوي ماراح يرضاها راح يقول لي انت ولدي ولازم تشغل منصب مهم
فهد : لو مو جدي الله يرحمه ( جده من امه) وصى امي اني ادير شركتها كان صرت مع ابوي .. ابوي محتاجنا يايوسف ..
يوسف: طيب خلني افكر بالموضوع
فهد : فكر زين يايوسف انت تدري انك الوحيد الي بتقدر تساعد ابوي .. لان احمدو داخل كلية العلوم يعني مامنه رجا
يوسف: ان شاء الله بفكر واعطيك خبر
فهد : ريحتيني ياخوي .. وبصراحه تغيرك عطانا كلنا امل خلك على كذا
ابتسم يوسف
فهد : يلا عن اذنك بروح اكمل الشغل الي في الشركه صار لي فتره مهملها عشان اشغال ثانيه
يوسف : اذنك معاك
يوسف ( والله يافهد شايل همومنا كلنا الله يعينك.. خليني اروح اتطمن على غنا)
-------------------------------------
دق يوسف الباب على غنا .. فتحت غنا الباب وكان شكلها باين عليها انها باكيه
يوسف: جيت اتطمن عليج كيفك؟
غنا بنبره حزينه : الحمدلله
يوسف شاف اثار الدموع الي على وجه غنا واشر عليها: والي يبكي هذا يعتبر بخير؟
غنا :لا بس متضايقه شوي .. لاتهتم
يوسف: شلون ما اهتم انتي ماقلتي تبيني اصير معاج مثل احمد وفهد وتبيني اعتبرج مثل اختي.. والاخو مايحمل هم اخته؟
ابتسمت غنا : اكيد
يوسف : طيب خلاص وانا بصير مثلهم
غنا : ريحتني يايوسف
يوسف : لايكون حاقده علي للحين
ضحكت غنا : لا حاشاك احقد عليك
يوسف : طيب انتي ليش ماتطلعين الحين تروحين عند صديقاتج بدل حبستج هنا
غنا : بعد الي صار اليوم الافضل اني ماصير بوجه امي .. واذا طلعت بتعتبرني مطنشه
يوسف : لا انا راح اكلمها .. الا اذا مالك خلق تطلعين براحتج
غنا : لا عادي حابه اجلس بالحالي
يوسف يمزح : هذه طرده ؟؟
غنا : لالا ما اقصدك
يوسف : عارف فاهمج .. يلا براحتج
" حس يوسف ان غنا للحين مو متأقلمة مع يوسف حتى عيونها ماتحطهم بعيونه واحيانا تتحاشاه "
"غنا في نفسها فرحانه من تصرفات يوسف الجديده.. بس في نفس الوقت حاسه بخوف .. مو عارفه شنو هذا الخوف والحاجز ليش مو قادره تتأقلم .. "
-------------------------------
بالليل على الساعه 2 الفجر :::
كان بو فهد يجهز شنطته عشان بيرجع لبيته الثاني
ام بدر : بو فهد قبل لاتطلع بغيت اكلمك بموضوع
بو فهد : ماتقدرين تأجلينه لان لازم الحين ارجع تركت الشغل هناك
ام بدر : لا مايتأجل
بوفهد : خير
ام بدر : بدر اليوم الصبح اتصل وكان يبكي يبي يرجع البيت تعب من المستشفى
بو فهد : لازم يصبر .. الحين هم يعطونه دم كل فتره عشان يرجع لمستواه الطبيعي ولا ماراح نقدر نسوي له العمليه
ام بدر : شسوي تعبت وانا اقنعه
بوفهد : صبري عليه يا ام بدر
نزلت الجوري من فوق وكانت توها صاحيه من النوم وتفرك عيونها(الجوري عمرها 6سنوات) : بابا وين بتروح خذني معاك
حمل بوفهد الجوري بأيده وباسها على خدها : لا بابا بروح الشغل مايصير اخذج معاي..
الجوري: طيب ابي بدر
بوفهد : بدر في المستشفى اذا طلع تلعبين معاه اوكي
الجوري : لأ ابي اروح معاك
جلس بو فهد يلعبها شوي واخذ بخاطرها ووعدها بلعبه لحد ما اقتنعت
بو فهد : والحين يا ام بدر لازم امشي ديري بالج على الجوري وانا ان شاء الله بعد يومين بجي وبتصل كل فتره اتطمن على بدر
ام بدر : بحفظ الله
"رجع بو فهد لبيته طبعا السفره كلها ماتاخذ منه ساعتين عشان كذا يقدر يروح ويرجع كل ماسمحت له الفرصه "
دخل بوفهد البيت وكان هادئ وتقريبا مافي احد صاحي بس كان متأكد ان فهد مو نايم فراح مكتب فهد يتأكد
دق الباب ودخل على طول .. وفهد كان حاط اوراق بدر قدامه على المكتب ونايم عليهم
قرب بوفهد لفهد عشان يصحيه من نومه ولفت نظره الاوراق
بس فهد بعد انتبه وسحب الاوراق على طول
بو فهد تقريبا تعرف على الاوراق فسأل بعفوية وكردة فعل : اوراق شنو هذه ؟
فهد مرتبك : هذه .. امممم ايه هذه اوراق خاصة بالشغل ليش تسأل؟
بوفهد : لأ مو عن شي مجرد سؤال
فهد فكر للحضه انه يستغل الفرصه ويسأل ابوه بدل مايعرف من برا : يبه بصراحه حاب استفسر عن شي وصار لي فتره منشغل بالي
بوفهد ( توقعاتي في محلها فهد حاس بشي من لما شاف الصوره ) : شنو يافهد تكلم
فهد : يبه منو بدر ؟
"حس بوفهد ببروده في اطرافه ورجفه في جسمه كله مع انه كان متوقع بس فجأه تلخبط كيانه كيف ممكن يواجه السؤال هذا مع فهد "
بوفهد : اسمع يافهد انا بقولك السالفه كلها وانتي ولدي الكبير وفاهم وواعي بس ما ابيها تطلع لاي احد كان ابد عشان مصلحة ناس معينين وانا متأكد انك بتفهمني ومابتاخذ في خاطرك
فهد : من كلامك يبه السالفه كبيره
بوفهد : لا مو قد ماصورتها انت
فهد : طيب خبرني منو بدر .. " طبعا فهد ماحب يتكلم عن الحرمه الي كان يكلمها ابوه عشان مايسبب له أي حرج "
بوفهد : اول شي قبل لا اقولك منو بدر .. لازم اخبرك اني عندي زوجه ثانيه
فهد عصب من داخله بس ما اظهر الشي هذا فصبه كله في قبضة يده
بوفهد : توقعت انك بتعصب
فهد وهو عاقد حواجبه : لأ مو تقول في سبب نسمع
بوفهد : بدر هو سبب زواجي
فهد : طيب منو بدر هذا .. هذا الي مجنني واكثر شي مدور راسي
بوفهد : بدر يصير ولد عمك يعني اهو اخو غنا
انصدم فهد : بدر يصير اخو غنا ؟!! وليش كان بدار الايتام ومو مع غنا مثلا .. وغنا تدري ولا لا
بوفهد : الحين بفهمك بكل شي .. ام غنا الله يرحمها قبل لاتموت كانت حامل في بدر وقبل لايصير الحادث بيومين جابته.. بدر مو طبيعي بدر معاق .. فعمك قبل لايموت الله يرحمه وصاني بغنا وبدر ولما عرفت امك انه معاق رفضت ان يتربى عندنا ورفضها كان فيه نوع من التهديد بترككم وانا عشانكم تركت بدر في دار الايتام لمدة سبع سنوات.. بس ماقدرت اتحمل ظميري عذبني كيف اترك ولد اخوي في دار الايتام وبعد سبع سنوات قررت اتزوج ام بدر عشانه وهي جزاها الله الف خير وافقت وحطته بعيونها ..
