الفصل 2
الفصل الثاني ...
صحى فهد من نومه غسل وماحب يطلع من غرفته لان كان شاغل فكره كلام فيصل وصار يفكر بجديه في موضوع الزواج خصوصا بعد ماتزوجت حنان بنت خالته الي كانت مسميه له من هو صغير وماتصور نفسه مع غيرها .. فقرر انه يتزوج عشان ينساها .
فصارت فكره تجيبه وفكره توديه اهو كان تفكيره انه يختار البنت بنفسه وماحب فكرة الزواج التقليدي لكن بعد الي صار قرر يفاتح امه بالموضوع ..
قطع حبل افكاره صوت بوفهد من برا الغرفه
فهد "ابوي جا ؟ " فز من سريره وراح فتح الباب وشاف ابوه قدامه سلم على ابوه وباس راسه : اسف يبه ما استقبلتك في المطار ولا حتى في البيت
بو فهد : اصلا انا مابغيت اقولكم خصوصا اني وصلت بدري وانا عارف انك انت ماتنام زين الا الخميس تفكريك كله في شغلك
فهد (فهم تلميح ابوه ) : والله يايبه الشغل مايخلص وانت عارف كيف
بوفهد : عارف يافهد ان الشغل مايخلص بس لازم تشوف نفسك شوي شوف حياتك مو كل شغل شغل
فهد : على امرك يبه
بوفهد : يلا انا طالع مشوار
فهد : اجي معاك ؟
بو فهد : لا مايحتاج
فهد : اوكي
كانت غنا ماره وفهد بيدخل غرفته
غنا : صباح الخير فهد
فهد : هلا هلا صباح النور
غنا : اكيد اكيد مافطرت
فهد : ههههههه عارفتني
غنا : طيب اسوي لك فطور
فهد : لامايحتاج تكلفين على نفسج خلي الخدامه
غنا : لا انا بسوي لك اليوم
فهد : خير شالمناسبه ؟
غنا : لا بس عشان بابا جا
فهد : اها عشان كذا .. اوكي اذا بتسوين لي مابقول لا
-------------
كانت غنا تجهز الفطور لفهد وشافتها ام فهد
ام فهد : غريبه غنا داخله المطبخ
غنا : صباح الخير يمه
ام فهد : صباح الخير .. شعندج داخله المطبخ
غنا : اسوي فطور لفهد
ام فهد : غريبه وشالمناسبه
غنا : ولا شي صاحيه كلي نشاط . . احسبج يمه ؟
ام فهد : لالا انا باكل لي أي شي على طاير ودام فيك نشاط على قولتج اذا وديتي الفطور لفهد رتبي غرفة يوسف انتي تدرين انه مايحب الخدم
غنا : ان شاء الله ..
ام فهد : صح تذكرت شي بو فهد جاي من السفر يعني اكيد بيجونا ظيوف روحي اليوم السوق واخذي لج ملابس لايقولون عنا مانلبسج
غنا وهي خانقتها العبره : بس يمه الظيوف على طول يجون وانا متشيكه على الاخر ومامقصرين انتوا عني بشي شمعنى الحين تبيني اتشيك ؟
ام فهد : لايصير لسانج طويل وقولي ان شاء الله وبس
غنا : ان شاء الله
ام فهد : خلي السواق يوديج واخذي الخدامه معاج
غنا : بس
ام فهد : بس شنو
غنا : يوسف مايخليني اروح مع السواق اخاف يخانقني
ام فهد : فكينا قولي له انا الي قلت لج ..