نزل فهد راسه وحس بتضحيه الكبيره الي قام فيها ابوه وبالعكس بدل ماكان معصب حس ان ابوه يحمل كل معاني الانسانيه وزفر زفره حاده : يبه بصراحه مو عارف شنو اقول لك
بوفهد : انت يافهد لو كنت مكاني راح تسوي نفس الي سويته
فهد : أي يبه بالعكس الي سويته نادر من يسويه في هالزمن وصدقني غنا وبدر ماراح ينسون الي سويته طول عمرهم .. بس هم عندي سؤال ليش مافاتحت غنا بالموضوع
بوفهد : لو قلت لغنا ماراح تترك بدر ويمكن تترك البيت عشانه وانا مابي ابعدها عنكم خصوصا انها متعلقه فيكم كثير
فهد : بس بيجي اليوم الي بتعرف فيه
بوفهد : ماراح اخبرها الا لما اامن حياتها مع الشخص الي يناسبها
فهد ( هه لوعرفت امي كانت مخططه لشنو كان شنو سويت ؟؟) : خلاص يبه الحين بعد ماوضحت كل شي ريحتني وماراح اتكلم مع أي احد .. بس الي فهمته من كلامك ان امي عارفه ان في اخو لغنا
بوفهد : امك عارفه بس مفكره انه بدار الايتام ليومك هذا
فهد : بس غريبه انها مامره قالت لغنا
بو فهد : امك يوم مناها الي تخبر فيه غنا بس انا حلفتها ان ماتخبرها لاي ظرف من الظروف وهددتها انها لوقالت لغنا راح تروح كل ثروتكم لغنا وبدر
ضحك فهد : بس يبه ليش ماهددتها لوماقبلت ببدر راح تسوي نفس الشي
بوفهد : ماشاء الله عليك طالع على ابوك .. بس فاتتك نقطة.. لو خليت بدر هنا ماراح ترعاه بالعكس راح تأذيه اكثر من غنا خصوصا انها رفضته خير شر بعكس غنا الي تقبلت فكرة وجودها ولو انها ماعمرها حبتها
فهد : اها صح فاتتني
بو فهد : بس ها مثل ماتفقنا مابي أي احد يعرف
فهد : وعندك عيال من حرمتك الثانيه ؟
بوفهد : ايه بنت الله يحفظها وسميتها الجوري
فهد : وونحرم منها يبه هذه اختنا
بوفهد : ماودي انكم تنحرمون منها بس انت عارف
فهد : واقدر ازوركم .. اقدر اشوف بدر وغنا ؟
بوفهد : اكيد بما انك عرفت الحين
فهد : واخواني ؟
بوفهد : يوسف متسرع مو لازم يعرف .. واحمد عنيد وفي هذه الامور صعبه عليه يتقبل بسرعه انت عارفه كيف يتخذ مثل هالمواقف
فهد : براحتك يبه بيجي اليوم الي يعرفون فيه
بوفهد : بأذن الله .. والحين انا بروح اريح شوي .. وانت اترك الشغل عنك وقوم خذ لك لو غفوه
فهد : ان شاء الله
-----------------------
فزعت غنا من منام شافته وهو دوم يتكرر عندها كانت تحلم بقصر كبير ومليان ابواب وانها تجري فيه وتفتح كل الابواب ولما توصل لاخر باب تحاول تفتحه تصجى من النوم قبل لاتفتحه وعلى طول يتكرر معاها الحلم .. كان الوقت تقريبا 5 الفجر
غنا : بسم الله الرحمن الرحيم اعوذ بالله " غطت وجهها بكفينها وهي تزفر زفرات حاده وعلامات الضيق على وجهها .. مسكت القرآن عشان تحس بالامان وجلست تقرا المعوذات .. وقامت صلت الفجر قبل لاتفوتها .. وبعدها اخذت لها شور وحست انها مخنوقة من الغرفه فطلعت من الغرفه ونزلت الدرج ولما وصلت بنص الدرج وحست ان البيت هدوء وماكان فيه احد والدرج اضلم تراجعت .. وهي صاعده وكانت ميته خوف ماحست ان في احد قدامها فأصتدمت فيه وصرخت صرخه فزعت الي قدامها وكانت راح تطيح من الدرج لو مو الي قدامها قدر يلحق عليها ويمسكها "
"غنا من كثر الخوف صار نفسها سريع ودقات قلبها تتسابق وتبلع ريقها وعلامات الخوف مرسومه في وجهها وكانت مغمضه عيونها "
يوسف وكان ميت من الخوف بعد: غنا صار فيج شي ؟؟تأذيتي؟؟
حست غنا بالامان لما سمعت صوت يوسف وفتحت عيونها : لا لا
يوسف: ليش نازله الدرج بالوقت هذا ماتخافين
غنا تطالع في عيون يوسف و متمسكه بيده بقوه مثل الطفل الي خايف يظيع
اول مره يوسف يشوف غنا بالحاله هذه حاول يهديها ودخلها غرفتها بس هي بعدها متمسكه فيه ..وهذا الشي اثار استغراب يوسف (شفيها غنا مامره شفتها بالحاله هذه )
غنا بصوت خايف: يوسف لاتتركني
شغل يوسف الاضاءه وجلس جنبها : شفيج غنا خير عسى ماشر ؟
غنا : اسفه يوسف خفت وخوفتك معاي ..
يوسف: شنو خوفتيني ؟؟!! كنتي راح تطيحين من الدرج وراح يغمى عليج من الخوف
غنا : مادري ليش في حلم مجرد ما احلم فيه تصيبني لفزعه وانا اخاف منه مجرد اني احلم فيه يصير شي عشان كذا يتملكني الخوف
يوسف : ابعدي عنج الوساويس وتعوذي بالله
غنا : اعوذ بالله
التفت يوسف على كومدينة غنا عشان يعطيها الماي : خذي اشربي وهدي وسمي بالله ونامي
غنا منزله راسها : اسفه يوسف
يوسف : غنا ليش هالرسميه معاي .. ليش مو قادره تتأقلمين معاي .. موتقولين انا مثل اخوج .. مثل احمد وفهد
غنا : اكيد يوسف ولا ماكان شفتني قاعده معاك بس انت تدري انك انت كنت تتحاشاني وماتتكلم معاي الا للضروره ,, اصبر علي شوي
يوسف : اخاف انج بنيتي الحاجز وماتقدرين ترفعينه
غنا : لا يايوسف لاتفكر كذا ابد .. ربي يشهد علي اني اعتبرك مثل فهد واحمد وخلك كذا على طول
يوسف : طيب الحين انا بتركك تنامين وسمي بالله ونامي وان شاء الله مافي الا الخير
غنا : ان شاء الله .. " جلست غنا تراقب يوسف لحد ماطلع من الباب وهي تسئل نفسها .. (الكلام الي قاله يوسف صحيح انا مو قادره ارفع عيني في عينه مع اني اعتبره مثل احمد وفهد الا ا ن الي كان يسويه معاي يخلني اتحاشاه هذا العيب فيني انا مو منه هو .. انا الي مسويه حاجز ) وقعدت تلوم في نفسها وانها لازم تحاول تتغير معاه مثل ماهو قاعد يتغير معاها ... بعد ماغطت نفسها بالبطانيه وتعوذت بالله نامت "
"اما يوسف فكعادته راح يتمرن ويجري في الحديقه وهو يفكر في الي صار قبل شوي مثل ماقلت لكم من قبل ان يوسف ضايع في مشاعره ومو قادر يحددها هل هو يشوفها مثل اخته او ان يتملكه شعور ثاني.. داخله يقوله تحبها مو مثل اختك لكن عقله يقوله ابعد الفكره هذه عنك لان غنا لايمكن تتقبل هذا الشي وكان يصب كل توتره في التمارين القاسيه الي يقوم فيها .. ففكر في كلام اخوه فهد وان لازم يشتغل في شركة ابوه حتى قبل لايتخرج حتى مايحس بالفراغ او يفكر افكار ممكن توديه في الف داهيه وتشغله عن التفكير بغنا بغير مايتمنى "
كان بو فهد بيطلع وشاف يوسف
بوفهد : صباح الخير يوسف اشوفك صاحي
يوسف : صباح الخيرات يبه الحمدلله على السلامه.. كان ودي ابوس راسك بس حالتي حاله
ضحك بوفهد : وصلت ..
فهد :يبه مستعجل ؟
بوفهد : ل كنت راح اروح الشغل مبكر عشان اذا في شغل اخلصه بسرعه وارجع اجلس معاكم
فهد : طيب انا ماراح اعطلك كير
بوفهد : تعال نجلس وقول الي عندك
جلسوا تحت المضله
بوفهد : قول شعندك
يوسف : بصراحه يبه بديت احس بالملل والفراغ انت عارف طبعي ما احب احتك بالناس كثير .. وما اطلع كثير ففكرت اني اشتغل معاك بالشركه
تفاجئ بوفهد : ودراستك ؟
يوسف : اقدر اوفق بين الاثنين وبعدين انا قررت اني اذا خلصت الدراسه اشتغل معاك بالشركه
بوفهد : صعبه يايوسف لاتضيع نفسك حرام ماباقي لك غير السنه هذه وتتخرج
يوسف : يبه صدقني ماطلبت منك هذا الطلب الا وكلي ثقه اني اقدر اوفق بين الاثنين واتخذت هالقرار بعد تفكير
بوفهد : خلاص براحتك بس اوعدني انك ماتهمل دراستك
يوسف : اوعدك يبه
بوفهد : خلاص انا بحطك المدير المالي
يوسف : لأ يبه مابيك ترفعني على حساب غيري انسى اني ولدك في الشغل
حس بو فهد بفرحه داخله من كلام يوسف وان شخص يعتمد عليه وهذا الاحساس اول مره يحس فيه لان ماتعود من يوسف مثل هالتصرف : خلاص انا بسأل مدير الموظفين يوظفك الوظيفة المناسبه .. والحين يلا انا بقوم اروح الشغل
يوسف : بحفظ الله
ارتاح يوسف نوعا ما من هالموضوع وهو داخل شاف امه جالسه تفطر لحالها بالمطبخ
راح يوسف لامه وباس راسها : صباح الخير يمه
ام فهد : هلا بولدي صباح النور .. تعال افطر معاي
يوسف : لا باخذ شور بالاول وبعدين بفطر
مدت ام فهد سندويشه من قدامها : غسل ايدك وكلها لاترد امك
يوسف : من عيوني لحضه بس
ام فهد : شعندك مع ابوك قبل شوي شفتكم تسولفون بالحديقه
يوسف : يمه بصراحه قررت اني اشتغل مع ابوي بالشركه
ام فهد : ودراااااستك !!