راحت غنا تودي الفطور لفهد وكان منشغل كالعاده
غنا : فهد فهد
التفت فهد على غنا ورفع النظاره : اوه من متى انتي هنا اسف والله
غنا : فهد انت ليش تسوي كذا بنفسك ريح شوي مو بس شغل شغل
ضحك فهد : شرايج تشتغلين عني وتفكيني
غنا : اذا اقدر ليش لا تراني قدها وقدود .. بس جد فهد ليش على طول تشتغل انت حتى ماتتمشى وماتطلع معانا وماتقعد معانا
فهد : ليش قمتي تشتاقين لي ؟
غنا : اكيد صرنا مانشوفك
سكر فهد الملف الي قدامه : وهذا سكرنا الملفات وبطلع بعد من المكتب وبروح الحديقه شرايج الحين رضيتي علي ؟
غنا : أي كذا
راحوا الحديقه وجلسوا يسولفون وجا معاهم احمد
احمد : اوه اوه فهد جالس بالحديقه غريبه شصاير ؟
فهد : والله اسأل اختك اللحوح
غنا : هههههه شفت احمد اني قدها وقدود
احمد : انا اشهد انك قدها وقدود
فهد : طيب شرايكم نلعب بيبي فوت
غنا : وااااو
احمد : منو قال بتلعبين انا وفهد بنلعب بس هذا لعبة شباب مو بنات
غنا : ياسلام عليك لا مو بكيفك
فهد : خلاص انت وغنا في فريق وانا لحالي
احمد : لا انا احتج لا للتفرقه والغش لازم نكون سواسيه
جا من وراهم يوسف : لاتحتج ولا شي انا بلعب معاكم
نططت غنا : يااااي وناسه يعني بقدر العب
يوسف : بما ان غنا هي اصغر وحده فينا فبنخليها تختار منو الي بيكون معاها في الفريق
فهد واحمد يطالعون بعض ومستغربين : اوكي واحنا موافقين
غنا : بغمض عيوني وانتوا بدلوا اماكنكم وانا بختار عشوائي اوكي ؟
الشباب : اوكي
طاح اختيارها على احمد ..
وكملوا لعبهم وكان طول الوقت يوسف يضحك ويجنن غنا " يعني انقلب 180 درجه "
والكل كان مستغرب من يوسف
يوسف : شفيكم تطالعوني ؟!!
فهد : لا ولا شي خليك رايق على طول كذا
يوسف : وليش شنو شايفيني
غنا : لا لا هذا انت على طول من قال غير كذا
ترك يوسف اللعب ومشى : غيرت رايي مابي العب
احمد : الله يهداك يافهد شوف شنو سوا
فهد : هذا لان يوسف داخله ماتغير
غنا : بس فهد اهو يحاول والمفروض احنا نشجعه
فهد : خلاص انا بعتذر له
------------------
رجع بوفهد من برا وهو كان داخل صادف ام فهد نازله من الدرج وكانت ماسكه عباتها
بو فهد : على وين
ام فهد : والله اتصلت علي ام رائد تبينا نسير على حرمه جايه من سفره
بو فهد : توني اليوم جاي من السفر وانتي بتطلعين ؟
ام فهد : وشفيها يعني انت كل يومين مسافر تعودنا
بوفهد : جلسي ياحرمه مو كل طالعه شوفي عيالج شوفي حاجاتهم
ام فهد : صاروا رجال كل واحد اطول مني مو محتاجيني
بو فهد : ومنو قالج هالكلام مره سألتي نفسج اذا فهد يبي يتزوج او لا مره سألتي نفسج يوسف مايحب يطلع وماعنده اصدقاء ليش مره شفتي احتياجات احمد وغنا
ام فهد : والله اذا فهد يبي يتزوج يجي بنفسه يقولي لاني سالته وقال مايبي ومايبني افتح السيره معاه اما يوسف فهو من عمره وهو مايحب يختلط باحد وأحمد ماشاء الله عليه الحمدلله شايل عمره اما غنا فهي بنت اخوك مو بنت اخوي انا
بو فهد : لو بطولها معاج مابنخلص وغنا امانه عندي وايانا واياج تسوين أي شي يظرها
ام فهد : انت مره شفتني اذيتها .. انا ماعلي منها واعاملها عادي
بو فهد : انا تعبت منج اطلعي بكيفج
راح غرفته وهو معصب وام فهد ولا اهتمت لانها فعلا تعودت على كذا
كان فهد نازل من الدرج وحس في ابوه انه مو على بعضه ولما شاف امه طالعه قال في نفسه هذا اكيد من امي (انا لله وانا اليه راجعون امي مادري متى الله يهديها ) خاف فهد ان يرتفع السكر على ابوه فقال خليني اروح اقيس السكر عنده ابوي احيانا يهمل السكر واذا ماصرنا وراه مابيهتم
دق الباب وماسمع صوت ..دقه مرتين و 3 وهم نفس الشي بدا يدخل قلبه الخوف واعصابه صارت جليد (ما اتوقع نام وبالسرعه هذه ) فتح الباب على طول وماشاف احد في الغرفه هذا الشي طمنه
فهد : اكيد راح المكتب بخلي الخدامة تسويه له كاسة ليمون بس بالاول بتأكد من السكر
توجه فهد المكتب وكان الباب مفتوح شوي توه بيدخل الا سمع الي ماتوقعه من ابوه ابد في يوم من الايام كان بو فهد يكلم حرمه في التلفون وهذا هو حواره
بوفهد : اسمعيني زين ياعمري والله انا الحين اعصابي تلفانه انتي لاتزيدينها علي .. ان شاء الله عن قريب بس انتي اصبري شوي ...طيب الحمدلله الحين طمنتيني وشلون بدر ؟ ... وقفل الجوال وهو يكلم نفسه .. : انا شنو سويت ياربي لو ماكنتي كذا يا ام فهد كان ماصار الي صار ..