يوسف : يمه انتي تعرفيني ماباخذ قرار طايش اقدر اوفق بين الاثنين
ام فهد : وليش القرار الفجائي
يوسف : فهد فتح معاي الموضوع وفكرت في كلامه زين صحيح انه ماقال لي الحين بس انا اشوفه وقت مناسب .. خصوصا اني احس بفراغ وجلستي بالبيت مالها داعي
ام فهد : يوسف شنو الي قلبك كذا ؟
يوسف : مو احسن من قبل ؟
ام فهد : مادري والله .. المهم ترا دراستك اهم من كل شي هي مستقبلك ففكر زين ياولدي
يوسف : هذا انسب شي بالنسبه لي
ام فهد : والله اني خايفه من التغير هذا
وقف يوسف عشان بيروح ياخذ له شور : لاتخافين يمه حطي في بطنج بطيخ صيفي والحين عن اذنج
ام فهد : روح يمه اذنك معاك
------------------------------------
الساعه 9 الصبح
جات مكالمه لابوفهد من ايطاليا وكانت من زوج خالة غنا الوحيده وهي ايطاليه ومتزوجه كويتي وعايشين بأيطاليا وعنده 3 ولدين وبنت ( طلال 23 - خالد20 –مروى 17)
بوفهد : هلا بو طلال
بوطلال : هلا فيك يابو فهد شالاخبار ؟
بوفهد : الحمدلله اخباركم انتوا واخبار طلال والعيال
بوطلال : الحمدلله كلهم يسلمون عليك ..
بو طلال : بغيت اتطمن على غنا .. خالتها من امس وهي تحاول تتصل على غنا بس موبايلها مقفل
بوفهد : الحمدلله غنا طيبه .. تبون تكلمونها؟
بوطلال : اذا صاحيه بس خلوها تكلم خالتها
بوفهد : خلاص انا اخبرها .. طيب يابوطلال مالكم نيه تزورونا
بوطلال: الا في والله
بوفهد : حياكم والله من جدي اتكلم
بوطلال : بأذن الله
بو فهد : انا في الشغل الحين بتصل على البيت يعطونها خبر تدق عليكم
بو طلال : اذا مافيها كلافه عليك
بوفهد : لا شنو كلافه الحين بتصل عليهم
بوطلال : الله يعطيك العافيه يابو فهد مع السلامه
بوفهد : مع الف سلامه
اتصل بو فهد والي رد على التلفون هي غنا
بوفهد : هلا غنوءه .. منزمان صاحيه؟
غنا : توني صاحيه من شوي
بوفهد : خالتج من امس تدق عليج وانتي مقفله جوالك .. فأتصل زوجها اليوم يبون يتطمنون عليج .. اتصلي فيهم
غنا : ان شاء الله بابا.. بتصل فيهم
على طول اتصلت غنا بخالتها " غنا مامره شافت خالتها غير بالصور وكانت كل بين فتره تتصل خالتها عليها .. صحيح انها من اصل اجنبي الا انها تتكلم عربي "
غنا : اهلييييييين خالتي سوري حبيبتي اني كنت مقفله الجوال
فاطمه " كان اسمها جانيت بس بعد مااسلمو سموها فاطمه " : كيفك غنا طمنيني عنك حياتي
غنا : الحمدلله خالتي ..
فاطمه : طيب غنا انا بس شفتك مره لما كنتي بيبي ففكرنا ان نجي نزوركم هنا
فرحت غنا : تتكلمين جد خالتي
فاطمه : أي غنوءه عشان اشوفك ومروى بنتي بعد
غنا : وينها مروى عطيني اكلمها
: مروى مو هنا
غنا : طيب سلمي لي عليها .. ومتى راح تجون
فاطمه: بعد اسبوع ان شاء الله على الخميس الجاي
غنا : بنتظر جيتكم على احر من الجمر
فاطمه : وانا اكثر ياعمري .. يلا مع السلامه وسلمي على ام فهد واخوانك
غنا : يوصل خالتو .. مع الف سلامه
" انبسطت غنا كثير بالمكالمه خصوصا ان خالتها راح تزورهم بالسعودية .. "
طلعت من الغرفه وشافت ام فهد قدامها واول ماشافتها ام فهد صدت عنها
راحت غنا تركض ووقفت قدام ام فهد " طبعا غنا ماغلطت على ام فهد بس قالت في نفسها مهما كان هي بمقام امي ومو غلط اني اعتذر منها "
غنا : يمه للحين زعلانه مني
ام فهد : والي سويتيه هين
غنا : اسفه يمه ماتتكرر
ام فهد : وشنو يفيد الاسف انتي خربتي على البنت حرام عليج
غنا ( اتمنى انج ماتزعلين مني بس هم انبسطت ان فهد مايبي ياخذ منال ) : طيب كيف ارضيج قولي لي
ام فهد: لاتدخلين في فهد ويوسف واحمد لاتنسين انج مو اختهم عن حق و حقيقي
غنا : بس انا اشوفهم مثل اخواني .. بس مثل ماتشوفين يمه ماراح اتدخل
" وقربت من ام فهد وباست راسها " : ارضي علي يمه
ام فهد : خلاص رضينا بس روحي عني
انبسطت غنا : يمه .. تسلم عليج خالتي فاطمه وتقول ان شاء الله راح تزورنا
ام فهد من غير نفس : الله يسلمها وحياها الله .. وانا اقول ليش كل هالنشاط والحيويه فيج
ابتسمت غنا : اكيد انبسط واتنشط عشانج رضيتي عني وعشان خالتي راح تزورنا
ام فهد : ومتى راح تجي ؟
غنا : على الاسبوع الجاي ان شاء الله وهم راح يتصلون فيكم
ام فهد : ايه خليهم يتصلون قبل عشان نستعد لضايفتهم
غنا : لا اكيد ماراح يجلسون هنا بيجلسون بفندق
ام فهد : هذا مو من شيم عمج وانتي عارفته
غنا : ايه صح ... "
ام فهد : يلا انا بروح اتصل بعمج اشوف شنو يبي على الغدا
غنا : اوكي
" كان يوسف طالع من غرفته وشاف غنا تنطط مبسوطه "
يوسف : الي يشوفك الحين مايقول عنك كنتي زعلانه
غنا : تبيني ابقى زعلانه ؟
يوسف : اكيد لا بس شنو الي باسطج ابسطيني معاج