"سمع صوت حركه خفيفه ورا الباب و ان في احد واقف وخاف ان الي كان ورا الباب سمعه راح بيفتح الباب وماشاف احد"
اما فهد فكان واقف ورا زاويه مجرد مارجع بو فهد لمكتبه رجع فهد لغرفته وافكار توديه وافكار تجيبه (ياترى من كانت هذه الي يكلمها .. بعدين من الكلام الي دار هذه حرمه ابوي يعرفها منزمان .. في البدايه قلت هذه عمتي هناء بس بدر منو بدر ؟ اهي ماعندها ولد اسمه بدر .. زوجته ؟؟!! لالا اوووه انا ليش تفكيري يروح بعيد يمكن حرمه معاه في الشغل برا )
" ورجع فهد لشغله كالعاده .. بس غصبا عنه الافكار تروح وتجي والشك في داخله مهما حاول يبعد الفكره هذه براسه لان هذا الشي ماتعوده على ابوه ابد ابد "
-----------------
استعدت غنا ولبست عبايتها واتصلت بساره عشان تكون جاهزه وتروح معاها السوق وقبل ماتروح راحت تكلم عمها عشان تستاذن منه لانها نست لاتقول له
دقت غنا الباب
بوفهد : منو ؟
غنا : انا بابا ممكن ادخل
بوفهد : تعالي بنتي ادخلي
غنا : بابا نسيت لا اقولك اذا ممكن اروح السوق او لا ممكن اروح ؟
بوفهد : اكيد بس لا تروحين لحالج على الاقل اخذي الخدامه
غنا : طيب بابا انا قلت راح امر على صديقتي ساره
بوفهد : مو المفروض تروح معاك ام فهد بس انا عارف ان هذا لايمكن يصر منها
غنا : لا يبه امي تتعب من السوق تعرفنا احنا البنات مو أي شي يعجبنا ولازم نحوس السوق حوس
بوفهد : طيب لحضه انتظري شوي
راح ورجع معاه 500 ريال وعطاهم لغنا
غنا : لا بابا عندي انت توك معطيني وانا ماصرفتهم
بوفهد : خليهم عندج دخليهم في حسابج
باست غنا راسه: مشكور بابا
بوفهد : انتبهي لنفسج
غنا : ان شاء الله بابا
---------------------
طلعت غنا وكان يوسف فاتح باب غرفته ومشغل الاستيريو بصوت عالي ويجري على جهاز السير ضحكت غنا على يوسف دايم فوضاوي
انتبه يوسف لغنا : غنا تكفين قفلي الباب عجزان لا اقوم اخاف ابوي يصرخ علي ليش معلي صوت الاستيريو
غنا انتبهت ليوسف انه يأشر عليها : يوسف مااسمع ما اسمع
يوسف : شنو تقولين انتي
غنا : ماااااااا اسمعك " رفعت يدها يلا باي باي انا بمشي لا تأخرني "
عصب يوسف من تطنيشها قفل المسجله طلع من غرفته وسحبها من شنطتها : انتي ليش تحبين تغيضيني
غنا : شكلك جد معصب لايكون جد معصب
يوسف : لا بس ليش ماتردين وبعدين ماطلبت منج شي كلها تسكيرة باب
غنا : اها وانا اقول يوسف شنو يقول
يوسف : يعني ماكنتي تسمعين
غنا : امانه يوسف امانه الحين انت معلي صوت المسجله كيف تبيني اسمعك
يوسف : يعني مو تطنيش ؟
غنا : مو تقول كلها تسكيرة باب .. والحين يلا عن اذنك لا اتأخر
يوسف : ليش وين رايحه ؟
غنا : بروح السوق مع الخدامه وصديقتي ساره اوكي ؟
يوسف : ليش شايفتني بمنعج
غنا استغربت ان يوسف ماقال شي
غنا : لا بس اخبرك
يوسف : طيب قلتي لامي وابوي
غنا : امي هي الي قالت لي وانا طلبت الاذن من بابا
يوسف : هذا اهم شي
يوسف رجع غرفته وقبل لايسكر الباب التفت على غنا : باي باي
ابتسمت غنا ابتسامة استغراب وارتياح بنفس الوقت
----------------------
بعد ساعه
رجعت ام فهد من برا وراحت على طول تدور على غنا
ام فهد : غناااااا ياغناااا
"مافي احد يرد طبعا لان غنا بالسوق "
ام فهد : هذه الغبيه وين راحت " وكانت تتحلطم بصوت عالي "
يوسف سمع امه تناديها
يوسف يكلم امه في الدرج من فوق : يمه غنا راحت السوق
ام فهد : راحت السوق ؟!! وليش
يوسف : ليش مو انتي الي قلتي لها ؟!