غنا : خالتي راح تجي من ايطاليا
يوسف : اها عشان كذا مبسوطه
غنا : أي خصوصا اني عمري ماشفتها بس بالصور
يوسف : ان شاء الله يجون بالسلامه .. هي عندها عيال ؟
غنا : أي ولدين وبنت طلال قدك وخالد قد احمد اما مروى فهي اصغر مني بسنة
يوسف : اها اساميهم عربيه
ضحكت غنا : ابوهم كويتي وازيدك من الشعر بيت خالتي اسمها فاطمه .. انا مامره سولفت لك عنهم ؟
يوسف : لا والله مامره
غنا : احيانا لما اكلمهم اتكلم عنكم وكثير متشوقين يتعرفون عليكم
يوسف : وانا هم نفس الشي
غنا : خصوصا طلول .. كثير حاب يتعرف عليكم
يوسف : ومنو طلول على قولتج الي قدي ولا الي قد احمد
غنا : لا قدك انت
يوسف : حياهم الله كلهم ومتى بيجون ؟
غنا : الاسبوع الجاي
يوسف : يلا انا نازل
غنا : اوكي وانا معاك عشان الحين اصلا راح يحطون الغدا ومييييييييييييييته جوع
" نط احمد من وراها " : انا ابي اعرف هالاكل كله وين يروح
ضحكت غنا : انت من وين طلعتي لي .. ماكنت بالبر
احمد : تبيني اعيش بالبر
غنا : لا بس بالعاده تجلس يومين
احمد : شسوي اشتقت لج
غنا : احم احم .. مايستغني عني
احمد : لاتصدقين عمرج كثير
ضحك يوسف على نجرتهم ونزل " كان يوسف يتضايق لما يشوفهم مع بعض بس بعد ماتغير وتفهم كل شي تغير حتى نظرته للامور "
------------------------
الغدا
بوفهد : يوسف كلمت مدير الموظفين وقالي بما انك حاب تتوظف حالك حال أي متقدم مقبول .. فبما انك مابعد تتخرج فراح تكون بقسم المحاسبه .. اما بعد التخرج فراح تصير مدير الماليه وانت قدها وقدود
يوسف : حلو وانا موافق
احمد وغنا منتفاجئين وهم فهد
فهد : يوسف انا قلت لك بعدد ماتتخرج ليش الحين
يوسف : فكرت في كلامك ولقيته بمحله والحين انا فاضي بدل هالفراغ اشتغل افضل لي وعشان اكتسب خبره
غنا : راح تشتغل ؟!! ودراااااااستك ؟
يوسف : لاتخافين على اخوج مخه يوزن بلد
احمد : الاخ يمدح نفسه
ضحك يوسف : احم احم ماقلت شي غلط
فهد : وانا اشهد
يوسف : لالا احرجتني
بوفهد : يوسف مابيك تخيبيني
يوسف :ابشر يبه
بوفهد : شفيج ساكته يام فهد
ام فهد : لا ولا شي بس خايفه على يوسف
بوفهد : لاتخافين ولا شي قدها ان شاء الله
فهد : انا كلي ثقه فيك يايوسف
يوسف : ان شاء الله قدها
احمد : تراني غرت شكلي بكنسل كلية المعلمين وبدخل مع ابوي بالشركة
بو فهد : هههههه انت خلص دراستك ويصير خير
احمد يهمس في اذن غنا : فشلوني
فطست غنا من الضحك على طريقة احمد
ام فهد : بوفهد اذا خلصت من الغدا ابي اكلمك في موضوع
بو فهد : ان شاء الله
----------------------------------------
بعد الغدا
بو فهد في مكتبه مع ام فهد
بو فهد : خير ؟ يا ام فهد
ام فهد : خير ان شاء الله بس انت دريت عن فهد وان يبي يتزوج ؟
بو فهد : لا والله ماقال لي .. والله فرحتيني وحاط احد في باله ؟
ام فهد : انت تدري بعد ماتزوجت حنان شال الفكره من باله والحين مافي بنت معينه بباله
بو فهد : خلاص الحين بأيدج تختارين له العروس المناسبه
ام فهد : لقيت له بنت سنعه لكن الله يهداها بنت اخوك فرت راسه وقال هالبنت بذات ما ابيها
بوفهد : ليش ؟
ام فهد : مادري عنها تقول معاها بالمدرسه وتصرفاتها ماتعجبها
بو فهد : وليش ماتصدقينها يمكن تكون صادقه
ام فهد : المهم اني بدور له غير البنت هذه
بو فهد : طيب ليش ماتخلين غنا تدور معاج خصوصا البنات ادرى ببعض
ام فهد : اشوف عجبتك الفكره ان غنا اهي الي تحدد منو يتزوج ولدي
بوفهد : والله انا مالي بالسوالف هذه اهم شي تكون بنت تناسب فهد والمواصفات الي يبيها
ام فهد : بأذن الله مابياخذ الا احسن بنت
بوفهد : على خير
--------------------------------------------
اتصلت ساره بغنا
ساره : غنوءه اليوم بقدم في دورة انجلش وابيك تجين معاي تقدرين ؟
غنا : متى بأي وقت ؟
ساره : بعد صلاة المغرب
غنا : طيب بس ليش ماتجين تجلسين معاي وبعدين نطلع
ساره :المفروض انتي تجين مو انا
غنا : لا تعالي عندي فلم تحححححححفه يجنن احمد توه جايبه
ساره تذكرت احمد وقامت تضحك : أي اما احمد مانتوقع منه غير المفاجئات
غنا : طيب شقلتي تجين ؟
ساره : فشله استحي من زوجة عمك
غنا : لا لا عادي تعالي
ساره : اوكي بعطي امي دواها وبجي
-----------------------
العصر الساعه 5
دقت ساره على جوال غنا عشان تفتح لها الباب لكن غنا حاطه صامت وما انتبهت
ساره تتحلطم : الله يهداج ياغنا كذا تسوين فيني ردددددددددددي
كان فهد طالع ورجع للبيت وشاف ساره برا تنتظر
فهد : احم احم
فتح الباب لها : تفضلي
ساره ارتبكت ودخلت تركض
فهد ( اعتقد ان هذه ساره ) وبعد ما تأكد انها دخلت دخل البيت .. بس هم ساره في الصاله وتتحلطم على غنا : ياربي شنو هالاحراج غنا يانذله وينج .. "وتنادي بصوت خفيف " غنااااا
وفهد كان واقف ويضحك عليها .. وراح المطبخ عشان يقول للخدامه تناديها
وشاف غنا بالمطبخ
فهد : غنا حرام عليج صديقتج برا صار لها ساعه تناديج
شهقت غنا وهي ماسكه قالب الكيك وحطته بالمجلى : الحين بتهزئني تهزيء ياويلي
ضحك فهد : الله بهداج بس احرجتيها المسكينه
غنا : لا انا المسكينه الحين
فهد : ليش ؟
غنا : لاني بحصل تهزيئة معتبره
ضحك فهد على غنا وانتظرهم يصعدون وطلع
" فهد حس ان البنت هذه دخلت قلبه من غير مايعرف عنها شي .. بس لايمكن يخلي الشي هذا يتغلب عليه عشان مايكون سبب مشكله ممكن تسويها امه وعارف انه قدها ويقدر يبعدها عن راسه "
"لكن ساره الي غصبا عنها تفكر فيه بالرغم ان حتى اهي ماشافته الا مره بس كلام غنا عنه خلاها تتأثر بشخصيته وتبدأ تفكر فيه .. وهي ماتختلف عن فهد في انها تحاول تبعد الفكره عنها خصوصا ان هي متأكده ان ام فهد لايمكن تقبل فيها "
غنا : منو فتح لج الباب
ساره : سكتي بس لا اذبحج انتي دايما تحرجيني لاعاد تقولين لي تعالي
غنا : كنت عارفه اني بتهزء
ساره : تستاهلين
غنا : فهد بعد هزئني يقول لي احرجتي البنت
ساره : هذا فهد ؟
غنا : يعني ماتعرفينه
ساره : تبيني انط بوجهه لا قلت يمكن يوسف
غنا : من ناحية الشكل فاجملهم يوسف لكن كهيبة مافي مثل هيبه فهد
ساره : وانتي ماتملين تمدح في اخوانج
غنا : لا الله يخليهم لي قولي امين
ساره : اميييييييييييين
غنا : قومي غرفتي
ساره : بس لانطول عشان ارووح اسجل كورس .. انتي مابتسجلين
غنا : تصدقين احيانا افكر اني اسجل واحيانا لا
ساره : والله انج ماتحتاجين الانجلش عندج 10 على 10
غنا : لا بس الشهادة تنفع
ساره : دخلي اذا تحسين فيها فايده
غنا : بستشير بابا بالاول
" سئلت غنا عمها ووافق على تسجيلها وسجلت مع ساره .. وكان الكورس 3 ايام في الاسبوع لمدة شهر لانها دخلت المستويات الاخيره لان غنا عندها لغة بشكل كبير "
-------------------------
بعد اسبوع
غنا كانت فرحانه وماسكه البخور تبخر الصاله والبيت عشان خالتها راح تجي
ام فهد : الي اعرفه ان الاجانب مايحبون البخور ومايعرفونه
غنا : بس لاتنسين ان خالتي زوجها كويتي
ام فهد : المهم لاخلصتي تبخير الصاله والمجلس ابيج تساعديني في غسيل الفواكه
غنا : من عيوني يمه
اتصل بو فهد على البيت ورفعت غنا السماعه
بوفهد : هلا
غنا : هلا فيك بابا
بوفهد : ان شاء الله جهزتوا كل شي
غنا : أي بابا
بوفهد : لان انا الحين بالمطار بستقبلهم
غنا : جد واخيراااااااا
بوفهد : ايه خلكم جاهزين لاستقبالهم
غنا : ان شاء الله
" حست غنا بتوتر لانها اول مره راح تشوفهم .. وهل راح تتكلم معاهم براحه مثل ماتكلمهم بالتلفون .. كل هذا كان يدور براسها "
"دخل بوفهد بعد نص ساعه ودخل الرجال المجلس ونادى على ام فهد تجي تستقبل فاطمه
دخلت ام فهد فاطمه ومروى بنتها في غرفة الحريم الخاصة واستقبلتها احسن استقبال
ونادت غنا عشان تسلم عليهم "
غنا كانت كثييييييييير متوتره واول مادخلت وشافتهم حستهم غريبين ودخلت وسلمت على خالتها عادي بس خالتها لمتها بقوة وهي بدورها حضنتها وفجأه حست نفسها تبكي في حضنها
مسكت فاطمه غنا وخلتها قبالها عشان تطالعها من قريب ودموعها على خدها فرحانه ببنت اختها الي ما شافتها الا لما كانت صغيره : كبرتي ياغنا .. بعيده عنا
غنا تمسح دموعها وتهز راسها بالايجاب
مروى : وانا مالي سلام ؟؟
ضحكت غنا : سوري مروى ..وسلمت عليها
ام فهد ( ياليت ياخذونج ونفتك )
جلسوا يسولفون مع بعض لحد وقت الغدا
------------------------------
بو فهد : زارتنا البركه يابو طلال
بو طلال : البركه فيك يابو فهد .. فاطمه حنت علي الا تبي تجي عشان تشوف بنت اختها
بوفهد : حياكم بأي وقت .. وانتوا ناوين تجلسون هناك على طول ؟
بو طلال : لا ننتظر طلال يخلص الماجستير والدكتوراه وبنستقر بعدها في الكويت
بو فهد : يعني باقي عليكم كثير
بو طلال : أي والله ماتصجق شكثر ابي ارجع لديرتي
بو فهد : أي والله الواحد مايرتاح الا بديرته
............... وجلسوا يكملون سوالف
وهم فهد ويوسف واحمد كانوا جالسين يتعرفون على طلال وخالد
بعد ماتغدوا طلعوا بالحديقه ..
طلال وخالد : فهد ممكن نسلم على غنا
فهد : أي اكيد لحضه اناديها
طلال : لاخلنا احنا نروح نسلم عليها اكيد بتستحي اهي تجي هنا
فهد على راحتكم
راح فهد وخبر غنا ان طلال وخالد بيسلمون عليها
لبست غنا عباتها وحطت الشيله على راسها
طلال : هلا غنا شخبارج
غنا مستحيه : الحمدلله شخباركم انتوا
طلال وخالد : الحمدلله ..