ام فهد : ايوا ايوا صح نسيت
يوسف : اها اوكي يلا انا بروح اكمل تمارين
---------------------
فهد كان مازال يفكر في مكالمة ابوه ومو عارف يزيح الافكار عن راسه حاول يشغل نفسه بالشغل بس مافي فايده .. اخذ له كتاب يقراه بس هم مافي فايده رغم انها مكالمه يمكن ماتعني شي
صار يمشي بالغرفه رايح جاي رايح جاي .. قطع افكاره صوت فتح الباب وكانت ام فهد
فهد : هلا يمه رجعتي ؟
ام فهد : ايه توني قبل 5 دقايق
فهد : يمه ترا ابوي شكله مره معصب ياليت تخففين طلعاتج خصوصا انه توه جاي من السفر
ام فهد : ليش هو شكا لك
فهد : ابوي تدرين انه لايمكن يشكي لعياله ثاني شي انا مستغرب تصرفات ابوي في هالفتره كان على طول يعصب وكلمته فوق كل شيء واذا قال لا لا بس الي مستغرب منه الحين انه ماكان يمنعك مثل قبل .. وراه شي مثلا
ام فهد : شتقصد
فهد : ها لا ولاشي بس اقول لازم تخففين من روحاتج وجياتج
ام فهد : خلاص ابوك صار عنده عادي المهم ماعلينا انا جايه ابي اكلمك في موضوع
فهد : خير يمه
ام فهد : انت من بعد ماتزوجت حنان وانت ابد ماجبت طاري الزواج ليش يمه ماتفكر في الزواج ابد ؟
فهد : لا قبل هالفتره لا بس الحين احيانا اقول بفتح الموضوع معاج واحيانا اتراجع
انبسطت ام فهد : فرحتيني ياولدي يعني تبينا ندور لك ؟
فهد : الي تشوفينه يمه
ام فهد : في بنت منزمان حاطه عيني عليها .. جمال ومال وحسن ودلال
فهد : كل الي قلتيه مايهمني اهم شي عندي الاخلاق وابيها تكون مطيعه وهاديه هذا المواصفات الي اتمناها
ام فهد : فيها هالبنت كل الموصفات الي تبيها
فهد : شكلج مجهزه كل شي وبس تنتظرين مني اشاره
ام فهد : أي والله يافهد فاهمني
فهد : خلاص بس اتمنى يمه ماتستعجلين في الاختيار
ام فهد : يوه قلت لك منزمان حاطه عيني عليها وانا اكيد مابختار لك أي بنت
فهد : خلاص الي تشوفينه .. بس ماقلتي لي من بنته ؟
ام فهد : بنت ام رائد اسمها منال
فهد : منال بنت ام رائد اوكي
ام فهد : بروح ابشر ابوك
ضحك فهد على حماس امه
راحت ام فهد للمكتب وماشافت ابو فهد وراحت الغرفه ولقته نايم ( خلاص اكلمه بعدين )
-----------------
كان فهد يفكر بس هالمره في موضوع الزواج ( مو كأني استعجلت شوي .. وانا بصراحه ما اثق في اختيار امي بس هذه امي ماراح تختار لي أي بنت .. بس احسن شي اسويه اني اسال غنا اكيد تعرفها )
-------------
رجعت غنا من السوق ومعاها ساره ولما دخلوا شافوا ام فهد جالسه بالصاله
غنا : هلا يمه
ام فهد : رجعتي .. شريتي الي قلت لج عليه
غنا (ليش مهتمه للدرجه هذه) : أي يمه
ساره : هلا خالتي ام فهد
ام فهد من غير نفس : هلا فيج شلونج؟ وشلون امج
ساره : الحمدلله خالتي .. الحمدلله تسلم عليج
ام فهد : الله يسلمك ويسلمها