خالد : لايكون مستحيه منا ؟
ابتسمت غنا بخجل : لا بس لاني اول مره التقي فيكم
فهد : اتركم على راحتكم
جلست غنا ومروى وطلال وخالد على الطاوله الي بالحديقه وجلسوا يسولفون
وطلال طول الوقت مارفع عينه عن غنا ( الي تميزت بجمال عربي اصيل وماكانت تشبه الاجانب الا كلمحة بسيطه بس ) الي خلا غنا ماتلتفت عليه ابد وهي ترد عليه
مروى علقت على نظراته: طلال نحن هنا
انحرج طلال من تعليق اخته بس مامنعه من الرد فقال : اعذريني يا اختي بصراحه الجمال العربي وبس
استغربت غنا من جرئة طلال وحمرت خدودها " طبعا لانهم عايشين طول عمرهم في ايطاليا كانوا منفتحين شوي "
غنا تبي تغير الموضوع: مروى انتي بأي سنه ؟
مروى : السنه الجايه بتخرج
غنا : اها انا تخرجت السنه هذه
طلال : وكيف النسبه ؟
غنا : 98 ونص
طلال : ماشاء الله .. واي قسم بتدخلين
غنا : بأذن الله راح ادخل طب قسم الاعصاب
طلال : حلو
خالد : لا اجل طلعتي مثلي .. نفس نسبتي وبنفس القسم بعد
غنا : جد ماشاء الله .. حلو
طلال : ماتدري يمكن تشتغلون بنفس المكان
خالد : أي والله ماتدري
" احمد بعد ماجلس جنب الرجال شوي جا وانظم لغنا وعيال خالتها "
احمد : مسموح اني اجلس معاكم
طلال : اكيد احمدو
غنا : تعال احمد اجلس جنبي
خالد : الا بسألك احمد انت شنو تدرس
احمد : انا في كلية المعلمين بس شكلي مابدخل تدريس بشتغل مع ابوي بالشركه
" انتبه احمد لطلال كيف جالس وعينه على غنا طول الوقت ومايسولف مع غيرها .. واحمد لايمكن يترك موقفمل كذا ومايعلق "
احمد : طلال
طلال : هلا
احمد : ترا مو بس غنا جالسه هنا
طلال : مو كأنكم انتوا ومروى ملاقيف
مروى مسكت الملعقه الي كانت تحرك فيها الشاي وضربت راس طلال : بس اكلت البنت بعيونك
" احمد انقهر منه وكان وده يذبحه من جرائته "
احمد : خلاص طولتوا بالجلسه قومي غنا انتي وبنت خالتج مع الحريم
غنا : ان شاء الله .. وهمست في اذنه : شرايك في مروى مو حلوه ؟
احمد : لا مايعجبوني الشقر
غنا : الحين صرت ماتحب الشقر
احمد : اقول قومي طسي لا اذبحج واذبح ولد خالتج معاج
غنا : أي واحد فيهم
طلال : شنو قاعدين تحشون من ورانا
احمد : سر بين اخو واخته انت شكو
طلال : احمدو شكلك حاقد علي من قلب
احمد : حاشاك ياطلال ..
طلال : امزح معاك ..
خالد : ترا طلال من النوع الاجتماعي وبسرعه يمون .. لاتزعلون منه
احمد ( احد قال كون محامي عنه ) : طيب شرايكم نلعب كورة الطائره
طلال : اوكي .. ويوسف وفهد
احمد : أي كلنا بروح اناديهم
" ولعبوا وكانوا مروى وغنا واقفين يتفرجون "
وقت ماكانوا يلعبون قرب طلال من غنا وقال لها بهدي الفوز هذا لبنت خالتي الوحيده
" يوسف بعد ماشاف الموقف هذا تنرفز وصب غضبه على قبضة ايدينه . حاول يسيطر على اعصابه بس هذا الشي غصبا عنه .. غمض عيونه وكانه مايبي يشوف تصرفات طلال الجريء "
"استحت غنا من تصرفات طلال بس ماتقدر تمنعه لان عاداته وتقاليده تختلف عنهم خصوصا انهم عايشين في ايطاليا "
مروى : غنوءه شكله طلال حاط عينه عليج .. مثل مايقولون حب من اول نظره .. او بالاحرى اعجاب من اول نظره
غنا تراقب يوسف واحمد وحستهم معصبين ( الله يعدي على خير يوسف واحمد مايحبون التصرفات هذه الله يستر )
مروى : تصدقين غنا طول ما احنا بطياره طلال جالس ويتكلم عنك
غنا : جد .. مع ان مايعرفني غير بالمسن وكم مره كلمته
مروى : اول ماطرت امي ان احنا بنجي هنا نط اول واحد .. بس عشان يشوفج
غنا مستحيه وحبت تغير الموضوع لان مروى شكلها ماراح تخلص : مروى شرايج اوريح البوم صوري لما كنت صغيره احسن من مقابل الشباب وهم يلعبون
مروى : ايه يلا وناسه احب اتفرج على البومات
" طلال كان يراقب غنا لحد مادخلت .. "
قرب خالد منه وهمس له : شكلك طحت وماحد سما عليك
طلال : اصلا هدف جيتي غنا وبس وانت عارف
خالد : بس اعتقد ان في منافس لك
طلال : لا كلهم مثل اخوانها
خالد : وتشوف اذا ماكان لك منافس
طلال : ماعاش الي ينافسني ياخالد
احمد : ارمي الكوره ياطلال .. وخالد لاتشغله نبي نخلص القيم
" بعد مالعبوا وخلصوا "
بوطلال : ماقصرتوا يابو فهد اكركم الله .. الحين لازم نروح نريح في الفندق عشان تعب السفر
بو فهد : لا يابو طلال .. شنو هالكلام ضيافتكم عندنا
بوطلال : لا ماحبينا نثقل عليكم .. وعشان حريمكم ياخذون راحتهم
بو فهد : لا والله ماتردني يابو طلال حلفتكم بالله واكيد غنا ماشبعت من خالتها .. خلاص قول تم
بو طلال : ماعاش من الي يردك يابو فهد
بو فهد : ادخلوا اوريكم غرفكم ترتاحون فيها
بو طلال : شكلهم العيال مبسوطين مع بعضهم نخليهم براحتهم بندخل انا والمدام
"استأذن ابو فهد من بو طلال بعد ماوراهم غرفهم وراح الشغل هو وفهد .. "
---------------------------
في غرفة غنا
مروى : غنا ليش ماتجين تصيفين معانا في ايطاليا .. ابوي قال اذا جيتي معانا مستعد يرجعج هنا قبل ماتنتهي الاجازه
غنا : انا ؟!! اصيف بالحالي احسها مستحيل
مروى : منو قال لحالج معانا ؟
غنا : ماتعودت اسافر من غير ابوي وامي واخواني
مروى : جربي هالمره
غنا : اصلا ما اتصور نفسي من غيرهم هم اهلي الي ما اقدر استغني عنهم ولا يوم
مروى : يعني انتي عايشه معاهم مثل اختهم ؟
غنا : أي ومامره حسسوني اني مو اختهم يحترموني ويخافون علي مثل اختهم
مروى : الحمدلله .. امي كانت على طول تحاتيج حتى احيانا كانت تفكر تاخذج معاها
"غنا تصورت للحضه ان لو اخذتها خالتها كيف راح تعيش فتغيرت ملامح وجهها "
انتبهت مروى لغنا وغيرت الموضوع على طول والتمست من غنا تعلقها بعمها وعياله "
مروى : غنا عندج افلام ؟
غنا : الي تبينه.. انا حاطه بغرفتي الثانيه بروجكتر وافلام على كيف كيفج امشي واختاري الفلم الي يعجبج ..