غنا : عن اذنج يمه بروح غرفتي مع ساره
ام فهد : لا انا ابي اكلمج بموضوع خلي ساره تروح وبعدين الحقيها
غنا : ان شاء الله يمه .. ساره روحي انتي غرفتي وانا بجي بعد شوي
-----------
صعدت ساره فوق وهي مضيعه الغرفه وبالغلط فتحت مكتب فهد وفهد بالصدفه كان بيطلع وصاروا *** اوف *** ارتبكوا الاثنين وكل واحد مو عارف يتصرف
فهد : ااااسف .. ودخل غرفته وسند راسه على الباب " فهد اول مره تصير معاه مثل هالحركه "
ساره منحرجه و تتحلطم : الله يهداج ياغنا شوفي شسويتي فيني الحين شنو بيقول عني .. اخاف يقول اني تعمدت . اف اف اف من كل قلبي
وراحت غرفة غنا بعد جهد جهيد في تذكر غرفتها
------------------
غنا : خير يمه
ام فهد : اكيد انتي تسألين ليش ابيج تشترين ملابس جديده ووتتانقين صح ؟
غنا : بصراحه ايه
ام فهد : انتي الحين ياغنا كبرتي وصرتي بسن حلو للزواج
تفاجئت غنا وانصدمت : لا يمه انا توني صغيره تو الناس وما افكر في الشي هذا ابد
ام فهد : ياغنا احنا ماراح ندوم لج انتي تدرين اني انا مشغوله وماعندي وقت لج .. وفهد بيتزوج وهم يوسف واحمد يفكر يكمل دراسته برا وعمج كل يومين مسافر .. وانتي الحين كبرتي ولازم في من يهتم فيج في كل النواحي
دمعت عيون غنا : بس يمه عذرا على هالكلمه بس كل الي قلتيه ماله معنى انا عارفه ان هذه الاشيا بتصير بس الوضع مابيتغير وكل البيوت كذا اكبر مل صاحبتي ساره ماعندها اخوان وابوها على طول مسافر وامها مريضه وهم عايشه حياتها بأحلى مايكون من غير ماتتزوج
ام فهد : بس عمج كثير شايل همج
قامت تبكي اكثر : ليش يمه كذا فجأه
ام فهد : ومن قال فجأه انا قلت بس بتخلصين ثانوي بنزوجج بصراحه مو مستعده اتحمل اكثر دايما عمج يصرخ علي بسبب قل اهتمامي فيج وانا مو ملزومه
غنا : اكيد مو ملزومه بس انا مالي غيركم وربي يشهد علي اني اشوفج في مقام امي واكثر بعد
ام فهد : انا اسفه ماشوفج بمقام بنتي .. وهذا الي عندي بكرا بيجون صديقاتي ابيج تكونين احلى مايكون ولا راح تشوفين الي مايسرج
قامت غنا بدون ماتتكلم ودموعها اربع اربع
---------------
وقبل ماتدخل غرفتها مسحت دموعها وحاولت تتمالك نفسها
ساره : غنا ياشينه كذا تسوين فيني
غنا : ليش ؟
ساره : مادري منو دخلت غرفته
ضحكت غنا : جد سوري والله .. بس منو دخلتي غرفته
ساره : وليش شالفرق
غنا بأسلوب مرح مصطنع : انا اقولج ليش لا لو دخلتي غرفة يوسف بيعصب وبيشيل الدنيا شيب وبعدين يمكن يحس ان الي داخله غرفته وحده مايعرفها .. اما احمد فهو ممكن يحرجج لان ماعنده .. اما فهد فهو بيعتذر ومابيتكلم فأي واحد منهم
ضحكت ساره : لا عارفتهم بعد .. مايخصج منو انا لحالي بموت من الحرج
غنا : ياليت احمد عشان تنحرجين اكثر ..