" وجلسوا على الافلام لحد صلاة المغرب .. وبعد ماصلوا انزلوا يجلسون مع ام فهد وام طلال "
ام فهد كانت طول الوقت تراقب مروى وعجبتها تصرفاتها وخصوصا شكلها بس كانت تقول في نفسها ( لو امج مو ايطاليه كان خطبتج ليوسف انتي حلوه ويوسف ماشاء الله عليه قمر بس لو مو امج اخخخخخ )
" يوسف كان يتميز بجماله العربي الاصيل .. طويل القامه وبشرته برونزيه وكانت ملامحه حاده وعيونه عسليه فاتحه والي ميز شكل عيونه كانوا وساع ورموشه كثيفه .. "
ام فهد : انتي بأي سنه مروى ؟
مروى : السنه الجايه ثانويه عامه
ام فهد : بالتوفيق
فاطمه : غنا تعالي جلسي جنبي ماشبعت منج
جلست غنا جنب خالتها وخالتها كانت محاوطتها بأيدنها
فاطمه : تصدقين ياغنا ماتشبهين امج الا بس يمكن انفج وفمج والغمازات
ابتسمت غنا : خالتي كيف كذا تتكلمين عربي
فاطمه : الكل جذي يستغرب مني ..انا عن نفسي مادري كيف تكلمت بالطلاقه هذه
مروى : دروس ابوي
" ام فهد كانت مستغربه منهم حستهم ناس بسيطين ومرحين .. وخاصة فاطمه كانها عربيه .. "
وجلسوا يسولفون لحد وقت العشا
بعد ماتعشوا توجهوا لغرفهم ينامون .. ومروى راحت تنام مع غنا بغرفتها
غنا : مروى انتي نامي بسريري انا بنام على الفرشه
مروى : لا والله ماحزرتي .. اخذي راحتج لاتعتبريني ظيفه
غنا : بس مافيني نوم الحين لاتقولين بتنامين
مروى : أي مافيني نوم .. خلينا نكمل الفلم الي قطعناه لما نزلنا تحت
غنا : لحضه عشان تكون السهره حلوه بروح اجيب حلويات وفشار وكولا شرايج
مروى : خوش شي .. اجي معاج ؟
غنا : لا مايحتاج ارتاحي ..
مروى : اوكي انتظرج
نزلت غنا وراحت للمطبخ تجهز الاغراض .. وانتبه طلال الي كان طالع من دورة المياه ان غنا كانت واقفه في المطبخ واستغل الفرصه
طلال : غنا مانمتي ؟
تفاجئت غنا من طلال وحطت الشيله براسها
ابتسم طلال : سوري غنا
غنا : بغيت شي ..
طلال : الله لايهينج عطيني ماي
غنا : ان شاء الله
صبت له الماي ومدته له
طلال : مشكوره .. شكلي باخذ الكاس معاي ايطاليا
غنا طافها قصده : ليش عجبك شكله ؟
طلال : لا مو شكله الي عجبني
ارتبكت غنا لما فهمت قصده : مايغلى عليك .. عن اذنك مروى تنتظري فوق
وطلعت تركض وطلال كان واقف يراقبها
" كان يوسف بينزل يشرب ماي .. وشاف طلال كيف يكلم غنا ورافع كل الكلافه .. طبعا طلال مايقصد شي لانه مثل ماقلت لكم من قبل اهما عايشين برا ومتفتحين فكان بالنسبه له عادي ومايحس ان الي يسويه خطأ "
يوسف تنرفز وعصب ولما التقى بغنا مسكها وقال لها : قولي لولد خالتج ترا عاداتنا تختلف عنهم اشوفه ماخذ راحته
غنا : يوسف ايروح فكرك بعيد اهما كذا تحملهم شوي
يوسف : عاجبتج تصرفاته
غنا : يوسف الله يخليك مابي مشاكل كلها كم يوم تحملهم
يوسف : مارديتي علي عاجبتج تصرفاته ؟
غنا : اكيد لا بس ما اقدراقوله بطل مو حلوه بحقي وبعدين هو ولد خالتي
يوسف : تقصدين ان مثل ما انت ولد عمي اهو ولد خالتي
زفرت غنا زفره حاده وعارفه ان يوسف ماراح يسكت : لا يايوسف مو كذا والحين اتركني لاتخليهم يحسون ان في شي .. وبعدين تأخر على مروى فوق
يوسف : اتمنى ان مو هذا قصدج وانا بتركك الحين بس لاعاد لاتتصرفين كذا
غنا : على امرك .. اتركني الحين
"ترك يوسف غنا وصار يدور على طلال بعيونه بس ماشافه.. بس طلال كان يراقب يوسف بس بدون مايسمع شي حس ان يوسف تضايق منه وقال في نفسه ( صدقت ياخالد يوم تقول لي في من ينافسك "
كيف بتواجه غنا تصرفات يوسف وطلال .. وكيف يتصرف يوسف مع هذه المواقف بعد ماوعد نفسه ان مايفكر بالطريقه هذه .. وكثير من الاحداث انتظروها في الفصول الجايه
#14