ساره : لا اجل مو احمد
غنا: اجل يوسف صرخ عليج مو
ساره : لا لا ابد
غنا : مافي غيره اكيد فهد
ساره : سكتي بس لاتزيديني
غنا : المهم ماعلينا شرايج نشغل فلم على البروجكتر ؟
ساره : عندج بروجكتر
غنا: ايه ابوي عارفني اموت على الافلام فقال لي بخصص لج جزء من غرفتج للبروجكتر تشغلين افلام على كيف كيفج
ساره : ياي وناسه
غنا : أي فلم
ساره : أي شي اهم شي رعب
غنا : اوكي من عيوني
-----------------
فهد بينه وبين نفسه ( البنت الي شفتها قبل شوي منو هي .. اووه وانا شكو ليش اسأل .. بس البنت هذه . لالا خلاص يافهد انت اليوم صاير عندك يوم التفكير العالمي )
-------------
احمد : مليت من النت بروح اجلس مع غنا او بخليها تشغل لي فلم في غرفتها وناسه ..
بس اول شي بروح اسوي فشار عشان احس اني في سينما عن حق وحقيقه لان ولله الحمد مافي سينما هنا <<< مصدق نفسه الاخ
بعد ماسوى الفشار وحرق نصه توجه لغرفة غنا دق الباب وماحد رد عليه حط اذنه على الباب وسمع صوت فلم ..فتح الباب وفجأه كانت لقطة مخيفه
وساره حست ان في احد فتح الباب فتخبت تحت البطانيه
احمد : سوري مادري ان في احد في الغرفه .. وبعدين ياخبله اذا انتي خايفه غمضي عيونج مو تتخبين تحت البطانيه بيطلع لج الجني من تحت البطانيه
ساره ميته خوف وفي نفس الوقت فطست من الضحك على كلمة احمد
غنا : احمد يانذل اطلع ماتشوف ان في احد
احمد : مايصير اشوف الفلم معاكم
غنا تضحك وهي متوجهه للباب بتقفله : صج انك نذل وتستغل ابشع المواقف عشان تحرج الي قدامك
احمد : هههههه ماصير احمد .. طيب ماقلتي ادخل
غنا : روح روح لا اذبحك
احمد : اف منج ونا الي مسوي فشار وراز ***ج مالت عليج
سحبت غنا الفشار : مشكور حماده على الفشار " ودخلت وقفلت الباب"
احمد (وربي نذاله اوريج ان مارديتها لج ماكون احمد )
يوسف : شفيك تتحلطم
احمد : ولا شي بس ودي اشوف فلم مع احد ومافي احد يحب الافلام الا غنا وغنا معاها وحده خبله
ضحك يوسف : طيب انا بشوف معاك فلم
احمد : غريبه شصاير
يوسف : خلاص غيرت رايي
احمد : لا لا تغير رايك ماصدقنا على الله
------------------
في اليوم الثاني
كان بو فهد صاحي الصبح وجاته مكالمه ضروريه من برا ولازم يسافر
اخذ اغراضه وترك ورقه لام فهد وصادف فهد في طريقه لان فهد كان بالمطبخ يسوي له نسكافيه
فهد : خير يبه شفيك مستعجل ؟
بوفهد : انا مظطر اسافر عندي شغله ضروريه
فهد : الحين ؟
بو فهد : أي بعدين اقولك
ومن العجله طاح البوك بدون مايحس
كان البوك مفتوح وطاحت عين فهد على صورة طفل صغير بس ما امداه يفتحه او يدقق
فهد : يبه يبه البوك
ارتبك بوفهد : وسحب البوك
فهد : يبه ماتبيني اوصلك
بو فهد ك لا مايحتاج انا قلت لسواق وهو برا ينتظرني يلا مع السلامة
طلع بو فهد وترك وراه الف استفهام في راس فهد " منو هذا بعد ؟!! ليش يبه كل هالاسرار وراك شو مخبي علينا ومنو الحرمه الي كنت تكلمها "
من الطفل الي شافه فهد .. وشنو السر ورا بو فهد .. شنو مصير غنا بعد خطط ام فهد
تابعوني في الفصل الجاي
اتمنى تعجبكم
قراءة ممتعه
#6